View
229
Download
5
Category
Preview:
Citation preview
GABAY SA PAGTATALAKAY HINGGIL SA CARPER
Inihanda ng ANAKBAYAN
Marso 2014
1. Ano ba ang CARPER?
Ang Comprehensive Agrarian Reform Program Extension with Reforms (CARPER),
sa mas simpleng salita, ay ang pagpapahaba ng sakop ng CARP lampas sa orihinal
na katapusan nito nung 2008. Ipinasa naman ang CARP noong 1988, sa panahon
ng nanay ni Noynoy Aquino, para palabasin na may ginagawa ito para solusyunan
ang ilang siglo ng problema ng kawalan ng lupa ng magsasaka.
Dalawang beses ng binigyan ng ekstensyon ang orihinal na CARP: noong 1998, at
2003. Minadali ng Rehimeng U.S-Arroyo, katulong ang huwad na progresibong
grupo ng Akbayan, ang CARPER para bigyan pa ng 6 taon ang buhay ng nabubulok
na batas. Ngayon, nananwagan muli ang Akbayan ng panibagong pagpapahaba sa
buhay ng CARPER at CARP.
2. Bakit dapat tutulan ang ekstensyon ng CARPER lampas 2014?
Hindi nasolusyunan ang problema ng magsasakang Pilipino sa kawalan ng sariling
lupa sa pinagsamang 26 na taong buhay ng CARP at CARPER. Nananatiling pito sa
bawat 10 magsasaka ay walang sariling lupang sinasaka. Ayon mismo sa datos ng
gobyerno, di pa aabot sa 40% ng target ng Dept. of Agrarian Reform (DAR) na
pamahagian ng lupa ang nakatanggap. Hindi pa kasama sa bilang
3. Ano ang kalagayan ng sektor ng magsasaka sa kasalukuyan?
Mayorya sa kanila ay pumapasok bilang mga kasama, o mga magsasaka na
nakikisaka sa lupa ng iba. Dahil hawak ng panginoong maylupa ang mga papeles ng
pag-aari sa mga sakahan, sila ang nagtatakda kung ano ang hatian ng ani o
harvest. 60-40 o 70-30, pabor sa panginoong maylupa, ang kadalasang hatian.
Dahil sa napakababang kita na natatanggap tuwing anihan, napipilitan ang mga
magsasaka mangutang sa mga usurero, o mga nagpapautang sa napakataas na
interes (halimbawa ay 50% kada buwan, o 100% kada anihan). Natutulak ang mga
magsasaka na mangutang, bagay na lalong kumakaltas sa kanilang mababa kita na
matagal ng mababa. Naibabaon sa utang ang mga magsasaka, kanilang mga anak,
at mga susunod na henerasyon.
Marami tuloy ang napipilitang lumikas papuntang mga siyudad para makipag-
sapalaran, at mangibang bansa. Natutulak rin sila na pumasok sa prostitusyon,
pagiging mga mersenaryo ng CAFGU at AFP, at iba pang gawaing anti-sosyal.
4. Paano pinalala ng CARPER ang kalagayan ng uring magsasaka?
Hindi inalis mula sa CARPER ang mga kontra-magsasakang probisyon at laman ng
orihinal na CARP.
Isa dito ang Stock Distribution Option (SDO) na ginamit ng pamilya ni Noynoy
Aquino para linlangin ang mga magsasaka ng Hacienda Luisita. Sipi o stocks sa
isang korporasyon na humahawak sa lupa, imbes na yung aktwal na lupa, ang
ipamamahagi sa mga magsasaka sa ilalim ng SDO. Kitang-kita paano nito nilulugi
ang mga magsasaka noong ipinagpalit ng mga taga Hacienda Luisita ang kanilang
mga stocks noong nakaraang 2011. Ang pinaka-mataas na natanggap ay nasa
P6,000, na di pa sapat para bumili ng kahit isang ektarya lamang, at ang iba pa nga
ay iilang piso lang.
Isa pang pinanatili ang Voluntary Offer to Sell (VOS), isa sa dalawang porma para
makuha ng DAR ang mga lupang dapat nitong ipamahagi (ang isa pa ay yung
Compulsory Acquisition). Sa VOS, ang nagtatakda ng presyo ng lupang
ipapamahagi ay ang mismong nagbebenta nito. Walang kinatawan ang magsasaka
sa pagtatakda ng presyo (DAR lamang at Land Bank ang kausap ng panginoong
maylupa). Sobra-sobrang taas na babayarin ng mga magsasaka ang dulot nito.
Hindi rin inalis ang Land Use Conversion. Ito ang iskema kung saan pinapalitan ng
panginoong maylupa ang gamit ng kanyang sakahan mula agrikultural tunggong
komersyal (subdivision, resort, golf course, mall, atbp.), o industriyal. Imbes na
ipamahagi ito, papalitan nila ng gamit para mapagkakitaan nila ng buo at ipagkait
ang karapatan ng mga magsasaka.
Sa Seksyon 5 ng CARPER, isang rekisito para makatanggap ng lupa ang
sertipikasyon mula sa mismong panginoong maylupa. Ginagamit itong sandata para
parusahan ang mga lumalabang magsasaka at takutin sila sa paggiit ng kanilang
mga karapatan.
5. Kung hindi CARPER, ano?
Isinusulong ng mga makabayang partylist representatives sa Kongreso ang House
Bill 252 o ang Genuine Agrarian Reform Bill (GARB).
Di tulad ng CARPER at CARPER, libreng ipamamahagi ang lupa sa mga
magsasaka sa ilalim ng GARB. Sakop ng panukalang-batas na ito ang lahat ng mga
lupang agrikultural, lalo na ang mga lupain ng mga dayuhang korporasyon at
malalaking panginoong maylupa tulad ng Cojuangco-Aquino. Tatanggalin ang mga
pamamaraan ng mga panginoong maylupa para makatakas sa pamamahagi ng lupa
sa ilalim ng CARP at CARPER, tulad ng SDO at LUC.
Sa kanayunan naman, isinusulong ng rebolusyonaryong kilusang lihim, kabilang ang
Pambansang Katipunan ng Magbubukid (PKM-National Democratic Front) at ng
Bagong Hukbong Bayan) ang rebolusyong agraryo, kung saan kabilang ang libreng
pamamahagi ng lupa sa mga magsasaka.
6. Bakit dapat makialam ang kabataan at estudyante sa pakikibaka ng
magsasaka?
Hindi babangon ang sambayanang Pilipino mula sa kahirapan kung ang pinaka-
malaking sektor nito, ang uring magsasaka na bumubuo ng 75% ng buong
populasyon natin, ay hindi umuunlad.
Magpapatuloy ang bigla-bigla at sobrang pagtaas ng presyo ng bigas hangga’t
pinahihintulutan ang LUC. Bumababa ang sarili nating suplay ng bigas at tumitindi
ang pagiging palaasa natin sa imported na bigas. Dahil dito, bulnerable tayo sa
epekto ng pagmahal ng bigas sa iba pang mga bansa dahil sa kanila na tayo
nakaasa.
Habang bagsak ang agrikultura, mananatili ring bagsak ang ating mga industriya.
Walang mapagkukunan ng murang hilaw na materyales, isa sa mga malalaking
problema ng mga lokal na negosyante. Dahil mayorya ng mga magsasaka ay
mahirap, wala rin bibili ng mga produkto ng mga lokal na industriya.
7. Ano ang magagawa ng kabataan at estudyante para sa pakikibaka ng
magsasaka?
Malaki ang maitutulong ng mga kabataang estudyante sa pakikibaka ng uring
magsasaka. Dahil relatibong mataas ang tingin sa ating lipunan sa mga estudyante
at mga nagkaroon ng pormal na edukasyon, maidadala ng kabataang estudyante
ang kalagayan at laban ng magsasaka sa mga lugar na di-abot ng tinig nila.
Sa kabilang banda, kailangan rin magsanib pwersa ang uring magsasaka at ang
kabataang estudyante para parehong makamit ang mga karapatan nila. Bilang
napakaliit na bahagi lang ng lipunan, di kaya ng kabataang estudyante na baguhin
ang Pilipinas sa sarili nitong lakas.
Ito ang ilan sa maaaring magawa nating mga kabataan at estudyante:
1. Alamin ang kanilang kalagayan, makipamuhay sa kanilang hanay
Pinakamainam na paraan para malaman ang kalagayan ng uring magsasaka ay
ang pakikipamuhay sa kanila. Sa pamamagitan ng pagdanas ng kanilang araw-
araw na pakikibaka para mabuhay, madidiskubre ng kabataan ang tunay na
kalagayan ng mga magsasaka at bakit kailangan ng militanteng paglaban para
sa kanilang mga interes.
Sa mga kabataang may malaking limitasyon, maaari naman siyang dumalo sa
mga pag-aaral at talakayan ng mga balangay ng ANAKBAYAN. Isa sa mga
dapat na inaaral na paksa ng mga kasapi ng organisasyong ito ay kalagayan ng
mga magsasaka, bilang magsasaka ang mayorya ng mga kabataang Pilipino.
Ang mga pag-aaral na ito ay bukas sa kahit sinong interesadong matuto.
2. Lumahok sa pambansa-demokratikong pakikibaka, sumapi sa
ANAKBAYAN
Makakamit lamang ang tunay na reporma sa lupa sa pagtatagumpay ng
tinatawag na pambansa demokratikong rebolusyon, o sa pagkamit ng tunay na
demokrasya at kalayaan. Nangangahulugan ito ng pagbagsak ng kasalukuyang
sistema, kung saan naghahari ang mga dayuhan, malalaking kapitalista, at mga
panginoong maylupa. Ito ay papalitan ng isang gobyernong tunay na
kumakatawan sa mga mamamayan.
Para mapalitan ang organisadong lakas ng mga naghahari (ang kasalukuyang
gobyerno), kinakailangan rin ng organisadong lakas ng mamamayan. Ito ay
binubuo ng mga pambansa demokratikong organisasyon ng iba’t-ibang sektor na
nagtutulungan para makamit ang pambansang demokrasya. Sa sektor ng
kabataan, ANAKBAYAN ang samahan na ito.
Sa loob ng organisasyon na ito, nabibigyan ng koordinasyon ang lakas at
pagkilos ng mga indibidwal na nakapaloob dito. Mas epektibo ang pinagsamang
lakas ng sampung taong nagtutulungan kesa sa sampung tao na hiwalay-hiwalay
kumilos. Sa loob rin nito pinapaunlad ang mga kabataang bilang mga aktibista at
rebolusyonaryo sa pamamagitan ng di-natatapos na proseso ng pag-aaral,
pagkatuto, at mga bagong karanasan.
3. Itambol ang kalagayan at pakikibaka ng uring magsasaka
Kailangan marinig ang sigaw ng uring magsasaka sa bawat sulok ng ating
bayan, lalo pa sa mga siyudad kung saan wala ang magsasaka para ipagtanggol
ang kanilang panig at kung saan mas malakas ang pwersa ng kontra-
mamamayang gobyerno.
Dapat maglunsad ng pinaka-malaking bilang ng mga talakayan sa mga
estudyante at iba pang mga kabataan sa mga paaralan, komunidad, simbahan,
at pagawaan.
Dapat lumahok sa mga kilos-protesta ng mga magsasaka tuwing dinadala nila
ang kanilang laban sa mga siyudad, lalo na ang mga LAKBAYAN o ang ilang
araw na martsa mula kanayunan papuntang mga siyudad.
Recommended