Upload
lambert-christophe-safari
View
49
Download
5
Embed Size (px)
Citation preview
Paruwasi gatolika ya Kaminuza Nkuru y’ u Rwanda yibutse inzirakarengane zazize Jenocide yakorewe
Abatutsi muri Mata 1994.
Padiri Mukuru na Vicaire ba Paruwasi, Chorale La Fraternité na Chorale le Bon Berger (Photo IHIRWE Nicole)
Nk’uko bisanzwe buri mwaka Kiliziya Gatolika y’u Rwanda yibuka by’umwihariko inzirakarengane zazize
Jenoside yakorewe abatutsi muri Mata 1994; Ibi byemejwe n’inama y’abepesikopi bo mu Rwanda. Ibi
bikorwa ku wa gatandatu w’icyumweru cya nyuma cy’ukwezi kwa Mata. Ni muri uru rwego kuwa 27
Mata 2012 Paruwasi Gatolika ya Kaminuza nkuru y’ u Rwanda yitiriwe Mutagatifu Dominiko yateguye
umunsi wo kwibuka watangijwe n’ijoro ryo kwibuka ryabaye kuwa 26 Mata 2012.
Uwo muhango wo kuwa 26 Mata 2012 witabiriwe n’abakiristu b’iyi paruwasi, amakorali atandukanye
aririmbira muri iyi Paruwasi Gatolika ya Kaminuza harimo Chorale Illuminatio, Chorale La fraternité,
Good News Choir na Chorale Le Bon Berger. Hari n’amatsinda asenga ariyo Groupe charismatique de l’
Emmanuel na Groupe Charismatique Urumuli, NUR-Jesus Friends Group ndetse n’indi miryango y’agisiyo
gatolika itandukanye ikorera muri iyi Paruwasi.
Uwo mugoroba wo kwibuka watangijwe n’isengesho ryayobowe na Groupe Charismatique de l’
Emmanuel n’Urumuli, nyuma y’aho hafashwe umunota umwe wo kwibuka (bucece), ubundi amakorali
atandukanye asimburanwa aririmba indirimbo zinyuranye zijyanye n’uwo munsi ari nako hatangwa
inyigisho. Indirimbo zaririmbwe ndetse n’ijambo ry’Imana ryasomwe byose byagarutse ku rukundo.
Hari abashyitsi baturutse muri Kaminuza baje kwifatanya n’abakiristu. Aha twavuga nk’uhagarariye
AERG muri Kaminuza Nkuru y’u Rwanda Bwana RUGAMBWA Jean Paul, intumwa yari yaje ihagarariye
abakozi gatolika bo muri kaminuza Bwana KARINGANIRE Charles, umuyobozi w’ umuryango
w’abanyeshuri gatolika biga muri Kaminuza nkuru y’ u Rwanda uzwi nka CCCCE (Communauté de
Coordination des Communautés Catholiques des Etudiants) Bwana Emmanuel MBERABAGABO, Padiri
mukuru wa paruwasi Abbée Bruno NKONJI na Padiri Alphonse NKUSI akaba ari Econome wa Diocèse ya
Butare ndetse na Vicaire wa Paruwasi gatolika ya Kaminuza.
Abafashe amagambo bose bagarutse ku nsanganyamatsiko y’ uyu mwaka igira iti “Twigire ku mateka
twubake ejo hazaza”.
Uwavuze mu izina ry’abakozi gatolika bo muri Kaminuza, Bwana KARINGANIRE Charles, yanatanze
ubuhamya bugaragaza ko amacakubiri yatangiye cyera kandi akigishwa n’ abantu bajijutse. Yasobanuye
ko ari nayo mpamvu urubyiruko rwose rugomba gufata iya mbere mu kubaka igihugu by’umwihariko
bihereye ku rubyiruko rwiga muri za kaminuza ndetse n’andi mashuri atandukanye. Yasoje asaba abiga
bose ndetse n’abize kujya basoma bagasobanukirwa hanyuma kugira ngo bashobore gusobanura ibintu
uko biteye mu kuri no mu rukundo. Yongeraho iki kibazo yabajije buri wese w’umukristu: “Ese iyo tuvuze
ngo Kristu Yezu akuzwe turamukanya, mu by’ukuri tuba tuzirikana ibyo turi kuvuga?”
Uhagarariye AERG muri Kaminuza Nkuru y’u Rwanda Bwana RUGAMBWA Jean Paul mu ijambo rye
yashimiye ubuyozi bwa Paruwasi Gatolika ya Kaminuza bwateguye iki gikorwa, ndetse n’abantu bose
bari babyitabiriye. Yanabashishikarije kandi gufatanya n’ abanyarwanda bose ndetse n’ igihugu muri
rusange, kugira umutima wo gufasha abasizwe iheruheru na jenoside yakorewe abatutsi muri Mata
1994 higanjemo imfubyi n’ abapfakazi. Yatanze ubutumwa bwe agira ati: “Ntabwo hakerwa
umusemburo mwinshi kugira igikorwa cyawo kibe cyagaragara.” Yakomeje gusaba buri wese ufite
ubushake bwo kubaka ejo hazaza heza gukunda mugenzi we nk’umuvandimwe we ndetse
by’umwihariko tugakundana nk’abana b’Imana. Yarangije agira ati: “Si sito et istae, cur non ego?” Uyu ni
umugani wo mu Kilatini, tugenekereje usobanura gutya : «Niba bano cyangwa bariya (…barashoboye
kugera kuri ibi byiza…), kuki njye ntabigeraho? …ndamutse mbinganye !!! Bishaka kuvuga tugomba
kwigira ku batubanjirije bakoze ibyiza kandi byahiriye, kugira dushobore kubaka ejo hazaza heza.
Padiri Mukuru wa Paruwasi gatolika ya kaminuza y’u Rwanda mu nyigisho ye y’akataraboneka yagarutse
ku nsanganyamatsiko yo kwibuka muri uyu mwaka wa 2012. Yigishije yerekana impamvu tugomba
guhora twibuka ndetse tukanasabira abacu batuvuyemo. Yerkanye urugero rwo mu ibaruwa Pawulo
yandikiye Timoti amubwira ati : « Jya uhora wibuka Yezu mwene Dawidi, umuzuka mbere mu
bapfuye….» Yakomeje asaba ko twakwiga kubaha ububabare bw’abandi kubera ko aribwo umuntu
ashobora kuba yamenya uburyo yafasha uwo ariwe wese uri kubabara akaba yashobora kuva muri ubwo
bubabare. Yakomeje yerekana imvo n’imvano yo kwibuka ndetse no gusabira abacu bapfuye. Ibi
biboneka mu isezerano rya Cyera aho abayisiraheli bari barajyanywe bunyago, bagakoreshwa imirimo
ivunanye hanyuma abitabye Imana ntibashyingurwe bakandagazwa ku gasozi kugira ngo baribwe
n’ibisiga. Nyamara hari itsinda ryari riyobowe na Yuda Makabe bacungaga ijoro riguye, abandi bose
basinziriye hanyuma bakegeranya ya mirambo yose bakayishyingura mu cyubahiro ; hanyuma y’ibi
agashyira amaturo abaherezabitambo kugira ngo basabire babandi bapfuye. Iyi niyo mvo n’imvano yo
guhora twibuka abacu batuvuyemo kugira ngo tububahe tubaha icyubahiro cyabo bakwiye hanyuma
tukanabasabira twizera ko amasengesho azabagirira akamaro.
Padiri mukuru wa Paruwasi Gatolika ya Kaminuza yasoje aduha ubuhamya bw’ibyabereye muri Genocide
y’abayahudi. Muri ubu buhamya yatubwiye aho umudage (Nazi) yabwiye umuyahudi ngo avuge Bibiliya
yose mu ncamake ahagaze ku kuguru kumwe. Hanyuma umuyahudi yazamuye akaguru kamwe
hamyuma abwira wa mudage ati: incamake ya Bibiliya yose iragira iti «Ntuzigere na rimwe ukorera
mugenzi wawe icyo utashakaga ko bagukorera!»
Ku munsi wo kwibuka nyirizina, ku wa gatandatu taliki ya 27 Mata 2012, gahunda zose zabimburiwe
n’igitambo cya misa cyatangiye saa mbiri za mu gitondo (8h00) kiyobowe na Padiri Mukuru wa Paruwasi
Gatolika ya Kaminuza. Nyuma y’iki gitambo cya misa hakurikiyeho gukora urugendo bucece rwerekezaga
ku Rwibutso rwa Genocide rwa Kaminuza y’u Rwanda. Abakristu Gatolika bose bakikije Urwibutso
habanje kuvugwa amsengesho yo gusabira izi Nzirakarengane zose zazize Jenoside yakorewe abatutsi
muri Mata 1994; hanyuma Chorale La Fraternité na Chorale Illuminatio zifasha abari aho bose kwibuka
binyuze mu ndirimbo. Hakurikiyeho gushyira indabo ku mva, umuvugo wa Nsanzimana Théodore ndeyse
n’amasengesho asoza yo gusabira abpfuye.
Hanyuma abari bitabiriye uyu muhango bose basubiye muri Kiliziya bucece kugira ngo bajye gusoza iyi
gahunda.
Padiri Vicaire Alphonse NKUSI
na Curé Bruno NKONJI ba Paruwasi Gatolika ba Kaminuza bunamira abazize Genocide yo muri Mata
1994 bashyinguye mu rwibutso rwa Kaminuza Nkuru y’u Rwanda (Photo IHIRWE Nicole).