KINDERDOOP,
NAGMAAL
en
BEGRAFNISDIENSTE
UCCSA/ELD
1980
Saamgestel deur:
Die Liturgiese Komitee van
The United Congregational Church of Southern Africa
Uitgegee deur:
The Ecumenical Literature Distribution Trust
Posbus 2115, Johannesburg 2000
Kopiereg:
The United Congregational Church of Southern Africa
Posbus 96014
BRIXTON
2019
ISBN 0 86881072 X
Alle regte voorbehou.
INHOUD
Erkennings................................................................................................4
DIE
KINGERDOOP................................................................................6
DIE
NAGMAAL.......................................................................................19
AANHANGSEL.......................................................................................51
Skrifgedeeltes en Gebede vir die
Christelike Jaargang en ander Spesiale Geleenthede
DIE
BEGRAFNISDIENS........................................................................75
ERKENNINGS
Die samestellers wil in erkentlikheid ‘n hartlike woord van dank
rig aan die volgende vir die gebruik van materiaal wat aan kopiereg
onderhewig is, in vertaalde en somtyds effens aangepasde vorm:
Geoffrey Chapman Publishers, vir die gebede by die Offerande en
die Toejuiging in die Nagmaaldiens;
The Church of the Province of South Africa, vir die Afrikaanse
weergawes van die Apostoliese Geloofsbelydenis, die
Geloofsbelydenis van Nicéa, die Sursum Corda en die Santus, uit
Liturgie 1975;
Alan Gaunt en John Paul the Preacher’s Press vir die
Bevestigings in die Nagmaaldiens, “Ons aanbid God die Vader....” en
Ons bevestig ons geloof....”, uit New Prayers for Public
Worship;
Die Registrateurs van die provinsies van Canterbury en York, vir
die Inleiding tot die diens vir Kinderdoop en vir die Eerste gebed
in daardie diens, uit Alternative Services, Series 3, Initiation
Services, van die Algemene Sinode van die Church of England;
The Student Christian Movement Press, Ltd, vir die paragraaf,
“Ons dank U dat Jesus onder ons gebore is...........,” uit
Contemporary Prayers for Public Worship, onder die redaksie van
Caryl Micklem;
The United Reformed Church in England and Wales, vir die vrae
aan die ouers en sommige van die gebede in die diens vir
Kinderdoop, uit die Order of Worship for Baptism of Infants; ook
vir die Dankseggingsgebed uit New Church Praise, en vir die gesang,
“Vir dierb’res eens op aard’ vereen” in die Nagmaaldiens.
Aanhalings uit die Bybel is, in die geval van die Nuwe Testament
en Psalms, afkomstig uit die 1979-Vertaling, Die Nuwe Testament en
die Psalms, en aanhalings uit die res van die Ou Testament is
geneem uit Die Bybel in Afrikaans, kopiereg deur die
Bybelgenootskap van Suid-Afrika. In een of twee gevalle is die
vertaling effens gewysig.
Die gesang aan die einde van die Nagmaaldiens is deur mnr. JH
Smit vertaal.
Indien daar per ongeluk in gebreke gebly sou wees om enige bron
van materiaal wat gebruik is te erken, word verskoning aangebied.
Indien dit onder aandag gebring word, sal dit in die Eerste uitgawe
daarna reggestel word.
DIE
KINDERDOOP
VOORWOORD
DIE DOOP word in die teenwoordigheid van die gemeente bedien,
gedurende die Sondaggodsdiens, en gewoonweg in die afdeling, “DIE
WOORD VAN GOD”, óf na die Skriflesing, óf na die die Preek.
Die Skriflesings is dié vir daardie dag bepaal of onderskeidelik
Esegiël 36:24-28, Romeine 6:3-11 en Johannes 3:1-17. Ander geskikte
gedeeltes kan ook in plaas daarvan gebruik word.
Wanneer verskeie kinders gedurende dieselfde diens gedoop moet
word, om nie die diens onnodig te verleng nie, kan die Leraar die
ouers en die bevorderaars gesamentlik ondervra (5, 6), en elke
familie antwoord dan afsonderlik. So kan die gemeente se
verwelkoming (16) ook net een keer gedoen word, wanneer al die
pasgedoopte kinders voorgestel word.
Geloofsbelydenis (11): Aangesien die Apostoliese
Geloofsbelydenis tradisioneel deur die grootste gedeelte van die
Westerse Kerk gebruik word vir die belydenis gedurende die Doop,
word dit vir opsionele gebruik in hierdie diens ingesluit.
Wanneer die Doop gedurende die Nagmaaldiens plaasvind en hierdie
geloofsbelydenis tydens die Doop gedoen word, word die
Geloofsbelydenis in die Nagmaaldiens (21) natuurlik weggelaat.
Die Gebede (20-25): Wanneer die Doop gedurende die Nagmaaldiens
plaasvind, kan die Voorbidding (24.1-6) in laasgenoemde diens
weggelaat word, en die Onse-Vader gebed (24) gedurende die Doop
moet dan ook weggelaat word.
Dele van die diens wat nommers tussen hakies het, is
opsioneel.
Bevorderaars: Hierdie diens maak uitdruklike voorsiening dat die
doopouers deur bevorderaars bygestaan en ondersteun word. Hulle
verpligtinge word in die vraag (6) uiteengesit waarin hulle gevra
word om die kind se ouers te help om hom/haar in die geloof en
gemeenskap van die Kerk op te voed. Hul funksie is dus nie om die
ouers se verantwoordelikhede oor te neem nie, maar om namens die
gemeente die ouers by te staan sodat hulle hul verantwoordelikhede
kan nakom. Dit is moeilik – of wel onmoontlik – vir die hele
gemeente om ten volle herderlike toesig oor die kind te hou.
Nogtans is dit van die grootste belang, as kinders in die
beoefening van die Christelike lewe opgevoed moet word. Gevolglik
beveel die samestellers aan dat die eeu-oue instelling van
bevorderaars (wat ten minste tot die einde van die tweede eeu n.C.
teruggaan) weer in ons gemeentes in gebruik word.
Bevorderaars behoort goedstaande lede van die gemeente te wees,
wat deur die kerkraad aangestel is, en aan wie hulle vir die kind
se geestelike opvoeding verantwoordelik is, en ook aan wie hulle
gereeld verslag moet gee. Hulle behoort dus volwasse Christene te
wees, bekwaam en bereidwillig om die ouers in die opbouing van die
kind se geestelike lewe by te staan.
In gevalle waar die familie na ‘n ander plek, en dus na ‘n ander
gemeente vertrek, behoort nuwe bevorderaars aangestel te word,
sodat herderlike bediening voortgesit word, totdat die kind vir eie
getuienis van geloof gereed is.
Voorbereiding: Ons insiens, is dit VAN DIE UITERSE BELANG dat
alle ouers vir die doop van hul kinders goed voorberei word. Die
implikasies van die vrae wat aan hulle gestel sal word en die
beloftes wat hulle sal maak (5) behoort minstens ingesluit te word.
Dit mag ook paslik wees om gedurende hierdie voorbereiding die
doopouers aan die bevorderaars voor te stel, en om laasgenoemde aan
hul verantwoordelikhede te herinner.
HIERDIE DIENS is hoofsaaklik gebaseer op ‘n ontwerp van die
Liturgiese Komitee van die Church Unity Commission. Die lede van
die Liturgiese Komitee van die United Congregational Church of
Southern Africa is baie dankbaar vir vergunning om daardie ontwerp
te gebruik. Hulle wil graag ook hulle waardering uitspreek vir die
Alternative Services, Series 3, Initiation Services, van die
Algemene Sinode van die Church of England, en die Order of Worship
or the Baptism of Infants van die United Reformed Church of England
and Wales. Die feit dat sommige daarvan aangepas is vir die gebruik
in hierdie diens verminder geensins ons verskuldigheid aan hulle
nie.
METTERTYD SAL daar ‘n diensorde vir die Doop van Gelowiges
opgestel word om ‘n diensorde vir die Aanname in Volle
Kerklidmaatskap te vergesel.
DIE LITURGIESE Komitee bied hierdie diensorde aan met die bede
dat dit sal ons mense help tot waardiger deelname aan die edele
plegtigheid van die Christelike Doop, en dat God die gebruik
daarvan in ons gemeentes sal seën, tot sy ewige lof.
DIE KINDERDOOP
(Doopgesang)
INLEIDING
BEVESTIGING
Vrae aan:
Die Ouers
Die Bevorderaars
Die Gemeente
DIE DOOP
Versie en Antwoorde
Gebed
(Die Apostoliese Geloofsbelydenis)
Die Benaming
Die Doop
Die Seën van die Kind
DIE VOORSTELLING EN VERWELKOMING
DIE GEBEDE
Gebed vir:
Die Kind
Die Ouers
Die Bevorderaars
Die gemeente
(Die Onse-Vader Gebed)
(Die Seën)
Die gedeeltes deur die Leraar gespreek is in Kleinletters
geset.
Die gedeeltes deur die Gemeente gespreek is vetgedruk.
Die gedeeltes deur DIE LERAAR EN GEMEENTE saamgesproke is in VET
HOOFLETTERS geset.
DIE KINDERDOOP
1. Na die Skriflesing of na die Preek bring die ouers, vergesel
deur die bevorderaars, hulle kind(ers) na die doopvont.
(2) ‘n Doopgesang kan gesing word.
3. INLEIDING
Na sy opstanding het onse Here Jesus Christus aan sy dissipels
gesê:
Aan my is alle mag gegee in die hemel en op die aarde. Gaan dan
na al die nasies toe en maak die mense my dissipels: doop hulle in
die Naam van die Vader en die Seun en die Heilige Gees, en leer
hulle om alles te onderhou wat ek julle beveel het. En onthou: ek
is met julle al die dae tot die voleinding van die wêreld.
Op Pinksterdag het die apostel Petrus op die mense ‘n beroep
gedoen:
Bekeer julle, en laat julle doop in die Naam van Jesus Christus,
sodat julle sondes vergewe kan word, en julle sal die Heilige Gees
as gawe ontvang. Wat God belowe het is vir julle en vir julle
kinders en vir almal wat daar ver is, vir almal wat die Here ons
God na hom toe sal roep.
Broers en susters in Jesus Christus, deur die geboorte van
kinders gee God aan die ouers ‘n deel in die skeppingsdaad en die
vreugde daarvan. Maar almal wat uit aardse ouers gebore is, moet ‘n
wedergeboorte ondergaan. Jesus sê:”..As iemand nie uit water en
Gees gebore word nie, kan hy nie in die koninkryk van God kom nie.”
God belowe ons dus ‘n deel in sy nuwe skepping en in die verbond
van genade, en skenk ons die Heilige Gees, sodat ons in eenheid met
hom mag lewe.
Die Doop is die teken en seël van hierdie nuwe geboorte, van ons
toetrede tot die verbond, en van ons lidmaatskap in Christus se
Kerk, wanneer hy ons van dood tot lewe bring en ons deelnemers in
sy opstanding maak sodat ons as erfgename van sy koninkryk kan
lewe.
Deur die Doop tree ons kinders toe tot die gesin van die Kerk.
Terwyl hulle groot word, benodig hulle die hulp, die voorbeeld en
die aanmoediging van hierdie huisgesin, sodat hulle mag leer om in
kerkgang en private gebed getrou te wees, asook om deur geloof in
God te leef. Hulle vertrou dus op hul ouers, hul bevorderaars en
die gemeente om hulle te leer, te lei en te sorg, sodat hulle tot
eie getuienis van die Christelike geloof gebring kan word, en om
Christus in sy Kerk en in die wêreld te dien.
BEVESTIGING
4. Die Leraar stel die vrae aan die ouers en bevorderaars van
elke kind agtereenvolgens.
(4.1) (Wanneer verskeie kinders gedoop moet word, kan hy die
vrae aan die ouers en bevorderaars gesamentlik stel, en elke
familie antwoord dan afsonderlik.)
5. Aan die ouers sê die Leraar:
M en N, u het u kind vir die Doop gebring. Glo u en vertrou u in
God die Vader as u Vader?
Die ouers antwoord: Ons glo en vertrou.
Glo u en vertrou u in God die Seun as u Verlosser en Heer?
Die ouers antwoord: Ons glo en vertrou.
Glo u en vertrou u in God die Heilige Gees as u Ondersteuner en
Leidsman?
Die ouers antwoord: Ons glo en vertrou.
Belowe u om met die hulp van God ‘n Christelike tuiste aan u
kind te verskaf, waar hy/sy deur u voorbeeld te volg, sal kan leer
om sy/haar vertroue in Jesus Christus te stel, en vir hom te leef?
En belowe u om hom/haar in die godsdiens en lering van die Kerk op
te voed, en hom/haar aan te moedig om ten volle in die Kerk se lewe
en bediening in die wêreld deel te hê?
Die ouers antwoord: Met Gods hulp, belowe ons.
6. Aan die bevorderaars: sê die Leraar;
Sal u, M en N, hierdie kind se ouers help om hom/haar in die
geloof en gemeenskap van die Kerk op te voed?
Die bevorderaars antwoord: Met Gods hulp, belowe ons.
7. Nadat al die ouers en bevorderaars geantwoord het, vra die
Leraar vir die gemeente:
Sal u, Gods volk in dié gemeente, hierdie kind ontvang? Sal u
vir hom/haar en sy ouers bid? Sal u hom/haar in die geloof van
Christus opvoed deur hier so ‘n gemeenskap van aanbidding en diens
te handhaaf dat hy/sy en al die kinders van die gemeente mag
opgroei in die kennis en genade van God, in die liefde en diens van
sy Seun; en in die gemeenskap van die Heilige Gees?
Die Gemeente antwoord: Ons sal met Gods hulp.
DIE DOOP
8. Loof God, die Skepper van hemel en aarde;
Hy behou sy beloftes vir ewig.
9. Laat ons bid.
Almagtige, God,
ons dank U dat u Seun, Jesus Christus,
in die Jordaanrivier gedoop is.
Ons dank U
dat U hom deur die diepe waters van die dode gebring het,
en hom seëvierend tot die lewe opgewek het.
Ons dank U
dat in hom U vir ons die wedergeboorte gee,
deur water en die Heilige Gees.
Halleluja!
Seën hierdie water,
sodat hierdie kind wat hierin gedoop word
een met Christus kan word
in sy dood en opstanding,
om van alle sondes gereinig en verlos te word.
Skenk vir hom/haar u Heilige Gees,
om hom/haar tot nuwe geboorte in die gesin van u Kerk te
bring
en hom/haar met Christus tot volle en ewige lewe op te wek.
Aan U kom toe alle mag, majesteit,
heerskappy en krag tot in alle ewigheid!
10. Die gemeente staan.
11. Laat ons ons geloof bevestig.
EK GLO IN GOD DIE VADER, DIE ALMAGTIGE,
SKEPPER VAN DIE HEMEL EN DIE AARDE
EK GLO IN JESUS CHRISTUS,
SY ENIGGEBORE SEUN, ONSE HERE.
HY IS ONTVANG DEUR DIE KRAG VAN DIE HEILIGE GEES
EN IS UIT DIE MAAGD MARIA GEBORE.
HY HET GELY ONDER PONTIUS PILATUS,
EN IS GEKRUISIG, GESTORWE EN BEGRAWE
HY HET NEERGEDAAL NA DIE DODERYK.
OP DIE DERDE DAG HET HY WEER OPGESTAAN.
HY HET OPGEVAAR NA DIE HEMEL EN SIT AAN DIE
REGTERHAND VAN DIE VADER.
HY SAL WEER KOM OM DIE LEWENDE EN DIE DODE TE OORDEEL.
EK GLO IN DIE HEILIGE GEES.
EK GLO IN DIE HEILIGE, KATOLIEKE KERK.
DIE GEMEENSKAP VAN DIE HEILIGES, DIE VERGEWING
VAN SONDES, DIE WEDEROPSTANDING VAN DIE LIGGAAM.
EN DIE EWIGE LEWE. AMEN.
(11.1) Wanneer die Doop gedurende die Nagmaaldiens plaasvind,
word die Geloofsbelydenis in laasgenoemde weggelaat.
12. Die Leraar ontvang die kind, en vra:
Noem hierdie kind.
Die ouer gee die kind se naam/name.
13. Die Leraar doop die kind deur die water drie keer oor
hom/haar te stort of besprinkel, een keer met die noem van elk van
die Persone van die Drieëenheid:
N……ek doop u
in die Naam van die Vader,
en van die Seun,
en van die Heilige Gees. Amen.
14. Die Leraar seën die kind:
Die Here seën en behoed u;
Die Here laat sy aangesig oor u skyn en u genadig wees;
Die Here verhef sy aangesig oor u en gee u vrede. Amen.
(OF hierdie seën kan deur die gemeente gesing word.)
DIE VOORSTELLING EN VERWELKOMING
15. Die Leraar stel die kind aan die gemeente voor:
U is getuie dat N….in Christus ontvang is, as ‘n huisgenoot van
God. Bid en sorg vir hom/haar, sodat hy/sy in genade mag toeneem,
en aan Christus lewe lank getrou bly.
16. As verteenwoordigers van die ganse Kerk, verwelkom die
gemeente die pasgedoopte kind:
Wees welkom as ‘n lid van die huisgesin van God.
17. Die Leraar gee die kind terug aan die ouers, met die
woorde:
In hierdie hoë en heilige taak wat hy op u gelê het, mag die
Here self met u wees. Mag sy belofte tot u waar wees: “Wie so ‘n
kindjie in my naam ontvang, ontvang my.”
18. (Wanneer verskeie kinders gedoop word, kan die Leraar hulle
gesamentlik aan die gemeente voorstel:)
U is getuies dat hierdie kinders in Christus ontvang is, as
huisgenote van God. Bid en sorg vir hulle, sodat hulle in genade
mag toeneem, en aan Christus lewenslank getrou bly.
En dan word die verwelkoming net eenmaal gesê:
Wees welkom as lede van die huisgesin van God.)
19. Die gemeente mag sit.
DIE GEBEDE
20. Here God, onse Vader, Skepper van die hemel en aarde,
ons dank U dat deur u Heilige Gees
hierdie kind tot ‘n nuwe lewe gebore is,
as u eie aangeneem is, en in die gemeenskap van u Kerk ontvang
is.
Beskerm hom/haar altyd in u liefde.
Gee dat hy/sy ‘n ware en getroue dissipel van Jesus Christus, sy
Heer, word. Amen.
21. Ons dank U vir u genade teenoor hierdie ouers,
vir die lewe wat U geskenk het, en vir dié wat U gespaar
het.
Help hulle om die beloftes wat hulle vandag gemaak het, na te
kom.
Mag hul liefde vir hul kind u liefde weerspieël.
Mag hulle hom/haar u waarheid leer en in al u weë lei,
deur Christus Jesus, onse Here. Amen.
22. Seën die bevorderaars in hul ondersteuning van die
ouers,
in hierdie kind se opvoeding in die Kerk se geloof en
gemeenskap.
Mag hulle vreugde in hul taak ondervind,
met die wete dat wat hulle aan die kind doen,
doen hulle ook aan U, om Jesus ontwil. Amen.
23. Ons dank U vir die huisgesin van geloof
en die gemeenskap wat ons deel
met almal wat in Christus gedoop is.
Help ons om getrou aan ons doop te wees.
Gee dat ons in die wêreld
getuies tot u waarheid
en u liefde vir alle mnse mag wees.
En berei ons voor vir die dag
wanneer die hele skepping in u Seun,
onse Heiland, Jesus Christus, volmaak sal wees. Amen.
24. En soos Christus ons geleer het, sê ons met vertroue:
ONSE VADER WAT IN DIE HEMEL IS,
LAAT U NAAM GEHEILIG WORD,
LAAT U KONINKRYK KOM,
LAAT U WIL GESKIED,
SOOS IN DIE HEMEL NET SO OOK OP DIE AARDE,
GEE ONS VANDAG ONS DAAGLIKSE BROOD;
EN VERGEEF ONS ONS SKULDE SOOS ONS OOK ONS
SKULDENAARS VERGEWE.
EN LEI ONS NIE IN VERSOEKING NIE,
MAAR VERLOS ONS VAN DIE BOSE,
WANT AAN U BEHOORT DIE KONINKRYK,
EN DIE KRAG, EN DIE HEERLIKHEID,
TOT IN EWIGHEID.
AMEN.
25. Die genade van onse Here Jesus Christus,
en die liefde van God,
en die gemeenskap van die Heilige Gees,
sy met ons almal. Amen.
26. As dit nie alreeds gedoen is nie, kan ‘n doopgesang hier
gesing word.
DIE
NAGMAAL
VOORWOORD
HIERDIE diensorde is nie bedoel slegs vir gebruik by
Kerkordelike geleenthede nie, maar ook in die plaaslike
gemeentes.
In wese is dit liturgies: die gedeeltes volg logies op
mekaar.
Deurgaans maak dit ook voorsiening vir die gemeente om ten volle
deel te neem. In sommige gemeentes van ons Kerk sal dit nuwe
elemente in ons aanbidding wees, waar, behalwe die Onse Vader-gebed
en die “Amen” na die Seën, gemeentelike deelname nie gebruiklik is
nie. Nietemin in Congregationalisme – miskien meer as in enige
ander vertakking van die Christelike Kerk – behoort dit ‘n kenmerk
van aanbidding te wees! Hierdie diens is dan ook so beplan dat ons
lede hul regmatige aandeel sal hê.
Alhoewel die diens begryplikerwys hoofsaaklik vir gebruik tydens
die bediening van die Sakrament van die Nagmaal bedoel is, kan dit
by ander geleenthede ook gebruik word. In so ‘n geval moet afdeling
25-49 weggelaat word, en die Voorbidding (24) moet deur die
Offergawes, die Dankgebede (afgesluit met Onse Vader-gebed), en ‘n
Gesang gevolg word.
Dele van die diens wat nommers tussen hakkies het, is
opsioneel.
DAAR IS verskillende ander aangeleenthede waarop die
samestellers van die diensorde aandag wil vestig.
1. In die Skrifgedeeltes (4), die Lofgebed (6) en die Gebed vir
die Genade van God (9) maak die rubrieke voorsiening vir sinne en
gebede wat by die tye van die Christelike Jaargang of by spesiale
geleenthede in die plaaslike gemeente pas. Hierdie sinne en gebede
(saam met dié by die Opening en Afsluiting van die Assembly of ‘n
streeksraad) vorm ‘n AANHANGSEL (bladsye 51-74) tot die diens.
Gedurende die verskillende tye kan dit ook in eredienste, waar die
Nagmaal nie bedien word nie, gebruik word, om sodoende die
aanbidding van ons mense te verryk.
2. In hierdie diensorde is daar geen vermelding aangaande die
houding wat vir gebed ingeneem moet word nie. Alhoewel die
sitgeriewe in die meeste van ons kerke hulle nie tot gemaklike
kniel verleen nie, moet diegene wat gedurende gebed graag wil
kniel, daartoe aangemoedig word, aangesien dit altyd as die mees
gepaste houding beskou word. Daarenteen kan die mense in sommige
gevalle – soos, byvoorbeeld, die gebed by die Offerande (33) en die
Dankseggingsgebed (35) - gevra word om te staan.
3. Die samestellers wens verder betreffende gebede die aandag op
die gebruik van die AMEN te vestig. Die term beteken “Mag dit so
wees” – met ander woorde, dit is die gemeente se beaming op die
gebed wat die leraar namens hulle offer. “Die hele volk moet sê:
“Amen!” (Ps. 106: 48) behoort as reël vir al ons
aanbiddingsgeleenthede te geld. Dit beteken dan dat dit nooit deur
die persoon wat die gebed lei, gesê moet word nie, maar eerder deur
hulle wat daarin deel deur daarna te luister. Daarenteen waar die
hele gemeente die gebed saambid (bv. Die Ons Vader-gebed) moet, dit
natuurlik geheel-en-al weggelaat word.
Maar deur “Amen” te sê, doen die gemeente meer as net om hul met
die gebed te vereenselwig. Hiermee word ook uitdrukking aan die
priesterskap van alle gelowiges gegee, omdat dié woord impliseer
dat almal aktief hul regmatige aandeel in elk van die gebede
het.
4. Om verder hierdie uitgangspunt van die priesterskap van alle
gelowiges te beklemtoon, word daar vir andere ook voorsiening in
die diens gemaak, afgesien van die Leraar, om deel te neem aan die
waarneming van die diens, veral met die lees van die Skrif (13-15),
die Voorbede (24) en die Hertoewyding (38). Iemand anders as die
Leraar kan ook die Dankseggingsgebed (35) of die Slotgebed (45)
lei. (In hierdie verband sien ook 11 hieronder.)
Ons is oortuig dat in elke erediens elke poging aangewend moet
word om meer van ons mense te betrek. Maar daaroor wil ons ook dit
streng beklemtoon dat almal wat uitgenooi word om op hierdie manier
deel te neem, vroegtydig in kennis gestel moet word, sodat hulle
hulself kan voorberei om Gods gemeente in daardie aspekte van die
erediens te lei, wat aan hulle toevertrou word. Verder moet diegene
wat vir die Voorbede verantwoordelik is, die strekking van hierdie
gebede in ag neem, en hulle daarby bepaal.
5. Die Skriflesing (13-15): Die ideale erediens sluit gedeeltes
uit die Ou en Nuwe Testament en die Evangelies in. Waar dit egter
nodig is om die diens in te kort, kan óf die Ou óf die Nuwe
Testamentiese gedeelte – of selfs albei – weggelaat word, maar NIE
die Evangelie nie.
6. Alternatiewe keuses word in sekere gedeeltes van die
diensorde ingesluit, nl. die Versekering van Vergifnis (8), die
Lofbetoning (19) en die Bevestiging van Geloof (21); Daar sal
begryplikerwys in elk geval net EEN alternatiewe keuse gebruik
word. Wanneer die Hernuwing van die Verbond (41-44) ingesluit word,
moet die Bevestiging van Geloof geheel-en-al weggelaat word.
7. Geen voorsiening word in hierdie diensorde gemaak vir diegene
wat wil uitgaan omdat hulle nie wil of instaat is om aan die
Nagmaal deel te neem nie. Dit is doelbewus gedoen, aangesien die
samestellers sterk daaromtrent voel dat die eenheid van die
aanbiddende gemeente tot die einde van die diens gehandhaaf moet
word, en dat selfs vir hulle wat nie aan die brood en wyn wil
deelneem nie dit van besonder nut sal wees om dwarsdeur die diens
teenwoordig te wees. Dit geld vir ons kinders, die katkisante en
diegene wat onder sensuur geplaas is; almal sal meer aangaande
Christus leer deur by die Sakrament aanwesig te wees.
8. Byna al die Nuwe-Testamentiese aanhalings word uit die
onlangse 1979-Vertaling geneem. Dit skep ‘n probleem (wat ook deur
ander vertalings nie uit die weg geruim is nie) by die woord
“gedagtenis” in die Woorde van die Instelling (28), die
Dankseggingsgebed (35), die aksie (36), die Deelname (37) en die
Slotgebed (48). Daar is egter geen uitweg uit hierdie dilemma nie,
want ons besit nie ‘n enkele term wat die volkome drakrag van die
Hebreeuse (of Aramese) naamwoord wat Jesus gebruik het uitdruk nie.
Dit is ‘n baie kragtige woord, wat beteken om op so ‘n manier te
onthou dat die verlede reg in die hede gebring word. Wanneer
hierdie woord in die Nagmaaldiens voorkom, voer dit ons in die gees
na-die Bovertrek terug, waar Christus aan sy tafel voorsit, en al
sy mense van alle plekke en tye gemeenskap met hom en gevolglik met
mekaar het. Met die uitdeel van die brood word gepoog om in die
woorde wat deur die Leraar gespreek word kortliks uitdrukking
hieraan te gee – “... en hou so sielsgemeenskap met hom en met al
sy volgelinge.”
9. Die Offerande (32) in hierdie diens volg die eeue-oue gebruik
van die universele Kerk daarin dat dit nie net die offer van die
lede se gawes (d.i. geld of goed) insluit nie, maar ook die offer
van die brood en wyn. Dit is die bring na God van al drie elemente
wat die offerande behels, en ons beveel sterk by ons gemeentes aan
dat dit in ons aanbidding tot sy reg kom. (Waar dit gebruiklik is
om die Tafel vooraf te dek, doen ons aan die hand dat ten minste
een bord met brood en een beker – of een skinkbord met kelkies –
een kant gehou word tot hierdie punt in die diens, sodat dit die
toewyding van hierdie elemente simboliseer.)
10. Die Aksie (36): By elke viering van die Nagmaal moet die
daad van die breking op so ‘n wyse uitgevoer word dat almal dit kan
sien. Hiervoor moet daar genoeg ongebreekte brood beskikbaar wees
sodat die Leraar dit by hierdie hoogtepunt in die diens kan breek.
Netso moet daar (as daar een beskikbaar is) ‘n skinkbord gebruik
word om die wyn in die beker te skink, soos die rubriek
voorsien.
11. In baie van ons gemeentes is dit gebruiklik dat sekere
diakens gebede sê gedurende die Deelname (37). Vanweë ons sterk
oortuiging dat die gemeente ten volle in die erediens moet
deelneem, wil ons nie hê dat dierdie gewoonte verwerp word nie. Aan
die anderkant wil ons voorstel dat sulke diakens uitgenooi word om
die Dankseggingsgebed (35) te sê in plaas van addisionele gebede.
In daardie geval kan die Eerste diaken die Eerste gedeelte van die
gebed (tot by die gemeente se antwoord: “Heilig, heilig, heilige
Heer...”) sê, en die ander tweede gedeelte daarvan, vanaf die
woorde: “Heilige God, deur wat ons hier doen...”
12. Oor die netelige saak oor wanneer die gemeente die brood en
wyn moet nuttig word in die diensorde die swye bewaar! Plaaslike
gemeentes sal ongetwyfeld voortgaan om hul gewone gebruik in dié
verband te handhaaf. Daar moet egter kennis van geneem word dat die
algemene Gereformeerde gewoonte waarvolgens die Leraar Eerste neem,
daarna die diakens en uiteindelik die res van die gemeente (wat eet
en drink wanneer hulle die elemente ontvang), op historiese sowel
as liturgiese gronde aanbeveel kan word. Daar bestaan min twyfel
dat dit die gebruik was in die dae van klassieke
Congregationalisme, veral in die geval van die wyn, toe slegs ‘n
gewone beker gebruik is.
13. Daar is ‘n meningsverskil (hoewel nie onder die samestellers
van hierdie diensorde nie!) oor die mees geskikte plekke vir die
Hernuwing van die Verbond en vir die Vrede. In hierdie diensorde
kom dit voor by die onderskeie plekke (41 – 44 en 46), want dit is
ons siening dat dit pasliker is nadat die gemeente van Christus aan
sy Tafel saam was. Aan die anderkant kon dit elders geplaas word:
bv. die Verbond in plaas van die Bevestiging van Geloof (21), en
die Vrede voor of na die Offerande (32-33).
14. Met betrekking tot die Vrede, kan die woorde deur ‘n gepaste
gebaar van die kant van die gemeente as geheel (bv. die handdruk)
gevolg word, solank dit nie onnodige inbreuk op die verloop van die
diens maak of die gees van die aanbidding steur nie.
15. In die slotplegtigheid van die “Liturgie van die Bovertrek”
word klem gelê op ons gewaardeerde geloof in die gemeenskap van die
heiliges. Dit is veral versoek deur die Uitvoerende Raad van die
United Congregational Church of Southern Africa, toe die opstel van
hierdie diensorde vir die eerste keer voorgestel is, om die verdere
dimensie van ons aanbidding en lidmaatskap van Christus te
beklemtoon.
16. Vir hulle wat nie onnodiglik onderbreek wil wees nie, is die
plek van die Afkondigings in ‘n liturgiese diens ‘n voortdurende
probleem. Ons het dit reg aan die einde geplaas, nie net met die
hoop dat die gemeente dit sal onthou nie, maar liewer omdat dit ‘n
aankondiging is van wat die gemeente van plan is om in Christus se
naam in die week op hande te doen. In daardie sin is dit ‘n gepaste
reaksie van die kant van hulle wat aan die Here se Tafel was en
hulle gemeenskap met hom hernu het. Bo en benewens dit, as die
afkondigings gedoen is, kry die verdagingswoorde wat onmiddelik
volg – “Gaan in vrede om God lief te hê en te dien” – addisionele
betekenis.
DIE LITURGIESE KOMITEE bied hierdie diensorde aan met die bede
dat dit ons mense sal help om God met meer waardigheid te aanbid in
die Sakrament van sy Seun se dood en opstanding, en hom meer getrou
in hul alledaagse lewe te dien, aan hom eer toe te bring en die
koms van sy koninkryk te verhaas.
DIE NAGMAALDIENS
Prosessiegesang
Die Begroeting
DIE LITURGIE VAN DIE WOORD
LOFUITING
Skrifgedeeltes
Lofgebed
Berou en Vergifnis
Versekering van Vergifnis
Gebed vir die Genade van God
Gesang van Lof
DIE WOORD VAN GOD
Gebed vir Insig
Die Skriflesing:
(Ou Testament)
(Psalm)
(Nuwe Testament)
(Lofsang of Gesang)
Die Evangelie
Gesang
Die Preek
Die Lofbetoning
ANTWOORD OP GODS WOORD
(Bevestiging van Geloof)
Gesang of Koorsang
Voorbidding
(Die Bevestiging van Kerkraadlede)
(Die Aanneming van Lidmate)
DIE LITURGIE VAN DIE BOVERTREK
Die Woorde van die Instelling
Die Genadevolle Uitnodiging
Die Gebed van Toenadering
Die Nagmaalgesang
Die Offerande
Die Afsondering van die Elemente
Die Dankseggingsgebed
Die Aksie
Die Deelname
Die Toejuiging
Hertoewyding
(Hernuwing van die Verbond)
Die Vrede
Slotgebed
Gesang
Die Afkondigings
Die Verdaging en die Seën
Die gedeeltes deur die Leraar gespreek in Kleinletters
geset.
Die gedeeltes deur die Gemeente gespreek is vetgedruk.
Die gedeeltes deur Die LERAAR EN GEMEENTE saamgesproke is in VET
HOOFLETTERS geset.
DIE NAGMAAL
PROSESSIEGESANG
1. Die prosessie word gevorm deur die Koor, gevolg deur die
diakens en die Leraar.
1.1 (Die prosessie kan gelei word deur ‘n Diaken wat die Bybel
dra, wat hy dan op die kateder plaas. Waar daar nie ‘n kateder is
nie, kan dit op die preekstoel geplaas word.)
1.2 Die gemeente staan onderwyl die prosessiegesang deur die
koor (of deur die hele gemeente gesing word.)
2. Die gemeente bly staan
3. DIE BEGROETING
Behalwe op Paasdag word hierdie begroeting gebruik:
Genade en vrede vir julle
van God onse Vader en die Here Jesus Christus.
Genade en vrede ook vir u.
DIE LITURGIE VAN DIE WOORD
LOFUITING
4. SKRIFGEDEELTES
4.1 Die paslike Skriflesing vir die verskillende tye van die
Christelike Jaargang of vir spesiale geleenthede in die gemeente
word in die AANHANGSEL (bladsye 46-68) gevind.
4.2 Wanneer dit nie gebruik word nie, word die volgende
gesê:
Ons hulp kom van die Here,
wat hemel en aarde gemaak het. (Ps. 124:8)
Loof die Here, want hy is goed
Aan sy liefde is daar geen einde nie! (Ps. 106:1)
Wie kan die magtige dade van die Here onder woorde bring?
Wie kan sy lof ten volle verkondig? (Ps. 106:2)
Uit hom en deur hom en tot hom is alle dinge.
Aan hom behoort die heerlikheid tot in ewigheid! (Rom.
11:36)
Christus het opgestaan uit die dode.
Die Here het opgestaan.
HALLELUJA!
5. Die gemeente sit.
6. LOFGEBED
6.1 Die paslike lofgebede vir die tye van die Christelike
Jaargang of vir spesiale geleenthede in die gemeente word in die
AANHANGSEL (bladsye 51-74) gevind.
6.2 Wanneer dit nie gebruik word nie, maak die Leraar gebruik
van die volgende (of ‘n ander) lofgebed:
Lof en eer aan U, almagtige God!
U het die heelal geskape en hou dit in stand.
Lof en eer aan U, God ons Vader!
U het ons lief met ‘n liefde wat geen perke het nie;
U het ons u Seun, Jesus Christus, gegee
om ons te versoen met U en met mekaar.
Lof en eer aan U
uit elke deel van u heerskappy,
uit die Kerk in die hemel en op aarde,
uit ons lofliedere en ons lewens!
Aan U die eer,
aan U die lof,
deur Jesus Christus, onse Heer. AMEN.
7. BEROU EN VERGIFNIS
Laat ons ons sondes voor God bely:
ons dade wat sy gebooie verbreek en sy kinders tenagekom
het;
(stille gebed)
ons woorde waarmee ons Christus ons Heer verloën het
en diegene vir wie hy gekom het om te red,
gekwes of beswaar het;
(stille gebed)
Ons gedagtes wat hom onwaardig was;
(stille gebed)
Al die kwade wat ons gedoen het,
en die goeie wat ons ongedaan gelaat het.
(stille gebed)
Here, wees ons genadig.
Christus, wees ons genadig.
Here, wees ons genadig.
TER WILLE VAN U SEUN, CHRISTUS, ONSE HERE,
VERGEEF ONS ONS VERLEDE,
EN GEE DAT ONS U MET
‘N NUWE LEWE MAG DIEN,
TOT VERHEERLIKING VAN U NAAM.
8. VERSEKERING VAN VERGIFNIS
Ontvang die versekering van God se vergifnis.
8.1 EEN van die volgende Skrifgedeeltes word gebruik:
(A) God sê:
As my volk, oor wie my naam uitgeroep is,
hulle verootmoedig en bid
en my aangesig soek
en hulle bekeer van hul verkeerde weë,
dan sal ek uit die hemel hoor
en hulle sondes vergewe en hulle land genees. (2 Kron 7:14)
OF
(B) God sê:
Ek, ek is dit
wat jou oortredinge uitdelg om my ontwil
en aan jou sondes dink ek nie.
(Jes. 43:25)
OF
(C) God het die wêreld so liefgehad
dat hy sy enigste Seun gegee het,
sodat dié wat in hom glo, nie verlore sal gaan nie,
maar die ewige lewe sal hê.
(Joh. 3:16)
OF
(D) Aangesien ons nou deur geloof geregverdig is,
het ons vrede by God
deur onse Here Jesus Christus.
(Rom. 5:1)
OF
(E) As ons ons sondes bely,
hy is getrou en regverdig.
Hy vergewe ons ons sondes
en reinig ons van alle ongeregtigheid.
(1 Joh. 1:9)
OF
(F) Dit is ‘n betroubare woord
en werd om sonder voorbehoud aanvaar te word:
Christus Jesus het in die wêreld gekom
om sondaars te verlos.
(Tim. 1:15)
9. GEBED VIR DIE GENADE VAN GOD
9.1 Die paslike gebede vir die tye van die Christelike Jaargang
en spesiale geleenthede in die gemeente word in die AANHANGSEL
(bladsye 51-74) gevind.
9.2 Wanneer dit nie gebruik word nie, maak die Leraar gebruik
van die volgende (of ’n ander) gebed vir God se genade:
Almagtige God,
bevestig en bekragtig ons in alles wat goed is,
en bewaar ons vir die ewige lewe;
deur Jesus Christus, onse Here.
Aan hom, met u en die Heilige Gees, een God,
sy al die heerlikheid, vir ewig. Amen.
10. GESANG VAN LOF
DIE WOORD VAN GOD
11. Waar moontlik behoort gemeentelede gevra te word om die
Skrifgedeeltes wat vir die diens gekies is, voor te lees.
12. GEBED VIR INSIG
U HET ONS GELEER, HERE GOD,
DAT ONS NIE VAN BROOD ALLEEN KAN LEWE NIE,
MAAR VAN ELKE WOORD WAT UIT U MOND KOM.
MAG CHRISTUS, DIE BROOD VAN DIE LEWE,
WAT MENS GEWORD HET,
DIE SKRIFTE VIR ONS ONTVOU,
SODAT ONS U WIL MAG LEER KEN,
EN MAG VOORTGAAN AS SY VOLGELINGE.
DIE SKRIFLESING
13. ‘n Gedeelte uit die Ou Testament.
13.1 Die Leser lei die gedeelte in:
Die Ou-Testamentiese Skriflesing is geneem uit hoofstuk..., (by
vers...).
13.2 Na die Skriflesing
Dit is die woord van die Here.
Dank sy God!
13.3 Die Skriflesing kan deur ‘n Psalm en/of stille oordenking
gevolg word
14. ‘n Gedeelte uit die Nuwe Testament uitgesonderd die
Evangelies.
14.1 Die Leser lei die gedeelte in:
Die Nuwe Testamentiese Skriflesing is geneem uit...,
hoofstuk..., (by vers...).
14.2 Na die Skriflesing:
Dit is die woord van die Here.
Dank sy God!
14.3 Die Skriflesing kan deur ‘n Lofsang of ‘n Gesang en/of
stille oordenking gevolg word.
15. DIE EVANGELIE
15.1 Die Leser lei die Evangelie-gedeelte in:
Luister na die Blye Boodskap, uit die Evangelie volgens... ...,
hoofstuk..., (by vers...).
15.2 Na die lees van die Evangelie:
Dit is die Blye Boodskap van Christus.
Lof aan Christus, onse Heer!
16. Die lees kan deur stille oordenking gevolg word.
17. GESANG
(waarin die Heilige Gees aangeroep word of dank vir die Skrif
gegee word)
18. DIE PREEK
19. DIE LOFBETONING
Aan die einde van die Preek gee die Leraar God die eer, deur
gebruik te maak van EEN van die volgende Skrifgedeeltes:
(A) Aan hom wat deur sy krag wat in ons werk, magtig is
om oneindig meer te doen as wat ons bid of dink,
aan hom kom die eer toe, in die Kerk,
deur verbondenheid met Christus Jesus,
deur al die geslagte heen tot in alle ewigheid. Amen. (Ef.
3:20-21)
OF
(B) Uit die liefde vir ons het hy ons deur sy bloed
van ons sondes verlos
en ons sy koninkryk gemaak, priesters vir God sy Vader.
Aan hom behoort die heerlikheid en die krag
tot in alle ewigheid. Amen.
(Op. 1:5-6)
OF
(C) Die lot en die heerlikheid,
die wysheid, die dank en die eer,
die mag en die sterkte behoort aan ons God
tot in alle ewigheid. Amen.
(Op 7:12)
OF
(D) Aan hom wat magtig is
om julle van struikeling te bewaar,
en julle onbevlek en met vreugde
sy heerlikheid te laat aanskou
aan die enigste God, ons Verlosser,
deur Jesus Christus ons Here,
aan hom behoort die heerlikheid en die majesteit,
die krag en die mag,
van alle ewigheid af, ook nou
en tot in alle ewigheid. Amen.
(Jud 24-25)
20. Die Lofbetoning kan deur stille oordenking en/of gevolg
word.
ANTWOORD OP GODS WOORD
(21)BEVESTIGING VAN GELOOF
21. Tensy die Verbond later in die diens hernu sal word, kan die
gemeente opstaan en hul geloof bevestig.
(21.1)EEN van die volgende kan gebruik word:
(A) DIE APOSTOLIESE GELOOFSBELYDENIS
EK GLO IN GOD DIE VADER,
DIE ALMAGTIGE,
SKEPPER VAN DIE HEMEL EN DIE AARDE
EK GLO IN JESUS CHRISTUS,
SY ENIGGEBORE SEUN, ONSE HERE,
HY IS ONTVANG DEUR DIE KRAG VAN DIE HEILIGE GEES
EN IS UIT DIE MAAGD MARIA GEBORE.
HY HET GELY ONDER PONTIUS PILATUS,
EN IS GEKRUISIG, GESTORWE EN BEGRAWE.
HY HET NEERGEDAAL NA DIE DODERYK.
OP DIE DERDE DAG HET HY WEER OPGESTAAN.
HY HET OPGEVAAR NA DIE HEMEL
EN SIT AAN DIE
REGTERHAND VAN DIE VADER.
HY SAL WEER KOM
OM DIE LEWENDE EN DIE DOOIE TE OORDEEL.
EK GLO IN DIE HEILIGE GEES.
EK GLO IN DIE HEILIGE, KATOLIEKE KERK.
DIE GEMEENSKAP VAN DIE HEILIGES,
DIE VERGEWING VAN SONDES,
DIE WEDEROPSTANDING VAN DIE LIGGAAM.
EN DIE EWIGE LEWE.
OF
(B) DIE GELOOFSBELYDENIS VAN NICẾA
ONS GLO IN EEN GOD,
DIE ALMAGTIGE VADER,
DIE SKEPPER VAN HEMEL EN AARDE,
EN VAN ALLE SIENLIKE EN ONSIENLIKE DINGE.
ONS GLO IN EEN HERE, JESUS CHRISTUS,
DIE ENIGGEBORE SEUN VAN GOD,
GEBORE UIT DIE VADER VOOR ALLE EEUE,
GOD UIT GOD, LIG UIT LIG,
WAARAGTIGE GOD UIT WAARAGTIGE GOD,
GEBORE, NIE GEMAAK NIE,
VAN DIESELFDE WESE MET DIE VADER,
DEUR WIE ALLE DINGE GEMAAK IS.
TER WILLE VAN ONS, MENSE, EN OM ONS TE VERLOS
HET HY UIT DIE HEMEL NEERGEDAAL.
DEUR DIE KRAG VAN DIE HEILIGE GEES
IS HY UIT DIE MAAGD MARIA GEBORE,
EN HET MENS GEWORD.
OM ONS ONTWIL IS HY ONDER PONTIUS PILATUS GEKRUISIG;
HY HET GELY, HY HET GESTERWE, HY IS BEGRAWE.
DIE DERDE DAG HET HY WEER OPGESTAAN,
IN VERVULLING VAN DIE SKRIFTE.
HY HET OPGEVAAR NA DIE HEMEL,
EN SIT AAN DIE REGTERHAND VAN DIE VADER.
HY SAL WEER KOM IN HEERLIKHEID
OM DIE LEWENDE EN DIE DODE TE OORDEEL,
EN SY KONINKRYK SAL GEEN EINDE HÊ NIE.
ONS GLO IN DIE HEILIGE GEES,
DIE HERE, DIE GEWER VAN DIE LEWE,
WAT VAN DIE VADER EN DIE SEUN UITGAAN,
SAAM MET DIE VADER EN DIE SEUN
WORD HY AANBID EN VERHEERLIK.
HY HET DEUR DIE PROFETE GESPREEK.
ONS GLO IN EEN, HEILIGE, KATOLIEKE EN APOSTOLIESE KERK.
ONS BELY EEN DOOP
TOT VERGIFNIS VAN SONDES.
ONS VERWAG DIE OPSTANDING VAN DIE DODE
EN DIE EWIGE LEWE.
OF
(C) ONS AANBID GOD, DIE VADER,
WAT DIE HEELAL GESKAPE HET
EN DIT IN LIEFDE IN STAND HOU.
ONS AANBID JESUS CHRISTUS,
IN WIE GODS WAARHEID EN KRAG MENS GEWORD HET
EN ‘N LEWE SOOS DIẾ VAN ONS GELEI HET.
HY HET AAN DIE KRUIS GESTERWE;
HY HET UIT DIE DODE OPGESTAAN;
HY REGEER MET DIE VADER.
ONS VERWELKOM DIE HEILIGE GEES,
IN WIE GODS KRAG EN WAARHEID NOG TOT ONS KOM.
ONS ERKEN EEN UNIVERSELE KERK
IN AANSLUITING BY DIE APOSTELS,
DEUR WIE GOD VAN VOORNEMENS IS OM AAN DIE WÊRELD
SY WAARHEID EN LIEFDE TE TOON.
ONS SIEN UIT NA DIE TOEKOMS
WANNEER GODS SKEPPENDE WERK VOLTOOI SAL WEES,
SY VOLK IN SY EWIGE LEWE SAL DEEL,
EN DIE HEELAL MET VOLMAAKTE LOF SAL WEERKLINK.
OF
(D) ONS BEVESTIG ONS GELOOF
DAT GOD DIE WÊRELD IN WYSHEID EN GOEDHEID REGEER,
EN DAT HY ONS TOT SY DIENSKNEGTE GEROEP HET.
DEUR JESUS CHRISTUS HET HY ONS SY WAARHEID GETOON
EN ONS VAN DIE BOSE VRYGEMAAK.
ONS GLO DAT GODS LIEFDE NOOIT SAL EINDIG NIE,
DAT HY SAL VOORTGAAN OM ONS TE VERGEWE,
EN ONS UITEINDELIK TOT IN VOLLEDIGE KENNIS EN VOLMAAKTE
GEMEENSKAP MET HOMSELF SAL BRING.
ONS HET GOD LIEF OMDAT HY ONS EERSTE LIEFGEHAD HET,
EN ONS SY SEUN GEGEE HET
SODAT ELKEEN WAT IN HOM GLO –
NIE VERLORE SAL GAAN NIE,
MAAR DIE EWIGE LEWE SAL HÊ.
ONS SAL OP GOD VIR ALTYD VERTROU,
EN ONS LIEFDE AAN HOM BEWYS
DEUR MEKAAR LIEF TE
HÊ EN OOK ONS NAASTE;
MET ONS STEMME EN ONS LEWE
SAL ONS HOM VIR EWIG LOOF.
22. GESANG OF KOORSANG
23. VOORBIDDING
23.1 Besondere onderwerpe vir voorbidding kan kortliks hier
vermeld word:
23.2 Die Leraar (of iemand anders wat daartoe aangestel is) kan
voorgaan in voorbereide of vry gebed, of kan die volgende
gebruik:
24. GEBEDE
24.1 Laat ons vir die Kerk oral in die wêreld bid, en veral vir
die Kerk in hierdie land.
Here God,
gee aan die Kerk ‘n duideliker openbaring en dieper wysheid,
sodat deur die hernuwing van haar eenheid
sy u heerlikheid kan weerspieël;
en laat die ewige boodskap van u Seun
as die blye boodskap van die nuwe skepping ontvang word;
deur hom wat alle dinge nuut maak,
Jesus Christus, onse Heer. Amen.
24.2 Laat ons vir die volkere van die wêreld bid, en veral vir
hierdie volk.
Here God,
U het die ganse mensdom geskape,
alle mense na u eie beeld;
U het Jesus gestuur om vrede aan alle nasies te verkondig.
Verenig alle mense in een broederskap in hom
en vestig so u heerskappy van vrede op aarde,
deur hom wat die Vredevors is,
Jesus Christus, onse Heer. Amen.
24.3 Laat ons vir manne en vroue in hul werk bid.
Here God,
u Seun Jesus het as skrynwerker gewerk.
Bevestig alle werkers
in die diens van hul medemens,
sodat hulle op die vaste grondslag
van u doelstelling sal bou;
deur hom vir wie dit vreugde was om u wil te doen,
Jesus Christus, onse Heer. Amen
24.4 Laat ons vir almal wat in moeilikheid verkeer, bid,
Here God,
u Seun het gekom om die laste van mense te dra.
In u genade verleen hulp aan die hulpelose,
almal wat deur ons gevoellose wêreld geknak is,
wat geval het,
en nie sonder u hulp kan opstaan nie;
deur hom wat medelye met die menigtes gehad het,
Jesus Christus, onse Heer. Amen.
24.5 Nog voorbidding kan volg, bv.
Vir die krankes,
Die werklose,
Die gevangenes,
Die bedroeftes,
Enigeen met ‘n besondere behoefte,
Hulle wat op die drumpel staan om te sterf.
24.6 Aan die einde van die gebede:
Here God,
in Jesus het U na aan ons gekom,
en u liefde en simpatie aan ons getoon.
Terwyl ons in die wêreld leef en werk;
gee aan ons ‘n liefde wat u Liefde vir mense weerspieël,
en medelye vir die behoefte van alles wat U geskape het;
deur Jesus Christus, onse Heer. Amen.
25. DIE BEVESTIGING VAN KERKRAADLEDE
26. DIE AANNEMING VAN LIDMATE
As lidmate aangeneem word met belydenis van geloof of deur
oorplasing, of as iemand herstel word tot kerklike voorregte kan
die gepaste diensorde by hierdie geleentheid gevolg word.
DIE LITURGIE VAN DIE BOVERTREK
27. Die Leraar beweeg na die Nagmaalstafel.
28. DIE WOORDE VAN DIE INSTELLING
Geliefdes, luister na die uiteensetting van hoe Christus,
volgens Paulus, die Nagmaal ingestel het:
Ek het van die Here ontvang wat ek ook aan julle oorgelewer het:
Die Here Jesus het in die nag waarin hy oorgelewer is, brood geneem
en, nadat hy God daarvoor gedank het, het hy dit gebreek en gesê:
“Dit is my liggaam; dit is vir julle. Gebruik dit tot my
gedagtenis.” Net so ook het hy ná die maaltyd die beker geneem en
gesê: “Hierdie beker is die nuwe verbond, wat deur my bloed beseël
is. Gebruik dit, elke keer as julle daaruit drink, tot my
gedagtenis.” Elke keer as julle van hierdie brood eet en uit die
beker drink, verkondig julle die dood van die Here, totdat hy
kom.
29. DIE GENADEVOLLE UITNODIGING
Luister ook na die genadevolle uitnodiging waarmee ons Here
Jesus ons uitnooi na hom toe, sodat ons sy tafel kan nader in die
versekering dat hy ons hier verwelkom. Hy sê:
Kom na my toe, almal wat uitgeput en oorlaai is, en ek sal julle
rus gee. Neem my juk op julle en leer van my, want ek is sagmoedig
en nederig van hart, en julle sal rus kry vir julle gemoed. My juk
is sag en my las is lig.
Geseënd is die wat honger en dors na wat reg is, want hulle sal
versadig word.
Ek is die brood wat lewe gee. Wie na my toe kom, sal nooit weer
honger kry nie: en wie in my glo, sal nooit weer dors kry nie. Ek
sal hom wat na my toe kom, nooit verwerp nie. Kyk, ek staan by die
deur en ek klop. As iemand my stem hoor en die deur oopmaak, sal ek
by hom ingaan en saam met hom die feesmaal hou, en hy saam met
my.
Hierdie tafel van die Here is oop vir almal wat hom liefhet en
verlang om hulself aan hom toe te wy. In sy naam nooi ons almal wat
met ons aanbid om in die heilige maaltyd te deel.
30. DIE GEBED VAN TOENADERING
Laat ons antwoord op Christus se uitnodiging. Laat ons bid.
Genadige God,
Ons kom nie na hierdie tafel omdat ons voel dat ons goed is
nie.
Ons kom as sondige mense, wat vergifnis nodig het.
Ons kom omdat ons smag na die lewe, en U alleen kan ons
voed.
Vader, vergeef ons en voed ons.
Ons kom omdat Christus ons uitgenooi het.
Ons kom in dankbaarheid en bewondering, in verering en
aanbidding, om onsself ten volle aan U te offer.
Vader, ons prys U, neem ons aan.
31. DIE NAGMAALGESANG
32. DIE OFFERANDE
Geliefdes in Christus, die Evangelie deel ons mee dat op die
Eerste dag van die week, die dag toe ons Heer uit die dode
opgestaan het, het hy aan sy dissipels verskyn, en hom aan hulle
bekend gemaak met die breek van die brood.
Laat ons dan hierdie tafel met die offergawes van ons lewe en
arbeid voorberei.
U gawes sal nou ontvang word.
32.1 Die Diakens ontvang die gemeente se gawes, en bring dit na
die tafel met die brood en wyn.
33. Dit word dan in gebed toegewy:
33.1 Die Leraar neem die brood aan:
Ons loof U, Heer, God van die ganse skepping:
Deur u goedheid kan ons hierdie brood offer,
Wat die aarde opgelewer het en mensehande gebak het.
Here, voed ons met die Brood van die lewe.
33.2 Die Leraar neem die wyn aan:
Ons loof U, Heer,
God van die ganse skepping;
Deur u goedheid kan ons hierdie wyn offer,
Die vrug van die wynstok en die werk van mensehande.
Here, les ons dors.
33.3 Die Leraar neem die geldgawes aan:
Ons loof U, Heer,
God van die ganse skepping;
Deur u goedheid kan ons hierdie geld offer,
Die simbool van die talente wat U aan ons gegee het, en van ons
arbeid.
Neem ons en ons besittings om u werk in die wêreld te doen.
34. DIE AFSONDERING VAN DIE ELEMENTE
Dat ons met blydskap mag uitvoer wat Jesus ons beveel het, volg
ons sy voorbeeld in dit wat ons sê en doen.
Soos Jesus in die nag waarin hy oorgelewer is, brood en wyn
geneem het, (die Leraar lê sy hande op die bord en beker) so sonder
ons hierdie af vir heilige gebruik.
En soos hy die seën gevra en daarna gedank het, laat ons
bid.
35. DIE DANKSEGGINGSGEBED
Verhef u harte.
Ons verhef hulle tot die Here.
Laat ons die Here onse God dank.
Dit is paslik om hom te dank en loof.
Almagtige God, Bron van alle lewe en liefde,
met blydskap gee ons eer en dank
dat ons in u wêreld leef,
dat U dit voortdurend skep en instandhou deur u krag,
en dat U ons in staat stel om U te kan ken en liefhê, vertrou en
dien.
Ons dank U
dat U die wêreld so lief het dat U,
U enigste Seun gegee het,
sodat elkeen wat in hom glo
nie verlore sal gaan nie maar die ewige lewe sal hê.
Ons dank U
dat Jesus onder ons gebore is;
Dat hy om menslike lot hier op aarde beleef het,
Dat hy vir ons gely en gesterf het;
Dat hy weer opgestaan het,
En na u heerlikheid teruggekeer het.
Ons dank U
dat hy altyd deur die Heilige Gees met ons teenwoordig is,
en dat ons in die vaste hoop van sy oorwinning ons kan
verbly,
in die geloof dat u koninkryk sal kom,
en dat in lewe, in dood en in die hiernamaals U met ons is.
Ons dank U
dat ons hierdie nagmaal vier
in gemeenskap met al u kinders,
uit die verlede, die hede, en die toekoms.
Met hulle, en saam met die hele hemelse leerskare,
verkondig ons u majesteit en bring ons U lof:
HEILIG, HEILIG, HEILIGE HEER,
GOD VAN KRAG EN MAG,
DIE HEMELSE EN AARDE IS VOL VAN U HEERLIKHEID.
HOSANNA IN DIE HOOGSTE!
Geseënd is hy wat kom in die naam van die Here!
HOSANNA IN HOOGSTE!
Heilige God,
deur wat ons hier doen ter gedagtenis van Christus vier ons
sy
volmaakte offer aan die Kruis, en sy glorieryke opstanding
en
hemelvaart;
ons verklaar dat hy Heer van die heelal is;
en ons berei ons voor vir sy wederkoms as Koning.
Mag die Heilige Gees ons en hierdie, u gawes, seën,
en, wanneer ons hierdie brood eet en die wyn drink,
mag ons in die ewige lewe van Christus deel,
met hom en al sy volgelinge verenig word,
en toegerus wees om u wil in die wêreld te doen.
Neem aan ons offer van danksegging,
en aan U, die enige, heilige en ewige God,
Vader, Seun, en Heilige Gees,
kom toe heerlikheid tot in alle ewigheid. AMEN.
En nou, soos Christus ons Verlosser ons geleer het, sê ons
vrymoediglik:
ONSE VADER WAT IN DIE HEMEL IS,
LAAT U NAAM GEHEILIG WORD,
LAAT U KONINKRYK KOM,
LAAT U WIL GESKIED,
SOOS IN DIE HEMEL NET SO OOK OP DIE AARDE,
GEE ONS VANDAG ONS DAAGLIKSE BROOD;
EN VERGEEF ONS ONS SKULDE SOOS ONS OOK ONS
SKULDENAARS VERGEWE.
EN LEI ONS NIE IN VERSOEKING NIE,
MAAR VERLOS ONS VAN DIE BOSE,
WANT AAN U BEHOORT DIE KONINKRYK,
EN DIE KRAG EN DIE HEERLIKHEID,
TOT IN EWIGHEID.
AMEN.
36. DIE AKSIE
In gehoorsaamheid aan die bevel van onse Here Jesus Christus,
volg ons nou sy voorbeeld in dit wat ons sê en doen.
In die nag waarin hy oorgelewer is, het hy brood geneem. (Die
Leraar neem die brood). Nadat hy God daarvoor gedank het, breek hy
dit (die Leraar breek die brood) en sê: “Dit is my liggaam; dit is
vir julle. Gebruik dit tot my gedagtenis.”
Net so ook neem hy die beker, (die leraar skink die wyn in die
beker en lig dit op) en sê: “Hierdie beker is die nuwe verbond, wat
deur my bloed beseël is. Gebruik dit, elke keer as julle daaruit
drink, tot my gedagtenis.”
37. DIE DEELNAME
37.1 Met die uitdeel van die brood:
Hierdie brood is die liggaam van Christus; dit is vir julle.
Neem en eet tot gedagtenis.
Voed in die geloof op hom,
en hou so sielsgemeenskap met hom en met al sy volgelinge.
37.2 Stille gebed volg op die eet van die brood.
37.3 Met die uitdeel van die wyn:
Hierdie beker is die nuwe verbond
deur Christus se dood beseël,
sodat die sondes van almal vergewe mag word.
Drink dit tot sy gedagtenis;
gee uself aan hom oor,
wat met die prys van sy lewe u gekoop het.
37.4 Stille gebed volg op die drink van die wyn.
38. DIE TOEJUIGING
Laat on die Here loof.
(LUID)
CHRISTUS HET GESTERWE!
CHRISTUS HET OPGESTAAN!
CHRISTUS KOM WEER!
39. HERTOEWYDING
Die Leraar (of iemand anders wat daartoe aangestel is) lees
hierdie gedeelte van Johannes 13:
Jesus het geweet dat die Vader alles in sy hande gegee het en
dat hy van God gekom het en na God teruggaan. Toe het hy van die
tafel af opgestaan, sy bo-kleed uitgetrek en ‘n handdoek gevat en
om hom vasgemaak. Daarna het hy water in ‘n wasskottel gegooi en
begin om sy dissipels se voete te was en dit dan af te droog met
die handdoek wat hy omgehad het...
Toe hy hulle voete klaar gewas en sy bo-kleed aangetrek het en
weer aangesit het, sê hy vir hulle: “Verstaan julle wat ek vir
julle gedoen het? Julle noem my ‘Meester’ en ‘Here’, en julle is
reg, want ek is dit. As ek, wat julle Here en julle Leermeester is
dan julle voete gewas het; behoort julle ook mekaar se voete te
was. Ek het vir julle ‘n voorbeeld gestel en soos ek vir julle
gedoen het, moet julle ook doen.”
Dit verseker ek julle: ‘n slaaf is nie belangriker as sy baas
nie, en ‘n gesant ook nie belangriker as die een wat hom gestuur
het nie. Julle weet dit nou; gelukkig is julle as julle dit ook
doen.”
40. Stille gebed van persoonlike hertoewyding wat deur ‘n versie
van ‘n paslike toewydingsgesang gevolg kan word.
41. HERNUWING VAN DIE VERBOND
41.1 Hierdie gedeelte kan voorbehou word vir die toelating van
lidmate tot die gemeenskap van die plaaslike gemeente of vir
spesiale geleenthede soos Sy jaarfees.
41.2 Die gemeente staan.
42. En nou, as lede in die huisgesin van God,
In die eenheid van geloof, in die gemeenskap van heiliges,
In liefde en welwillendheid teenoor almal,
Laat ons in die teenwoordigheid van onse Here Jesus Christus
Ons opnuut aan hom en aan mekaar
in al die voorregte en pligte van ons hoë roeping in Christus
Jesus.
43. Die plaaslike gemeente se verbond word hier opgesê of die
volgende:
ONS GLO IN GOD, ONSE HEMELSE VADER;
ONS BELY JESUS CHRISTUS AS HEER EN SALIGMAKER;
ONS IS AFHANKLIK VAN DIE LEIDING VAN DIE HEILIGE GEES;
IN GOD SE TEENWOORDIGHEID STREWE ONS OM TE
LEWE OOREENKOMSTIG ALLES WAT HY AAN ONS
GEOPENBAAR HET EN NOG SAL OPENBAAR.
ONS VERBIND ONSSELF OM SAAM TE AANBID, TE WERK
EN TE GETUIG BINNE DIE GEMEENSKAP VAN HIERDIE
GEMEENTE, OM DIE LIGGAAM VAN CHRISTUS OP TE BOU, EN DIE
KONINKRYK VAN GOD OP AARDE BEKEND TE MAAK.
44. Dan volg dié gebed:
Almagtige God,
Leier en Bewaarder van U kinders,
gee dat die verbond wat ons hier vandag op aarde sluit
in die hemel bevestig mag word;
deur Jesus Christus, onse Here. Amen.
45. Die gemeente sit.
46. DIE VREDE
Mag die vrede van die Here Jesus Christus met u almal wees.
Mag sy vrede ook met u wees.
47. Hierdie woorde kan met ‘n gepaste handeling (bv. ‘n
handdruk) gepaard gaan.
48. SLOTGEBED
Laat ons God vir hierdie maaltyd dank. Kom ons bid.
Here God,
ons loof en aanbid en vereer U
vir alles wat U aan ons by hierdie tafel gegee het.
Ons loof U dat ons die dood van u Seun kon herdenk;
mag ons die oue afsterf.
Ons vier sy opstanding uit die dode;
mag ons tot nuwe lewe in hom gebring word.
Soos hy vir ewig in u heerlikheid leef, mag ons ook vir U
leef,
en U heerlikheid in elke deel van ons lewe bring.
Ons dank U
dat ons met al u kinders in die hemel en op aarde aan
tafel kon aansit, en gemeenskap met hulle hou.
Ons prys U vir u kinders oor die hele wêreld heen,
met wie ons by hierdie tafel verenig is.
Ons loof U vir ons eenheid
met almal wat vóór ons geleef het,
U getrou gedien het en nou in u heerlikheid deel.
Met innige dankbaarheid onthou ons ons eie dierbares en die
lidmate
van hierdie gemeente wat op Jesus Christus vertrouend gesterf
het, en
ons is verheug dat in die gemeenskap van u Seun ons een met
hulle in
die geloof is.
Behou ons in hierdie heilige gemeenskap en as ons lewe hier ten
einde loop
bring ons na die tuiste wat U voorberei het
vir almal wat U liefhet,
waar ons U in volmaaktheid vir ewig mag loof en dien.
Dit vra ons in die naam van Jesus Christus, onse Here,
en aan hom, met U, Vader, en die Heilige Gees,
een geseënde God, kom oneindige lof en heerlikheid toe.
AMEN.
49. GESANG
Die volgende gesang of ‘n ander wat dank betuig vir die
gemeenskap van die heiliges of wat Christus se opstanding gedenk,
of Te Deum Laudamus.
(Wysie: Almsgiving of Meyer)
Vir dierbares eens op aard’ vereen,
Wat met ons langer nie verkeer,
Maar ewig rus verwerwe het,
Dank ons U, Heer.
Volmaakte nuutverworwe stand -
Hierop was hul stryd gerig -
In klare lig sien hul, o Heer,
U aangesig.
Anders as wat ons hul onthou,
In sorg gebuk, en moeg en tam,
Nou opgehef! En op hul hoof
Dra hul u naam.
Van aards’ beperkinge onthef,
In nuwe kennis van u Gees,
Met groter insig, groter vreug’,
Dien hul U steeds.
Hoe voller is die lewe daar!
Hoe ruimer, wyer die bereik!
Geen mensehart of gees kan peil
Die heerlikheid.
Of hoe U hulle wyer krag
Mag aanwend, en U mag bestier
Die wyse van hul inslag op
Ons lewe hier.
Met aanskyn stralend van geluk
Dien en aanbid hul immermeer;
En woon en werk en wandel hul
Een met hul Heer.
50. DIE AFKONDIGINGS
51. DIE VERDAGING EN DIE SEËN
Geliefdes is Christus,
Gaan in vrede om God lief te hê en te dien.
Die seën van ons almagtige God, die Vader die Seun en die
Heilige Gees, sy met julle almal.
AMEN.
52. Die Amen kan gesing word.
AANHANGSEL
SKRIFGEDEELTES EN GEBED
vir
DIE CHRISTELIKE JAARGANG
en
ANDER SPESIALE GELEENTHEDE
Advent
Oukersaand
Kersdag
Die Sondae voor Vastyd
Vastyd
Lydenssondag
Palmsondag
Paasdag
Paastyd
Hemelvaartstyd
Pinksterdag
Drieëenheid Sondag
Herdenking van Allerheiliges
Sondag voor Advent
Kerkverjaarsdag
Oestyd Danksegging
Hervorming Sondag
Die Openingsdiens van Assembly of Streeksraad
Die Afsluitingsdiens van Assembly of Streeksraad
ADVENT
(die vier Sondae voor Kersdag)
4. Sing ‘n nuwe lied tot eer van die Here.
Sing tot eer van die Here met begeleiding van die lier,
speel op die lier en sing.
Want hy kom om oor die aarde te heers;
hy sal oor die wêreld heers met regverdigheid,
oor die volke met billikheid. (Ps. 98:1,6,9)
Julle moet wees soos mense wat vir hulle Heer wag,
sodat hulle dadelik vir hom kan oopmaak as Hy aanklop.
(Luk. 12:36)
6. Ons loof en prys U, magtige God, Here van hierdie en van elke
eeu,
Vader van u volkere in elke geslag,
U het tot ons vaders deur die profete gespreek.
U het tot die hele wêreld deur u Seun gespreek.
U vul ons met die hoop van sy oorwinning.
Aan U kom toe die eer dat alle geslagte ‘n voorbereiding vir sy
koms is.
Ons juig dat al u beloftes waaragtig is en standhou. Terwyl ons
wagtend bly op die nuwe hemel en die nuwe aarde volgens u belofte,
wil ons U aanbid en eer, deur Jesus Christus, onse Here. AMEN.
9. Help ons, Here God
Mag ons soos mense wees wat op hul Heer wag tot hy terugkom,
sodat ons dadelik vir hom kan oopmaak as hy kom en aanklop.
Gee aan ons opmerksaamheid, sodat ons hom altyd sal erken op
welke wyse hy ookal mag kom, en ons lewe aan hom onderwerp, Jesus
Christus, onse Here.
Aan hom, met U en die Heilige Gees, een God, sy al die
heerlikheid, vir
ewig. AMEN
OUKERSAAND
(24 Desember)
4. God sê:
Vir julle wat my naam vrees, sal die son van geregtigheid
opgaan, en daar sal genesing onder sy vleuels wees. (Mal. 4:2)
Heilig julle:
Want môre sal die Here wonders onder julle doen. (Jos. 3:5)
6. Genadige en heerlike God,
met vreugde nader ons die krip van u Seun.
Soos die engele hierdie heilige aand oor Betlehem gesing het,
so
ook offer ons U ons lot.
Soos die herders hulle verwonder het oor die goeie nuus so
nader
ons met bewondering om U te verheerlik deur Jesus Christus,
u
Woord wat vlees geword het en onder ons kom woon het. Amen.
9. Almagtige God,
berei ons voor om u Seun te verwelkom.
Mag hy in ons harte weer gebore word, en ons liefde vir hom
daagliks groei, om sy naams ontwil, Jesus Christus, onse Here.
Aan hom, met U en die Heilige Gees, een God, sy al die
heerlikheid, vir ewig. Amen.
KERSDAG
(25 Desember)
4. My siel besing die grootheid van die Here.
My Gees juig oor God, my Verlosser. (Luk. 1:46-47)
Danksy die genadige ontferming van ons God,
Soos die môreson sal hy opgaan,
om lig te bring aan die wat in duisternis en in die skaduwee van
die
dood lewe,
OM ONS VOETSTAPPE TE RIG OP DIE WEG VAN VREDE. (Luk.
1:78-79)
Eer aan God in die hoogste hemel,
en vrede op aarde vir mense in wie hy ‘n welbehae het. (Luk.
2:14)
6.Alle eerbied, alle lof en prys kom U toe,
magtige Here God!
In die begin het U beveel dat die lig uit die duisternis moes
skyn.
Toe die volheid van tyd gekom het is u Seun gegee as die Lig van
die wêreld, om oor ons te skyn, en ons voetstappe op die weg van
vrede te rig.
Alle lof en prys kom U toe vir u onuitspreeklike gawe, Jesus
Christus, onse Here. Amen.
9. Here God, U het ons na u beeld geskape,
en U het ons in Jesus Christus herstel.
Soos hy in ons midde gebore was, om in ons swakhede te deel, mag
ons in hom gebore word, om so in sy heerlikheid te deel.
Dit vra ons in sy naam, Jesus Christus, onse Here.
En aan hom, met U en die Heilige Gees, een God, sy al die
heerlikheid, vir ewig. Amen.
KERSTYD
(die Eerste Sondag na Kersdag tot
Die tiende Sondag voor Paasdag)
4.Die volk wat in duisternis wandel, het ‘n groot lig
gesien.
Die wat woon in die land van die doodskaduwee,
oor hulle het ‘n lig geskyn. (Jes. 9:11)
Kom en laat ons wandel in die lig van die Here. (Jes. 2:5)
6.Here God, Bron van alle lig en lewe,
Skepper en Ondersteuner van alle dinge,
ons loof, ons aanbid U.
U is groot – gedug bó ons verstand,
tog het U na die wêreld in Jesus gekom, die Baba van
Betlehem,
die Skrynwerker van Nasaret, die Man van Galilea.
In u lig juig ons – dit wat deur sy koms in ons harte skyn.
In u grote verlossing jubel ons.
Ons aanbid U, onse Vader en Onse God, deur u Seun, Jesus
Christus, onse Here. Amen.
9.Genadige Here,
Soos U die wyse manne na u Seun deur ‘n leidende ster gelei het,
lei
ons verder in ons lewens deur hom wie die Lig van die wêreld
is,
Jesus Christus, onse Here.
Aan hom, met U en die Heilige Gees, een God, sy al die
heerlikheid, vir ewig. Amen
DIE SONDAE VOOR VASTYD
(Septuagesima, Sexagesima, Quinquagesima)
(die negende, agste en sewende Sondae voor Paasdag)
4.Sing tot eer van die Here, prys sy naam,
verkondig elke dag sy reddingsdade!
Vertel die nasies van sy mag,
al die volke van sy magtige dade.
Die Here is groot,
al die lof kom hom toe.
(Ps. 96:2-4)
6.Almagtige, seënryke God,
Heer en Heerser oor hemel en aarde!
Al u werke loof U oor al u ganse heerskappy.
Met hulle aanbid ons u grootheid en prys ons u krag.
U het in Jesus nader tot ons gekom, en as Vader,
oorvloedig in liefdevolle genade, Uself aan ons geopenbaar.
Met al u losgekooptes in die hemel en op aarde,
vereer ons u liefde, en rus ons in u ontferming.
Alle roem aan U, Here in die hoogste!
Alle prys en eer, deur Jesus Christus, ons Here! Amen.
9. Here God,
deur U lewe ons, beweeg ons, en bestaan ons.
U het ons vir Uself geskape, en in U alleen vind ons rus.
Gee dat ons rein van harte en sterk in voorneme mag wees,
sodat
geen selfsugtige begeertes ons sal hinder om u wil te verneem
nie,
geen swakhede ons verhoed om u wil te doen nie.
In U lig mag ons lig sien, en in u diens volmaakte Vryheid vind,
deur Jesus Christus, onse Here.
Aan hom, met U en die Heilige Gees, een God, sy al die
heerlikheid, vir ewig. AMEN.
VASTYD
(die sesde, vyfde, vierde en derde Sondae voor Paasdag)
4.Soek die Here terwyl hy nog te vinde is;
Roep hom aan terwyl hy naby is.
Laat die goddelose sy weg verlaat en die kwaaddoener sy
gedagtes;
en laat hy hom tot die Here bekeer, dan sal hy hom barmhartig
wees;
en tot onse God want hy vergeef menigvuldiglik. (Jes. 55:6
-7)
6.Almagtige God, ons aanbid u.
Ons is in u teenwoordigheid, omdat U ons geroep het.
In die vreedsaamheid van hierdie dag en die plegtigheid van
hierdie tyd,
hier waar ons U so dikwels ontmoet het, en nou weereens met U
verenig is, Heer van heerlikheid, loof ons U.
Saam met al wat U op aarde aanbid, saam met die vrygekooptes in
die hemele, saam met al wat voor u troon dien, Heer van
heerlikheid, loof ons U, deur Jesus Christus, onse Here. Amen.
9.Heilige Vader,
U het nie u eie Seun van beproewing en versoeking vrygestel nie,
sodat hy volmaak kon wees deur sy lyding.
Skenk aan ons genade om teen die kwade te stry, om die goeie na
te strewe, en ons kruis op te neem en hom te volg, Jesus Christus,
onse Here.
Aan hom, met U en die Heilige Gees, een God, sy al die
heerlikheid, vir ewig. Amen.
LYDINGS SONDAG
(die tweede Sondag voor paasdag)
4.Hy is ter wille van ons oortredinge deurboor,
ter wille van ons ongeregtighede is hy verbrysel;
die straf wat vir ons vrede aanbring, was op hom,
en deur sy wonde het daar vir ons genesing gekom. (Jes 53:5)
Jesus, vir die vreugde wat hom voorgehou is, het die kruis
verdra, die skande verag. (Heb. 12:2)
6Alle lof aan U, Here God, ons hemelse Vader!
Alle heerlikheid aan U! Alle majesteit en mag, aanbidding en
heerskappy!
Ons loof U vir u liefde wat u Seun gegee het om vir die
verlossing van die wêreld te sterwe.
Ons verbly ons in sy onderdanigheid, deurdat hy die kruis
verduur het, en vir die vreugde wat hom voorgehou is, die skande
verag het. Vader van alle liefde en krag, ons aanbid U, deur Jesus
Christus, onse Here. Amen
9.Here God,
vervang ons lafhartigheid met moed om ons Meester te volg
waarookal hy mag lei.
Gee ons genade om die self agter te laat, ons kruis op te neem,
en hom te vergesel.
Mag ons onsself verloën ter wille van hom en die Evangelie.
Sodoende sal hy ons veilig behoed, Jesus Christus, onse
Here.
Aan hom, met U en die Heilige Gees, een God, sy al die
heerlikheid, vir ewig. Amen.
PALMSONDAG
(die Sondag voor Paasdag)
4.Hoor die gejuig
in die laer van die oorwinnaars.
Maak die tempelpoort vir my oop:
EK WIL INGAAN EN DIE HERE LOOF.
(Ps. 118:15,19)
6.Lof en eer aan U, Here God!
U het die heelal geskep; deur u krag onderhou U dit;
vir alles deur U geskape sorg U.
Lof en eer aan U, God, onse Vader! U liefde vir ons is
ewigdurend; daarom het U u Seun gestuur om ons te red.
Lof en eer aan U, magtige God! Deur Jesus het U die bose oorwin,
die mag van die dood verbreek, en die ewige lewe aan die lig
gebring.
Aan U die oorwinning, onse God en aan die Lam! Amen.
9.Almagtige Vader,
soos u Seun hierdie dag Jerusalem binnegegaan het, gee dat hy
ook so ons lewe in mag ry
Soos hy die kwaad van die stad teegegaan het, mag hy ook met die
kwaad in ons so worstel.
Soos hy met moed sy vyande teengegaan het, help ons om
standvastig te staan teen die wêreld se opposisie, en tot die einde
getrou bly in die krag van Jesus Christus, onse Here. Aan hom, met
U en die Heilige Gees, een God, sy al die heerlikheid, vir ewig.
AMEN
WIT DONDERDAG
(die nag voor Goeie Vrydag)
4.Genadig en barmhartig is die Here.
hy voed dié wat hom dien,
Hy hou sy verbond altyd in stand. (Ps.111:4-5)
6.Ons loof en aanbid U, genadige God.
Dankbaar is ons vir u liefde in Jesus gegee om die wêreld te
red.
Verheug is ons omdat hy ons geroep het tot gemeenskap met hom en
sy Kerk.
Wyl ons nou in hierdie heilige aand sy tafel nader, vereer ons U
in sy naam. Amen.
9.Here God, onse hemelse Vader,
Soos die heilige awendmaal in hierdie nag lank gelede deur u
Seun ingestel is, mag ons sy teenwoordigheid kenlik aanvoel in
hierdie heilige geheimenis, en met hom gemeenskap hou, wie die
Brood van die lewe is, Jesus Christus, onse Here.
Aan hom, met U en die Heilige Gees, een God, sy al die
heerlikheid, vir ewig. Amen.
PAASDAG
3.DIE BEGROETING:
Die Here het opgestaan!
Die Here het waarlik opgestaan!
HALLELUJA!
4.Christus is opgewek uit die dood,
as eersteling van dié wat gesterf het.
Aangesien die dood ook deur ‘n mens gekom het, het die
opstanding van die dooies ook deur ‘n mens gekom.
Net soos almal deur hul verbondenheid met Adam sterf, so sal
almal in Christus lewend gemaak word. (Kor. 15:20-22)
Sing ‘n nuwe lied tot eer van die Here,
Want hy het magtige dade gedoen,
DEUR SY KRAG EN GODDELIKE MAG HET HY OORWIN.
Die Here het sy oorwinning bekend gemaak, aan die nasies het hy
sy reddingsdade geopenbaar. (Ps. 98:1-2)
6.Halleluja!
Lof sonder perke aan U, Here God, onse Vader!
Eer sonder einde word aan U toegesê, hemelse Koning!
Met groot krag het U Jesus uit die dood teruggebring. Deur u
grootste weldaad het U ons uit die hand van die vyand verlos. Op
hierdie dag van alle dae jubel ons in u oorwinning met ‘n vreugde
onuitspreeklik.
Met die Kerk deur die ganse wêreld, verenig ons om U te loof en
te prys.
Met die Kerk in die hemel roep ons uit: “Aan U die oorwinning,
onse God, en aan die Lam!”
Halleluja! Halleluja!
Lof sonder perke, eer sonder einde, kom U toe in ewigheid, God
en Vader van Jesus Christus, ons verrese Here!
HALLELUJA! HALLELUJA! HALLELUJA!
9.Almagtige en genadige Here God,
Deur die opwekking van u Seun het U die dood en die bose
oorwin.
Mag ons, wat in sy opstanding juig, vir die sonde sterf, en die
ewige lewe beërf, deur hom wat die opstanding en die lewe is, Jesus
Christus, ons verrese Heiland, wat met U en die Heilige Gees leef
en regeer, een God, tot in alle ewigheid. Amen.
PAASTYD
(die vyfde Sondag na paasdag)
4.Aangesien julle saam met Christus
Uit die dood opgewek is, moet julle sterwe na die dinge daarbo
waar Christus is en aan die regterhand van God sit. Rig julle
gedagtes op die dinge wat daarbo is, want julle het gesterwe, en
julle lewe is saam met Christus verborge in God. (Kol. 3:1-3)
6.Alle lof, alle heerlikheid kom aan U toe, magtige Here!
Deur u grote mag het U u seun uit die dood opgehef.
Deur u sterke hand het U ons en u ganse skepping verlos.
In u grote ontferming het U ons opnuut gebore tot ‘n lewende
hoop.
Ons seën U, ons aanbid U; ons vereer U, onse Vader en onse God.
Met die hele Kerk op aarde, met die hele geselskap in die hemel,
verheerlik ons U, deur Jesus Christus, onse verrese Here. Amen.
9.Here God, hemelse Vader,
Terwyl ons jubel in die opstanding van u Seun, verlos ons van
gebondenheid aan die sonde, en bring ons tot die volheid van die
ewige lewe in Jesus Christus, onse Here, wat met U en die Heilige
Gees leef en regeer, een God, tot in alle ewigheid. Amen.
HEMELVAARTSTYD
(Hemelvaartsdag en die Sondag daarna)
4.Laat die hemele bly wees en die aarde juig,
en laat hulle onder die volke sê:
Die Here is Koning ! (Kron. 16:31)
Verbly julle, poorte, wees bly, eeue-oue deure.
WANT DIE MAGTIGE KONING WIL INGAAN! (Ps. 24:7)
God gaan op onder gejubel,
die Here gaan op onder basuingeskal. (Ps. 47:6)
6. Lof aan U, Here God, ons Vader!
U het u Seun uit die dood teruggebring, en hom tot die hoogstes
verhef.
U het hom die Naam gegee wat bo elke naam is, sodat in die Naam
van Jesus elkeen die knie sou buig, en elke tong sal bely dat hy
Here is.
Tesame met al die verlostes in die hemel, wat voor troon staan
en van die oorwinning van u grote mag sing;
tesame met u Kerk dwarsoor die wêreld, wat in die geloof in U
opgevare Seun lewe, verheerlik ons U groot en glorieryke God.
Die lof en die heerlikheid, die wysheid, die dank en die eer,
die mag en die sterkte behoort aan U tot alle ewigheid! Amen.
9.Here, onse God,
deur sy glorieryke hemelvaart het u Seun vir ons ‘n weg na die
allerheiligste geopen. Mag ons ook geestelik verhef word tot
daardie ryk waar hy aan U regterhand sit, Jesus Christus, ons
opgevare Here, wat met U en die Heilige Gees leef en regeer, een
God, tot in alle ewigheid. Amen.
PINKSTERDAG
4.Die tyd nader – trouens, dit is reeds al hier – wanneer alle
ware aanbidders die Vader in gees en waarheid sal aanbid. Sulke
aanbidders wil die Vader graag hê.
God is gees, en diegene wat hom wil aanbid moet hom in gees en
waarheid aanbid. (Joh. 4:33-34)
6.Eer aan U, Here God!
U roep ons om U in gees en in waarheid te aanbid.
Eer aan U hemelse Vader!
U skenk die Heilige Gees aan almal wat vra, en seën hulle met sy
krag.
Eer aan U, onse Skepper en ons Koning! U plaas u seël op ons en
bevestig daarmee dat ons u eiendom is, en as waarborg van wat U vir
ons belowe het.
Skenk U ons u Gees om in ons harte te woon.
Met die ganse Kerk op aarde en in die hemel loof ons U, vereer
ons U, verheerlik ons U, en sê dankie vir die Heilige Gees, in die
naam van Jesus Christus, onse Here. Amen.
9.Here God,
op hierdie Pinksterdag jubel ons in die gawe van die Heilige
Gees.
Mag hy die dryfkrag in ons lewens word, wat ons ywer sal laat
vlam vat sodat ons wonderlike drome van u koninkryk sal droom; wat
ons die moed en die krag sal gee om ons drome te verwesenlik, deur
Jesus Christus, onse Here.
Aan hom, met U en die Heilige Gees, een God, sy al die
heerlikheid, vir ewig. Amen.
DRIEËENHEIDSONDAG
(die Eerste Sondag na Pinksterdag)
4.Heilig, heilig, heilig,
is die Here God, die Almagtige,
hy wat was en wat is en wat kom. (Op. 4:8)
O diepte van die rykdom en wysheid en kennis van God!
Hoe ondeurgrondelik is sy oordele, hoe onnaspeurlik sy weë!
Uit hom en deur hom en tot hom is alle dinge.
Aan hom behoort die heerlikheid tot in ewigheid! (Rom.
11:33,36)
6.Glorieryke Here God, die Vader!
U het ons geskape; U sorg vir ons.
Glorieryke Here God, die Seun! U het ons verlos.
Glorieryke Here God, die Heilige Gees!
U lei ons die volle waarheid in.
Soos U geloof was sedert die begin van tyd, soos U nou geëer
word, soos U ook aanbid sal word tot in ewigheid, alle roem aan U,
Vader, Seun en Heilige Gees, Drie-in-Een, Een-in-Drie! Amen.
9.Glorieryke en almagtige God,
U het Uself bekendgestel as Vader, Seun en Heilige Gees.
Help ons om van u vaderlike liefde meer versekerd te wees, om
ons aan die aansprake van u goedgunstige eise oor te gee, en U toe
te laat om ons te hervorm totdat ons aan die beeld van Christus
gelyk is; en mag ons lewens u heerlikheid weerspieël, salig,
heilige, drieënige God. Amen.
DIE HERDENKING VAN ALLE HEILIGES
(1 November of die Sondag daarna)
4.Die heiliges van die Allerhoogste sal die koningskap
ontvang,
en hulle sal die koninkryk in besit neem tot in alle ewigheid.
(Dan. 7:18)
Sing tot eer van die Here
julle wat hom getrou dien,
loof sy heilige naam! (Ps. 30:5)
6. Alle lof aan U, magtige Here God!
U volk in die hemel en op aarde aanbid U en verkondig u
grootheid.
Met almal in die hemel wat die lied van Moses en die Lam sing,
met almal dwarsoor die wêreld wat jubel in u magtige verlossing,
vereer ons U, bring ons hulle aan U, die Koning van alle tye, deur
Jesus Christus, onse Here. Amen.
9.God, onse Vader,
Met so ‘n groot skare geloofsgetuies rondom ons soos ‘n wolk,
help ons om ons lewens aan U te wy,
Om elke las van ons af te gooi,
En ook die sonde wat ons so maklik verstrik,
En laat ons die wedloop wat ons voorlê met volharding hardloop,
die oog gevestig op Jesus, die Begin en die Voleinder van die
geloof.
Aan hom, met U en die Heilige Gees, een God, sy al die
heerlikheid, vir ewig. Amen.
DIE SONDAG VOOR ADVENT
(die vyfde Sondag voor Kersdag)
(kan ook vir Nagwaakdiens gebruik word)
4.Dink aan die dae van die ou tyd,
Let op die jare van geslag tot geslag;
Vra jou vader, dat hy jou dit bekend maak;
Die ou mense, dat hulle jou dit sê. (Deut. 32:7)
Ek wil die Here loof,
Met alles wat in my is, wil ek sy heilige naam loof.
Ek wil die Here loof en nie een van sy weldade vergeet nie. (Ps.
103:1-2)
6.Magtige Here God, u ganse skepping aanbid U:
die hemel en aarde, die see en die lug verkondig die heerlikheid
van u mag dwarsdeur die tallose eeue, in die wyd-verspreide
hemelruim.
Hier in die wêreld word die wonder van u beskermende besorgheid
en u ongelooflike liefde vir al u mense van een geslag na die ander
oorgedra.
As deel van u skepping, as diegene vir wie U lief het en red,
verheerlik ons U, ons Vader en onse God, deur Jesus Christus, onse
Here. Amen.
9.Here God van hierdie en elke tydsvak,
soos U hierdie jaar met ons begin het, ons dwarsdeur geseën het,
en ons aan die einde daarvan gebring het, help ons, te midde van
alle geleenthede en gebeurlikhede, om ons vertroue op U te plaas,
en ons lewensreis voort te sit in die krag van u Seun, wat belowe
het om saam met ons te wees, al die dae, tot aan die voleindig –
Jesus Christus, onse Here. Aan hom, met U en die Heilige Gees, een
God, sy al die heerlikheid, vir ewig. Amen.
KERKVERJAARSDAG
4.Die Here is groot, alle lof kom hom toe,
Sy grootheid is ondeurgrondelik.
Geslag na geslag prys wat hy doen
En vertel van sy magtige dade.
Sonder ophou moet hulle sy groot goedheid verkondig
En oor sy reddingsdade jubel. (Ps. 145:3,4,7)
6.Groot en glorieryke God,
U het u Seun, Jesus Christus, geskenk om Hoof van die Kerk te
wees.
In sy naam aanbid en vereer ons U.
Met elke deel van u skepping, met u ganse volk op aarde, met
diegene van hierdie gemeente wat ons voorafgegaan het, en met al u
heiliges in die hemel, loof ons U
Eer aan U, magtige Here God!
Eer aan U op hierdie ons verjaarsdag!
Eer aan u elke dag! Eer aan U tot in ewigheid, deur Jesus
Christus, onse Here! Amen.
9.Almagtige God,
U het ons tot hierdie verjaarsdag gebring.
Wyl ons hulde aan U bring dat U ons geroep het om u volk hier te
wees, bid ons dat u Gees ons langs u weë sal lei, en ons in staat
stel om onsself aan U te offer – ‘n toegewyde offergawe wat vir U
aanneemlik is, deur Jesus Christus, onse Here.
Aan hom, met U en die Heilige Gees, een God, sy al die
heerlikheid, vir ewig. Amen.
OESTYD
DANKSEGGING
4.God sê:
Van nou af sal al die dae van die aarde, saaityd en oestyd, koue
en hitte, somer en winter, dag en nag nie ophou nie. (Gen.
8:22)
Hy het vir julle reën van die hemel af gegee en gereelde oeste;
hy het vir julle volop kos gegee, en julle gelukkig gemaak. (Hand
14:17)
Julle moet die Here loof vir sy troue liefde,
vir sy wonderdade wat hy aan mense doen.
Hy het die dors geles van dié wat honger gely het, hy het die
goeie in oorvloed gegee aan dié wat honger gely het. (Ps.
107:8-9)
6.Here, onse God genadige hemelse Vader,
So groot, so goed, so getrou aan al u beloftes!
U het ons weer tot by oestyd gebring, en uit harte met
dankbaarheid gevul loof ons U.
Hoe talryk u werke, Heer! In wysheid het U alles gemaak;
die aarde is gevul met u rykdom.
U sorg vir al wat U geskep het. Hulle sien op na U om hulle van
voedsel te voorsien.
U maak u hand oop, en versadig alles wat lewe.
U maak hierdie wêreld so lief dat U u enigste Seun geskenk het,
die
Brood vanuit die hemel, om ons gees met die ewige lewe te
voed.
Ons vereer U, Vader van alle goedheid.
Ons loof u naam, Here God van ouds.
Van elke deel van u skepping, van u vrygekoopte volk in die
hemel en op die aarde, alle eer aan U, alle mag en glorie, vandag
en tot in alle ewigheid, Amen.
9.Hemelse Vader,
U voorsien in al ons behoeftes.
Help ons om in eenvoudige geloof voor te leef dat U sal aanhou
om vir ons uit u ryk bronne te sorg.
Verlos ons daarvan om behep te wees met die begeerte om aardse
skatte op te gaar ten koste van ons geestelike welvaart. Voed ons
gedurigdeur met die Brood van die lewe, sodat ons in Jesus
Christus, ons Here, mag groei en ryp word.
Aan hom, met U en die Heilige Gees, een God, sy al die
heerlikheid, vir ewig.
Amen.
HERVORMINGSONDAG
(31 Oktober of die vorige Sondag)
4. God is vir ons ‘n toevlug en ‘n beskerming;
Hy was nog altyd bereid om te help in nood.
Die Here, die Almagtige, is by ons,
Die God van Jakob is vir ons ‘n beskutting. (Ps. 46:2,8)
6.Groot en glorieryke God, ons aanbid en loof U.
U woord het alles in die hemel en op die aarde geskep.
Op wonderbaarlike wyse hernu u woord alles wat U gemaak het.
U woord roep ons vandag om U te prys en te dien.
Blymoediglik beantwoord ons, verheug in u openbaring deur u
vleesgeworde Woord, dankbaar vir die liefde wat U deur hom aan ons
bied.
Alle eer aan U, almagtige God,
Deur Jesus, onse Here. Amen
9.Here God,
Gee ons so ‘n geloof in u vergewende liefde dat ons deur hierdie
geloof geregverdig mag word.
Werk aan ons deur u heilige Gees dat ons dag vir dag hernu mag
word, en in goddelikheid groei totdat ons die volle gestalte van
Jesus Christus, onse Here, bereik het.
Aan hom, met U en die Heilige Gees, een God, sy al die
heerlikheid, vir ewig. Amen.
DIE OPENINGSDIENS
van
ASSEMBLY OF STREEKSRAAD
4. Die Here is groot, alle lof kom hom toe.
Sy grootheid is ondeurgrondelik.
Geslag na geslag prys wat hy doen
En vertel van sy magtige dade.
Sonder ophou moet hulle sy groot goedheid verkondig
En oor sy reddingsdade jubel. (Ps. 145:3, 4, 7)
6.Groot en glorieryke God,
U het u Seun, Jesus Christus, geskenk om Hoof van die Kerk te
wees.
In sy naam aanbid en vereer ons U.
Met elke deel van u skepping, met u ganse volk op aarde, met
diegene van hierdie Kerk wat ons voorafgegeaan het, en met al u
heiliges in hemel, loof ons U.
Eer aan U, magtige Here God!
Eer aan U in hierdie vergadering van u volk!
Eer aan U tot in ewigheid, deur Jesus Christus, onse Here!
Amen
9.Almagtige God,
U het ons opgeroep om met U te beraadslag oor die dinge van u
koninkryk.
Wyl ons hulde aan U bring dat U ons geroep het om u volk te
wees, bid ons dat u Gees ons langs u weë sal lei, en ons in staat
stel om onsself aan U te offer – toegewyde offergawe wat vir U
aanneemlik is, deur Jesus Christus, onse Here.
Aan hom, met U en die Heilige Gees, een God, sy al die
heerlikheid, vir ewig. Amen.
DIE AFSLUITINGSDIENS
van
ASSEMBLY of STREEKSRAAD
4.Hier het ons geen vaste verblyfplek nie, maar ons is op soek
na die toekomstige stad.
Deur Jesus laat ons dan onophoudelik aan God ‘n offer van lof
bring.
Eer aan hom tot in ewigheid! (Heb. 13:14-15)
6.Mees genadige God, ons loof U
Vir Jesus Christus, die Hoof en Koning van die Kerk,
Aan wie ons hoort, en vir wie ons dien, en vir die Heilige Gees,
wat ons beraadslagings gelei en beheer het.
Nou loof ons U dat, voordat ons van mekaar skei, U ons geroep
het na die fees van u Seun se dood en opstanding.
Hier aan sy heilige tafel vereer ons U, onse Vader en onse God,
in sy geseënde naam. Amen.
9.Almagtige God,
Besvestig en bekragtig ons in alles wat goed is, en bewaar ons
vir die ewige lewe;
Deur Jesus Christus, onse Here.
Aan hom, met U en die Heilige Gees, een God, sy al die
heerlikheid, vir ewige. Amen.
DIE
BEGRAFNISDIENS
IN DIE KERK
1. OPENINGSREDE
EEN van die volgende kan gebruik word:
(A) Ons wil hê, broers, dat julle nie onkundig moet wees oor wat
met die
ontslapenes gaan gebeur nie. Dan sal julle ook nie treur nie,
soos die
ander mense wat geen hoop het nie. Ons glo immers dat Jesus
gesterwe maar ook opgestaan het. Net so glo ons dat God saam
met
Jesus die ontslapenes wat in hom geglo het, na hom toe sal
neem.
(Tess. 4:13-14)
Ons weet dat, wanneer ons aardse woning wat maar ‘n tent is,
afgebreek word, ons ‘n vaste gebou in die hemel het. Dit is ‘n
woning wat nie deur mense gemaak is nie, maar deur God, en dit bly
ewig staan. (1Kor. 5:1)
As ons lewe, leef ons tot eer van die Here; en as ons sterwe,
sterf ons tot eer van die Here. Of ons dan lewe en of ons sterwe,
ons behoort aan die Here. Hiervoor het Christus ook gesterf en weer
lewend geword: om Here te wees van die dooies en die lewendes. (1
Rom. 14:8-9)
OF
(B) Geseënd is dié wat treur, want hulle sal vertroos word.
(Matt. 5:4)
Wees nie bevrees nie, want ek is met jou;
kyk nie angstig rond nie, want ek is jou God.
Ek versterk jou, ook help ek jou,
ook ondersteun ek jou met my reddende regterhand. (Jes.
41:10)
God is nie ‘n God van dooies nie maar van lewendes. (Mark.
12:27)
Geseënd is dié wat van nou af in die Here sterwe. “Ja,” sê die
Gees,
“hulle sal rus van hulle arbeid.” (Op. 14:13)
Daarom is God nie skaam om hulle God genoem te word nie;
trouens,
hy het vir hulle ‘n stad gereed gemaak.
OF
(C) Die Here Jesus sê: “Julle moet nie ontsteld wees nie. Glo in
God; glo
ook in my. In die huis van my Vader is daar baie woonplek. As
dit nie so was
nie
