mahashveta devi ek aisa nam jisaka dhyan men aate hi unakee kaee-kaee chhaviyan aankhon ke samane prakat ho jati hain. jisane apani mehanat v eemanadari ke balaboote apane vyaktitv ko nikhara hai. unhonne apane ko ek patrakar, lekhak, sahityakar aur aandolanadharmi ke roop men vikasit kiya. mahashveta devi ka janm somavar 14 janavari 1926 ko eest bangal jo bharat vibhajan ke samay poorvi pakistan vartaman men (bangladesh) ke dhaka shahar men huaa tha.gat 13 faravari '2009 ko subah 11.30 baje sahara samay (kolakata) kee varishth patrakar saeeda sadiya azim , hind-yugm (dilli se) shree shailesh bharatavasi aur main khud kolakata sthit mahashveta devi ke ghar usane milane gaye the. mahashveta ji ne apana sara jivan hi mano aadivasiyon ke sath gujar diya ho, jal, jangal aur jamin kee ladaee ke sangharsh men kharch kar diya ho. unhonne pashchim bangal kee do janajatiyon 'lodhasa' aur 'shabara' vishesh par bahut kam kiya hai. in sangharshon ke dauran pida ke svar ko mahashveta ne bahut karib se suna aur mahasoos kiya hai. pida ke ye svar unakee rachanaon men saf-saf sunaee padte hain. unakee kuchh mahatvapoorn kritiyon men 'agnigarbha' 'jangal ke davedara' aur '1084 kee man' hain. inhe padmavibhooshan puraskar (2006), raiman maigsese (1997), bharatiy gyanapith(1996) sahit kaee any puraskaron se bhi sammanit kiya ja chuka hai. pichhale dashak men mahashveta devi ko kaee sahityik puraskaron se sammanit kiya ja chuka hai. aapako magsese puraskar se bhi sammanit kiya ja chuka hai jo eshiya mahadip men nobel puraskar ke samakaksh mana jata hai.fir bhi ve bolati hain ki aapane kisi puraskar ke liye kary nahin kiya. bar-bar aadivasi ke prashn par vichalit hote inako kaee bar dekha gaya. kahati hain ki "ham log tab tak apane aapako sabhy nahin kah sakaten,jab tak ham aadivasiyon ke jivan ko nahin badal dete. aapane 'santhala', 'lodhasa', 'shabara' aur mundas jaise khas aadivasi (aadivasi jan jati) logon ke jivan ko bahut gaharaee se n sirf adhyayan hi kiya in par bahut kuchh apani kathaon men sametane ka prayas bhi kiya hai, aaj bhi aapako aise samachar vichalit kar deten hain jahan kisi aadivas ke oopar zulm kiya jata hai. Mahashewta devi sadaiv se samajik aur rajanitik prasangik vishayon par apani kalam se prahar karati rahin hain. Deviji ne ek jagah likha- ‘‘ek lambe arase se mere bhitar janajatiy samaj ke lie pida kee jo jvala dhadhak rahi hai, vah meri chita ke sath hi shant hogi......’’ inhone apana poora jivan aur sahity, aadivasi aur bharatiy janajatiy samaj ko samarpit kar diya hai. isalie nau kahaniyon sangrah men se aath kahaniyon ke kendr men aadivasi jati kendrit hai, jo aaj bhi samaj kee mookhyadhara se katakar ji raha hai. lekhika mahashveta devi 14 janavari 2009 ko 83 ven sal kee ho gaee, par inake chehare par kahin koee thakan nahi hai. baten aise karati hain jaise koee parivar ka sadasy hi ho ham. varsh 1967 men naksalabadi aandolan ke dauran unakee lekhani ne logon ko dahala diya tha. aaj bhi kisi aandolan ke nam aapako aage dekha ja sakata hai. jab mainne yah prashn kiya ki-"aap to buddhadev baboo (vartaman men bangal ke mukhyamantree) ko to bahut manati thi, fir nandigram aur singoor ke mudde par aapane unaka sath nahin diya?" bolane lagi- " main bahut din rajanitik kee hoon. kisanon kee jamin ko dakhal karake udyog kaise lagaya ja sakata hai?" tumhin socho... fir thoda rook kar kisan bhoomihin ho jayega to khayega kya?tab talak fotografar bhi aa gaya tha. use dekhate hi ekadam se us par baras padi "eee...ee amar chhvi kothaee?" fir muskarate hue bolin- " tara.. tadi chhvi tulo ... onek kaj korate hove...."( devajyoti fotografar ko dekhate hi us par naraj ho gaee.... e ladake ... meri fotau kahan hai? ... fir thoda muskarate hue kaha.. jaldi se foto le lo mujhe bahut kam karana hai abhi) isase pahale jab hind-yugm ke shree shailesh bharatavasi unase bat karana shuroo hi kiye the to bat ko shuroo karane ke liye mainne jaise hi bangala men unaka parichay dena shuroo kiya to bolane lagi- "tumi hindite bolo... main achchha se hindi janati hoon."mahashewta ne sahity v sanskritik aandolan ke sath rajanitik aandolanon men bhi bhag liya hai. tasalima nasarin ko kolakata se hataye jane ke mamale ko

lekar ve pashchim bangal v kendr sarakar ke ravaiye se kafi aahat hain. vo bolati hain ki " idhar desh men jahan muslaman hain vahan hamalog muslim ummidavar to jidhar hindoo hain udhar hindoo ummidavar khade karate hain isase desh kaise chalega. socho tab to unakee bhasha men hi hamen bat karana hoga. hamane unake sath jo pal gujara ise aapake sath bantane ka yah prayasabhar hai. kisi rajanaitik vicharadhara se hamen koee sarokar nahin hai, fir bhi kahin koee bat aapako rajaniti si lagati ho to use najarandaj kar denge. is avasar par aapako mere dvara sanpadit kolakata se prakashit ek samajik patrika "samaj vikas" ke kuchh sahity visheshank bhi bhent kiya jise aapane svikar karate hue kaha ki- "khoob bhalo kaj korachho tumi" ( khoob achchha kam karate ho tum) chehare par tejasv kee roshani is tarah chamak rahi thi jaise sakshat hamane man ka darshan kar liya ho.parichay:aap n sirf ek prakhyat lekhika ek samajik karyakarta bhi hain. mahashveta devi ka janm somavar 14 janavari 1926 ko eest bangal jo bharat vibhajan ke samay poorvi pakistan vartaman men (bangladesh) ke dhaka shahar men huaa tha. aapake pita manish ghatak ek kavi aur ek upanyasakar the, aur aapakee mata dharitree devi bhi ek lekhakika aur ek samajik karyakarta thi. aapakee skooli shiksha dhaka men huee. bharat vibhajan ke samay kishoravastha men hi aapaka parivar pashchim bangal men aakar bas gaya. bad men aapane vishvabharati vishvavidyalay,shantiniketan se bi.e.(Hons)angreji men kiya, aur fir kalakatta vishvavidyalay men em.e. angreji men kiya. kolakata vishvavidyalay se angreji sahity men mastar kee digri prapt karane ke bad ek shikshak aur patrakar ke roop men aapane apana jivan shuroo kiya. taduparant aapane kalakatta vishvavidyalay men angreji vyakhyata ke roop men naukari bhi kee. tadapashchat 1984 men lekhan par dhyan kendrit karane ke lie aapane sevanivritt le li. mahashveta ji ne kam umr men lekhan ka shuroo kiya aur vibhinn sahityik patrikaon ke lie laghu kathaon ka mahatvapoorn yogadan diya. aapakee pahali upanyas, "nati", 1957 men apani kritiyon men prakashit kiya gaya tha ‘jhansi kee rani’ mahashveta devi kee pratham rachana hai. jo 1956 men prakashan men aaya. svayan unhin ke shabdon men, "isako likhane ke bad main samajh paee ki main ek kathakar banoongi." is pustak ko mahashveta ji ne kalakatta men baithakar nahin balki sagar, jabalapur, poona, indaur, lalitapur ke jangalon, jhansi gvaliyar, kalapi men ghatit tamam ghatanaon yani 1857-58 men itihas ke manch par jo huaa us sabake sath-sath chalate hue likha. apani nayika ke alava lekhika ne kranti ke tamam agradooton aur yahan tak ki angrej afasar tak ke sath nyay karane ka prayas kiya hai. aap batati hain ki "pahale meri mool vidha kavita thi, ab kahani aur upanyas hai." unakee kuchh mahatvapoorn kritiyon men 'agnigarbha' 'jangal ke davedara' aur '1084 kee man', maheshvar, gram bangla hain. pichhale chalis varshon men, aapakee chhoti-chhoti kahaniyon ke bis sangrah prakashit kiye ja chuke hain aur sau upanyason ke karib (sabhi bangala bhasha men) prakashit ho chukee hai.