Embed Size (px)
Citation preview
Ensera Anembiak
Tahun 4
1. Tekura Lenyau Akal
Nyadi sekali kenu bisi Tekura diau kediri – diri, seorang – orang ba tinting
munggu sigi. Nyau kepuas iya diau kediri nadai urang enggau begulai, enggau
berandau, dia iya berunding deka mindah ngagai menua bukai. Deka iya terebai
nadai ga sayap. Deka merau enda ga nemu berkayuh. Nya alai tusah ati mih
tudah Tekura, tusah diau kediri.
Seninjik hari siti, dia iya betemu enggau Itit dua iku. "Oh! Kini seduai tak
ngena gaya pejalai ?” Ku Tekura. ”Eh! Deka bejalai ngagai menua bukai kami
duai tu. Ngichaka diri tau bertemu enggau orang bukai. Enda nyamai bendar
kami duai tak diau kediri,” Ku saut Itit.
”Enti munyi nya, ngena bendar mih nya. Aku tu pen berunding deka
bejalai ngagai menua bukai. Tang aku tak nadai daya mindah. Sayap aku tu
nadai. Kaki enda penyai.” Ku Tekura.
Itit lalu nyaut iya. ”Nadai nya nusah nuan dih sambi. Enti nuan nyengala
amat deka mindah ari menua tu, kami duai ulih naban ke nuan terebai.”
”Au, nya keba manah, enti seduai nuan deka nabanka aku terebai. Tang
ni maya kitai angkat dih? ” ku Tekura nanya.
” Nadai nya anggur lama, ” ku Itit. ” Enti nitih ke aku tak pagila mih kitai
angkat.”
Nya alai hari siti sida pen lalu ngatur diri mindah ari menua nya. Atur sida
terebai baka tu. Nyadi Itit dua iku nya diasuh ngenggam lumpung Kayu ba puting
setak – setak. Tekura diasuh ngetup Kayu ba tengah – tengah. Kebuah ngasuh
iya ngetup Kayu, ngambi ke nyamai ditaban ke terebai.
Udah nya sida lalu angkat terebai. Peda tak kebap – kebap sayap Itit dua
iku nya terebai. Nyadi Tekura tak semina kating- kating ngetup lumpung Kayu.
Nadai utai ngenyamai nya iya ditaban ke Iti dua ikunya terebai. Nyau ke lama
sida terebai dia sida mansa rumah anak mensia. Tak enda mukai – mukai maya
nya anak mensia bisi malik ke langit lalu terpeda ke Tekura terebai.
” Apu! Nama nya tak Tekura terebai!” Ku anak mensia. ” Tentunya Raja
Tekura. Enti Tekura ngapa dini nemu terebai.”
Ninga jaku kelangkung anak mensia munyi nya, dia tudah Tekura tak
berasai besai mua. Ngambi bala anak mensia amat ngumbai iyanya tadi Raja
Tekura,” dia iya berunding deka madahka diri amat Raja Tekura.
Iya lalu bejaku. ” Amat aku tu mih Raja Tekura,” ku iya.
Tekala nya iya merangap ke mulut diri bejaku, iya lalu tebelengka ari
papung Kayu ke diketup iya nya tadi. Nama agi dih, lalu labuh ke baruh mih
tudah tuai, lalu redak mih iya temera ninggang gerugu batu galang.
Sayau bendar Raja Tekura nya labuh dih Apai,” pia ku anak mensia.
” Kemaya kitai kala ninga Tekura ngelulu ke diri terebai. Tekura Langkung
nya anak ditaban ke Itit terebai, ” ku Apai Anak Mensia.
Ukur pemanah : Anang kelalu ngelangkung(muji) diri empu
2. Chuik enggau Empitu
Dalam ensera tu kitai macha pasal Chuik seduai Empitu. Chuik nya bansa
jelu, lalu Empitunya bansa burung.
Burung Empitu nganga sarang iya tengah dandang umai Anak Mensia.
Jelu Chuik bersarang ba bandir Kayu ba tisau umai Anak Mensia. Chuik seduai
Empitu sama beranak mit.
Hari siti Chuik bejalai ke umai Anak Mensia. Iya bejalai ngiga pemakai ke
diempa anak iya. Pemuas iya ke bejalai sebelah umai, lalu tetemu ke sarang
burung Empitu. Indai seduai apai burung Empitu udah nyau turun, semuti anak
mit iya dua iku aja bisi tinggal ba sarang. Datai Chuik dia meda bisi pemakai
ditinggal ke indai Empitu ke anak iya.
Dia Chuik lalu berunding ku iya. ” Apai seduai indai Empitu nadai ditu.
Manah aku ngambi pemakainya, tekala seduai nadai meda.”
Chuik lalu naban ke pemakai nya pulai ngagai rumah iya empu ba bandir
Kayu di tisau serarai.
Udah nya ninga dih indai seduai apai Empitu ari seduai ke turun, ninga
anak seduai nyabak, rauh – rauh. Seduai lalu ngerumban pulai ke langkau. Datai
dia lalu nanya anak seduai.
”Nama nama utai disabakka seduai anak ?” Ku indai Empitu.
” Apai Chuik udah ngambi pemakai kitai, lalu nadai agi diempa kami duai
menyadi,” Ku saut Empitu.
”Ninga rita nya, apai seduai indai Empitu lalu mansang ngagai rumah
Chuik. Datai seduai din lalu nganu Chuik.
”Kati alai nuan enchuri pemakai anak aku ?” ku iya.
” Nadai aku ngenchuri pemakai anak nuan,” ku Chuik.
” Tentu nuan bisi ngenchuri pemakai anak aku, ” ku Empitu. ” anak aku
enda nyabak ngapa enti nadai kebuah.”
” Nadai aku ngambi pemakai anak nuan.. Anak nuan nyabak lapar
ditinggal ke nuan turun. Nuan ngemalu aku,” ku Chuik.
” Ukai ngemalu nuan, tang nuan tentu ngenchuri pemakai anak aku,” ku
Empitu.
” Nuan nyangke aku ngapa enda terang. Kemaya nuan meda aku
ngenchuri pemakai anak nuan? ” ku Chuik.
” Tentu nuan, anak aku meda nuan ngenchuri,” ku Empitu.
” Bula nuan!” ku Chuik. ” Nadai anak nuan meda aku. Aku nadai kala
bejalai ngagai rumah nuan.”
Nyau kalama sida ke bechakeh, angkat Empitu lalu nyamah Chuik. Apai
enggau indai Empitu belaban enggau apai enggau indai seduai Chuik. Laki
bejamah sama laki, bini berekek sama bini. Apus siang ganti malam, agi ga sida
belaya. Sida iya belaya sehari – hari nya, lalu ngerampit hari siti enda ngetu.
Anak nadai diintu enda diberi makai, nadai diibun. Sida empat nadai talah ke
pangan. Rebah sama belah rutan. Bediri sama degi – degi. Bibat sama rapat.
Bepalu ngena Kayu sama meleku. Babas baka ke udah ditebas bekau sida binas
– inas. Rumput baka ke udah dibabut. Anak raras abis patah kena teruju sida.
Balat bendar laya Chuik seduai Empitu, tang nadai orang ngerara. Sida belaya
pemuas ati diri empu.
Maya nya kelia bansa jelu nadai pengulu. Nyadi Aji Bulan ke pengulu sida
udah tebuai ari kereja, laban iya bisi beduan bala jelu, mai sida beban perau
pengalalalu diambi iya nyadi keritok pending.
Nya alai, laban nadai urang tau ngintu, tau ngemparu laya, dia Empitu lalu
mai Chuik besumpah. Nya alai tu munyi leka sumpah iya.
” Enti nuan Empitu enggau uchu ambu nuan jemah ila bisi buya nepan ba
rangkang, ba dan Kayu, nuan parai,” ku Chuik.
Nya alai kenyau ari nya alah datai ke sehari tu burung Empitu ingatka
sumpah Chuik. Ia nadai kala inggap ba rangkang Kayu. Iya enda berani
ngelanggar sumpah Chuik.
Udah nya baru Empitu lalu malas nyumpah Chuik. ” Nya alai nuan
Chuik,enti nuan enggau uchu ambu nuan jemah ila bisi merake jalai raya Anak
Mensia, nuan mati,” ku Empitu.
Kenyau ari nya, alah datai seharitu, Chuik agi mali merake jalai raya Anak
Mensia. Sida ga endang enda tekalalungka jalai raya, sida ga tulah bisi
penyalah. Nya alai suah bendar kitai diatu meda bangai Chuik garing – garing ba
tengah jalai raya.
Berengkah ari nya kitai bulih jaku munyi tu; ” bisa baka sumpah Chuik
seduai.
Ukur pemanah : mesti ngaku ke penyalah diri ngambi enda nyadi penusah ke diri
empu.
3. Jelu Siga
Jelu mayas tu semacham ari jelu siga ti diau di kampung jerung tauka
kampung tuai ti nadai diperimba orang.
Jelu mayas tu bisi tiga bansa. Mayas chapan tauka mayas timbal, mayas
tunggal enggau mayas kaban. Mayas chapen tu nyelai agi gamal ari mayas ti
bukai laban mua iya begambi lalu bulu iya bauh. Bulu mayas bechura mirah
redam.
Mayas tunggal besai agi ari mayas kaban. Iya rindu diau kediri enggai
begulai enggau kaban mayas ti bukai. Iya ngiga pemakai ke diri empu. Nadai
berumba enggau mayas bukai.
Bansa pemakai ti dikedekaka jelu mayas iya nya kentuk Kayu sereta
enggau mayuh macham buah ti bisi dalam kampung. Lebuh iya deka ngulihka
buah iya lalu ngeruyakka dan Kayu. Tak nadai beleman iya matahka dan Kayu ti
mesai lengan, mesai pah laban mayas tu endang bansa jelu ti kering.
Mayas tu endang bansa jelu jangkit ke rindu diau di kampung. Enti lebuh
kitai bejalai ke dalam kampung suah kitai tepedaka lampin mayas ba puchuk
Kayu. Lampin tu baka reti sarang burung. Iya diguna mayas ke alai sida ngenduh
lebuh malam hari. Lampin mayas digaga sida ari dan Kayu. Nadai salah – salah
baka burung ti ngaga sarang alai diau. Jelu siga deka sebaka enggau mayas iya
nya bala sida nyumbuh, rasung, empeliau, bejit, lutung enggau kara. Nyumbuh,
rasung, empeliau enggau bejit sama rindu nguan kampung puang tang lutung
enggau kara deka diau ba damun. Di menua ili kara enggau lutung rindu diau ba
tebing ai. Sida suah dipeda meragau di pasir ngiga lelambai ke dipakei.
Ukur pemanah : Rinduka rampa menua kitai Malaysia
Jerita Antu Kara
Nyadi dulu kelia bisi orang siku ti benama Assan. Iya tu udah bebini, jadi enggau indu siku serta beranak lelaki siku ke benama Selalu.
Assan seduai bini iya gaga bendar ati meda diri bisi anak lelaki siku ke sigat sereta siker dalam semua main enggau pengawa. Nya alai endang kenyau ari mit iya arapke Selalu tau nyadi orang ti menyana ke ganti iya nampung bilik nampung pemaik sereta nyaga reta tengkira, enti lebuh nyau datai ba maya seduai bini nyau udah nadai agi jemah ila.
Nyadu lebuh maya Selalu nyau udah bujang, iya selalu belajarka semua pengawa ti tau pulaike pengidup ti menyana kena ngidupke diri empu. Selalu tu nembiak ke rajin bendar, serta enggau liat ati ngereja pengawa ti mar sereta pedis dikereja.
Nyadi sekali lebuh hari agi tumu pagi, dia Assan nurun bejalai ngagai tembawai buah tuai ti enda berapa jauh ari rumah sida empu. Nyau puas iya ke malik kiba malik ke kanan merening sereta nengkadah puchuk buah, dia iya bisi tepedaka manyi inggap sereta nepan ba puchuk kara. Puchuk kara nya enda berapa tinggi iga, tang rakah bendar dan. Assan lalu besindang pun kara enggaika bisi orang bukai deka ngambi manyi nya. Udah tembu iya ke besindang pun kara iya lalu mulai ke diri ke rumah. Datai di rumah iya lalu madahke diri deka mai Selalu muar manyi lemai nya ngagai bini iya.
Nyadi lebuh maya hari nyau penumbas iya alai nurun, seduai iya lalu mupuk mega bejalai, mansang deka muar manyi nya tadi. Datai seduai ba pun kara, dia Selalu lalu begaga ke tangga Antu nya. Selalu pen lalu berengkeh maji enggau natuk batang kara. Iya pen lalu manggai ba pun dan, udah nya Selalu lalu nurun ke baruh ke baru. Semua utai enggau perengke ti deka dikena muar manyi baka tali penyai, rintung enggau semilu endang udah sedia magang. Baka nya mega sempun kulit engkejang ti endang udah rangkei pen nyau udah rembun-rembun udah ditungkun ke apai iya Assan.
Udah tembu ngeruku indah, dia Selalu pen lalu mupuk niki. Dia iya ngambi tali enggau semua utai bukai ti dikena, lalu ditanchang ke iya ba punggung iya magang. Udah nya iya lalu mansang bejalai gadai-gadai serta ngeradayau niki ngagai dan ti endur manyi nepan ba puchuk kara.
Lebuh iya ke berengkeh niki tadi malam endang udah jauh, lalu panchar bulan pen enda berapa terang, laban bulan baru ke tumbuh, tambah agi laban bisi mua hari, ujan bisi beberis sereta mesi-mesi mimit. Nya kebuah sempun Selalu enda berapa mayuh bara lalu enggai merumum.
Lebuh iya baru datai ba pun kara ke alai manyi nya nepan, dinga iya daun kara nyau gerisih. Puchuk kara lalu berenyang tiga keli. Meda utai bakanya, dia bulu iya lalu tumbuh, bulu pegu lalu nyeregu, tapak kaki lalu begeremai asai sepi iya, laban kalalu takut sereta geli bendar ati. Iya lalu enda engkebut, agi engketut ba pun dan kara, agi nganti utai ti ngasuh puchuk kara nya berenyang ayan.
Nyau kalama udah Selalu ke ngetu baka puyu mabuk ambuh, ngenung baka empelekung mabuk keruh, Antu kara pen lalu ayan lalu nangkep Selalu. Nadai daya mih tudah Selalu tu tadi, laban ba puchuk Kayu nadai jalai tudah tuai ngelaban. Antu kara tu tadi lalu nelan iya segala-gala. Semina pah iya sepiak agi digalau antu nya.
Pah Selalu sepiak nya tadi lalu disimpan Antu kara ke dalam rintung, serta lalu diulur iya ke baruh.
Meda rintung bisi diulur bakanya, dia Assan lalu gaga, nyangke Selalu udah tembu muar manyi ba puchuk kara. Nyau kalama rintung ke begitang kating-kating lama agi baruh agi ga rintung peda iya dalam petang dia Assan tepeda ke utai dalam rintung baka pah mensia dalam nya. Lebuh rintung nyau ulih tilik iya nya baru Assan nyau ngelala nya pah Selalu dalam rintung nya. Pedis ati ke anak ti pemadu di kesayau ke iya digaga Antu baka nya, Assan lalu narit tali rintung nya enggau pengabis tulang iya. Dinga iya lalu semerap sereta lalu meredup labuh ari puchuk kara, tak mereding ninggang tanah.
Udah nya Assan lalu bejalai belubah-lubah nuju ngagai endur utai ti labuh. Datai dia, iya lalu tepeda ke bangkei Antu nyau abis tebelimbur untak kiba kanan, pala pechah tepangke sebelah bandir kara engga Kayu bukai ti nyaruk batang kara nya.
Enda berapa lama udah nya, dia Assan lalu bisi ninga nyawa orang munyi tu, “Isa antu kara.” Suah bendar nyawa orang nya didinga Assan, tang tubuh nadai dipeda iya.
Iya pen berasai takut sereta geli, lalu beguai-guai ngambi pah Selalu, lalu ditaban ke iya pulai ke rumah sida. Dia dih Assan seduai bini enda nemu utai nusah nya ngenang anak ti dikerindu seduai nadai enggau begulai sejalai agi. Ngutuk diri mih tudah Assan laban ti udah mai anak iya muar manyi, laban enti enda dibai iya muar manyi tentu enda ga anak tulih ke badi enggau penusah ke baka nya.
Pah anak iya nya tadi lalu dikubur ke seduai ba pendam sida serumah. Assan seduai bini lama ngulit ngenang penusah tinggal anak parai ditangkep serta dipakei Antu Kara
Ensera Telu Baya
Nyadi sekali agi tumu pagi Pelanduk bejalai ngiga pemakai. Kira sejam iya udah bejalai ngejang ke rumah, iya pen datai ba paya madang melai bechampur enggau madang buan. Pagi nya Apai Tuai Lalut benama Dullah endang udah dulu datai dia. Pengawa Dullah nebas paya nya endur bumai.
Pelanduk, laban ke nyau lapar, tetenguk bendar ke buah buan. Deka iya mansang takut ke Dullah. Lama iya berunding ngiga jalai ngulih ke buah buan. Buah buan endang pemakai Pelanduk. Enda lama udah nya, iya pen lalu mansang bejalai begadai-gadai ngagai madang buan. Seninjik bendar, laban Dullah ke bendar ngasakke diri nebas, enda meda iya.
Udah Pelanduk nyau kenyang ngulam buah buan, iya pen lalu mulai ke diri ke rumah. Tang tak enda mukai-mukai, lebuh iya agi di rantau jalai iya lalu tekenyit besatup enggau baya indu siku. Dia baya tak lalu neken ke Pelanduk makai telu iya ba madang melai ke udah ditebas Dullah. Nama agi dih, telu baya nyau abis tekusai, lalu pelanting kiba kanan kena pentap Dullah. Tang kebuah baya neken ke Pelanduk makai telu iya, laban iya bisi meda bekau tunjing kaki Pelanduk sebelah nya dia.
Pedis bendar ati baya ngagai Pelanduk. Iya endang ngengkeng bendar ngumbai siku nya makai telu iya.
“Aku nadai makai telu nuan,” ku Pelanduk.
“Anang bula nuan,” ku Baya. “Uji abas kin, nadai bekau utai bukai din, tak bekau nuan magang. Nya alai nadai orang bukai endang sigi nuan makai telu aku.” Ku Baya.
“Nadai!” ku Pelanduk.
“Bisi!” ku Baya.
Nyau kepuas seduai udah bebelit ke jaku, tak angkat indu Baya lalu nerekem Pelanduk. Tang laban Pelanduk bangat siker serta jampat, lalu engkechit ngagai lebak sepiak kin. Seninjik bendar salah. Datai di lebak Pelanduk pen lalu nyakep Baya.
“Kami bansa Pelanduk enda takut ke kita Baya enti di darat. Tak sebarang pengawa bai kita,” ku Pelanduk dia.
Iya lalu ngentak ke kaki, ngering diri nyakep Pelanduk.
“Anang banggar-banggar ngapa.” Ku Baya. “Gamal ke baka nuan nya, enda chukup telan aku segala. Enti nuan karas ngumbai diri nadai makai telu aku, manah tua bebatak tali, nya baru temu sapa bula, awak ke sama meda pengering pangan diri,” ku Indu Baya.
Udah nya Pelanduk lalu nyanggup bebatak tali ngelaban baya. “Gamal nuan amat besai, tang untak nuan mit,” ku puchau Pelanduk. Pelanduk lalu minta timpuh tiga hari, baru bebatak tali.Udah nya Pelanduk lalu mulai ke diri ke rumah, ngiga akel dikena ngelaban baya. Datai dirumah, iya lalu nuduk ke diri. Enda lama udah nya iya lalu ngangauke Tekura.
“Oh Sambi” ku iya. “Mati aku tu Sambi, dibai indu Baya bebatak tali, laban aku enggai disangke iya makai telu iya ba madang melai ba tebas umai lalut Dullah din tadi.” Ku Pelanduk nganu Tekura.
“Oh Sambi,” ku Tekura nyaut. “Anang tusah ati nuan Sambi. Tu aku agi bedau ditu nulung nuan. Nya mih utai ke dilaban kitai, utai ke baka Baya Indu nya.”
“Nama runding nuan dih Sambi?” ku Pelanduk.
“Nadai runding bukai tu Sambi.” Ku Tekura. “Lebuh seduai bebatak tali ila, aku nulung nuan nanchang ke ujong tali nuan ngagai batang bandir nyiur. Ukai Baya Indu nya meda dih Sambi, enti iya udah dalam ai din,” ku Tekura madah ngagai Pelanduk.
Udah chukup timpuh tiga hari, Indu Baya pen datai ngagai pengkalan lalut, ke endur seduai iya Pelanduk deka bebatak tali. Datai iya dia lalu enda chechamang lalu ngangau ke Pelanduk.
“Kati nuan udah datai Sambi Pelanduk?” ku iya.
“Aku tu Punggal,” ku Pelanduk, “Dulu mimit datai ari nuan. Tak baru badu ngeruku aku tu,” ku iya nyaut Baya.
“Nya alai,” ku Indu Baya, “pagitu tua endang bebatak tali, laban endang udah samaya suba.”
“Au mih Punggal,” ku Pelanduk. “Ti nuan nadai datai tadi endang deka madahke nuan kin aku tadi. Kitai ga sama udah semaya enda tau bula sekali-keli ke semaya kitai nya suba.”
Udah nya seduai lalu sama berunding ngiga orang diasuh nyadi Hakim ke pengawa ti deka belaban bebatak tali. Meda tudah Tekura bisi keyau-keyau semak dia, Baya lalu minta Tekura nyadi Hakim seduai.
Pelanduk lalu lantang bendar ati ninga Baya munyi nya, laban seduai iya Tekura endang udah bejuraike utai nya. Baya lalu ngangauke Tekura ngasuh iya pansut ari iya ke duduk dugau-dugau. Tekura lalu ngaga diri tekenyit ninga penginggar nyawa Indu Baya ti ngangau ke iya. Tekura kemaya nya lalu ringkep-ringkep tudah tuai mansang kia.
Udah nya Tekura lalu ngatur adan endur seduai ti deka bebatak. Seduai diasuh Tekura siku, ari tebing lalu siku ari dalam ai. Iya ke ari tebing nya Pelanduk, lalu Indu Baya ari dalam ai.
“Enti kaki baya udah datai di darat reti nya baya alah. Pelanduk, enti sepiakkaki iya udah terejun ke ai, reti nya Pelanduk alah, lalu Baya mih menang. Seduai enda tau ngakel pangan. Aku ke nyadi Hakim tu tau di darat lalu tau mega ke dalam ai kin,” ku Tekura.
Udah nya Pelanduk lalu diasuh iya ari tebing, Baya lalu diasuh iya terejun ke dalam ai. Udah nya baru Tekura lalu terejun ke ai nganjung tali ngagai Baya. Pansut ari dalam ai, iya lalu nganjung puting tali ngagai Pelanduk ke di darat. Dia seduai Pelanduk lalu sama besaup nanchangke puting tali ngagai batang nyiur ke enda jauh ari endur nya. Pelanduk pen lalu duduk ngeluluka diri matak tali.
Tembu Hakim Tekura ke nerangka adat, lalu ngatur seduai ti deka bebatak, Tekura lalu mansang ngagai tengah tali. Dia iya lalu ngasuh Baya seduai Pelanduk lalu sama sedia. Udah seduai iya sedia Tekura lalu niap sa! Dua! Tiga, batak!” Ku Tuan Hakim Tekura.
Udah nya Baya pen lalu matak penapat-inat. Peda ai nyau bebual serta nyau besimpur kiba kanan laban iku Baya. Batak iya enda ga ulih. Empa pemendar iya ke matak baka ke deka terengkeh di tanah kenu puchuk nyiur. Batak iya baru enda ga ulih tarit, asai ke matak chagak bedil besi. Tarit Baya, enda ga ulih tarit, asai ke narit Bukit Tuchong Sebangki. Nyadi Pelanduk tu nyau abis rebah kiba-kanan ditabanka tali ti ditarit Baya. Nyau sepagi-pagi, sehari-ari Baya matak tali, enda ga ulih. Insak Baya kenu nyau enda ulih ensing ke agi nyau lilih kediri ari lubang idung. Liur nyau bepupu pansut ari nyawa. Nyau kalama ai mata Baya nyau renjai-renjai labuh ari mata. Tudah Sambi Pelanduk nama agi tau nyau dugau-dugau duduk ngeluluka diri nanke tali, ngilake Baya matak pun nyiur.
Tak enda berasai, Baya lalu ngelengkeke tali. Iya lalu nikike pantai nyenguk tudah Pelanduk, meda tudah Pelanduk bebendar agi ga ngeluluka diri matak tali. Baya tu tu tadi lalu meradai ba pantai dia, natke pengelelak diri. Udah nya Pelanduk lalu ngetu, meda Baya udah ngetu matak tali. Meda tak lama Pelanduk seduai Indu Baya udah nadai agi bebatak nya baru Tuan Hakim Tekura ngansak ngagai tengah tali.
Meda seduai lama udah ngetu bebatak, dia Tuan Hakim Tekura lalu nanya seduai iya. “Kati seduai agi deka bebatak?” ku iya.
“Aku tu nadai mayuh jaku, barang bai Punggal Baya nya,” ku Pelanduk nyaut. Ngenung Baya ninga jaku Pelanduk munyi nya, laban iya empu nadai tulang dianjung agi.
Meda bakanya, Hakim Tekura bejaku baru, ku iya. “Ba pemutus pechara seduai ti udah bebatak sehari-hari tu baka tu. Seduai sama kering sama enda tentu tealahke pangan, tang laban nuan Baya udah ngindik darat, nya alai nuan alah,” ku Tekura. Ari diatu nuan enda tau nyangke Pelanduk enchuri telu nuan agi. “Amat mih telu nuan, ti munyi ku Pelanduk dikechau Lalut Dullah. Nya orang ke bumai ba tanah nya dia. Penyalah endang enggi nuan empu, laban betelu ba tanah Lalut Dullah.
“Lapa dih” ku Pelanduk, “bedau nemu pengering kami Pelanduk nuan Punggal,” ku iya nganu Baya. “Ba ati aku sehari da tua agi bebatak nya baru puas. Pengering kita Baya lalu nadai endur aku ngujike pengagah tulang,” ku Pelanduk.
Angkat Pelanduk ari iya ke duduk ningake pemutus pechara lalu ngaga diri baka ke deka narit tali nya baru ba mua Baya. Tudah Baya tak semina kesap-kesap leka mata. Ati iya malu bendar. Baya lalu ngelantar terejun ke ai natke urat nyau asai ti enda betampung agi udah bekau bebatak tali ngelaban Pelanduk.
JERITA UNGGANG “ANTU GERASI”
Unggang ke bejuluk Antu Gerasi nya endang pugu orang berani dalam menua Batang Ai apin Bantin “Ijau Lelayang” seduai Ngumbang “Berauh Langit” tediri nama. Unggang tu endang tuai matak serang, lalu serang iya nadai kala balang. Semua menua ke udah kena serang iya, kenu ku cherita, nadai kala enda papa sereta enggau nadai kala enda muai ai mata. Iya endang enda kala nitihka serang orang, endang munka diri empu. Lebuh maya cherita tu nyadi kelia, Unggang berumah muak ari ulu Nanga Engkari mimit.
Nyadi sekali ba rumah nya Unggang matak bala iya nirika Gawai Kenyalang. Semua orang ke semakai enggau sida endang diambi magang, baka ari Engkari enggau ari Emperan. Hari nuntung endur maya begawai, orang mayuh pen sama begulu dia. Nya alai rami mih sida maya nya. Pagi siti, bala belatur deka nirika sandung. Sandung udah tediri, mensia mayuh mulai ke diri ngagai rumah diri empu.
Tujuh hari udah lepas gawai, peda sandung Gerasi tak rebah. Rebah sandung nya tadi lalu ngelantar ke Batang Ai, lalu nadai temu tunga agi. Selam ke ulu nadai temu, selam ke ili nadai mega temu.
Malam nya Unggang empu bisi mimpi. Dalam mimpi iya asai ke betemu enggau sandung iya nya tadi ke mali diri nyadi raja nabau. Nabau nya lalu nyumpah Unggang tau serang numbangka menua, sereta lalu madahka turun-menurun iya deka kaya raja . Nabau nya mega madahka Unggang semua menua ke kena serang iya nadai enda nunduk.
Apin lama udah bekau gawai nya Unggang bebunuh ngelaban Ubong seduai Along ba Tuchung Kelikit di Ulu Lemanak, ketegal seduai nya mantu orang ari Skrang. Ubong seduai Along alah, lalu dipinta Unggang mayar sigi tajau rusa ke tanda seduai ngaku alah. Tajau nya agi meruan datai ke sehari tu.
Lepas tu Unggang bejuluk Antu Gerasi enggau sida serumah pindah ke Nanga Delok. Apin lama udah bala sida Unggang ngentapka pendiau diri di Nanga Delok alai datai bala Pengiran Suma. Pengiran Suma nya tuai bansa Laut ari Nanga Tawang di Batang Kepuas. Bala Pengiran Suma nya datai deka ngalahka Apai Bulit di Nanga Lalong, enda jauh ari ili Nanga Delok. Lalu dikena nyemerai Batang Ai, bala Pengiran Suma ngaga andau ngena wi semambu. Tang maya tu bala sida Apai Bulit serumah udah nyau bedampa ba Langgong Kemantan di ulu Sasawa. Nya alai datai bala Pengiran Suma ba rumah lama sida Apai Bulit sida nemu rumah tak puang, semina tinggal indu enam iku aja ke nutuk di tembawai nya. Indu enam iku ke nutuk nya lalu dibunuh sida magang.
Pedis ati ninga pengawa Pengiran Suma ke deka ngalahka Apai Bulit, Unggang mai anak iya Layang ke bejuluk Biau Balai sereta enggau bala sida serumah ngipa bala Pengiran Suma.
Malam nya bala Unggang lalu ngeramka ipa. Sida lalu besatup enggau bala Pengiran Suma. Lebuh ke bamuk nya bala Pengiran Suma mati enam iku, tang bala Unggang endang nadai ruji mimit. Meda utai bangat bakanya, Pengiran Suma empu nguji deka ngerarike diri tang nemu andau semambu sida ke meraka Batang Ai udah diketas orang. Enda berani ngelaban agi, Pengiran Suma lalu nirika tambai burak madahke diri alah. Pengiran Suma enda dibunuh sida Unggang tang diasuh iya pulai ke menua iya empu.
Tang udah bekau tu, anak Gerasi ke benama Layang apin puas ati bebunuh. Nya alai iya lalu ngupah orang dua iku ngena tajau betanda awakka seduai nya deka dibai iya ke Tawang, laban Layang deka mai Pengiran Suma bebunuh baru. Datai di Nanga Tawang, Layang ke bejuluk Biau Balai enda kakang endang tak lalu mai Pengiran Suma bebunuh. Ninga nya, bala Pengiran Suma terus madahka diri enggai bebunuh ngelaban Unggang agi. Pengiran Suma empu minta ampunka pengawa iya ke udah, sereta lalu meri Layang sigi tajau rusa enggau sesingkap pinggai bulan ke tanda badu bebunuh. Tajau nya agi dikembuan bala peturun Gerasi ke endang empu pun bilik di Ensawang, Lubok Antu, datai ke diatu.
Laban enggaika dikumbai Gerasi bulaka semaya, Pengiran Suma empu agi nganjung sigi tajau betanda ngagai Penghulu Alam, uchu Unggang “Gerasi”, ke tanda bekaban. Laban empa sumpah antu sandung nya tadi, semua menua ke kena serang Gerasi enggau anak iya nadai enda nunduk magang. Pengiran Suma ke nunduk nya semina mandang ke sekeda ari empa mimpi Unggang.
Tanah rumah sida Unggang ke endur sandung nyadi nabau nya lalu dikumbai ‘Tembawai Sandung’, nyadi ke pesaka semua peturun Unggang ‘Antu Gerasi’ datai ke kemaya tu.
1. Indai Aloi Abis Garam
Nyadi Apai Aloi tu endang orang ke pintar bejaku dalam menua nya. Tang taja iya pintar bakanya, suah mega iya saru pengawa dikereja tauka saru jaku dipansutka ngagai orang.
Nyadi tumu pagi siti, dia Enchelegit Nangga Langit, Enchelegi Nangga Hari, bini Apai Aloi angkat berapi pagi ke sida sebilik. Lebuh asi udah mansau, dia iya lalu berengkah mela tubu ke lauk pagi nya. Udah tembu mela tubu nya, dia iya nemu garam sida udah abis.
“Oh, abis garam aku tu,” ku iya bejaku kediri berandau nengali. “Nama penyadi tubu tu nadai garam kena ngulai.”
Ninga indai Aloi bejaku kediri, dia dih Apai Aloi lalu nanya, “Nama utai dikarandauka nuan, Enchelegit?”
“Eh! Kitai nadai agi garam kena ngerami tubu tu. Enti nuan deka, manah nuan nemuai ngagai sida indai di Panggau minta garam,” ku Indai Aloi.
“Nama guna enggau garam ?” ku Apai Aloi.
“Eh! Dikena aku ngerami paku-tubu, “pia ku saut Indai Aloi.
“Au! Lagi mih aku minta garam,” ku Apai Aloi.
Udah nya angkat iya lalu begari. Pasok ke iya baju bisi charik, pasok ke tanchut bisi rubik. Belit ke labong gari batik. Tangkin duku jungkang tarik.
Udah begari, lalu nurun mih tudah tuai. Nyadi rumah sida mentua iya numbas ga penyauh ari nya. Enda tentu berasai iya bejalai lalu datai. Dia iya lalu niki ke rumah sereta napat ke ruai sida mentua iya, lalu terus tama ke bilik. Iya lalu nuduk ke diri di bilik.
“Akai rai! Lelak aku tu bejalai,” ku iya.
“Oh! Nama kebuah nuan bangat ngenumu nya dih, Apai Duat? Nama utai dipeguaika nuan?” ku mentua iya nanya.
“Es! Nadai kebuah bukai, semina diasuh Indai Duat minta garam kena ngerami paku-tubu,” ku saut Apai Aloi.
“Au, Apai Duat,” pia ku saut mentua iya. Udah nya lalu ditungkus ke mentua iya garam lalu disimpan dalam ma Apai Aloi. “Nya, Apai Duat udah aku simpan garam ba ma nuan,” ku mentua iya.
“Au, manah mih nya,” ku Apai Aloi.
Udah nya iya lalu mulai ke diri. Di rantau jalai iya ke mulai ke diri, dia iya mansa madang paku. Lama iya ngenung dia. “Oh, nya madang paku, tentu paku nya diasuh
Indai Aloi gerami aku garam,” ku iya bejaku ke diri berandau nengali. Iya lalu ngambi upih ari ma iya, lalu digerami iya madang paku ngena garam nya.
Angkat iya ari nya, lalu datai ba tanjung madang perin rigai, peda iya tubu mayuh bendar nyumbuk sebelah nya dia.
“Bah! Nya madang tubu! Tentu tubu nya ke diasuh Indai Duat gerami aku ngena garam,” ku iya bejaku ke diri berandau nengali. Iya mega lalu berengkah ngerami tubu dia datai ke garam iya abis.
“Nya baru tubu tu masin ila, udah digerami ngena garam,” ku iya bejaku ke diri, gaga ati ke pengawa diri udah tembu.
Udah tembu ngerami paku enggau tubu, iya pen lalu mulai ke diri ke rumah iya empu, ari ili Nanga Panggau. Datai iya di rumah sida empu, hari pen nya deka tengah hari. Sereta datai iya lalu tama ke bilik. Ma iya lalu diengkah iya ba tempuan lalu disandihka iya ba dinding. Meda iya datai lalu beguai mih Indai Aloi nyerungkai ma iya, peda iya upih sarang garam udah puang, semina mimit aja garam bisi lekat ba selepak upih nya.
“Ni garam dibai nuan dih, Apai Duat?” ku Enchelegit.
“Nama utai ditanya ke nuan! Bisi aku bulih garam diberi indai nuan tang udah abis dikena aku ngerami paku-tubu di rantau jalai tadi. Aku ga nitih kejaku nuan. Nuan madahka garam nya kena ngerami paku-tubu,” pia ku saut Apai Aloi.
“Kasih-kasih mih nuan nya dih Apai Duat, enda nemu reti jaku. Ukai nya dikena ngerami paku-tubu dalam babas ku aku. Dikena ngerami engkayu kitai di rumah,” ku Enchelegit.
“Nuan ngumbai aku tambap, aku enda tambap. Nuan ke tambap enda nemu bejaku. Nuan ngasuh aku minta garam ngagai sida indai nuan di Panggau kena ngerami paku-tubu ku nuan. Nya alai paku-tubu ga digerami aku ngena garam. Tu dikena ngerami daun kayu ga ku nuan. Dini agi bisi garam kena ngerami utai ngemayuh nya?” ku Apai Aloi.
Enchelegit lalu ketawa rakah-rakah berunding ke jaku Apai Aloi. Udah nya sida sebilik sama makai merarau belaluk tubu tabar.
2. Apai Aloi Ngaga Rumah Ari Kayu tebelian
Nyadi sekali Apai Aloi ngaga rumah limas sebuah. Semua tiang rumah iya digaga ari kayu tebelian magang, lalu ramu bukai bisi mega kayu lembut tang iya bansa kayu ke teguh lalu enda diempa bubuk.
Lebuh semua ramu udah chukup nuntung magang ba endur ke deka alai berumah, dia Apai Aloi lalu nyedia ke diri deka ngentak. Nyadi endur ke deka alai ngaga rumah baru
nya enda jauh ari ili rumah iya ke diatu. Lalu nama endur nya dikumbai Emperan Embawang. Kebuah alai dikumbai Emperan Embawang laban dia mayuh Kayu embawang tanam Aya Bujang Tuai seduai Apai Keling.
Lebuh ke ngentak nya Apai Aloi minta tulung sida Tutong enggau Ngelai ari Gelong enggau bala sida Keling ari Panggau. Orang Panggau enggau orang ari Gelong nulung Apai Aloi ngelama tiga hari berturut-turut. Udah nya Apai Aloi enggau sida sebilik besaup ngaga rumah nya datai ke tembu. Pengelama sida menyanak nembu ke rumah nya kira tiga bulan.
Nyadi lebuh ke deka berumah tu Apai Aloi seduai Apai Seumang-umang endang udah bisi aum sama deka berumah laban rumah sida iya udah kelalu lama lalu patut diganti baru. Apai Seumang-umang dudi agi ngentak ari Apai Aloi. Iya ngaga rumah enda nampung Apai Aloi tang enda berapa jauh ari nya, didinga kukuk manuk. Lalu endur Apai Seumang-umang berumah iya nya dikumbai Munggu Lensat laban mayuh lensat tubuh dia ari leka lensat ke ditikau ke orang Panggau enggau Orang Gelong lebuh ke bisi ngetu mansa menua nya dia pulai sida ke ngembuah lensat.
Nyadi ramu rumah Apai Seumang-umang tu digaga ari buluh, lalu betiang ke buluh payan magang. Kira sabulan pengelama Apai Sumang- Umang ngaga rumah alai iya tembu.
Nyadi lebuh rumah seduai sama udah tembu dia seduai sama bebai pindah, taja pen rumah seduai enda betampung tang seduai deka pindah sama sereta hari lalu ngintai ke maya bulan agi mansang tauka maya anak bulan. Apin seduai iya pindah, seduai dulu ngiga burung ke manah kena pindah.
Udah tembu pengawa nya, Apai Aloi pen pindah ngagai rumah baru iya di Tembawai Embawang. Pia mega Apai Seumang-umang lalu pindah ngagai rumah baru iya di Munggu Lensat.
Kira sabulan Apai Aloi udah pindah ngagai rumah baru alai iya lalu nirika gawai Pangkung Tiang. Tang apin iya menyadi gawai dulu iya nanya Apai Seumang-umang . Pagi siti Apai Aloi lalu nemuai ngagai Apai Seumang-umang .Lebuh iya datai ba kaki tangga iya lalu ngangau.
“Oh, akan! Jadi rumah nuan?” ku iya.
“Jadi,” ku saut Apai Seumang-umang . “Niki mih, lalu, duduk kitu.” Apai Seumang-umang lalu nganchau tikai. Apai Aloi mega lalu duduk.
“Nama pejalai nuan dih, akan , beguai tauka pejalai lantang?” ku tanya Apai Sumang- umang.
“Au mih, akan , aruh iya nuan nanya ni tau nadai kebuah. Iya ke sama tuai baka kitai tu,” pia ku Apai Aloi. “Aku bejalai nemuai ngagai nuan, ensepi diri baru datai ba rumah baru.
Nya alai aku madahke diri deka begawai pangkung Tiang lalu enggau gawai Nama ke Tuah. Nyadi ati aku deka mai kitai sama begawai, kitai patut minta ngagai petara awak ke kitai gerai nyamai lalu rumah likun alai diau.”
“Manah runding nuan nya, akan . Aku pen bisi ga ati deka begawai, tang rumah aku diatu apin tentu tembu, agi mayuh utai kena ngelagu rumah apin digaga,” pia ku saut Apai Seumang-umang .
Udah tembu randau nya Apai Aloi mega lalu mulai ke diri ngagai rumah iya di Emperan Embawang. Udah nya iya lalu nyendiaka Gawai Pangkung Tiang.
Lebuh gawai nya iya ngambi lemambang, iya nya lemambang ari Panggau, betuai ke Balu Jantau seduai Engkerong Ridan. Apai Seumang-umang pen sama bisi enggau ngabang, pia mega orang ari Panggau enggau ari Gelong, laban orang deka meda penegap rumah Apai Aloi ke digaga ari Kayu tebelian.
Tembu gawai Pangkung Tiang pagi nya, lalu ditampung Gawai Nama ke Tuah iya nya ngangau ke Raja Tuah ke dikumbai Gangga Ganggai ari tasik besai linggang gumbang. Tembu Gawai Nama ke Tuah, semua pengabang sama-sama mulai ke diri.
Sereta Apai Seumang-umang udah pindah ngagai rumah baru, iya lalu nebuk semua tiang reraga tanju, kesau enggau pagar manuk, pagar babi semua digaga ke lubang magang, baka lubang kesuling. Lalu di tanju digaga ke iya ayam ribut lalu tiang ayam ribut nya pen lalu digaga ke iya lubang. Semua lubang enda sabaka bisi besai, bisi mega mit, nya alai lebuh hari ribut, rumah Apai Seumang-umang nya rami bendar laban tau bemunyi baka kesuling ke disepu orang enda kurang ari sepuluh iku sama sereta.
Lebuh semua utai nya udah tembu, nya baru Apai Seumang-umang lalu nirika Gawai Pangkung Tiang enggau Gawai Nama ke Tuah baka gawai ke didiri ke Apai Aloi. Nyadi gawai Apai Seumang-umang nya enda dipengapka lemambang tang semina nyampi aja, ngangau ke petara tuah, petara limpah. Lebuh gawai nya Apai Aloi mega bisi diambi Apai Seumang-umang ngabang, orang bukai nadai dipadah ke iya.
Lebuh Apai Aloi datai ba rumah Apai Seumang-umang iya mega lalu niki ke rumah. “Oh, lalu akan ,” ku Apai Seumang-umang .
Enda lama udah nya Apai Seumang-umang lalu mantai ke mayuh macham utai diempa. Pia mega Indai Seumang-umang di bilik din sama mantai ke macham utai diempa, baka panganan, letup enggau utai bukai.
Lebuh ti makai utai nya dia Apai Aloi lalu nanyaka pengabang bukai. Ku iya nanya, “Kati ku sida di Panggau enggau sida di Gelong bisi diambi nuan ngabang?”
“Eh! Mayuh orang dipadahka aku, tang sida madahka diri enda ulih ngabang laban bisi penanggul ke berat,” pia ku saut Apai Seumang-umang . Tang iya ke bendar, Apai
Seumang-umang nya takut ke rumah diri runtuh ditepan bala mayuh laban ramu rumah iya digaga ari buluh magang.
Udah badu makai utai nya tadi dia Apai Aloi seduai Apai Seumang-umang lalu berandau enggau pangan diri, lalu lebuh nya mega hari bisi ribut. Sereta ribut datai dia rumah Apai Seumang-umang lalu bemunyi munyi kesuling. Ninga rumah tau bemunyi ngemanah nya, dia Apai Aloi lalu lama ngenung. Dinga iya ke tan-ju bisi ga bemunyi, di baruh rumah pen bisi ga bemunyi, pagar babi sama bisi munyi kesuling. Ninga nya seruran bemunyi nadai ngetu dia Apai Aloi lalu nanya.
Ku iya, “Sapa orang nebah utai nya?”
“Eh!” ku Apai Seumang-umang nyaut, “Bunsu ribut ke nebah nya tang iya enda dipeda kitai laban iya nya antu.” Nya kebuah Apai Seumang-umang enggai ngambi Lemambang mengap, enggaika bunyi kesuling enda didinga alah laban nyawa Lemambang ke mengap.
Ninga utai munyi nya, Apai Aloi lalu bejaku, “Tuai ga umur aku tu udah tang aku nadai kala ninga rumah tau nyepu kesuling baka rumah nuan tu, akan , lalu kesuling nya pen nadai ga dipeda.”
Udah nya Apai Aloi lalu nanya, ku iya, “Deka nuan nyual utai ke bemunyi nya awak ke aku engkeh iya ba rumah aku din.”
“Oh!” ku Apai Seumang-umang . “Utai nya enggai nyadi di-jual, laban nya udah disimpan dalam tiang din. Nambah ke nya orang bukai nadai ulih nyepu kesuling ngemayuh nya sereta sekali semina bunsu ribut aja ti tau. Lalu aku enda nemu berapa ke rega ribut nya enti iya dijual. Laban Semina Petara aja, enti iya deka, bisi kuasa tau nyual ribut,” ku Apai Seumang-umang .
“Enti iya enda tau dijual, manah tua besilih rumah, rumah nuan pulai ke aku, lalu rumah aku pulai ke nuan,” pia ku jaku Apai Aloi.
Apai Seumang-umang ngaga diri enggai besilih, laban ngaga rumah ke tau bemunyi baka nya enda mudah, ku iya. Apai Aloi nyau bebendar ngumbuk Apai Seumang-umang selemai-lemai nya. Ati Apai Seumang-umang endang deka besilih, tang iya ke enggai nya endang ngaga diri.
Nyau kelama iya, Apai Seumang-umang pen deka dibai Apai Aloi besilih rumah. Lalu ku Apai Seumang-umang , “Aku sayau bendar ke rumah tu, tang semadi nuan mih akan , kitai ga ukai orang bukai.”
Malam nya seduai mutus ke jaku lalu tetap besilih rumah. Tiga hari udah nya sida sama berangkut ke reta-tengkira. Apai Aloi enggau sida sebilik ngangkut barang sida ngagai rumah Apai Seumang-umang , pia mega sida Apai Seumang-umang sebilik. Lebuh semua perengka udah abis diangkut, pia mega babi enggau manuk, sida lalu sama pindah.
Apai Seumang-umang gaga bendar ati bempu rumah ke manah sereta tegap. Apai Aloi pen gaga mega ati laban rindu ninga tiang buluh ke bemunyi dipuputka ribut. Lalu lebuh maya hari ribut Apai Aloi endang enggai nurun gawa, laban rindu ninga rumah nya ke munyi kesuling.
“Sehari tu kitai menyanak anang nurun gawa, manah kitai diau seraya ke ninga ke rumah kesuling,” pia ku jaku Apai Aloi. Nya alai hari nya sida sebilik sama diau di rumah.
Kira dua taun bumai udah nya rumah Apai Aloi lalu chundung laban tiang payan nyau mansang buruk. Antara dua tiga bulan udah nya, rumah Apai Aloi lalu tumbang, lalu sida sebilik nadai agi rumah alai diau. Nya alai sida Apai Aloi lalu pulai ngagai langkau umai, lalu dia mega alai sida diau nganti ke bisi awak alai ngaga rumah baru.
Ari langkau umai nya, Apai Aloi enggau sida sebilik mupuk beramu laban deka ngaga rumah baru, nambak endur rumah buluh ti udah rebah nya tadi, rumah nya digaga ari Kayu tegoh, lalu rumah nya ke alai sida diau lalu ngidup ke diri bumai betaun. Apai Seumang-umang endang nadai pengirau ati laban rumah iya endang manah sereta tegap.
3. Apai Aloi Nyumpit
Nyadi Apai Aloi tu selalu bendar ngulih ke burung ngena sumpit. lya ke nyumpit nya enda ngena ipoh, tang semina laja aja, laban iya enggaika burung nya lalu terus mati.
Nyadi sekali, lebuh nya maya buah kara nyau mansau di menua nya, dia iya lalu nurun nyumpit. Endur ke digagai iya nyumpit nya jauh ke dalam kampung puang nadai didinga kensung nyumbuh Bujang. Datai iya dalam kampung dia iya nemu mayuh endar kara bebuah ke benung mansau bendar, lalu burung pen mayuh makai buah kara. Sida burung sempidan, sengayan pen mayuh mega makai buah kara ke labuh ke tanah laban burung bukai.
Dia Apai Aloi lalu berengkeh nyumpit. Tang laban iya nadai mai sarang kena mai burung, nya alai iya lalu nanchang kaki burung enggau tali, lalu ditanchang ke iya ba punggung. Burung ke besai pen mayuh mega ulih iya, baka kenyali, tekalalu, bruie, kejakuh, emperegam enggau burung bukai mega, datai ke tubuh iya nyau penuh laban burung ke ditanchang ke iya. Meda burung ulih iya bangat mayuh nya alai Apai Aloi enggai badu-badu nyumpit.Lebuh semua burung ke ditanchang iya ba punggung engkebap ke sayap magang, dia Apai Aloi Ensepi tubuh diri tak begantung ari tanah.
Burung nya tadi lalu naban ke iya terebai ke atas kin. Lama agi tinggi agi ga Apai Aloi dibai burung nya terebai. Tang nyau kalama burung pen mayuh mega lepas sereta nyau lelak laban pemerat Apai Aloi. Sida pen nyau mansang baruh sebaruh terebai. Lebuh sida mansa ba senentang rumah orang Panggau Libau, Apai Aloi pen lalu ngalepas ke semua burung ke ulih iya nya tadi. Iya pen lalu labuh kebaruh ninggang tugong padi ba tanju sida Keling. Kumang ke benong nyembui padi dia pen lalu tekenyit meda anak mensia tak meredup munyi punggu ninggang bandir labuh ari Langit. Laban ke kalalu kesal di
jungkel kerong dada, dia iya tak enda berasai lalu engkechit ke dalam rumah lalu megau sida serumah.
Semua sida serumah pen lalu datai begau kia magang, lelaki, indu enggau anembiak meda Kumang nyau kesak-kesak baka ukui ke nyau anak. Sida ke begau nya tadi lalu pansut ke tanju lalu nanya anak temuai, “Sapa nuan tu tak terjun ari Langit? Anak petara nuan tu?” ku sida nanya Apai Aloi ke agi ngerising nyintak seput nat ke pemedis tubuh diri.
Nyawa Apai Aloi pen nyau rapas ke nyaut, “Iya mih nya, anak petara mih aku tu.”
Ninga iya madahke diri anak petara, orang lalu beguai nanggong iya ke dalam rumah. Kumang lalu beguai ga beranchau tikei dipanggau enggau diruai.
Genap iku orang ke datai dia sampal nanya iya magang,“Anak petara nuan tu?” ku sida iya agi itok ke penatai iya nya tadi.
“Au, anak petara mih aku,” ku iya.
Lemai nya Keling lalu mai sida serumah nya baum. Sereta udah tembu makai lemai nya, iya lalu ngasuh bala anembiak lelaki bepadah niti rumah. Bala anembiak nya lalu berebut betesau ngagai tiap-tiap pintu niti rumah Penyai sida Panggau Libau.
“Aya Keling ngasuh kitai serumah tu angkat ngagai ruai iya,” pia ku sida anembiak nya ngerah sida serumah.
Enda lama udah nya semua orang lalu angkat ngagai ruai Kel¬ing. Lebuh semua orang udah duduk, Keling lalu bejaku, “Aku ngumbai kitai serumah tu, laban bisi kebuah ke besai. Aku nanya ke runding kitai mayuh pasal anak Petara ke bisi nurun ari langit.”
Sempurai lalu nyaut, “Uji kitai agi nanya iya, awak ke nentu ke anak sapa iya nya.”
Kumang lalu nguing nanya anak temuai, “kati nuan tu, amat anak petara nurun ari langit?”
“Iya, anak Petara mih aku tu,” ku iya nyaut, nitih ke tanya orang.
Udah sida sampal ninga iya nyaut, madah ke diri anak Petara, Keling lalu bejaku, “Dalam runding aku, manah kitai ninga ke runding aya kitai Nawang Gundai.”
Nawang Gundai lalu bejaku. Ku iya, “Iya tu anak Petara. Iya datai ngagai kitai, nurun ari langit. Kenyau ari menya, aku nadai kala ninga tauka meda anak Petara. Nya alai dalam runding aku, iya tu patut disambut enggau gawai. Tu mih baru kitai meda Petara datai segendai ke dalam dunya tu.”
Ninga jaku Nawang Gundai munyi nya, semua orang lalu setuju deka begawai kena nyambut penatai anak Petara. Malam nya semua sida serumah nadai tindok laban ngulu anak Petara ba panggau sida Keling.
Tumu pagi siti semua indu sida di Panggau lalu betutok tepong enggau nyendia ke perengke piring ke bukai. Semua orang ke lelaki pen sama kiroh mega nyendia ke gawai. Lalu udah diputus ke dalam aum timpuh gawai nyadi. Tiga hari puang ke empat gawai nyadi. Semua pengabang dipinta datai magang lebuh nya. Simpurai ngambi ngabang ngagai rumah orang Gelong, lalu sida bukai ngambi ngabang ngagai rumah bukai.
Lebuh maya hari gawai nyadi, pengabang mayuh bendar datai, laban orang deka bepeda ke anak Petara. Nyadi endur orang ngengkeh anak Petara nya ba panggau sida Keling. Ngelingi iya ke gali di redai kepua kumbu. Piring sembilan, diengkeh ngelingi iya ke gali. Tang bisi ga sekeda pengabang bejaku enggau diri sama diri. Ku sida, “Jai bendar gamal anak Petara nya. Nadai patut anak Petara bakanya gamal. Iya ga tuai, pala ga lasu, idong ga binsang lalu bisi litan ba kening.”
Nyadi lebuh gawai nya sida Indai Aloi bisi enggau ngabang. Udah badu merarau, dia dih Aloi bisik nilik ke dalam kendang alai anak Petara ke gali. Dia iya meda nya ukai anak Petara tang apai iya empu. Aloi lalu madah ngagai indai iya.
“O, Indai,” ku Aloi bejaku, “peda aku anak petara nya tak sebaka endar gamal enggau apai.”
“Eh!” ku indai iya nyaut, “ukai nya apai nuan. Apai nuan lama udah parai. Nama nuan enda ingat lebuh iya ke nyumpit lalu enda pulai-pulai.”
Tang Aloi karas bendar madahke nya tentu apai iya. Enda liat agi ati Indai Aloi, iya lalu nilik ngagai kendang anak Petara ke gali.
Lebuh Indai Aloi ke nilik iya, dia Apai Aloi lalu meda Indai Aloi, iya lalu bejaku, “O, Indai Duat, idup aku, enda parai. Enti nuan pulai lagi nganti aku,” ku Apai Aloi bejaku.
Ninga nya orang lalu begau kia ke. Nya baru sida nemu nya ukai anak Petara, tang Apai Aloi. Udah nya semua pengabang lalu pulai, laban udah nemu iya nya ukai anak Petara, tang Apai Aloi.
Udah nya Simpurai lalu nanggong Apai Aloi lalu muai iya ari ujong tanju. Pedis endar Apai Aloi, pala iya telih, tubuh iya ga mega, kaki iya kembai. Iya mega nyabak enggau nake iya nat ke pemedis diri, lalu minta ambi anak iya Aloi.
“Mati aku Aloi ti nuan enda ngambi aku,” ku iya nyabak dia.
Tekala nya Aloi lalu ngambi apai iya lalu mai iya pulai sereta sida. Datai di rumah sida lalu ngubat abi telih iya. Indai Aloi mega lantang ati, laban Apai Aloi ke udah dikumbai mati udah pulai idup baru. Pia mega bala anak iya gaga meda apai sida udah pulai.
4. Apai Aloi Nan Abau
Pagi siti Aloi seduai apai iya nan abau. Seduai iya nan abau enda bangat jauh ari ulu rumah sida. Seduai iya merau. Lebuh seduai iya datai ba wong siti ke enda berapa tinggi lalu ai pen enda berapa deras, seduai iya lalu ngaga tampun dia. Lebuh tampun udah tembu, seduai lalu nan abau seduai iya dia, udah nya seduai lalu mulai ke diri ke rumah.
Tumu pagi siti seduai lalu nurun ngabas abau. Lebuh seduai datai semak tampun, Aloi lalu bejaku. “Oh! Bulih abau tua apai.” Ninga nya, Apai Aloi lalu malik ngagai abau.
“Oh! Nadai Bulih abau tua nyin.”
“Bisi apai,” ku Aloi nyaut. “Bulih lelabi abau tua.”
“Eh, ukai nya lelabi,” pia ku Apai iya nyaut.
“Nyin daun engkubong,” ku iya nyaut Aloi. ”Aram pulai tua.”
Udah nya Apai Aloi lalu ngelulu ke diri sakit. Iya lalu ngaga diri getar-getar.
“Jampat ke tua pulai, tak lain asai isi aku tu,” ku iya madah ngagai Aloi. Aloi pen lalu bekeyoh nake ulih iya, beguai naban ke apai iya pulai ke rumah. Datai di pengkalan seduai iya lalu niki ke rumah. Datai di rumah Apai Aloi ngelulu ke diri balat agi ga sakit.
“Kati abau seduai bisi bulih ?” ku Indai Aloi nanya.
“Nadai bulih,” ku Apai Aloi nyaut. “Mua abau alit laban daun engkubong.”
Nyadi lebuh Aloi seduai Apai iya ke pulai, duku Apai Aloi ditinggal ke iya ba tisau jalai pendai. Nyau lama iya udah datai dirumah dia Apai Aloi lalu madahke diri deka bira,
laban perut iya balat endar pedis. Iya mega lalu nurun bira. Pulai iya bira, dia iya madahke diri udah bisi nyamai agi. “Tang aku agi nat ke diri dirumah. Semua kita nurun ke umai magang, laban padi kitai agi bisi rumput apin abis dibantun,” pia ku iya bejaku.
Indai Aloi enggau bala anak iya pen lalu nurun ga ke umai. Apin lama sida udah nurun, Apai Aloi pen lalu nurun ga ngagai tampun abau. Tang iya enda merau. Iya bedarat nengah jalai ke muntang. Abau nya amat bulih lelabi.Datai iya ba tampun dia iya lalu munoh lelabi nya. Udah nya iya lalu netak lelabi ke lalu disimpen dalam buluh. Tembu nya iya lalu menyadi ke api, alai iya ngelulun lelabi.
Kira maya tengah hari sida Indai Aloi pen pulai ga ari umai. Datai di rumah nemu Apai Aloi nadai dia.
“Kati amat abau nadai bulih iken?” ku Indai Aloi nanya.
“Eh?,” ku Aloi, “abau bisi bulih lelabi, tang apai madahke nya ukai lelabi, daun engkubong. Peda aku nya amat lelabi.”
“Aram tua nurun kin. Tentu apai nuan bisi din,” ku Indai Aloi.
Udah nya Aloi seduai indai iya lalu nurun mai ma. Apin seduai datai ba tam¬pun abau, seduai bisi meda asap.
“Ah!” ku Indai Aloi. “Nyin asap apai nuan, anang inggar tua.”
Seduai iya lalu bejalai begadai-gadai, lalu belalai ba pun rian semak endur Apai Aloi ke ngelulun lelabi, tang iya empu nadai dia. Iya udah mandi ba lubok ari ulu nya mimit. Dia Aloi seduai indai lalu nuang semua lelabi dalam ruas nya ke dalam ma, lalu diganti seduai enggau keresik.
Udah tembu nyimpen semua lelabi ke dalam ma, Aloi seduai in¬dai iya lalu pulai ke rumah. Udah nya Apai Aloi pen badu ga man¬di, lalu pulai ngagai endur iya ke ngelulun lelabi.
“Tu lagi baru kenyang perut tu,” ku ia bejaku kediri. “Nadai orang nemu aku makai lelabi ditu.”
Iya ketawa inggar endar laban ati iya lantang ngadang diri kenyang makai lelabi. Sereta iya datai dia, iya lalu nuang ke lelabi nya ke atas daun ke udah dianchau iya manah-manah ba atas tanah. Peda iya ukai lelabi pansut ari ruas, tang keresik bechampor enggau daun Kayu. Udah nya ia lalu nuang ke semua ruas, tang siti pen nadai ga lelabi dalam nyin. Semua putong nya penuh laban keresik enggau daun magang.
“Oh!,” ku ApaiAloi. “Nyelai bendar lelabi tu tau bebali nyadi keresik. Nadai utai bukai tentu lelabi tu udah diempa antu. Enda aku berani diau ditu agi, enti antu nya datai tentu
iya deka makai aku. Nasit ga aku nadai ditu lebuh antu datai lalu makai semua lelabi aku tadi,” ku iya bejaku kediri berandau nengali.
Udah nya iya lalu beguai-guai mulai ke diri ke rumah, sampai ke duku enggau labong iya pen enda mih iya ingat mai pulai. Iya lalu belanda nake penegar iya.
Lebuh iya ke belanda, dia dan punggu Kayu bisi labuh ari puchuk Kayu, lalu inggar bendar meredup labuh ke tanah. Nya ti ngasuh iya tekenyit bendar ati lalu rari belanda tegar agi, laban iya ngumbai nya redup kaki antu mansang semak deka makai iya.
Lebuh iya ke belanda nya, iya nyau rauh-rauh minta tulong Aloi, “Tulong!… tulong!… Mati aku tu, ambi aku Aloi!… Antu deka nangkep aku!” ku iya.
Tang laban jaku iya enda bangat inggar ketegal iya nyau deka luput laban kalalu kesal dijungkel kendang dada, nya alai sida Aloi seduai indai iya nadai ninga. Lebuh iya datai di rumah iya pen lalu rebah ga luput. Ninga bisi utai bemunyi di ruai, Aloi pen lalu pansut nilik ari bilik, lalu meda apai iya gali di tengah ruai.
“Lapa nuan apai?” ku Aloi nanya, tang iya enda nyaut. Indai Aloi agi kiroh mela lelabi di bilik. Aloi lalu ngangau. “Oh! Indai,” ku iya. “Mati apai tu, nama utai nganu iya tu.”
Indai Aloi pen lalu pansut ari bilik lalu meresa semua tubuh Apai Aloi, tang nadai ga nemu bisi abi, tauka pentok ular. Enda lama udah nya Apai Aloi pen lalu ngeleda ari luput.
Aloi seduai indai iya lalu nanya, “Nama kebuah nuan baka tu Apai?”Apai Aloi lalu nyaut. “Tengah hari tadi aku ngelulun lelabi ulih abau. Udah mansau lulun aku lalu mandi. Pulai aku mandi, nemu lelabi udah abis diempa antu. Semua ruas disimpen ke antu keresik kena iya nganti lelabi. Enda berani dia agi, aku lalu belanda pulai ke rumah. Lalu redup kaki antu bisi didinga aku nitih ke aku. Nya alai aku lalu belanda nake tulang. Datai di rumah tu aku lalu luput.”
“Eh! Keba nuan tu tambap,” ku Indai Aloi bejaku, “lebuh seduai Aloi ke ngabas abau Aloi endang meda lelabi, tang nuan madahke ukai lelabi, Daun engkubong ku nuan. Nya nuan ngakel kami, tang nuan ukai semina ngakel kami tang lalu ngakel nuan empu. Manah endar ti lelabi dibai seduai Aloi pulai ke rumah, tentu bisi ke laluk kitai sama. Nya dilulun nuan dalam babas, nya alai iya diempa antu. Tak sekumbang tua udah begulai tu nuan nan abau, sekali pen nadai mih kala bulih. Tak bulih daun engkubong beari-ari ku nuan. Nya alai nuan tambap belama-lama.”
Tang taja pen Apai Aloi suah salah pengawa, ngakel sida sebilik enda ga Indai Aloi kala datai jari ba iya. Lebuh iya sakit, tabin tauka pemedis bukai, sida bini-anak iya endang ngintu iya enggau manah.
Lemai nya Apai Aloi udah ga badu lelak, lalu lebuh sida makai lemai nya sida sama belaluk lelabi ke ulih abau Apai Aloi tadi.
Dia Apai Aloi nanya, “Dini kita bulih lelabi tu dih?”
“Eh!” ku Indai Aloi, “tu lelabi beri antu. Lebuh kami pulai ari umai tadi, betemu enggau antu pulai ngabas abau. Iya lalu meri kami.”
“Nelap endar antu enggau kita. Enggi aku abis lelabi diempa lalu diambi antu,” ku Apai Aloi.
“Kati ku baka gamal antu nya?” ku iya nanya.
“O, manah, sigat bendar gamal iya. Tak baka gamal nuan lebuh nuan agi bujang menya,” ku Indai Aloi nyaut iya.
“Nya alai enti abau nuan bisi bulih lelabi, anang ngelulun iya dalam babas agi, enggaika abis diambi antu. Tambah mega enti nuan selalu ngakel kami, nengali lelabi, nengali jelu, nengali iken ulih bubu, aku enggai begulai enggau nuan agi. Nyamai aku begulai enggau antu ke nelap enggau aku, iya suah meri aku lelabi, meri aku babi,” ku Indai Aloi.
Ninga jaku Indai Aloi munyi nya, dia Apai Aloi mega tusah laban iya takut ke Indai Aloi enggai begulai enggau iya agi. Iya mega lalu bisi sangke ke Indai Aloi nya bisi bepangan enggau antu ke suah meri iya lelabi enggau iken tauka babi.
Berengkeh ari nya, dia Apai Aloi bisi ngetu enda lama ngakel sida sebilik, lebuh iya bisi bulih babi, iken tauka lelabi. Tang taja iya bisi kurang agi ga ngakel sida sebilik ba jelu enggau iken, tang iya balat ngakel senentang ba buah, baka buah lensat, sibau, rian enggau buah bukai.
5. Apai Aloi Nyadi Barukep
Nyadi bisi sekali lebuh maya Apai Aloi berunding dalam ati diri. “Aku tu, suah bendar udah alah dikeduan Enchelegit. Lebuh aku bulih babi, bulih lelabi, bulih iken, iya ngaga diri nyadi ngingit lalu minta utai ari aku. Nya alai diatu manah aku malas,” pia ku iya bejaku.
Tiga lemai Apai Aloi udah berunding munyi nya, Indai Aloi pen lalu ngaga tumpi mulong. Lebuh Indai Aloi berengkeh ngirau mulong, dia Apai Aloi nurun ari rumah ke tanah, lalu belalai di baruh rumah, senentang Indai Aloi ke ngaga tumpi mulong. Nyadi hari maya nya nyau udah sabong petang. Enda lama udah nya, iya lalu berengkeh bemunyi,
“Barukep! Barukep! Barukep!
Minta tumpi mulong
“Barukep! Barukep! Barukep!
Minta tumpi mulong”
Lebuh Apai Aloi nyebut jaku nya, Indai Aloi endang ngelala nya jaku Apai Aloi laban iya enda ulih ngelalai ke idol lebuh iya bejaku.
Udah nya Indai Aloi lalu nyaut, “Anang guai dulu, tumpi apin mansau.” Udah nya Indai Aloi lalu nunu batu bulih mesai betis. Ninga Indai Aloi madahke apin mansau, Apai Aloi bejaku baru ga ari baruh rumah,
“Barukep! Barukep! Barukep!
Minta tumpi mulong
“Barukep! Barukep! Barukep!
Minta tumpi mulong”
“Nganti enda lama agi, nyau ke mansau, lagi baru meri nuan,” ku Indai Aloi nyaut ari dapor. Nyadi maya nya batu ke ditunu Indai Aloi apin chukup angat.
Lebuh batu nyau udah mansau bendar, Indai Aloi lalu ngangau ari dapor, “Nya tumpi mulong, sambut jampat ke ulih nuan!” ku Indai Aloi.
Ninga Indai Aloi ngangau, Apai Aloi lalu beguai nyambut ari baruh, laban iya ngumbai nya amat tumpi mulong ke dibuai Indai Aloi ari dapor. Disambut iya batu nya tadi lalu deka dipengkil iya enggau ngeli. Ensepi utai nya angat bendar, iya lalu nyeraoh. “Akei indai! akei apai! parai aku tu! Ambi aku, Aloi, ambi!” ku iya enggau sabak-sabak.
Nyadi lebuh nya Aloi enggau bala menyadi iya agi duduk di ruai, nganti tumpi mulong ke digaga indai sida mansau. Ninga bisi orang besai tuai nyabak di baruh rumah, Aloi lalu ngangau ke in¬dai iya.
“Indai! Sapa orang nyabak di baruh rumah dia?” ku Aloi ngangau.
Apai Aloi agi mengkeng nyabak di baruh rumah. “Akei rai! mati aku!” ku leka sabak iya.
Deka iya pulai, enda nemu jalai ngagai tangga, laban utai bangat petang enda peda achok mata. Nyau baka redup tiang rumah sida tu tempoh iya dalam petang. Papong tengkiong pen nyau baka setak kena sipak iya ke ngerijat nat ke pemedis abi betu. Udah nya baru Indai Aloi nyaut, “Sapa dih orang bukai, apai nuan mih nya”.
“Nama kebuah iya tak nyabak di baruh rumah dih, indai?” ku Aloi nanya indai iya baru.
Apai Aloi mengkeng ga nyabak ngangau ke Aloi, “Ambi aku, ambi aku, Oh Duat. Mati aku tu. Dada enggau jari aku betu laban batu, tunu indai nuan.”
“Alai mih Aloi, ambi mih apai nuan nya,” pia ku indai iya bejaku.
Aloi, laban ke mereti ke ulah apai seduai indai iya, lalu nurun mai sempun api lukai kena iya betenggau, mansang ngambi apai iya ke baruh rumah sida.
Datai Apai Aloi di rumah iya lalu nanya, “Oh, Indai Duat, kepa nuan meri aku batu tunu? Ukai nya ke dipinta aku,” ku iya bejaku agi enggau sabak.
“Ni aku nemu nya nuan, iya ga barukep ke bemunyi minta tum¬pi mulong. Nama kebuah nuan tak diau di baruh rumah besagam ngelaban petang dia? Ukai bisi utai ulih nuan dia. Aku ngaga tumpi mulong tu di bilik kitai ditu. Enti deka makai mulong, tak tama ke bilik kitu. Peneke ati nuan nyamah. Ukai nya orang bukai ke ngaga nya, bini nuan empu,” pia ku Indai Aloi nyaut sambil tuchum lelegup.
Udah mansau tumpi mulong, sida Aloi menyadi lalu sama makai mulong, tang Apai Aloi enda enggau makai mulong, laban betu ba dada enggau ba jari iya balat bendar. Udah badu makai mulong, nya baru Aloi seduai indai iya ngubat betu Apai Aloi.
“Kesih, kesih mih nuan Apai Duat, udah ga tambap, lap ga agi,” ku Indai Aloi bejaku.
“Eh! Enchelegit, anang bejaku agi! tindok kitai, lama lemai udah,” ku Apai Aloi. Udah nya sida sebilik lalu sama tindok magang. Tang Apai Aloi malam nya enda tentu jenak tindok, laban semua abi betu iya nyau berasai nyengut magang.
6. Ensera Aloi Mati Kentut
Nyadi jerita tu beduduk ari Aloi seduai Ini iya diau nyembuah kediri di Nanga Sungai ke dikumbai Sungai Isang Bebelit, Pati Batang Gelong. Seduai enda bangat jauh kulu. Orang ke diau ari ili seduai pen mayuh, ke nyau semak pasar ba Nanga Sungai nya.
Nyadi sekali nyepi diri nyau puas makai nadai laluk, dia Ini Aloi bejaku enggau Aloi. “Aloi, pama nuan undor ke pasar, ngipa utai ke laluk, nyau puas nadai laluk, nadai garam.” Ku iya.
“Au, aram mih Ini,” ku saut Aloi.
Udah nya seduai lalu beradu. Aloi tu tadi beradu baka ke enda, semina melit ke sirat sebelit aja,. Udah iya tembu melit ke anak sirat iya, Aloi lalu nurun minching sengayuh siti. Datai ba pengkalan, endang enda chechamang lalu nepan ke perau, lalu belabuh beKayuh penapat inat. Iya beKayuh sapagi-pagi. Peluh tudah Aloi ngenjing bekerenjoi nurun kening, ti baka iya bebaju endang sigi tentu basah laban peloh, tang laban iya enda bebaju. Nyau kalama-lama iya ke udah dugau-dugau beKayuh, dia dih iya ninga auh kukuk manuk. “Ah! Enda jauh agi pasar,” pia ku ati iya bejaku kediri berandau nengali. Nyau ke lama dinga gerong-gerong labu orang mansang nyauk datai ari atas. Ari maya nya nyau ke tengah hari.
“Nama nya nuan dih Aloi?” pia ku Ini iya.
“Nama nya nuan ga dih Ini?” ku saut iya. “Kemaya nuan datai ditu dih Ini?” ku iya nanya Ini iya.
“Nama utai ditanya ke nuan. Tu ga endang pengkalan kitai.” Ku saut Ini iya.
Angkat dih Aloi tu tadi enda ingat muke tali perau ari liking. Iya ke beKayuh nya tadi endang enda mindah ari pengkalan sida empu.
“Aih dih Aloi. Andal-andal aku ngumbai nuan udah datai di pasar meli laluk. Enti pia, aram mih tua sama undor ke pasar,” Pia ku Ini iya.
Ini iya lalu muke tali perau ari liking, serta ngejang ke luan perau. Seduai lalu berKayuh undur ngili ai Gelong. Apin bangat jauh udah seduai ngejang la pengkalan, dia Aloi lalu tepeda ke bangkei ukui. Aloi enda senunoh bendar, endang sebarang utai rara.
“Nama nya tak baka ukui tua dih Ini?” ku iya.
“Badu enda iya mih nya.” Ku Ini iya nyaut.
“Enda tua tau nyadi undor, Ini. Jai burung tua.” Ku Aloi.
Enda mih seduai nyadi undur ke pasar, laban udah meda bangkei ukui. Seduai iya ga jai burung.
Ukui nya udah mati kira dua tiga hari dulu ari nya, diatu iya nyau melepong laban udah bentut serta bau buot. Lebuh Aloi narit bangkei ukui dia iya nanya, “Kati alai bangkei ukui tu tak bebau dih Ini? Mati ukui tu?” ku iya.
“Au, udah mati mih nya,” Pia ku saut Ini iya. “Nama iya bebau sium nuan udah mati mih nya.” Ku Ini iya madahke Aloi.
Nyadi pagi siti Aloi seduai Ini iya sama tumu beradu deka undur ke pasar ngalu utai ke laluk. Seduai lalu sama nepan ngagai perau ti endang udah dibuke Ini Aloi lalu undur ngili Sungai. Kira tiga tanjong seduai udah undur ngili ke ai, dia seduai lalu betemu
enggau bangkei buot ukui tepenggai ba tugong reba ti betaket ba tengah ai. Bau bangkei ukui ngenjing nempoh lubang idong. Tang endang baka Aloi, sebarang utai rara.
“Kati alai ukui nya bebau Ini? Mati ukui nya?” ku Aloi.
“Au, mati mih ukui nya,” ku Ini iya nyaut.
Seduai pen majak ke diri berKayuh seruran regup-regup ngili ai. Nyau ke lama seduai ti udah beKayuh, dia dih Ini Aloi lalu kentut. Nyau berenyang asai perau kena kesuh kentut Ini Aloi, serta balat bendar bau. Laban iya ke luan nya alai bau kentut balat bendar ngesuh ngagai Aloi ti di kemudi, serta nempoh iya ke ngemudi.
“Apu! Mati mih Ini tu.” Pia ke Aloi bejaku dalam ati diri. Iya dipeda tusah ati. Luan perau lalu dituntung ke iya ngagai tebing. Ini iya lalu disangkei ke iya dia.
“Nama main nuan nyangkei ke aku ditu dah uchu?” ku Ini iya nanya Aloi.
“Nuan ga mati dih Ini,” Ku Aloi.
“Enda aku mati dih uchu,” Pia ku tudah Ini iya nyaut Aloi.
“Mati mih nuan. Nuan ga nyau bebau dih,” Ku Aloi ngelaban Ini iya dia.
Tanggong iya Ini iya ke tebing lalu kejang ke iya perau baru takut ke Ini iya ke udah mati nepan baru ku ati iya.
“Keba nuan tambap dih Aloi.” Ku Ini iya ngangau ari jauh.
Dia Aloi lalu mupuk beKayuh. Iya enda beduli ke kenggau Ini iya. Dia iya beKayuh kediri-diri ngili ai. Udah nya iya ninga burung richah. “Nama utai empa burung nya da dia?” ku ati iya. Datai iya ba senentang burung ke richah dia iya rangap-rangap mengkedah ketas. Peda burung mit enggau burung ke besai nya baka ke bebintih makai buah kara. Peda iya jelu anak pen ngemayuh nya. Da tan-tan ke iya perau serta rangap-rangap nengkedah burung enggau jelu ba pokuk kara. Sepi iya tak merubas tama rekung iya, tai engkarabak enggau tai burung labuh ari atas, lalu telan iya. “Ho! Udah mansau endar buah kara, nama tu tak nyau penat asai buah tu tama nyawa aku dih?” ku ati iya.
Nyau kenyang iya laban pemayuh tai jelu enggau tai burung ti labuh tama nyawa iya. Udah nya Aloi lalu beKayuh nat ke perut nyau segai kenyang. Lama agi segai agi ga asai perut iya. Purus iya perut sepi nyau tengelam belit sirat laban angin dalam perut. Apin bangat jauh ari nya dia iya lalu kentut inggar bendar. Nyau bernyang perau kena kesuh kentut Aloi.
“Apu!” ku iya .”Mati mih aku tu dih. Bau kentu Aloi nyau baka bau buot ukui. Aloi tu tadi lalu tusah ati berunding ke diri ti ke mati. Dia iya nyau enda engkebut duduk dugau-dugau ba kemudi perau. Sengayuh ke dikena iya nyau tebelengke ari jari. Perau iya
lepong-lepong rarat ngili ai. Lebuh iya mansa mayuh buah rumah orang, dia orang alit ati meda gaya iya. Ditanya orang iya endang enda nyaut laban udah mati.
Lebuh iya tepeda ke buah nyau mirah mansau, dia iya mengkalak. “Ah! Sayau mih aku tu udah mati. Enti aku enda udah mati, tentu aku ulih niki lalu makai buah nyin.” Ku iya bejaku kediri, berandau nengali. Mayuh macham buah bukai dipeda iya.
Ari ili nya dia iya meda orang nyual iken, undang, burung, keli enggau macham laluk bukai. Lebuh iya mansa pasar dia iya balat agi ga tusah ati. Orang ke bepensa enggau iya pen alit bendar ati iya tak beranyut enggau perau enda kebut-kebut. Nyau kalama perau iya nyau pansut ari nanga sungai ngagai tasik besai ledong lalinang. Dia iya lalu besatup enggau ribut ke bepuput bepulas uchong, angin ke bepusin puting beliong, kilat jampat ngelambai bungkung, guntur temepur inggar tetaung, bakul muat gelumbang besabong, mangke ke januar kepal lambong, putus serumbong patah singkilong rantai besi.
Nyadi perau Aloi ama tenggelam ama melepong ama telentang ama mengkenjong. Iya empu nyau tenggelam ditaban ke bangkung. Nadai agi pegari penjong, enggau orang ke Tanjong stak-stong, betumpu dan enggau wong tujuh beranggong, tuai sebayan ke dajan dulu pumpong, mandi di lepong mandai mati. Mati mih tudah Aloi nengali hari, parai mih Aloi nengali lemai, dajan mih tudah Aloi Tambap nyenggai bulan.
PENGULU EDWARD JALIN
