Sut gallwn ni gysylltu cymunedau ac ymwelwyr ar hyd Llwybr Arfordir Cymru?Crynodeb o’r problemau a ddatryswyd gan y Timau Pow Wows yn Abertawe a Bangor, ynghyd â chwe chyfweliad ffôn.7 Chwefror Abertawe ac 8 Chwefror Bangor

Cefnogir her GeoVation gan:

Tîm Pow Wow Abertawe

Tîm Pow Wow Bangor

Crynodeb

2 broblem i’r timau Pow Wow

6 chyfweliad ffôn

32 o bobl wedi ymgysylltu

178 o broblemau cychwynnol

9 thema

54 mewnwelediad.

1. Adnoddau i bawb2. Cyfleoedd i fusnesau3. Ymrwymiad cymunedol 4. Gwybodaeth hygyrch5. Seilwaith6. Cyllid a gwneud polisïau7. Cynllunio8. Marchnata, cyfathrebu a brandio9. Daearyddiaeth a’r amgylchedd

Gofynnom ni:

“Beth sy’n rhwystro mwy o bobl rhag defnyddio Llwybr Arfordir Cymru?”

1. Adnoddau i bawb

Problemau allweddol cysylltiedig â darparu adnoddau addas ar hyd llwybr yr arfordir sy’n cwrdd ag anghenion pawb.

# 1. Cyfleusterau cyfleus

Sut gallwn ni ddarparu digon o luniaeth a thai bach ar hyd y llwybr er mwyn sicrhau nad oes cyfaddawdu o ran cyfforddusrwydd pobl?

Mae angen i bobl gynllunio’u teithiau yn ofalus, yn enwedig os oes rhaid ystyried pobl eraill, er enghraifft plant a phobl hŷn. Mae cynnig adnoddau addas yn gwneud gwahaniaeth mawr i’r profiad.

# 2. Picnics ym mhob tywydd

Sut gallwn ni ddarparu adnoddau picnic i bobl, heb orfod poeni am y tywydd?

Pan nad oes adnoddau picnic ar gael: ar y gorau, mae pobl un ai’n eistedd yn eu ceir neu’n ceisio cysgodi o dan ymbarel; ar y gwaethaf, mae pobl yn gadael.

# 3. Nid wyf yn gallu parcio

Sut gallwn ni wneud hi’n fwy cyfleus i bobl barcio?

Mae gallu parcio yn agos at lwybr yr arfordir yn bwysig iawn i bobl wrth geisio sicrhau bod eu hymweliad mor hawdd a hwylus â phosibl.

# 4. Punnoedd ar gyfer parcio

Sut gallwn ni ddarparu strategaeth cost parcio cyson ar hyd Llwybr Arfordir Cymru?

Mae costau parcio’n amrywio o 50c i £3.50 yr awr. Yn y llefydd drutaf, mae pobl yn tueddu parcio tu allan i’r maes parcio er mwyn osgoi talu, ac mae hynny’n gallu achosi tagfeydd.

# 5. Gweithio o 9 i 5

Sut gallwn ni unioni amser agor adnoddau gyda’r tymhorau?

Mewn rhai ardaloedd ar hyd Llwybr Arfordir Cymru mae tai bach a chaffis yn cau gyda’r nos yn ystod yr haf, er bod nifer o bobl yn parhau i fwynhau’r llwybr gyda’r nos.

# 6. Profiad bratiog

Sut gallwn ni gyfuno’r holl brofiadau mae cwsmeriaid yn eu cael ar hyd Llwybr Arfordir Cymru?

Mae profiadau gorau’r cwsmeriaid yn deillio o bob cyswllt maen nhw’n ei gael ar hyd y llwybr (y bobl maen nhw’n cwrdd â nhw, gwybodaeth maen nhw’n ei gael, offer maen nhw’n ei ddefnyddio) yn cydweithio’n llyfn.

# 7. Llety cyraeddadwy

Sut gall cwsmeriaid ddod o hyd i lety addas mewn ardaloedd lle mae’r dewis yn gyfyngedig neu lle nad yw’r llety sydd ar gael yn cael ei hysbysebu?

Bydd perchnogion gwestai a lleoliadau gwely a brecwast yn colli allan ar incwm posibl, sef eu cyfran nhw o’r 9.6 miliwn o ymwelwyr dros nos i Gymru, a wariodd hyd at £1.8 biliwn yn 2010.

Wales.gov.uk (http://bit.ly/ztoki6)

2. Cyfleoedd i fusnesau

Problemau allweddol cysylltiedig â dechrau, datblygu a chynnal busnesau ar hyd Llwybr Arfordir Cymru, 365 diwrnod y flwyddyn.

# 1. Beth yw’r manteision i mi?

Sut gallwn ni gyflwyno achos cryf i fusnesau o Gymru i fuddsoddi yn eu hunain er mwyn cymryd mantais o lwybr yr arfordir?

Er mwyn i unrhyw fusnes un ai ddechrau a/neu dyfu, mae angen tystiolaeth gref o enillion ar fuddsoddiad o lwybr yr arfordir.

# 2. Canfod cyfleoedd ar gyfer tyfiant

Sut gallwn ni sbarduno tyfiant ymysg busnesau lleol o ystyried y problemau go iawn sydd angen eu datrys?

Ym mhedwaredd chwarter 2011, roedd y sector teithio a thwristiaeth yng Nghymru’n wynebu twf o 56% o ran problemau ariannol penodol o gymharu â pedwaredd chwarter 2004. Begbies Traynor’s Red Flag Alert (http://bit.ly/z744TE)

# 3. Pa botensial?

Sut gall busnesau ddeall y nifer o ymwelwyr posibl yn well?

Yn 2010, denodd Cymru 890,000 o ymwelwyr rhyngwladol a wariodd £333 miliwn, ond un ai nid yw’r wybodaeth hon wedi’i deall gan nifer o bobl neu nid yw wedi cael ei rhoi mewn cyd-destun i fusnesau lleol allu cymryd mantais o’r sefyllfa. Twristiaeth yng Nghymru, Llywodraeth Cymru (http://bit.ly/ztoki6)

# 4. Mae’r tymor yn rhy fyr

Sut gall Llwybr Arfordir Cymru ddatblygu i fod yn gyrchfan atyniadol tu allan i’r prif dymor?

Ar hyn o bryd, mae’r tymor twristiaeth yn rhedeg rhwng mis Mawrth a mis Hydref gydag anterth o dri mis yn y canol. Mae hynny’n cynnig y cyfle i ased o ansawdd yng Nghymru elwa’n llawn trwy gydol y flwyddyn.

# 5. Cynnal busnes nad yw’n cyrraedd anterth

Sut gallwn ni greu, datblygu a chynnal busnesau sy’n gwneud elw trwy gydol y flwyddyn?

Ar hyn o bryd, nid yw nifer o’r busnesau cyfredol yn gallu gwneud bywoliaeth gydol y flwyddyn trwy ddibynnu’n unig ar ymwelwyr i’r llwybr.

# 6. Gweithgareddau i bob tymor

Sut gallwn ni ddatblygu gweithgareddau a rhoi rheswm i bobl defnyddio’r llwybr tu allan i’r tymor arferol?

Mae angen amrywiaeth o resymau cymhellol i ymweld â’r llwybr, beth bynnag yw’r tymor.

3. Ymrwymiad cymunedol

Problemau allweddol cysylltiedig ag ymrwymo cymunedau a sicrhau busnes i Lwybr Arfordir Cymru.

# 1. Llwybr i dwristiaid yn unig yw e.

Sut gallwn ni wneud mwy ar ran cymunedau lleol er mwyn iddynt gefnogi a defnyddio’r llwybr?

Er mwyn i Lwybr Arfordir Cymru fod yn gynaliadwy trwy gydol y flwyddyn, mae angen i gymunedau lleol deimlo cysylltiad ag ef.

# 2. Llwybr i oedolion yn unig yw e.

Sut gallwn ni ymrwymo a grymuso plant i ddefnyddio, dangos mwy o ddiddordeb a bod yn falch o Lwybr Arfordir Cymru?

Mae tystiolaeth yn dangos mai anogaeth yn ystod blynyddoedd cynnar plentyn yw’r ffordd fwyaf effeithiol o wella ei gyfleoedd, torri’r cylchoedd sy’n gallu bodoli ym mywydau rhai o’r plant mwyaf difreintiedig ac agored i niwed, a rhoi cyfle iddynt dyfu, llwyddo a chyflawni.

Cynllun Gweithredu Ymrwymo Ieuenctid a Chyflogaeth 2011 – 2015, Llywodraeth Cymru (http://bit.ly/ADgvtc)

# 3. Mae cerdded yn ddiflas…

Sut gallwn annog pobl leol a thwristiaid sydd heb unrhyw ddiddordeb i gerdded y llwybr?

Mae rhai pobl o’r farn bod cerdded yn ddiflas ac mae gwell ganddynt wneud rhywbeth arall gyda’u hamser.

# 4. Bom-amser gordewdra

Sut gallwn ddenu mwy o bobl i gymryd sylw o’u hiechyd trwy gerdded?

Mae 57% o oedolion Cymru, 22% o fechgyn 13 oed ac 16% o ferched yn cael eu cyfrif un ai’n rhy drwm neu’n ordew. Erbyn 2019, bydd 85% o oedolion a phlant Cymru yn ordew.

Wales Online (http://bit.ly/2xyKyj)

# 5. Neges fawr mewn pwll dŵr bach

Sut gall cyfathrebu gael effaith mor fawr ar lefel leol, fel digwyddodd yn llwyddiannus ar lefel ryngwladol?

Yn ôl rhifyn goreuon 2012 cylchgrawn Lonely Planet, Llwybr Arfordir Cymru yw rhanbarth gorau’r blaned. Beth yw’r neges i bobl leol sy’n codi o’r ffaith hon?

Lonely Planet (http://bit.ly/tKiNBo)

4. Gwybodaeth hygyrch

Problemau allweddol cysylltiedig â gwybodaeth a mynediad digidol at Lwybr Arfordir Cymru.

# 1. Dim signal

Sut gallwn ni sicrhau bod defnyddwyr apps a’r rhyngrwyd yn gallu cael mynediad band llydan, wi-fi a 3G 100% ym mhob lleoliad ar hyd y llwybr?

Mae pobl yn dibynnu fwyfwy ar eu ffonau symudol o ran cael mynediad at wybodaeth. Bellach, mae yna 1.2 biliwn o ddefnyddwyr rhyngrwyd symudol ac mae un o bob archwiliad gwe yn cael ei wneud o ffôn symudol.

Mobithinking.com (http://bit.ly/a2f9uO)

# 2. Oes yna app ar gyfer hynny?

Sut gall apps wella’r profiad cysylltiedig â Llwybr Arfordir Cymru?

I nifer o bobl, mae apps yn rhan allweddol o fywyd. Mae dros 300,000 o apps ar gyfer ffonau symudol wedi’u datblygu yn ystod y dair blynedd diwethaf. Mae cwmni Apple yn unig wedi gweld yn agos at 25 biliwn o’i apps yn cael eu lawrlwytho.

Mobithinking.com (http://bit.ly/a2f9uO)

# 3. Technolegau yn cydweithio

Sut gallwn ni sicrhau bod amrywiaeth o dechnolegau sydd eisoes yn bodoli a thechnolegau newydd yn cydweithio’n ddi-dor ar hyd y llwybr?

Mae defnyddwyr y llwybr eisiau cael profiad cyfun a bydd hynny’n cael ei ddifetha os nad oes modd iddynt gael mynediad at wahanol dechnolegau ar hyd y llwybr.

# 4. Dim syrpreisys annisgwyl

Sut gallwn ni ddarparu gwybodaeth hygyrch i helpu pobl i drefnu eu teithiau cerdded yn seiliedig ar eu hanghenion, medrau a disgwyliadau?

Mae pobl yn hoffi trefnu gyda sicrwydd o flaen llaw ac felly mae angen cwrdd â’u hanghenion penodol.

# 5. Data lleol cywir

Sut gallwn ni ymrwymo pobl leol i helpu i ddiweddaru a gwella gwybodaeth cysylltiedig â Llwybr Arfordir Cymru?

Mae pobl leol yn gwybod ffeithiau penodol am yr ardal maen nhw’n byw ynddi (e.e. hanes lleol, atyniadau, adnoddau) – ffeithiau nad ydynt yn gyffredin i bawb neu sydd efallai yn anghywir os ydynt ar gronfa ddata.

# 6. Gwybodaeth i bawb

Sut gallwn ni arddangos a rhannu gwybodaeth mewn ffordd effeithiol gydag amrywiaeth eang o gynulleidfaoedd gydag anghenion amrywiol gan ddefnyddio hysbysfyrddau cyfyng o ran eu maint?

Daeth 890,000 o ymwelwyr rhyngwladol i Gymru yn 2010, gan wario £333 miliwn. Mae galw am wybodaeth mewn ieithoedd gwahanol, ond does dim digon o le ar yr arwyddion i gynnwys gwybodaeth i gwrdd ag anghenion pawb.

Wales.gov.uk (http://bit.ly/ztoki6)

# 7. Prinder gwybodaeth

Sut gallwn ni sicrhau bod pobl yn cael yr holl wybodaeth sydd ei hangen arnynt er mwyn gwneud penderfyniadau fydd o bosibl yn arwain atynt yn dewis ymweld â llwybr yr arfordir?

Gall bwlch mewn gwybodaeth arwain at ymwelwyr yn dewis un ardal dros ardal arall, ac arwain at effaith economaidd negyddol.

# 8. O’r ffordd i’r llwybr

Sut gallwn ni sicrhau bod arwyddion o’r ffyrdd i’r llwybr yn cynnwys yr holl wybodaeth berthnasol ynghylch mynediad?

Mae pobl yn defnyddio amrywiaeth o ddulliau teithio i gyrraedd Llwybr Arfordir Cymru ac mae angen cael arwyddion eglur sy’n hysbysu ymwelwyr os yw’r rhan benodol hon o’r llwybr yn addas ar eu cyfer ai peidio.

# 9. Arwyddion 100%

Sut gallwn ni sicrhau bod rhwydwaith arwyddion 100% ar hyd 870 milltir Llwybr Arfordir Cymru?

Os yw’r arwyddion yn anghyson ac o ansawdd gwael, mae pobl yn llai tebygol o ddarganfod ardaloedd newydd i’w harchwilio, sy’n effeithio ar fusnesau lleol yn ogystal â llwyddiant cyffredinol y llwybr.

5. Seilwaith

Problemau allweddol cysylltiedig â’r seiliwaith teithio a lletyau ar hyd Llwybr Arfordir Cymru.

# 1. Ansawdd y llwybrau mynediad

Sut gallwn ni sicrhau bod rhwydwaith o ffyrdd mynediad a meysydd parcio o ansawdd uchel i’r rheiny sy’n teithio i lwybr yr arfordir mewn car?

Os nad oes modd i bobl gyrraedd llwybr yr arfordir yn hawdd, ni fyddant yn ei ddefnyddio.

# 2. Manteisio ar ein llwyddiant

Sut gallwn ni sicrhau dyfodol Llwybr Arfordir Cymru er mwyn sicrhau bod rhinwedd y llwybr yn cynyddu yn unol â llwyddiant y llwybr, heb danseilio’r profiad i ymwelwyr?

Bydd llwyddiant yn arwain at ddenu mwy o ymwelwyr, a fydd yn ei dro yn golygu: llwybrau prysurach, mwy o ysbwriel, mwy o faw ci, mwy o ddamweiniau, mwy o straen ar adnoddau lleol megis tai bach a chaffis, ac erydu’r llwybr yn y pen draw.

# 3. Allan o gyrraedd

Sut gallwn ni ddarparu system trafnidiaeth gyhoeddus gyfun ledled Llwybr Arfordir Cymru?

Nid oes gan bawb fynediad at gar, felly bydd rhaid iddynt ddibynnu ar drafnidiaeth gyhoeddus i ymweld â lleoliadau ar hyd y llwybr.

# 4. Costau cyson ac isel

Sut gallwn ni ddarparu trafnidiaeth a llety fforddiadwy i gwrdd ag anghenion ariannol pawb?

Bydd costau yn rhwystro pobl rhag ynmweld â llwybr yr arfordir os ydynt yn cael eu hystyried yn rhy ddrud.

# 5. Cerddwyr a beicwyr

Sut gall cerddwyr a beicwyr ddefnyddio’r llwybr heb lesteirio’u gilydd?

Gall beicwyr gael effaith negyddol ar brofiadau cerddwyr, fel arall bydd beicwyr yn chwilio am lwybrau gwahanol os yw llwybr yr arfordir yn orlawn.

# 6. Celfi ar hyd y llwybr

Sut mae modd cynnal a chadw’r celfi ar hyd y llwybr, er enghraifft meinciau a mynedfeydd?

Gall celfi pydredig neu ansafonol achosi damweiniau ac effeithio ar iechyd a diogelwch defnyddwyr. Mae enghreifftiau sydd wedi’u cofnodi yn cynnwys camfeydd a chlwydi colledig neu wedi’u torri, pontydd wedi’u difrodi ac arwyddion colledig neu wedi’u torri.

Ramblers Cymru (http://bit.ly/y9eT5s)

# 7. Mynediad perthnasol

Sut gall mynedfeydd perthnasol i’r llwybr fod yn fwy hygyrch i bobl sydd ag anghenion mynediad arbennig?

Bydd “rhai rhannau o’r llwybr yn addas i bobl ag anableddau, teuluoedd gyda phramiau, marchogion ceffylau a beicwyr”, ond mae angen i bobl wybod ble.

Llywodraeth Cymru (http://bit.ly/xhsiQy)

# 8. Yn addas i bawb?

Sut gall llwybr yr arfordir wasanaethu amrywiaeth o anghenion a gofynion defnyddwyr: ydyn ni’n gwybod beth ydyn nhw?

Heb ddealltwriaeth eglur o bawb fydd eisiau defnyddio’r llwybr, mae’n bosibl datblygu atebion na fydd yn cwrdd ag anghenion y defnyddwyr.

6. Ariannu a chreu polisïau

Problemau allweddol cysylltiedig â chreu polisïau ac ariannu Llwybr Arfordir Cymru

# 1. Bom-amser ariannu

Sut gallwn ddatblygu a magu partneriaethau i ddod o hyd a sicrhau cymorth ariannol ar gyfer cynhaliaeth a datblygiad hirdymor y llwybr?

Ar ôl i’r £3.9 miliwn gael ei wario i gwblhau Llwybr Arfordir Cymru yn 2012, rydym yn disgwyl gweld 100,000 o ymwelwyr/defnyddwyr pellach a fydd yn arwain at angen parhaus am gymorth ariannol ar gyfer gwaith cynnal a chadw.

Llywodraeth Cymru (http://bit.ly/yosGgk)

# 2. Newid safbwyntiau’r gwrthwynebwyr

Sut gallwn newid safbwyntiau’r bobl sy’n gwrthwynebu’r llwybr?

Mae’r gofynion cyllido’n gostwng os yw cymunedau lleol yn chwarae rôl gyfranogol o ran gwaith cynnal a chadw y llwybr a’r ardal leol.

Arfordir Sir Benfro (http://bit.ly/yPP3VM)

# 3. Polisïau gwrthgyferbyniol

Sut gall un awdurdod lleol ar bymtheg a dau barc cenedlaethol gyd-drefnu a chyflawni amcanion polisïau gwahanol?

Gall blaenoriaethau gwahanol (e.g. llifogydd arfordiriol a materion gwledig a diwydiannol) arwain at anghysondebau o ran cynlluniau ariannu.

# 4. Buddsoddi amser ac arian

Sut gall buddsoddi mewn gwaith cynnal a chadw’r llwybr arwain at greu uchafswm refeniw?

Yn ne-orllewin Cymru mae Llwybr Cenedlaethol Arfordir Sir Benfro yn creu £52 am bod £1 sy’n cael ei gwario ar waith cynnal a chadw. Mae angen model cynaliadwy hirdymor ar Lwybr Arfordir Cymru er mwyn sicrhau polisïau a datblygiad cadarnhaol.

Ramblers (http://bit.ly/AB64Ph)

7. Cynllunio

Problemau allweddol cysylltiedig â threfnu ymweliad â Llwybr Arfordir Cymru

# 1. Teithiau cerdded wedi’u teilwra’n arbennig

Sut gall pobl drefnu teithiau cerdded yn seiliedig ar allu, anawsterau, hyd ac amser?

Gall hwyluso’r broses drefnu a gwybod faint o amser bydd y daith gerdded yn cymryd, ynghyd â rhyw syniad o ba mor anodd yw’r daith, gynyddu defnydd dyddiol ac ail-ymweliadau ymysg cerddwyr.

# 2. Cerdded y ci

Sut gall cerddwyr cŵn a’u teuluoedd wneud y defnydd gorau o’r llwybr o gofio bod cŵn yn cael eu gwahardd o’r traethau rhwng mis Mai a mis Medi?

Gall dieithrio pobl leol ac ymwelwyr gael effaith negyddol ar yr economi e.e. “ni fydda i’n mynd ar wyliau i Gymru eto oherwydd bod cŵn yn cael eu gwahardd o’r traethau”.

BBC News (http://bbc.in/zfUduA)

# 3. Ymwelwyr newydd i lwybr yr arfordir

Sut gall cerddwyr newydd fod yn hyderus eu bod yn meddu ar yr holl wybodaeth ddaearyddol sydd ei hangen arnynt i gwblhau’r daith gerdded maen nhw wedi’i dewis?

Bydd sicrhau mai Llwybr Arfordir Cymru yw prif ddewis y rheiny sy’n mynd ar wyliau cerdded neu daith diwrnod am y tro cyntaf yn canfod marchnad newydd ac yn arwain at fusnes ailadroddol.

8. Marchnata, cyfathrebu a brandio

Problemau allweddol cysylltiedig â chyfathrebu’r neges gywir trwy’r sianeli cywir

# 1. Nid llwybr yn unig

Sut mae’r llwybr yn hwyluso gweithgareddau eraill i grwpiau demograffig gwahanol, er enghraifft ffotograffiaeth, ysgrifennu, chwaraeon dŵr a gwylio adar?

Nid cerdded yw prif ddiddordeb pob un sy’n bwriadu ymweld â’r llwybr, ac mae modd cynyddu nifer yr ymwelwyr trwy sicrhau bod croeso i grwpiau demograffig gwahanol.Pecyn Cyfryngau Llwybr Arfordir Cymru (http://bit.ly/wuAENq)

# 2. Adrodd Straeon

Sut gall straeon cysylltiedig â llwybr yr arfordir gael eu hadrodd a’u hailadrodd mewn ffordd ystyrlon?

Mae straeon da yn gallu ysbrydoli pobl. Mae yna nifer o straeon i’w hadrodd, yn amrywio o straeon cysylltiedig â’r llwybr ei hun i chwedlau o ardaloedd cyfagos.

Walking Stories (http://bit.ly/x1Troj)

# 3. Perchnogaeth

Sut gall pob uno Gymru fod yn rhanddeiliad o lwybr yr arfordir?

Os caiff y llwybr ei ystyried fel “ein llwybr, llwybr Cymru a llwybr y gymuned”, gall hynny arwain at y llwybr yn cael ei ystyried yn yr un ffordd â Wal Hadrian neu Wal Fawr Tsieina.

# 4. Beth yw llwybr yr arfordir?

Sut gall poblogaeth Cymru ddarganfod llwybr yr arfordir?

Mae tystiolaeth anecdotaidd yn awgrymu nad yw rhan helaeth o boblogaeth Cymru yn ymwybodol o lwybr yr arfordir.

# 5. Hyrwyddo’r llwybr

Sut mae modd sicrhau addewidion marchnata a hyrwyddo ar ôl i bobl brofi llwybr yr arfodir eu hunain?

Os yw profiad ymwelwyr o lwybr yr arfordir yn wahanol i’r ymgyrch farchnata, mae’n bosibl torri addewid y brand e.e. mae’n bosibl y bydd cymunedau o deithwyr sy’n gwrthwynebu’r llwybr yn achosi bylchau yn y gylchdaith gyflawn o amgylch yr arfordir.

Newyddion y BBC (http://bbc.in/vPs38D)

# 6. Cyfuno i greu profiad cynhwysfawr

Sut mae modd sicrhau cysondeb o ran ansawdd pob rhan o’r llwybr, a chynnig pwynt gwerthu unigryw i ddenu ymwelwyr?

Bydd nodweddion a phwyntiau gwerthu unigryw yn cyfuno i greu profiad cynhwysfawr. Nododd cylchgrawn Lonely Planet y bywyd gwyllt, mannau syrffio ardderchog, cestyll a lleoliadau bythgofiadwy megis Bae Barafundle a Thyddewi.

# 7. Cylchdeithiau diddorol

Sut mae modd cynnwys y cylchdeithiau cerdded/beicio sy’n arwain at lefydd o ddiddordeb oddi ar y llwybr?

Mae’r cylchdeithiau yn ychwanegu rhywbeth ychwanegol at brofiad Llwybr Arfordir Cymru, gan gynnig cyfle i bobl ymweld â mannau o ddiddordeb eithriadol, er enghraifft Caer Mynydd Tre’r Ceiri.

Newyddion y BBC (http://bbc.in/9V6kBD)

# 8. Mynedfeydd anhysbys

Sut mae modd gwneud mynedfeydd anhysbys mae pobl leol yn ymwybodol ohonynt yn fwy amlwg?

Mewn mannau penodol mae yna rai lleoliadau anghysbell gyda mynedfeydd sy’n anodd dod o hyd iddynt ond sy’n werth eu gweld i ymwelwyr.

Llwybr Arfordir Ceredigion (http://bit.ly/xntP5E)

9. Daearyddiaeth a’r Amgylchedd

Problemau allweddol cysylltiedig â daearyddiaeth, yr hinsawdd a’r amgylchedd leol

# 1. Glaw neu hindda

Sut gallwn gymryd mantais o’r fath ddywediadau â “does dim y fath beth â thywydd gwael, dim ond y dillad anghywir” er mwyn sicrhau bod y tywydd yn ased i lwybr yr arfordir?

Gyda gwell gwybodaeth am y tywydd ar gael i bawb, mae’r posibilrwydd o dywydd gwael yn fwy o ataliad na’r tywydd gwael ei hun.

Hinsawdd Cymru (http://bit.ly/kQ1ZIS)

# 2. Darnau diflas

Sut gallwn hyrwyddo mannau llai hygyrch a deniadol llwybr yr arfordir, er enghraifft ardaloedd diwydiannol, mewn ffordd gadarnhaol?

Nid yw pob rhan o llwybr yr arfordir yn ddeniadol ac felly mae’n bwysig ein bod yn rheoli disgwyliadau yn effeithiol er mwyn osgoi profiadau negyddol ymysg ymwelwyr.

# 3. Gwastraff

Sut gallwn reoli gwastraff, sbwriel a baw cŵn wrth i nifer y defnyddwyr gynyddu?

Bydd llwybr brwnt yn arwain at brofiadau gwael. Bydd annog cerdded cyfrifol ar hyd y llwybr yn lleihau gwastraff, sbwriel a baw cŵn.

Cyngor Gwynedd(http://bit.ly/opMudA)

# 4. Llwybr traed cyson

Sut gall llwybr yr arfordir gynnig profiad cerdded cyson i ddefnyddwyr?

Mae’n bosibl y bydd llwybr troed anghyson yn atal defnyddwyr os yw’r llwybr yn newid o fod yn llwybr o ansawdd uchel i lwybr brwnt sy’n anodd cerdded arno.