ANG BULAG NA MUSIKERO

Dulang Pampelikula

Page 2 of 72

BLACK SCREEN

LUNA (V.O.)

Ang mata ay parang lens ng kamera. Ang

nakikita ng unang layer nito ay kabaligtaran

ng tunay na imahe. Pagdating ng mensahe ng

optic nerves sa utak, saka lamang naitatama

ang imaheng ito.

FADE IN:

SEQ1. INT. MALL – TANGHALI - ESTABLISHING

Hitik sa tao ang mall. Parang mga bubuyog na nagkukuyog sa mga

nakabalandrang sale items.

Mapapangiti ang isang batang babae, si LUNA, 13. Dadaanan lang niya ang

mga items na naka-sale hanggang makarating sa isang travel agency.

Titingnan niya ang mga posters ng Paris, New York at Tokyo na nakapaskil sa

salamin. Ididikit niya ang mukha sa salamin upang makita ang pangyayari sa

loob ng agency. Magmamarka ang hininga niya sa salamin.

Page 3 of 72

Sa loob ng travel agency, mapapansin siya ng isang ahente. Papaalisin siya.

May customer na lalabas ng pinto bitbit ang ilang promo flyers. May

dalawang flyers na mahuhulog sa sahig. Pupulutin ito ni LUNA.

May maririnig siyang tugtugan. Aalis si LUNA at pupuntahan ang pinangga-

galingan ng musika.

SFX: GUITAR MUSIC

SEQ2. INT. FOOD COURT NG MALL - TANGHALI

Sisiksik si LUNA sa mga usisero hanggang makarating sa harapan. Isang

blind rondalla ang tumutugtog.

Kabisado ni LUNA ang lyrics kaya’t mapapasabay din siya sa pagkanta.

Pagkatapos ng performance, lalapit si LUNA kay SER, 74.

LUNA

Lolo, kain na po tayo.

Page 4 of 72

SER

Luna, kangina pa kita pinapahanap.

Saan ka ba nagsusu-suot? Kumakalam na

ang sikmura ko. Hanapin mo na si Blessie

at gutom na ako.

Lalapit si BLESSIE, 45, na may dalang mga supot ng pananghalian. Isa-isa

niya itong ilalagay sa kandungan ng mga bulag.

BLESSIE

O, eto ang pananghalian.

(Inis)

Tsk. Wala pang laman ang donation box, a.

Sabado pa naman at may sale.

Titingnan ni BLESSIE ang mga bulag na tahimik na nakaupo sa kanyang

harapan. Babaling ang tingin niya sa isang miyembro na nakaupo sa may

likuran ng grupo.

Page 5 of 72

BLESSIE (CONT’D)

Maia, alisin mo muna ‘yang salamin

mo at itali mo ang buhok mo. Dito

ka na sa harap umupo.

Tatayo si MAIA, 23, mula sa likuran at marahang lalakad sa harap gamit ang

mahabang patpat. Uupo siya sa harapan ng grupo. Aayusin muna niya ang

mahabang buhok bago alisin ang malapad at itim na salamin.

Lalantad ang mga lubog na talukap ng kanyang mga mata at ang lapnos at

kulubot na balat sa mukha.

Iiling at magbu-buntong hininga si SER. Tatawagin niya si LUNA.

SER

Luna, kuhanin mo yung jacket ko at nilalamig ako.

LUNA

Opo, Lolo.

Page 6 of 72

Kukuhanin ni LUNA ang jacket ng lolo at isusuot kay SER. Sa laki ng jacket at

sa patpating hubog ng katawan ni SER, magmumukhang naka-hanger ang

jacket sa balikat niya.

Sa background, makikitang nag-uusap ang ibang rondalla members.

Abala si LUNA sa pag-aasikaso sa lolo niya. Bubuksan ni LUNA ang supot ng

kanin at ulam at tutulungang kumain ang lolo. Titingnan lang ni LUNA ang

donation box.

May maghuhulog ng piso.

SEQ3. INT. MALL – LOTTO KIOSK – GABI

Mahaba ang pila sa tayaan ng lotto.

Sa may harapan ng pila, nag-uusap ang mag-lolo. Sasabihin ni SER ang anim

na numero na gusto niya at mabilis na mamarkahan ni LUNA ang hawak na

tiket.

SER

Otso, katorse, beinte-tres, trenta, kuwarenta’y

singko, kuwarenta’y siyete. Nakuha mo ba lahat?

Page 7 of 72

LUNA

(pabulong na bibilang)

Opo, Lolo. Ito na ‘yun! Mananalo na tayo! Naku,

‘pag nanalo po tayo, mapapagamot ko na kayo!

Makakakita na kayo ulit!

SER

Shh.. huwag ka masyadong maingay.

Mamalasin tayo niyan, e.

LUNA

(di makikinig)

Tapos papasyal po tayo sa malayong lugar!

Sasakay tayo ng eroplano!

Lilingon ang matandang babaeng nakapila sa harapan ni LUNA.

BABAE

Sana nga at magdilang anghel ka.

Uusad ang pila.

Page 8 of 72

SER

Eh paano tayo mananalo n’yan kung salita ka

nang salita? Pwede ba, itaya mo na.

Ibibigay ni LUNA ang Mega Lotto tiket at ang bayad sa babaeng nasa kiosk.

SEQ4. EXT. KALSADA – GABI

Naglalakad pauwi si SER at si LUNA. Madilim na ang paligid. Makakakita

si LUNA ng mga bituin at mahuhuli ito sa paglalakad.

SER

Luna? Luna?

LUNA

Po? Andyan na po, lolo.

Hahabol si LUNA kay SER. May ilalabas na plastic bag si SER.

SER

May nakikita ka bang basurahan?

Page 9 of 72

LUNA

Andito po sa may kanan ninyo.

Sisimulan ni LUNA halukayin ang basurahan gamit ang walking stick ni SER.

Tahimik na maghihintay si SER habang nilalagay ni LUNA ang mga

nakuhang plastic at bote sa plastic bag.

Uubo ng malakas si SER.

LUNA

Ok na po.

SER

O, bakit ang bilis naman? Tapos na? May pera

sa basura, Luna. Tandaan mo ‘yang mabuti.

Huwag na huwag mo ikakahiya ‘yan.

LUNA

‘Lo, alam ko naman po ‘yon.

Pero pagod na po kayo at gabing-gabi

na. Umuwi na po tayo at inuubo na kayo.

Page 10 of 72

SER

Ituloy mo lang ‘yan, Luna.

Sayang din ‘yan.

Titingin sa paligid si LUNA. Manlalaki ang kanyang mga mata.

LUNA Ayun pa! Sa may labas ng restaurant! Sandali

lang, ‘lo, at kukuhanin ko.

Matiyagang pupulutin ni LUNA ang mga basyo. Babalik siya kay SER bitbit

ang nagkikiskisang mga basyo sa plastic bag. Maglalakad silang muli.

Magpapatuloy ang paghahanap ng mga boteng pwede ibenta.

SEQ5. EXT/INT. BAHAY NI SER SA SQUATTER’S AREA – GABI

Bababa ng tricycle si LUNA. Aalalayan niya si SER sa paglabas nito sa

sasakyan.

May mga tambay na nag-iinuman at nagtatawanan sa kanto.

Aakayin ni LUNA si SER sa makipot na iskinita.

Page 11 of 72

LUNA

Lo, kailan po tayo pupunta sa Baguio?

SER

Tayo? Hindi pa nga ako nakapag-desisyon

kung isasama kita.

LUNA

Pero ‘lo, di pa ako nakakalabas ng

Maynila tsaka sino ang mag-aalaga sa inyo?

SER

Aba, sa tingin mo ba’y hindi ko kayang mag-isa

ng ilang araw? Hindi pa ako tuluyang bulag,

Luna. May mga naaaninag pa akong anino.

(beat)

Kakanta lang naman kami doon sa kasalan ng

kamag-anak ni Blessie tapos uuwi na. Hindi na

kami lilibot pa. Wala naman kaming makikita!

Aba, di hamak na mas maganda ang Baguio sa

aking imahinasyon!

Page 12 of 72

Uubo si SER at hahagurin ni LUNA ang likuran nito.

LUNA

Maganda po ba dun? May magandang

tulay ba dun? Parang yung nakita

kong larawan dun sa travel agency,

Golden Gate Bridge po ‘ata yun?

Titigil sa paglalakad si SER.

SER

Ano ba ‘yang pinagsasabi mo? Wala

‘ata sa Pilipinas ‘yan?

LUNA

Sa San Francisco po. Sa Amerika.

Maglalakad muli si SER.

SER

Sa Baguio, may paliku-likong daan…

malamig at sariwa ang simoy ng hangin,

Page 13 of 72

may mga punong matataas. Walang

gintong tulay…

(mahinang boses)

Mararating nila ang pinto ng munting bahay. Papasok na si SER habang si

LUNA naman ay titingin sa mga kumikislap na bituin.

SEQ6. INT. BAHAY NI SER SA SQUATTER’S AREA – GABI

Tutulungan ni LUNA si SER na magpunas at magpalit ng damit. Pagod at

mainit na ang ulo ni SER habang inaayusan siya ng apo. Hihiga at matutulog

na ito.

Kukuhanin ni LUNA sa isang bag ang mga nakuha niyang mga papel sa

travel agency na may nakasulat na SPECIAL PACKAGE TOURS.

Titingnan niya ang mga larawan – mga makukulay na templo at namumuting

bundok ng Japan - hanggang unti-unti siyang makakatulog.

Sa may tabi ng higaan ni LUNA, makikita sa pader ang nakapaskil na mga

flyers na may mga larawan ng kilalang tourist spots sa ibang bansa.

Page 14 of 72

BLACK SCREEN

LUNA (V.O.)

Ang mga mata ay may kakayahang

sumala ng tubig. Kapag hindi gumana ito,

magkakaroon ng pressure sa optic nerve.

Hindi mararamdaman ang mabagal at

patuloy na pagkasira ng mata.

SEQ7. INT. LIGHT RAIL TRANSIT STATION – CARD ISSUANCE AREA - UMAGA

Close-up sa mga mata ni SER na may katarata. Naka-upo na ang ibang

rondalla members.

Ilalabas ni BLESSIE ang donation box pero bago niya ilagay ito sa harapan ay

maghuhulog muna siya ng kaunting barya.

Inaasikaso ni LUNA si SER. Maingat na ilalabas ni LUNA ang gitara sa itim

na lalagyan nito at ipapatong niya ang instrumento sa nakabukas na mga

palad ni SER.

Makikinig si LUNA sa pag-uusap ng dalawang miyembro ng blind rondalla --

sina NOG, 30, at MAIA.

Page 15 of 72

NOG

Ang ganda mo naman ngayon, Maia.

Lalo kang gumaganda sa pagdaan ng

mga araw.

MAIA

Naku, lubayan mo nga ako, Nog.

Di ka lang pala bulag, bolero ka pa.

Matatawa si NOG. Parang bumbilyang umilaw ang mga ngipin nito sa kutis

niyang maitim. Sa kanyang kandungan, hawak na niya ang hugis peras na

piccolo bandurya.

Ilalapat niya ang mga daliri sa kwerdas at tutugtog siya ng isang harana.

Uulit-ulitin niya ang pangalan ni MAIA.

NOG

O Maia… O Maia… Sa gabing madilim,

sa gabing madilim… wangis mo’y bituin sa

langit… O, Maia…

Page 16 of 72

LUNA (V.O.)

Si Kuya Nog. Anak ng isang itim na Amerikanong

sundalo at pinay. Pinabayaan na lamang daw

siya nang malaman ng mga magulang niya ang

kapansanan niya.

MONTAGE

1. Mabubulabog ang mga madreng nakaluhod at mataimtim na

nagdarasal. Didilat ang kanilang mga mata. Magugulat sa iyak ng bata.

SFX: IYAK NG BATA

2. Umiiyak ang isang maitim na batang uhugin na nakataas ang mga

kamay na parang may inaabot sa langit.

END OF MONTAGE

Ididiin ni MAIA ang mga daliri sa kwerdas ng gitara at magpa-praktis ng

ilang chords.

Page 17 of 72

LUNA (V.O. CONT’D)

Si Ate Maia. Nanilbihan siya bilang katulong sa

isang retired na pulis. Nagustuhan siya at

pinagtangkahan ng masama. Nang tanggihan

siya ni Ate Maia isang gabing lasing ito,

binuhusan siya ng kumukulong tubig sa

mukha.

MONTAGE

1. Babaeng natutulog.

2. Isang lasing na lalaki ang lalapit sa kanya at magsisisigaw.

3. Bubuhusan ng kumukulong tubig sa mukha si MAIA.

4. Tatawa ang lalaki.

END OF MONTAGE

Maglalabas ng gusgusing kuting si ADOR, 40, sa kanyang belt bag.

Ngingiyaw ang kuting.

Page 18 of 72

ADOR

Hello, kamusta ka na? Nainitan

ka ba sa loob?

Hihipan ni ADOR ang balahibo ng maliit na kuting.

ADOR (CONT’D)

O ayan! Aircon!

BLESSIE

Hoy, Ador, ano na naman ‘yan? Saan mo naman

napulot ‘yan?

Tatakpan ni ADOR ang dalawang tenga ng kuting.

BLESSIE (CONT’D)

Naku… tsk! Pwede ba magpasok ng hayop dito sa

LRT? Ang dumi-dumi!

ADOR

It’s Adora, not Ador. Ay, pabayaan

mo nga ako sa mga alaga ko. E, sino

Page 19 of 72

pa mag-aalaga nito?

Kawawa ka naman, di ba, Piolo?

NOG / MAIA

Piolo?!

(tatawa)

Panggigigilan ni ADOR ang kuting.

LUNA (V.O. CONT’D)

Si Kuya Ador. Dala daw ng maselan na

impeksiyon sa mata ang pagkabulag niya. Isang

araw, pagkagising niya, wala na ang kinakasama

niya. Iniwan na siya.

MONTAGE

1. Mag-isa sa kama si ADOR, umiiyak.

2. Mag-isa din siyang kumakain.

3. May pusa na iikot sa kanyang binti. Kukuhanin niya ito at yayakapin.

END OF MONTAGE

Page 20 of 72

Patuloy ang paghahanda ng rondalla.

CUT TO:

Close-up sa isang bakanteng upuan na may nakapatong na octavina.

LUNA (V.O. CONT’D)

Meron pang isang miyembro ng rondalla, si Kuya

Pip. May mga tumor daw ang kanyang mga mata

kaya siya nabulag. Magaling siya kumanta. Nang

malaman niya na may kanser siya, hindi natinag

ang kanyang pagnanasang mag-perform. Sa tingin

ko, pumanaw siya na payapa ang kalooban. Alam

ko na kumakanta na siya ngayon sa langit.

O.S. - Pumanaw si PIP na kasama ang mga kaibigan. Nakangiti ito sa huling

sandali ng kanyang paghinga.

CUT TO:

Nagpe-perform na ang blind rondalla. Isang inspirational na kanta.

Gaya ng nakagawian, gagala si LUNA.

Page 21 of 72

MONTAGE:

1. Mga food stalls sa LRT

2. Mga tao na nakapila sa ticket booth

3. Mga tao na gumagamit ng ticket vending machine

4. Guard na nag-i-inspect ng mga bag.

5. Sa overpass, nakatingin si Luna sa langit. May dadaan na eroplano.

Masisilaw siya sa sinag ng araw.

SFX: TUNOG NG EROPLANO

END OF MONTAGE

SEQ8. EXT. OVERPASS – HAPON

Dadaan si BLESSIE. May mga bitbit ito na plastic bags. Makikita niya si

LUNA na pinapanood ang mga kotseng dumadaan.

BLESSIE

O, Luna, andyan ka pala. Tulungan mo nga ako

dito sa mga pinamili ko.

Page 22 of 72

LUNA

Opo, Tita Blessie. Ano po ba ang mga ito?

Kukuhanin ni LUNA ang ilang plastic bags sa kamay ni BLESSIE. Ipapahid ni

BLESSIE ang sleeve ng blusa niya sa namuong pawis sa noo.

BLESSIE

Bumili ako ng mga magkaka-parehong kulay na

polo at blouse dyan sa may ukay-ukay. Para

naman may ternong damit ang grupo.

Ilalabas ni BLESSIE ang isang blouse sa supot at ipapagpag sa harapan ni

LUNA. Babahing si BLESSIE sa alikabok.

BLESSIE (CONT’D)

Tingnan mo, maganda di ba? Ang tingkad pa ng

pagka-green. Ipapa-silk-screen ko na lang ang

“BLESSINGS FOR D’BLIND RONDALLA ”

dito sa may harapan…

Page 23 of 72

LUNA (V.O.)

Si Tita Blessie. Siya ang nagbuo ng grupo. May

tatlo pa siyang grupo ng mga blind rondalla.

Dati siyang music teacher. Ngayon, ibinubuhos

na lang niya ang oras niya bilang manager ng

mga blind rondalla. Di naman kalakihan ang

kita. Basta’t tuwing may tugtog kami,

may P200 si lolo.

BLESSIE

Ano, Luna? Napag-isipan mo na ba yung

pinag-usapan natin nung isang araw?

LUNA

Di ko pa po nasasabi kay Lolo, e.

BLESSIE

E para din naman sa kanya yun, Luna.

Mapapagamot mo na siya. Ayaw mo ba siya

bigyan ng pagkakataong makakitang muli? Hindi

lang ‘yun. Makakapag-aral ka. Uunlad kayo ng

konti.

Page 24 of 72

LUNA

Ako po ang unang matutuwa para kay lolo kung

makakakita siyang muli. Huwag kayo mag-alala,

pag-iisipan ko po, Tita.

Mauunang maglakad si LUNA kay BLESSIE. Hahabol si BLESSIE sa may

likuran nito.

BLESSIE

O baka naman natatakot ka? Sa buhay, kailangan

lang ng lakas ng loob paminsan-minsan.

(beat)

Teka, etong papel. Andyan nakasulat yung

pangalan ng tatawagan natin kung nakapag-

desisyon ka na.

Hihinto sa paglalakad si LUNA at aabutin ang dilaw na papel.

Ipapasok niya ito sa bulsa ng palda niya.

Page 25 of 72

SEQ9. INT. AIRPORT DEPARTURE AREA – DUTY FREE EXPRESS UMAGA

Masaya si LUNA. Nasa loob sila ng airport. Ang mga bulag ay naka-

uniporme ng mint green na pang-itaas. Tumutugtog na ang blind rondalla at

magka-duet si SER at MAIA.

Si LUNA ang nagpapamigay ng mga maliliit na envelope sa mga dumadaan

sa Duty Free.

May Amerikanong dadaan. Bibigyan siya ni LUNA ng envelope.

AMERIKANO

What’s this for?

LUNA

Ah, for blind? Ah, donation po?

Ituturo ni LUNA sa foreigner ang nakasulat sa envelope: “LOVE OFFERING

FOR BLIND RONDALLA”. Kukuhanin ng Amerikano ang envelope.

Papanoorin ng Amerikano ang grupo habang nakatitig naman si LUNA sa

kanya na bukas ang bibig at tila tulala sa mala-higanteng taas nito.

Sa wakas, kukuhanin ng Amerikano ang wallet sa bulsa at bubunot ng $5.00.

Page 26 of 72

AMERIKANO

Here you go, kid. Don’t spend it all at once, ok?

Lalakad paalis ang Amerikano. Susundan ng tingin ni LUNA ang papalayong

Amerikano. Mababaling ang tingin niya sa kakaibang hitsura ng pera na

hawak niya na may larawan ni Presidente Lincoln sa harap at Lincoln

Memorial sa likod. Ipapasok niya ito sa envelope at isusuksok sa donation

box.

Excited na lalapit siya kay SER pagkatapos ng kanta nito.

LUNA

‘Lo, may nagbigay po ng dollar sa atin! Five

dollars! Binigay po nung Kano.

SER

Hmph, walang kwenta. Dalawang daan lang ‘yan.

Huwag mo sayangin ang envelope. Sinabi nang

maghanap ka ng mga Arabo. Mas malaki iaabot

nun.

ADOR

Ay! Buwena mano! Nakita ba niya ako, Luna?

May hitsura ba?

Page 27 of 72

Maririnig sila ni BLESSIE. Si BLESSIE ay nakasuot din ng mint green na pang-

itaas.

May kliyente siyang minamasahe – isang matandang Intsik. Sa isa pang

upuan ay may nakapaskil na karatula: “MASSAGE SERVICE AVAILABLE”.

BLESSIE

Shh! Pwede ba, tama na ang harutan.

Magpaka-propesyunal tayo. Para parati

tayong makapunta dito.

(beat)

O, umaandar ang oras! Kantahin niyo na

yung medley.

Habang naghahanda ang mga bulag, maglalabas si LUNA ng ilang kwintas

ng sampaguita. Lalapit siya sa kinauupuan ni MAIA at isasabit niya ito sa

gitara. Maaamoy ito ni MAIA. Maririnig din niya ang mahinang tawa ni

LUNA.

MAIA

Sampaguita? Saan ‘to galing, Luna?

Page 28 of 72

LUNA

Pinapabigay po ni Kuya Nog.

(ngingiti)

Sa may likuran, walang kamalay-malay si NOG. Bahagyang mapapangiti si

MAIA. Mahahawi ang buhok niya at makikita ang mga parte ng mukha nito

na nalapnos ang balat.

Sisimulan na ni SER ang pagkanta ng isang makalumang kantang ingles.

LUNA (V.O.)

Si lolo. Severino Matias o “Ser” ang palayaw niya.

Dati kasi siyang nag-trabaho sa barangay bilang

isang katiwala ng barangay captain. Dahil malapit

siya sa barangay captain, “Ser” sa rin ang naging

tawag sa kanya. Nang matalo sa re-eleksiyon ang

barangay captain, pati siya ay nawalan ng trabaho.

SER

…I deed eet MY WAY!

Malayo na ang nalakad ni LUNA. Papanoorin niya ang mga tao sa paligid.

Page 29 of 72

MONTAGE:

1. Paalis na tao sa departure area. May Indian, Hapon, Amerikano.

2. Samu’t-saring emosyon – may umiiyak, may masaya, may deadma.

3. Sa may bintana, papanoorin ni LUNA ang eroplanong lilipad.

4. Lalapit kay LUNA ang security guard na may kasamang sniffing dog.

Babalik na si LUNA sa lugar ng mga bulag na musikero.

END OF MONTAGE

SEQ10. INT. AIRPORT DEPARTURE AREA – DUTY FREE EXPRESS – HAPON

Makikita si BLESSIE na may kausap na matandang lalaki. Magre-request ang

lalaki ng kanta at ituturo ang asawang nakatayo ilang metro ang layo sa

kanila. Bibigyan niya ng P500 si BLESSIE.

Walang atubiling pupuntahan ni BLESSIE si SER at bubulungan ito.

Si LUNA naman ay nasa isang tabi, naghihintay ng mga biyahero para abutan

ng envelope.

Page 30 of 72

BLESSIE

Ser, kantahin mo yung kundiman na WALANG

KUPAS. May nag-request. Anibersaryo daw

nilang mag-asawa at paborito nila itong kanta.

Tatango si SER at sasabihan ang mga ka-grupo. Sisimulan ni SER ang

pagtugtog sa gitara.

SER

Wala nang hahanapin pa,

Pagka’t pag-ibig mo’y walang kupas,

Pag-ibig na wagas.

Mahal, ako’y iyong-iyo --

Hihinto bigla si SER at uubo ng malakas. Itutuloy lang ni NOG, MAIA at

ADOR ang pagtugtog. Hindi titigil ang pag-ubo ni SER.

Lalapit si LUNA sa tabi niya at kukuha ng baong tubig sa bag. Habang

umiinom si SER ng tubig, si LUNA ang magpapatuloy ng kanta.

Sa simula ay mahina ang kanyang boses nguni’t pagkatapos ng isang linya ay

lalakas ang loob ni LUNA at magiging bigay-todo ang pagkanta niya.

Page 31 of 72

LUNA

… ako’y di lilisan sa tabi mo.

Pakinggan mo, aking awit,

pangakong hanggang langit.

Panginoon, ang tanging hiling,

Ikaw at ako’y magkapiling.

Papalakpak ang mag-asawa na nag-request ng kanta. Magpapahid ng luha

ang matandang babae. Nakangiti naman sina MAIA, NOG at ADOR.

May Hapon na maghuhulog ng yen sa donation box.

Samantala, hawak-hawak pa din ni SER ang kanyang dibdib at tila

nahihirapan ito sa paghinga. Hahagurin ni LUNA ang likuran ni SER. Bakas

sa mukha ni LUNA ang pagkabahala.

BLACK SCREEN

LUNA (V.O.)

Ano nga ba ang liwanag para sa isang bulag?

Alam lang nila ang init nito...

Page 32 of 72

SEQ11. EXT. BUS STOP - HAPON

M.O.S. / No Sound

Inaalalayan ni LUNA si SER pagbaba ng bus. Nakahawak sa dibdib si SER,

hirap sa paghinga. Malayo na ang nilalakad nila nang matumba si SER.

Inatake ito sa puso. Sisigaw si LUNA.

LUNA (V.O. CONT’D)

… o ang katahimikan nito.

May mga usiserong papalibot sa kanila.

SEQ12. INT/EXT. - CHARITY WARD NG OSPITAL – UMAGA

Dadating si BLESSIE sa ospital at makikita niya si Luna na tulala. Katabi niya

sa upuan ang nangungulilang gitara ni SER. Nasa harapan ni LUNA ang

isang nurse, hawak-hawak ang kanyang kamay. Paglapit ni BLESSIE, tatayo

ang nurse upang kausapin siya.

Page 33 of 72

CUT TO:

Hihilahin ni BLESSIE ang kamay ni LUNA papasok sa isang malamig at

tahimik na kuwarto. Sa harapan nila ay may isang katawan na nakasaklob ng

puting kumot. Isang attendant ng morgue ang mag-aalis ng kumot.

Makikita ni LUNA si SER. Sisigaw si LUNA at tatakbo palabas.

Hindi siya titigil ng pagtakbo at hindi rin siya lilingon sa pinanggalingan.

SEQ13. EXT. KALYE SA MAYNILA - UMAGA

Magpapalaboy sa kalsada si LUNA. Ayaw nito umuwi. Sa may overpass,

makikita siyang gusgusin at iyak ng iyak. Mariin niyang kinakagat ang

kanyang mga labi hangga’t dumugo ito.

May magbibigay sa kanya ng tinapay.

SEQ14. EXT. BAHAY NI BLESSIE SA SQUATTERS AREA - GABI

May lamay sa labas ng bahay ni BLESSIE. May mga taong nakaupo, may

nagdarasal, may umiinom ng kape. Pati mga tambay sa kanto ay

nakikiramay.

Makikita si LUNA ilang metro sa lamay, astang balisa at nag-aalinlangan.

Page 34 of 72

Dahan-dahan siyang lalapit sa isang puting kabaong. Simple lang ito at

walang anumang disenyo. Nakapatong sa kabaong ang larawan at gitara ni

SER.

Mapapalingon sa kanya ang mga taong nakikiramay. Makikita siya ni

BLESSIE.

BLESSIE

Luna!

Nakatingin pa din sa kabaong si LUNA.

BLESSIE (CONT’D)

Naku, ang pinakamurang kabaong ay eight

thousand. Ten thousand naman yung nitso pero

hanggang limang taon lang pwede gamitin. Sa

ospital naman, halos ten thousand din. Di ko

naman pwede pabayaan ang lolo mo. Nakautang

ako sa kapitbahay at may ibang nakuha sa abuloy.

Tumulong din yung mga taga-barangay at sina

Nog, Ador at Maia. Pa’no ba ‘yan, Luna? Siguro

dapat pumayag ka na dun sa pinag-usapan natin.

Ayoko naman mabaon sa utang…

Page 35 of 72

Tulala si LUNA. Sa may harapan, tatayo si MAIA at hahakbang palapit kay

LUNA gamit ang kanyang mahabang patpat. Aabutin niya si LUNA at

aakbayan niya ito.

LUNA

Hindi ko na po alam kung saan ako pupunta.

Hindi ko po alam kung nasaan ang mga magulang

ko. Iniwan lang po nila ako kay lolo. Ate Maia…

mag-isa na lang po ako.

(iiyak)

Hahawakan ni MAIA ang mukha ni LUNA. Makakapa niya ang mga luhang

pumapatak sa mga mata ni LUNA.

Ipupunas ni MAIA ang kanyang mga daliri.

MAIA

Luna, lahat tayo dumadaan sa pagsubok.

Masakit man na isipin na wala na ang lolo mo,

magpakatatag ka sana. Malaki ka na rin naman.

Page 36 of 72

BLESSIE

Tama, Luna. Hindi ka na bata. Mag-isip-isip

ka na.

Titingnan ni LUNA ang lolo sa loob ng kabaong.

Dadaloy na naman ang luha sa kanyang mga mata.

SEQ15. EXT. SEMENTERYO - TANGHALI

Sa libingan, ipinasok na sa loob ng 5-palapag na nitso ang kabaong ni SER.

Sa labas ng nitso, inilapat na ang lapida na may bagong pinta: “SEVERINO

MATIAS. R.I.P. DECEMBER 1, 1937 – MARCH 13, 2011”.

Titingin sa mga ulap si Luna. Nagbabanta ang ulan. Ipipikit niya ang

kanyang mga mata.

Sa may likuran, kumakanta si ADOR at naggi-gitara si NOG ng isang kilalang

kanta ng pamamaalam.

May tatawag kay LUNA, si BLESSIE.

Page 37 of 72

BLESSIE

(pabulong)

Pumunta ka sa bahay mamaya, Luna. Mag-usap

tayo. Mag-desisyon ka na.

Aatras si BLESSIE nang mapansin niya na may mga taong lumalapit kay

LUNA.

MAIA

Condolence, Luna.

IBANG BISITA

Nakikiramay kami…

Muling ipipikit ni LUNA ang kanyang mga mata.

SEQ16. INT. BAHAY NI SER SA SQUATTERS AREA - GABI

Nakatingin sa maliit na salamin si LUNA. Magulo ang kanyang buhok at

natatakpan ang kanyang mga mata. Iiyak ito at kukuha ng gunting.

Gugupitin niya ang mahabang buhok.

Page 38 of 72

Sa isang maliit na backpack, ilalagay ni LUNA ang ilang damit. Sa ilalim ng

kama ni SER, kukuhanin niya ang mga pera na nakatago doon – may P100,

P50, P20 at mga barya. Kukuhanin din niya ang mga larawan at flyers sa

pader, pati na ang lumang gitara ng kanyang lolo.

Matitigilan siya sa isang dilaw na papel.

Nakasulat dito ang pangalan ng ospital, telephone number nito at mga

salitang- “KIDNEY DONATION”.

INSERT – DILAW NA PAPEL

SEQ17. INT/EXT. BAHAY NI BLESSIE - GABI

Nakaupo sa may hapag-kainan si BLESSIE kasama ang pamilya niya.

Maliwanag sa loob at nagtatawanan ang pamilya.

Si LUNA ay nakatayo sa labas sa ilalim ng nagniningning na poste, nakatingin

lamang sa bahay ni BLESSIE. Bitbit niya ang bag at ang gitara ni SER.

Titingala upang tumingin sa may labas ng bintana si BLESSIE pero wala na

doon si LUNA.

Page 39 of 72

SEQ18. EXT. SEMENTERYO - GABI

Pupuntahan ni LUNA ang puntod ng Lolo. Uupo siya sa may harapan ng

pala-palapag na puntod at mahinang kakantahin ang kundiman na huling

kinanta ni SER.

LUNA

… ako’y di lilisan sa tabi mo.

Pakinggan mo, aking awit,

pangakong hanggang langit.

Ilang sandali pa ay makakatulog siya sa may damuhan malapit dito.

SEQ19A. INT. MALL - UMAGA

Nagse-set-up na ang “BLESSINGS FOR D’ BLIND RONDALLA”. Makikitang

apat pa din ang monoblock chairs. Sa harap nakaupo sina MAIA at NOG. Sa

may likuran naka-puwesto si ADOR at ang bakanteng upuan.

Lalapit si Luna sa kanila. Una niyang hahawakan sa kamay si Ador.

Page 40 of 72

ADOR

Luna? Ikaw nga ba?

NOG

Ha? Siya nga ba?

Yayakapin ni LUNA si MAIA.

MAIA

Oo, siya nga.

(natatawa)

Kamusta ka na? Nawala ka na naman.

Saan ka ba nagpunta?

LUNA

Dinadalaw ko po si lolo sa puntod niya. Madalas

po na ginagabi na ako ng pag-uwi sa may amin

para walang makakita sa akin.

(beat)

Nasaan na po si Tita Blessie?

Page 41 of 72

NOG

Umalis lang sandali. May inasikaso lang sa Admin.

Naku galit na galit si Blessie nung nawala ka bigla

pagkatapos ng libing.

Ilalabas ni ADOR ang puting daga na nasa loob ng kanyang bulsa at ipapakita

niya ito kay LUNA.

Tatakbo ang puting daga mula sa kamay ni ADOR hanggang makarating ito

sa balikat niya. Ngingiti si LUNA.

ADOR

Kulang pa daw yung abuloy na nakuha niya.

May twenty thousand pa daw na kailangang

bayaran.

LUNA

Kaya nga po ako nandito. Gusto ko po sabihin kay

Tita Blessie na nakapag-desisyon na po ako.

Page 42 of 72

MAIA

Anong desisyon ?

LUNA

Papayag na po ako dun sa pagbenta ng kidney.

Matitigilan sina MAIA, NOG at ADOR. Mahinahong magsasalita si MAIA.

MAIA

Luna, hindi ‘yan ang tamang paraan

para mabayaran mo si Blessie. Ang bata bata mo

pa para ma-operahan.

LUNA

Ate Maia, dapat dati ko pa ito ginawa. Napagamot

ko sana si lolo. Nakakita pa sana siya.

NOG

Huwag mo sisihin ang sarili mo, Luna. Tama si

Maia, huwag ka papayag.

Page 43 of 72

LUNA

Naiyak ko na po lahat ng maiiyak ko itong mga

nagdaang araw. Pero naisip ko na meron pa akong

pamilya – Kuya Nog, Kuya Ador, Ate Maia, kayo

na po ang pamilya ko. Gusto kong maging bahagi

pa din ng buhay ninyo saan man kayo magpunta

kaya’t gagawin ko kahit ano pa po ang ipagawa ni

Tita Blessie sa akin.

NOG

Pero hindi ito ang buhay na bagay sa iyo.

Nakakakita ka. Madami ka pang pwedeng gawin

sa buhay mo.

ADOR

Mangarap ka, Luna. Naghihintay ang madaming

posibilidad sa buhay mo.

NOG

Luna, kami man ay minsang pinilit ni Blessie na

ibenta ang bato namin.

Page 44 of 72

MAIA

Nog!

NOG

Maia, dapat makilala ni Luna ang totoong Blessie.

(kay Luna)

Kami man ay baon na sa utang kay Blessie pero

hindi kami pumayag sa gusto niya.

ADOR

Mapilit ‘yang si Blessie. Pero, ayoko talaga.

Simple man ang buhay ko, masaya naman ako.

NOG

Bulag nga ako pero hindi niya ako maiisahan.

Alam kong may mga nabiktima na siya. Mas

malaki pa ang nakukuha ni Blessie kaysa dun

sa nagsasakripisyo ng kanilang bato.

Mapapansin ni LUNA na walang kimi si MAIA.

Page 45 of 72

LUNA (KAY MAIA)

Ate Maia? Wala po akong pera na pambayad kay

Tita Blessie. Wala na rin po akong pambayad dun

sa tinitirhan namin ni lolo.

MAIA

Luna, masakit man sa akin na hindi ka makasama,

mas gugustuhin ko pa na lumayo ka na.

NOG

Huwag ka papayag na ibenta ang bato mo.

Buong-buo ka, Luna. May kinabukasan

pang naghihintay sa iyo.

MAIA

Alam ko na may plano si Ser para sa iyo. Hindi

sarili ang iniisip niya kundi ikaw! Wala na siyang

balak magpagamot. Ang balak lang niya ay

puntahan ang kakilala niyang madre sa Baguio

para itanong kung pwede ka manilbihan doon

kapalit ng pagpapatuloy ng pag-aaral mo.

Page 46 of 72

LUNA

May kakilala po si lolo sa Baguio?

MAIA

Oo. Pero ang gusto niya ay hanapin muna at

kausapin ang madre. Hindi niya muna sinabi sa

iyo kasi alam niyang hindi ka papayag na iwan

siya kahit na makabubuti ito sa iyo.

LUNA

May sinabi po ba siya na pangalan?

ADOR

Hindi niya sinabi sa amin kung sino, Luna. Pero

alam kong kaya mo hanapin yung madreng ‘yon.

(May kukuhanin sa bulsa)

Eto ang isandaang piso. Makakatulong ito sa iyo.

Mag-aabot din ng kaunting pera si MAIA at NOG.

Page 47 of 72

MAIA

Tandaan mo sana, Luna. Mahal ka namin. Parang

kapatid na ang turing ko sa iyo.

NOG ADOR

Sige na, Luna, habang Mag-iingat ka, Luna

wala pa dito si Blessie.

Tutugtog na ng bandurya si NOG. Babaling ang tingin ni LUNA sa isang

bakanteng upuan. Maaalala ni LUNA ang kanyang lolo.

FADE IN/ M.O.S. Si SER na kumakanta.

FADE OUT

SEQ19B. INT. MALL - UMAGA

Hindi pa man nakakaalis si LUNA ay mahuhuli na siya ni BLESSIE.

Page 48 of 72

Kakalabitin siya nito.

BLESSIE

Halika nga dito, bata ka.

(pupunta sa gilid)

LUNA

Tita BLESSIE, wala naman po akong balak

tumakas. Nandun lang po ako sa sementeryo.

BLESSIE

Hah? Baliw ka na ba? Anong ginawa mo doon?

Luna, patay na ang lolo mo!

LUNA

(iiyak)

Alam ko naman po ‘yun…

BLESSIE

Mamaya, tatawagan ko na si Mrs. Ismael.

Malala na daw yung anak niya at kailangan

na ng kidney transplant. Bukas na bukas,

Page 49 of 72

pupunta tayo sa ospital para makita kung

pwede kang donor. Kung di naman, madami

pa doon ang may kailangan ng kidney.

LUNA

Pero Tita Blessie…

(iiling)

BLESSIE

Walang nang pero, pero. Papaano na yung bente

mil na utang mo sa akin sa pagpapalibing sa lolo

mo?

LUNA

Baka pwede po na magtrabaho ako sa inyo.

Tutulong po ako. Kahit ano na po ang pagawa

niyo para lang po mabayaran yung utang.

BLESSIE

Naku, hindi ka pwede dito. Hindi kita

mapapakinabangan.

Page 50 of 72

LUNA

Tita Blessie, sige na po. Huwag lang po tayo

pumunta sa ospital.

BLESSIE

Luna, dalawa ang bato ng tao. Mabubuhay tayo

sa isa. Tsaka, makakatulong ka pa sa iba. Ayaw

mo ba kumita ng P35,000? Bale, fifteen sa iyo,

twenty sa akin. Ayaw mo pa ba ‘nun?

Susulyapan ni LUNA ang mga kaibigang bulag. Tumigil na sila sa pagkanta.

Magkahawak-kamay sina NOG at MAIA. Kapwa umiiling ito.

LUNA

(iiyak)

Ayoko po!

BLESSIE

Huwag ka mag-drama dito at madaming tao!

Basta’t pupunta tayo sa ospital bukas.

Page 51 of 72

Tatalikod si LUNA at akmang tatakbo. Hahablutin ni BLESSIE ang pang-itaas

ni LUNA. Biglang mapapansin ni BLESSIE ang mga tao na nakatingin na sa

kanila. Bibitiwan niya si LUNA. Aayusin ni LUNA ang nagusot na damit.

Sa huling pagkakataon ay titingnan niyang muli ang mga kaibigang bulag –

sina NOG, MAIA at ADOR. Nangungusap ang kanyang mga mata, isang

pamamaalam.

Lalakad si LUNA ng mabilis palayo sa grupo.

BLESSIE

Luna!

BLACK SCREEN

LUNA (V.O.)

Sa pamamagitan ng pandinig, pang-amoy at

sa tulong na din ng mahabang patpat, ang bulag

ay nakakarating sa kanyang patutunguhan.

Ang takot ay unti-unting napapalitan ng

kumpiyansa sa sarili.

Page 52 of 72

SEQ20. EXT. EDSA - UMAGA

Sa may hagdan ng overpass, makikitang nakaupo si LUNA at namamalimos.

Buhol-buhol ang trapik ng kotse, bus at jeep sa kalye. Maririnig ang mga

busina ng sasakyan.

Mapapansin niya ang mga vendors sa gitna ng kalye na nagbebenta ng tubig,

mani, at pahayagan sa mga drivers.

Pupunta si LUNA sa kalye at kakatok siya sa bintana ng mga kotseng

nakatigil sa trapik. Isang driver ang magbubukas ng bintana para mag-abot

ng barya.

Bago pa man makuha ni LUNA ang barya, may darating na isang babaeng

may karga-kargang sanggol.

BABAE

Hoy, teritoryo ko ‘to. Umalis ka dito kung ayaw

mo masaktan. Alis!

Matatakot si LUNA sa nanlilisik na mga mata ng babae. Maglalakad palayo si

LUNA.

CUT TO:

Page 53 of 72

Makikita si LUNA na tumitingin sa mga basurahan subali’t walang siyang

makukuhang basyo.

Makakakita siya ng bus na gagarahe sa istasyon. Ang bus ay may karatula na

“Baguio” na nakapaskil sa may harapan nito. Naalala niya ang sinabi ng lolo

niya tungkol sa Baguio.

SER (V.O.)

… may paliku-likong daan… malamig...

sariwang hangin… may matataas na puno…

SEQ21. EXT. BUS STATION - UMAGA

Papanoorin ni LUNA ang isang biyahero na bumibili ng tiket. Kukuhanin ng

lalaki ang tiket na iaabot sa kanya. Lalapitan siya ni LUNA.

LUNA (SA LALAKI)

Ito po ba ang bilihan ng tiket papuntang Baguio?

LALAKI

Ah, oo.

Page 54 of 72

LUNA

Magkano po ba ang pamasahe?

LALAKI

Kung ordinaryong bus, P445. Kung deluxe naman,

P715. Ayan o, walang nakapila, pwede ka na

bumili ng tiket.

Titingnan ni LUNA ang laman ng wallet niya at bibilangin ang pera.

Kukunot ang noo nito.

LALAKI

Abot ka pa sa biyahe ng alas-diyes.

(aalis)

Magbu-buntong-hininga si LUNA. Ibabalik niya ang wallet sa bag.

Babalik si LUNA sa kalye at may hahanapin na tindahan. Maglalakad siyang

patingin-tingin sa mga karatula.

Makakakita siya ng pawnshop. Papasok siya sa loob na hahaw-hawak ang

gitara ni SER.

Page 55 of 72

SEQ22. INT. PAWNSHOP - UMAGA

Lalapit si LUNA sa isang babae sa likod ng bakal na rehas.

LUNA

Ah… ate… ano po… gusto ko po itanong. Yung

gitara ko pwede po ba isangla?

BABAE

Akin na. Titingnan ko.

Aalisin ni LUNA ang gitara sa kanyang balikat. Dahan-dahan niyang iaabot

ito sa babae.

LUNA

Heto po.

Kakahawak pa lang ng gitara ay alam na kaagad ng babae na walang halaga

ito.

Page 56 of 72

BABAE

Hindi puwede ito. Mumurahin lang ito.

LUNA

Gitara po ito ng lolo ko. Maayos pa po ‘yan at

maganda ang tunog. Kahit P100 po?

Tatawa ng malakas ang babae sa likod ng rehas.

Ibabalik ng babae ang gitara kay LUNA. Malungkot na aalis si LUNA.

SEQ23A. EXT. KALSADA - TANGHALI

Susubukan muli ni LUNA na ibenta ang gitara sa isang lalaking nakaupo sa

gilid ng kalsada na may hawak na karatulang “BUMIBILI NG GINTO, PILAK,

OLD COINS, PAPEL DE AHENSYA AT RELOS”.

Papanoorin ni LUNA ang lalaki habang sinusubukan ang gitara. Aabutan

niya ng P50 si LUNA. Bakas sa mukha ni LUNA ang magkahalong lungkot at

panghihinayang nang iwan ang nag-iisang ala-ala ng yumaong lolo.

Page 57 of 72

SEQ23B. EXT. KALSADA – TANGHALI

Sa paglalakad ni LUNA, may makikita siyang bulag na namamalimos. Ma-

grasa ang hitsura nito. Iaalok ng bulag ang plastic cup sa mga dumadaan na

tao. Iiwasan ng mga tao ang pulubing bulag.

Mahahabag si LUNA at dali-dali niyang ilalabas ang wallet niya at

maghuhulog siya ng kaunting barya sa plastic cup.

Maririnig ng bulag ang kalansing ng barya. Ngingitian niya si LUNA.

BULAG

Salamat! God bless you!

SEQ24. EXT/INT. KARINDERYA - TANGHALI

Nakatingin si LUNA sa mga customer na kumakain. Gutom na gutom na

siya. Bubuksan niya ang wallet niya. Kukuha na siya ng P20 pero ibabalik

din niya ito sa wallet. May makikita siyang estudyante na tatayo sa upuan.

May tira pa itong kanin at ulam. Susunggaban niya ang pagkain sa iniwang

pinggan. Makikita siya ng tindera.

Page 58 of 72

TINDERA

Hoy, umalis ka diyan!

Hindi papansinin ni LUNA ang babae at patuloy siya sa pagsubo – dalawa,

tatlong beses.

Lalabas ang tindera sa counter at hahatakin niya ang pinggan kay LUNA.

Matatapon ang tirang laman nito sa mesa. Mabilis na dadamputin ni LUNA

ang natapon na ulam.

Mas lalong magagalit ang babae.

TINDERA

Aba ang kulit mo, a! Umalis ka sabi eh.

Iniistorbo mo mga customer ko!

Sa isang sulok ng karinderya, nakatingin ang isang lalaki, si PASTOR, 49.

Pinapanood niya ang kaguluhan. Hindi makakatiis at tatayo siya.

Page 59 of 72

PASTOR (SA TINDERA)

Aling Paring, tama na ‘yan!

(kay Luna)

Bata, halika dito…

Babaling ang tingin ng tindera (ALING PARING) kay PASTOR.

Titigil siya sa pagputak pero magdadabog naman sa may counter.

Lalapit si LUNA kay PASTOR. Malagkit ang tingin ni LUNA sa pansit na

nasa plato ni PASTOR.

PASTOR (CONT’D)

… anong nangyari dun sa labas?

LUNA

Kuya, gutom lang po ako talaga. Tinitipid ko lang

po kasi yung natitirang pera ko.

Page 60 of 72

PASTOR

Umupo ka dito. Ano ba pangalan mo?

LUNA

Luna po. Luna Matias.

PASTOR

Nasa’n mga magulang mo?

LUNA

Hindi ko po alam. Ang lolo ko na po ang

nagpalaki sa akin.

PASTOR

Asan na ang lolo mo?

Yuyuko si LUNA. Makikita niya ang hitsura ng kanyang mga mata sa

makintab na kutsara sa kanyang harapan. Para itong cartoon – mas malaki

ang kanang mata sa kaliwa.

Page 61 of 72

LUNA

Patay na po si lolo. Inatake po sa puso.

PASTOR

Ganun ba?

(malumanay)

Saan ang bahay mo?

LUNA

Umalis na po ako doon nung mamatay si lolo.

Wala na rin po akong pambayad dun.

PASTOR

Wala ka bang ibang mapupuntahan?

Sesenyasan ni PASTOR ang waitress. Lalapit ito.

PASTOR (CONT’D)

Ah, miss. Isa pang order ng pancit canton para

sa kanya. O, Luna, softdrink?

Page 62 of 72

LUNA

(mahihiya)

Tubig na lang po. Ah, maraming salamat po,

Kuya --

Aalis ang waitress.

PASTOR

Kuya Pastor ang itawag mo sa akin. Eh, saan ka na

ngayon? Ano balak mo?

LUNA

Gusto ko po sana pumunta sa Baguio.

PASTOR

Baguio? Ang layo ‘nun a. Ano meron ‘dun?

LUNA

May hinahanap po akong madre na kakilala ng

lolo ko. Sabi din ng lolo ko, maganda daw po

‘dun. Gusto ko po makita.

Page 63 of 72

PASTOR

O, malapit lang dito ang istasyon ng bus

papuntang Baguio! Naligaw ka ba?

LUNA

Hindi po, kuya. Naghahanap lang po ako ng

paraan para maka-ipon ng pera para sa pamasahe.

PASTOR

Magkano ang kailangan mo?

LUNA

Isandaan pa po ang kulang ko.

Tatahimik si PASTOR at pagmamasdan lang si LUNA.

PASTOR

May kamag-anak ka ba ‘dun?

Iiling lang si LUNA. Sa may counter, nanlilisik ang mga mata ng tindera.

Page 64 of 72

Padabog niyang ihahampas ang pambugaw ng langaw.

Lalabas ang kasama niyang waitress mula sa kusina na dala ang bagong order

ng pancit. Ihahain ng waitress ang plato. Maglalagay din siya ng baso at

pupunuin niya ito ng tubig.

Ganado sa pagkain si LUNA na gamit ang kutsara.

Aaliwin ni PASTOR si LUNA ng mga kuwento hanggang matapos siyang

kumain.

SEQ25. INT. KARINDERYA – TANGHALI

Makikigamit ng hugasan si LUNA. Mapapansin niya ang maliit na salamin

na nakapako sa pader.

Sisilipin niya ang kanyang hitsura sa salamin. Susuklayin niya ang buhok

gamit ang kanyang mga daliri.

Mapapatingin siya sa kanyang blouse. Babasain niya ang laylayan nito at pilit

na kukuskusin ang dumi.

Titingin siya ulit sa may salamin. Bahagyang naibsan ang lungkot sa kanyang

mga mata.

Pipilitin niyang ngumiti.

Page 65 of 72

SEQ26. EXT. SA MAY KANTO – MGA KALYE SA MAYNILA - HAPON

Susundan ni LUNA si PASTOR kung saan naka-parada ang motorsiklo nito.

Matitigilan si LUNA.

PASTOR

O, Luna, may problema ba?

LUNA

Kuya, di pa po ako nakakasakay ng motorsiklo.

PASTOR

Huwag ka mag-alala. May suot ka namang

helmet. Tsaka, maingat naman ako mag-maneho.

(beat)

Paano tayo makakapasyal n’yan kung hindi ka

sasakay?

Page 66 of 72

LUNA

Mabagal lang po?

PASTOR

Oo naman!

Sasakay si LUNA sa motorsiklo ni PASTOR. Ibibigay ni PASTOR ang helmet

kay LUNA. Kukuhanin ni PASTOR ang bag ni LUNA at itatali niya ito sa

manibela ng motorsiklo.

Pagsindi ng makina, kakapit ng mahigpit si LUNA kay PASTOR. I-re-rev up

ni PASTOR ang makina.

Pagkatapos ng ilang minuto, makikita sa mga mata ni LUNA ang tuwa sa

mabilis na takbo ng motor.

PASTOR

(sisigaw)

Ganito ang mga daan papuntang Baguio!

Sasadyain ni PASTOR na iliko-liko ang motorsiklo.

Mag-e-enjoy si LUNA sa mga pasikot-sikot na dadaanan nila.

Sisilip si PASTOR sa salamin at makikita niya ang masayang mga mata ni

LUNA. Ngingiti din si PASTOR.

Page 67 of 72

SEQ27. INT. KARNABAL – HAPON

Ituturo ni LUNA ang sasakyang eroplano sa karnabal. Gusto niyang sumakay

dito.

Bibili ng tiket si PASTOR at ibibigay niya sa kontroler. Pulang eroplano ang

pipiliin ni LUNA. Papasakayin ng kontroler si LUNA at ikakabit ang seatbelt.

Abot tenga ang ngiti ni LUNA.

Aandar na ang pambatang sasakyan at kakapit ng mahigpit si LUNA sa bakal

na manibela. Mapapatili sa tuwa si LUNA. Mapapansin niya ang mga batang

nakataas pa ang mga kamay habang nakasakay sa kanya-kanyang eroplano.

Titingin siya sa ibaba at kakaway kay PASTOR. Nakangiting kakaway din si

PASTOR.

Matatapos ang ride. Bubuksan ni LUNA ang maliit na pinto ng eroplano

kahit na naka-seatbelt pa siya. Magpupumiglas ito. Mabilis na lalapit ang

kontroler at aalisin ang seatbelt para makababa ng maayos si LUNA.

Tatakbo si LUNA kung saan naghihintay si SER. Humahangos na

ikukuwento ni LUNA ang naranasan niya.

Page 68 of 72

LUNA

Para akong lumilipad! Tataas… bababa…

tapos paikot-ikot! Muntik na nga po ako

mahilo, e! Ganun po pala sumakay ng

eroplano!

PASTOR

Kung pwede lang nga ako sumakay,

sasakay din ako.

(tatawa)

May iaabot na bote si PASTOR kay LUNA.

PASTOR (CONT’D)

O eto, inumin mo ‘tong juice.

Mukhang uhaw na uhaw ka na kasi.

Nakangiting kukuhanin ni LUNA ang bote. Iinumin ni LUNA ang pulang

inumin.

Page 69 of 72

SEQ28. INT. KUWARTO – GABI

Buhat-buhat ni PASTOR ang walang malay na si LUNA papasok sa isang

madilim na kuwarto. Ihihiga niya si LUNA sa kama. Aayusin niya ang

buhok nito.

May ilalabas siyang beer sa refrigerator at iinumin niya ito -- bottom’s up.

Pagkatapos ay titira siya ng shabu. Namumula na ang kanyang mga mata

habang pinagmamasdan ang nakahimlay na katawan ni LUNA.

Huhubarin ni PASTOR ang kanyang damit at hihiga sa itaas ni LUNA.

SEQ29. INT – KUWARTO – UMAGA

Magigising si LUNA na nag-iisa sa kuwarto. Gulo ang kanyang buhok at

wala siyang suot na damit. Unti-unti niyang mamamalayan ang nangyari sa

kanya. Makikita niya ang dugo sa kama. Sisigaw siya.

Hihiga si LUNA at iiyak. Sa may upuan malapit sa kama, pipilitin niyang

abutin ang bag niya. Nanginginig ang kanyang mga kamay. Kukuha siya ng

mga damit.

Page 70 of 72

Mapapansin niya na bukas ang zipper ng wallet niya. Malalaman niyang

wala nang laman ito. Ihahagis niya ang wallet.

Parang kinakapos siya sa paghinga.

Sa may harapan ng kama, makikita niya ang hitsura niya sa salamin. Tititigan

lang niya ang sarili habang patuloy ang pagdaloy ng mga luha sa kanyang

mga mata.

May mapapansin siya na mga basyo ng beer sa sahig. Aabutin niya ang isang

bote at babasagin niya ito sa pader. Hahawakan niya ang ulo ng basag na

bote.

Itutusok niya ang bubog sa kanyang mga mata.

Dadaloy ang dugo sa kama.

TIME LAPSE OF ONE YEAR

Page 71 of 72

BLACK SCREEN

LUNA (V.O.)

Sabi nila, mapalad pa daw ang mga bulag dahil

may mga bagay na hindi na nila kailangang

makita pa.

Ako si Luna.

SFX: GUITAR MUSIC

SEQ30. EXT – LUNETA – CONCERT AT THE PARK - UMAGA

Close-up sa mga mata. Sa likod ng mga talukap na bahagyang nakasara, wala

na ang mga mata ni LUNA.

Si LUNA ay nakaupo sa gitna ng isang malaking grupo ng mga bulag na

performers. Lahat sila ay naka-uniporme ng puti, may hawak na instrumento,

at maayos na nakahilera sa isang magarbong entablado.

Parang magandang huni ng ibon ang boses ni LUNA na masiglang nakiki-isa

sa tunog ng rondalla.

Page 72 of 72

ANNOUNCER (V.O.)

(off-mic)

Ladies and gentlemen, Ms. Luna Matias!

Sa kanyang harapan, makikitang pumapalakpak ang mga manonood. May

mag-aabot kay LUNA ng mga bulaklak.

BLACK SCREEN

LUNA (V.O. CONT’D)

Ako si Luna. Ako ay isang bulag.

-WAKAS-