IS GOSPOTI Ab Albert Camus Sambahsa tarjem

PRETER DEIL I Mamma mohr hoyd. Au maghses ghes, ne woidim. Ho recept un telegramme ex id gerosdom : Mater decess. Dafan cras. Sellsto namos. To maynt neid. Kad to eet ghes. Id gerosdom est in Marengo, octgim kilometers dalg ud Alger. Emsiem id autobus ye dwo saat ed arrivesiem in id posmiddien. Katha, ghehdsiem wakhe ed gwirlaysiem cras vesper. Ho budto dwo diens ud mien bes ed is ne poiss mi refuse ia face un lik excuse. Bet is ne kwohk masrour. Ho hatta saygen ei : To ne est mien fault. Is ne mi hat antwohrden. Ho tun mohnen od ne habiem tohrben sayge to ei. In summ, io ne hieb ad ouzer. Anter is ge tohrb mi porge sien taziya. Bet is kwehrsiet to aundwoi poscras, quan is me vidsiet traurnd. Ye tod moment, est lyt kamsei mamma ne habiet mohrt. Pos id dafan, to sessiet pagen re ed hol habsiet esposen un officialer aspect. Ho emt id autobus ye dwo saat. Id weter eet chald. Ho mejen in Clestes restaurant, kam adet. Quanti spruv maung aytan dia me ed Cleste mi hat sayct : Hams tik ein mater. Quando ho abgwahn, me hant hamrahn tiel id dwer. Eem lyt sturdiht ob ho tohrben stighes do Emmanuels hem kay laune ud iom un swordo cravat ed un brachar. Is hat lusen sien oncle, oik munts pre. Ho curren kay ne lipses id asimat. Tod hast, tod drahsa, ob to hol aundwoi, addiht ibs takans, ei naftodor, ei reverberation ios strad ed ios waurn, ho vinarct. Ho swohpt unte quasi id hol itner. Ed quando ho gohrt, eem kneigvend protiev id flank uns askari qui mi hat smiht ed me hat sprohct an io gwohm dalgtos. Ho saygen ya kay neti tehrbe tolke. Id gerosdom est dwo kilometers dalg ud id village. Ho kwohrt id itner ped-ye. Ho vidskwt mamma fauran. Bet is bawab mi hat saygen od io tohrb ghate iom director. Dat is eet besic, ho skohpten lyt. Unte tod hol wakt, is bawab hat tolct ed dind, ho viden iom director : is me hat primen in sien bureau. Est un smulk veut, samt id Lgion dhonneur. Is me hat spohcen med sien clar okwi. Dind is me hat mussafahet tem diu quem io vidieum quosmed oistrage mien hand. Is hat perlisen un dossier ed mi hat saygen : Potnia Meursault entrit hetro tri yars pre. Yu eete ays wahid demskwr. Ho credihn od is mi miembh semject ed ho biexplien ei. Bet is me hat interrupt : Yu ne tehrpte justifie vos, dorgv yuwen.1

Ho list id dossier vosters mater. Yu khiek subvene ays naudhs. Ia tohrb un liekwakht. Voster salairs sont modeste. Ed, final-ye, ia eet norocter her. Ho saygen : Ya, poti Director. Is hat addihn : Yu woid, ia hieb prients, leuds os sien oumer. Ia ghohd diles con i sem interesses qua sont alyios tid. Ste yun ed ses con vos sollit plictisse iam. Eet ver. Quando ia eet domi, mamma passit sien wakt apterspehcend-ye me silent-ye. Unte sien presta diens in id gerosdom, ia plieng ops. Bet to eet ob id adet. Pos oik munts, ia habiet plangen sei ia habiet est oistract ex id gerosdom. Semper ob id adet. Lyt ob to unte id senst yar quasi neti ho gwahto tetro. Edschi ob to rlungdwienit mieno mingo aun conte id effort kay eme id autobus, kaupe tiquets ed kwehre dwo hors itner. Is director mi hat nabahn. Bet quasi neti klusim iom. Dind is mi hat sayct : Suppono yu vidskwte vies mater. Ho staht ub aun sayctum ject ed is mi hat proghangen kyid dwer. In id drab, is mi hat explien : Hams intikalt iam do noster smulk morghe. Kay ne impremes alters. Ielgs kun un pensionar mehrt, alters sont nerveus unte dwo au tri diens. Ed to difficileiht id service. Hams tohrt un ghehrd quer eent maung rlaurjiens, balbelnd in smulka grupps. Tieyceer quando gwohmam pri. Ed apter nos, ia conversations rinkiep. Swohn kam un psitaken stupen snatter. Ant id dwer os uno smulk treb, is director me hat likwt : Sranso ud vos, poti Meursault. Vos remano behandet in mien bureau. In principe, id dafan est previs pro dec saat aghyern. Habmos mohnen yu ghehdsiete it wakhe iam mortu. Oin senst werd : kwehkiet od vies mater hat ops expresst ad sien sokwis id vansch os ses begrabht religieus-ye. Me ho maimouriht med id necessar. Bet volim vos informe de. Ho danken iom. Mamma, aun ses atheiste, naiwo hieb mohnen gwiv de religion. Ho entren. Eet un baygh-ye clar kyal, blaychen med kalch ed covohrt med un stikelkrov. Eet meublet med stuls ed X-forme subdehmens. Dwo om ia, in id centre, tohl un jenasa covohrt med ids capak. Eent dyohrcta tik sem bleigu, payn dupt scruvs, stehlbe ep ia baurds kmehno med nuceglends. Prokwem id jenasa, eet un arab sanitara in albh kitel, un akster color chador ep sien cap. Ye tod moment, is bawab hat entret za me. Is hieb sollt curre. Is hat lyt balbalen : Hams tohgen iam, bet dehlgo disscruve id jenasa kay yu ghehdte vide iam. Is gwahsit prosch id jenasa quando ho halten iom. Is mi hat sayct : Yu ne eiskwte ? Ho antwohrden : No. Is hat se interrupen ed eem turben ob io khiss ne habiem dohlgen sayge to. Pos uno moment, is me hat spohcen ed me hat sprohct : Ma ? bet aun mambh, kamsei is istifsier. Ho saygen : Ne woidim. Tun, streikwnd sien albh moustache, is hat declaren aun spehce me : Ghabo. Is hiebit bell thark okwi, ed un lyt rudho teint. Is mi hat dahn un stul ed isswo hat sess ghom lyt apter me. Ia lieksuor hat stahn ub ed trohcen kyid udghang. Ye tod moment, is bawab mi hat saygen : Ia hat un ghayn. Dat io ne ghieb, ho spohcen iam sanitaru ed ho vis ia vohsit sub sien okwi un rica quod periembh ays cap. Ye id hoge aysios nas, ia rica eet platt. Tik id ielbhe ios rica eet vis in ays lige.2

Quando ia hieb abgwahn, is bawab hat baht : Vahm linkwes vos mon. Ne woidim qualg geste ho kwohrn, bet is hat nastahn apter me. Tod presence za me turbit me. Id kyal eet pleno med un bell fayront luce. Dwo crayks drohn protiev id stikelkrov. Ed khissim swehpen lambhnes me. Ho sayct ei bawab, aun volge kyom : Ste yu ter diutos ? Fauran is hat antwohrden : Penk yars kamsei is habiet pon aiw intizart mien suwal. Dind, is hat balbeln maung. Habiet maung staunen sei ei habiet esen saygen od is fineiheit ka bawab in id gerosdom os Marengo. Is eet sixgimquarat ed parisian. Ye tod moment ho interrupen iom : Ah ! Yu ne ste hetos ? Dind ho mohmen od pre me duce bei director, is mi hiebit bahto de mamma. Is mi hieb sayct od ia tohrb ses begrabhta baygh oku, ob in id plain id weter est warm, besonters in tod gaivia. Tun is me hat manthihn od is hieb gwiwt in Paris ed od ei eet difficil myehrse to. In Paris, manmos con el mohrt unte tri, yando quar diens. Her yu ne habte id wakt, yu ne habte bad realisen to kun yu tehrpte ja curre apter id daunoswogh. Eys gvibh hieb ei tun sayct : Tayc, ta ne sont jects ad narre ad poti. Is veut hieb erudht ed ouzert. Io hieb intervent kay sayge : Bet no. Bet no. Io pohnd quo is narrit prabh ed interessant. In id smulk morghe, is me hat manthiht is hieb entret id gerosdom ka nidehn. Dat is khissit se fit, is hieb-se propost pro tod place os bawab. Ho kauihn iom od in summ is eet un pensionar. Is mi hat saygen no. Me hieb ja ubfallt id weidos quosmed is sieyg : i, alters, ed rarer-ye i veuts, tolkend-ye dei pensionars ex qui sems ne eent ater quem is. Bet naturelika, to ne eet id sam ject. Is ge eet bawab, ed, unte un certaino meid, is hieb rects uper i. Ia lieksuor hat entren ye tod moment. Id vesper hieb gwohmen brusk-ye. Baygh oku, id noct hieb dusct uper id stikelkrov. Is bawab hat wohrten id mutaschalter ed ho est blins ab id stayg lucespreuz. Is me hat invitet ad gwahe id trapezariya kay diner. Bet io ne hungher. Is hat tun bohdt mi bringhes un tasse cafee-au-lait. Dat meg kamo cafee-au-lait ed is hat riken sem moment serter samt un tepji. Ho poht. Ho tun dumskwn. Bet ho kungen ob io ne wois an io poiss kwehre to ant mamma. Ho daumt, to hieb neid importance. Ho daht un cigarette ei bawab ed hams dumen. Ye uno moment, is mi hat sayct : Yu woid, ischi prients as Potnia vies mater vahnt gwehme ad wakhe iam. Est id swohd. Tehrbo vane stuls ed sword cofie. Ho sprohct iom an oino iom lampes ghohd ses gwest. Id cand ios luce ep ia kwit murs me strakih. Is mi hat saygen od to ne eet possible. Id installation eet it kwohrn : eet hol au neid. Neti ho maung-ye kaurn de iom. Is hat salgen, hat gwohmen tsay, hat disposen sem stuls. Ep oin ex ia, is hat kwinuwen sem tasses ambh un cofiedostkan. Dind is hat sess ghom face me, ocolo mamma. Eem za iam lieksuor, iamschi in id bund. Io ne vis quo ia kwohr. Bet yeji id mov aysen brakhs, io ghohd credihes ia mohsg. Id weter eet mild, id cofie hieb warmen me ed unte id ghyanen dwer entrit un odor om noct ed flors. Credeihm ho lyt raflat. Un streip me hat protiebudt. Ob io hieb clus mien okwi, id kyal mi hat kwohcto dar kweitoster. Ant me ne eet skadh ed cada object, cada angule, vasya curves3

oiskip samt un okwiveurnend kweitert. Ye tod moment hant i prients as mamma entret. Eent in summ un decen, ed snohgeer silent in tod blindend luce. Hant sess ghom aun stulknar. Io vis i kam ho naiwo vis anghen ed neid detayl iren ligen au iren povestis oiskiep me. Yed io ne ieur i ed mi eet difficil credihes in iro realitat. Quasi vasyas gwens vohs uno mandile ed id spartako quod king ir lendvo dar meis-ye stehlbihsit ir kowko gventer. Io hieb naiwo bad kaun kam gwiwotic ghohd ses anuas. Quasi vasyi wirs eent baygh maigher ed dohrj cannas. Quo in ir lieks ubfiell me eet od io ne vis ir okwi, sontern un aunarg diutis medsu un raugen nest. Kun hant sedden ghom, pleisti me hant spohcen ed nuken zakhmat-ye, ir lipps alnos praedden ab ir aundento stohm, aun od io ghohd woide kweter me saluteer we lit de un tick. Credeihm anter od me saluteer. Ye tod moment ho io bedyohrcen od vasyi sess face me yaund-ye ir caps, ambh iom bawab. Ho haben unte un khvil id joking pondos od eent ter kay judce me. Pau pos, un gwen hat biplangen. Ia sess ye id dwot rang, kohlt ab oinu sienen sokwnias, ed io dusvis iam. Ia pliengit med lytil cries, regular-ye : mi kwohk od ia naiwo stopiet. Alters tengier ne aure iam. Spohceer id jenasa au ir canna, au quodquid, bet spohceer tik tod. Ia gwen eepiplanct. Io baygh-ye stieun ob ne gnohsim iam. Habiem iskwno neti aure iam. Yed ne dursim sayge ay to. Is bawab se hat cliht kyam, hat baht ay, bet ia hat scusso sien cap, hat naplanct samt id sam regularitat. Is bawab hat tun gwohmto nieb me. Is hat sess ghom prokwem me. Pos un destull-ye longo moment, is me hat istikhbaret aun spehce me : Ia eet baygh bohnd con Potnia vies mater. Ia sayct od sa eet ays saul prientin her ed od nun ia neti hat anghen. Hams remanen it unte un khvil. Ia kwehsters ed sleucta ias gwen bihr rarer. Ia maung-ye snif. Bad ia hat swight. Neti swohpskwim, bet eem strak ed miena nugvers gvoleer. Taiper mi eet kados id silence tim quant leuds. Tik ex tid do tid, io ieur un aunsam blosk ed khiekim ghabe quo id eet. Fin-ye, ho vitarken od oiks bayna iens geronts sug id inner iren gians ed skapihr ta bizarre claps. Ies ne bedyohrc to tantghi absorpt in ira brens ies eent. Io hatta hieb id pondos od sa mortua, lyehgend medsu i, ne mieyn ject pro i. Bet nun credeihm od to eet un ghawo pondos. Wey quants hams pohn sem cofie, schohnken ab iom bawab. Dind neti woidim. Id noct hat passen. Mehmo od ye uno moment ho ghyanen mien okwi ed ho vis od ies geronts swohp duben ep se, ploisko oin qui, sieno mant ep id denwrnt sienen hands greipend sien canna, stier ad me kamsei is intizier tik mien gehren. Dind ho swohpyet. Ho gohrt ob miena nugvers semper meis gvoleer. Id dien slid ep id stikelkrov. Pau pos, oino iom geronts hat gohrn ed is hat maung-ye kwasen. Is spiu do uno mier careit handchirk ed ielg eysen spieumens eet kam un rehven. Is hat protiebudt alters ed is bawab hat saygen i dohlg abgwahe. Hant stahn ub. Tod negadab wakht hieb im dahn aschen liges. Salgend-ye, ed ye mieno megil staunen, vasyi me hant mussafahet kamsei tod noct unte quod ne hiebam bahn hieb criscen nies intimitat.4

Eem strak. Is bawab me hat ducen do sien logement ed ho ghohdt me lave lyt. Ho iter poht sem cafee-au-lait quod eet baygh lecker. Quando ho sals, id dien hieb alnos wust. Uper ia clins qua separent Marengo ud id mar, id waurn eet reudhosplen. Ed id wind quod swohbh uper ia brigh hetro un odor os sald. Un bell dien se preparit. Io ne hieb gwahn rur diutos ed io khiss quod plaisure habiem habt sayranend-ye sei ne habiet esen mamma. Bet ho skohpten in id ghehrd, sub un platane. Io ann id odor ios fresch ghom ed neti swohpskwim. Ho mohnen dei bureau colleghs. Ye tod saat, stahr ub kay gwahe orbate : pro me tod eet semper id meis difficil saat. Ho namohnt lyt de ta jects, bet buim distract ab un clocko quod swohn eni ia trebs. Buit talasch apter ia fensters, dind hol hat sakwnascen. Id sol hieb stight lyt hoger in id waurn : id biwiermit mien peds. Is bawab hat tohrn id ghehrd ed mi hat saygen od is director bud me. Ho gwaht eys bureau. Is me hat signiht un certaino numer documenten. Ho vis od is eet sworddut samt uno maschruu pantalon. Is hat ghens id telephone aurer ed is hat wohkwt me : Ies daunos employeits sont ter pon un moment. Vahm budes ke gwehment ad clude id jenasa. Volte yu prever vide vies mater ye un senst ker ? Ho saygen no. Is hat wohlen do id telephone khafyeihnd-ye sien voc : Figeac, saycte ibs wirs poittent gwahe. Dind is mi hat saygen is prispehciet id dafan ed ho danct iom. Is hat sedden ghom apter sien scribtable, hat crucet siena smulk jambs. Is me hat warnen od ego ed is esiemos saul, con iam dejour sanitaru. Per prabhil, pensionars ne poiss prispehce dafans. Is sis i tik wakhe : Est un question os humanitat, hat is kaun. Bet, ye cid fall, is hieb ijaben id autorisation os sehkwe id convoy uni veut prient as mamma : Thomas Prez. Tun hat is director smihn. Is mi hat saygen : Ghapte, est un lyt magvisk khisses. Bet is ed vies mater pau likweer mutu. In id gerosdom, eet scherzen de i ed saygen ad Prez : Ia est vies fiancee. Is ge glih. To plaisit i. Ed in fact Potnia Meursaults mohrt hat iom maung affecen. Ne ho credihn ei refuse id autorisation. Bet sekwent id radh ios visitant liek, ei ho banen id ghestern wakht. Hams remant silent destull diu. Is director hat staht ub ed hat spohct per id fenster siens bureau. Ye uno moment, is hat observet : En ja iom pleban os Marengo. Is udwakt. Is me hat maunt od tehrbiemos ghange minst-ye tri quardels hor kay gwahe id kyrko quod est in idswo village. Habmos stighto ghom. Ant id treb eent is pleban ed dwo ministrant pwarns. Uter dohrj uno mijmer ed is pryster se clih kyom kay panges id longe ios argwrnten zangir. Quando hams arriven, is pryster hat stauto tsay. Is me hat kalt mien sunu ed mi hat sayct oik werds. Is hat entren; ho sohkwn iom. Ho glazt od ia scruvs ios jenasa eent dupt ed od eent quar kyehrsen wirs in id kyal. Ho aurt sammel iom director mi sayge od id wogho skohpt ep id strad ed iom pryster inkape eys prehgens. Ab tod moment, hol hat jinkdout baygh oku. Ies wirs hant gwahn perodh kyid jenasa con un drap. Is pryster, eysi chelds, is director ed ioswo habmos salgen. Ant id dwer eet un potnia io ne gnohsim : Poti Meursault, is director hat sayct. Ne ho aurn id nam tas potnia ed ho tik5

preten od ia eet delegeit sanitara. Ia hat inclinet aun smeiho sien ostic ed long lige. Dind hams ardehn-se kay sines id nayv prigwehme. Habmos sohkwn iens bertors ed salgen id gerosdom. Ant id dwor eet id wogh. Vernisset, oblong ed smeuk, id mehnih de un pennscrin. Ant id eent is diadehtor, smulk wir samt joking vesters, ed un skayvspeudo geront. Ho ghaben is eet Poti Prez. Is vohs un fedora samt rundo tackya ed plaut leizd (is hat giowen id quan id jenasa hat gwohmen pri id dwor), un costume quos pantalon kriemp uper eysa schous ed un node ex swordo stoff pior smulk pro eys camisso samt mier albh colnier. Eys lipps trembleer ender uno nas comspergen med sword nuktas. Eys destull teun albh kayso sis prioscille curieus dusdacht aurs quom sehrgrudh color in tod pallo lige me ubfiell. Is diadehtor nos dahsit nies places. Is pleban proghieng, sohkwn ab id wogh. Ambh id ies quar wirs. Apter id, is director, ioswo ed, ye alaycaud, ia delegeit sanitara ed Poti Prez. Id waurn eet ja solplen. Id bivyig uper id ardh ed id gvrens oku ieug. Io ne woid ma habmos skohpto destull diu pre bighange. Mi eet warm subter mien deusk vesters. Is smulk veut, qui se hieb rekufyet, hat iter giowt sien hat. Io hieb lyt volgen kyeys gon, ed eem spehcend iom kun is director mi hat bahto de iom. Is mi hat sayct od ops miena mater ed Poti Prez ee-sayrane vespers tiel id village, hamrahn ab un sanitaru. Io spohc id rur ambh me. Per ta cypressen lignes qua duxeer ibs clins prokwem id waurn, tod ruoss ed glend ghom, ta rar ed suarissen doms, io comprehens mamma. Id vesper, in tod land, sollit ses kam uno melankholic tregv. Hoyd, id uperwarm sol quod trehsihsit id landspect id kwohr inhuman ed depremant. Hams bighanct. Ye tod moment ho bedyohrcen od Prez mulayim-ye claudicit. Id wogh eegaissgaint syrat ed is geront eeleusleust plor. Oino iom wirs quoy periembh id wogh se hieb sisen udgwahe ed ghiengit nun nieb me. Eem surpris ab id okutat samt quod id sol stigh in id waurn. Ho bedyohrcen od ja diutos in id ruro drohn insectenkan ed grasreusa. Swoid srusit ep mien gians. Dat io ne hieb hat, io me swins med mien handchirk. Is daunos employeit mi hat tun sayct semject ne ho aurn. Sammel is tiersit sien ghalv med un handchirk is dohrj in sien levter ghesor, id dexter ayrend id rand siens kulah. Ei ho sayct : Pardon ? Is hat repetihto deikend-ye id waurn : Gvereht. Ho saygen : Ya. Lyt pos, is me hat sprohct : Est vies mater ter ? Ho iter sayct : Ya. Eet ia veut ? Ho antwohrdt: Katha, ob ne gnohsim id exacto ciffer. Dind is hat tayct. Ho volgen ed ho viden iom veut Prez ye penkgimtia metern apter nos. Is hiestit se wipeihnd-ye sien fedora ye id bors om sien brakhs. Ho spohcen iomschi director. Is ghieng samt maung decos, aun inutil geste. Oik swoidghutts perleer ep eyso chol, bet is ne tiers ia. Mi kwohk od id convoyo ieg lyt meis oku. Ambh me eet semper id sam gwayder rur uperpehldend med sol. Id diewarg eet nestehmim. Ye oino moment, hams uperghanct un part ios strad quod hieb est nuper rekwohrt. Id sol hiebit spragen id katran. Peds dub tetro ed likw idso smeuk pulp ghyanen. Uper id wogh, id hat ios cocher, ex yohst lieter, kwohk esus dighen ex tod sword slamm. Eem lyt6

lusen inter id blou ed albh waurn ed id monotonia tom colors, sleibic sword ios spragen katran, tarn sword iom povestis, laquen sword ios wogh. To hol, id sol, id odor om lieter ed spyra ios wogh, tod ios verniss ed tod ios timian, id strieke unios neswohpen noct, troublit mien spect ed mien idees. Ho vols iter meis : Prez mi hat kwohct baygh dalg, lust in un gvrensnebos, dind ho neti dyohrct iom. Ho paursken iom med mien spect ed ho viden is hieb likwt id strad ed gwaht poldskeir. Ho constaten odschi ant me id strado tour. Ho ghaben od Prez qui gnohsit id land kwohr id cortst itner kay navaxe iom. Ye id skamb is hieb jointo nos. Dind hams lusen iom. Dind is hat kwohryen itner poldskeir ed it plurs. Ego khiss mien sehrgo quod stus protie mien skolfas. Hol hat passarto dind samt tant precipitation, yakinia ed natural, quem neti mehmo ject. Tik oin : ye id entrat ios village, ia delegeit sanitara mi hat bahn. Ia hieb un aunsam voco quod ne dohbh ays lige, uno melodieus ed tremblant voc. Ia mi hat sayct : Sei gwahms lent-ye, riskmos nrischay. Bet sei gwahms pior oku, transpirems ed in id kyrk nos forkheuldmos. Ia sieyg prabh. Ne eet solution. Ho dar gwupt oik images ex tod dien : mathalan, id lige os Prez quando, ye id senst ker, is nos hat joinen prokwem id village. Taungh dakrus om erghen ed pein rohn ep eysa gians. Bet, ob eys raugs, ne abdohneer. Ia se ster, joineer mutu ed skip un aqua verniss ep tod destruct lige. Buir dar id kyrk ed i villagers ep ia trotuars, ia rudha gerania ep ia tumbhs ios cimtier, id bayaldissen os Prez (is kwohkit kam un disloquen marionette), id sehrgcolor ardh quod rollit uper id jenasa as mamma, id albh krewos iom raudhs qua se bliend ei, dar leuds, vocs, id village, id skehpten ant un cafee, id aunstop snarcen ios motor, ed mien joy quan id autobus hat entret id lucen nest os Alger ed kun ho mohnen vahsim lyehge ghom ed swehpe unte dwodem hors. II Gehrnd-ye, ho ghaben ma mien bes hieb tengiet rhayr masrour quando hiebim buden mien dwo cungeiddiens ud iom : hoyd est sabd. Io hieb in druve myohrsen to, bet stahnd-ye ub, to mi hat enfallen. Mien bes, alnos naturelika, hat mohnt habiem it quar ferias dien con mieno mingo ed to khiek plaise iom. Bet hois, to ne est mien fault sei mamma buit begrabht ghes vice hoyd ed ciois, habiem dact mien sabd ed mieno mingo zowngschie. Weidwos, to ne mi stambht comprehende lakin mien bes. Mi buit difficil stahe ub ob eem strakihn ab ghes. Menxu io me xur, ho daumt quod vahsim kwehre ed ho decis gwahe me balnye. Ho emen id tram kay gwahe id balnyen xitu ios port. Ter, ho mergen do id passe. Eent maung yuwencs. Ho retrohft in id wed Marie Cardona, un prever teipster miens bureau quam io hieb wohnt ye tod zaman. Iaschi hieb, credeihm. Bet ia hieb likwt lyt pos ed wey ne hieb haben id wakt. Ho hohlpt iam ad stighes ep un schamandura ed, unte tod mov, ho strifen ays pizda. Eem dar in id wed quando ia lyohg ja brous ep id7

schamandura. Ia hat volgen kye me. Ia hiebit sien kays in sien okwi ed ia glih. Ho glohmbern nieb iam ep id schamandura. Id weter eet khauris ed, kam per jok, ho sis mien cap ihes retro ed ho deht id ep ays gventer. Ia hat sayct neid ed ho remanen it. Io hieb id waurn in mien okwi ed id eet blou ed golden. Sub mieno neuk, io khiss Maries gventer bate mliak-ye. Habmos manto diu ep id schamandura, pwolswehpend. Quan id sol hat bihn pior akster, ia hat mergen ed ho sohkwn iam. Ho navaxt iam, ho deht mien hand ambh ays lendv ed hams comsnaht. Ia dar glih. Ep id quie, menxu wey turs, ia mi hat sayct : Som bruner quem yu. Ho sprohct iam an ia gwohmskwit do kino, hovesper. Ia hat iter gliht ed mi hat sayct ia wohnit smauter un film con Fernandel. Quando hams redut, ia hat tengien baygh surpris ab vide me samt un swordo cravat ed hat me sprohgen an eem traurnd. Ho sayct ay od mamma hieb mohrn. Dat ia gnohskwit pon quando, ho antwohrdt : Pon ghes. Ia hat lyt staut retro, bet ne hat nabaht. Ho wohnen ay saygen od to ne eet mien fault, bet ho halten ob ho mohnen io hieb ja saygen to mieni bes. To mieynit neid. Zowngschie, smos semper lyt faultic. Ye id vesper, Marie hieb myohrsen quant. Id film eet goil unte moments ed finye druve-ye pior cacavan. Ayso jamb eet protie mieno. Caressim ays pizda. Ambh id end ios smauter, ho kussen iam, bet khak-ye. Salgus id kino, ia hat gwohmto do mien hem. Quando ho gohrt, Marie hieb abgwaht. Ia hieb mi explien ia dohlg faungmoene sien tante. Ho mohnt od eet mingo ed to me hat plictisset : ne kamo mingos. Tun ho volgen in mien crovat, ho paursken in id bolster id odor os sald quod Maries kayso hieb likwn ter ed ho swohpen tiel dec saat. Ho dumto dind cigarettes, dar lyehgend, tiel middien. Ne obeddskwim bi Cleste kam adet ob, sigwra, mi habient iskwn werds ed ob ne kamo to. Ho pohkwt mi oivs ed ho ess ia ex idswo pliat, aun dvan ob io neti hieb sem ed ob ne stighskwim ghom kay kaupe sem. Pos obedd, me ho lyt plictissen ed ho erren in id appartment. Id eet gadab quando mamma eet ter. Nun id est pior miero pro me ed ho tohrben transporte do mien kamer id meja. Gwivneum tik in tod kyal, inter ia stuls ex lyt disstohven kalm, id schkaf quos specule est gohlben, id beauteitstable ed id cupern crovat. Id reste est diskaurn. Lyt serter, kay kwehre semject, ho ghens un veut journal ed ho list id. Ho bohrdto tetos un reclame iom Kruschen salds ed ho glimt id do un veut cadern quetro dehm ia jects qua me zalisse in journals. Ho yaschi laven mien hands ed, in id end, ho sedden ep mien balcon. Mien kamer uperspehct id magno strado ios suburb. Id posmiddien eet bell. Lakin, id pavement eet piwer, i leuds rar ed dar hirsic. Preter eent familias qua gwahr sayrane, dwo smulk pwarns in naut costume, ira brugs haltend uper ir genus, ed una smulka kweil samt un taungh pembo node ed sword vernisset schous. Apter i, un enorm mater, in rogv ex karag silk, ed is pater, uno smulk destull smiegd wir quom vidgnohm. Is vohs un canotier, uno muschdiemen ed dohrj un canna. Vidend-ye iom con eys gvibh, ho ghapt ma in id quartier eet saycto de iom od is eet mumtase. Lyt serter prighieng ies yuwens ios suburb, laquet kays ed rudh cravat, id jaquet baygh-ye kohmbert, samt un altiet pochette8

ed quadratborsa schous. Ho mohnt ies gwahr ia kinos ios centre. Itak abgwahr tem aus ed spohdeer kyid tram gleihnd-ye tem honar-ye. Pos iens, id strad hat bihn lyt ed lyt desert. Ia skaus hieb inkapt quantloc, credeihm. Eent ep id strad ne meis quem dukandars ed cats. Id waurn eet kweiter bet aunarg uper ia ficus qua leizde id strad. Ep id anti trotuar, is tabakdukandar hat salgihn un stul, hat installen id ant sien dwer ed hat riden id kneigvend-ye med sien dwo brakhs ep ids clintor. Ia nuper uperplen trams eent quasi tuich. In id smulko cafee : Chez Pierrot, nieb id tabakdukan, is garson firschit kussut in id desert locanda. Eet druve-ye mingo. Ho wohrten mien stul ed ho placen id kam tod ios tabakdukandar ob ho pohnden to eet gadaber. Ho dumen dwo cigarettes, ho vanen entro un schtuk chocolat ed ho riken edde id claus id fenster. Pau pos, id waurn hat bihn dengu ed ho credihn vahsam subihes un lient aumber. Hat lakin kwikwoityet. Bet id pertu iom nebsen hieb likwn ep id strad kam un seuy promiss quod hieb id kwohrn deusker. Ye penk saat, tramvias hant arriven honar-ye. Brigheer tsay ex id suburb stadium grwozdus om spectators perchet ep ia ubgwaders ed galenders. Ia sehkwnda tramvias hant brighen tsay iens leikers ho recognihn ob ir smulk valises. Ies hul ed sohngveer med plen pulmons od ir club ne nehciet. Plurs mi hant znaycen. Oino mi hat hatta criet : Hams vicen iens. Ed ho baht : Ya, neukend-ye. Ab tod moment, autos hant bistrohmt. Id sol hat lyt-ye stighto ghom. Uper ia tects, id waurn hat regwen ed, dat id vesper inkiep, ia strads hant bihto chepran. I spasserers eereireikent. Ho recogniht iom mumtase poti medsu alyens. I purts plieng au se siseer sehlke. Quasi fauran, ia kinos ios quartier hant sikwen do id strad un flutt spectatoren. Bayna ti, i yuwencs hieb gestes gwaukaner quem biadet ed ho mohnen i hieb smautert un aventuren film. Ti qui rik ex ia urbkinos arriveer lyt serter. Kwohkeer graver. Dar glihr, bet ex tid do tid, tengier strak ed khayalend. Habent manen ep id strad, gwigwahnd ep id anti trotuar. Ias gwenaks ios quartier, lutkays, dohrj mutu per ia brakhs. Ies yuwens hiebeer pliohgen prighange ians ed mlur scherza de qua ias glihr diswehrtend ir caps. Plurs ex ians, quans gnohsim, mi hant znayct. Ia fanars buir tun daght brusk-ye ed hant palliht ia prest istars qua wus in id noct. Ho khissen mien okwi strakasce ob spehce ia trotuars con ir onos menscen ed lucen. Ia lampes leucihr id smeu pavement, ed ia tramvias, ye regular intervalls, glimmerihr uno smeuko kays, uno smeih au un argwrnten brakhlett. Pau pos, samt ia ja rarer tramvias ed id ja sword noct uper drus ed lampes, id quartier hat tuichasct rhayr kheissas-ye, hin el prest catis tohr lent-ye id iter deserto strad. Ho tun mohnen io tohrb diner. Me lyt gvolit mien coll ob manus diu kneigvend ep id clintor os mien stul. Ho stighen ghom kauptum dvan ed pasta, ho cocen ed ho edden stahnd. Ho dumskwt un cigarette claus id fenster, bet id air hieb khuldasct ed mi buit lyt srig. Ho cluden mien fensters ed reikendye ho viden in id specule un schtuk meja quer mien spiritlampe stahsit nieb

9

dvanschtuks. Ho mohnen od to eet iter oin khatem mingo, od mamma eet nun begrabhen, od vahsim eme tsay mien orbat ed od, in summ, neid hieb changen. III Hoyd ho maung orbaten in id bureau. Is bes hat est maedwn. Is me hat sprohct an ne eem pior strak edschi is hat gnohskwt mammas oumer. Ho saygen sixgimtiat, kay ne rhalte ed io ne woid ma is hat tengiet ses rohmen ed aye to un khatem besoyn. Eet un kowp conosmenten qua se kwinuw ep mien table ed ho tohrpto perilises vasya. Pre linkwes id bureau kay gwahe obessum, ho laven mien hands. Middiens, kamo tod moment. Vespers, me plaist minter ob id rollhandtuko quod neudmos est alnos madh : id hat daughen unte id hol dien. Ho saygen tod remarke sem dien ad mien bes. Is mi hat antwohrdt is pohnd to regretet, bet od to eet lakin un aunahammiyato detayl. Ho salso lyt sert, ye middien trigim, con Emmanuel, qui orbat in id expedition service. Id bureau uperspehct id mar ed hams lust un khvil observend-ye ia cargonavs in id solgverehnd port. Ye tod moment, un onwogh hat arrivet samt un behngos om zangirs ed explosions. Emmanuel me hat sprohgen an gwahsam tetro ed ho bicurren. Id onwogh hat udiht nos ed hams inkapt apterdrahe id. Eem endermergen in blosk ed duil. Neti visim ject ed khissim tik tod aunaurdhen elan ios drahsa, medsu ia wincha ed ia machines, ia masta qua diens ant id horizont ed ia scrocks engwn qua gwahsam. Ho trohven sprijin ka preter ed ho priskanden. Dind ho hohlpt Emmanuel ad sedde ghom. Eemos exter annem, id onwogho gvohmb ep ia sanscha adoquins ios quie, medsu duil ed diewo. Emmanuel glih hina kwehse. Hams arriven uperswoidus bi Cleste. Is eet semper ter, samt sien piwon gventer, sieno mandile ed sien albh moustaches. Is me hat sprohgen an lakin io lit wal. Ei ho saygen ya ed od io hungher. Ho mejen baygh oku ed ho pohn cofie. Dind ho gwirlayt, ho swohpt lyt ob io hieb drohnct pior vin ed, gehrendye, ho dumskwt. Eet sert ed ho curs kay kape un tram. Ho orbaten unte id hol posmiddien. Baygh gverehsit in id bureau ed ye id vesper, salgus, ho esen norocto de ghange dom lent-ye engwn ia quies. Id waurn eet glend, io me khiss masrour. Lakin, ho gwirlayn direct-ye ob mi yohsskwim kartoffels. Steighend-ye, in id temosto drab, ho prihurt iom veut Salamano, mien plornieber. Is eet con sien kwaun. Sont vis com pon oct yars. Is epagneul kwehndt un rudho dedru, credeihm, quod leuseiht iom quasi eys quanta drighs ed quod stehct iom med dedruks ed brun khassas. Pelu gwegwivus con iom, bo saul in uno smulko kamer, is veut Salamano hat vikwohken kam is. Is hat subrudh khassas ep sien lige ed eysa drighs sont gehlb ed rar. Is ge kwaun hat emen ud sien poti un sorte os wonk speud, sieno naster perodh ed xyangend. Tengient ex id sam genos yed detestent mutu. Dwis cadadien, ye oindem ed octdem saats, is veuto duct sien kwaun ad sayrane. Pon oct yars, ne hant10

changen ir itner. Ghehdent ses vis engwn id Rue de Lyon, iom kwaun tragend iom mensc hin is veut Salamano kwehlpt. Is plact tun sien kwaun ed hakaret iom. Is kwaun rempt ob dekhschat ed se sint sehlke. Ye tod moment, zaruri est ei veuti trage iom. Quan is kwaun hat myohrst, is dreibht iter sien poti ed is biht iter plagen ed hakaren. Tun, bo mane ep id trotuar ed spehcent mutu, is kwaun samt terror, is mensco samt haines. Est it cadadien. Quan is kwauno minghskwt, is veut ne ei lasst id wakt pro ed tract iom, iom epagneul sehnd un sohlka smulken ghutten apter se. Sei kjiawxieng, is kwaun kwehrt in id kamer, tun is biht iter plact. To dureneut pon oct yars. Cleste semper sayct od to est biedan, bet, in druve, nimen ghehdt woide. Quando ho incontret iom in id drab, Salamano eet hakarend sien kwaun. Is ei sieyg : Caltak ! Lesch ! ed is kwaun gyiep. Ho sayct : Sell vesper, bet is veut nahakarit. Tun ho io sprohct iom quod is kwaun hieb ei kwohrn. Is ne mi hat antwohrden. Is tik sieyg : Caltak ! Lesch ! Io tierk iom, clihn uper sien kwaun, arrangend semject ep id zgarda. Ho bahn jaharer. Tun aun volge, is mi hat antwohrden samt un sorte os arcto rage : Est dar ter. Dind is hat abghangen tragend-ye iom biest qui se sisit sehlctum kwetwerpod, ed gyiep. Just ye tod moment hat entret mien dwot plornieber. In id quartier, est saygen od eys parwarisch est gwens. Quan is est sprohgen de sien kasseb, yed, is est magasinier . Daydey est pau kamen. Bet is mi tolct ops ed semkers oispendt un khvil in mien hem ob kleum iom. Pehndo quo is sayct interessant. Eti, ho neid sababo bi quod ne tolke ei. Eys nam est Raymond Sints. Is est destull smulk, samt plaut omsa ed un boxer nas. Is est semper dut baygh correct-ye. Isschi mi hat sayct, tolkend-ye de Salamano : Kam biedan to est ! Is me hat sprohct an to ne me mierz ed ho antwohrden no. Habmos stighen ed vahsim linkwes iom quan is hat mi saygen : Ho in mien hem blutwurst ed dvan. Kwe yu eiskwte meje un schtuk con me ?... Ho mohnen od to mi vergeihiet coce ed ho accepten. Isschi hat tik oin kamer, samt un aunfenster cucin. Uper eys crovat, sont un angel ex albh ed pemb stuck, photos om champions ed dwo au tri clischees nogwen gwens. Id kamer eet murdar ed id crovato disstert. Is hat preter daghen sien tienhuy, dind is hat salgiht un destull dubieus plastire ex sien gep ed hat vulbht sien dexter hand. Ho sprohgen iom quod is kwohnd. Is mi hat saygen is hieb drauct protiev un type qui iskwit naos ud iom. Ghapte, poti Meursault, ego ne som peigher, bet som elangver. Alter mi hat sayct : Steigh ex id tram sei es un wir. Ho sayct ei : Hay, reman sakwn. Is mi hat sayct od ne eem un wir. Tun ho stighen ex ed ho saygen ei : Basta, est gohder pro te, sons vahm zrehle te. Is mi hat antwohrden : Quod tar ? Tun ho birt ei oin. Is hat fallt. Ego vahsim hehlpe iom ad restahe. Bet is mi hat birt kalcs ghomtos. Tun ho birt ei oin genucutt ed dwo choyks. Eys enokwo sohrg. Ho sprohgen iom an is hieb sien conto. Is mi hat saygen : Ya. Unte tod hol wakt, Sints arrangit sien plastire. Io sess ep id crovat. Is mi hat saygen : Yu vidte ne ho iskwn to. Is ge me hat prilipsen. To eet ver ed ho11

recognihn to. Tun is mi hat declaren od, chiowdeo, is budskwit un radh ud me de tod re, od ego, eem un wir, gnohsim gwit, od io ghohd hehlpe iom ed od dind is esiet mien rafik. Ho saygen od to mi eet egal : is hat tengiet masrour. Is hat salgihn blutwurst, hat pohkwn id med id tanjar, ed hat stern glasa, talers, bestehg ed dwo botels vin. To hol in silence. Dind hams emen place. Mejend-ye, is hat mi binarren sien storia. Is preter kung lyt. Ho gnoht un potnia... ghehdt ses sayct ia eet mien parika. Is wiro protie quom is hieb katuet eet is brater tas gwen. Is mi hat saygen is hieb subvenen ays parwarisch. Ne ho antwohrden ject yed is hat addihn is wois quo eet saygen in id quartier, bet od eys ment eet netaraght ed od is eet magasinier. Kay gwehme do mien storia, hat is mi ayt, ho bedyohrct eet venchen. Is ay dahsit uno minimal parwarisch. Isswo pieygh id kira aysios kamer ed ay dahsit dwogim francs cadadien pro pieut. Tricent francs pro id kamer, sixcent francs pro pieut, un pair chorapen ex tid do tid, to kwohr mil francs. Ed madame ne orbiet. Bet ia mi sieyg to eet gnebh, od ia ne nohs met quo ay dahsim. Yed, io ay sieyg : Ma ne orbats tu unte un pwoldien ? Me suarehmies pro ta quan smulk jects. Ti ho kaupen un ensemble homunt, tib paygho dwogim francs cadadien, tib paygho id kira, ed tu pohs cofie posmiddiens con tien prientins. Tu iabs dahs id cofie ed id suker. Ego tib dahm ia denars. Ho suaagen con te ed tu mi dusredahs to. Bet ia ne orbiet, ia semper sieyg ia ne nohs ed katha ho bedyohrct eet venchen. Is mi hat tun narren is hieb trohft un loterie bild in ayso sack ed od ia hieb khact ei explie quosmed ia hieb kaupt id. Lyt serter, is hieb trohven bay un deiken ios tangpfu quod pruv ia hieb enghigteln dwo brakhletts. Tuntro, is ne gnohsit id existence tom brakhletts. Ho suaviden eet venchen. Tun ho likw iam. Bet preter, ho plact iam. Dind ho saygen mien vertats de iam. Ho saygen od quanto ia volit eet glewos con sien ject. Kam ho ay to saygen, yu ghapte, poti Meursault : Ne vids od id mund jalouset id noroc tib dahm. Tu gnohsies serter id noroc tu hieb. Is hiebit plageln iam tiel cruor. Prever, is ne eeplagelt iam. Io plieg iam, bet tender-ye kay sayge ver. Ia lyt cricit. Io clus ia stavens ed to ens kam semper. Sekwent me, ne ho kafi punihn iam. Is mi hat tun expliet od is nieudh un radh ob to. Is hat halt kay adjuste id swordaydend fitil ios lampe. Ego dar klu iom. Io hieb drohncto takriban oin liter vin ed mien skolfas baygh-ye gverehr. Io dum ia cigarettes os Raymond ob neti mi resteer sems. Ia sensta trams prirolleer ed abdribh ia nun piern bloska ios suburb. Raymond hat nabahn. Quo troublit iom, eet od is dar hieb un sentiment de yehbhe iam. Bet is punihskwit iam. Is hieb preter mohnen de duce iam do un hotel ed kale id moren police kay cause un scandal ed ardhmihes iam ka prostitut. Dind, is hieb wohkwn sem prients is hieb in id milieu. Ies hieb trohven neid. Ed kam Raymond me kauih to, ses member ios milieu hieb daught ei ka neid. Is hieb saygen ibs to ed ies hieb tun propost marke iam. Bet to ne eet quo is volit. Is vahsit namehne de. Prever, is oisprohcskwit me de semject. Eti, pre12

sprehge de, is gnohskwit quo io mieyn de tod storia. Ho antwohrden od mieynim neid de id, bet od to eet interessant. Is me hat sprohgen an io mieyn kwe eet venchen, kwe io pohnd ia dohlg ses punihn ed quod kwehriem instet iom, ho ei sayct od nimen ghohd aiwo gnohe, bet io comprehens is punihskwit iam. Ho drohnkyen lyt vin. Is hat daghen un cigarette ed mi hat aunstohgen sien idee. Is ay scripskwit un brev med kalcs ed sammel jects kay regretihes iam. Pos, quando ia reikiet, is yehbhiet iam ed just ye id finmoment, is oispieuiet kyep ays enokw ed dehiet iam extro. Ho ghi pohndt od, med tod weidos, ia esiet punihn. Bet Raymond mi hat saygen is ne khiss kabil os scribe id tohrben brev ed od is hieb mohnen de me kay redage id. Dat io sieyg neid, is me hat sprohct an mi eet nao kwehre to fauran ed ho antwohrdt no. Is hat tun staht ub pos drehnkus oin glas vin. Is hat arken ia talers ed id pau os srig blutwurst wey hieb etilikwn. Is hat kaur-ye tiergen id woxto sukno ios meja. Is hat ghenden ex un liachic sienios nocttable un schid os careit papier, un gehlb vulbh, uno smulk penkalem ex rudho dreu ed un quadrato divite os violetto tint. Quan is mi hat sayct id nam ias gwen, ho woiso sa eet una Maur. Ho kwohrt id brev. Ho script id lyt-ye towsraen, bet me ho strohnct ad contente Raymond, ob io hieb neid sababo bi quod ne contente iom. Dind ho lisen id brev jahar. Is me hat klun deumend-ye ed neukend-ye, dind me hat prohgen ke relises id. Is hat est alnos masrour. Is mi hat sayct : Eem yakin tu woid quo gwit est. Preter ne ho bedyohrct is me wohkwit med tu. Bad quan is mi hat declaren : Nun, es un druv rafik, hat me to ubfallen. Is hat repetiht sien jumla ed ho saygen : Ya. Mi eet egal ses eys rafik ed is druve-ye tengicit wehne to. Is hat pechaten id brev ed hams drohnken id reste os vin. Dind hams remanto deumend unte un khvil aun sayge werd. Exo, quant eet sakwn, hams aurt un prisnehgend auto. Ho saygen : Est sert. Raymond isschi mieyn to. Is hat kaut od wakt oku passit ed, in un sense, to eet ver. Swohpskwim, bet mi eet difficil stahe ub. Ho sollto tengie strak ob Raymond mi hat sayct od io ne dohlg neti kaure de meswo. Preter, ne ho ghaben. Is mi hat tun expliet is hieb matht mammas mohrt bet od to eet un jecto quod sollit tyehce ye sem dien au alyo. Toschi eet mieno mayn. Ho staht ub, Raymond hat me mussafahet nert-ye ed mi hat sayct od wirs semper comprehenseer mutu. Salgus eys hem, ho zaghyant id dwer ed ho mant unte un khvil in id temos, ep id drabplor. Id dom eet sakwn ed ex ia dubes ios nardban stigh un obscure ed madh blahsa. Io ieur tik ia bats os mien sehrgo quod drohn protie mien aurs. Ho stahn still. Bet in id kamer ios veut Salamano, is kwaun hat gyapto stump-ye. IV Ho suaorbat unte id hol hevd, Raymond hat gwohmt ed mi hat sayct is hieb yist id brev. Ho gwahn kino dwis con Emmanuel qui ne semper ghapt quo jinkdout ep id ecran. Tehrbo tun ei dahe explications. Ghes eet sabd ed Marie hat13

gwohmen, kam hiebam dohbht. Ho baygh wohnt iam ob ia vohs un bell rogv samt rudh ed albh rais ed lietern sandals. Ays kaurd pizda eent tarkim ed id brun ud id sol ay dahsit un flor lige. Hams emen un autobus ed hams gwahn oika kilometers dalg ud Alger, ep un strand anght inter perwnts ed lizdt med neds ep landgon. Id sol os quar saat ne eet pior chald bet id wed eet tepid, samt long ed adriug smulk volns. Marie mi hat docen un leik. Wey tohrb, snahnd-ye, pohe ex id volnencrest, kowpe in sien stohm id hol skum ed lyehge dind ep sien regvo kay xubhes id waurntro. To kwohr tun un spoimic dantelle quod disparihsit in id air we nifiell ka tepid seuy ep id lige. Bet pos sem wakt, mien stohm eet prust ab id saldem. Marie me hat tun joinen ed hat glohmern engwn me in id wed. Ia hat dehn sien stohm protie mien. Ays dingv refreschit mien lipps ed hams rollt in ia volns unte un khvil. Quando hams redun ep id strand, Marie me spohc med bleigu okwi. Ho kussen iam. Ab tod moment, neti hams tolken. Ho dohrjt iam protie me ed buam urgen ad trehve un autobus, ad gwirlaye do mien hem ed ad nos xubhes ep mien crovat. Io hieb lassen mien fenster ghyant ed eet khauris khisses id lient noct srues ep nies brun corpsa. Todeghern, Marie hat mant ed ho ay saygen wey comobeddiems. Ho stighen ghom kay kaupe miems. Steighend-ye retro, ho aurn un gwen voc in Raymonds kamer. Lyt pos, is veut Salamano hat grinten sien kwaun, hams aurn un blosk om swauls ed noghs ep ia dreun stieupens ios drab dind : Caltak, lesch , hant sals do id strad. Ho narren ad Marie id storia ios veut ed ia hat glihn. Ia vohs oino mienen pyjamas quos armels ia hieb slahn ub. Quando ia hat glihn, ho iter wohnen iam. Uno moment pos, ia me hat sprohgen an io liubh iam. Ho ay antwohrden od to mieynit neid, ed od mi kwohk od ne. Ia hat tengiet yui. Bet preparend-ye id obedd, ed ob neid, ia hat iter tem gliht quem ho kussen iam. Ye tod moment hant ia bloska uns dispute udbrohgen in Raymonds hem. Hams preter aurt un acut voc as gwen dind Raymond qui sieyg : Me has prilipsen, me has prilipsen. Vahm tib dikes kam est prilipses me. Oik stumpa bloska ed ia gwen hat hulen, bet tem terrible-ye quem fauran id drabplor hat pohldt med leuds. Marie ed ego hams weyschi salgen. Ia gwen dar cricit ed Raymond dar plieg. Marie mi hat sayct od to eet terrible ed ho antwohrdt neid. Ia me hat prohgen ke vane un agent, bet ho ay sayct od io ne kiem agents. Yed hat arrivet oin con iom mustajer ios dwot etage qui est plumbher. Is hat studen id dwer ed neideti buit aurn. Is hat stus nerter ed pos uno moment, ia gwen hat planct ed Raymond hat ghyanen. Eyso stohm dohrj un cigarette ed is tengicit suave. Ia bent se hat precipiten kyid dwer ed hat declaren ei agent od Raymond hiebit plagen iam. Tien nam, hat sayct is agent. Raymond hat antwohrdt. Strag tien cigarette ex tien stohm quando me wehkws, hat sayct is agent. Raymond hat kunct, me hat spohct ed hat kauct ex sien cigarette. Ye tod moment, is agent hat schamarno brutal-ye eyso giano med un teug ed gwaur latmah. Id cigarette hat fallt oik meters dalger. Raymond hat mutaliget, bet is ne hat sayct werd ye tod momento dind hat sprohct med un humil voc an is poiss14

ghende ub sien papiross. Is agent hat declaren is poiss ed is hat addihn : Bet niebs ker, woidsies un agent es neis guignol. Unte tod wakt, ia bent plieng ed ia hat repetihn : Is me hat plagelt. Is est un pesvenke. Poti agent, hat tun sprohct Raymond, kwe est in id loy, sayge pesvenke uni wir ? Bet is agent hat wohlen iom clude sien muk. Raymond hat tun volgen kyam bent ed ay hat saygen : Skehpt, smulka, siem retrehve te. Is agent hat ei saygen clude id, od ia benta dohlg abgwahe ed is mane in sien kamer skehptend-ye ses kyuken do id police station. Is hat nabahn od Raymond dehlgiet aygve ehgvus hina tremble kam is kwohr. Ye tod moment, Raymond hat ei explien : Ne som ehgvus, poti agent. Men stahm her ant vos, ed io tremble, mi est dwight. Is hat cluden sien dwer ed vasyi leuds hant diswaurs. Marie ed ego habmos zapreparen id obedd. Bet ia ne hungher, ho edden quasi hol. Ia abgwahsit ye oin saat ed ho lyt swohpt. Ambh tri saat, mien dwer buit studen ed Raymond hat entren. Ho nalyohct. Is hat sess ghom ep id leizd os mien crovat. Is hat remanen unte un khvil aun bahe ed ho sprohct iom kam hieb eys affaire passaren. Is mi hat narret is hieb kwohrt quo is iskwt bet od ia hieb ei birt un schamar ed od tun is hiebit plageln iam. Id reste hieb io vis. Ho ei saygen od mi kwohk od nun ia eet puniht ed od is sollit ses masrour. Toschi eet eys mayn, ed is hat observet quodkwe is agent kwehriet, is changiet neid ibs cutts ia hieb kwohnden. Is hat addiht is suagnohsit agents ed od is siegv circumvene iens. Is me hat sprohct an io hieb skohpten is apokwihsit id schamar ios agent. Ho antwohrden io skohpt khich eti od io ne kiem agents. Raymond hat tengien baygh masrour. Is me hat sprohgen an sielcskwim con iom. Ho stahn ub ed me ho bipohken. Is mi hat sayct io tohrb ei daughe ka weitwodd. Mi eet to egal, bet io ne gnohsim quo io tohrb sayge. Sekwent Raymond, kafi eet declare od ia bent hiebit prilipsen iom. Ho accepten ei daughe ka weitwodd. Habmos salgen ed Raymond mi hat schohnken un glas liqueur. Dind is hat licskwt biliard ed ho gnebh lusen. Is dind gwahskwit bordell bet ho sayct no ob ne kamo to. Tun hams gwirlayn lent-ye ed is mi sieygit kam masrour is eet ob kamyabus punihes sien parika. Iom pohndim baygh latif ed ho mohnen od to eet un khauris moment. Dalgtos, ho dyohrct ep id soyl iom veut Salamano qui tengicit taraght. Quando hams gwohmen prosch, ho vis od is neti hieb sien kwaun. Is spohc bachimien, parvols, tentit transdyehrce id temos ios dikhliz, muticit aunsehkwa werds ed spohcyit id strad med siena smulk rudh okwi. Quando Raymond iom hat sprohgen quod is ieg, is ne hat antwohrden fauran. Ho vagh-ye aurn is murmurit : Caltak, lesch, ed is eet nataraghen. Iom ho sprohcto quer eet eys kwaun. Is mi hat brusk-ye antwohrdt od is hieb abkwetwerpohden. Ed stayg is hat tolken volubil-ye : Ho duct iom do id Champ de Manoeuvres, kam adet. Eet menegh, ambh ia balakhans. Ho halten kay smauter iom Roy os Oiskapologia. Ed quando ho abgwahskwn, is neti eet ter. Weidwos, diutos ei eekaupneuskwim

15

un minter mier zgarda. Bet habiem naiwo crediht so lesch ghehdiet skape katha. Raymond ei hat tun expliet is kwaun hieb ghohden se forkwetwerpehde ed od is vahsit gwirlaye. Is ei hat citet exempels kwaunen qui hieb andhto decens kilometern kay retrehve ir poti. Nespekent to hat is veuto tengieto taraghter. Bet iom ghendsient ud me, ghapte. Sei bariem semanghen preimiet iom. Bet to ne es possible, is marz vasyanghen ob sien khassas. Ies agents kapsient iom, sure. Ho sayct ei tun od is tohrb gwahe id public kuneina ed od is ei esiet redaht po id payghen sems ujrat. Is me hat sprohct an tod ujrat eet alt. Io ne wois. Tun is hat grasbanasct : Dahe denars po tom lesch. Ah ! nehctu ! Ed is hat bihakaret iom. Raymond hat gliht ed penetret id dom. Ho sohkwt iom ed hams likwt mutu ep nies drabplor. Sem moment serter, ho aurn id stieup ios veut ed is hat stus mien dwer. Quando ho ghyant, is hat manen unte un khvil ep id soyl ed is mi hat saygen : Excuset me, excuset me. Ho inviten iom ad entre, bet is ne hat volen. Is spohc id bors om sien schous ed eys khassawent hands trembleer. Aun face me, is me hat sprohgen : Ne vahnt ies ghende iom ud me, saycte, poti Meursault. Vahnt redahe iom mi. Sons quod vahm io bihe ? Ho ei sayct od id public kuneina gwup kwauns tri diens behandet ab ir potis ed od dind id kwohr timmed quo id volit. Is me hat spohct silent-ye. Dind is mi hat saygen : Sell vesper. Is hat cluso sien dwer ed ho aurn iom gwigwahe. Eys crovat hat cracken. Ed ob id bizarre lytil blosko quod hat tohrn id tabique, ho ghapt is plieng. Io ne woid ma ho mohnen de mamma. Bet io tohrb stahe ub aus posdini. Io ne hungher ed me ho cubhen aun diner. V Raymond mi hat telephonen do mien bureau. Is mi hat saygen od oin eysen prients (is hieb ei tolcto de me) me invitit ad spende id mingo in sien bungalow, prokwem Alger. Ho antwohrden od gwehmiem gairn, bet od hiebim promitten mien dien uni prientin. Raymond mi hat fauran declaren is invitit iamschi. Ia esor eysios prient esiet baygh masrour os ne ses saul medsu un wiren grupp. Ho fauran enhancskwn ob io woid is bes ne kamt od nos sia telephonen urbtos. Bet Raymond me hat prohcto ke skehpte ed is mi hat sayct is habiet ghohdt mi transmitte tod invitation hovesper, bet od is me wiernskwit de alyo ject. Is hieb esen sohkwn unte id hol dien ab un grupp Araben bayna quens wohs is brater eysias prever parika. Sei vids iom prokwem id dom hovesper gwirlaynd-ye, warn me. Ho saygen od eem tamam. Pau pos, is bes me hat kaliht ed, unte tod moment, ho khissen zakhmat ob ho mohnen is vahsit mi sayge telephone minter ed orbate gohder. Nel-ye eet it. Is mi hat declaren is vahsit mi tolke de un dar baygh vagh project. Is gnohskwit tik mieno mayn de tod question. Is iskwit installe un bureau in Paris quod esiet besic med eys verslyn ep stet, ed direct-ye, con ia megil compagnies ed is16

woidskwit an eem suamenos de gwahe tetro. To mi permittiet gwive in Paris edschi safer unte un part ios yar. Ste yun, ed mi kwehct od to est un gwit quod soll plaise vos. Ho saycto ya bet od fin-ye to mi eet egal. Is me hat tun sprohgen an io ne eem interessen ab un gwit change. Ho antwohrdt od anghen naiwo mutagwiviet, od in quant fall quanta wirt mutu ed od mieno ter me nel-ye desplaisit. Is hat tengien rhayr masrour, mi hat saygen od antwohrdim semper goni, od io ne hieb ambition ed od to eet desastreus in verslyn. Tun ho riken orbate. Habiem milen ne miscontente iom, bet ne visim sababo bi quod change mien gwit. Suamehnend-ye de, ne eem biedan. Quan eem studyent, io hieb maung talg ambitions. Bet quando ho tyohgvt mien studyes, ho oku ghaben od to eet aun real ahammiyat. Ye id vesper, Marie me hat vanen ed me hat sprohgen an wohdskwim iam. Ho saygen od to hol mi eet egal ed od maghiemos sei ia volit. Ia hat tun gnohskwn an io liubh iam. Ho antwohrden kam io hieb ja kwohrn oins, od to mieynit neid bet od aundwoi ne liubhim iam. Ma tar wehde me ? hat ia ayt. Ay ho expliet od to hieb neid importance ed od sei ia wohn, maghiemos ghame. Eti ia ge prohsc ed ego me contentim med sayge ya. Ia hat tun observet od gham eet un grave ject. Ho antwohrden : No. Ia hat swighen unte un khvil ed me hat spohcen silent-ye. Dind is hat baht. Ia mer-ye gnohskwit an habiem acceptet id sam prehscen ud alyu gwen, quay esiem lika bohnden. Ho saygen : Naturelika. Ia hat tun daumen an ia me liubh ed ego, khiekim woide jecto de tod point. Pos alyo moment silence, ia hat murmuren od eem bizarre, od ia me liubh aundwoi ob to bet kad sem dieno marziem iam bi ia sam sababs. Dat io tieyc, habend neid addeihtu, ia hat ghenden mien brakh smeihnd-ye ed hat declaren ia snumpskwit me. Ho antwohrdt kwehriems to yant ia eiskwiet. Ho ay tun tolken de id behd ios bes ed Marie mi hat saygen ia kamiet gnohe Paris. Ho manthihn iam od io hieb gwiven ter unte un tid ed ia me hat sprohcto kam id eet. Ho ay saygen : Est murdar. Sont pigeons ed temost ghehrds. Id cuit im leuds est pall. Dind habmos ghangen ed tohrn id urb unte ids magna strads. Ias gwens eent bell ed ho sprohgen Marie an ia kieu to. Ia mi hat saygen ya ed od ia me comprehens. Unte un khvil, neti hams tolken. Io lakin volim ke ia mien con me ed ho ay saygen od miegham diner bi Cleste. Ia suawohn to, bet ia hieb kwehrtu jects. Eems prokwem mien hem ed ho ay saycto do reviden. Ia me hat spohcen : Ne gnohskws tu qua jects ho kwehrtu ? Acceptim gnohe ia, bet io ne hieb mohnto de ed to tengicit ia mambhe mi. Tun, ant mien zakhmatwent wultu, ia hat iter glihn ed ia hat moven kye me sien hol corpos kay mi rege sien stohm. Ho dinert bi Cleste. Io hieb ja biess kun entrit un bizarre smulka gwen qua me hat sprohct an ia poissit sedde claus mieno meja. Naturelika ia poiss. Ia hieb saccadata gestes ed bleigu okwi in uno smulk apel-lik enokwo. Ia hat abdeht sien jaquet ud se, hat sess claus ed hat perilist febreus-ye id menue. Ia hat kalt Cleste ed hat hangjowt fauran eys quant pliats med un sammel precis ed hastic17

voc. Skehptend-ye ia hordovers, ia hat ghyant sien sack, hat salgihto tetos uno smulko quadrat papier ed uno molive, hat hissapt in avance id addition, dind hat tract ex un gussett, auct med id schabasch, id exact summ ia hat placet ant se. Ye tod moment, ay buir bright sem hordovers ia hat guraghen syrat-ye. Skehptendye id sehkwnd pliat, ia hat iter salgiht ex sien sack un blou molive ed uno majalah quod dik ia radiophonic programmes ios hevd. Meg kaur-ye, ia hat strichen ein pos ein quasi vasya irsals. Dat id majalah mathmounit decen pagen, ia hat nakwohrn tod orbat meticuleus-ye unte id hol chifan. Menxu io hieb ja zamejen, ia dar strich tem kaur-ye. Dind ia hat stahn ub, hat redun sien jaquet med ia sam precisa gestes as automat ed ia hat abgwahn. Dat io hieb neid kwehrtu, ioschi ho sals ed ho sohkwt iam unte un khvil. Ia hieb staht ep id trotuarpriem ed samt incredible syrat ed yakinia, ia kwohr sien itner aun se extrehpe ni volge. Ho vilust iam ud vid ed ho stiupt retro. Ho mohnt ia eet bizarre, bet ho myohrst iam destull oku. Ep mien soyl, ho trohft iom veut Salamano. Ho entriht iom ed is me hat manthiht eys kwaun eet forlusen, is ghi ne eet in id public kuneina. Ies employeits hieb ei saygen kad is hieb esen epterwohghen. Is hiebit sprohct an ne eet possible woide to in police stations. Ei hieb esto antwohrdt od solg jects ne eent recorden, ob wakyeer cadadien. Ho saygen ei veut Salamano is maghiet habe alyem kwaun, bet is hat bahn prabh kaueihnd-ye me od is swohd tom. Eem ahocken ep mien crovat ed Salamano hieb sedden ghom ep un stul ant id table. Is facit me ed eys dwo hands eent ep eysa genus. Is hieb navohsen sien veut fedora. Is giuter schtuks om jumlas sub sien gohlben moustache. Is me plictissit lyt, bet io hieb neid kwehrtu ed ne swohpskwim. Kay sayge semject, ho interroget iom de eys kwaun. Is mi hat sayct is hieb habt iom pos id mohrt siens esor. Is hieb ghamto destull sert. Unte sien yuwent, is hieb wohnen age theatre : in sien regiment is ieg in ia militar vaudevilles. Bet is hieb viorbaten pro ia railvias ed is ne regretit to, ob is nun hieb uno smulk pension. Is ne hieb esen norocto con sien esor, bet in summ is hieb dohbro viswohden iam. Quan ia hieb mohrt, is hieb khissen baygh mon. Tun, is hiebit buden un kwaun ud un atelier dust ed is hieb haben tom, dar baygh yun. Is hieb tohrben piutes iom med un deihbotel. Bet dat un kwaun gwivt minter quem unis mensc, ies hieb vibihn veut com. Is hieb duspinseing, mi hat sayct Salamano. Ex tid do tid, nos phiegam con mutu. Men is eet lakin un sell kwaun. Ho sayct is eet os bell race ed Salamano hat tengiet masrour. Eti, hat is nabahn, yu ne habte gnohn iom pre eys dedru. Eys drigh eet quo is hieb bellst. Ielg vesper ed ielg aghyern, pon is kwaun kwohnd tod dedru, Salamano ee-ehngwneut iom med meklemm. Bet sekwent iom, eys druv siuge eet geros, ed geros ne schifet. Ye tod moment, ho ghiht ed is veut mi hat mohldt is vahsit abgwahe. Ho ei saygen is poiss mane, ed od eem taraghen ab quo hieb wakyet eysi kwaun : is me hat danct. Is mi hat sayct od mamma kiemit meg eys kwaun. Tolkend-ye de iam, is kiel iam vies orm mater. Is hat emiss id supposition od sollim ses baygh biedan pon mammas mohrt ed ho antwohrden neid. Is mi hat tun saygen,18

baygh oku ed samt un zakhmatwent protiokwo, od in id quartier io hieb esto duskohnst ob io hieb dehno miena mater do id gerosdom, bet is me gnohsit ed is wois io kiem baygh mamma. Ho antwohrdt, ne woidim iter ma, od ne eegnohneum tuntro od eem duskohnsen de to, bet od id gerosdom hieb mi kwohken semject natural chunke io ne hieb kafi denars kay uperwakhihes mamma. Eti, ho io nabahn, ia hieb diutos neti ject ad sayge mi ed ia se plictissit mon. Ya, hat is mi saygen, ed in id gerosdom, anghen gain dustens. Dind is hat-se excusen. Is swohpskwit. Eys gwit hieb nun changen ed is ne pior gnohsit quo is vahsit kwehre. Ye id prest ker pon gnohsim iom, med un discreto geste, is hat regen sien hand kye me ed ho khisst ia squams os eys cuit. Is hat lyt smiht ed pre abgwahe, is mi hat saygen : Spehm i kwauns nien baue honoct. Semper credeihm est mien. VI Mingo, mi buit difficil gehre ed Marie hat tohrben kale ed scutte me. Ne hams edden ob volam nos balnye aus. Io khiss alnos tuich ed kwohnd un lytil khaketha. Mien cigarette hieb un bitter gust. Marie hat goilt me ob ia sieyg io hieb un dafan cap. Ia hieb dun un rogv ex albh woibh ed lun sien kays. Ho ay saygen ia eet bell, io hat gliht ob plaisure. Steighend-ye ghom, habmos stus Raymonds dwer. Nos hat antwohrden is vahsit gwehme. Ep id strad, ob mien strieke edschi ob wey ne hieb ghyanen ia miechstavens, id diewo, ja pleno med sol, me hat placto kam un schamar. Marie skiend ob joy ed eebibaht id weter eet bell. Ho khisst waler ed ho bedyohrct io hungher. Ho sayct to ad Marie qua mi hat diken sien sack ex woxto sukno quetro ia hieb dehno nies dwo yukwis ed un katife. Io tohrb tik skehpte ed hams auren Raymond clude sien dwer. Is vohs un blou pantalon ed un albh camisso samt cort armels. Bet is hieb kufyet un canotier, quo hat glihiht Marie, ed eys bagus eent baygh pall sub sworda drighs. To me mierz lyt. Is oiswih steighend-ye ghom ed tengicit baygh masrour. Is mi hat saygen : Salut, veut, ed is hat kalt Marie potnika. Perdini hiebam gwaht id police station ed io hieb weitwodden ia bent hiebit prilipsen Raymond. Ei buit infligen un warnen. Mien affirmation ne buit controlen. Ant id dwer, hams tolcto de to con Raymond, dind hams decis eme id autobus. Id plaj ne eet baygh dalg, bet gwahiemos meis oku it. Raymond mohn eyso prient esiet masrour os vide nos arrive aus. Vahsam abgwahe quando Raymond, fauran, mi hat znayct spehce perodh. Ho viden un grupp Araben kneigvend regv-ye protiev id fassade ios tabakdukan. Spohceer nos silent-ye, bet ye ir weidos, neter meis ni minter quem sei esiems petras au tursta drus. Raymond mi hat sayct od is dwot levtos eet eys type, ed is hat tengien beswurghen. Is hat nabahn od, yed, to eet nun un khatem storia. Marie ne meg suaghieb ed nos hat sprohgen quod wakyit. Ay ho sayct ies eent Arabs quoy19

pigher dia Raymond. Ia hat volen kem abgwahsam fauran. Raymond hat staun tsay ed hat glihn saygend-ye od wey tohrbam spehde. Hams gwaht kyid bus stop quod eet lyt dalger ed Raymond mi hat mohldt ies Arabs ne sohkweer nos. Ho volgen. Stahr dar ye id sam stet ed spohceer samt id sam indifference id loco quod hiebam just likwn. Hams emt id autobus. Raymond, qui kwohk alnos rohmt, eeschischerzt pro Maria. Ho khisst ia plaisit iom, bet ia ei antwohrd quasi neid. Ex tid do tid, ia spohc iom gleihnd-ye. Habmos stighen ghom do id suburb os Alger. Id plaj ne eet baygh dalg ud id bus stop. Bet hams tohrpto tehre uno smulko plateau quod uperkeiht id mar ed nisteurdt dind kyid plaj. Id eet tohgen ab subgehlba petras ed alnos albh asphodels ender id ja kaurd azur ios waurn. Marie se zalissit med skendhes ir petals beirnd-ye mier cutts med sien sack ex woxto sukno. Hams ghanct inter massafs om smulk villas samt glend au albha barriers, sems bedohlven con ir verandas sub ia yilgins, alters bare medsu ia petras. Pre arrive ep id leizdo ios plateau, ja ghohd ses viden id still mar ed dalger un raflatic ed massive rass in id kweiter wed. Uno mulayim motorblosk hat ludt in id sakwn air tiel nos. Ed hams vis, baygh dalg, uno smulk trawler quod fanzowit perodh, imperceptible-ye, ep id argu mar. Marie hat karpen oika ghianshiek iris. Ud id kleitu quod stighit ghom kyid mar, hams vis eent ja oik balnyers. Raymonds prient wik uno smulk dreun bungalow ye id bors ios plaj. Id domo knigvit caud-ye protie perwnts ed id galgon quod stohm id front-ye ja miedh in id wed. Raymond nos hat presentet. Id nam eysios prient eet Masson. Eet un buland plautoms type, con un smulk schischmav ed latif esor, samt parisian accent. Is hat fauran sayct nos yowasce ed od eet un pisken friture qui is hieb yaghen todeghern. Ho ei saygen kam jamile io pohnd eys dom. Is me hat manthiht is eespendt ter sabds, mingos ed sien hol cungeiddiens. Mien esor ed ego suabeidmos mutu, hat is nabaht. Chiowdeo, eys esor glih con Marie. Ye maghses id prest ker, ho druve-ye mohnt vahsim ghame. Masson men nigvieskwit, eys de esor ed Raymond ne gwohmskweer. Wey tri habmos stighen ghom ed Marie se hat fauran xubhen do id wed. Masson ed ego hams lyt skohpten. Is ge bahsit lent-ye ed ho kaut is swohd complete quantum is swohrit med un ed saycsiem meis, hatta quando, fin-ye, is addih neid ei mayn os sien jumla. De Marie, is mi hat saygen : Ia est perbleufend, ed saycsiem meis, khauris. Dind ho neti kaut tod tick ob eem besic med spruves od id sol mi eet sislew. Id sand bichals ender ia peds. Ho dar kunct id wehnos io hieb os wed, bet ho visayct Masson : Smad gwahe tetro ? Ho mers. Is ge hat entren id wed mliak-ye ed se hat xubhen quan is hat lusen id grund. Is brasse-ye tem dussnahsit quem ho likwn iom kay joine Marie. Id wed eet srig ed eem masrour de snahe. Marie ed ego hams comsnahn dalger ed wey khiss tamam in noster gestes ed nies contentement. Apo, hams kwohrn el mortu ed ep mien waurnwort lige id sol ierk ia sensta wedkehlders qua sru do mien stohm. Hams vis od Masson ghohd tsay id plaj kay lyehge ender id sol. Dalgtos, is kwohk enorm. Marie hat volt ke comsnahsam.20

Me ho dehn apter iam kay kinges ays lendv ed ia snahsit perodh med id nerce om sien brakhs menxu io hohlp iam med mien pedbats. Id lytil blosk ios tuden wed nos hat sohkwt in id aghyern hina me khissim strak. Tun ho likwt Marie ed ho snaht retro suaannmend-ye regular-ye. Ep id plaj, ho lyohgen brous prokwe Masson ed ho dehno mien enokwo do id sand. Ei ho saygen od to eet khauris ed is mieyn id sam. Pos pau, Marie hat gwohmt. Ho vols kay spehce iam gwahe perodh. Saldwed alnos visk iam ed ia dohrjit sien kays caudtro. Ia hat lyigen sien flank protie mien ed ia dwo gvrensa aysios corpos ed ios sol me hant lyt swehpiht. Marie me hat scuss ed mi hat sayct od Masson hieb regwirlayt ub, wey tohrb obedde. Ho staht ub fauran ob io hungher, bet Marie hat mi sayct od io ne hieb kussen iam pon todeghern. To eet ver yed io wohn to. Gwehm do id wed, hat ia mi ayt. Hams curs kay strahe in ia presta smulk volns. Hams tyicen oik brasses ed ia hat glohmert protie me. Ho khissen aysa jambs protie mien ed ho nafsanen iam. Quando hams rict, Masson ja kiel nos. Ho saygen od io baygh hungher ed is hat declaret fauran sieni esor od plaisim iom. Id dvan eet lecker, ho praedden mien part pisk. Eent dind miems ed pommesfrites. Wey quant ess aun bahe. Masson drohnk ops vin ed mi eeschischehnct sem. Ye id moment ios cofie, mien cap lytye dusiesc ed ho maung dumen. Masson, Raymond ed ego, hams kwenchaut comspende august plaji, ye smyohrt costa. Marie nos hat fauran saygen : Yu woid quod saat id est ? Est oindem saat trigim. Wey quanti stieun, bet Masson hat saygen od wey hieb mejet baygh aus, ed od to est natural ob id saat ios obedd, eet id saat kun anghen heunghert. Io ne woid ma to hat glihiht Marie. Credeihm od ia hieb lyt pior-ye drohnct. Masson me hat tun sprohct an sayrienskwim con iom ep id plaj. Mien esor semper siest pos obedd. Ego ne kamo to. Tehrbo ghange. Ay semper saygo to est gohder pro sieune. Bet, pos quant, to est ays rect. Marie hat declaret ia maniet kay hehlpe Potnia Masson ad spules id vescell. Ia smulk Parisian hat saygen od pro to, ies wirs tohrb extro. Wey tri habmos stighen ghom. Id sol fiell quasi lodhseid ep id sand ed ids arg ep id mar eet nestehmim. Neti eet anghen ep id plaj. Ud ia bungalows qua lizd id plateau ed uperkihr id mar, eent aurn bloska om talers ed bestehg. Anghen ann payn in id petra gvrens quod lud swoltos. Kay inkape, Raymond ed Masson hant tolcto de jects ed leuds io ne gnohsim. Ho ghapt od gnohr mutu diutos ed od ies hieb hatta comgwiven ye un tid. Hams trohcen kyid wedum ed engwn id mar. Semkers, uno smulk volno longer quem alter gwohm ad smues nies woibhen schous. Io mohn de neid ob eem pwolswehpihn ab tod sol ep mien bare cap. Ye tod moment, Raymond hat sayct semject ad Masson quod ho dusaurt. Bet ho sammel dyohrcen, ye id piernst bors ios plaj ud nos, dwo Arabs in overall quoy gwohm kyant nos. Ho spohcen Raymond ed is hat saygen : Est is. Habmos naghangen. Masson hat sprohgen quosmed ies habient ghohden sehkwe nos

21

tetro. Ho mohnt ies habient sollt vide nos eme id autobus samt un plajsack, bet ne ho sayct ject. Ies Arabs hieb ja stohmben meg proscher. Wey ne hieb mutaspudt, bet Raymond hat sayct : Sei es draug, tu, Masson, ghendsies iom dwot. Ego me maimoureihm med mien type. Tu, Meursault, sei alyos arrivet, is es pro te. Ho sayct : Ya ed Masson hat deht sien hands do sien geps. Id uperwarm sando mi kwohk rudh nun. Stiupam regular-ye perodh kyens Arabs. Id distance inter nos hat naminct. Quando habmos stahn oika stieups dalg ud mutu, ies Arabs hant halten. Masson ed ego habmos nilento nies kadam. Raymond hat gwaht seid kye sien type. Ho dusaurn quo is ei hat sayct, bet alter hat simulen chuoke iom. Raymond hat tun plagen ye un preter ker ed is hat fauran kalen Masson. Masson hat gwaht kye tom qui hieb ei est kyust ed is hat placto dwis med sien hol vyige. Is Arab se hat stern do id wed, face protie bund, ed is hat manen oik secundes it, burbules peungend do id surface, ambh sien cap. Entrim Raymond isschi hat plact ed alters cap eet cruorwent. Raymond hat vols kye me ed hat sayct : Vahs vide quo is vaht kwehnde. Ei ho crien : Zinhaar, hat un kniv ! Bet ja Raymond hieb sien brakh ghyanen ed sien stohm scidden. Masson hat klaupen perodh. Bet alter Arab hieb stahn tsay ed hieb-se placet apter tom qui eet armet. Ne hams dursen move. Hant stohmben retro, spispehcend nos ed titehrgend nos apo med id kniv. Quando hant vis ies hieb kafi plor, hant mwaungsout baygh oku, menxu eestitahmos sub id sol ed Raymond dier sien cruorgheuttend brakh. Masson hat fauran sayct od un liek eespendt mingos ep id plateau. Raymond hat gwahskwn tetro strax. Bet ielgs kun is eebaht, id cruor eysios vurnos eetyityeict burbules in eyso stohm. Habmos oistohmt iom ed hams rict ei bungalow oku possiblest. Ter, Raymond hat saygen eys vurnsa eent superficial ed od is ghohd gwahe bei liek. Is hat abgwaht con Masson ed ho mant kay explie iabs gwens quo hieb wakyet. Potnia Masson plieng ed Marie eet baygh pall. Me ge plictissit iabs explie. Ho viswighen ed ho dumen spehcend-ye id mar. Ambh oin saato trigim, Raymond hat riken con Masson. Eys brakh eet bandaget ed un plastire glimt ep eyso serkven. Is liek hieb ei saygen to eet neid, bet Raymond tengicit baygh sombre. Masson hat pit glihihes iom. Bet is ne wohkwyit. Quan is hat sayct is oistighit ghom ep id plaj, Masson ed ego habmos saygen vahsam hamrahe iom. Tun, is hat grasbanascen ed nos hat hakaren. Masson hat declaren is ne tohrb ses balahn. Ego ho lakin sohkwn iom. Hams ghancto diu ep id plaj. Id sol eet nun uperkwehlmend. Id oisbohrst ep id sand ed ep id mar. Ho haben id pondos od Raymond wois quetro is gwahsit, bet to eet aundwoi ghaw. Ye id piernst bors ios plaj, hams bad arriven uni smulk iswor quod surc in id sand, apter un taungh perwnt. Ter hams trohven nies dwo Arabs. Ies lyohg, in ir selpic overalls. Tengier alnos sakwn ed quasi masrour. Nies gumt hat changet neid. So qui hiebit plact Raymond spohc iom aun sayge werd. Alter blahsit do uno smulk ned ed eekikant, skeirspehcend-ye nos, ia tri notes is udann sib med sien bukin.22

Hol entrim buit ne meis quem id sol ed tod silence, con id smulk blosk ios iswor ed ia tri notes. Dind Raymond hat bright sien hand ad sien revolvergep, bet alter ne hat mot ed naspohceer mutu. Ho kaut od so qui kien flute hiebit sem bayghye ghohncta doiks. Bet aun linkwes ud okwi sien duschman, Raymond me hat sprohct : Nistrehlo iom ? Ho mohnt od sei saygiem no is excitiet-se mon ed sigwra strehliet. Ho ei tik saygen : Ne tib hat bad baht. Esiet cherkin strehle katha. Hams iter aurn id smulk blosk om bog ed flute in id kerd om silence ed gvrens. Dind Raymond hat saygen : Tun vahm hakare iom ed quan is antwehrdsiet, nistrehlsiem iom. Ho antwohrden : Katha. Bet sei ne salgeiht sien kniv, tu ne poitts strehle. Raymond hat inkapen se excite lyt. Alter dar kien ed bo observeer ielg geste os Raymond. No, ho io ayn ad Raymond. Confronte iom face ad face ed dah mi tien revolver. Sei alter intervent, au sei swehnct sien kniv, iom nistrehlsiem. Quando Raymond mi hat dahn sien revolver, id diewo hat lucen uper. Yed, hams dar stahto still kamsei hol habiet zaghyaht ambh nos. Wey spohc mutu bet ne ghom ed hol hielt her inter mar, sand ed sol, id double silence ios flute ed ios bog. Ho mohnt ye tod moment od poissit ses strohlen au ne strohlen. Bet bruskye, ies Arabs hant retrosnohgen apter id perwnt. Raymond ed ego hams tun retrostiupt. Is ge kwohk waler ed is mi hat tolken de id reiken autobus. Ho hamraht iom tiel id bungalow ed, menxu is bestigh id dreun drab ho mantum ant id presto stieupen, mien cap sturdiht ab id sol, schawngdanus ant id effort tohrben kay stighes do id dreun etage ed wehkwe iter ians gwens. Bet id gvrens eet solgo quemschi mi eet muschkil stahe still sub id blindend seuy quod fiell waurntos. Mane her au abgwahe viel id sam. Pos uno moment, ho ricto kyid plaj ed ho bighanct. Eet id sam rudh sprehngos. Ep id sand, id mar kwohs med id hol oku ed stupt annem om siena smulk volns. Io ghieng lent-ye kya perwnts ed io khiss mien chol oide sub id sol. Tod hol gvrenso knigv ep me ed diwid mien perodhghang. Ed ielgs kun eekheisso ids megil chald annem ep mien lige, ee-sehro mien dents, eecludo mien peungsta in ia geps miens pantalon, eetendo-me alnos kay triumphe id sol ed tod opac medvia id mi sikwit. Ye cada luce eins gwohlen ex id sand, ex un blaychen kyonk au sem glas debris, mien ghyanus eecraspe. Ho ghancto diu. Io vis dalgtos id smulk deusk perwnto masse perambhen ab un halo blindend ob luce ed marduil. Io mohn de id khuld iswor apter id perwnt. Io wohn retrehve id murmure idsios wed, wohn fuges id sol, id effort ed id gwenen plang, wohn badye retrehve skadh ed ids rahat. Bet quando ho esen proscher, ho viden od Raymonds type hieb rict. Is eet mon. Is kihsit ep sien regv, sien hands sub sieno neuk, sien chol in ia skadhs ios perwnt, sien hol corpos in id sol. Eys overall dum in id gvrens. Buim lyt surpriden. Pro me, to eet un khatem storia ed io hieb gwohmen tetro aun mehne de.

23

Yant is vis me, is ieyrit-se lyt ed dehsit sien hand do sien gep. Ego, naturelika, ho sohrno Raymonds revolver in mien jaquet. Tun, iter, is hat snohgen retro, bet aun oistractum sien hand ex sien gep. Eem destull dalg ud iom, ye decen metern. Io tierk eyso spect unte instants, inter eys pwolcluden lids. Bet opsst-ye, eys kwiter diens ant mien okwi, in id enflammet air. Id volnen blosken eet dar adriuger, sterner quem ye middien. Eet id sam sol, id sam luce ep id sam sand quod se prolongit her. Pon ja dwo hors id dieno neti eeleitneut perodh, dwo hors pon id hieb fundarn in un ocean ex yehsend metall. Ep id horizont, uno smulk vapor hat prifanzowt ed ho tarken idso sword gloi ud id leizd os mien spect, ob io ne hieb zaspohct iom Arab. Ho mohnt od io hieb tik ad abgires ed od to esiet khatem. Bet un hol solvibrant plaj waurs apter me. Ho lyt stiupen kyid iswor. Is Arab ne hat mot. Nespekent quant, is eet dar destull dalg. Maghses ob ia skadhs ep sien lige, is tengicit glihes. Ho skohpt. Solpreus gaiss mien gians ed ho khissto swoidghutts kowpe in mien brovs. Eet id sam sol quem ye id dien kun hiebim begrabht mamma ed, kam tun, hassa mien chol me gvolit ed ids quant veines combiet sub mien cuit. Ob tod preus quod neti ghohdim tehle, ho mot perodh. Io wois to eet stupid, od niem abdehe id sol ud me movend-ye oino stieupo perodh. Bet ho stiupto perodh, tik oino stieup. Ed ye tod ker, aun se ayre, is Arab hat swohngen sieno kniv is mi hat anacen sub id sol. Luce hat gwohlt ep id stal ed eet kam un long tweiser miech quod hih mien chol. Ye id sam instant, id swoid kowpt in mien brovs hat srun ghom unte oin schtoss ep mien oklids ed hat covohrn ia med un tepid ed tegu kehlder. Mien okwi eent blinden apter tod cortin ex dakrus ed sald. Io khiss ne meis quem ia cymbals os sol ep mien chol ed, neenderkwit-ye, id argu skolm gwohlt ex id kniv dar face me. Tod preusend einso ghyanuit mien pecmens ed dohlv mien gvolic okwi. Tun hat quant vanken. Id mar hat carrien un teug ed ardent blahsa. Mi hat kwohken od id waurn ghyahsit unte sien hol aykwos kay sintum suyes piurn. Mien hol seso se hat tens ed mien hand hat craspen id revolver. Id abtrigher hat cedden, ho touchen id poliht gventer ios chung ed ter, in id sammel stump ed bodereihnd blosk hat hol inkapt. Ho scuss id swoid ed id sol. Ho ghapt od io hieb destruct id tula ios dien, id exceptional silence uns plaj quer io hieb esen noroct. Tun, ho strohlyen quars ep un inert nayv quetro ia glonces se sehr aun kwehke. Ed eent kam quar bragva cutts quommed io stus id dwer os bieda.

24

DWOTER DEIL I Fauran pos mien arrest, buim interroget plurs. Bet lit de identitatsinterrogations qua ne hant duret diu. Ye id prest ker in id police station, mien re kwohk interesse nimen. Oct diens pos, is sokjudce, punor, me hat spohcen samt curiositat. Bet kay inkape, is me hat sprohgen tik de mieno nam ed mien adresse, mien profession, id tarikhe ed id loc mienios gnahsa. Dind is hat gnohskwn an io hieb chust un advocat. Ho recogniht od ne ed ho ei suwalen kay woide an eet mutlak necessar habe oin. Ma ? hat is ayn. Ho antwohrdt io pohnd mien re baygh simple. Is hat smihn saygend-ye : Est un mayn. Yed, loy est ter. Sei yu ne cheuste advocat, dikskyeussiemos oin. Ho pohndt eet baygh-ye gadab od justice se maimourih med ta detayls. Ho ei sayct to. Is me hat approben ed hat concluden od loy eet suakwohrn. In-kap, ne ho ayt serieus iom. Is me hat primt in un kyal behancto med cortins, is hieb ep sien scribtable oin lampe quod beluc id foteuyl quetro is me hat seddihno menxu isswo mien in skadh. Io hieb lisen samlik description in buks ed to hol mi hat kwohct un leik. Pos nies tolk, punor, ho spohct iom ed ho vis un wir samt teun traits, dupta blou okwi, buland, samt un longo greis moustache ed abundant quasi albh kays. Is mi hat kwohct baygh-ye kemall, ed, in summ, prientlik, nespekent oik nerveus ticks qua protietrieg eyso stohm. Salgend-ye, vahsim hatta rege mien hand kyom, bet ho mohmt barwakt od io hieb nicen uno mensc. Posdini, un advocat hat gwohmen bi me in id prison. Is eet smulk ed gwiwotic, destull yun, sien kays kaur-ye glehmberiht. Nespekent id gvrens (io hieb slahn ub mien camissarmels), is vohs un deusk costume, un stehcolnier ed un bizarre cravat samt taungh sword ed albh streis. Is hat dehn ep mien crovat id brevsack is bohr sub sien brakh, se hat presenten ed mi hat saygen is hieb studyen mien dossier. Mien re eet delicat, bet is ne dwoyit de idso success, sei io trus iom. Ho danct iom ed is mi hat sayct : Smad chehxe id merit ios topic. Is hat sess ghom ed mi hat expliet od hieb esen istifsarn de mien privat gwit. Hieb esen woiden od miena mater hieb mohrno nuper in gerosdom. Hieb esto tun soct in Marengo. Ies sokars hieb mathen od io hieb me beviden rhayr kheissas ye id dien os mammas dafan. Ghapte, mi hat ayto mien advocat, to me turbet lyt sprehge vos de to. Bet to est baygh important. Ed to sessiet un mier argument pro id accusation, sei ne trehvo ject antwehrdtu. Is volit ke io hohlp iom. Is me hat sprohct an io hieb habt gomra ye tod dien. Tod question hat maung staunihno me ed mi kwohk od habiem esen meg turben sei habiem tohrben iskwes talg werd. Ho lakin antwohrdt od io hieb lyt lusen id adet os25

daume ed od mi eet difficil ei dahe istikhbaras. Aundwoi, io kiem mamma, bet to mieynit neid. Vasyi saun sesi hieb meis au minter vanschen id mohrto tim qui i kiem. Her, is advocat me hat interrupen ed is hat kwohken baygh agitet. Is me hat promttiht ne sayge to unte id audience ni bei sokmagistrat. Lakin, ei ho expliet io hieb un solg buhsa quem mien physic naudhs ops oisturb mien khisses. Ye id dien kun io hieb dafanen mamma, eem baygh strak, ed swohpskwim. Tem quem ne ho bespohcto quo wakyit. Quo io ghohd sayge sigwra, eet od habiem milt od mamma ne habiet mohrn. Bet mien advocat ne tengicit masrour. Is mi hat saygen : To ne est kafi. Is hat reflecten. Is me hat sprohct an is miegh sayge od ye tod dien io hieb uperwaldhen mien natural khisses. Ho ei saygen : No, ob to est ghaw. Is me hat spohcen bizarre-ye, kamsei inspiriem ei lyt marz. Is mi hat saycto quasi peigher-ye od in quant fall is director ed id personel ios gerosdom esient aurn ka weitwodds ed od to ghohd mi kwehre un mier renk. Ho kauiht iom od tod storia ne hieb sibia con mien re, bet is mi hat tik antwohrden od eet visible io hieb naiwo dilen con justice. Is abgwahsit tengiend-ye peighernd. Habiem protiedarskwn iom, ei explie io wohn eyso sympathia, ne kay ses meis suadefenden, sontern, sei magho sayge, naturelika. Bilhassa, io vis io bfuyowih iom. Is ne me comprehens ed pigher lyt dia me. Io wohn ei sigwre eem kam cadanghen, mutlak-ye kam cadanghen. Bet to hol, fin-ye, ne hieb megil utilitat ed ho tyohgven to ob xieday. Pau wakt pos, eem iter ducen ant iom sokjudce. Eet dwo saat ios posmiddien ed ye tod ker, eys bureau eet pleno med un luce payn krihn ab un sukno cortin. Gverehsit baygh. Is me hat seddihn ed, samt maungo curtesia, mi hat declaren od mien advocat, sekwos un giutayo, hieb khacto gwehme. Bet io poiss ne antwehrde eysims questions ed skehpte ke mien advocat ghohd assiste me. Ho saygen io ghohd antwehrde mon. Is hat touchen med sien fingher uno knop ep id table. Un yun graphion hat gwohmt ad se installe quasi za me. Wey bo hams yowascto do nies foteuyls. Id interrogation hat inkapt. Is mi hat preter sayct od eem depicto ka esend uns taciturn ed cazour pinseing ed is hat gnohswn quod io mohn de. Ho antwohrden : Est ob ho naiwo maung sayctu. Tun tayco. Is hat smiht kam ye id prest ker, hat recogniht od to eet id gohdsto sabab ed hat addiht : Eti, to hat neid ahammiyat. Is hat tayct, me hat spohct ed hat stauto tsay destull brusk-ye kay mi sayge baygh oku : Quo me interesset est yu. Ne ho suaghaben quo is mieyn ed ho antwohrden neid. Sont jects, hat is nabahn, qua khako comprehende in voster geste. Som yakin yu vahte hehlpe me ad ghabe ia. Ho saygen od hol eet baygh simple. Is hat urs ei lehge mien dien. Ei ho lohcto quo ja io hieb ei narret : Raymond, id plaj, id balnia, id cheid, iter id plaj, id smulk iswor, id sol ed ia penk revolverstrehls. Ye cada jumla is eesayct : Gohd, gohd. Quando ho arrivet do id lyehgend nayv, is hat approbet saygendye : Tamam. Ego eem malalto de repetihes it id sam storia ed mi kwohk od naiw eebebahsim.

26

Pos un silence, is hat stahn ub ed mi hat sayct is hohlpskwit me, od interessim iom ed od med Divs hehlp, is kwehriet semject pro me. Bet prever, is volit mi iskwes iter oik werds. Aun transition, is me hat sprohct an io liubh mamma. Ho sayct : Ya, kam cadanghen ed is graphion, qui tuntro tip regular-ye med sieno machine, hat sollt rhalte touches, seghi hat embarasset ed hat skult toipye retro. Semper aun apparent logique, is judce me hat tun sprohct an io hieb strohlt penkwes consecutive-ye med id revolver. Ho reflecten ed preciden od io hieb strohlt oins preter ed, pos oik secundes, quars dind. Ma habte yu skohpt inter id prest ed id secund strehl ? iey is tun. Oins meis, ho reviden id rudh plaj ed ho khissen ep mien chol id solpreus. Bet ye tod ker, ho antwohrden neid. Unte id hol sience quod hat sohkwt is judce hat tengiet se agite. Is hat sess ghom, hat snict sien hand do sien kays, hat deht sien olans ep sien scribtable ed se hat cliht lyt kye me samt un stragno protiokwo : Ma, ma habte yu strohlen ep un nayv ghomi ? Dar tun, ne ho wois quod antwehrde. Is judce hat passet sien hands ep sien chol ed hat repetiht sien questiono med un lyt alteren voc : Ma ? Yu tehrpte mi sayge to. Ma ? Io dar swigh. Brusk-ye, is hat stahn ub, hat gredden kyun bors os sien scribstable ed hat ghyanen un liachic in un classeur. Is hat tragen tetos un argwrnten crucifix is hat swohngen reikend-ye kye me. Ed med un alnos changen, quasi tremblant voc, is hat scrien : Kwe yu gnohte tom ? Ho saygen : Ya, naturelika. Tun is mi hat saygen baygh oku ed passionat-ye is ge credihsit in Div, od eys conviction eet od nel mensc eet kafi skultic kay Div ne al indulg, bet od el mensc tohrb med sien pischman bihe kam unis magvis qual atmen est tuich ed parat ad primes quant. Eys hol corpos eet clihn uper id table. Is agitit sien crucifix quasi uper me. Kay sayge ver, hiebim baygh dussohkwt iom do eys raisonen, preter ob gverehm ed ob eent in eys maktab piwoni musch qui lans ep mienum enokwum, ed obschi is me lyt bayih. Io sammel recognihsim od to eet joking ob, pos quant, ego eem is criminal. Yed is hat continuen. Io hieb edvas ghaben od ye eys mayn eet tik oin obscure point in mien confession, id fact os skehptus kay strehle ye un second ker med id revolver. Pro id reste, to eet baygh-ye gohd, bet to ghieb is ne. Vahsim ei sayge is ieg ghaw-ye se persteivend-ye : tod senst pointo ne hieb tant ahammiyat. Bet is me hat interrupt ed me hat exhortet ye un senst ker, staund unte sien hol buliende, sprehgend-ye me an credeihsim in Div. Ho antwohrden no. Is hat sess ghom indignat. Is mi hat sayct od to eet impossible, od vasyi mensci credihr in Div, hatta ti qui disvols ud eys lige. Ets conviction eet ter ed, sei is solliet aiwo dwoie de, eys gwit neti habiet sense. Eiskwte yu, hat is exclamet, od mien gwit neti haba sense ? Ye mieno mayn, to ne me betak ed ho ei sayct to. Bet uper id table, is ja pors iom Christ perodh sub mien okwi ed scricit bochengli-ye : Ego som christian. Beudo pardon tienen skeulsen ud tom. Quosmed maghs tu ne credihes od is hat paytten pro te ? Ho suakaun od is me wohkwit med tu, bet bactissim to. Id gvrens eecicrehsct. Kam semper, quando wehno abdehe ud me semanghen io payn kleum, ho tengien approbe. Ant mien27

surprise, is hat triumpht : Vids, vids, iey is. Ne credeihs tu ed vahs confide bi iom ? Aweis ho sayct no oins meis. Is hat fallen tsay ep sien foteuyl. Is tengicit baygh strak. Is hat remanen unte un khvil silent menxu id machine, quod hieb nasohkwt id dialogos, dar prolongit idsa sensta jumlas. Dind, is hat chohxen me samt lyt aytan. Is hat murmuret : Ho naiwo viden atmen tem sakht quem voster. Ies criminals quoy hant gwohmt ant me hant semper planct ant tod image os gvol. Vahsim antwehrde od eet chiowdeo ob lit de criminals. Bet ho mohnt od ioschi eem kam ies. To eet un idee quod io khiek biswehde. Is judce hat tun staht ub, kamsei is mi significit od id interrogation eet khatem. Is me hat tik sprohgen samt id lyt malalt wultu an regretim mien act. Ho reflex ed ho sayct od, anter quem druv regret, io spruv un certaino nao. Ho haben id pondos od is ne me comprehens. Bet bye tod dien jects ne hant liten dalger. In id sehkwo ho ops revis iom sokjudce. Lakin eem hamrahn ab mien advocat ye cada ker. Eet grancen ad precidihes me certain points om mien prever declarations. We dar is judce discuss ia charges con mien advocat. Bet in druve naiwo kieureer de me ye ta moments. Lyt ed lyt in quant fall, id ton iom interrogations hat changet. Kwohk od is judce neti se interessit de me ed od is hieb kamgvonc classen mien fall. Is neti mi hat tolken de Div ed ho naiwo revis iom in id excitation tos prestios dien. Id resultat est od nies tolks hant bihn cordialer. Oika questions, lyt conversation con mien advocat, ois ia interrogations. Mien re sohkwit sien druna, sekwent idswo wekwos ios judce. Semkers yaschi, quan id conversation eet os general aurdhen, io smyohr id. Io biann. Nimen, unte ta hors, eet peigher dia me. Hol eet tem natural, tem suapact ed tem sober-ye acto quem io hieb id joking pondos os ses member ios familia. Ed ye id fin iom oindem munts tod sok hat duret, ghehdo sayge od io quasi stieun de naiwo ghawdus de alyojecto quem de ta rar instants kun is judce eeduct me tsay ei dwer sienios maktab teipend-ye mien oms ed mi saygend-ye samt un cordial wultu : Est khatem pro hoyd, poti Antichrist. Eem tun upertragen ei waldh iom gendarmes. II Sont jects de qua ho naiwo kamen tolke. Quando ho entret id prison, ho ghapto pos oika diens io naiwo kamiem tolke de tod part miens part. Serter, ho neti trohven importance in ta protievols. In druve, ne eem real-ye in prison unte ia presta diens : io intizier vagh-ye sem nov wakya. Bad pos id prest ed wahid visite as Marie hat hol inkapen. Ex id dien kun ho recept ays brev (ia mi sieyg ia neti poiss gwehme ob ia ne eet mien esor), ex tod dien, ho khisst od mien hem eet mien cell ed od mien gwito stopit ter. Ye id dien miens arrest, buim preter dwerbohndt in un kamer quer eent ja plur deteneits, pleist-ye Arabs. Hant glihn vidend-ye me. Dind me hant sprohgen quod io hieb kwohrn. Ho sayct io hieb nict un Arab ed hant remanen silent. Bet un khvil pos, id vesper hat28

gwohmen. Mi hant explien kam io tohrb arrange id matta quer dohlgim lyehge. Rollend-ye uter bors, ghohd ses kwohrt tosmed un bolster. Unte id hol noct, kimons drahr ep mien lige. Oika diens pos, buim isolen do un cell quer io lyohg ep un dreun capchenmur. Io hieb un dayschawbien drug ed un isern leghenn. Id prison eet baygh atopp id urb ed, per uno smulk fenster, io ghohd vide id mar. Sem dien kun io grip id kankel, mien lige recto kyid luce, un cipire hat entret ed mi hat sayct io hieb un visite. Ho mohnen eet Marie. Yaghi eet ia. Ho apterghangen kay gwahe id parluar unte un longo corridor, dind un drab ed fin-ye alyo dikhliz. Ho entren un kielken belucen ab un vast leuxmen. Id sall eet separen in tri deils med dwo mier kankels qua segeer id in ids longe. Inter ia dwo kankels wohs un inter oct ed dec meters weru rewos quod separit i visitors ud iens prisoners. Ho dyohrct Marie face me samt ays maschruu rogv ed ays bruniht lige. Ye mien gon, eet un decen deteneiten, pleist-ye Arabs. Marie eet perambhen ab Mauras ed wohs inter dwo visitricens : unu smulk anua samt sohrn lipps, sworddun, ed un piwon gwen samt lun kays qua bahsit baygh honar med maung gestes. Ob id distance inter ia kankels, i visitors ed ies prisoners skul bahe meg jahar. Quando ho entren, id blosk iom vocs qua antskiend protie ia mier bare murs ios kielken, id rauk luce quod sru waurntos ep ia schibs ed regwohl in id kielken, mi causeer un sorte os sturdition. Mien cell eet sakwner ed deusker. Ho tohrben oik secundes kay me adapte. Yed, ho vividen ielgo lige nett-ye, enderkwit in id diewo. Ho observet od un cipire eet seddend ye bors ios dikhliz inter bo kankels. Pleist arabi prisoners tem quem ir familias hieb hocken vis--vis mutu. Ti ne crier. Nespekent id tumult, i ghohd aure mutu bahnd-ye baygh khafi. Ir stumpo murmure, startus ghomtos, formit kam uno mussalsal bass ibs conversations qua se intercruceer uper ir caps. To hol ho io kaun baygh oku gwahnd-ye perodh kye Marie. Ja glehmbernd protiev id kankel, ia mi smih med sien hol gwis. Ho iam pohndt baygh bell, bet ne ho sagven sayge to ay. Tun ? mi hat ia ayt baygh jahar. Tun, eno. Leits wal, has quanto vols ? Ya, quanto. Habmos swighen ed Marie dar smih. Ia piwon gwen hul kye mieno nieber, sieno mann aundwoi, un buland blondo type samt frank spect. Eet id sehkw os un ja inkapt conversation. Jeanne ne hat volen ghende iom, cricit ia aksterst-ye. Ya, ya, iey is mann. Ho saygen ay tu reghendies iom salgend-ye, bet ia ne hat volen ghende iom. Marie hat criet ud sien gon od Raymond mi vienschit sellamat ed ho sayct : Dank. Bet mien voc buit tohgen ab mieno nieber qui hat sprohgen an is lit wal. Ays gwen hat glihn saygend-ye is hieb naiwo lit waler. Mien levter nieber, uno smulk yuwen samt teun hands, sieyg neid. Ho kaun od is eet face iam smulk anua ed od bo spohc mutu samt intensitat. Bet ne ho habt id wakt os observe i diuter ob Marie mi hat criet wey tohrbam spehe. Ho saygen : Ya. Sammel, io spohc iam ed io wohn sehre ays rogv epter ays oms. Io wohn tod teun wehbh ed io ne meg suawois quo tohrb ses speht exter id. Bet to eet baygh aundwoi quo Marie mieyn ob ia dar smih. Io vis ne meis quem id arg aysen29

dents ed ia smulk diplas aysen okwi. Ia hat iter crien : Salcsies ed ghamsiemos ! Ho antwohrden : Credeihs tu ? bet to eet bilhassa kay sayge semject. Ia hat saygen tun baygh oku ed dar baygh jahar od siemos, od esiem acquiten ed od dar nigviciemos. Bet alter gwen hul ud sien gon ed sieyg ia hieb lasst un corbh in id graphionia. Ia rahsit quanto ia hieb dehn tetro. To tohrb ses chohxt, toghi hol costit dorgv. Mien alter nieber ed eys mater dar spohc mutu. Id murmure im Arabs continuit ender nos. Exo id luce hat kwohct oide protiev id leuxmen. Io khiss lyt sieug ed habiem abgwahskwt. Id blosko gvolit me. Bet ciois dar iskwim brunges id presence as Marie. Ne woidim quayt wakt hat passet. Marie mi hat tolcto de sien orbat ed ia eesmismeiht. Id murmure, ia cries, ia conversations cruceer-se. Id saul pelegv os silence eet nieb me in tom smulk yuwen ed tam anua qui spohc mutu. Lyt ed lyt, i Arabs bihr abbrighen. Quasi quanti hant taycen yant is prest hat salgen. Ia smulk anua hat gwohmen proscher id kankel ed, ye id sam moment, un cipire hat znayct aysi son. Is hat saygen : Do reviden, mamma ed ia hat passet sien hand inter dwo stanghs kay znayce ay lyt, lent-ye ed prolongen-ye. Ia hat abgwaht menxu un wir entrit, hat in hand, ed emsit eys place. Un prisoner buit introduct ed bo hant comtolken chepran-ye, bet ye midvoc, ob id kyal hiebit rebihn silent. Mien dexter nieber buit vanen ed eys esor ei hat saygen aun bahe meis khafi kamsei ia ne hieb kaut od neti eet necessaro crie : Suakaur de te ed dah attention. Dind mien roig hat gwohmt. Marie hat znaycen od ia me kuss. Ho volgen pre disprehpe. Ia stahsit still, sien lige truden protiev id kankel, samt id sam kwetwerdilt ed craspend smeih. Pau pos to hat ia mi scriben. Ed ab tod moment hant inkapen ia jects de qua ho naiwo kamt tolke. Zowngschie neid tehrpt ses exageren ed to mi hat esen meis facil quem alyims. In-kap miens detention, yed, quo hat est id kaurdst, est od hiebim brens os leur wir. Mathalan, id wehnos lambhit me om ses ep un plaj ed stighes ghom kyid mar. Imaginend-ye id blosk iom prest volns