TAARIFA KWA VYOMBO VYA HABARI
Ndugu Waandishi wa Habari, Leo ni siku ya mtoto wa Afrika.
Siku hii ina umuhimu wa kipekee kwa mtoto wa Afrika.
Ni siku ambayo watoto wote barani Afrika wanakumbuka mauaji ya
kinyama yaliyotekelezwa na utawala wa makaburu dhidi ya watoto wa
mji wa SOWETO, tarehe 16, Juni 1976.
Ikiwa ni miaka 39 toka kutokea kwa mauaji hayo dhidi ya damu
isiyokuwa na hatia, Chama Cha Waandishi wa Habari za Watoto
Tanzania (TAJOC), kinalaani vikali kila aina ya dhuluma
zinazoendelea kutekelezwa dhidi ya watoto hapa nchini Tanzania, na
pia tunaiomba serikali kuchukua hatua madhubuti dhidi ya wahusika
wa matukio hayo.
Mfano wa matukio hayo ni lile la mkoani Kilimanjaro ambapo
watoto kadhaa walikutwa wamefichwa kwenye nyumba ya mkazi
mmoja.
Chama cha TAJOC, kinaitaka serikali kuchukua hatua za haraka
dhidi ya watu wa aina hiyo, kwani huko ni kuwadhulumu watoto haki
zao.
Lakini pia watoto nchini bado wanakabiliwa na tatizo la lishe
ambapo takwimu zinaonyesha kwamba, asilimia 42 ya watoto chini ya
miaka mitano nchini wana utapiamlo.TAJOC kinawaasa wananchi kuwa,
ni jukumu la kila Mtanzania kuhakikisha kuwa wanapambana na tatizo
hili la utapiamlo kwa watoto, na kutoa kipaumbele kwa siku 1,000 za
mwanzo za mtoto, kwa maana ya kuwa toka mimba inapotungwa hadi
kipindi cha miaka miwili toka kuzaliwa, kwani ndicho kipindi
kinachotoa picha kamili ya maendeleo ya mtoto.
Tunaiomba serikali kuwa na bajeti maalumu kwenye eneo la lishe,
lakini na wadau wengine kuliangalia suala la lishe ya watoto ili
tatizo la utapiamlo kwa watoto chini ya miaka mitano liweze
kuisha.
Watoto, Kwanza!
Edward Qorro
Mwenyekiti
TAJOC
