AOKUSO 12, 2018 MATAUPU 1: O LE FOAFOAGA (The Creation ...efkasonline.org/data/documents/Vasega-Matutua-Faapitoa-2018-2019.pdf · 2 O le molimau a Kenese, na silasila atu le Atua

1

AOKUSO 12, 2018

MATAUPU 1: “O LE FOAFOAGA” (The Creation)

TUSI FAITAU: KENESE 1: 1 – 10 SINI: Ia malamalama le fanau na faia e le Atua mea uma lava o le olaga nei.

FESOASOANI MO FAIAOGA:

E mua‟i tuu atu le lima o le faatalofa ma faafeiloa‟i atu i lenei foi tausaga faa le a‟oa‟oga o le a

tatou savalia. Ua faamalo folau malo le onosa‟i i feau ma tiute ua totofi ai e le Atua. Ia viia pea le

Matai o le galuega i lo outou soifua galulue. Ua tatou i ai i le amataga o lenei foi tausaga aoga

ma ua motu atu so outou matūpalapala i le saunoaga a le Faatonu e ala i le „Upu Tomua‟ o lenei

galuega. O lea foi se lagona mo lenei tausaga aoga, ina ia tatou galulue faatasi ae ā se lumana‟i

manuia o alo ma fanau a le EFKAS ia ma viia pea le Atua i o tatou tagata galulue.

O le ulua‟i mataupu ua faaaogaina ai le tala i le foafoaga i le tau faamatalaina o le Atua foafoa. A

tatou mafaufau ane i le pogisa ma le leai o se mea i le amataga sei vagana ai le Atua, na Ia filifili

ai i lona lava taimi o le a fausia se mea manaia; o se mea e faamatalaina ai o Ia. Ina ia nofo

malamalama ai le lalolagi ma mea uma lava na Ia faia, o le Atua e to‟atasi na faia mea uma lava.

Ua na ona lana fetalaiga ona faia lea o lea mea ma lea mea. O se mea ofofogia! O le a tatou

talanoa i lenei taeao i le foafoaga na faia e le Atua i le amataga i ana upu fetalai.

Fai mai le tala i le amataga o mea uma, na gaogao ma soona nunumi le lalolagi ua na o le

Atua. E faigata se manatu i se ata o lena vaitau.Auā o se taimi leva i tua atu o tatou tuaā. A‟o lei i

ai ni tagata, leai ni meaola, leai se lalolagi, leai ni fetu, peita‟i ua na o le Atua na i le amataga o

mea uma. O le tala lenei ile foafoaina po o le gaōsia e le Atua o mea uma i lona „Mana Fetalai‟.

Ua fai mai le Tusi Paia, ua na ona fetalai atu o le Atua ona tino mai lea o lea mea ma lea mea.

Ua Ia fetalai atu ina „ia malamalama‟ ona malamalama ai lea, ona tu‟ueseeseina ai lea o le

malamalama nai le pouliuli. Ua tu‟ueseeseina foi e le Atua le vai ma le eleele matūtū. Na Ia

fausia foi le La, le masina, o fetu ma mea uma o i le va-nimonimo. Na Ia fausia foi manu felelei

ma i‟a o le sami ma mea uma o loo i ai. Na ia fausia foi manu vaefa ma manu fetolofi e tata‟a i le

laueleele. Ina ua mae‟a ia mea uma; ona Ia fausia lea o le tagata i lona „faatusa paia‟. E ono aso

na faia ai e le Atua mea uma, ae o le aso fitu na malolo ai o Ia mai ana galuega uma lava.

O manatu e faatauaina (Major points):

O le amataga, na leai lava se mea vagana ai le Atua.

Na fetalai atu le Atua ona tino mai lea o mea uma.

Na faia e le Atua mea uma o le lagi, lalolagi ma le atu-laulau.

Na silasila atu foi le Atua ua lelei mea uma (Kenese1:1-31; Ioane1: 1-14).

2

O le molimau a Kenese, na silasila atu le Atua ua lelei mea uma na Ia faia. Ioe, o mea uma

lava na fausia e le Atua ma ua lelei uma i le amataga mo le soifua ma lo tatou ola. Ina ua silasila

atu o Ia ua lelei mea uma lava; ona malolō ai lea i le aso fitu mai ana galuega lelei uma lava. O le

mea lea e ao ai ona tatou faafetaia le Atua foafoa, auā e ui na ona fetalai atu ona i ai lea o lea mea

ma lea mea, peita‟i e le‟i faatagā faia e le Atua le foafoaga. O lona mataisau poto ma lona silafia

na faataoto ai le foafoaga ina ia matuā lelei ma tofu ma lona aogā.

O le mata‟utia o le foafoaina e le Atua o mea uma ua avea ma ala e faatupula‟ia ai nisi o

manatu taufaasesē. E pei o nisi o manatu faa-sainisi fai mai o le tagata na faaauau mai i nisi o itu-

aiga o meaola (evolution). O loo i ai foi nisi e maanatu; „o le lalolagi na tupu pe na mapuna a‟e

ina ua fetaui ni malosiaga se lua (big bang theory).‟Peta‟i, o le tasi o taua o le soifua talitonu ma

le faatuatua i lana Afioga Paia. E le masalosalo ai se manatu i lenei tala logologoā i le „Mana

Fetalai‟ o le Atua na foafoaina ai mea uma o le atu-laulau. A e pei ona faamanatu le mataupu ina

ia mautū i loto ma manatu o le au faatuatua le tala i le Atua foafoa e ala i le „Upu‟.

O le mea lea e ta‟ua ai o le „Mana Fetalai‟ auā fai mai le Tusi Paia na ona fetalai atu o le Atua

ona i ai lea o lea mea ma lea mea. O se vaaiga e ofoofogia ma talitonu gatā i manatu faa-le tagata

peita‟i, o lona lea Silisiliese na faia ai mea uma. O lona foi Mataisau Poto na saunia ai mea uma

ina ia lelei. O lona uiga e ui ua na o Lana Fetalaiga na foafoaina ai mea uma peita‟i, e le‟i faatagā

faia mea uma e le Atua. E tofu mea uma ma lona uiga po o lona aogā i le foafoaga.

A‟oa‟oga: O le faamanatu taua foi lea mo le fanau, o mea uma na faia ma saunia e le Atua i le

amataga mo le leleiga o le foafoaga. Aemaise le tagata na avea ma „Palealii‟ o Lana Foafoaga

Paia. Ia teu loto, e le‟i pa‟ole pe faatagā faia e le Atua oe ma a‟u; na faia lava i mea e gata ai

mea. E faamaonia le tala a le Kenese auā e o‟o mai lava i lenei vaitau o iso le au popoto e tau

sailiili ma vailiili vaega o le tino o le tagata na faia a‟i e le Atua. I le miliona ma miliona o tagata

o lenei lalolagi, ae tasi lava oe ma a‟u na faia a‟i e le Atua. E tasi faapitoa lou foliga (DNA), na

saunia ai e le Atua ina ia iloga ai oe ma a‟u na faia i lona lava faatusa paia.

O le ta‟utinoga e patino i tagata uma aemaise le au faatuatua ma talitonu; „o le Atua na

foafoaina le lagi ma le lalolagi, le atu-laulau ma mea uma o i ai‟. Ia manino ma tala‟i atu i au uo,

o ou aiga, nu‟u o malo aemaise le lalolagi atoa. O le Atua Tolu Tasi Paia na foafoaina le lagi,le

lalolagi ma mea o tumu ai, na saunia mae‟ae‟a mea uma ae a se lumana‟i manuia o le foafoaga.

A e tainane le tagata, na faamemelo i ai le Atua ma avea ma palealii o Lana galuega mamana.

<<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>

3

AOKUSO 19, 2018

MATAUPU 2: O ATAMU MA EVA (Adam and Eve).

TUSI FAITAU: KENESE 2: 7 – 25.

SINI: Ia mae‟a le mataupu ua malamalama le vasega na faia e le Atua le

ulua‟i tagata.

FESOASOANI MO FAIA‟OGA

O le Manatu Autū o tusitusiga o lenei tausaga aoga pei ona faailoa atu e le „Upu Tomua‟ o le

galuega; “O le faamatalaina o le Atua i le Tusi Paia.” O lea foi le manulauti o mataupu taitasi

mo lea Aso Sa ma lea Aso Sa. Pei o le mataupu o lenei taeao`, e tau fesiligia ai le faiaoga pe

faapefea ona faamatalaina le Atua i le olaga o Atamu ma Eva? Ia toe to manatu i le mataupu

muamua, o le Atua na foafoaina mea uma. O lona uiga e tatau ona atagia le Atua ia Atamu ma

Eva auā o lona faatusa paia na faia a‟i i laua o le tane ma le fafine.

O loo faaauau mai le vaiaso ua tuana‟i le tala „o le Atua Foafoa.‟ Na faia foi e Ia o ulua‟i

tagata; o Atamu ma Eva e pei ona i ai le mataupu o lenei aso. Na faia e le Atua o le tane ma le

fafine ma lona faamoemoe e sili ma taua i laua mo le áotelega o le foafoaga. O le Silisiliese ma

le mata‟utia o le Atua o loo taumafai le tusitala e faamatala i le faiga o le tagata; ne‟i fesiligia e le

fanau pe aiseā ua lua ai tala o le foafoaga? O le Atua mata‟utia na ona fetalai ona i ai lea o le

tagata, ae sili foi lona latalata mai pei ona Ia faia ai le fafine mai le ivi ásoaso o Atamu.

O manatu e faatauaina (Major Points):

Ua faia e le Atua le ulua‟i tagata.

Ua tu‟uina e le Atua le tagata i le faatoaga.

Ua le usita‟i le tagata i le Atua.

Ua tuliesea le tagata e le Atua mai le faatoaga.

O faasalaga ma le folafolaina o le faaolataga mo le tagata e le Atua.

Na faia e le Atua le uluaí tagata mai le efeefu. Ua Ia faaigoa foi ia te ia o „Atamu‟, mulimuli ane

na faia e le Atua le fafine. Ina ua silasila atu le Atua ua lē lelei ona to‟atasi le tagata, ona faia lea

o le fafine e fesoasoani ia Atamu. Na tu‟uina e le Atua le tagata i le faatoaga i Etena, ina ia la

galulue ma leoleo ai. E pule foi i laua i mea uma o le foafoaga, se‟i vagana le laau e iloa ai le

lelei ma le leaga. Peta‟i, „na faasala e le Atua le ulua‟i tagata ona o le lē usitaia o lana faatonuga.‟

A‟oa‟oga:O loo atagia ilenei tala le loloto o fuafuaga a le Atua na faataoto a‟o le‟i faia mea uma

e o‟o i le tagata. O le tofi po o le gafa o le tagata soifua ia galue, leoleo ma usita‟i i le finagalo o

Lē na faia o ia. O lea foi se tofiga mo tagata uma ia ola usita‟i ma matata‟u i le Atua Foafoa.

<<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>

4

AOKUSO 26, 2018

MATAUPU 3: “O KAINO MA APELU (Cain and Abel).”

TUSI FAITAU: KENESE 4: 1 – 16 SINI: Ia malamalama le fanau ina ia fealolofaa‟i i totonu o aiga.


I totonu o tatou aiga e i ai lava feeseesega i fanau, e i ai foi taimi e faatigā-ulu ai o tatou tei laiti

ia i tatou. E lē o se mea faato‟ā tupu ananafi, o le mea na tupu mai lava i le amataga. Na tupu i le

aiga o Atamu ma Eva e pei o le tala ia Kaino ma Apelu. Na fasiotia e Kaino lona uso o Apelu

ona o feeseesea‟iga i mafutaga i totonu o aiga. E le o se mea lelei le nonofo fefulituaa‟i ma le

femisaa‟i i totonu o se aiga. Ia manatua mai, o fanau ia a le ulua‟i tagata, le ulugali‟i na foafoaina

i áao alofa o le Atua. E le tatau ona femisaa‟i pe fefulituaa‟i, a ia maua le fetausia‟i ma le filemū.

O le tala ia Kaino ma lona uso o Apelu o loo faaáuau mai pea i le mataupu o le foafoaga ma le

ulua‟i tagata. O le tala masani i le áu uso po o le fanau a le ulua‟i matua o le Tusi Paia. O le

ulumatua o Kaino o le galue fanua ia, a o Apelu lona uso o le leoleo mamoe o ia. O le faiga

taulaga na mafua ai ona feseesea‟i i laua. E le o ta‟ua e le Kenese se mafuaga ua le silasila ai le

Alii i le taulaga a Kaino, peita‟i ua silasila o Ia i le taulaga a Apelu. Ua silafia foi e le Alii le ita o

Kaino ona o lea tulaga ma ua faaūū lava ona mata. Ua avea foi lea ma ala ua tula‟i ai Kaino ma

faao‟o le oti i lona uso o Apelu, ona pepelo lea o ia i le Alii na te le iloa lona uso. Ona faasalaina

lea o Kaino ona ua ia fasioti i lona uso o Apelu; ua faamalaia o ia mai le éleele.

A‟oa‟oga: Ioe, e ese le matuiā o le i‟uga o lenei tala, peita‟i o le taunu‟uga lea o le ita

faamoemoe ma le tele o feeseeseaiga i totonu o mafutaga i aiga. Ua aumaia lenei tala e faailoa ai

le ogaoga o tulaga e o‟o i ai le ita po o le loto ua pulea e le ti‟apolo. E ui e le o atagia ai fofoga

alofa ma le filemū o le Atua, a‟o se mataupu e faamanatu mai ia te i tatou le mea moni e ono

tutupu i lenei olaga. O le olaga e tumu i mea lelei ma le taua pe a i ai le Atua a e misi loa o Ia i le

olaga po o lou aiga, ona tutupu lea o fitā ma puapuagā i totonu o mafutaga. O le fautuaga, ina ia

faalogo ma usita‟i i le musumusuga a le Agaga o le Atua e manuia ae lē malaia ai le olaga.

E tutupu pea liu i va‟a pei o lea muā-gagana, a e ao lava ona tatou maua le onosa‟i ma le

faapalepale i totonu o mafutaga i aiga. Aua le umi le ita, fai mai ia goto le la ua uma. O le tali

filemū foi e liliueseina ai le ita. A o‟o se mafutaga i le tulaga pei ona faia e Kaino i lona uso, ua

le aogā le Talalelei. O le isi a‟oa‟oga aua tatou te pelogia le Atua na te silafia mea uma.

<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>

5

SETEMA 02, 2018 “ASO SA O LE TALALELEI”

MATAUPU 4: “O LE TALALELEI MO ÁAI UMA (GOODNEWS FOR ALL).”

TUSI FAITAU: LUKA4: 42 – 44 SINI: Ia malamalama le fanau o Iesu na fetalai, „e tatau ona folafola le

Talalelei i le malo o le Atua i áai ma nu‟u uma‟.


O le molimau a Luka i lefou amata o le galuega faaola a le Alii i le lalolagi. I le mataupu e 4 o

loo amata i Kalilaia ma Nasareta le galuega tala‟i ina ua mae‟a ona „faaosoosoina‟ o Ia e le

ti‟apolo. Ua a‟oa‟o atu Iesu i o latou Sunako ma ua logo atu le tala ia te Ia, ua so‟o ai lava itu

uma. Ua Ia faamalolō i ma‟i e tele ma lauga atu i le Afioga a le Atua. Ua fai vavega tetele i lea

áai ma lea faoa áai ua o‟o lava i fale o nisi o ona so‟o.

I le fuaiupu 43 o loo atagia ai le manatu faapito o le au Iutaia, tusiupu ma tagata lolotu o lea

vaitau, ina ia tala‟i le Talalelei mo na o i latou lava. O lea na manino i le fetalaiga a le Alii ia i

latou; e tatau ona folafola le Talalelei i le malo o le Atua i nisi áai foi; auā o le mea lea na auina

mai ai o Ia i le lalolagi. O le Talalelei mo nu‟u ma áai uma o le lalolagi, ia o‟oo‟o atu i so‟o se áai

ma so‟o se tagata le tala o le malo o le Atua ua tau áao mai e Iesu Keriso.

E talitonu le manatu o lea se mafuaga ua o‟oo‟o mai ai i Samoa nei le faaolataga, pei ona

suluia ai lau-fanua o le Atunu‟u i ave malolosi o le Talalelei. O le finagalo o le Atua ia o‟oo‟o i

soo se tulimanu ma soo se vaipanoa le faaolataga ina ia leai se tagata talitonu e fano, a ia maua

uma le avanoa mo le ola faavavau. O le Talalelei e le faa-ituauina pe na o se vaega o tagata, o le

faaolataga e mo tagata uma na faia e le Atua. O loo faailo ma tuliloa mai manatu, i le lē faatuaoia

o le alofa o le Atua mo lana foafoaga nai le amataga e oo i le faavavau.

Ua manino foi le sailiga a le Atua mo lana tagata na pa‟ū i le agasala mai le amataga o le

foafoaga. O le pule faitalia a le Atua na tapenaina ai le faaolataga mo le lalolagi atoa, ina ia le

fano so i tatou o e faatuatua ia te Ia a ia maua le ola e faavavau. O le faamanatu masani, aua le

foualuga ni manatu ina ua ta‟ua itatou o kerisiano ona maua-fua leo o le ola e faavavau. Aua foi

le mapo lotu ma faaituauina lagona mo le Talalelei, auā o le Atua e silafia mea lilo uma.

A‟oa‟oga:Ia manatua, na faia lava i tatou i le faatusa paia o le Atua ina ia tatou foliga ia te Ia. E

ui ina faigatā ona molimoli mai le Talalelei i o tatou lau-fanua, peita‟i e le‟i nofoa‟i ai le galuega

a le Agaga Paia i tagata o Samoa. O Iesu lava na fetalai, „e tatau ona folafola le tala lelei i le

malo o le Atua i áai uma.‟ O le Talalelei ia Iesu Keriso lea ua sapi ai Samoa ma le lalolagi atoa.

<<<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>

6

SETEMA 09, 2018

MATAUPU 5: “O LE VALAAUINA O APERAAMO (Abraham‟s Call).”

TUSI FAITAU: KENESE 12: 1 – 9 SINI: Ia malamalama le fanau i le talitonu ma le faatuatua o Aperaamo i

lona valaauina e le Atua; e tu‟ua lona nu‟u a e alu e tali le valaau.


Na valaauina e le Atua ia Aperaamo e tuua lona nuu; a e alu i le nuu o le a faasino atu ia te ia.

Ua folafola atu foi e le Atua mo Aperaamo, „e fai o ia ma tupuga o nuu-tele‟. O ana faamanuiaga

ia te ia, o le a manuia foi aiga uma o le lalolagi ia te ia, pe afai e faalogo ma usita‟i. Na alu lava

Aperaamo i lona faatuatua ma le usita‟i i le faatonuga a le Atua. Ua ia talitonu i le faamaoni o le

Atua i ana folafolaga. O le uiga lata mai o le upu faatuatua; „o le talitonu lea i mea ua lē vaaia.‟ E

pei ona talitonu ai Aperaamo i le Atua e le o vaaia i mata ae maise lana folafolaga e alu i le nuu e

faasino atu ia te ia. E le‟i faafitifiti pe tomumu Aperaamo a e na tula‟i loa ma alu malaga.

O manatu e faatauaina (Major Points):

Na tupuga mai Aperaamo ma ia Noa.

Faatonuga: Ia tu‟ua le aiga o lou tamā, lou nuu a e alu i le nuu e faasino atu e le Atua.

E maua faamanuiaga pe afai e faalogo ma usita‟i i le faatonuga a le Atua.

Ua talitonu ma usita‟i Aperaamo i le Atua.

Ua faataunu‟uina e le Atua ana folafolaga ia Aperaamo.

Ia faamatala atili uiga o le upu folafolaga po o le tautoga e faia i le va o le Atua ma le tagata;

po o le va o le tagata ma le isi tagata. E pei ona folafola e le Atua lana faatonuga ia Apeaamo ina

ia tu‟ua lona aiga ma lona nuu a e alu i le nuu o le a Ia faasino atu ia te ia. O le folafolaga ma le

tautoga lē gausia a le Atua ia Aperaamo pe a faalogo ma usita‟i, na te faamanuia ia te ia ma ana

fanau. Na filifilia e le Atua o Aperaamo ona o lana amiotonu ma le amiolelei ma ua silafia lelei

le faalogo ma usita‟i o lenei auauna. O le faatuatua ma le faalagolago o Aperaamo i le Atua o le a

faataunu‟uina mea uma ua ia folafolaina ma faamanuiaga na te avatu ia te ia.

A‟oa‟oga: O le faalogo ma usita‟i o le mea sili lea ona fiafia i ai le Atua. E lē faigofie foi i se

tagata ona tu‟ua mea ua masani ai ae maise le aiga o lona tamā; auā o lona lea faasinomaga, a e

alu e nofo i se isi laueleele e fai mona. Ioe, o le mea sili lea ona taua i le silafaga a le Atua, mo

lana fanau ia savavali i le amio sa‟o ma le tonu i ona luma. O le usita‟i lava lea ma le ola

matata‟u i Lē na faia mea uma atoa ma o tatou tagata faatauvaa. Ia faalogo outou le fanau i

matua, e faamanuia ma faalevalevaina ai lou ola i le nuu o le a foa‟iina e le Atua ia te oe.

<<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>

7

SETEMA 16, 2018

MATAUPU 6: ISAAKO: TAMA O LE FOLAFOLAGA (Isaac; the Son of Promise).

TUSI FAITAU: KENESE 21: 1 – 7 SINI: Ia malamalama le fanau o le faatalitali i le pule a le Atua i lona lava

taimi e faataunuúina ai lona finagalo mo le tagata.


O le faatalitali o se mea faigatā. E pei o Aperaamo ma Sarai na faatalitali i se taimi umi lava. O

le folafolaga ia Aperaamo ina ia tu‟ua le aiga ma le nu‟u, a e alu i le nu‟u o le a foa‟iina e le

Atua. O le a avea o ia ma nuu tele ma e toatele lana fanau. I le fitu sefululima o ona tausaga na

amata ai ona faatalitali lenei ulugalii mo se tama o le folafolaga. O le folafolaga po o le tautoga

le gausia, e faataunu‟uina lea i lona lava taimi. O lana pule faitalia foi e faataunu‟uina ai i lona

finagalo malie, tau o lenei ia tausisi le pito laau a le tagata pei ona faatonuina ai i le feagaiga.

Na manino le lē mafai ona faatalitali lenei ulugalii i le folafolaga e fai ilaua ma nuu tele. Ina ua

matutua i laua, na tonu ai se manatu o le a saili se isi ala e maua ai se atalii. O lea na avane ai

Akara ia Aperaamo ma maua ai Isamaeli, ma le manatu o ia o le tama o le folafolaga. Peita‟i, e le

o le finagalo lea o le Atua mo le tagata. E le o Isamaeli foi se tama o le folafolaga, auā o lea lava

na toe ita i ai le loto o Sara ina ua fanau mulimuli ane lana tama o Isa‟ako. E ui ina selau tausaga

o Aperaamo na faataunu‟uina lava le folafolaga ma le tautoga a le Atua ma na fanau mai ai le

tama o le folafolaga ma le gafa ua faaauauina.

O faamanuiaga e amata i totonu o aiga ma e faataunu‟uina lava e le Atua i ona lava taimi. E ui

ina le lava le onosa‟i a le ulugalii, ma uia se isi auala ona o le faaletonu o manatu. Peita‟i, na

faataunu‟uina lava e le Atua i ona taimi ma lona finagalo mo le tagata. E le gata i le faatalitali i

lona faaali mai a e tatau foi ona talitonu na te mafaia mea faigatā uma o lenei olaga. E leai se

mea e le mafaia e lo tatou Atua.

A‟oa‟oga: O lea foi se faamanatu mo i tatou le fanau, ia tumau pea le ola faatuatua i folafolaga

ma faamanuiaga mai le Atua o manuia. O le a lava se mea ua folafolaina mai e ao i le tagata ona

talitonu, faatalitali ma faalagolago e leai se mea e le mafaia e lo tatou Atua mo oe ma a‟u. Aua

tatou te masalosalo pe fesiligia ana folafolaga auā o le ola anaana lava lea i le Atua. E pule

faitalia le Atua i lana taimi e faailoa ai lona silisiliese ma lana pule aoao i mea uma o lenei olaga.

O nisi o taimi ua na o nai itula po o nai aso, a o nisi folafolaga pei ona faia ia Aperaamo ma Sara

na lata i le 25 tausaga. Ia faatalitali ma onosa‟i, faapalepale ma talitonu i faamanuiaga e le Atua.

<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>

8

OKETOPA 28, 2018

MATAUPU 7: O ISAAKO & REPEKA (Isaac and Rebekah).

TUSI FAITAU: KENESE 24: 1 – 7 SINI: Ia malamalama le fanau e tuufaatasia e le Atua ni tagata se to‟alua pe

a faamoemoe ma faalagolago ia te Ia.


O tala i aso ua leva, e saili e matua ni teine lelei e nonofo ai le fanau tama ina ia faaauauina le

gafa ma le soifua manuia o ona tagata. E pei o tu ma aga a nisi o atunuu, e saili se tama‟itai lelei

ma agavaa e faaauaua le gafa o aiga. O le tala i le malaga a le auauna a Aperaamo ma kamela e

sefulu e tau saili se to‟alua o le tama o le folafolaga o Isa‟ako.Ua tagata matua lava Aperaamo, o

lea ua tonu ai e tuli lana auauna e saili se teine mai lona aiga e fetaui ma Isaako lona atalii.

Ua alu le auauna aga‟i i le aiga o lona matai o Aperaamo ma nisi o tagata na latou malaga,

faatasi ai ma kamela e sefulu. A o alu le malaga e le o mautonu le auauna pe faapefea ona ia saili

se tamaitai e fetaui ma le tama o le folafolaga. Ua tatalo ma faatoga le auauna i le Atua se‟i

faasino mai se auala na te iloa ai le tama‟itai tonu e avea ma toalua o le atalii o lona matai. Ua

faaali e le Alii i le miti po o lana faalepō, „ia alu i le vaieli pe a taunu‟u i le áai ma vaai se

tamaitai o loo utu vai ai; o lē agalelei ane o ia lenā.‟ Na faapeaina ona faia e le auauna pei o upu

a le Kenese, na sau le tamaitai o Repeka e utuvai ma agalelei ane i le auauna ma kamela e sefulu.

O se fuaitau ua tatou masani ai; „o ala o le Atua e lē o ala ia o le tagata.‟ Ioe, e lililo ala o le

Alii mo i tatou, se‟i vaganā ua tatou mafuta vavā lalata ma Ia, ona iloa lea o le faaali mai o lona

Agaga mo i tatou. O le manatu e fia faa-malamalama, „e lotolotoi faatasi le Atua i o tatou ala

peita‟i na te le o faatumauia o tatou ala. O le uiga o le manatu e i ai lava le pito laau a le tagata e

faia i ala ia, e le pei i tatou o ni masini ua mae‟a ona tu‟u matāmaga le ola (pre-destination). O le

matagofie lea o le soifuaga nei, e auai faatasi le Atua ma o tatou ala ae faatino lava le pitolaau a

le tagata lava ia mo le ola. O le sa‟olotoga o le tagata e filifili ai i ona ala.

A‟oa‟oga: E ese foi le manaia o tu ma aga faa- Sasae tu totonu i le sailiga o to‟alua ma avā a

latou fanau. O le mea sili ona taua o le fesiligia o le Atua mo lana faasinoga po o se faailoga e

filifili tonu ai. Ou te talitonu e tatau foi ona faapenaina lenei vaitau, i le tau sailiga o se agavaa pe

fetaui lelei mo se tama po o se teine. Atonu e lei taitai o‟o i ai le fanau i lea tulaga, peita‟i ua iloa

lelei lava e le fanau le autū o lenei mataupu. E taua le filifili ma le Atua, ae maise foi au uo i

totonu o soo se mafutaga. E ao lava ona fesiligia le faasinomaga a le Atua e manuia ai.

<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>

9

NOVEMA 04, 2018

MATAUPU 8: O IAKOPO&ESAU (Jacob and Esau).

TUSI FAITAU: KENESE 25: 21 – 34 SINI: Ia malamalama le fanau le mafuaga na foa‟i ai e Esau le tofi o le

ulumatua ia Iakopo.


O tala i le au uso masaga na fanau mai ia Isaáko ma Repeka, soso‟o mai i le tala o le vaiaso ua

tuana‟i. E ui ina masaga tama ia, peita‟i e eseese o laua loto. O Esau le ulumatua e poto e tuli

manu o le tagata o le vao. Ua alofa le tamā ia Esau ona ua tausami o ia i manu o lana tuliga. A o

Iakopo e agamalu ma ua mau o ia i le fale ie, ua alofa Repeka le tinā i le ui‟i. O se tala e ese foi

manatu ona o tama ma mea na fiafia i ai i laua, a‟o loo taoto ai le finagalo o le Atua mo le na te

faaauauina le gafa o aiga ae maise faamanuiaga ia Aperaamo o le a faia o ia ma nuu-tele.

O Manatu e faatauaina (Major Points):

Na pa pe lē fanau Repeka le to‟alua o Isaako.

Ua faatoga atu Isaako i le Alii mo lana ava o Repeka.

Ua faafofoga le Alii ma ua foa‟i ia te i laua o le masaga tama.

Ua fanau le ulumatua o Esau ma le ui‟i o Iakopo.

Ua faoa le tofi o le ulumatua o Esau e Iakopo ona o mea ái.

O le fanau na faatoga ai Isaako i le Alii mo lana avā o Repeka auā sa lē fanau o ia. Na fetalai

le Atua ia Repeka, e lua malo o loo i lona manava ma o le a vaevaeina. O le ui‟i na ia uúina le

mulivae o lona uso matua, o lona uiga e i ai le taimi e pule ai le ui‟i i le uso matua. E le tutusa

loto ma tino o lea masaga pei o le tele o masaga tama. O le tasi aso na tupu ai se mea uiga ese,

ina ua foi mai Esau mai lana tuliga ua fia ái lava, a‟o sasala atu le manogi o le kuka a lona uso.

Ua aisi le tama matua ia Iakopo mo sina fasi mea ái, peita‟i ua faatau ane ai le tofi o le ulumatua

e le ui‟i i lea lava fasi mea ái. E le manaia le tala, ae o le mea moni na tupu i lenei aiga.

A‟oa‟oga: E tele ni fesili taua mo lenei tala pei ona faamatalaina e le tusitala, peita‟i e faamanatu

pea le upu masani; „o ala o le Atua e le o ala ia o tatou tagata‟. E le o se mea lelei le faailoga o

fanau e fiafia i ai le tamā po o le tinā. E le tatau foi ona finau le ui‟i i le ulumatua, aemaise le tofi

ua faatauina i mea ái. Peita‟i, atonu o le agamalū ma le mataalia o Iakopo e mafai ona ala mai ai

faamanuiaga. Auā foi o Iakopo lea na faoa le tofi o le ulumatua e ala i mea ái, o ia foi lea na faoa

faamanuiaga a lo la tamā o Isaako na tu‟u e avatu ia Esau le ulumatua. O se faamanatu ina ia

tatou tapena ma saili ala o le Atua mo tatou tagata ma faatalitali i ana faamanuiaga e le aunoa.

<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>>

10

NOVEMA 11, 2018

MATAUPU 9: UA FAAIPOIPO IAKOPO IA RASELA (Jacob married Rachel).

TUSI FAITAU: KENESE 29: 1 – 35 SINI: Ia malamalama le fanau o Iakopo na faaauauina le folafolaga a le

Atua mo ona augā tamā.


Ua uma ona ave e Iakopo le tofi o le ulumatua a‟o lea foi ua ia toe faoa faamanuiaga mai lo laua

tamā o Isaako. Ua iloa e le tinā o Repeka ua tau i le lagi le ita o Esau ia Iakopo, ona faasola lea o

Iakopo i le aiga o Lapana lona tuagane. O le togafiti lava na fafau e Iakopo e faoa ai faamanuiaga

mai lona tamā tauaso, lea ua toe totogi i ai e Lapana le tuagane o lona tinā.

Manatu e faataua (Major points):

Ua sola Iakopo i le uso o lona tinā.

Ua auauna Iakopo i tausaga e fitu.

Ua fai-tagafiti Lapana ina ia nonofo Iakopo ma Lea.

Ua toe auauna Iakopo mo le isi fitu tausaga mo Rasela ua ia alofa i ai.

Ua maua atali‟i e sefululua ia Iakopo ma ana avā.

O le solaaga a Iakopo na faasola ai e lona tinā aga‟i ia Lapana, na le‟i faigofie auā e mamao le

ala. Na vaivai o ia, ua moe gase ma aluga i le ma‟a. Ua vaivai tele o ia na fai ai lana miti e

faapea; o agelu o loo a‟ea‟e ma ifoifo i le apefa‟i. Ua ala o ia ma iloa ai o lana miti; na ia faaigoa

ai lea mea o „Peteli‟ (e i ai le Atua i le mea nei). E ui ina mamao a ua mautinoa e Iakopo o loo

auai faatasi le Atua ma lana faigamalaga.

Ua folafola e Lapana ia Iakopo, e mafai ona faataunu‟u lona mana‟o pe a fai e auauna ia te ia

mo tausaga e fitu. Peita‟i, na olegia e Lapana o Iakopo ma ua avatu Lea le ulumatua. Fai mai

Lapana; „o la latou aganu‟u e muamua ona fai to‟alua le ulumatua.‟ Ua toe auauna Iakopo i isi

tausaga e 7, ina ua mae‟a ona faato‟a mamulu ane lea o Rasela. O le mataupu 29 ma le amataga o

le 30 o loo ta‟ua ai fanau e 12 a Iakopo i le aiga o Lapana le tuagane a lona tinā.

A‟oa‟oga: E toe taui mai lava oe pe afai e te fai-togafiti i isi tagata. E lelei le ola finafinau a e

leaga le ola fai-tagafiti. Ia manatua e auai ma lotolotoi faatasi le Atua i la tatou faiga-malaga i

taimi ma aso uma e le aunoa. E ui ina tutupu pea liu i va‟a, ae to‟a lava le áu peáu i le Tautai sili

o le vasa. O fea tatou te fesēa‟i ai i lenei olaga, ia manatua o loo faamanatu mai pea le Agaga

tu‟umumusu o le Atua ina ia sao ma uli la tatou faiga-malaga i lenei foi tausaga. Ia talitonu ma

faalagolago i le fesoasoani a le Agaga na te mafaia mea uma, e leai se mea e faigata i le Atua.

<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>

11

NOVEMA 18, 2018 „ASO FAAFETAI‟

MATAUPU 10: IA FAAFETAIA LE ATUA (We must thank God).

TUSI FAITAU: SALAMO 100: 3 – 5 SINI: Ia malamalama le fanau ina ia faafetaia ma viia le Atua i mea

uma ua tatou maua.


O lagona vivi‟i o le fai-Salamo pei ona tatou faitauina i lenei taeao. O se pese tau logologo a‟o se

faamanatu i le Isaraelu ona nafa ma tiute tauave i taimi ma aso uma e le aunoa. Ua faailoa mai

mo tagata uma na faia e le Atua e ao ona vivi‟i ma patipatia le alofa ma lona agalelei i taimi uma.

Ia alalaga fiafia mea uma na faia e le Atua ona o le tele ma le faula‟i o lona alofa. Ia faailoa ma

ta‟u atu i tuluiga uma o le atu-laulau, auā o Ia lava o le Alii le Atua o Isaraelu ma le lalolagi atoa.

O le faamanatu ia Isaraelu le feagaiga na tofia ai i latou e fai mona nu‟u, ae fai o Ia ma o latou

Atua.Ia iloa ma malamalama soo se Isaraelu i lona lea faasinomaga ma le Atua osi feagaiga. O le

Atua foi na tausia ma leoleoina i latou, o le lafu mamoe ua Ia fagaina. Po o fea lava e lele ma alu

i ai le Isaraelu e ao lava ona sisi le faamalama ma alalaga fiafia ona o lo latou Atua e toatasi, o

Le e ou le viiga, le malosi ma le mana ua lava. O lona alofa e silisili i mea uma e manatu ma

lagona e le tagata, e tumau e le liliu e faavavau lava lea.

Afai e foi mai le Isaraelu ma ulu atu i ona faitoto‟a ma le viiga, ma ona lotoā ma le pese; ia

outou vivii atu ia te Ia, ma faamanū i lona Suafa Paia. O le soifua vivii e faia i aso ma taimi uma

e maua ai le avanoa o le Isaraelu, e le tatau ona faa-vaitauina le pese auā o loo le aunoa lona

agalelei i lona nu‟u. E faamaoni lona alofa e o‟o atu i lea tupulaga ma lea tupulaga, pe a tumau

ma ola vivii ia te Ia lana fanau e le aunoa. O le faafetai i le Atua ona o mea uma, e ao foi i mea

uma ona viia o Ia i aso uma o le tausaga ae maise taimi e maua ai le avanoa.

A‟oa‟oga:O le faamanatu mo le aso ua ta‟ua o le „Aso Faafetai,‟ e leai lava se tasi e tatau ona

viia ma faafetai pei o le autū o lenei aso. Fai mai na faa-tauaina e tagata ina ua tele le seleselega

o fua o faaéleeleaga na latou maua mai ulua‟i fua o a latou faatoaga. Na faamauina o tagata

malaga mai i le atu-Eropa na ainā ma faato‟aina lau éleele o Amerika i matū. O lo latou

faagae‟etia ma le viiga ona ua latou selesele le tamaoaiga ma le sosia o lenei lau-éleele fou ona o

le pule faasoa a le Atua mo i latou a‟o aumau i atunu‟u ese. O le matafaioi tausi po o le galuega

patino lea mo le au kerisiano ma soo se tupulag talavou, ina ia vivií ma alaga fiafia i le Atua ona

o lona tamaoaiga faasoa e ala i lona alofa ma lona agalelei tausi i lea aso ma lea aso.

<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>

12

TESEMA 02, 2018

MATAUPU 11: O IESU I LE MALUMALU (Jesus in the Temple).

TUSI FAITAU: LUKA 2: 41 – 52 SINI: Ia malamalama le fanau i mea na faia e Iesu i le malumalu a‟o 12 ona

tausaga.


O le 12 o tausaga o se tama po o se teine e le o se tagata ua matua. O le molimau a Luka i mea na

faia e le Alii a‟o faato‟a 12 ona tausaga. E maofa ai le loto ina ua a‟oa‟o atu o Ia i totonu o le

malumalu a‟e le o se tagata na a‟oa‟oina i le tulafono ma le Tusi Paia. O iina na faailoa ai le

mafuta tele o le Alii i le Tusi Paia ae maise le tatalo atu i lona Tamā e le aunoa. Na silafia e Iesu

o Ia o le Alo o le Atua, o lea na a‟oa‟o atu ai ma le poto pei o se tagata ua ia te ia le pule.

Manatu e faataua (Major Points):

O Iesu o Ia o le Alo o le Atua.

Na tuputupu a‟e o Ia ma le malosi, na alofagia o Ia e le Atua ma tagata.

Ina ua atoa le 12 o ona tausaga na ia a‟oa‟o atu i le malumalu i tagata e to‟atele.

Na matuā ofo tagata uma ona o le poto na a‟oa‟o atu ai Iesu.

Na silafia lelei e Iesu o le Atua na auina mai o Ia.

Na faalogo ma usita‟i o Ia i ona matua o Iosefa ma Maria.

Na tuputupu a‟e Iesu ma le malosi, ua faatumulia foi o Ia i le poto ua ia te Ia foi le alofa o le

Atua. Na alu o Ia i le malumalu e a‟oa‟o atu ai i tagata, ua taufaiofo le toatele o tagata i le poto

ua ia maua. O le soifua mafuta o le Alii i lona Tamā i le tatalo, ae maise lona poto na maua mai i

lana suesuega i le Tusi Paia a‟o itiiti lava o Ia.

Ua su‟e le tama e Iosefa ma Maria; ua alu le po o tau saili o Ia. Fai mai o Iesu i ona matua; „se a

le mea ua lua saili ai ia te a‟u, lua te le iloa ea e tatau ona ou i ai i le Fale o lo‟u Tamā.‟ O iinā na

iloa ai e Iosefa ma Maria ua tupu le poto o le tama o le folafolaga. O le Atalii ua liu-tino tagata ai

le Atua ina ia mafai ona faamagaloina agasala a le lalolagi. E ui i lona itu Atua peita‟i, na

lagonaina tigā, le matuitui ma le sasa na puapuagatia ai, na maliu ai lava ona o lona alofa.

A‟oa‟oga: O le manatu taua o lenei mataupu, ia saili atu ma maua oe le tupulaga i totonu o le

Malumalu tapua‟i o le Atua. Ia mafanafana la oulua mafutaga ma le Atua, na te faailoa atu mea

lilo ma oloa natia o lona Malo ia te oe. O le faalogo ma usita‟i i matua o le tulafono e tasi o loo

sau ma lona faasalaga. “Ia e ava i lou tamā ma lou tinā; ina ia faalevaleva ai ou aso i le nu‟u o le

a foa‟iina e le Alii lou Atua ia te oe.” O le soifua o le Alii e faitau le Tusi Paia ma tatalo i aso

uma, o se faataitaiga sili foi lea mo i tatou le tupulaga talavou o lenei vaitau.

<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>>

13

TESEMA 09, 2018

MATAUPU 12: O IESU O LE EMANUELU (Jesus is thy Emmanuel).

TUSI FAITAU: MATAIO 1: 22 – 23 SINI: Ia malamalama le fanau o Iesu o le Emanuelu; po o le Atua ua ia te i

tatou.


O le valoaga a perofeta pei o Isaia, e afio mai le Atua e ala i le tama o le folafolaga. E i lona ua le

malo, o le Faipule, ole Silisiliese o le Emanuelu; po „o le Atua ua ia i tatou‟. O le Alii e atoatoa, e

paia foi o Ia e le mafai ona fesoota‟i se tagata agasala ma le paia o le Atua. Peita‟i, na pau le ala e

mafai ai ona faamagalo agasala a le tagata mai le amataga, o le toto o le tama‟i mamoe le ponā a

le Atua. O le mafuaga lea na liu-tino tagata ai le Atua pei ona molimau Mataio.

E manino o le mausa lea o le tagata soifua, o le agasala pea lava pea. Ua le asa lava se taimi

ma le sese o i tatou le fanau. E le gata ua agasala a ua o ese mai foi i le Atua ma ua mamao ai i

tatou ma le Alii. O le mea lea na valoia ai ma folafolaina e le Atua i perofeta; „o le a to le taupou,

e fanau e ia se tama tane e faaigoa foi ia te Ia o Emanuelu (o le Atua ua ia i tatou). O le manatu

ina ia soifua le tagata i le olaga sa‟oloto mai le pologa o le agasala. E manino le toe foi o le

tagata i le agasala pe afai e le talitonu pe faatuatua i le valoaga ma le folafolaga a le au perofeta.

O le a auina mai le „Puluvaga‟ mo Isaraelu ma le lalolagi atoa.

O le molimau a Mataio i le gafa o le Mesia pei ona sau a‟i le talafaasolopito o le Isaraelu mai

le amataga ia Aperaamo. O le tala na tu‟u faasolo mai e augā tamā o le nu‟u o le Atua. O le gafa

mai ia Aperaamo se‟io‟o mai i le Alii Faaola. O le aiga ma le fanau, a o le nu‟u na fagaina e le

Atua mai le amataga. Na to i ai faamanuiaga, e uluola ma avea ma nuu tele ma e tupu mai ia te

oe o le na te togiolaina le lalolagi. O lea na to laulau e Mataio mai le ulua‟i fuaiupu e oo mai i le

23 usuga ma augā tupulaga o le Keriso. O le gafa o le „tama o le folafolaga‟ ua afio mai ina ia le

fano se tagata lava e toatasi, a ia maua e le lalolagi uma le ola e faavavau.

A‟oa‟óga: Ia mautinoa e le fanau o le Atua lava lea ua afio mai i le lalolagi e ala ia Iesu Keriso

ina ia magalo agasala o tagata uma. O a‟oa‟oga ma le mataupu silisili lava lea mai le amataga a

la tatou Ekalesia na faavae mai ai. E tatau ona taofi mau ma malamalama lelei i ia taualumaga o

la tatou talitonuga, a e sili ai o le soifua ma ola ai i le faatuatua i le Talalelei. Ia mautinoa e le‟i

tutupu fua ia mau mea pei ona molimauina e le au perofeta ae maise tala a le au fai-evagelia. O le

Atua ua faamatalaina ai le tala faasolopito o le tagata ina ia maua le ola ma maua atili ai lava.

<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>

14

TESEMA 16, 2018 „ASO KERISIMASI‟

MATAUPU 13: O LE A LE KERISIMASI IA TE OE? (What is Christmas to you?).

TUSI FAITAU: LUKA 1: 26 – 38 SINI: Ia malamalama le fanau i le uiga moni o le Kerisimasi.


O le a se taua o le aso Kerisimasi ia te oe? O le aso fiafia ma le matagofie auā e faagae‟etia ai

lagona i le fefaasoaa‟i o meaalofa ona o le Aso Soifua o Iesu Keriso. E tele nisi mea e manatu i ai

le toatele i lenei vaitau, pei ua faamamafaina aso fiafia. Ua tau faagalogalo ai le taua o le aso na

soifua mai ai le Alo o le Atua i le lalolagi ina ia maua e tagata uma le olioli loloto ma le filemū

moni. O loo manino le upu „Kerisimasi‟ e sau mai le upu „Keriso‟, o lona uiga o le faiga ái mo le

Alii o Iesu, e ao ona fiafia ma alalaga tagata uma ona o lea ua afio mai lo latou „Faaola‟.

Manatu e faataua (Major Points):

O le faamanatuina o le Aso Soifua o Iesu Keriso,

O Maria ma Iosefa o le tinā ma le tamā o Iesu.

O Iesu e iai lona itu Atua – toe i ai lona itu tagata (two nature of Christ).

O Iesu o le Alo o le Atua.

O le mau a Luka e uiga ese ma le ofoofogia lenei mea, o le Atua ua fanau mai po ua liu tino-

tagata e ala i lona Alo pele e toatasi. Fai mai na alu ane Keperielu le agelu i le taupou o le aiga o

Tavita; o Maria le igoa na faufautane ia Iosefa. Ua fai mai le agelu, „si o‟u alofa Maria le ua

alofaina e le Atua, ua ia te oe le Alii.‟ “Aua e te fefe; o le a to oe, e fanau mai se tama tane, e te

faaigoa foi o Ia ia Iesu.”

Ua taunu‟u folafolaga na fetalai ai le Atua ia Atamu ma Eva le ulua‟i tagata ina ua agasala. Ua

taunu‟u foi valoaga a le Feagaiga Tuai ma le au perofeta i le vaitau ua fanau mai ai le Keriso. Ua

faaalia ai le faamaoni ma le lē gausia o tautoga a le Atua mo lana foafoaga ae maise le tagata. O

le tama o le folafolaga lea ua aui i le íe e Maria le taupou o le aiga o Tavita. O le tala e mafai ona

faamatala ma toe faamatala pea, ae lē uma ai le taua ma le aogā o lenei mea na tupu i le lalolagi

ma ona tagata mai e le Atua.

A‟oa‟oga: O le mataupu ina ia faamumū ma faasusulu atu pea le fiafia ma le olioli loloto, ina ua

fanau mai le Alii o le filemū. O le a sau tali atu i lenei mea mata‟utia ua faia e le Atua mo oe ma

a‟u? Pe tau lava o le faamanatu pea i lea tausaga ma lea tausaga le fanau mai o Iesu i le lalolagi,

a e leai sona taua loloto ia i tatou? O le uiga lea o le mataupu; „o le a le uiga o le Kerisimasi ia te

oe?‟ O le tunoa lea o le alofa o le Atua i lana foafoaga ae maise le tagata na Ia faia ua agasala.

<<<<<<<<<<<<<<<<<< Ia Manuia Tele Malologa O le Kerisimasi >>>>>>>>>>>>>>>>>>>

15

IANUARI 20, 2019

MATAUPU 14: O LE PAPATISOINA O IESU (Jesus Baptism).

TUSI FAITAU: MAREKO 1: 9 – 11 SINI: Ia malamalama le fanau o le papatisoina o Iesu Keriso o le faailoga

mai le Atua.


Ua mae‟a le tala i le liu-tino tagata o le Atua i le lalolagi, pei ona tatou faamanatuina lona Aso

Soifua mai i lena masina ua tuana‟i atu. E ui e foliga mai e mau eseese le au faievagelia i tala e

uiga i le Alo o le Atua, peita‟i e moni uma ma faamaoni a la latou mau. O le tusitala lenei o

Mareko faatoa tusia tala ia Iesu keriso ina ua matua o Ia. Na amata i le tala ia Ioane le papatiso, o

le tausoga o Iesu auā e uso o laua tinā. O Ioane o le teuteu ala mo le Mesia o le a afio mai, ina ia

salamō ma papatisoina tagata mo le Keriso o le a mulimuli mai. O le papatisoga o le faailoga lea

o le tagata ua i le Atua ina ua salamō mai le agasala po o faalētonu sa i ai.

Na amata le talalelei na tusia e Mareko i le papatisoga na faia e Ioane i le vaitafe o Ioritana.

Fai mai le tala na ui ane ai le Alii ma ua finagalo ina ia papatisoina o Ia e Ioane i lea lava taimi.

O le itu-aso lava na papatisoina ai Iesu na masae ai le lagi, ma le Agaga ua afio ifo i ona luga, e

peiseai se lupe. Ua oo mai foi le siufofoga mai le lagi ua faapea mai, “O lo‟u Atalii pele oe, ou te

fiafia ia te oe.” E ui e le‟i agasala lo tatou Alii o Iesu Keriso, a ua avea le papatisoga ma faailoga

o le fanau a le Atua o i le lalolagi.

Ioe, o loo tatou molimauina pea lea sakarameta paia i taimi o le Lotu a Tamaiti ma isi aso Sa

ua atofaina e le faifeau e faataunu‟u ai le papatisoga. E ui o fanau-iti o loo papatisoina, a ua avea

lava lea ma faailoga o le faamamaina ma le ofi mai e fai ma fanau a le Atua i totonu o lana

Ekalesia. Aua la ne‟i mama ia i tatou le fanau le sakarameta o le papatisoga, ua faailogaina ma

vavaeeseina mai i tatou ua ta‟ua o fanau a le Atua i totonu o lana Ekalesia. O le faamoemoe ua

faailogaina ai i tatou uma ua papatisoina, ina ua faamamaina i le salamō ma le faatuatua moni i le

Talalelei lea na afio mai ai le Atua i le lalolagi e ala i lona Alo pele e toatasi.

O le faailoga e faatasi ona faatinoina, o lona uiga e le gata i le faamamaina, salamō moni,

talitonu ma faatuatua i le Faaolataga, a ia tumau ma ola ai e le aunoa. O le Sakarameta paia e

faatasi ona o‟o i ai le tagata talitonu ma le faatuatua, ae faavavau le faamau faailogaina o lana

fanau ua moni lona ofoina atu mo le Atua. Ia manatua ua papatisoina le toatele o outou le fanau,

o le faailoga taua o le tagata ua salamō moni ma ua talitonu ma faatuatua i le Atua e faavavau.

<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>

16

IANUARI 27, 2019 „ASO SA O TUPULAGA‟

MATAUPU 15: UA FILIFILIA E IESU ONA SO‟O (Jesus chooses His diseples).

TUSI FAITAU: LUKA 5: 1 – 11 SINI: Ia malamalama le fanau i ala na filifilia ai e Iesu lona áu so‟o.


O le tala o lenei taeao pei ona faamauina e Luka, le fou amata o le galuega tala‟i po o le

misiona faaola na afio mai ai Iesu i le lalolagi. Na silafia e le Alii e le o se galuega faigofie ma e

ao ona saili nisi e fesoasoani ia te Ia. O lea na filifilia ai e Iesu tagata e sefulu ma le lua e avea

ma ulua‟i so‟o o le Talalelei pei o le molimau a Luka. O le uiga o le upu so‟o; “o le ua mulimuli i

a‟oa‟oga ma ola i mataupu a le ua avea ma Matai o lea galuega.”

O le to‟a 4 muamua pei ona faitauina i lenei taeao, o áu uso e to‟alua ma o tagata fai faiva i

latou. Fai mai le tala ina ua lolofi ane le motu o tagata e fia faalogologo ia Iesu ma ana a‟oa‟oga,

ona faaaogaina lea e le Alii o le vaa o Simona ma lona uso e fai ma pulela‟a mo le motu o tagata.

O se faamanatu taua foi lea mo le au faalogologo i le Upu a le Atua, e le gata e maua i taimi uma

a e maua foi i soo se mea. E le na o le falesā e tu ai se pulela‟a, auā e i ai le Atua i mea uma.

Ua faaauau le tala ina ua uma le lauga a le Alii i le motu o tagata, na fāliu ane loa ia Simona,le

fai faiva mo i‟a o le sami. Ua fetalai atu, “se‟i tu‟utu‟u atu i le loloto ma tu‟u ifo ai le upega e

maua ai ni i‟a”. A ua fai ane Peteru ia te Ia, “le Alii e, ua alu le po atoa o matou tigaina ai, a ona

o lau fetalaiga ou te tu‟u ifo ai le upega.” Ina ua uma ona latou faia o lea mea,na tau fai ofo i le

tele o i‟a na latou maua. Ua fai atu Peteru i le Alii ina ia maliu ese atu Ia ma i latou ina ua tau fai

ofo i lenei vavega ua faia. A ua fetalai o Ia ia Peteru, “aua e te fefe, e amata i nei ona po ona e

maua o tagata.” Ua avea ai Peteru ma Anetere‟a ma le fanau a Sepetaio o Iakopo ma Ioane o

ulua‟i so‟o o le Alii, ua latou tu‟ua le fai faiva mo i‟a, a ua avea ma fai faiva mo tagata. Fai mai,

ua tuta o latou va‟a, ona latou tuu ai lea o mea uma, a e mulimuli atu ia Iesu.

Ioe ua mana‟omia e Iesu ni so‟o moni e fesoasoani faamaoni i le galuega tala‟i ma le misiona o

le faaolataga i lenei lalolagi. O le so‟o e fiafia e faalogo ma usita‟i i le si‟ufofoga o le Matai o le

galuega. O le galue faamaoni i taimi uma ma e le faavaitauina lona ola ofoina atu. O le so‟o e

iloa lona faatauva‟a ma tulivae i le Alii ina ua faamaulaloina lona loto mai ana agasala. O le so‟o

ua tu‟ua mea uma o lenei olaga, lona tagata tuai ma le olaga na fiafia i ai, a ua mulimulita‟i ma le

faamaoni i le Matai o le galuega, auā ua molimauina faamanuiaga o faiva o le Alii e faavavau.

<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>

17

FEPUARI 03, 2019

MATAUPU 16: O LE ULUA‟I VAVEGA NA FAIA E IESU (The first miracle by

Jesus).

TUSI FAITAU: IOANE 2: 1 – 12 SINI: Ia malamalama le fanau e i ai le mana fai vavega o Iesu.


O le tala moni i le mea na faia e Iesu e faaalia ai le mana fai vavega o le Atua lona Tamā i le

lalolagi. E faailoa ai le mata‟utia, mamana, malosi ma le pule uma lava a le Atua o le lagi ma

lenei lalolagi. O le itu- Atua lea o le Keriso (Divine Nature of Christ), pei ona taumafai le au-

faievagelia e tau faamatala mai le liu-tino tagata o le Atua e ala mai ia Iesu. E le o se malosiaga

faa taulaitu – po se se isi mana o agaga leaga, a o le mana fai-vavega o le Alo o le Atua ua faaalia

ina ia talitonu le lalolagi ua auina mai o Ia. E faailoa ma faamanatu i o tatou tagata le Silisili ese,

le mamalu, le mana ma le malosi uma lava e a le Atua ia.

E ui o se tala masani le vavega muamua na faia e le Alii, a e tele lava ni a‟oa‟oga taua e maua

mai ai. Pei ona amata muamua i totonu o le aiga, auā o le ulua‟i vavega na amata e le Alii i

totonu o lona lava aiga. I le faaipoipoga a le tama o le aiga o Maria le tinā o Iesu. O aiga e tatau

lava ona lotolotoi ai Iesu po o le Atua, auā o le olaga e le asa ma ni fitā po o ni faafitauli e tula‟i

mai i soo se faamoemoe. E manatua ai upu a le pese o le Aoga Aso Sa; “a i ai Iesu i se aiga, aiga

fiafia, ae a leai Iesu; o se aiga faamisa.” Ioe, a i ai Iesu i se aiga e leai ni fitā ma ni faafitauli e le

mafai ona fofōina; ae a leai Iesu ua tumu le aiga i fitā ma faafitauli e lamatia ai le soifua.

E faamanatu mai foi i o tatou tagata le eseese o taimi ole tagata ma ituaso o le Alii. Pei ona

tali atu Iesu i lona tinā „e le‟i o‟o i lo‟u ituaso‟ ina ua logo atu ua uma le uaina o le faaipoipoga. E

taua foi le tau-logologo ma le faamanatu a le tinā, aemaise le tautatā pea i le Alii i taimi e

faaletonu ai se faamoemoe. Auā o iinā e faaalia ai le mana o le Agaga o le Atua pe a tatou saili

ma le faamaoni i le Alii i o tatou olaga. E ao foi ona talitonu le tagata i le mata‟utia ma le Silisili

ese o le Atua, na te fofoina soo se faafitauli pei ona liliuina le vai e avea ma uaina sili ona lelei.

O lea foi se faamanatu ia i tatou le fanau, o loo ta‟ua e le Tusi Paia o vavega tetele na faia e le

mana fai vavega o le Atua. Peita‟i, e ao lava ona tatou talitonu ma manatunatu mamafa i ia

vavega pei ona faailoa mai. Auā o iinā o lootaoto ma faaalia ai le Silisili ese, mata‟utia, malosi

ma le mana uma lava o le Atua o loo tatou talitonu ma tapua‟i i ai. O se tala fiafia foi lea mo le

au faatuatua, e leai se mea e lē mafaia e le „mana‟ fai vavega o le Atua i o tatou aiga.

<<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>

18

FEPUARI 10, 2019

MATAUPU 17: UA VAVAO E IESU LE MATAGI (Jesus calms the Storm).

TUSI FAITAU: MATAIO 8: 23 – 27 SINI: Ia malamalama le fanau e faalologo ma usita‟i mea uma i le Alii.


O le tasi foi lenei o vavega po o mea ofoofogia na faia e le Alii a‟o i ai i lana misiona faaola i

le lalolagi. E ui e foliga eseese tala a le au Sinopi i le mea na tupu, peitai o loo taula uma ia

faamatalaga i le manulauti e tasi. E pei o loo faaalia ai le mana o le Alo o le Atua ma i le taimi

lava lea e tasi o loo tofotofoina ai le talitonu o lona au soo. Auā o le faatuatua e taele ai le soifua

ma le ola faa le-kerisiano. E faalologo mea uma na faia i Lē na faia i latou e oo foi i le tagata.

O le tala manino pei ona faamauina e Mataio, „na maliu ae Iesu i le vaa, ona mulimuli atu ai

lea o ona so‟o‟.O lona uiga e le‟i tauanaua e le Alii, ae na mulimuli i le Matai ma le loto

fuatiaifo.O le loto ua malie e avea so‟o moni o Iesu, a e galo ai o le galuega e o mai faatasi ma le

tele o fitā ma faigatā o le soifuaga neie tusa lava po o le i ai o le Alii i se faigamalaga. O le

faamanatu a Iesu e i ai pea fitā i soo se faigamalaga ma e tutupu pea liu i totonu o soo se vaa a‟o

fai-malaga. Ae ao ona mautinoa o loo malaga faatasi ma le ta‟ita‟i malaga-sili. O Le na te mafaia

mea uma ma e leai se mea e faigatā pe a tatou faataga le Alii e tautai la tatou folauga.

O le avea ma soo, o le mulimulita‟i lea i le Alii i soo se faigamalaga ma e ao ona faalogo ma

usita‟i i ana a‟oa‟oga. O le mafutaga e faatupulaia ai le ola faatuatua ma le faalagolago o le soo i

le Matai o le galuega. Ia faimalaga faatasi ma lou Alii aemaise le ola mautinoa ma le talitonu o

loo lotolotoi faatasi le Tautai i la tatou faigamalaga. E leai se mea e popole pe atuatuvale ai le

tagata malaga, a e tau ina talitonu ma faatuatua e mafaia e le ta‟ita‟i malaga ona vavao i soo se

matagi po ni afā tatou te fetaia‟i pea i lenei olaga o puapuagā.

Ia to‟a pea le áu peau i le Alii, o lona uiga ia faalagolago ma faatuatua e mafaia e le mana fai

vavega o Iesu ona vavao le matagi ma faa-malūina le sousou o le sami.Auā e faalologo mea uma

na faia e le Alii, e oo foi i le tagata na te mafaia ona vavao ma faa-to‟a se matagi pe a lava ma

maua‟a le faatuatua i le Atua. Ioe, o le faamanatu foi lea mo le so‟o e mulimulita‟i ma talitonu i

lona Matai, na te mafai ona vavao i le matagi ma faa-nofo filemū se faigamalaga ua fetaia‟i ma le

sousou o le tai. E mafai ona vavao atu i soo se faafitauli pe a tula‟i mai i totonu o aiga, nu‟u ae

maise le ekalesia, pe afai e maua‟a ma tele lo tatou faatuatua i le Atua o manuia.

<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>>

19

FEPUARI 17, 2019

MATAUPU 18: O LE FAFAGAINA E IESU O TAGATA E LIMAAFE (Jesus feeds

5000 people).

TUSI FAITAU: MATAIO 14: 13 – 21 SINI: Ia malamalama le fanau o le mana fai vavega o le Atua na mafai ai e

Iesu ona fagaina le limagaafe o tagata.


O loo tuu faasolo pea tala i nisi o vavega tetele na faia e le Alii a o i ai i lenei lalolagi. O le

tasi nei o mea ofoofogia na faia e Iesu, o le fagaina o le motu o tagata i nai mea ái iti na maua. O

loo faailoa atu o Iesu o le Alo o le Atua Soifua, ua tu‟uina ia te Ia le mana e fai ai vavega tetele

ina ia talitonu tagata ia te Ia. Na liu-tino tagata le Atua e ala ia Iesu Keriso (human nature), e i ai

foi lona itu Atua (divine nature). E tatau ona malamalama la tatou vasega i natura ia e lua o le

Alii, nei fesiligia pe se tagata vavalo po o se faataulaitu o Ia. Auā afai ua na o lona itu-Atua, e

manatu foi nisie le‟i lagonaina e le Alii tigā ma puapuagā na oo ia te Ia i le lalolagi.

O le tasi lenei o tala ofoofogia na molimauina e le au-faievagelia ona o le mana fai vavega o

le Alo o le Atua. E pei o se tala faafagogo, a e o le mea moni na tupu na fememea‟i ai le au so‟o

ona o le manatu i le to‟atele o le motu o tagata. O le molimau a Mataio, pe limagaafe o tane, ae le

faitaulia ai fafine ma tama iti. E talitonu o ala o le Alii, le tata‟i ane o le motu o tagata i le mea

tu‟ufua ina ia latou vaavaai ma molimauina le mana fai vavega o le Alii o loo autū i ai lo latou

faatuatuaga. Auā o fea o le mea tuufua e maua ai ni mea ái e fafaga ai le 5000 o le motu o tagata,

ae pe a lava foi ona o le to‟atele.

E fai mai le tala a Mataio, ua na o nai areto e limagafua ma i‟a e lua lau. A ua fetalai atu le

Alii e avane ia te Ia, se‟i fai i ai se vavega. Ua fetalai atu o ia i le motu o tagata ia latou taooto i le

mutia. Ona tago lea o Iesu i areto e limagafua ma i‟a e lua lau, ua tepa a‟e i le lagi, ua faafetai ma

ua Ia tofitofi ma avatu i lona au-soó. O se mea ofoofogia o le to‟atele o le motu o tagata, a ua

maoóna i nai mea ái iti ma na totoe ato e sefulu ma le lua o ato tutumu ina ua uma ona latou áai.

E tele vavega na faamauina i le Tusi Paia e ao ona malamalama i ai le fanau. O le faamanatu

ma o loo faailoa ai le mata‟utia, le malosi, le silisili ese, le mamalu ma le pule uma lava a le Atua

na faia ai mea uma o lenei olaga. E tatau ai ona mitamita le kerisiano i tala pei o lenei vavega na

faia e le Alii, tatou te faailoa atu ai e lē o se tama‟i atua lea tatou te ifo ma toéle i ai, a‟o le Alii

malosi e fai mea mafai ma e leai se mea e le mafaia e lo tatou Atua.

<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>

20

FEPUARI 24, 2019

MATAUPU 19: O IESU O LE ALA, UPU MONI MA LE OLA (Jesus is the Way, the

Truth and Life).

TUSI FAITAU: IOANE 14: 1 – 7 SINI: Ia malamalama le fanau o Iesu Keriso o le Alo o le Atua ma ua na o Ia

o le „Ala‟, „Upu Moni‟ ma le „Ola‟.


E faapefea ona tatou sao i le Lagi? O le tasi nei o fesili taa tele i mafaufau ma lagona o tagata

e manaomia ai se tali mautinoa. O le tala o lenei taeao o loo fetalai manino ai Iesu, “E tele mea e

nonofo ai i le maota o lo‟u Tamā, ana leai po ua ou alu e sauni se mea e nonofo ai outou (f. 2).”

“Afai foi ou te alu ou te toe sau, ou te talia foi outou ia faatasi ma a‟u; ina ia i ai outou i le mea

ou te i ai a‟u.” Ua fetalaiatu le Alii, “Ua outou iloa foi le ala i le mea ou te alu i ai.” Ua fai atu

Toma ia te Ia, “matou te lē iloa, pe faapefea ona matou iloa?”

O lo‟o talanoa Iesu i le lagi po o le nofoaga e alu i ai le tagata pe a uma lenei olaga. E foliga mai

o le nofoaga lea po o le lagi o le mea alofa a le Atua mo le tagata talitonu. Peita‟i e ao ona sa‟o

ma tonu le ala e ui atu ai pei ona manino i le fetalaiga a le Alii i lenei mataupu; „o a‟u nei le ala‟ i

le lagi po o le nofoaga ua saunia e le Atua mo le tagata talitonu. O lona uiga o mea uma na faia e

Iesu o faata‟ita‟iga sili ia mo le soifua e tatau ai o le tagata kerisiano. Ua faailoa mai e le

mataupu lenei, o Iesu na savali i ala e tusa ai ma le finagalo o lona Tamā o i le lagi. Afai e le iloa

e le tagata Iesu, o lona uiga ua le iloa e lenā tagata le „ala‟ e tau atu i le Atua le Tamā o i le lagi.

Ua toe faamanatu e Ioane le foi o le Atalii i lona Tamā i le nofoaga e pei ona saunia mo le tagata

faatuatua. A‟o se tapenaga a le tagata mo le sao atu i lea nofoaga, e leai se isi „ala‟ nai lo le

faataítaíga na tau áao mai e Iesu i le lalolagi. O le tali lea e pei ona aumaia e Ioane i le fuaiupu e

6, „O Iesu o le Ala, le Upu Moni ma le Ola,‟ o Ia o le Upu Moni ma le Ola auā ua na o Ia o le Ala

i le Atua (o le Upu Moni ma le Ola). Ua na o le pau lava lea o le „Ala‟ mo soo se tagata ma soo

se augā tupulaga e sao ma oo atu ai i le lagi le nofoaga ua mae‟a tapena e le Atua mo lana fanau.

O lea foi se faamanatu mo oe ma a‟u o loo ola ma outou soifua pea i lenei lalolagi. Ua mae‟a

ona tapenaina e le Atua le nofoaga mo le tagata talitonu i lona soifua na ofoina atoa mai mo le

lalolagi o tagata. O le soifua na puapuagatia ma maliu ai, peitai na toe soifua manumalo mai le

oti ma le tuugamau ona o le tunoa o lona alofa mo le tagata agasala. O Iesu Keriso ua na o ia o le

„Ala‟, i le ola e faavavau ua saunia e le Atua mo lana fanau faatuatua.

<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>

21

MATI 03, 2019

MATAUPU 20: INA TUU MAI IA O TAMAITI E O MAI IA TE A‟U (Let the little

children come to me).

TUSI FAITAU: MAREKO 10: 13 – 16 SINI: Ia malamalama le fanau e fiafia le Atua i tamaiti auā e le gata i le

mamā o latou loto a‟o le faalagolago ma faamoemoe atu ia te Ia.


E faapea se manatu i le tele o matua ae maise tagata matutua e faatatau i faanau iti. E faasasā

ma tulituli mamao tamaiti pe a i ai ni malō po o ni tagata faaaloalogia i totonu o se fale. Atonu e

mapuna mai i la tatou aganu‟u, e pei o tala i alofi o soo se nu‟u e le mafai lava ona latalata ane i

ai ni tamaiti. E talitonu foi se manatu e faapenaina lagona o le au soo ina ua tu‟u ane tamaiti i le

Alii, ua latou vavao atu i e na amaia. E pei ua alia‟e ai se manatu e lē atuga pe feagai tamaiti ma

le tupu o tagata Iutaia. O le vaai maulalo e taa tele foi i o tatou tagata, faata‟i e loloto le silasila a

Iesu nai lo le papa‟u o le tai nenefu lea ua masani ai le vaai a le au soo ma le tele o tagata.

Fai mai Mareko ina ua silafia e le Alii le mea ua tupu, ona tigā tele ai lea o lona finagalo. Ua

mana‟o Iesu ina ia tuu mai tamaiti se‟i fai atu ai se a‟oa‟oga mo le au soo, ta‟ita‟i o le lotu Iutaia

ae maise le au faalogologo. E taulia foi tamaiti i le Malō o le Atua. O lea na faatuina ai e le Alii

le tamaitiiti i o latou luma ma fai atu; “Ai se le talia le Malō o le Atua faapei o se tamaitiiti, e lē

sao lava o ia i ai.” Ioe, ese le faamaoni o le alofa o le Atua i lana fanau e tutusa ai tagata uma i

lana silafaga. Ua le gata i le faae‟e o ona áao i luga ia i latou, a ua Ia faamanuia atu foi i le fanau.

O le manatu o le mataupu mai faata‟ita‟iga a le Alii, ua Ia faatauaina ai soo se tagata e oo foi i

tamaiti. A o se manatu laualuga ina ia maua le ola pei o le tamaitiiti, e le gata i le soifua mamā

a‟o le faalagolago i matua po o le Alii i taimi uma. O le finagalo lea o le Atua mo lana fanau, ina

ia faalagolago ma faamoemoe atu ia te Ia i taimi uma e le aunoa. O le tasi o mafuaga e lē sao atu

ai le isi i le Malō o le Atua ona o le sese o le mea po o le tagata o loo faalagolago i ai, ia ma le

tele o le éleelea ma le palapalā o le loto, e sili mamao ai le tamaitiiti.

Aua le manatu outou le fanau iti ua lē amanaia outou, e fiafia ma manatu mai foi le Atua ia te

outou i taimi uma. O le aogā ma le tāua lea o Aoga Aso Sa ma Au Talavou, e faasoa ai lagona

ma manatu o outou le fanau iti. Aua tou te manatu ua le amanaia outou i taimi o sauniga tele a le

ekalesia ona o le leai o se avanoa mo outou, auā e maua pea avanoa lelei e saunia e lo outou

Tamā o i le lagi. Ia manatua e sili le ola faalagolago i le Atua ma le ola faapaiaina o tamaiti.

<<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>

22

MATI 10, 2019

MATAUPU 21: O LE ATALI‟I FAAMAUMAU ÓA (Parable of the Prodigal Son).

TUSI FAITAU: LUKA 15: 11 – 32 SINI: Ia malamalama le fanau i le tunoa o le alofa faa le Tamā o le Atua, e

tusa lava pe soona ulavale le atalii, a e tonu lana faamasinoga.


O le tala ua lauvivilu ai le fanau, atonu e lē tau faamatalaina lenei faataoto e pei ona saunia e

le Alii. O le tala ua lau-iloa i le igoa lea „O le atalii faamaumau óa.‟ E le o aveesea ai le taua ma

le autū o lagona na saunia ai e le Alii lenei faataoto pei ona molimau Luka i le tusi faitau o lenei

taeao. O loo oga-totonu o le ata le tamā ma ona atalii e to‟alua, e foliga lava e autūi le ui‟i

faamaumau óa lenei faataoto ona o loo faaulutala ai le mataupu. A o totonu o le tala o loo faailo

ai e le Alii le tunoa ma le lē faatuaoia o le alofa o le Atua i lana fanau.

E pei ona faamatala mai le Feagaiga Tuai i le lē usita‟i ma le sese soo o le nu‟u o Isaraelu i le

feagaiga ma lo latou Atua. O lea foi ua vaaia i le au Iutaia i le Feagaiga Fou ma le Atua lava lea e

to‟atasi. Ua faaaogaina ai e Iesu le tamā ma le tutusa o lona alofa i ona atalii e to‟alua. O le tala i

le ui‟i pei ona malamalama ai, o le ola ua le tatau ma o le atalii ua mana‟o e vavae ese lona ola

mai le aiga ma lona faasinomaga. O le soifua o le tagata ua mana‟o i le pule i ana lava mea ma ua

pei ua oti le tamā i lona olaga. E ui ina faigata ma le lē usita‟i o le atalii faamaumau óa, ae na

tamo‟e lava le tamā i fafo e faafetaia‟i ina ua toe fo‟i mai i le aiga. Ua galo le leaga ona o le tele

o le alofa ma ua latou fiafia ona o le atalii na se a ua toe maua, na oti foi a ua toe ola mai.

Ua aumaia foi e le Alii le isi amio taa-tele i o tatou tagata e pei ona faatino e le ulumatua. Ua

faapito ona lagona mo ia lava ma ua le maua le loto faamagalo atu i lona uso na sē a ua toe foi

ifo, na oti a‟o lea ua toe ola mai. Ua le iloa se uso ona ua punitia mata i le manatu faapito ma le

alofa mo ia lava. O isi ua faatusa le ui‟ii tagata o nu‟uese e agasala a e tausaili le faaolataga,

peita‟i le ulumatua ua atagia mai ai le au Iutaia manatu faapito i le Atua. O le tele o le au mapo

lotu ma le áu Iutaia ua manatu o le faaolataga ua na o i latou ua ta‟ua o le fanau a le Atua.

Ioe, e tuu avanoa pea le Atua peita‟i, e faamaoni lana faamasinoga mo lana fanau. E

mutimutivale le alofa ma faula‟i pea lona agalelei, a e tonu ma moni ona ala mo oe ma a‟u. E lē o

le manatu faapito le Atua i le atalii faamaumau óa, peita‟ie sili atu le manatu o le Tamā i le

mamoe na se a ua toe foi mai i le Atua. O loo faailo le tunoa o le alofa o le Tamā mo le lalolagi

atoa, e ui lava ina femoumoua‟i ma tatou agasala pea; e tumau lona alofa e oo i le faavavau.

<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>

23

MATI 17, 2019

MATAUPU 22: O E GALULUE I LE TOVINE (The Workers in the Vineyard).

TUSI FAITAU: MATAIO 20: 1 – 16 SINI: Ia malamalama le fanau e tutusa uma tagata galulue ma lona taui i le

silafaga a le Atua po o le Matai o le galuega.


O le faataoto i e na galulue i le tovine, o loo a‟oa‟o mai ia i tatou le alofa le faatuaoia o le

Atua e ala i lana faaolataga. Ina ua faa-faigaluegaina e le pule tagata i taimi eseese o le aso, o

lona alofa le faatuaoia na totogi tutusa ai i latou. E foliga mai „e le fetaui (not fair),‟ mo nai

tagata na muamua faigluega i le aso atoa ma le mugalā. A e peitai ua faailoa ane e le pule sa

malilie uma e maua le totogi mo le galuega; ae lei faapea e totogi e tusa ai ma le umi na

faigaluega ai. Ua totogi tutusa e le Matai tagata uma, o e muamua ma e na mulimuli atu.

Ua a‟oa‟o mai ia i tatou e tutusa uma lava le taui o i latou e talia ma talitonu i le faaolataga na

saunia e ala ia Keriso Iesu. Na fetalai foi le Alii “o e na mulimuli e avea ma muamua ao e na

muamua e avea ma mulimuli.” Auā o le faaolataga e le‟i maua e le tagata ona o ni ana galuega

lelei po o le umi foi e galue ai, ae na maua i le tunoa o le alofa lē faatuaoia o le Atua. O loo

faaalia ai foi le pule aoao o le Atua i mea uma na Ia faia e oo lava i o tatou tagata galulue. Ua

atagia ai le masani o le olaga, e galue mo se taui i le taimi a le tagata, faata‟i o le Atua e silasila i

le moni ma le faamaoni o le tagata galue.

O loo faaalia foi le Matai o le galuega, e lē mana‟o e nofonofo pe tutū solo ma faamaumau le

taimi a le Atua. E le‟i mapu foi ona Ia asia le galuega auā na te lē tuufau lana áu fai-galuega i isi

tagata galulue. O le Matai e finagalo ia galulue tagata uma e manuia ai le ola. E laualuga ai lona

manatu ia tau lava o le faamaoni o le galue e taui lava e tusa ai ma lana galuega. E ui ina manatu

le toatele i le lē fetaui o totogi ua avane e le Matai, e le‟i suia ai lana faai‟uga na faia ma le

manino. Fai mai a ia, “e te faau‟ū ea ou mata ona o lo‟u agalelei,” a tu‟u i se isi faaupuga; e te

pule ea i lo‟u alofa? Ua silafia lelei e le Alii natura o tagata Iutaia o lona vaitau, ua latou

manana‟o e maua filemū le faaolataga ma ua manatu faapito mo i latou lava.

O lea foi se a‟oa‟oga mo i tatou le fanau, aua le masani e galue mo sou taui. Ae maise galuega

faa-le ekalesia pei o fai-aoga Aso Sa, ta‟ita‟i o Autalavou, aufaipese ma isi punavai e le totogia ia

galuega peita‟i e fai ma le loto atu o loo silafia e le Atua. Ia saili muamua le Atua ma lona

finagalo, ona faamanuia lea ma maua le lumana‟i manuia tatou le fanau mai le Alii.

<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>

24

MATI 24, 2019

MATAUPU 23: O LE ATUA O LE LEOLEO MAMOE LELEI (God is the good

Sheperd).

TUSI FAITAU: SALAMO 23: 1 – 6 SINI: Ia malamalama le fanau o le Atua o le Leoleo Mamoe sili ona lelei.


O le isi lenei o tusi faitau sili ona lauvivilu ma faaaogā soo e le toatele o le au faitau. O le tasi

o Lau Salamo iloga a Tavita ua lagi faa-pese e le auauna ua mansani i le faiva o le leoleo mamoe

e pei ona sa feagai ai a‟o talavou. O le faiva e le faigofie le leoleo mamoe, auā e fetaia‟i pea ma

fili ma faigatā o le ala. O le tasi o galuega po o faiva ua faatusa i ai le Atua e le fai-Salamo. Ua

faatusaina le Alii o le Leoleo mamoe sili atu nai lo leoleo mamoe a le-tagata.

O le Salamo o loo faailoa mai ai le faalagolago po o le faatuatua o le tagata i tausiga (caring)

a le Atua. O loo faalagi ai le tausiga a le Leoleo mamoe sili e leai se mea e mativa ai le mamoe.

O le Atua fai mea sili mo le tagata e mulimulitai ma anaana i ana poloaiga ma tulafono. E ta‟ita‟i

ma faataoto i mea lafulemū ina ia maua le soifua malosi ma saogalemū i taimi uma. O le Leoleo

mamoe e malosi ai le loto o le mamoe, fai mai e tusa lava pe asā le vanu o le ata o le oti e le fefe

auā ua manino i le malu puipuia ma áao lavea‟i o le Leoleo mamoe lelei.

E leoleo e le Atua tagata uma e oo lava i tamaiti ma tagata mama‟i. O le leoleo e o‟oo‟o lana

puipuiga i soo se tafa o le vao-matua ma toáfa. Ua ta‟ua o le Leoleo mamoe lelei auā e tutusa ia

te Ia le lafu atoa. E tuúa e Ia le lafu ae alu e saili le mamoe ua lē iloa seia maua. E faatauaina e le

Leoleo mamoe lelei mamoe e mulimulita‟i ia te Ia ma faalologo i lona si‟ufofoga. E mataála le

Leoleo mamoe lelei i lana tausiga ae maise na te ta‟ita‟i le lafu i ala o le amiotonu. O le Leoleo

mamoe Sili e malilie ai mana‟oga o lana lafu, e iloa foi e mamoe lona si‟ufofoga.

E faalagolago ma faamoemoe le lafu mamoe i le ta‟ita‟iga a le leoleo mamoe i taimi uma. O

le Leoleo mamoe lelei fai mai e faa-sili ia te Ia le lafu nai lona ola. E pei ona fetalai Iesu i le

molimau a Ioane 10:11; „O a‟u le leoleo mamoe lelei. E tuu atu e le leoleo mamoe lelei o lona

ola mo mamoe‟. Fai mai upu faai‟u a le fai-Salamo, “e moni e mulimuli mai ia te a‟u le agalelei

ma alofa i aso uma o lo‟u ola; ou te nofo foi i le fale o le Alii i aso e tele lava.” O faamanuiaga e

maua e le tagata e faalogo ma usita‟i i le Leoleo mamoe Sili. Ia iloa ma malamalama le fanau i

lumana‟i manuia e foa‟iina ma taumulimuli i ai le agalelei ma le alofa o le Leoleo mamoe Sili. E

ao lava ona soifua ma ola e tatau ai i le finagalo o le Atua o Ia o le Leoleo mamoe

25

sili.<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>

>>>

MATI 31, 2019

MATAUPU 24: O LE ATUA O LO‟U LAFITAGA (God is my Fortress).

TUSI FAITAU: SALAMO 18: 1 – 6 SINI: Iailoa e le fanau e sulufa‟i le tagata i le Atua e malu puipuia ai.


O le tasi lenei o natura vaaia o le Atua, o le lafitaga e malu ai le tagata pe a lafi mai fitā ma

ona fili. O le lafitaga e sulufa‟i atu i ai le tagata pe a oo mai fili ma faigatā o le olaga nei. O le

lafitaga la e tatau ona mautū ma malosi ina ia malu puipuia mai ai le tagata e sulufa‟i atu i ai. O

se nofoaga e malosi ma faigatā ona satia e le fili. A o lea ua faatusa e le fai-Salamo le Atua o le

„Lafitaga‟ mo le tagata puapuagatia. E tatau ona fiafia le tagata sulufa‟i ma le mautinoa i le

malosi ma le mana uma lava o lona lafitaga. O le tagata e vaivai ma faatauvaa ae sulufa‟i i le

Atua e malu puipuia ma maua ai le ola, auā e ou le malosi ma le mana uma lava.

E i ai le upu a le atunu‟u e faapea, „e leai se tagata e tu faa-mauga i taimi uma‟. O le manatu e

le malosi pea se tagata i taimi uma o lenei olaga, a e i ai le taimi e vaivai ma pa‟ū ai. O lona uiga

e tatau ona i ai se isi malosiaga e sulufa‟i i ai ina ia malu puipuia ai le soifua ma le ola. Peita‟i, ua

faalagolago ma faamoemoe le tagata i lona malosi po o lona iloa ma le poto e mafai ona sulufa‟i

ma malu ai pe a osofai‟a e le fili. O le tele lea o le soifua maumau ona o le sesē o lafitaga o le

tagata sulufa‟i, ua manumalo ai le fili ma le ti‟apolo ona e malosi atu i se iloa po o se malosi o i

le tagata. Ua moni ai le fai-Salamo, „ua na o le Atua e tonu ma malu ai le tagata mai togafiti ma

mailei a le ti‟apolo,‟ e le gafatia e se iloa ma se malosi faa le-tagata.

E tele upu o loo faatusa i ai e le fai-Salamo le Atua o Ia o le „malosi, lo‟u papa, lo‟u ólo, o

lo‟u Faaola ma lo‟u talitā, ma le nifo o lo‟u olataga ma lou ólo maualuga. E sa‟o uma ia faa-

lagiga i le Atua auā o Ia o le Lafitaga i taimi uma mo le tagata. O lona malosi e le mafai lava e se

isi malosi ma o le olo maualuga e le mafai e se fili ona a‟ea pe faatoilaloina. O upu a le fai-

Salamo ua lagi faa pese ona o lona mautinoa i le Atua ua na lavea‟iina o lona ola mai fili ma

mailei a le tiapolo. Ua molimau le fatu-pese i le lelei ma mata‟utia o lona Atua ua fai ma lafitaga.

O natura vaaaia uma ia e fetaui i le Atua, auā na te faa-maluina le tagata mai fitā ma faigatā o

lenei olaga. Ia tatou sulufa‟i i le Atua auā na te puipui i tatou mai mea tiga e pei o faama‟i, o le

26

oge, fia áai ma le galala i le fia inu ma isi lava puapuagā ma mala faa le-natura e oo mai. O le

fiafia loloto o lana fanau, e malu puipuia i tatou pe a tatou faatagaina le Atua i o tatou olaga.

<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>>

APERILA 07, 2019

MATAUPU 25: O LE ATUA O LO‟U MALAMALAMA (God is my light).

TUSI FAITAU: KENESE 1: 1 – 3 SINI: Ia iloa e le fanau o le Atua o le malamalama moni Ia o le lalolagi.


A o tatou i ai i le faasologa o mataupu i le faamatalagaina o le Atua e le Tusi Paia, ua tatou oo

mai i le „malamalama‟ lea ua faatusa i ai le Atua. O le mea na mua‟i faia e le Atua auā sa soona

nunumi o lenei lalolagi i le amataga. O le molimau a le Kenese i upu amata o le foafoaga, ua na

ona „fetalai‟ atu o le Atua ona i ai lea o le malamalama. Fai mai foi le Salamo 27, “O le Alii, o

lo‟u malamalama ia…o ai ea se ou te fefe ai?” Ina ua oo i le Feagaiga Fou, ua faatatau e Ioane 1:

3 lana molimau ia Iesu Keriso o le malamalama moni Ia o le lalolagi.

O upu Eperu o loo faasino i le malamalama i le Feagaiga Tuai o le „or‟ mai le Feagaiga Fou faa-

Eleni - „phō‟; o la uiga lata mai o se mea na te aumaia le iloa, pupula, iila, po o le susulu atu ina

ia faamalamalamaina ai le pogisā. Ae a tatou toe to manatu i le molimau a le Kenese pei ona

aumaia i luga, na mua‟i faia e le Atua le malamalama ae le‟i faia le la, fetu, masina ma nisi mea

latou te aumaia le malamalama i le lalolagi e oo foi i le vavaeina o le ao ma le po. O lona uiga o

le Atua o le „malamalalma‟po o le „ola‟ Ia o le lalolagi, e lē tau faamalamalamaina i isi

malosiaga susulu atu pei o le la ma le masina po se afi foi.

O le mea lea e fia faailoa i le fanau o le Atua o le „malamalama‟, o lona uiga e mafai ona

maua ai le ola, iloa, susulu mai, ma pupula atu mai ia te Ia lava. O le manatu laualuga foi lea o le

mataupu ina ia faalagolago le tagata i le malamalama o le Atua, e aumaia le ola, le poto, le ala e

savali tonu ai ma le iloa e talia ai faaaliga a le Agaga Paia. E foliga e faigofie le mataupu ae o loo

taoto i le faatuatua o le tagata ua taliaina le malamalama moni o le Atua. O le manatu e tau le

faa-malamalamaina le pogisā pe a iloa e le tagata le Atua. O le tagata e iloa ma talitonu i le

malamalama moni o le Atua e maua le ola ma ana faamanuiaga.

E mafai foi ona tatou toe tepa ia i latou o loo tauaso i totonu o le Tusi Paia. A e na

faapupulaina e Iesu ona o le soifua e tusa ai ma le malamalama o le Atua. O le tagata e tauaso faa

le-tino ae o loo pupula mata faa le-agaga, e manino la latou vaai atu i le malamalama o le Atua.

27

Pei ona fai atu tusa po o le tauaso ma le pouliuli ae latou te iloa atu le Atua, latou te savavali lava

i lona malamalama. O le faamanatu taua ina ia tatou savavali pea i le malamalama o le Atua.

<<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>

APERILA 14, 2019

MATAUPU 26: O LE ATUA O LO‟U TALITᾹ (God is my Shield).

TUSI FAITAU: 2 SAMUELU 22: 26 – 34 SINI: Ia malamalama tamaiti e mafai e le malosi o le Atua ona avea ma

talitā, e saogalemū ma malu puipuia lana fanau.


O lenei taeao ua faaaogaina le „talitā‟ e tau faamatala ai nisi natura vaaia o le Atua. O le talitā

pei ona silafia o se tasi o méatau po o se aúpega a le fitafita e faaaoga i le taua. O le tāua o le

talitā e lafi ma álo i ai le fitafita mai mea-tau a le isi áutau. O lona uiga e tatau ona malosi,

agagatā ma malu puipuia ai le tino atoa ma le ola o le tagata tau. E ao foi i le tagata tau ona

faalagolago i lana talitā e lafi, álo ma puipuia mai ai lona tino a‟o malomaloā se taua. O nai aogā

ma agava‟a na o le talitā, e ui ina le mafai ona faatusalia i le Atua, ae mo le mataupu lava ia

tainane le silafia e le fanau i nisi o natura vaaia o lo tatou Tamā.

O lagona foi ia o le tupu o Tavita pei ona tusia i le tusi a Samuelu 22: 31 fai mai, “o le talitā o

Ia i e faatuatua uma lava ia te Ia.” O le fitafita ua masani ma le taua,nate faaaoga tatauina mea

tau e tusa ai ma le taua e tete‟e atu ai le fili. Ua sala i le pese o le tupu ona o le Atua ua mafai ai

ona a‟e malo faiva. O le pese a Tavita ua mautinoa lona manumalo i le Atua, ua malu puipuia ai

lona ola ae maise lana itutaua. O le talitā e malu ma mautinoa ai le tagata faatuatua i le pogai o le

ola. O Le faaolaina le nuu ua tigaina, ua faamalamalamaina ai le pouliuli o le tagata talitonu pei o

upu o le tusi o Samuelu, ua sa‟oloto le ola ua mautinoa ua malu puipuia i áao o le Atua.

O le pese a le fatu-pese ona o le tunoa o le alofa o le Atua, fai mai a Tavita, “e te amio alofa

Oe i le ua alofa; e te amio tonu Oe i e ua amiotonu.” O le tau faamatalaina e le fitafita tau ua

faasaoina le ola e le talitā a le Atua. E oo foi i ona fili o e ua faamaululuga ua silasila i ai le Atua

ma ua faamaulaloina i latou. O le pule áoao a le ta‟ita‟i áu a Isaraelu lele ua fai ma o latou talitā e

sulufa‟i i ai a‟o puapuagatia. Ua faailoa mai e le tusitala, le olaga e le asa ma fitā ma puapuagā e

fetaia‟i pea ma le tagata tau a le Atua. A e ao ona tapena ma sauniuni e tete‟e atu le fili e ala i le

faaaogaina o le talitā ina ia faasaoina mai ai lo latou soifua imailei ma togafiti a le fili.

E mafai foi ona tatou faaaogaina lea talitā e malu puipuia ai lo outou soifua ma le ola i lenei

vaitau. E ao ona faatuatua ma talitonu i le Atua e malu ai i fitā ma faigatā o lenei olaga. Ia avea le

28

Alii ma tali pupuni po le talitā e tete‟e atu ai le malosi o le fili. E ao ona faamasani i le talitā o

lona uiga e tatau ona mafuta e le aunoa ma le Atua e malu puipui ai i fitā o lenei lalolagi.

<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>

APERILA 21, 2019 ASO SA O LAUPAMA

MATAUPU 27: UA SILAFIA E IA LE AAI ONA TAGI AI LEA.

TUSI FAITAU: LUKA 19: 41 – 44 SINI: Ia malamalama tamaiti na tagi Iesu ona ole alofa i ona tagata, auā ua

latou lē iloa le manuia o lana asiasiga.


O le Aso Sa o Laupama ua lauvivilu ai le tupulaga i lona taua ae maise mea tetele na tutupu ai.

O le a taoto ia le anofale o le Aso o Laupama ma leasiasiga ua taua o le Malaga faa-tupu a le

Alii. E pei o masani a tupu o malo ta‟itasi pe a uma ona faau‟uina ona alu lea o lana asiasiga i áai

uma o lona malo. Peita‟i, o le malaga mulimuli lea a Iesu i Ierusalema a e le‟i fasiotia o Ia. O le

malaga na amata i le tumutumu o le maua o Olive pei o le molimau a Luka, na ui atu i le ifoa‟i

ma oo atu ai i le auvae mauga pei ona i ai le tala i lenei taeao.

E talitonu se manatu ua loa ona silafia e le Alii le mea o le a tupu i le áai o Ierusalema, peita‟i

na fia mautinoa ma fia vaai-tino i ai. Fai mai Luka ua latalata atu Iesu i le áai ona tutulu ai lea o

Ia, ua tagi ona e leai lava nisi o faatalia mai lana malaga. O le Alii ua maligi loimata ona o le

alofa i le tauaso o tagata o lona lava nuu ma ua latou le faafeiloa‟ia i lana malaga. O le tupu o

tagata Iutaia na faatalitali i ai soo se Isaraelu, lele ua i ona faitoto‟a a ua le amanaiaina. O le nuu

ua alu le tagata lava ia i ana galuega masani o le aso, ae galo ai le Alii lea ua afio mai i lona

mamalu e asia ona laufanua ma ona tagata.

Ua tagi tautala le Alii ma faapea ane, “Ana e iloa, o oe lava i lenei lava aso, o mea e manuia

ai! A o lenei ua lilo i lau vaai… auā ua le iloa e oe ona po ua asia mai ai oe.”Talofa i le atalii o

le tagata po o le Alo o le Atua ua tu‟ua lona mamalu ma lona nofoalii, ae afio mai i Ierusalema e

fai ma tupu o tagata Iutaia a ua leai nisi e faatalia. O le soifua o le Alii na molimoli mai ai le

faaolatagata a le Atua i le lalolagi, a‟o lea ua le amanaiaina. Sala la i le tutulu o le Alii ona ua

maoaluma le faamoemoe a ua tali tuālimaina e ona lava tagata.

Ioe, ese le leaga pe afai e le taliaina foi e o tatou tagata i lenei vaitau, lona afio mai i o tatou

laufanua. Ia tatala atu lou fale, lou maota ae maise lou loto e asiasi mai ai le tupu o le lagi ma

lenei lalolagi. Ia tatou toe faamanatuina lenei Aso Sa o Laupama ma le fiafia o le Alii i la tatou

faafeiloa‟iiga ma taliaina lelei i o tatou aai ma afioaga ae maise aiga ma o tatou loto. E lē mafai

29

ona faamagaloina pe tatou te aeae i lana faaolataga pe a le taliaina lona afio mai i o tatou loto. Ia

talitonu ma salamo faamaoni i le faaolataga na asia mai ai e le tupu o tupu le áai.

<<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>

APERILA 28, 2019 (ASO SA O LE ESETA)

MATAUPU 28: UA TATOU MANUMALO A‟IA‟I ONA O LE „ESETA‟.

TUSI FAITAU: IOANE 20: 1 – 10 SINI: Ia malamalama tamaiti i lo tatou manumalo a‟ia‟i e ala i le Taeao o le

Toe Tu maio Iesu Keriso po o le Taeao o le Eseta.


O le Eseta po o le Toe Tu e tutusa ia aso i le vaaiga a le áu kerisiano. E pei o le molimau a

Ioane, o Maria le Makatala o le tinā na suia e Iesu lona olaga tuai i se olaga fou. O le ulua‟i

molimau lea o le Toe Tu manumalo o le Alii. O lona valevale alofa i le Keriso o le na mafuta a‟o

le‟i fetaia‟i ma ona puapuaga. O le Alii na sauāina, na puapuagatia ma faasatauroina na maliu ai

lava ma tanumia i le manava o le éleéle, o lea na mafua ai ona usupo lenei tinā e asi lona Matai i

le tuugamau. O le tuugamau foi lele na ofoina ane e Iosefa le Aremataia sa foaina i le papa ma e

le‟i tanuina ai lava se tagata i lea vaitaimi.

E ui i lagona o le fememea‟i ma le lē mautonu atoa ma le faanoanoa ina ua vaaia le ma‟a sa i

le gutu o le tuugamau ua fuliesea. Ua amata ona fefe le tinā ina ua avanoa le tuugamau ma ua

leai le Alii na tanu ai. E lei toe faatuai Maria ma ua momo‟e ma ta‟u atu le tala ia Peteru ma

Ioane pei ona faitauina. O le tala masani i mea na tupu i lea taeao i le tuugamau ua tuufua. Na

pogisā pea i latou i le mea ua tupu, ae na mafuli manatu o le au soo ma Maria, ua aveeseina e nisi

le tino o Iesu. Peita‟i, o le taeao lea o le manumalo o le Alii atoa ai ma le au faatuatua.

E ui ina faigatā ona talitonuina lenei mea ofoofogia o le toe tu mai o se tasi nai e ua oti, auā e

le‟i tupu muamua. Faata‟io le Toe Tu manumalo mai o le Alii o le fatu lea po o le manulautī o le

faatuatuaga a le Au Kerisiano uma i le lalolagi. Ua Toe Tu mai Iesu ma ua manumalo i le oti ma

le tuugamau, o lea ua manumalo a‟ia‟i ai foi ma e talitonu ma le faamaoni i le taeao o le Eseta. O

le Toe Tu o le Alii o le faavae mautū foi lea o le molimau o le Lotu Kerisiano i le lalolagi.

E ao foi ona toe faatutuina i tatou i le faaolataga lea ile Keriso Toe Tu auā ua toe faatuina ai i

tatou o e ua faatuatua i lona maliu ma lona toe tu. Ua mautinoa foi o le oti e le o le i‟uga lea o

mea uma, o loo i ai pea lo tatou lumana‟i i le ola e faavavau. O le taeao o le Toe Tu ua

faamanatuina ai le manumalo o le Alo o le Atua mai le matuitui o le oti ma le tu‟ugamau tu‟ufua.

O lea foi ua tatou manumalo a‟ia‟i pe afai tatou te talitonu ma salamō faamaoni i lona soifua na

30

ofoina atoa mai, na asā puapuagā ma oti ai, na faatautau i luga o le laau mataga, peita‟i na Toe

Tu manumalo mai le oti ma le tuugamau ina ia tatou manumalo a‟ia‟i i le ola e faavavau.

<<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>

ME 12, 2019 „ASO SA O TINᾹ‟

MATAUPU 29: O IESU MA LE FAFINE I LE VAIELI (Jesus and a woman at the

well).

TUSI FAITAU: IOANE 4: 1 – 27 SINI: Ia malamalama tamaiti o Iesu e malie ai le galala faa le-agaga o soo se

tagata e pei o lenei tinā i le vaieli.


I le fou amata o le galuega tala‟i a le Alii pei o le molimau a Ioane, ua amata foi ona i ai ma le

au tete‟e pei o le au faresaio ma tusiupu. O le ala lea o lona tu‟ua o Iutaia a ua aga‟i atu i

Kalilaia. I le f. 4 fai mai, „e ao ona ui atu o Ia i Samaria‟. O Samaria o le laumua o le malo iMatū,

na faatoilaloina e Asuria. E toatele i latou sa ave faa tagata-o-tauainai Asuria, a ua auina mai

tagata o nu‟uese e nonofo ma aumau i le laueleele o le Malo i Matū. O iinā ua tupu ai le fe-

nofoa‟i o tagta Isaraelu ma nuu ese ma ua maua ai le áu afakasi ma suiga o tu ma aga i fanua. Ua

tele le áu toto-lua, o le ala lea na matua te‟ena ai i latou e tagata o le malo i Saute po o Iutaia.

Ua malosi lava le fete‟ena‟i i le va o tagata Samaria ma Iutaia i lea vaitau. Ua oo foi i a latou

tapuaiga na masani ai ona mafuta faatasi i Ierusalema, ua le toe malosi aua ua fai lava nofoaga

tapua‟i o Samaria latou i le mauga o Keresema, a‟o Iutaia o le malumalu o loo i Ierusalema. O

loo taua ai ma le vaieli lenei o Iakopo e latalata i le ala autu mo femalagaiga. Fai mai le tala e na

o le taeao ma le afiafi e o ane fafine e utu-vai i lenei vaieli, peita‟i o lea ua tupu ai le tala i le

feiloaiga a le Alii ma lenei fafine agasala o Samaria.

Na silafia lelei e le Alii le galala faa le-agaga o lenei fafine sa nofo ma ia i le tele o aso. O lea

na amata ai le talanoaga i le aisi atu i le fafine mo sina vai. Atonu ua lagona e Iesu le fia taumafa

i se vai ona ua vevela foi le aso. Ae faate‟ia le Alii i le tali ane a lenei fafine. O le tali i ala o le

tulafono faa le-tagata, „e le mafai ona feavea‟ia mea i le va o Samaria ma Iutaia‟. E le‟i tuua e le

Alii lenei fafine e ola ma ona faaletonu, auā o le anava lea o le Talalelei e mo tagata uma- ua oo

mai lava i Samaria le „Vaiola.‟Na utupupuina e le Alii le ola-galala faa le-agaga o lenei tinā.

O le fafine ua ta‟u atu ma faasalalau solo le tala lelei ia Iesu o le Mesia na valoia e tagata

Iutaia. O le tinā ua pupula ona mata faa le-agaga ina ua tali leleia lona galala faa le-agaga e le

Alii o le ola. Ua útu le galala faa le-agaga o lenei tinā na nofo ma ia i tausaga e tele. Ioe, po o le a

31

le agasala ma le tau tatā i le olaga tuai, e suia e le Alii- manaoga ma le galala o soo se tagata

soifua. Ia maua se avanoa tatou te avatu ai le Talalelei i le lalolagi. Manuia le Aso Sa mo Tinā.

<<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>

ME 19, 2019

MATAUPU 30: E I AI LE ATUA I MEA UMA (God is everywhere).

TUSI FAITAU: SALAMO 139: 7 – 10 SINI: Ia malamalama tamaiti i le tasi o natura vaaia o le Atua, e i ai o Ia i

mea uma.


O loo tatou i ai pea i le tau-faamatalaina o nisi o natura vaaia o le Atua pei ona faa-mataupu mai,

vaganā ai mataupu mo aso faapitoa. O le tasi foi lenei o natura e iloa ai o le Atua e ou le mana, le

malosi ma le mana uma lava, e leai se tasi e faatusatusa i ai. E le mafai foi ona tatou limiti pe

faapumo‟umo‟uina le Atua i so tatou iloa po se malamalama, auā e mata‟utia ma le Silisili ese o

Ia. O le mataupu foi e faaaogaina ai le talitonu o le tagata i le Atua, e mafai ona i ai i soo se mea

pe faapea foi e i ai o Ia i mea uma. O lona uiga po o fea lava tatou te o i ai e tusa lava po o le alu

ifo i seoli, fai mai le Tusi Paia „o loo i ai lava le Atua i mea uma.‟

E pei o la le fai-Salamo na te le mafai ona sola pe lafi mai le Agaga o le Atua. Ua o‟o i tuluiga o

le lagi, ua o‟o lava i seoli o loo i ai foi le Atua auā o le Agaga lava Ia. Ua silafia e le fatu-pese le

mata‟utia o le Alii po o fea lava le maualuga o le lagi ma tuluiga o le sami o loo i ai lava áao

alofa o le Atua i mea uma. E alu ea i fea ai lona Agaga? Ua matuā iso le iloa ma le malamalama

o le fai-Salamo e saili se isi mea e le o‟o i ai le Atua, peita‟i, ua le mafai foi ona sola ai luma o le

silafaga ati a le Alii. E faamanatu mai i o tatou tagata o loo i ai faatasi le Atua ma i tatou e le

aunoa i soo se mea o lenei olaga. E pei o upu masani, „e mafai ona sola ae le mafai ona lafi ai.‟

O le pese a le fatu-pese ua manino i le „silafaga ati‟ a lona Atua. Ua faamatalatala mea uma na

taumafai e sola ma lafi ai ae le mafai. O le i ai lea o le Atua i mea uma, „o le poto lea fai mai, e

maualuga na te le mafaia ona a‟ea.‟ O le áano o le mataupu, „afai e i ai le Atua i mea uma, o lona

uiga e le mafai ona tatou o ese mai ia te Ia i soo se taimi o lenei olaga.‟ Ina ia faia mea uma ma le

faaeteete pe afai o loo i ai lona Agaga i soo se mea. E malie ai le tagata-gaoi pei ona tatou iloa i

se ata po se tifaga; „e tilotilo solo i lalo, luga ma autafa a‟o loo i ai faatasi ma le Agaga o le Atua

i le mea o loo fai ai lana gaoiga,‟ e faato‟ā iloa lava le Alii ina ua maua.

E pei ona fai atu, o se faamanatu taua i o tatou tagata galulue ina ia faamaoni i taimi uma. O

loo silafia mea uma e le Atua pei ona i ai o Ia i mea uma ma taimi uma. Ua tele ina tatou fai i

32

vaaiga faa le-tagata ma faapea ane, „ailoga ua iloa e se isi?‟ O loo silafia e le Atua mea uma, e

leai lava se mea e natia e le lia‟iina i le ala, e leai foi se mea e tau faalilo na te lē silafia!

<<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>

ME 26, 2019

MATAUPU 31: E LE LILIU LAVA LE ATUA (God never Changes).

TUSI FAITAU: Roma 8: 35 – 39 SINI: Ia malamalama tamaiti e lē liliu ae tumau le Atua e oo i le faavavau.


O le tumau po o le lē liliu, o se mea lelei lea mo le tagata soifua. O le mataupu e aoaoina ai fanau

i le tasi o natura vaaia o le Atua o le „tumau lea e lē liliu.‟ E tele lava mea o lo tatou olaga e fai

ma sui, o tagata e faasolo ina matutua, e fai a tatou uo ma o ese atu, e tele foi ina tatou suia a

tatou fuafuaga ma faai‟ugai lea aso ma lea aso. O le olaga e taamilo ma suia ai le taimi, le tai ma

le tele o mea e si‟omia ai le ola o tatou tagata. O nisi o suiga e lelei, peita‟i o le tele o suiga e lē

lelei mo le tagata, auā ua suia mo le leleiga o isi tagata ae galo ai le lautelega o le ola.

O le mataupu o le asō, o loo tau faamatala ai nisi o le uiga po o natura vaaia o le Atua, “e lē liliu

ae tumau,” e oo i le faavavau. O le tasi o natura vaaia o lo tatou Tamā e faamausalī ai lo tatou ola

faatuatua atu ia te Ia. O loo faamatala e le mataupu ni suiga o mea ua tatou masani ma vaaia i aso

fai-soo o le olaga. E pei o suiga o mea óla po o manu, o laau e oo foi i o tatou tagata taitoatasi. E

foliga mai e leai se mea e mafai ona tumau i tulafono o natura o le ola o mea o lenei olaga. O

lona uiga e faigata le tumau i se mea e lē liliu ona ua fai ma masani po o le natura e tutupu o mea

o lenei lalolagi.Peita‟i, ua a‟oa‟o mai le mataupu e ao ona tatou tumau e pei o le Atua e le liliu e

oo i le faavavau.

I fuiupu faai‟u o le mataupu o loo faamanatu mai ai Paulo i le tumau o le alofa o le Atua i o tatou

tagata e le liliu e oo ile faavavau. Fai mai le Aposetolo, “Auā ua ou mautinoa, e le mafaia e le oti,

po o e malolosi, po o mea i nei ona po, po mea atalī, po o le mauluga po o le loloto po o se tasi

mea na faia, e le mafaia e ia mea ona faate‟aeseina mai i tatou i le alofa o le Atua, o loo ia Keriso

Iesu lo tatou Alii.” O le tagata ua mautinoa ma taula i le Atua lona ola, e le mafai ona toe liliu ae

tumau e oo i le faavavau.

O lea foi se faamanatu taua mo i tatou le fanau mai le mataupu, ia taumafai e faalagolago i le

galuega mana a le Agaga ina ia faatupulaia le malosi e tutumau ai i le alofa tunoa o le Atua i o

tatou nuu, aiga ae maise o tatou tagata. E i ai le fuaitau e faapea, “e sui faiga ae tumau faavae,”

33

ioe, o le faavae lena o loo tautala i ai Paulo mo le Kerisiano, o le faatuatua ma ola i le Keriso Toe

Tu. Ia tumau ai ae aua le femoumoua‟i auā e le o liliu le alofa mo oe ma a‟u e oo i le faavavau.

<<<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>

IUNI 02, 2019

MATAUPU 32: E ALOFA LE ATUA I LO‟U AIGA (God loves my Family).

TUSI FAITAU: KENESE 18: 10 – 15 SINI: Ia malamalama tamaiti e alofa le Atua i o tatou aiga.


O le faasinomaga o soo se tagata soifua lava o le aiga, o iinā foi e tupu a‟e ai se moemoe fou i

le ola o le tamaitiiti. E taua tele la i le fanau le ola i totonu o aiga, e talanoa lava tamaiti i o latou

aiga i mea na ola a‟e ai. E ui ina lē mautinoa le eseesega o le anofale o aiga ta‟itasi, ae mitamita

lava ma tau tatā le tama ma le teine i le mea na faa-faileleina a‟e ai. E pei o le loto atoa o le fanau

ua faavae ma atagia ai lea aiga ma lea aiga, a‟o le taua lena o mafutaga i totonu o tatou aiga.

O le mataupu o lenei taeao e faavae i mafutaga e totogo a‟e i le aiga. E faapefea ona

tuufaatasia e le Atua o aiga ina ia alofa le tasi i le tasi. O totonu o se aiga o loo i ai matua ma

fanau, e i ai foi o latou tiute eseese ma matafaioi a le tagata lava ia. Ia a‟oa‟oina le fanau ina ia

malamalama i tiute ma nafa masani i totonu o aiga, o le matafaioi tausi lea a matua. Ia maua le

fetausia‟i ma atagia lava le alofa o le Atua i mafutaga i le li‟o o aiga. E i ai se manatu a mautū

ona toto le fatu lea i fanau i le tuputupu a‟e i totonu o aiga e le mafai ona toe te‟aese ai le tama

ma le teine ua a‟oa‟oina lelei i le alofa o le Atua, e faavae ma totogo a‟e i totonu o aiga.

O le tala masani i le aiga na tatalo ma tali i lagi se tamaitiiti e soso‟o ai le gafa ae maise le

tautoga o faamanuiaga mai le Atua mo nei matua. Fai mai ua matutua i laua (ua 100 tausaga o

Aperaamo a Sara ua 90 tausaga), a e na faataunuuina lava faamanuiaga a le Atua na tauto ai ia

Aperaamo mo se tamaitiiti e fai ma nuu tele ma e uluola lou aiga. E ui ina tau le talitonu le tinā o

Sara, ae na fanau mai lava ia te ia le tama o le folafolaga o Isaako. O le alofa o le Atua na

mulimulita‟i solo ia Aperaamo ma Sara se‟i ma‟ea ona faataunuuina folafolaga ma faamanuiaga

mo lo latou aiga. O le alofa o le Atua e le liliu mo lea aiga e ui lava ina matutua i laua.

O lea foi se faamanatu mo i tatou le fanau, ina ia tautuana lou alofa i lou aiga. Ia manatua ou

matua ma nai ou tei i totonu o lou aiga, auā e alofa le Atua i aiga ta‟itasi. Fai mai foi le pese

masani, “a i ai Iesu i se aiga ua fiafia, ae a i ai satani i se aiga ua faamisa.” Ioe, e alofa tele le

Atua i lo‟u aiga faapea foi ma lou aiga. E le faigofie le ola a‟e i totonu o aiga taitasi auā e eseese,

34

peita‟i ua silafia e le Atua meaalofa mo lea aiga ma lea aiga e tatau ai mo le aso ma lea aso. Ia

manatua, ia matau lou aiga i le Atua ma tali ane i lona alofa pei ona faamanuia ai o tatou aiga.

<<<<<<<<<<<<<<<<<<<<<<<<<<<<<<<<<<<>>>>>>>>>>>>>>>>>>>>>>>>>>>>>>>>>

IUNI 09, 2019 „ASO SA O LE PENETEKOSO‟

MATAUPU 33: UA ÁUINA MAI LE FESOASOANI SILI.

TUSI FAITAU: ROMA 8: 1 – 17 SINI: Ia malamalama tamaiti i le Afio ifo o le Agaga Paia ua avea ma o

tatou Fesoasoani Sili.


O le tusi faitau o lenei taeao, o le tali atu lea i le fesili o loo tusia i le Roma 6: 1. Ae ao pea

ona faamanatu ma faailoa i fanau le va‟aiga na tupu i le aso tonu lenei e pei ona faamatalaina e le

tusi o le Galuega 2: 1-20 ona faato‟ā faamalamalama lea o le mataupu lea. O se tasi o mea o loo

faamanatu atu e Paulo i lana tusi, o le ola i le Agaga, o le ola fou lea ua ia Keriso. I le f. 1-3, o loo

faaalia ai, o e uma ua ola ia Keriso ua lelei i latou ma le Atua ma ua faamamaina a latou agasala

uma.Ua le toe saisaitia foi i latou i tulafono faa Iutaia, auā ua sa‟oloto i latou e ala i le ta‟ita‟iiga

a le Agaga o le Atua. Ua leai foi se malosi o faaosoosoga uma ma ua faaumatia ai le agasala.

O e uma ua talitonu ma faatuatua e ao ona tutumau ai i la le Agaga, a e aua nei toe loto atu i

mea a le tino ma soli tulafono a le Alii. Auā o le atoatoa o le amiotonu a le Atua e maua ina ua

savavali i la le Agaga. O le loto atu i mea a le tino o le oti lea e pei ona fai mai le f. 4-8. E ui ina

nofo aitalafu i tatou i le Agaga, ona ua saisaitia i tatou i tuinanauga o le tino (f. 9-17). A e i ai pea

lo tatou so‟otaga ma le Atua ma ta‟ua ai i tatou o lana fanau moni ina ia tatou faatasi ma Ia i lona

Malo e faavavau. Ua uma ona manumalo ai le Alii Toe Tu. Na Ia faaumatia ai mea a le tino o le

agasala lea, a ua avea ai i tatou ma fanau a le Atua.

O le afio tumau o le Agaga Paia o le Atua i ai tatou ua loto tetele ai ma talitonu, poo a

puapuaga ma faigata e oo mai ma faaosoosoga uma; e le toe mafai ona manumalo i ai tatou. Auā

ua ia i tatou le Fesoasoani Sili o le Agaga Paia lea. O le Agaga ua liua o tatou loto vaivai, a e

faalototeleina i tatou uma. Auā pe faapefea ona tatou toe faavaivai, ua faato‟ilaloina e le Keriso

mea uma ina ia avatu i tatou i lona mamalu ma lona Malo e faavavau.

Pe a tatou toe to manatu i le fetalaiga a Iesu i lona au soo, e o i Ierusalema e faatalitali ai le oo

mai o le Fesoasoani Sili. Auā o Ierusalema lava na saili malosi i ai Iutaia e ala i le malosi fou mai

le Atua. A‟o le au soo o le Agaga Paia o le Atua ua liligi ifo i luga o i latou ma ua faa-

lototeteleina ai mo le galuega. E faapea foi i tatou le fanau pe a tatou maua lea Fesoasoani Sili e

35

le toe vaivai o tatou loto ma tumau i la le Agaga e faavavau. O le Agaga o le Atua e mafuta ma

faamalosia i lo tatou vaivai i tami uma e le aunoa, auā o lo tatou Fesoasoani Sili mai le Atua lea.

<<<<<<<<<<<<<< Manuia Tele le Malologa ma le Tu‟uaga mo le Fanau! >>>>>>>>>>>>>

Documents

AOKUSO 12, 2018 MATAUPU 1: O LE FOAFOAGA (The Creation ...efkasonline.org/data/documents/Vasega-Matutua-Faapitoa-2018-2019.pdf · 2 O le molimau a Kenese, na silasila atu le Atua