VASEGA MATUTUA · 33 Ua u’u e le fafine aao o Iesu i le Suau’uIuni 03, 2018 41 34 Aua ne’i fa’avaivaiIuni 10, 2018 41-42 ... A fua i le tala a le tusitala, e maoa’e ma tulaga

VASEGA MATUTUA TUSI MO FAIAOGA

2017

i

ASO FAASOLOGA O MATAUPU ITULAU

1 Aokuso 13, 2017 O le Atua Foafoa 1

2 Aokuso 20, 2017 O le Atua lo tatou fesoasoani sili 2

3 Aokuso 27, 2017 O le Atua alofa 3

4 Setema 03, 2017 O le taunu’u mai o le Talalelei i Samoa 4

5 Setema 10, 2017 Aua e te tofotofo i le Atua 5-6

6 Setema 17, 2017 Ia vave vala’au i le Atua i ou mafatiaga 6-7

MALOLOGA MO LE LOTU A TAMAITI (Setema 24, 2017-OKETOPA 08, 2017

7 Oketopa 15, 2017 E galo mea leaga ona o le moni o le alofa 7-8

8 Oketopa 22, 2017 Fa’aauau galuega lelei 8-9

9 Oketopa 29, 2017 Toe fo’i i le Atua 10-11

10 Novema 05, 2017 E leai se mea e lilo i le silafaga a le Atua 11-12

NOVEMA 12, 2017 *******SUEGA AOAO*******************

11 Novema 19, 2017 Ia fa’afetaia le Atua e le aunoa (Aso Sa Fa’afetai) 13-14

12 Novema 26, 2017 E i’u vale fanau le ava ma fouvale i matua 14-16

13 Tesema 03, 2017 Ua o’o mai le fa’aolataga 16-17

MALOLOGA MO LE KERISIMASI MA LE TAUSAGA FOU (Tesema 10, 2017- Ianuari 07, 2018

14 Ianuari 14, 2018 E fa’amaoni le Alofa o Matua 17-18

15 Ianuari 21, 2018 O le Atua fa’amanuia. 19-20

16 Ianuari 28, 2018 O amioga e tatau mo le Kerisiano 20-21

17 Fepuari 04, 2018 Ia manumalo i puapuaga 21-22

18 Fepuari 11, 2018 O le fetaia’i ma puapuaga, e a’oa’oina ai tatou i le

fa’alogo i le Atua

23-24

19 Fepuari 18, 2018 O le Atua Fa’amagalo 24-25

20 Fepuari 25, 2018 O le ulua’i vavega na faia e Iesu 25-26

21 Mati 04, 2018 E tāua le Tutū fa’atasi 26-27

22 Mati 11, 2018 Mafuta fiafia i le talisuaga a le Ali’i 27-28

23 Mati 18, 2018 O lo’o fetalai mai pea le Atua 29

24 Mati 25, 2018 O ai ea lenei Ali’i.” (Aso Sa Laupama) 30

25 Aperila 01, 2018 E moni ua toetu o ia.” (Aso Sa Toetu)

31

26 Aperila 08, 2018 E fa’avavau le pule a le Atua. 32-33

27 Aperila 15, 2018 O le vavega na faia e Iesu i Kana i Kalalaia 33-34

28 Aperila 22, 2018 O le vavega i Petesa 34-35

29 Aperila 29, 2018 Ia ola fa’amagalo 35-36

ME 06, 2018 ************SUEGA AOAO********************

30 Me 13, 2018 O le Tinā fa’atuatua mai nu’u ese.” (Aso Sa o Tina) 36-38

31 Me 20, 2018 Tausamiga o le Penetekoso 38-39

32 Me 27, 2018 E o fa’atasi le fa’alogo ma le usita’i 40

33 Iuni 03, 2018 Ua u’u e le fafine aao o Iesu i le Suau’u 41

34 Iuni 10, 2018 Aua ne’i fa’avaivai 41-42

35 Iuni 17, 2018 O Aperaamo le Tamā alofa 43-44

1

Aokuso 13, 2017

Mataupu 1: “O le Atua foafoa’

Sini: Ia mae’a lenei mataupu, ua iloa ma malamalama tamaiti o le Atua lava na ia foafoaina le

lalolagi i lona poto ma lona mata’isau.

Tusi Faitau: Kenese 1: 1-31, 2:1-3

O le taeao lenei o le toe amatalia o aoga aso sa mo lenei tausaga, aemaise le malologa sa

feagai ai. O lona uiga u tatau i lau susuga i le faiaoga ona fa’afeiloa’i lelei i le fanau aoga ina ua

aulia mai lenei taeao fou.

Fesoasoani mo le Faiaoga:

O le mataupu i lenei taeao, o le toe fa’amanatu lea i le fanau le lalolagi na foafoaina e le Atua

i lona poto ma lona mana. Sa a’oa’oina le fanau i le vasega amata ma le laiti i galuega eseese na

faia e le Atua i aso ta’itasi. I lenei aso sa, e toe fia fa’amanatu i le fanau le mana o le Atua na

fausia ai le lalolagi mai le amataga.

O le fuaiupu muamua e o’o i le tolusefulu o lo’o fa’amatala ai silisili ese o le Atua na fausia

ai le lalolagi. A fua i le tala a le tusitala, e maoa’e ma tulaga ese le galuega sa faia e le Atua i lana

foafoaga. E le o ni mea ua fausia i ni mea faigaluega e pei o le poto na iai le lalolagi i ona po nei.

O le molimau a le tusitala, ua na o fetalaiga lava a le Alii ona tino mai lea o mea uma. O se tasi

lea o tulaga maoa’e e fa’aalia ai le silisili ese o le Atua o lo’o tatou tapua’i ai. O le galuega fai

to’atasi ma e leai ma se isi lava mea na fesoasoani pe fa’alavelave i ai. O le fuaiupu muamua e

o’o i le tolu o le mataupu e lua o lo’o ai se fa’ata’ita’iga lelei mo le tagata. O lo’o fa’amanino

mai e le tusitala, e le i alu loa le galuega a le Atua, ae sa ia malolo foi e pei o i tatou. O lona uiga

o le feau ua aumai e tatau le malologa mo le tagata. O se fuafuaga ina ia maua pea le malosi aua

galuega o le aso fou.

A’oa’oga:

O se feau taua mo i tatou, ia tumau pea le fa’amoemoe, talitonuga ma le mautinoa; o le

lalolagi ma mea o tumu ai o galuega lava a le Atua. E tatau i soo se tagata soifua ona fa’afetai i le

Atua i aso uma, auā oi tatou foi o le galuega mulimuli lava lea a le Atua i lana foafoaga. O mea

uma ua tatou ola ma sa’oloto ai o mea uma lava na faia e le Atua i lona mana foafoa.

Mea e fai:

1. Fai ni fesili e toe fa’amalamalama atili ai le mataupu

2. Usu se pese e fa’atatau i le mataupu

3. Ia fai se tatalo fa’ai’u.

2

Aokuso 20, 2017

Mataupu 2: “O le Atua lo tatou fesoasoani sili”

Sini: Ia a’oa’oina tamaiti ina ia malamalama o le Atua e ou le malosi uma lava ma le pule aoao,

o ia lava e ao ona tatou saili fesoasoani ai.

Tusi Faitau: Isaia 30: 1-7


O lo’o i lau susuga lava i le faiaoga se tapenaga lelei e fa’afeiloa’i ai le fanau i lenei taeao. A

fai o lo’o e tau mafaufau, e lelei foi ona faaoga le fa’asologa lenei: Ia muamua lava ona fai se

tatalo. A mae’a, ia fa’afeiloa’i tamaiti i se fa’atalofa ona fa’amanatu ai lea o le mataupu i le aso

sa ua tuana’i. A uma lea, ona amata lea o le mataupu fou.

O Isaia le isi perofeta a le Atua na feagai ma le tele o faigata ma fa’afitauli o le galuega ona o

le faigata ma le loto maaa o tagata. ua tele ina latou fa’agalo le Atua e ona le malosi uma. Sa

latou maua ai le ola manuia, mai le tele o faigata ma puapuaga sa latou fetaiai. E amata mai lava i

lo latou ola pologa a’o i ai i Aikupito na lavea’i ai e le Atua ina ua fa’afofoga le Atua i lo latou

oi. E o’o mai la i vaitau o le vala’auina o Isaia, ua tau au ina le toe manatua e tagata o Iuta lenei

alofa tele ma le fa’aolataga sa faia e le Atua, ona ua tele ma pupu o latou loto i tamaoaiga ma

manuia ua maua a ua galo ai le Atua. E tula’i mai la Isaia i lana galuega fa’a-perofeta, o le

vaitaimi tonu lea o le nofoaiga a le tupu o Esekia i le malo o Iuta. O Esekia o le atali’i lea o Aasa.

E feagai tonu le tula’i mai o Isaia ma fa’aletonu nei. Lea o lo o ua matua fa’asea ai le perofeta i

le tupu o Esekia ma tagata Iuta. Ona ua le mau manatu ina ua fa’asaga tau ane Asuria ia Iuta. o le

mea ua tupu ia Iuta ua saili fesoasoani i le Aikupito, se’i fesoasoani ane la i latou a’o foufou mai

Asuria e osofaia i latou. O le mea e ofo ai, o le mafai fa’apefea e Iuta ona fa’agalo le malosi o le

Ali’i le Atua. O le Atua malosi ma le mata’utia, e leai se tusa ma ia. Sa ia matua fa’apupula o

latou mata i vavega tetele na ia faia e le mafai e se malosi o i lalo nei ma lūga, o lona mamana

ma le silisili ese na ia lavea’iina ai lona lava nu’u, a’o va’avaai i ai o latou mata. E ui lava e le o

toe soifua mai i vaitaimi o Isaia se tasi sa molimauina lea silisili ese o le Atua, ae o le molimau

ola lea ma le mautu sa a’oa’oina ai pea o latou fanau ma fanau a latou fanau, o lea tupulaga ma

lea tupulaga, seia o mai i taimi o le perofeta ma le nofoaiga a Esekia. A o lenei ua foliga ua sola

ese mai o latou fatu lenei mea aupito sili ona taua e tepa taula’i i ai e fai ma ta’iala i o latou

olaga. O le Atua o lo latou maluapapa lea i mea faigata ma tiga, o le ola, e pei ona iai o ia i

Aikupito a’o latou pologa ai i le toafa ma vao lafulafua, o le fa’aumatia o le malo a’o ulufale mai

e nofoia lo latou tofi. Sa tau ai le Atua mo latou, a’o to’agaogao ma le le tagolima. A’o lenei ua

maua mea e tele ma tamaoiga, ona le manatua lea o le sa mafua ai ona latou maua ia mea e tele.

O Asuria foi ma lona malosi, o mea fa’atauva’a lava ia i le Atua. Aua foi o le Atua o le pule aoao

i mea uma. O mea uma ua ia faia. A’o lea ua saili i ai le tupu o Esekia ma Iuta atoa. A ua le saili

le Atua o le na faia le tagata ma mea uma. O le mea sa sili ona fa’anoanoa ai le Atua, o le agasala

tele foi lenei a le tupu o Esekia ma Iuta. O tagata ua leai se fa’atuatua i le Atua ua ola

fa’alagolago i le malosi ma le oa. Ua manatu i le malolosi o mea tau ma le popoto o tagata e tau,

ae ua matua galo lava o ia mea fai fua, e leai se malosi pe a le i ai le Atua. O lea foi se a’oa’oga

3

taua mo tatou le fanau. Tele ina tatou fa’amoemoe i lo tatou malosi ma se iloa ua maau e o’o mai

loa faigata ma fa’afitauli, ua le iloga se mea e saili solo ai. O nisi ua fa’avaivai, ma solomuli, o

nisi ua saili auala e pule ai le ola, o nisi ua sola ese male aoga, ua musu, ae o le a’oa’oga taua lea

mo i taua. Saili i le Atua o ia o le tali o o tatou mafatiaga ma puapuaga.

Mea e fai:

1) Fai ni fesili e toe fa’amalamalama atili ai le mataupu

2) Usu se pese e fa’atatau i le mataupu

3) Ia fai se tatalo fa’ai’u.

Aokuso 27, 2017

Mataupu 3: “O le Atua alofa.”

Sini: Ia mae’a le mataupu ua iloa ma malamalama tamaiti, e le mavae le alofa o le Atua mo i

tatou.


Fesoasoani mo le mataupu





Aisea e sasa ai so’o tatou e o tatou matua i nisi taimi? Ia, e ala ona sasa ma fue tatou, ona ua

tatou faia se mea e le talafeagai, po ua malosi fo’i lo tatou le usita’i i ni fa’atonuga. Tele tamaiti e

manatu, e le aogā lea mea o le sasa i o latou olaga. Ae o le mea moni, e tele sona tāua. Auā e ala

ona sasa ma fa’atonu tatou e matua, ona e manatu ina ia ola lelei ma ola fiafia i le lumana’i.

O le tala lea o lo’o i le Isaia, e foliga tutusa lelei lava ma lea tulaga. Sa ia fa’amanuia ia

Isaraelu, ma alofa fa’amaoni i ai. Peita’i, na galo ia Isaraelu le alofa lea o le Atua. Ma ua fai amio

leaga, ma ua fai ma mea fiafia le faia o le agasala. Ua le usita’i ma ua le fia fa’alogo i le Atua.Na

sasa ma fa’atonu e le Atua lona nu’u e ala i le ave fa’atagata o tauaina i le malo tele o Papelonia.

Na matuā o’otia loloto i latou i puapuaga ua maua ai, ma ua na o le oi ma fia maua se fesoasoani.

Pāga lea, e leai lava se isi e latou to’omaga, ua na o le Atua e to’atasi. Auā o lo’o lotolotoi ai pea

i puapuaga lona alofa. O upu ia a Isaia, o lo’o avatu ai se vai mālu i loto o tagata mafatia, ua

saunia se sa’olotoga ma se fa’amoemoe mautu mo i latou, o lo’o tumau pea le alofa o le Atua ia

te’i latou, e le mavae. O upu na fa’amafanafana ai Isaia i le nu’u, “Aua le fefe pe matata’u, ae toe

mafaufau i aso anamua ma le latou mafutaga.

O lenei mafutaga na fa’avae mea uma i le alofa. Le alofa e le fiu, e le solomuli gofie, le alofa

e le mavae ae tumau. Ia tatou iloa lelei ma le mautinoa, o le tatou va feso’ota’i fo’i lea i le Atua.

4

E tigā lava lo tatou fesipasipaa’i mai le moa o le ala, ae le taitai ona fa’asipasipa mai ai le alofa o

le Atua. Aua la ne’i avea ma mea tatou te saga fiafia ai pea e fai le leaga, a ia tatou faia le lelei,

ma tumau ai i le alofa o le Atua, auā o le alofa o le Atua e le mavae lea mo i tatou.

Mea e fai:




Setema 03, 2017

Mataupu 4: “O le taunu’u mai o le Tala Lelei i Samoa.”

Sini: Ia ma’ea lenei mataupu ua iloa ma malamalama tamaiti o le taunu’u mai o le tala lelei i

Samoa o le fa’ataunu’uina lea o le poloaiga a le Ali’i o Iesu.

Tusi Faitau: Mataio 28: 16-20






O le mataupu i lenei taeao, o le toe fa’amanatu lea i le fanau le lalolagi na foafoaina e le Atua

i lona poto ma lona mana. Sa a’oa’oina le fanau i le vasega amata ma le laiti i galuega eseese na

faia e le Atua i aso ta’itasi. I lenei aso sa, e toe fia fa’amanatu i le fanau le mana o le Atua na

fausia ai le lalolagi mai le amataga.

Ina ua mavae le toe tu manumalo mai o le Ali’i o Iesu, o lana toe poloaiga i lona au so’o e

tusa ma le tala a Mataio, “Ia outou o atu e fai nu’u uma lava ma so’o ma papatiso atu ia te i latou

i le suafa o le Tama, ma le Atali’i ma le Agaga Paia.” Le poloaiga lenei a le Keriso toe tu ne tu’u

atu atoa ma le malosi e fai ai e le au aposetolo le galuega. Sa latou maua ai le loto tetele e o atu e

tala’i atu le tala i le Atua ua na fa’ato’ilalo le oti ma le tu’ugamau ma ua toe soifua manumalo

mai, le tala i lona alofa tunoa ma lana fa’aolataga ua ia saunia mo tagata uma. Le poloaiga lea sa

fa’aauauina ma o lo’o fa’aauauina pea. Lea foi na fa’avaeina ai le Sosaiete fa’a-Misipnare i le

tausaga 1790. O lea Sosaiete sa taua o le L.M.S (Lonetona Misionare Sosaiete). O misionare la

po’o faifeau o lea Sosaiete na latou mua’i aumaia le tala lelei i lenei vaega o le Pasefika. O le

tausaga 1830 ia Aukuso na taunu’u ai i Sapapali’i Sava’i’i misionare papalagi e to’alua, o Ioane

Viliamu, Papu Salesa, ma ni faifeau se to’aono mai Tahiti ma se to’alua mai Rarotonga ia ma le

ulugali’i Samoa o Fauea ma Puaseisei mai Tonga. E fa’apea le tala e o mai lenei malaga ma le

popole tele o lenei ulugali’i Samoa, ona o taimi ia o le mata’utia o le saua o le tamaloa lenei o

Tamafaiga. Peita’i, e o’o mai i gatai o Safune, ae sa latou fetaia’i ai ma ni tagata alo atu ma fesili

5

loa i ai Fauea, po ua a mai Samoa i nei aso. Ae tali mai tagata ia, ua oti Tamafaiga po’o le tama

faigata. Ona osooso ai lea o Fauea ma fa’apea ane, “ua mate le tevolo.” Sa latou o a’e i uta i

Safune ma malolo ai. Ona la toe fa’aauau lea i Sapapali’i i le nu’u o le tupu o Malietoa. O iina na

feiloa’i ai le aumalaga ma le tupu o Malietoa. Sa talia lelei e Malietoa Vainu’upo le savali o le

tala lelei. Sa tu’uina atu e Ioane Viliamu ia Malietoa le Tusi Paia, o le meaalofa o le tala lelei, ma

sa folafola atu foi e Malietoa le avea o le Lotu ma tapuaiga e ifo tagata uma i le Atua na aumai e

Misionare. O lea sa matua salalau ai le tala i Samoa i lenei mea. Ma o le mea e ofo ai o le vave

ona talia e tagata o le tala lenei, ae ona o le Atua e fa’amaoni i ana folafolaga ma ana poloaiga,

na te le tu’ulafoaina ai le galuega ua ofoina ai le soifua o ana auauna. Na te galueina loto o tagata

e amata i tupu o le atunu’u ua latou lafoa’i o loatu tupua ma aitu, ae ave uma o latou mamalu e

fa’amamaluina ai le Atua soifua lea ua fa’atalaleleina ai Samoa.

O lenei ua atoa 173 tausaga talu ona o’o mai le tala lelei i Samoa. Ae ua foliga mai ua tau au

ina galo atu lena mamalu sa tatou fa’aeaea ai i le tala lelei. Peita’i, e ao pea ona tatou tausi ma

talitonu i le malosi o lenei saunoaga a le Ali’i o Iesu. E ui e le o ulua’i so’o ia na fetalai manino i

ai le Ali’i, lea ua aumaia le tala lelei, ae o le vala’au e fa’atauaofia ai tagata uma e tali atu i lenei

vala’au paia. Lea foi ua fa’aliliuina ai nei misionare papa’e lea ua f’aatalaleleiina ai Samoa. Sa

fa’apea foi ona fa’atupuina le agaga fiafia i tagata Samoa e ofo atu e avea ma ave feau e fa’aauau

pea fetalaiga a lo tatou Ali’i. To’atele faifeau ae maise tamā ma so’o se tasi e o’o lava i matai o

nu’u, ua ofo atu o latou ola e fai ma molimau i le tala lelei. E tele motu o le Pasefika sa

fa’atalaleleiina e o tatou tagata. Ua maliliu ai le to’atele i ia tafa na aumau ai so’o e momoli atu

le tala i le alofa o le Atua. O nisi e tiga lava ona le atoatoa le malosi o le tino, ae ua le mafai lava

le naunau e fia avea ma so’o o le Ali’i e fa’ataunu’u lana poloaiga. Ua le popole pe oti ai, ae ua

mumū le loto i le alofa i le Ali’i ona o lona alofa tele mai. O le poloaiga a le Ali’i e le mo na’o

latou ua ofo atu o latou ola mo le tala’iina o le tala lelei. E tele foi lo tatou sao mo le

fa’alauteleina o le feau o le tala lelei, auā ua tatou i ai i vaitau ua tauau ina mou atu lenei uiga

tāua o le fiafia o tagata i tapuaiga. Ua to’atele e ua le fiafia e o i ni lotu. Ua fai le Aso Sa ma aso e

tafafao ai i matafaga ma fai ai taelega. A’o le finagalo o le Ali’i ia ‘aua ne’i tatou gugu pe

nofonofo. Ia tatou fesoasoani atu i e ua vaivai, ina ia latou iloa e ao ona fa’afo’i le viiga ma le

fa’afetai i le Atua e le aunoa.

Mea e fai:




Setema 10, 2017

Mataupu 5: “Aua e te tofotofo i le Atua”

Sini: Ia ma’ea lenei mataupu ua iloa ma malamalama tamaiti e leaga le ola tofotofo i le mana o

le Atua.

6

Tusi Faitau: Galuega 5: 1-11






O le tala lenei i a Anania ma Safaira. O le ulugali’i sa o lava fa’atau le fanua ma aliali ai lo

la ola le fa’amaoni i le galuega sa la faia. Sa o laua f’aatau atu le fanua ma ave nisi tupe i le au

aposetolo e pule ae tu’u le isi vaega ma laua. Sa faia lava lenei gaioiga ma le manatu e lilo, ae

galo ai o lo’o silasila fofoga o le Atua. Na iloa lelei lava e Anania ma Safaira o aposetolo a le

Atua lea e ave iai tupe; peita’i, ua le mafai e le fa’amaoni ona manumalo i le tele o mana’o. Sa

tatau lava ia te i laua ona mafaufau o tagata o le Atua lea na latou talanoa i le mataupu. O lona

uiga o le mea ua la faia i aposetolo; o le Atua lava lea ua la faia i ai. Ua tofotofo nei tagata i le

Atua. Fai mai le fesili a Peteru “Se ā le mea ua oulua loto gatasi ai e tofotofo i le Agaga o le

Ali’i” (f-9). O se uiga mataga ma le to’ilalo na o’o i ai nei tagata talu le ola fia tofotofo i le Atua.

Fai mai le tusitala na feoti fa’atasi lava i laua i le a lava aso. Ua fai lenei mea ma auala ua tupu ai

le mata’u i e na fa’alogo i ai. E foliga mai i le tala, o le nei ulugali’i e malamalama lelei i le Atua

a ua le mafai lava le mana’o tele.

A’oa’oga:

E tele nisi mea tāua o lo’o aumaia e lenei tala. Muamua, o le fa’amaoni i se matafaioi ua tuuina

atu e lagona ai le fiafia ma le ola sa’oloto. O le fa’amaoni e fia silasila i ai le Atua. Lua, aua le

mana’o i mea e afaina ai le ola auauna i le Atua. Tolu, ia fa’amaoni i so’o se mea i le vaaiga a

tagata ae leai se mea e lilo i le silafaga a le Atua.

Mea e fai:




Setema 17, 2017

Mataupu 6: Ia vave vala’au i le Atua i ou mafatiaga”

Sini: Ia ma’ea lenei mataupu ua iloa ma malamalama tamaiti o le vave tu’uina atu o ou mafatiaga

i le Atua, e vave ai ona e mapu

Tusi Faitau: Salamo 70: 1-5

7






O upu amata o lenei Salamo o lo’o aumaia ai se feau tāua mo i tatou i le nei taeao. O upu

amata e fa’apea “Le Atua e, ia vave ona e lavea’i mai ia te a’u; le Ali’i e, ia vave ona e

fesoasoani mai ia te a’u (f-1).” O upu a le tagata ua mafatia i puapuaga; pe tatou te fa’apea fo’i o

le tagata o lo’o saili fesoasoani i le Atua. O Tavita, o le tupu ua masani ma puapuaga. A’o le mea

sili ona lelei ia Tavita, e saili fesoasoani i le Atua. E ui lava i lona poto ma lona malosi e tau a’i

taua; ae le i fa’amoemoe i ai. O le tupu ua fa’alagolago tasi i le Atua i ona mafatiaga. Ua silafia

lelei e Tavita le eseesega o le fa’amoemoe i tagata ma le fa’alagolago i le Atua i taimi faigata o le

ola. O le ala lea e le ma’imau ai lona taimi e saili ai i tagata se malosi mo ia. O lo’o fa’aaogaina i

le fuaiupu muamua upu e fa’apea “ia vave ona e lavea’i mai ia te a’u.” O lo’o aumaia fo’i i le

fuaiupu e lima upu e fa’apea “le Atua e, ia e vave mai ia te a’u.” O lo’o fa’aalia i nei upu se

lagona lelei ma le tāua o lo’o ia Tavita. E le o mana’o Tavita e tuai mai le Atua. E le o mana’o

fo’i Tavita e faifaiaga ona tu’uina atu i le Atua lona mana’o. O le vave i le Atua atoa fo’i ma le

vave mai o le Atua o le a le maua se avanoa o le tiapolo pule ai i le loto o le tagata.O le vave mai

fo’i o le Atua e vave ai ona foi’a mafatiaga tugā i le loto o le tagata.

A’oa’oga

Aua ete fa’atuai, ia vave ona e vala’au i le Atua i ou mafatiaga. Aua ete fa’amoemoe i le poto

ma le malosi ua e maua e fofo ai ou mafatiaga. O mea ua tatou maua i le nei olaga, o mea uma

lava na faia e le Atua. O lona uiga, ua na o le Atua lava tatou te maua ai le tali o mea uma. Ia

to’aga e tatalo ma fa’amaoni i le lua va ma le Atua. Aua e te fa’atuai, ina ne’i maua oe e le

tiapolo e te lei o’o i le Atua. Ia vave i le Atua, ua leva ona fa’atalitali mai o ia.

Mea e fai:




*************** MALOLOGA O LE LOTU O TAMAITI*******************

Oketopa 15, 2017

Mataupu 7: “E galo mea leaga ona o le moni o le alofa.”

Sini: Ia mae’a le mataupu ua iloa ma malamalama tamaiti, o le fa’amaoni o le alofa e

fa’atuatuana’i ai mea sesē.

8

Tusi Faitau: I Samuelu 19: 1-7






E le se mea e fesiligia le tofu uma o tatou ma uo mamae. O tagata ua mafana lelei le

mafutaga i totonu o le a’oga ma le nu’u, ma e tatou te tuāoi. E masani ona fefa’asoaa’i alofa i le

ituaiga va lea. Ae maise i le fesoasoani o le tasi i le isi, i meaaoga, galuega, ae fa’apea fo’i meaai

e maua. O le tala lenei, o se faiga uo fo’i fa’apea. Ae tulaga ese la, ona o ni fa’afitauli na tutupu

ai na mafua ai ona fa’asoa atu le alofa moni o Ionatana ia Tavita. O le tulaga lelei o Tavita i

totonu o Isaraelu ae maise o le mat’autia o lona malosi ma lona poto. Na fai o ia ma fili i le tupu

o Saulo. E ui lava la ina taumafai pea Saulo ina ia fasiotia ia Tavita, ae e le’i taunu’u lava. E le’i

manatu fa’apea ia lona atali’i o Ionatana. Auā, sa sili lona alofa ia Tavita lana uo, i lo le manatu i

lona tama. O iinei tonu o lo’o aliali ai le faamoni o le alofa o Ionatana ia Tavita, auā na fa’alogo

loa ua taupulepule lona Tamā e fasiotia ia Tavita, e le’i toe fa’atali, a ua alu loa ma logo ia

Tavita. Ona fai lea o le la tonu, ia fa’atali atu Tavita i le vao, ae se’i alu e o mai m lona Tamā, ma

se’i tauanau ina ia liliu lona mafaufau. Ua le manatu lava Ionatana i lona Tamā, a ua fuli e fa’aali

atu ia Tavita uiga leaga uma. Ua alu nei Ionatana ma ta’ita’i mai lona Tamā o Saulo i le vaega

tonu o lo’o lafi ai Tavita, ma fa’atalanoa ai loa e uiga i lana fuafuaga ua fai. Ua tolaulau uma lava

galuega lelei na faia e Tavita, ae maise ai o lona lavea’iina o Isaraelu mai lima o Filisitia. O nei

tala na fa’ao’otia ai lagona o Saulo ma liua ai le loto o le Tupu, ma ua ia taliaina ai fautuaga uma

a lona atali’i o Ionatana. Na i’u ai ina tauto Saulo ma fai ane, “O lo’o soifua le Ali’i, e le fasia

lava o ia”.

A’oa’oga:

O le malosi o le faamaoni o le alofa e aveesea ai le mafaufau i mea leaga e fia faataunuuina.

Ua le faalogo Ionatana i taupulepulega leaga a lona tama ona o le moni o lona alofa i lana uo pele

o Tavita. Sa tatau ona sili le alofa o Ionatana i lona tama nai lo’o Tavita,peita’i, e silasila pea

fofoga o le Alii i taimi uma i lana fanau. E iai taimi e masofa ai leva o matua ma fanau pe a

silafia e le Atua e le o se mea talafeagai.Ua le taunuu le mea sa mafaufau i ai Saulo ona e eseese

auala a le Atua e laveaiina ai ona tagata.

Mea e fai:

3)Ia fai se tatalo fa’ai’u.

Oketopa 22, 2017

Matāupu 8: “Fa’aauau galuega lelei.”

9

Sini: Ia mae’a le mataupu ua iloa ma malamalama tamaiti, e tatau on fa’aauauina pea galuega

lelei o lo’o faia.

Tusi Faitau: Tito 3: 1-11






O le tasi lenei o fa’amanatu taua na mafua ai ona tusi atu le aposetolo o Paulo ia Tito, “Ia

tumau i galuega lelei ae le o le fevaevaea’i.” E fa’apea se molimau o Tito o se faifeau talavou

a’o le atali’i i la le fa’atuatua o le aposetolo o Paulo e pei ona ta’ua i la amataga o le tusi (Tito

1:1-4). A o le tusi atu a le aposetolo i lenei faifeau talavou ma lana apoapoa’iga fa’a-tāma i le

galuega. Na ia apoapoa’i ai ia Tito ina ia tofia toeaiina o lea a’ai ma lea a’ai, auā le va’aia o le

ekalesia e pei ona ia tu’uina ai o ia i le galuega i Kereta. E o’o lava fo’i i tamaloloa ma fafine, o e

ua talavou ma e ua matutua, e iai lava fo’i lo latou aoga ma le fesoasoani taua i le fa’alauteleina o

le galuega a le ekalesia, pe afai latou te fai ma fa’ata’ita’iga o le savavali ma mulimuli i a’oa’oga

o le tala lelei a keriso. Na matuā fa’amamafa fo’i e le aposetolo ia atagia i le olaga o aso uma o le

au faigaluega ma le ekalesia le galuega fa’atino o le fa’aolataga e atagia i galuega lelei ua faia ma

fa’atinoina. E fa’apea se tala o le to’atele o le au Iutaia mai Kereta na o latou i ai ma

fa’alogologo i le lauga a Peteru i le aso Penetekoso. Na avea lea ma ala o lo latou talitonu ia Iesu

Keriso ma latou avatu ai le feau o le tala lelei i o latou tagatanu’u.

O nisi nei o vaega taua o le fa’amalosi o le aposetolo ia Tito, o le soifuaga o tagata Kereta ina

ia toe fa’asao mai le olaga sese o lo’o ola ai. Muamua, o le fa’amanatu a Paulo ia Tito ona tiute i

le tofiaina o toeaina ia talafeagai le soifuaga ma le ola fa’akerisiano e tatau i le Atua. Lua, o le

fa’avasegaina o mea ia lelei i totonu o le ekalesia. E ui ina o le olaga sese ma le talapepelo o lo’o

ola ai tagata Kereta. Ae le gata i lea, o a’oa’oga taufa’asese lea ua lapata’iina ai e pei ole

mataupu i le peritomeina e tatau ona faia ma le amiotonu ma le alofa. Ia fa’ailoa atu i tagata, Ia

fa’amanatu i ai le galuega lelei ma le alofa, o le fa’aolataga ua saunia e keriso. Ia tumau i le

fa’atuatua ma le amiotonu atoa ma le amio Atua e tatau ona ola ai. O lo’o ta’ua i le vs 1-2, uiga

ma aga e tatau ona fa’atino e iloa ai le tumau i galuega lelei o le faia o le finagalo o le Atua. E le

o le femisaa’i ma feitaga’i. E le o le tu’inanau leaga ma le fa’alogotata e pei ona sa valea ai

Kereta anamua. A ia latou iloa ua fa’aalia mai le agalelelei ma le alofa o le Atua i tagata e ala i le

fa’aolataga a le Atua. E le ona o se galuega o i le amiotonu. Peita’i, o le alofa lava o keriso na

fa’amaligi ai lona toto ina ia ta’uamiotonuina le tagata e ala i lona alofa tunoa ua fa’aalia mai.

Ina ia avea le tagata e fai ma suli i le ola e fa’avavau, e fai ma fanau a le Atua.

O le fa’amalosi lena a le aposeolo ia Tito, ia fa’ailoa atu, ina ia matuā naunau i latou o e ua

talitonu ma fa’atuatua i le Atua. Ia tumau ma faia pea galuega lelei, e aoga mo tagata uma. A ia

taumamao pea mai le faia o le valea ma ala o le vevesi e tupu ai maseiga. A ia ola ma tumau i

galuega o le finagalo fo’i lea o le Atua. O se a’oa’oga fo’i lea mo i tatou le fanau o le faia o

10

galuega lelei, a’o se fesoasoani mo le isi, o lea fo’i le finagalo o le Atua mo i tatou. E le ola

fa’amisa, e le ola pepelo, e le o le taufa’aleaga ma le tusitusilima, o mea ia e fevaevaea’i ai le

fanau o le Atua. A ia tatou tausisi i galuega lelei e maua ai le fealofani, le feoeoea’i, ma le

felagolagoma’i. O iina tatou te maua ai le finagalo o le Atua mo i tatou.

Mea e fai:


2 ) Usu se pese e fa’atatau i le mataupu


Oketopa 29, 2017

Mataupu 9: “Toe fo’i i le Atua.”

Sini: Ia mae’a le mataupu ua iloa ma malamalama tamaiti, o le toe fo’i i le Atua e manuia ai.

Tusi Faitau: Sakaria 1: 1-6


O lo’o i lau susuga lava i le faiaoga se tapenaga lelei e fa’afeiloa’i ai le fanau i lenei taeao. A fai

o lo’o e tau mafaufau, e lelei foi ona faaoga le fa’asologa lenei: Ia muamua lava ona fai se tatalo.

A mae’a, ia fa’afeiloa’i tamaiti i se fa’atalofa ona fa’amanatu ai lea o le mataupu i le aso sa ua

tuana’i. A uma lea, ona amata lea o le mataupu fou.

O le tasi lenei o feau e masani ona laugaina. Ae le uma pea lona aoga ma le tāua i o tatou tagata

i aso uma. A’o le tasi fo’i lea feau tāua na alagaina e le perofeta o Sakaria, le atali’i o Parakaio. O

le uiga o le igoa o Sakaria, “ E manatua e le Atua”. O lea uiga tāua o le igoa o lenei perofeta o

lo’o autu i ai le fa’amanuia e le Atua o Isaraelu auā e manatua pea e le Atua le feagaiga na ia osia

ma augātamā. I le vaitau o le perofeta o Sakaria o lo’o tāua ai o ia o se tupulaga itiiti a le perofeta

o Hakai. A’o le feau ma le poloa’i na fa’atonuina ai e le Atua Sakaria ina ia fa’alototele tagata i o

latou tiute ma galuega e le’i mae’a ona fa’ataunu’uina. E pei e foliga e ese mai le perofeta o

Sakaria mai isi perofeta o le Feagaiga Tuai. Auā fo’i o le tele o perofeta e matuā mamafa lava a

latou upu i tagata o le nu’u, e o’o i gaioiga o lo’o avatu ai se feau tāua. Peita’i o le perofeta o

Sakaria, na te le’i fa’aogaina lea auala e momoli ai le feau i tagata. Ae sa ia fautua fa’amalosi i

tagata ma fa’amanatu i ai le lumana’i taua o lo’o taoto i le malumalu. Auā, i le malumalu o le a

fausia, e i ai le aso o le mamalu o le Atua o le a afio ifo ai i le malumalu. O lona uiga, o le

fausiaina o le fale po’o le malumalu, o le fausiaina fo’i lenā o lo latou lumana’i.

I le vaega lenei o le mataupu a le perofeta o Sakaria, o lo’o toe fa’amanatu ai e le perofeta

o Sakaria le feau i le nu’u o le Atua, ina ia toe fo’i mai i le Atua. I lona manatu, e le’i taitai ona

lagona e tagata le a’oaiga e ala i le tafeaga. Ae le gata i lea o le agasala a le nu’u i le amataga lea

e masani ona fa’ailoa ma laugaina e le au perofeta. Fai mai le perofeta ia Iuta, e tusa ma le feau

11

mai le Atua, “Ia outou fo’i mai ia te a’u. Afai e le salamō fa’amaoni Isaraelu ma liliu ese mai le

faia o agasala, e le fo’i mai le Atua ia te i latou.

Pau lea o le auala e mafai ai ona fa’aolaina i latou, o le alo’alo ese mai le faia o le agasala. O

lo’o fa’amanatu atu e le perofeta o Sakaria ina ia tuamamao i latou m amioga anamua, o le ifo i

tupua ma le agasala e pei ona faia e o latou tamā anamua. Ae afai e toe fo’i mai i latou i le Atua o

iina latou te maua ai le alofa o le Atua ma le fa’amanuiaga a le Atua e le mavae mo lona nu’u ma

ona tagata. O le fo’i la i le Atua, e le na’o le fo’i na o laugutu. A’o le salamō fa’amaoni ia liliu

ese mai le faia o le agasala. A ia tumau i le faia o le lelei ma tausi i poloaiga ma tulafono a le

Atua ua uma ona avatu mo lo latou ola manuia.

Le fanau, o se a’oa’oga tāua o lo’o aumaia iinei, o le iloa toe fo’i i le Atua ma le loto ua

salamō fa’amaoni. Aloe se mai le leaga, a ia faia le finagalo o le Atua. E fa’apena fo’i i tatou, ia

e iloa ona e salamō mai lou le usiusita’i ma lou le fa’alogo i matua. Aua le fiafia e ola i le mea

sese po’o le agasala. O le salamō, o lou iloa o lou sese, fa’atoese o le faitoto’a lenā e te ui atu ai

ina ia e iloa atu ai le matagofie o le Atua i lou olaga. Afai o e maua pea i le olaga le usiusita’i ma

le lē fa’alogo, ia fo’i nei ma fa’amaulalo lou loto. Fa’apei o le feau a le perofeta o Sakaria, “ Ia

outou fo’i mai, ona fo’i mai lea o le Atua ia te i tatou.”

Mea e fai:




Novema 5, 2017

Mataupu 10: “E leai se mea e lilo i le silafaga a le Atua”

Sini: Ia mae’a le mataupu ua iloa ma malamalama tamaiti, o le Atua na te silafia mea uma lava e

o’o lava i mafaufauga ma le loto o le tagata, auā o ia na faia le lalolagi ma mea uma.







E masani tele tatou tamaiti ona tala pepelo i o tatou matua pe a tele a tatou amio lilo e faia. E

le iloa lava e nai o tatou matua, e tele ina fa’afoliga a tatou amioga ma mea e fai. O le mataupu la

i lenei taeao o lo’o a’oa’o mai ai le fai Salamo i le o lo’o ia matua iloa lelei a tatou amio uma o

lo’o fai e o’o lava i o tatou mafaufauga ma mea i o tatou loto. O le Salamo la lenei e pei ona

tatou faitauina e mafai ona vaevaeina ini vaega se tolu (3): (i) fuaiupu 1-6. O le vaega lea o loo

12

tautala ai le fai Salamo i le Silisili ese o le silafaga a le Atua. E le mafai ona fa’atusatusalia i le

iloa o le tagata, aua foi o le na te silafia mea uma, e ati lana silafaga i so’o se mea, aua o ia o le

Atua foafoa. O le ata fa’ata’ita’i e mafai ona tatou iloa ai o le tagata lava ia na faia e le Atua. O a

gaioiga uma a le tagata e leai se mea e lilo i le silasila a le Atua. O fea lava e alu i ai o ana

galuega ma mea na te faia, e silafia uma e le Atua. E o’o lava i le poto ma le atamai o le tagata na

te le mafai ona iloa le finagalo o le Atua, aua o le poto ma le atamai o mea-alofa ia a le Atua ua

foa’i i le tagata. O lona uiga e aoao le pule ma le silafaga a le Atua i le lalolagi.

(ii) fuaiupu 7-12. O loo manino mai i lea vaega le i ai o le Atua i mea uma. Soo se vaipanoa o le

olaga o le tagata, soo se mea e agai i ai le tagata, o loo manino mai ai i le vaega lenei le auai

faatasi o le Atua i le tagata. O le ala lea ua mafai ai ona tautala faapea le fai-Salamo, e le mafai

ona sola ese le tagata mai le Atua aua ua mautinoa o loo i ai lava le Atua i soo se mea. E pei foi

ona tatou maua i le tala ia Iona lea na auina e ta’u le feau i Nineva, ae alu atu sola i Tasesa. O

lona manatu e le o silafia e le Atua le mea lea na te faia ae na tuliloa lava e le Atua, ma toe aumai

e faataunuu lona finagalo. E pei foi ona ta’ua e le fai-Salamo, poo le a foi le malosi o le pogisa, e

le mafai ona manumalo i le malamalama o le Atua, aua o le Atua o ia lava o le malamalama. (iii)

fuaiupu 13-18; O loo manino mai i le vaega lenei o le Salamo le Silisili ese o le malosi o le Atua.

O le malosi ua ia faia ai le tagata ma o le ala foi lea e na’o le Atua lava na te silafianina

manatunatuga uma o le tagata. Tele taumafaiga a le tagata e naunau e fia oo i ai ae a le tusa ma le

finagalo o le Atua e le taitai ona mafai ona faataunuuina. E pei foi o le mea na naunau ai Iona na

mafua ai ona sola ese ona e le o manatu e faaoo le feau lenei i Nineva ona e le o loto Iona e

faasaoina Nineva. Peita’i, e le o mafai ai ona taofia le finagalo alofa o le Atua i le tagata, o loo

faaali ai o le Atua e silafia soo se mea e i ai le tagata, e le manatu faapito foi o ia.

A’oa’oga:

Aua nei galo ia te outou lenei mea, ma le aoaoga taua mo i tatou, ‘aua nei e faapea e le o iloa

mai lava e ou matua au amio nana o loo fai, ae o loo silasila mai le Atua iai tatou. O le Atua e

tumu i le alofa, e tiga lava lou leaga ae onosai lava i le Atua. A ia e manatua o mea uma e te faia

e te toe selesele lava. Poo fea lava e te i ai, alu ma lou mautinoa o loo silafia mai pea le Atua. O

lona uiga ‘aua e te manatu e le o iloa e ou matua, o le faiaoga, poo le faifeau au amio o loo fai, ae

ia e manatua poo a lava au amioga e le o lilo i le silafaga a le Atua. O loo i ai foi le tulafono a le

Atua ua uma ona tuuina mai mo i tatou, lea ua ta’ua o le tulafono e lima (5).

O le tamaitiiti e ava ma usiusita’i i lona tamā ma lona tinā, e faaumiumi e le Atua aso o lona

ola, ae le gata i lea e faamanuiaina foi lona olaga e le Atua. Toaga e fai mea lelei e fia silasila i ai

le Atua ma faafiafiaina ai ou matua. O le tamaitiitit usitai na te le faia se mea leaga, e taua o ia o

le tamaitiiti amio lelei ma le tauleleia.

Mea e fai:




13

********SUEGA AOAO****************

Novema 19, 2017

Mataupu 11: “Ia fa’afetaia le Atua e le aunoa” (Aso Sa Fa’afetai)

Sini: Ia mae’a le mataupu ua iloa ma malamalama tamaiti, ia tupu pea i o latou loto le fiafia e

vivi’i ma fa’afetai i le Atua i taimi uma, ona o le tele o lona alofa i ai tatou.

Tusi Faitau: Teuteronome 8: 7-18






O le vaega lenei o le tusi a Teuteronome, o lo’o fa’amaumauina ai e le tusi tala le lauga

fa’amanatu, e apoapoa’i atu ai i le nu’u o Isaraelu, a’o latou sauni atu e nofoia le nu’u na

folafolaina e le Atua ia Aperaamo. Lea ua toe fa’amanatu e le tusitala apoapoaiga ia e

fa’amanatu ai pea i le nu’u le alofa o le Atua i le ta’ita’iina o i latou i le filemu i mea uma sa

latou ui atu ai. O le apoapoaiga a le tusitala, ‘aua le avea le tamaoaiga ua maua e le fanauga a

Isaraelu i Kanana ma mea e mitamitavale ai ma latou fa’apea ane o lo latou lava poto ma le

malosi ma latou fa’agalo ai le alofa tele o le Atua ma laveai mai ai i latou mai le tele o faigata ma

puapuaga semanu e fano ai i latou. O le aotelega o manatu o le tusitala, o lo’o ia fa’amanatu atu

ai, le alaga tatau i le tagata Isaraelu ona fa’afoi atu le fa’afetai i le Atua ona o fa’amanuiaga ua

maua. Manatua le tusitala, o mea uma ua maua e le tagata o fa’amanuiaga ia mai le Atua. E tai

foliga fa’apea foi le agaga na afua ai ona faia lenei aso fa’afetai. O lenei lava e iai foi ona tala

tu’u. E fa’apea se tala e mafua lenei aso ona o ni tagata papa’e na sosola ese mai Enelagi ma

taunu’u i Amerika, ai o lea e maua le tasi aai o Amerika ua fa’aigoaina o New England. E

fa’apea le tala na tupu se feese’eseaiga i tagata papa’e i talitonuga o mea tau le lotu ma faiga

fa’apolokiki, o pulega ale malo o Peretania, ua a’afia ai mea lava tau tapuaiga. Ona manatu lea o

i latou (Pilgrims) e sili le sosola nai lo le pologa i sauaga ia. Ona sosola lea i Holani (Holand).

A’o le to’atele o i latou nei e fai fa’atoaga. O nisi fo’i o i latou e faigaluega i nisi galuega, ae laiti

o latou totogi. Na le gata ina faigata le soifuaga i Holani, ae o le feteena’i fo’i o latou talitonuga

tau tapuaiga ma le Ekalesia. Toe fuata’iina i Holani. O nei uma fa’afitauli, sa tupu fa’atasi ma ua

tasi ai loa lo latou manatu o le a tuua Holani. Ua latou tuua Holani ma sa latou fa’amoemoe mo

Guiana i Amerika i Saute. Peita’i, ona o le tele o le tamaoaiga sa maua i fa’afetauaiga i Amerika

i Matu e ala i le tapa’a i na aso, o lea ua latou filifila ai loa Amerika i matu. Ua la’u le malaga ma

ua tuua le atu Europa mo Amerika. Ina ua latou vaaia ulua’i laufanua o Amerika ua latou filifilia

totoa ma ua taunu’u ai i Plymouth, Massachusetts ia Tesema 11, 1620, ma le anoanoa’i o

14

fa’afitauli o le malaga ina ua taunu’u, e pei o le maliliu. O le faigata o mea taumafa ona o le

malulu, ma isi fa’afitauli, sa pule saua ai le oti i nisi oi latou. Ae sa maua sina lavea’i i se tasi o

toeaina initia na latou o mai o Sukunato (Squanto). I le vaitaimi sa filifilia ai Parafoti

(W.Bradford) e fai ma o latou Kovana, ma tau amata ona fa’ato’a le lau’ele’ele, o fale, o faiga

faiva, sa latou tulimanu foi i le ta’ita’iga a si toeaina Initia o Sukunato. Ua alu aso ma ua o’o ina

mautu. Ua matua fa’atoaga ma ua seleseleina fua o fa’atoaga ona latou manatu lea e ao na fai se

Aso Faapitoa, ma ua taua o le Aso Fa’afetai, e fa’afetaia ai le alofa o le Atua ona o ulua’i fua o

fa’atoaga ae maise o lenei tausiga e tele ua latou maua. Aua a manatu i le faigata sa latou tauasa

mai ai i le tele o le mau fa’afitauli, a’o tumau pea le alofa ma le agalelei o le Atua ua fa’asaoina

mai ai nisi o i latou. Ae le gata i lea o lenei alofa ma lenei manuia ua latou maua. Manatua foi o

tagata nei o tagata lolotu ua mausali lo latou ola talitonu ma le fa’atuatua. O le Atua alofa ua na

saunia mea uma mo i latou.

O lea foi le fa’amoemoe atoa o le tusitala o Teuteronome mo ona tagata. Ia ‘aua ne’i galo le

alofa o le Atua mai lo latou ola pologa sa i ai i Aikupito, lavea’i e le Atua, tuliloa e Aikupito e

fasioti ae o mai tau mai i le sami ulaula, ua leiloa poo fea a o iai ua na’o o le oti ua tu mai. Ae

lavea’i ai fo’i e le Atua ina ua vaeluaina le sami i lona mana ua savavali le nuu i le eleele matutu.

A’o fa’amalumalu peau malolosi ma le saua o le sami na fa’aumatia ai au tau a Aikupito. Sa fia

aai, fafaga e le Atua, sa fia feinu, fa’ainu e le Atua. E leai se mea e le’i faia e le Atua e lavea’i

mai ai i latou mai le fetaia’i ma lea faigata ma lea faigata. O le ala lea na matua apoapoa’i mai le

tuistala, ia tautuana Isaraelu ‘aua lava ne’i galo ia te oe le Atua alofa fua ma alofa mutimutivale.

E fa’apea foi i ai tatou le fanau. E te manatu o ai na lavea’i ma tausia i tatou mai lo tatou laiti seia

o’o i lenei taimi, mai fea tupe ma meaa’i, lavalava ua tatou fa’aogaina, e i ai se tasi e fa’apea mai

e mai ou matua. Ioe, ana leai le alofa o le Atua e le maua e ou matua le malosi, le poto, ma maua

galuega e maua tupe e tausi ai tatou. O lea la, e ao lava i ai tatou uma ona tatou matua fa’ataua

lenei aso fa’afetai ona o le Atua ua ia alofa ma tausi i ai tatou.

Mea e fai:




Novema 26, 2017

Mataupu 12: “E i’u vale fanau le ava ma fouvale i matua.”

Sini: Ia mae’a le mataupu ua iloa ma malamalama tamaiti, ia sili ona usiusita’i ma ava i matua,

aua e matua leaga lava le i’uga o fanau e le ava ma fouvale i o latou matua.

Tusi Faitau: II Samuelu 18: 1-18

15






O Apisaloma o le tasi lenei o atalii o Tavita. Sa manatu le to’atele o tagata o Isaraelu o le a

avea o ia ma tupu pe a mavae lona tama o Tavita. Atonu o le ava lea ua mafua ai ona ia faoa

fa’amalosi le faiga malo a lona tama. Aua foi ua manatu tagata Isaraelu, ua matua le tupuo Tavita

ma ua le toe ia te ia se malosi e tau ai le taua. Ua latou manatu e leai se isi tupu o Apisaloma lava

o le a fai ma o latou tupu (II Sam. 14:25). Peita’i, e le’i liliu ai loto nisi o e mau pea o latou

fa’atuatuaga i le mamalu ma le agava’a o ia Tavita e ta’ita’i ai lona nu’u. Ua avea uiga

fa’amaualuga o lenei tama ma ala ua galo ai ia te ia le ta’ita’iga a lona tama o le malo. Ua o’o

lava ina manatu e foua le pule a Tavita lona tama. Ua iloa e Tavita lenei mea ona sola ai lea o ia i

le vao. Ua manatu foi Apisaloma e tuliloa ia te ia ma lona aiga ma i latou uma ua mulimuli atu ia

te ia. Peita’i, ua avea lona liliu atu ia Apisaloma ma ala ua tupu tele ai le fa’aletonu i le soifuaga

ona o lona fa’amoemoe ia avea pea o ia ma auauna fa’amoemoeina a Apisaloma, peita’i ua avea

lona alu ma ala ua fetu’uina ai o ia e Tavita. Ua na fa’aleaogaina ai ana fuafuaga poto e usia. O

lea na alu ai Aitofele ma pule i lona ola aua sa manatu Aitofele e ao lava ona tuliloa ia Tavita

manu ua maua i latou i le vaivai. Peita’i, fai mai Usia, e ao ina matua vaai toto’a i se faiga e

fa’afetaui ai Tavita, aua o Tavita o se tagata faigata ma o le tupu e poto tele i fuafuaga o osofaiga

e fa’aumatia ai le fili. Ae le’i taofia ai le pule a Aitofele i lona lava pule i lona ola. Sa tuliloa pea

e Alisaloma ia Tavita, ma ana vaega ma tagata uma sa ia te ia. Ua latou sopoia Ma’anaima ona

agalelei ane ai lea o le fanauga a Amoni ia Tavita ma ona tagata. Ua lataou avane meaa’i ma mea

inu ona ua vaivai lava i latou i le tuliloaga a Apisaloma ma tagata o Isaraelu. Ua maua lo latou

malosi ona vaevaeina loa lea e Tavita i latou sa ia te ia i vaega e tolu ma tofia nisi e ta’ita’i ai. O

Ioapo, le tasi vaega, o Apisai le uso o Ioapo le tasi vaega, ma Itai le sa Kata le tasi vaega. Sa

manatu foi Tavita e o mai latou, peita’i e le’i loto i latou e o ma Tavita ae na latou talosaga e

fa’amuli atu i le leoleoina o le aai.

E ui i le agaleaga o Apisaloma ia Tavita lona tama, ae le mafai ai lava ona te’a ese le alofa o

Tavita. O lea sa i atalosaga atu ai iai latou e tautuana ma i latou lona atali’i o Apisaloma. Ua

latou o’o atu i le vao o Efaraima ona fetaia’i ai lea ma Isaraelu, ona tau ai lea o taua, ua matua’i

fa’aumatia Isaraelu e auauna a Tavita, ua taapeape solo le nu’u o Isaraelu, a’o Apisaloma ua sola

ane i se tasi itu ma lavea ai lona ua i le laau o le tapeneko, na iloa e se tasi o le vaega a Tavita

peita’i ua fefe lea tagata e fa’ao’o le oti ia Apisaloma ona sa latou fa’alogo uma i le upu a Tavita

sa fai ia Ioapo, o Apisai ma Itai o ta’ita’i ‘au ia o lana vaega. O lea sa ia le fa’ao’o ai le oti ia

Apisaloma a ua ia alu ma ta’u ia Ioapo. A’o Ioapo ua le mau onosa’i i lona ita tele i le le fasiotia

e lenei tagata o Apisaloma ona le mau a lenei tagata sa fai ane ai e tusa ma le talosaga a le tupu o

Tavita. E le’i toe fa’atali o Ioapo ua la o atu loa ma tutu’i ia Apisaloma i le tao a’o tautau ai pea

Apisaloma i le tapeneko. Ua o ane foi soatau o Ioapo ma latou fasi ia te ia seia oo ina maliu ai

Apisaloma. Ua latou ave foi ia Apisaloma ma lafo i le lua tele i le vao ma fa’aputu ai luga ia

fa’aputuga ma’a tele. A’o Isaraelu, ua ta’i to’atasi ma au sulusulu solo e su’e le mea e ola ai le

16

tagata ia. Tamaiti, ua tatou fa’alogo i le uiga o le tama le ava i matua, e fiu e sola ae tulituliloaina

lava ma tautau ai i le va o le lagi ma le lalolagi. E le i’u lelei se tamaitiiti e le usiusita’i ma le ava

i ona matua. ‘Aua le fa’aseseina fua i tala a tagata e fa’ase’e ma fa’avi’ivi’i ai tatou fa’apea ua

tatou maua le poto ona tatou manatu fa’atauva’a ai i le vaivai o nai o tatou matua, fa’apea ele

lava le a’oa’oina ona tatou sosopo lea ma fa’afiapotopoto i ai. O le fautuaga, afai ua tatou iloa

sina mea itiiti fa’alogo pea i ou matua e te maua ai le mea lelei. Vaai ia Apisaloma sa manatu i le

to’atele naunau o le nu’u ua lagolagoina o ia. Ua manatu ai ua leai se malosi o totoe i lona tama o

Tavita ma latou e to’aitiiti sa au ma ia. O fea ua i’u i ai? Leai se malosi o le to’atele ma le anoano

o ana vaega ua matua’i fa’ato’ilaloina lava e le vaega to’aitiiti a lona tama. Toe fa’asao nei o

tatou olaga pe afai o le uiga lena o lo’o tatou i ai nei. O le mea ua galo ia Apisaloma o lona tama

ua tofia e le Atua. O lona uiga e leoleo e le Atua ma lavea’i e le Atua. So’o se tasi e manatu

fa’amaualuga i lona malosi o ia lena e le o ia te ia le Atua, e pei o Apisaloma. Aua so’o se

tama’itiiti po’o se tagata e le ava i ona matua, po’o matua fa’a-le-agaga ua leiloa e ia le Atua.

Mea e fai:




Tesema 3, 2017

Mataupu 13: “Ua o’o mai le fa’aolataga ”

Sini: Ia mae’a le mataupu ua iloa ma malamalama tamaiti, o le fanau mai o Iesu le pepe o le

kerisimasi o le o’o mai lava lea o le fa’aolatga i le lalolagi.

Tusi Faitau: Luka 2: 1-20

Fesoasoani mo le mataupu:





Ua tatou i ai i le vaitau o le Ativeni a’o le vaitau o le fa’atalitali atu o le au kerisiano i le afio

mai o le Mesia, lo tatou Ali’i fa’aola. Ma e le fou lo tatou fa’amanatuina o lein vaitau, ae mafai

ona fou le pa’i mai o le fa’aolataga a le Atua, ina ua tatala atu o tatou loto ma le agaga maulalo e

talia ai lona fanau mai. O le tala a le fai evagelia o Luka, ina ua faia le poloaiga a Kaisara

Aokuso, ina ia tusia uma ai le lalolagi. Sa o a’e ai fo’i Iosefa ma maria ina ia tusia o la igoa e

tusa ma le poloaiga.

Sa i le vao leoleo mamoe, o lo’o leoleo po i la latou lafu, ae fa’ateia i se pupula uiga ese, o le

agelu a le Ali’i, ua pupula fa’atali’oli’o ia te i latou. Fai mai ua matuā fefefe, ua le mautonu

17

leoleo mamoe i lenei pupula uiga ese. O leo ua fa’ailoa mai i le au leoleo mamoe, “Aua tou te

matata’u, auā fa’auta, ou te aumai ia outou le tala lelei e olioli tele ai nu’u uma.” O le fa’aolataga

ua o’o mai i le lalolagi. A’o le fa’ailoga lenei ua fa’ailoa i leoleo mamoe, o le tama meamea, o

lo’o aui i le ie, o lo’o taoto i le fale povi

O pesega a le au agelu, “o le viiga i le Atua i mea aupitoaluga, ma le manuia i le lalolagi, o le

finagalo alofa i tagata”.Ina ua toe fo’i i le lagi le au agelu, ae ua fetautalatalaa’i leoleo mamoe, pe

se a le uiga o lenei fa’aaliga. Ua latou saili, ua o i Peteleema, ona latou maua lea o Maria ma

Iosefa atoa ma le pepe o lo’o taoto i le fale povi, o lo’o aui i le ie. O le fa’aaliga na iloa e leoleo

mamoe, o se tala fiafia, o le feau o le fa’aolataga lea ua o’o mai i le lalolagi. Auā o lea ua liutino

le Atua e ala i lona alo pele e to’atasi ina ua maua e leoleo mamoe le nofoaga ua fanau ai le

fa’aola. Sa latou fa’afetai ma vivi’i i le Atua, ona o lenei fa’aaliga ua o latou maua. E le gata o se

mea fou i le au leoleo mamoe, a’o le amanaiaina e le Atua o latou tagata i lana fa’aolataga. Auā

sea le mea na le fa’aali ai i tupu ma tagata taua, a’o lea ua fa’aali i tagata e leoleo manu. O lona

uiga o mea uma o le foafoaga n ate fa’ailoa le fa’aolataga ma le viiga o le Atua.

Ua tatou sauni ma fa’atalitali atu i le afio mai o le Ali’i Fa’aola na te aumaia mo i tatou le

fa’aolataga. A o le a sa tatou tali atu i le Atua o le a afio mai. Ia tatala o tatou loto, ta te talia ai

lona fanau mai. Fa’ailoa le agaga fa’afetai ma le viiga e toe fa’afo’i i le Atua. Fa’apei ona faia e

leoleo mamoe, sa latou alalaga e fa’afetaia le Atua ma lana fa’aolataga. So’o se tagata na te iloa

ona fa’afo’i le fa’afetai, o le tagata poto lena ma amanaia e le Atua.

Mea e fai:




*****MALOLOGA O LE KERISIMASI & TAUSAGA FOU!!***************

Ianuari 14, 2018

Mataupu 14: “E fa’amaoni le Alofa o Matua.”

SINI: Ia mae’a le mataupu ua iloa ma malamalama tamaiti, e fa’amaoni pea le alofa o matua ia i

latou, o le mea lea e ao ai ona latou usiusita’i ma ava i matua.

Tusi Faitau: II Samuelu 18: 31-33

FESOASOANI MO FAIAOGA:



18



E ao pea ina manatua e i tatou e foliga mai i lenei tala ua le usita’i ta’ita’i au foi nei na

talosaga i ai Tavita ina ia alofagia lona atali’i o Apisaloma. Peita’i, e pei e foliga mai ua iloa lava

e Tavita le faigata o lona fanoga po’o Iona mana’o na ave i ta’ita’i ‘au nei ma le au tau o totoe ia

te ia. Aua foi o le fili numera tasi lea o lo’o fa’asagasaga atu nei i ai e fa’aumatia ona o lona

fa’ataute’e i le tupu fa’au’uina e le Atua, ma o lona fa’ataute’e a foi lea i le Atua. Ae atonu sa

lagona lava e Tavita le mea e o’o iai Apisaloma, ae ua le mafai lava ona taofia lona alofa

fa’avalea, e ui ina tiga ma oona lenei tui ua tui ai o ia e Apisaloma lona atali’i. Aua e le’i mamao

tele atu foi lona fa’anoanoa ona o le fasiotia e Apisaloma o lona uso matua o Amanono, o lona

atali’i lea. Lea sa sola ai nofo i Kasuri i tausaga e tolu. Ae o Tavita lava na mafua ai ona toe o’o

mai Apisaloma ona o lona manatu o ia lea o le a soloa’i ane i le nofoali’i pe a mavae o ia. Peita’i,

ua tula’i mai lenei fa’aletonu tlee, ina ua fa’aliliu loto o tagata ia te ia ma tete’e atu i le tupu. O ia

mea uma lava na faia e Apisaloma atoa ma lona tuliloaina o Tavita ia fasiotia ina ia faoa le malo

i lalo lana ta’ita’iga, e le te’a ai lava le alofa o Tavita i le tama lenei o Apisaloma. E pei foi ona

taua i la tatou mataupu ua mavae le talosaga a Tavita, ia tautuana ia alofa ia Apisaloma. E ese le

faigata o lenei mea o le alofa fa’amatua. E tiga lava ona fa’asagatau mai, ae a iloa e matua o le a

fetaia’i fanau ma faigata, e tiga le ita, tiga le oona o mea ua faia e fanau, ae vave lava ona

momomo le loto i le alofa i le mafatiaga o le a o’o i ai. O le tala a le tusitala ina ua vaaia e le

tagata vaai le tagata o momoe mamao mai, sa ia ta’uina atu ia Tavita, fai mai, le tupu ua i ai se

tala. Peita’i, sa toe vaaia e le tagata vaai le tasi foi tagata o momoe to’atasi mai. Sa taunu’u le ave

feau muamua o Aimaasu lea ma ifo toele ma vivi’i i le Atua ina ua lavea’iina le tupu. O le fesili

muamua lava a Tavita, “O saogalemu ea le taule’alea’ o Apisaloma?” Ua fefe Aimaasu e ta’u atu

i le tupu le mea ua o’o ia Apisaloma. ONa ta’u atu lea e le ave feau ona lua ua faapea atu, Tavita

ia fa’atafa ese oe, e foliga i le tala lenei a Tavita ia Aimaasu, e le maua mai le mea o lo’o ou fia

fa’alogo i ai. A’o Kusi ua ifo ma fai atu i le tupu e tusa ma le alofa o le Atua i ai latou ae maise o

lona lavea’iina o le tupu. A’o Tavita ua fa’apea atu i le ulua’i fesili lava lea na fesili ai ia

Aimaasu. E le’i fa’afiti Kusi ma ia fa’apea atu, “Ia pei o lea taule’ale’a e ua ita i lo’u atali’i le

tupu, atoa ma i latou uma e tutu mai e agaleaga ia te oe.” Ua ta’u atu ua oti Apisaloma ona tagi

aueue ai lea o Tavita sa ia tagi tautala ma fa’apea, “Lo’u atali’i Apisaloma e, lo’u atali’i e, lo’u

atali’i Apisaloma e, ta fia oti e sui ai oe. Apisaloma lo’u atali’i e, lo’u atali’i e.” Vaai la outou

fanau i le tele o le alofa fa’amatua. Vaai i ai i le malosi o le alofa fa’amatua i fanau tiga lava ona

agaleaga ae alolofa pea matua. E fa’apena i tatou, tatou te fiu e agaleaga ma le le usiuista’i, ae

alolofa pea o tatou matua i ai tatou. Vaai, ‘aua le avea lou manatu e alofa pea ou matua ia te oe

tusa po’o le a lou fa’alogogata, leai, afai ua tatou iloa le fa’amaoni o le alofa o tatou matua ia i

tatou, ia fa’apea fo’i ona tatou tali atu i ai, i lo latou alolofa. O lona uiga, e ao ona matua tu’u

atoa lo tatou malosi e saili ai le mea o lo’o mana’o ai o tatou matua. Muamua ia tatou usiusita’i,

a maua le usiusita’i o le a faigofie ona tatou maua le poto. Aua foi o le poto e maua i le ava i le

Atua fa’atasi ai ma matua. Aua o le tama’itiiti usita’i e toaga e fai feau ma ona tiute o le tamaitiiti

a’oga. Aua tatou te pei o le tama o Apisaloma i le tele o leaga na ia faia, ae fa’amagalo ma alofa

pea i ai lona tama o Tavita. Ae a tumu loa le fua, ia ua leai se aoga. O lona uiga o le malaia po’o

le oti e pei o Apisaloma.

19

Mea e fai:




Ianuari 21, 2018

Mataupu 15: “O le Atua fa’amanuia.”

Sini: Ia mae’a le mataupu ua iloa ma malamalama tamaiti i le manuia o Isaraelu lea na

folafolaina e Isaia.







O le isi lea vaega taua o le galuega a Isaia, o le folafolaga po’o le valoaga o le afio mai o le

Mesia. O se feau o lo’o aumai ai se fa’amoemoe o le ola mo le nu’u o Isaraelu, a’o aumau ma

nonofo ai i lalo o pulega a le malo o Papelonia. O le alaga a le perofeta o isaia e fa’ailoa atu i le

nu’u o Isaraelu, e i ai le aso e fa’ati’eti’e ai Isaraelu i le mea maualuga, ona o le Mesia, po’o le

Fa’aola o le lalolagi e tupuga mai i Isaraelu. O le manuia lea o Isaraelu. E ui ina fa’amata’u e

malo malolosi ma fa’atafeaina, ae e i ai le aso e fa’aeaina ai, aua e auala mai ia Isaraelu le

finagalo o le Atua mo le fa’aolataga o le lalolagi. A’o le Mesia valoia e pei ona tautala i ai Isaia e

le o iloa e Isaia po’o ai tonu ua filifilia e le Atua e fai ma Mesia. E pei ona taua e Isaia, o le Mesia

na te aumaia le manuia i le nu’u, mo latou o loo tumau pea lo latou fa’atuatua ma talitonu i le

Atua e ui ina o iai i nu’u ese ma i latou o lo’o fa’aalia pea lo latou naunau i le Atua e fesoasoani i

ai latou. Aua o latou lava o auauna filifilia e le Atua ma e fa’amaoni pea le Atua i ana folafolaga.

O le manuia lena o Isaraelu, aua e ui se nu’u itiiti ma le fa’atauva’a, a ua filifilia lava e le Atua e

ala mai ai lana fa’aolataga i le lalolagi. O le ala lea o lo’o latou tumau pea i lo latou talitonuga e

le tu’ulafoa’iina i latou e le Atua, aua o tagata o lona filifilia. E le’i faigofie i le nu’u i lo laotu

vaitaimi ona talia le finagalo o le Atua, aua ua fiu e fa’atalitali pea le o’o mai o le Mesia lea na

valoia e Isaia. Ae sa taunu’u lava le manuia na o’o i le nu’u aua o le Atua e fa’amaoni i ana

folafolaga. Ae o le mea na tupu tamaiti, ina ua taunu’u valoaga a le au perofeta ma ua afio mai

Iesu le Mesia, o lo’o atagia uma ai lava i ona uiga ma lona soifua le manuia na folafolaina e Isaia

atoa ma ona uiga. O le feau la a le perofeta e i ai lava le taimi e fa’amanuiaina ai latou o e

fa’atalitali pea ma le onosa’i.

20

Aua o le Atua lava na te ta’ita’i ese i latou mai lo latou ola pologa ma ta’ita’i atu i latou i le

nu’u ua fai ma o latou tofi. O i latou fo’i e aupito sili ona fa’amanuiaina aua e le gata e o ese atu

ma manuia mai mea sa latou aumai ai, ae o lo’o sili fo’i ona fa’amanuiaina i latou e le Atua.

A’OA’OGA:

O lona uiga o e lava latou te matua onosa’i ma le fa’atuatua ma tumau pea lo latou talitonu i

le Atua, o le a sili ona fa’amanuia i ai le Atua. E pei o upu o masani ona tatou fa’alogo i ai, o le

tagata usita’i, fa’alogo ma le onosa’i ua maua le mea lelei, ma fa’amanuiaina lona olaga. Ioe

tamaiti, a’o tatou o iai i lo outou ola taumafai i a’oa’oga e le gata i a’oga palagi ma a’oga fo’i a le

faifeau, ‘aua tatou te fiu gofie, ‘aua tatou te fa’avaivai, tatou tauivi ma le onosa’i ma tatalo pea i

le Atua e fesoasoani mai. O le mea moni e le tu’ulafoa’iina e le Atua i tatou pe a tatou tatalo pea

ma le onosa’i. E pei ona ia fa’amanuia ia Isaraelu i lo latou onosa’i e fa’apena fo’i ona ia

fa’amanuia i ai tatou pe a fa’apea ona tatou maua le ola tauivi ma le onosa’i.

Mea e fai:




Ianuari 28, 2018

Matāupu 16: “O amioga e tatau mo le Kerisiano” (Aso Tupulaga)

Sini: Ia mae’a le mataupu ua iloa ma malamalama tamaiti, ia faia amioga fa’a-kerisiano e tusa

ma le finagalo o le Atua.

Tusi Faitau: Efeso 6: 1-9

Fesoasoani mo le ta’ita’i





O le tusi lenei a le aposetolo o Paulo ia Efeso, o lo’o vaevaeina i vaega e lua. O le vaega

muamua (1:1-3;21), o lo’o ta’ua ai le tulaga o le kerisiano ma le vaega lona lua (4:1-6;24), o tiute

fa’atino a le au kerisiano. A o le tasi lenei o taulaiga o le tusi a le aposetolo ia Efeso ina ia nofo

malama le au kerisiano i le tulaga o keriso e tatau ona taula’i i ai le soifua ma le ola fa’akerisiano

i aso uma o le olaga. Masani le aposetolo ona fa’aogaina le fuaitau “ia Keriso”, o lona uiga, o le

feau aupito sili lea e tatau ona ola ai, ma fa’amuamua i manatu o le au fa’atuatua i Efeso. O i ai

lo latou fa’amoemoe i le Keriso, aua o le alofa tunoa o le Atua e ala i le fa’atuatua , o le meaalofa

foa’i fua lea a le Atua e fa’aolaina ai le tagata. E tatau la ona amio ai le Kerisiano.

21

I le vaega lenei o le mataupu, o lo’o tautala ai le aposetolo i le amio e tatau ona ola ai le tagata

kerisiano. O lo’o amata apoapoa’i le aposetolo e amata mai i fanau ma matua, o le va fa’alea’iga

e tatau ona maua’a ma mausali. Aua fo’i o le fa’avae lea o se aiga kerisiano e fofoa mai i totonu

o le aiga. A lelei ma mautu le va lea o matua ma fanau, e fa’apena ona tupuolaola le finagalo o le

Atua. O lo’o amata le fautuaga a le aposetolo i fanau, aua o le lumana’i lea o aiga, nu’u, malo,

aemaise o le galuega a le Atua. O lo’o fa’amanatu e le aposetolo i fanau, e tatau ona fa’alogo ma

usita’i i matua. E tatau ona ola ai tagata uma. O i’ina e maua ai le manuia pe afai e usita’i ma

fa’alogo o lo’o soso’o mai ai ma le fautuaga i tamā e le tatau ona tu’ulafoa’i le fanau, a ia tausi i

apoapoaiga e tusa ma le finagalo o le Atua. O le vaega lona tolu o fautuaga o lo’o fa’asino i

pologa, po’o auauna e tatau ona fa’amaoni ma fa’alogo i o latou ali’i e tatau ona tu’uina atoa le

manatu ma le lagona e fa’apei ona tu’uina atoatoa e faia le finagalo o keriso.

E fa’apea fo’i le fautuaga i ali’i po’o pule e tatau ona taula’i le ta’ita’iga i ala o keriso. A o le

atoaga o ia apoapoaiga a le aposetolo, ina ia fa’atino ma ola ai i aso uma. O le fa’amoemoe lea o

keriso na valaauina ai i latou i lona finagalo. O le ola i le amio e tatau mo le kerisiano. E

fa’apena fo’i le finagalo o le Atua mo i tatou le fanau, o le amio, e tatau ona amio pulea,

fa’aaloalo, tausa’afia, ae le gata i lea ia fa’alogo ma usiusita’i, aua o le poloaiga lea a le Ali’i mo

lana fanau. O le fa’amanuiaga fo’i lenā e maua e i latou uma o lo’o ola ma savavali i le finagalo

o lo tatou Ali’i o Iesu Keriso. O lē ua ia a’oa’o mai mo i tatou le ala tatou te ola ma savavali ai.

Mea e fai:




Fepuari 04, 2018

Mataupu 17: “Ia manumalo i puapuaga.”

Sini: Ia mae’a le mataupu ua iloa ma malamalama tamaiti, i le feau a le tusitala. O le a le o’o

mai o faigata ma tiga i le olaga, ‘aua le fa’avaivai ai, ae fa’amoemoe ma tatalo i le Atua e aumai

ai le malosi e fai ai le galuega.

Tusi Faitau: Neemia 6: 1-16






O le tala lenei i le tagata o Neemia, le tasi o auauna loto tele ma le fa’atuatua i le Atua. O

Neemia o le tasi lenei o tagata sa avea fa’atagata o taua e le malo o Peresia. O ia lenei ua auauna

22

i le maota o le tupu, ma sa matua fa’amoemoeina lava o ia ele tupu o Anetaseta, le tupu o

Peresia. O le ala lea na faigofie ai ona matu’u mai le finagalo o le tupu e tu’u atu o ia se’i alu e

toe atia’e pa o lona malo ua soloia i lalo ma f’aatafunaina. Ina ua fa’alogo Neemia i lenei tala

fa’anoanoa e le’i toe mapu lona tatalo ma anapogi i le Atua ina ia fa’asino mai se ala faigofie ai

ona matu’u mai le finagalo o le tupu seia toe foi i lona nu’u ma lona aiga e atia’e ona pa sa fai ma

mitamitaga ona o lona matagofie ma le malolosi, a’o lenei ua f’aatafunaina. E le’i faigofie le fo’i

atu o Neemia e toe tau atia’e le aai, po’o lona itu i saute o Iuta, ae maise ai le aai o Ierusalema e

fa’amemelo i ai so’o se Isaraelu, aua o le aai e paia, e afio ai le Atua e pei ona latou taofi i ai. E

fai o le le faigofie o le fo’i atu o Neemia, ae e sili atu foi ona le faigofie le feagai ai ma le galuega

o le tau atina’eina o le pa o le aai ua matua soloia lava i lalo. E fai o le faigata o le galuega, ae sa

sili ona faigata le fa’alavelave o tagata e pei o Sanepalata ma Tovia, o loo fai ma ta’ita’i po’o

Kovana I Samaria po’o le malo i matu. Tagata nei ua fai ma fa’alavelave i le galuega a Neemia

ma nisi tagta sa latou fesoasoani ane ia te ia. Ua laua fa’amata’u ia Neemia, ae le’i fa’avaivai ai

Neemia seia oo ina maea le galuega. Ona o le auai fa’atasi o le Atua ia Neemia mo le toe fausia o

pa o le aai, o lo o atagia mai i lenei tala o le finagalo lava o le Atua e ala mai ai Neemia i le toe

fausiaina lea o le aai fa’atasi ai ma le ola fa’aleagaga o tagata. Le ala lea o le finau pea o Neemia

ina ia tini le fa’amoemoe. Sa fa’alagolago i le Atua i le malosi e fai ai le galuega ma le loto tele.

Ua avea le fa’amaoni ma le fa’atuatua o Neemia i le fa’atasi mai o le Atua i le galuega ma ala ua

malosi ai e ui na filifilia ai lava o ia e fai ma kovana o le malo i saute po’o Iuta, E foliga mai la i

le aano o le mataupu, ia ‘aua le fa’avaivai pe solomuli-gofie pe a fetaia’i ma puapuaga po’o

lu’itau o le ola. Aua o le mea moni, ua avea lu’itau ma auala e fa’amalosia ai lenei auauna ia

fa’atino le galuega. E pei foi ona fa’aalia i le galuega a Neemia, o le toe foi mai o tagata o le

tafeaga a ua tele le suiga o le nu’u, ua feusua’i solo tagata o le malo ma tagata o isi malo, e pei

foi o le auali’i nei sa fai ma fa’alavelave i le galuega. Ua avea lea aga ma ala ua le tasi ai le loto.

A ua faifai ma loto leagaina Neemia, ae malosi pea le naunau atu o Neemia e le tu’ulafoa’ina o ia

ma i latou uma sa feagai ma le galuega a le Atua, ma maea lelei le galuega o to’afilemu pea

Neemia ma nisi o le nu’u. O le tasi lenei uiga e masani ai tele tatou le fanau o le faifai tala, ma

tau fa’aleaga i se taumafaiga lelei a se tasi tagata. E vaai ane loa ua lelei ane lea tagata pe o le a

foi se lelei ua ia faia, ua tele foi tala e fai i ai, ma taumafai e saili se ala e ta’uleagaina ai. E leai

se agaga e taumafai e lagolago ma fesoasoani e fa’alelei atili. E pei o foliga mai tatou te le loto

ma le fiafia e lelei tele se tama poo se teine, a ia tutusa uma i le maualalo o le soifuaga o lo’o i ai.

Ae le fa’apena le uiga o le soifuaga tama ma teine, e le mafai ona aga’i atu i se lumana’i manuia

pe a tatou tumau pea i uiga tuai e leai se mea lelei e maua ai. ‘Aua tatou te fa’avaivai e fetaia’i

ma faigata ma fa’afitauli o le ola. O le olaga lenei o le olaga o tauiviga, ‘aua ne’i fa’alavelave ma

fai ma fa’afitauli i lou ola taumafai mea fa’afiafia o le olaga, ae toaga e tatalo ma mafuta i le Atua

e fa’asino mai ai ia te i tatou ala tatou te manuia ai. Vaai foi ia Neemia, e le’i fa’afiti pe

fa’avaivai ae sa matua tu’u atoa lona malosi e fetaiai ma le tele fa’afitauli a’o feagai ma le

galuega faigata o le toe ati a’e lea o pa ma toe fa’alelei le aai. O lona fa’aeaina ua fai ai ma

ta’ita’i o le malo. Ioe tamaiti, e le vale le taui o le tama ma le teine o la finau, loto tele, ma le

mafuta i le Atua e le aunoa e fesoasoani mai e manuia ai taumafaiga.

23

Mea e fai:




Fepuari 11, 2018

Mataupu 18: “O le fetaia’i ma puapuaga, e a’oa’oina ai tatou i le fa’alogo i le Atua.

Sini: Ia mae’a le mataupu ua iloa ma malamalama tamaiti, e aoga mea tutupu e maua ai ni

a’oa’oga tāua mo le manuia i le lumana’i.

Tusi Faitau: Eperu 5: 1-10






O le tele o fa’alapotopotoga e pei o nu’u ma Ekalesia ua fa’ataunu’uina le tele o galuega ona

o le ola usiusita’i i e ua avea ma ta’ita’i. O le tele fo’i o nisi tagata e ala ona usita’i, ona o le

fefefe i ta’ita’i. O le ala lea o le manatu e fa’atino galuega, ma faia e pei ona fa’atonuina. E ese la

le ola usita’i lena nai lo le usita’i e le’i faia ona o le fefe, pe ona o lo’o pulea e se malosi ese. O le

usita’i o Iesu Keriso, o le usita’i na tupu mai i lona loto fuatiaifo, ina ia ola manuia tagata. E le

tau fa’ailoaina faigata ma puapuaga na feagai ma Iesu ona o lona alofa i tagata. Peita’i, na avea

lona usita’i ma talia puapuaga ma auala e fa’amausaliina ai lona tumau ma fa’alogo i le Atua. O

le ala lea o le aumaia o le ola ositaulaga sili. O le tagata e filifilia e le Atua e fa’ataunu’u le

galuega lelei mo tagata. E fetaia’i ma fa’afitauli ma faigata o amio a tagata eseese, o e popoto

atoa ma e valea. E ao fo’i ona maua e le ositaulaga sili le onosa’i ma le agamalu. E faia e ia

taulaga lelei e totogi ai agasala a le nu’u. O lona uiga e tiga ma faigata le galuega. E le soona

filifilia fo’i se isi vagana le ua filifilia e le Atua. O Mekisateko sa avea ma ositaulaga sili, o lona

usita’i ma lona onosa’i na fa’amaualugaina ai lona tulaga. O le ala lea o le taua o lona igoa ona o

lona onosa’i ma fa’alogo i le Atua. O mea fo’i ia e tatau ona tatou ola ai, o le usita’i ma tauivi i

fa’afitauli tatou te iloa ai le iai pea o le Agaga o le Atua ia tatou fa’aiuga fai, aemaise le

a’oa’oina ai pea o tatou i mea lelei ma le taua.

O lenei lava olaga tatou te ola ai, ua tele lava ina tatou sa’i ma faitio i le Atua pe a o’o mai

mea faigata i o tatou olaga. O nisi fo’i taimi ua tatou manatu, ua tatou pologa ona o le Atua ma le

tala lelei. E i ai fo’i taimi tatou te manatu ai tatou usiusita’i ma fai le finagalo o le Atua ina ne’i

o’o mai puapuaga ia i tatou. O le mea fo’i lena na le fefefe ai Ioane ma Papu e aumai le tala lelei

i Samoa, a o Paulo fo’i ma nisi o le au aposetolo sa fetaia’i ma puapuaga ona o le tala’iina o le

24

tala lelei i nu’u ese. Aua ua uma ona tu’u e Iesu le alafua e manumalo ai, o le usita’i ma fa’alogo

i le Atua n ate aumaia le malosi fa’aleagaga e fai ai le galuega.

O le mea e ao ina tatou iloa, e le o ni fa’afitauli ma ni puapuga mea ia tatou te fetaia’i. A tatou

mafaufau loloto i le tele o mea faigata na feagai ma Iesu, na o’o lava i le tunuuga o le oti ma le

tuugamau. O le usita’i lava lea i le Atua e to’atasi. O lo tatou asaina o faigata ma puapuaga o le

fa’aalia lava lea o lo tatou usita’i ma fa’alogo i le Atua. O se a’oa’oga, o le kerisiano moni e

manumalo pea i puapuaga ma faigata e tofotofoina lona olaga fa’atuatua. O uiga ma aga na o le

olioli e fa’avavau na saunia e Iesu Keriso. Toe fa’ailoa pea tausaga na o’o mai ai le tala lelei i

Samoa, po o ua fia fo’i tausaga.

Mea e fai:




Fepuari 18, 2018

Mataupu 19: “O le Atua Fa’amagalo”

Sini: Ia mae’a lenei mataupu, ua iloa ma malamalama tamaiti, e fa’amagaloina i tatou i le alofa

tunoa o le Atua.

Tusi Faitau: Kenese 4: 1-16






O le tala masani lenei ia Kaino ma lona uso o Apelu le fanau a Atamu ma Eva. Ua tatou

malamalama fa’atasi i lenei tala. O le tala i le osigataulaga a lenei au uso. O le fuaiupu e lua o

lo’o fa’amatalaina ai galuega e nei tama pe a fai ua galo, “ O Apelu fo’i, o le leoleo mamoe o ia,

a o Kaino, o le galue fanua ia (f-2). “E fa’asolo pea le fuaitau se ia o’o i le fuaiupu e valu ma iloa

manino ai le mea na tupu. O le tala a le tusitala fai mai ua mū le taulaga a Apelu ae le i

fa’amanuiaina le taumafaiga a Kaino. O le mafuaga tonu lea na fasioti ai e Kaino lona uso. Ua

avea le ita o lona loto e fai ma auala e fa’atino ai le agasala matuiā` e sili ona le fiafia i ai le Atua.

O lo’o tatou va’ava’ai nei po’o le ā se tali mai a le Atua i lea mea. O le fasioti tagata o le agasala

lea e tatou te mafaufau fa’atasi uma ai e le fa’amagalo ina e le Atua. E ui i lea o lo’o fa’amatala

manino mai i le tusi faitau, o le fetalaiga a le Atua ia Kaino, ua iloa manino ai le fa’amagaloina e

le Atua Kaino i lana mea leaga sa fai. E ui ina fa’asala e le Atua Kaino, ae na ia toe folafola le

fa’asalaga o le tagata e na te fasioti i a Kaino.

25

A’oa’oga:

E alofa le Atua i lana tagata na ia manava iai le manava ola, ae inoino o ia i le agasala.O le

mea lava lea na le tu’uina ai e le Atua lana upu ina ia taunu’u ia Kaino, auā o le Atua alofa ma

fa’amagalo i lana tagata na fai.E alofa le Atua ia’i tatou, na ia fa’amagaloina i tatou i o tatou

fa’aletonu uma lava. Peita’i, ia le avea lea ma tulaga e faia ai pea e i tatou le agasala a’o silasila

mai ona fofoga alofa. Afai ua tatou sesē, ia o tatou iloa ona fa’atoese i le Atua ma ia aua ne’i toe

faia le fa’aletonu o le tuana’i. O le fa’amagaloga mai le Atua, o se manuia lea ua tatou maua fua

ona o lona alofa tunoa. Ia manuia le Aso Sa.

Mea e fai:




Fepuari 25, 2018

Mataupu 20: “O le ulua’i vavega na faia e Iesu.”

Sini: Ia a’oa’oina ma fa’amalamalama i tamaiti o le ulua’i vavega lava na faia e Iesu sa faia i

Kana i Kalilaia. O iina sa fa’aalia ai le silisili ese o lona mana, e ala i lenei vavega ofoofogia sa

ia faia.

Tusi Faitau: Ioane 2: 1-8






O le fa’aipoipoga na faia i Kana i Kalilaia, e foliga mai o le fa’aipoipoga o le aiga o le Ali’i

aua fai mai sa auai ia Maria le tina o Iesu. E le o i ai i fa’amatalaga a le tusitala o Ioane pe aiga

Iesu i le tama po’o le teine. E le taua foi e le tusitala ia suafa (igoa) o le ulugali’i fou. Pau le mea

o lo’o fa’amalatalaina sa vala’aulia ai foi Iesu ma ona so’o i le tausamaaga. Ua mafai foi ona

tatou iloa manino o Iesu sa ma aga i ia ona po sa taua tele le fa’aaogaina o le uaina i mafutaga

fa’apenei. O le ala lea na matua tapena ai aiga, ia lava ma totoe sauniuniga. Peita’i, ona o Maria

o lo’o auai i sauniuniga o le tausamaaga, o lea na ia iloa ai ua le lava le uaina. E le tatau ona iloa

e tagata lenei mea ua tupu, aua e avea ma mea e ta’uvalea ai le aiga molimau a le au faievagelia,

o se tina lelei ma le amio lelei. Sa taua o ia o le taupou a’o tenie o ia. E o’o foi ina avea o ia ma

tina, o le tina fa’alogo ma usita’i i le Atua. O lona uiga la o Maria o le tina fai mea lelei e le

mana’o e fa’aletonu se mea. O lea ua le nofonofo lelei ai ae ua ia taumafai e saili se ala e foia ai

lenei fa’aletonu o le a aliali i lona aiga. Ae ai foi ua manatu alofa Maria i si ana tama o Iesu i le

26

va ma ona so’o ina ne’i ta’uleagaina atu ai ma Iesu i lenei luma pe a o’o ina uma le uaina. O lea

na manatu ai e ala i lona fa’atuatua e tusa ma feau na ia maua mai le Atua e uiga ia Iesu. Sa le’i

toe fa’atali loa a ua ia logo loa ia Iesu ma lona talitonu na’o le pau lea o le ala e maua ai le tali o

le fa’afitauli. Aua ua ia mauatinoa na’o Iesu na te mafai ona aumai se tali lelei e tusa ma le

fa’aletonu ua tupu. E ui foi la ina manatu le Ali’i e le o se taimi e fa’apea e fa’aali atu ai le silisili

ese o le mana ma le malosi o lo’o ia te ia, ae ua ia le tu’ulafoa’iina le augani ane a lona tina. E le

finagalo foi o ia i se mea fa’aletonu, aua e taua foi ia te ia lonaaiga. O le naunau o Maria e tupu

mai lona fa’atuatua e loto tele ai e ta’u ia Iesu le fa’aletonu. A’o Iesu ua fetalai atu, “E le’i o’o i

lo’u itu aso.” Ui i lea o le fa’aaliga lea o le Atua alofa na te le teena le ua sulufa’i atu ua fia maua

se fesoasoani.

O le mea aupito taua i lenei vavega e ao ina tatou iloa ma manatua pea, o le mea e i ai le Ali’i,

e leai se fa’aletonu, ua na’o mea lelei ma mea matagofie e viia ai le Ali’i. E fa’alelei ma foia e

Iesu so’o se fa’afitauli. O a foi ni mea mamafa ua fai ma outou amoina la’u amo o lau avega foi e

mama ia.” E le gata o le ulua’i vavega lea ua faia e Iesu, ae o le a fa’amausali atili ai lea o loto o

le au so’o e mulimuli atu ia Iesu. Tamaiti ia tatou iloa le mea lenei - o a fa’aletonu ma fa’afitauli

e tutupu i o tatou olaga, alu ia Iesu e ta’u i ai ou mafatiaga. E ao ina e manatu ia e alu ma lou

talitonu ma le fa’atuatua e leai se mea e le mafaia e le Atua.

Mea e fai:

1 Fai ni fesili e toe fa’amalamalama atili ai le mataupu

2 Usu se pese e fa’atatau i le mataupu

3 Ia fai se tatalo fa’ai’u.

Mati 04, 2018

Mataupu 21:“E tāua le Tutū fa’atasi.”

Sini: Ia mae’a le mataupu ua iloa ma malamalama tamaiti i le ola galulue fa’atasi ma le loto e

tasi.

Tusi Faitau: Mareko 2: 1-12






E i ai le talitonuga fa’a-Iutaia, o le o’o mai o ma’i i le tagata o le taui lea o ana agasala mai

ana amio sa fai. Sa i ai la le tasi tagata ma’i, sa ma’i i le supa. O le ma’i foi sa tupu ia te ia, e pei

ona taua, ma’i ona o ana agasala, a’o maua lona malosi.Ae ui i lea, sa tumau pea le alofa o nisi o

ana uo ia te ia. O lea sa latou saili ai se ala e avatu ai lo latou uso ma’i lenei ia Iesu ina ia

27

fa’amaloloina. O le molimau a le tusitala o Mareko sa matua fa’atumulia le fale lenei sa i ai

a’oa’oga a Iesu ma ana vavega, ma ana fa’amalologa i le motu o tagata e to’atele, ua lolofi atu e

fia matamata ma fa’alogologo i le aave mai o tala i le tagata lenei o Iesu. E le’i avea le le ofi ma

le tumu saisai o le fale ma ala ua fa’avaivai ai le au uso lenei, ua latou si’i ma’i fa’atasi ma si o

latou uso ma’i supa lenei. Ua latou laga ese mea ua ato ai le fale lenei e fai ai a’oa’oga a Iesu, ma

latou tu’utu’u ifo ai le moega na taoto ai lo latou uso ma’i lenei. O le tala a Mareko, ua silafia e

Iesu le fa’atuatua o le au uso lenei na latou tu’utu’u ifo le tagata ma’i. Ona ia fetalai atu ai lea i le

ma’i supa, “Lo’u atali’i e, ua fa’amagaloina au agasala.” Ua silafia lelei e Iesu le fa’atuatua ma le

lotogatasi o i latou nei, ona tupu ai lea o lona fiafia i lenei uiga taua ua ia i latou nei na fataina

mai le ma’i supa, aua ua latou ave le ma’i ma lo latou fa’autuatua ma le lotogatasi o i latou nei,

one tupu ai lea o lona fiafia i lenei uiga taua ua ia i latou nei na fataina mai le ma’i supa, aua ua

laotu ave le ma’i ma lo latou fa’atuatua e ola ma malolo lenei ma’i ia Iesu. E le’i fa’avaivai pe

solomuli ina ua latou taunu’u atu ua matua le ofi le fale. Ua latou matua saili se auala e fa’ao’o

atu ai le ma’i lenei ia Iesu. Ioe, e mafai foi ona malolo ma’i, pe a tasi le loto ma gatasitasi loto

fa’atuatua o le au si’i ma’i. Sa latou o ma lo latou talitonu ma le fa’atuatua fa’atasi e mafai e Iesu

ona fa’amalolo lenei ma’i. Tamaiti, e taua ia o le tasi o le loto. Manatua foi le upu masani lea e

fa’alogo so’o ai lava tatou, “A pulupulu lima fa’atasi e mama ai le avega.” O lona uiga, o le tele

o lima e galulue fa’atasi ma le loto e tasi e faigofie ai se taumafaiga ma i’u i le manumalo. O lona

uiga e taua foi lou ola fesoasoani. Afai ua le mafai e se tasi o ou uso, sou tuafafine po’o sou

tuagane se mea ona o lona vaivai, aua tatou faifai pe ula iai, e taua tele lo tatou fesoasoani i ai. E

fiafia tele lo tatou Ali’i ae fa’apea ona tatou faia, aua o lona finagalo tonu lea. E o’o foi pe a sauni

i tatou i se fa’amoemoe, a le maua e i tatou le loto gatasi ma le fa’atuatua atoatoa i le Atua, e le

mafai ona tatou maua le sini o le manumalo. E taua lou fa’atuatua, ae sili ona taua pe a fa’atuatua

uma tagata i le Atua. O le a sili ona manuia ma maua e tagata uma le loto tetele e fetaia’i ma

faigata o le olaga, ma maua ai le amio lelei ma le tausa’afia e viia ai le Atua.

Mea e fai:




Mati 11, 2018

Mataupu 22: “Mafuta fiafia i le talisuaga a le Ali’i”

Sini: Ia mae’a le mataupu ua iloa ma malamalama tamaiti, o le auai i le fa’amanatuga o le talia

lea ma loto fa’afetai ma loto gatasi o le fa’aolataga ua faia e le Atua mo i tatou uma.”

Tusi Faitau: 1 Korinito 11: 23-27




28



O le tasi lenei o sauniga fa’apitoa a la tatou Ekalesia ua taua o le fa’amanatuga. E tatau foi

ona matua fa’amalamalama lelei tulaga uma e mafua ai ona fa’apitoa i latou e auai i lenei

Sauniga Paia. I la tatou Ekalesia, e na’o le lua lava a tatou Sauniga ua taua o le Sakarameta, ua

na’o le papatisoga ma le fa’amanatuga. O le sauniga la lenei o le fa’amanatuga sa poloa’iina ai i

tatou e lo tatou Ali’i o Iesu, ina ia tatou faia lenei sauniga e fai ma fa’amanatuga o lona maliu i le

satauro ma lona toe tu manumalo mai i le tu’ugamau ma le oti. Ua i fa’ato’ilaloina ai le matuitui

o tiga o le oti ma le tu’ugamau. Ae ua aumaia i tatou i le manumalo e fa’avavau o lo tatou Ali’i o

Iesu, ma ua togiolaina ai i tatou mai a tatou agasala uma lava, pe a tatou salamo ma talia ma le

fa’atuatua lea lava fa’aolataga. O le sauniga la lenei na fa’amanatu atu e le Aposetolo i lana tusi

atu i le Ekalesia i Korinito. Ona o le tulaga fa’aletonu ua o’o i ai tagata o le Ekalesia, ua

fevaevaea’i ai, ua fai vega tagata ma ua latou fa’amamafa ma fa’ataua le au tala’i po’o misionare,

ae ua le fa’ataua le e ona le feau ma le tala lelei. Na auina atu latou i Korinito e ta’u atu ai latou

tala i le ola, ma le fa’aolataga ua faia e le Atua e ala i le Keriso manumalo. O le manatu la o le

Aposetolo, o i latou uma o e auai i lenei talisuaga a le Ali’i, e ao ona matua su’esu’e ifo le tagata

lava ia te ia lava, pe tatau ona ia talia ma auai i lenei talisuaga. Aua o le talisuaga lenei e fa’atasia

ai loto ma agaga o tagata uma i le Ali’i e to’atasi, le Atua ole Tama, le Alo ma le Agaga Paia. O

lona uiga o i latou uma ua auai i lenei talisuaga, e ao ona lotogatasitasi, fealofani, fealolofaa’i,

galulue ma mafuta fa’atasi i le loto e tasi. E le tatau iai se tagata manatu fa’apito, e le agava’a i

lenei talisuaga se tagata tusitusilima ma le fa’ailoga tagata. E le agava’a i ai se tagata vaai

maualalo i nisi ona uso, e matititva ma puapuagatia. O le fa’amanatu lea a le Aposetolo na ia tusi

atu ai i le Ekalesia i Korinito. Afai ua latou tali le Ali’i toe tu ma le fa’aolataga ua ia saunia, e ao

i tagata uma ona mafuta i le loto ma le agaga e tasi aua e tasi le Atua o le tama fo’i lea o tagata

uma. E pei ona tasi le Tama ma le Alo, e fa’apena fo’i ona tasi o i latou uma i le Ekalesia. O le

feau la a le Aposetolo, e maumau le taimi e fai ai talisuaga e pei ona fa’atonuina ai i latou e le

Ali’i, pe a fai e le o tasi o latou tolo ma fa’amoemoe i le tala lelei i le Keriso toe tu. O le

fa’amanatu fo’i lea mo i tatou le fanau, e taua tele lo tatou auai i le talisuaga a lo tatou Ali’i. O le

fa’ailoga lea o lo tatou talia ma le fa’afetai i lana fa’aolataga. Sa ia saunia ma ofo atoa mai ai

lona lava soifua ina ia fa’aolaina i tatou mai le olaga pologa sa tatou i ai. E le gata la e

fa’amanatu mai ia i tatou o e ua auai i le taliaina o le tino ma le toot na fa’amomomo ma

fa’amaligiina, ae ina ia tatou iloa ma fa’aeteete ona iloa le taua o le auai i lenei mafutaga ma ia

toto i o tatou loto e le finagalo o le Ali’i lo tatou le aveesea o le felotoa’i ma fefulitua’i, a ia ola

fealofani ma fealolofaa’i le fanau a le Atua. Ia fa’apea fo’i ia i tatou e le o auai i lenei aiga po’o

le mafutaga, e ao ona tatou mafaufau i le tulaga e ao ai ona avea i tatou ma totino o lenei

mafutaga. Afai e te le lagona, o lona uiga e le o mau lou talitonu ma le fa’atuatua ma le alofa i le

Atua, le sa mua’i alofa mai ma ua tele naua lona alofa, i le lavea’iina o i tatou mai puapuaga.

Mea e fai:




29

Mati 18, 2018

Mataupu 23: “O lo’o fetalai mai pea le Atua.”

SIni: Ia mae’a le mataupu ua iloa ma malamalama tamaiti, e le o muta le fetalai mai pea o le

Atua e ala mai i ana perofeta, aposetolo, ma faifeau.

Tusi Faitau: Ieremia 1: 1-19






O le tusi lenei o lo’o fa’aigoa lava i le perofeta o Ieremia le atali’i o Hilikia. Na fanau lenei

tagata i Anatofa ma vala’auina i le galuega fa’a-perofeta i se vaitaimi o le T.L.M. 627, ae fa’atoa

luasefulu ona tausaga. O lo’o ia fa’amatalaina lona ia lava vala’auina e mai le Atua ina ia fai ma

perofeta. Sa le’i faigofie ona ia taliaina aua ua ia manatu i lona laititi ma le fa’atauva’a. Peita’i, O

le pa’i mai o le Atua i lona gutu, o se fa’amaoniga sili lea mo Ieremia aua le galuega. Na fa’ailoa

e le Atua ia Ieremia le laau o le sekati. O le uiga o lea mea ina ia lelei lana vaai ma ia mataala.

Ua fa’atusaina i le sekati, aua o le laau lea e vave ona totogo a’e ona fuga i le amataga o le

tausaga. O lona uiga ia mataalia i le galuega ma ia toa le loto e tautala ai mo le finagalo o le

Atua. E ui lava la i le laititi o Ieremia, ae sa matua iloga ona fa’atalitonuina o ia e le Atua i lona

arufa’atasi ma i ai le galuega ua vala’auina ai o ia. Lea ua fa’aalia i lona pa’i atu i ona laugutu ma

fetalati atu, “Fa’auta, ua ou tu’uina a’u upu i lou gutu.” E ui lava la ina fa’afiti le ali’i o Ieremia,

ae na toe maua lona loto tele e talia ai le fetalai mai o le Atua mo ia. O le fetalai mai pea o le

Atua e le aunoa, o lona uiga o lo’o vala’auina pea i tatou e le Atua mo ia, ma lona finagalo. Sa

vala’au mai le Atua e ala i le au perofeta ma le au aposetolo. Ae mo le taimi nei, o lo’o vala’au

mai pea le Atua e ala i lana au fai evagelia galulue ma faifeau. O e o lo’o fai le galuega folafola

ma i tatou uma foi ina ia le gata ina ia tatou fa’alogo ma le toto’a i le leo o lo’o vala’au mai pea,

a ia tatou usiusita’i e tali atu i lenei vala’au ma le loto fiafia. O le uiga taua lea o lenei mataupu

mo i tatou le fanau. E le fa’apea na’o tagata matutua e fa’aogaina e le Atua mo lona finagalo e

ala i le tala’i atu o lona finagalo i le lalolagi ae aofia ai tagata uma. A tatou vaai foi ia Ieremia, e

le’i fa’apea sa fa’atali le Atua se’i matua o ia. Ae o le taimi lava e finagalo ai le Atua e fa’aaoga i

tatou fa’aaoga loa. Tusa pe tatou te loto i ai pe leai, ae aumai pea e le Atua le malosi tatou te faia

ai le galuega. O le mea lea e ao ai iai tatou ona tatou talia le vala’au mai o le Atua. Ae le mafai

ona tatou lagona lena vala’au pe afai e le tatala o tatou loto e ta’ita’iina e le mana o le Atua. Aua

a tatou le maua le loto matala ma le talitonu i le Atua, e le mafai ona tatou lagona lona fetalai mai

i ai tatou.

Mea e fai:



30


Mati 25, 2018

Matāupu 24: “O ai ea lenei Ali’i.” (Aso Sa Laupama)

Sini: Ia mae’a le mataupu ua iloa ma malamalama tamaiti, o lea ua aga atu Iesu i ona puapuaga.


Fesoasoani mo le mataupu.





O le tatou mataupu i lenei taeao tamaiti, o ai ea lenei Ali’i? O se mataupu ua aumai fa’afesili

mo i tatou tamaiti. E talitonu le mataupu e uma ane le vasega i lenei Aso Sa, ua maua le tali o le

fesili e i tatou uma. A tamaiti? Manatua fo’i tamaiti, e amta lava le galuega a le Ali’i o tu’ufesili

pea le to’atele aemaise lava o ta’ita’i o le lotu Iutaia, auā e manatu i latou e tete’e tele Iesu i

tulafono ma fa’avae o le lotu Iutaia. Auā ua tele ina soli e Iesu le Aso Sapati, e fai ai ana

fa’amalologa. E le gata i lea, e filo fa’atasi ma lotolotoi i le mea e iai tagata agasala.

E fiafia tele le Ali’i e fa’atasi atu i ia tagata, ae o se mea le fetaui i le vaai a ta’ita’i o le lotu. O

le malaga la lea a le Ali’i, e taua o lana malaga fa’a-Tupu e aga atu ai i Ierusalema. Ona lolofi

mai lea o le motu o tagata, ua fola lau o pama, ma la o laau, o nisi ua fola o latou ofu i le ala ae

afio atu ai le Ali’i o lo’o ti’eti’e i le tama’i asini. O le fa’ailoga o lo latou fa’aeaea lea i le tupu ua

afio mai. A o le mea na sili ona feitai ai le au faresaio ma ta’ita’i o le lotu Iutaia, ina ua alalaga

mai tagata, “Osana! Ia manuia le afio mai i le suafa o le Ali’i, o le Tupu o tagata Iutaia.” O le

mea tonu lava lea e le’i manana’o i ai ta’ita’i o le lotu, ia aua lava ne’i mulimuli ia Iesu. Peita’i

tamaiti, e le mafai ona natia le mea moni. E le mafai e se poto fa’aletagata ona taofia i lalo le

mamalu ma le silisili ese o le Ali’i. Auā o lea ua fa’aalia mai i gutu o nei tagata le taualoa, ma

fa’atauva’a, le alagaina o le Tupu o tagata Iutaia.

Ioe, atonu e ese se mafuaaga o lo’o ta’atia i tua atu o le alalaga a tagata. Pe na manatu tagata,

e o’o atu loa Iesu i Ierusalema fa’atu loa ma lona malo, ma amata loa ana galuega fa’atupu. Se’i

lavea’i mai ai i latou mai le ola taotaomia pea. Pau le mea o lo’o fia tulituliloa, o lea ua ta’utino e

tagata o ia o le Tupu o Iutaia. E le o se Tupu e pei o le tupu Toga, ma le Tupu Peretania, Ia po’o

Malietoa fo’i. A o le tupu o le filemu, na te aumaia le fa’aolataga mo tagata uma lava o le

lalolagi.

Mea e fai:




31

Aperila 01, 2018

Matāupu 25: “E moni ua toetu o ia.” (Aso Sa Toetu)

Sini: Ia mae’a le mataupu ua iloa ma malamalama tamaiti, o le toetu o Iesu Keriso, ua fa’aolaina

ai i tatou.

Tusi Faitau: Luka 24: 13-35






O le tatou mataupu i lenei Aso Sa tamaiti, “E moni ua toe tu o ia?” E to’atele pea nisi tagata

sa le talitonu i lenei tala, ua toe tu le Ali’i o Iesu. O nisi fo’i tagata o lo’o fa’aafaafa lava, auā e

mana’omia pea nisi fa’amaoniga e atoatoa ai lo latou talitonuga. Tamaiti, o tagata sa sili ona le

mautonu o so’o lava o Iesu. Auā fo’i na latou iloa loa o le a o’o atu Iesu i puapuaga, ona latou

augani lea ia te ia, e aua ne’i o’o atu i ai. Auā fo’i a maliu nei Iesu, ua uma fo’i ma se

fa’amoemoega sa i a’i latou. Peita’i, na o’o lava puapuaga ma i’u ai ina fa’asatauro le Ali’i, ma

maliu ai. E leai se isi lava mea na totoe i o latou mafaufau, ua sili loa ona taapeape, malepe loa.

O le tala na maua ua i le taeao o le ulua’i aso o le Vaisapati. Ua leai se Iesu i le tu’ugamau auā ua

toe tu.

O so’o ia e to’alua na o i Emau, ua la talatalanoa nei i le ala ma le le talitonu o la mafaufau i

lea tulaga po’o mea fo’i na tutupu ma la fa’alogo i ai. Na alu lava le malaga ma talanoa, fesili le

isi i le isi. Pe fa’apefea ona tupu lenei mea, fai mai ua toetu Iesu. O le o’o ane la o Iesu ma latou

savavali, o le fa’ailoga lea o lo’o i ai pea le Ali’i toe tu, le Ali’i manumalo ia i tatou, e pei o lenei

au so’o. Pau le mea o lo’o fa’atalitali ai le Ali’i, o tatou ina ia tatou iloa lona fa’atasi ma ona

tagata. Na fa’amautuina i maantu o so’o ia e to’alua, e moni ua toe tu le Ali’i, ina ua fai le latou

talisuaga (aai) ma fai atu le tasi i le isi, “E le’i mu ea o ta loto, i totonu ia i taua, ina ua fetalai o

ia ia te’i taua i le ala.” Ona la toe fo’i lea i Ierusalema, ma fai atu i ona so’o, “ E moni lava ua

Toe Tu le Ali’i.

E manaia fo’i le fa’amanatu mai o lenei tala, auā o lea ua a’oa’o mai, o le tatou aai i le tino

ma feinu i le toto o le Ali’i, e pupula ai o tatou mata fa’a-le-Agaga. O le pupula lea o o tatou

mata fa’a-le-Agaga tatou te mautinoa ai ua Toe Tu lava le Ali’i. Ia aua la tatou te fa’atali, a ia

ta’u atu i le lalolagi, e moni lava ua Toe Tu le Ali’i o Iesu Keriso.

Mea e fai:

1) Fai ni fesili e toe fa’amanatu ai le mataupu

2) Usu se Pese

3) Tatalo Fa’ai’u

32

Aperila 08

Mataupu 26: “E fa’avavau le pule a le Atua.”

Sini: Ia mae’a le mataupu ua iloa ma malamalama tamaiti, o le pule a le Atua, e amata mai lava i

le amataga seia o’o lava i le i’uga.



O lo’o I lau susuga lava I le faiaoga se tapenaga lelei e fa’afeiloa’I ai le fanau I lenei taeao. A


tatalo. A mae’a, ia fa’afeiloa’I tamaiti I se fa’atalofa ona fa’amanatu ai lea o le mataupu I le aso


O le tasi lenei o Salamo, o lo’o ua ia mautinoa lona olataga mai le Atua. E ui ina o lo’o

fete’ena’I manatu I le na ia tusia, ae manatu nisi o Tavita a na ia tusia ma fa’amauina lenei

Salamo. Auā pe a fua I upu o lenei Salamo, “ aua 32 ate32 fa’atuatua I ali’i.” E I ai le molimau o

Tavita o le ali’I, o le fanau a le tagata. O lona uiga ua ia matuā malamalama lelei lava I le

gasologa o le natura ma le foafoaga a le Atua. E le o pogisa Tavita I le Atua ma lana pule aoao I

le foafoaga na ia fai. E moni, e sa’oloto le tagata I le foafoaga a le Atua ae n ate le pule, auā e

tasi a le pule o le foafoaga na o le Atua. Peita’I o le tagata o le tausi mea a le Atua. Afai o

Tavita, fai mai le agaga fa’afetai ma le vivi’I o le fai Salamo I le Atua. 32 ate vivi’ii le Atua a o’u

ola, oute fai pesega I lo’u Atua a’o o’u tumau I le ola nei. Le tagata ua na lagonaina ma mautinoa

le silisili ese ma le mata’utia o le pule aoao a le Atua ia te ia.

O lo’o ta’ua fo’i i lenei pese a le fai salamo, le so’otaga o le tagata ma le Atua. “Amuia le

tagata o i ai le Atua o Iakopo e fai mona fesoasoani, o i ai lona fa’amoemoe i le Ali’i lona Atua”.

O lo’o ta’ua ai i’inei le mafanafana o le sa’olotoga o lenei tagata ma lona Atua. O se tagata ua

masani ona feoa’i ma lona Atua e ala lea i le faia o lona finagalo. O le Atua o lē na ia faia le lagi

ma le lalolagi. A o le Atua fo’i na te faia lana fa’amasinoga tonu mo le tagata. E tele vavega ua

faia e le Atua i le soifua ma le ola o lenei tagata, ma ua fa’aalia ai lana amiotonu e ala i lona alofa

fa’ailoa mai i le lalolagi. O ia la’asaga uma o lo’o ta’ua e le fai-salamo, na fai vavega ai le Atua

ua matuā iloa manino ai le fa’alagolago ma le fa’amoemoe o le fai-salamo i le Atua. Auā e leai

lava se tasi e aoao lana pule na o le Atua. O le ala lea o le vivi’i ma le fa’afetai a’o se ta’utinoga

mai le gutu o le fai-salamo, e fa’ailoa ai lona agaga talitonu, fa’amaoni i lona Atua. E leai lava se

isi malosi e sili atu nai lo le fa’alagolago ma fa’amoemoe i le Atua, auā o ia lava e fa’avavau lana

pule i le lalolagi. Auā o le tagata o se mea faigaluega a le Atua.

O se a’oa’oga taua fo’i lea mo i tatou tamaiti. E leai lava se isi malosi e sili atu nai lo le pule

aoao a le Atua e fa’avavau. Fai mai le agaga o le fai-salamo, “Amuia le tagata o i ai le Atua o

Iakopo e fai mona fesoasoani ; o i ai lona fa’amoemoe i le Ali’i lona Atua”. Ae fai mai le

fa’ai’uga o lana pese, e pule le Atua e fa’avavau lava. Aua ne’i motusia lou so’otaga ma le Atua.

33

Afai e te fa’amaoni i le Atua, e faia e le Atua mea sili mo oe. Ae afai e aunoa oe ma le Atua, e

fesiligia le manuia e avatu ia te oe. Ia o tatou talitonu i le pule aoao a le Atua e fa’avavau. Ma

aua lava ne’i galo ona e tali atu e ala i le vi’iga o le Atua e te avatu. Fa’apei o le fai-salamo, na ia

matuā ta’utino lona agaga fa’afetai i le Atua, auā o lona malosiaga lea ma lona olataga i taimi

uma o lona olaga.

Mea e fai:

1) Fai ni fesili e fa’amanatu ai le mataupu

2) Usu se Pese


Aperila 15, 2018

Matāupu 27: “O le vavega na faia e Iesu i Kana i Kalalaia.”

Sini: Ia mae’a le mataupu ua iloa ma malamalama tamaiti, ua na’o Iesu e na te mafaia ona faia

mea ofoofogia.







Talofa tamaiti, o le tatou mataupu i lenei Aso Sa, “ O le vavega na faia e Iesu i Kana i

Kalalaia.” Tamaiti o ai e iloa le mea e ta’u o le Vavega? Ia, o le vavega o se mea ofoofogia lea ua

faia e se tagata, ae maise lava o e fa’alagolago i le mana o le Atua. O le vavega o se mea ese lea

ua fai ma fa’ailoga o le fa’amaoni ma le moni o le fa’atuatua. O le vavega la na faia e Iesu I

Kalilaia, o le liliuina lea o le suavai e fai ma uaina. O le vavega muamua lava lea na faia e Iesu.

Sa faia se fa’aipoipoga i Kana i Kalilaia, na iai ia Maria, fa’apea fo’i Iesu ma ona so’o. Ua

fa’atumulia le aiga i tagata e to’atele o aiga o le ali’i (tama) ma le tama’ita’i (teine) fa’aipoipo

atoa ma le au valaaulia. Ua amata le tausamaaga (le aiga) ae logo ane loa ia Maria, ua uma le

uaina. E le’i toe fa’atali Maria, a ua alu atu loa ia Iesu ma ta’u atu i ai le mea ua tupu. Na faigata

ia Iesu ona tali atu i lona Tinā, auā na te le’i faia muamua se vavega, lea na ia tali atu ai i lona

Tinā, e le’i o’o i lo’u ituaso. E ui lava i lea, ae na manatu tele Iesu i lona Tinā, ae maise le aiga

ne’i ta’uvalea. Lea na ia fa’atonuina ai le au faifeau e fa’atutumu fagu ma’a tetele e ono i vai ma

asu loa i tagata. Ua tofo atu i ai le pule o le tausamaaga ma ua ofo, ina ua muamua mai le uaina

leaga, ae ua fa’amulimuli mai le uaina lelei. E o’o lava i tagata uma sa i ai, ua matua’i iloga ona

fiafia i le uaina mulimuli. Peita’i e leai se isi o i latou na iloa le mea na tupu, se’i vagana ai lava

le au faifeau ma so’o o Iesu na latou iloa.O lea vaega na fai e Iesu, na fa’aalia ai le mamalu ma le

34

fa’amaoni o le Ali’i, ma ua talitonu ai le au so’o. A e faia se galuega e mana’o i ai lou Tamā po’o

lou Tinā, ia faia ma le fa’amaoni, ma fai ia lelei, ina ia iloa ai lou usita’i.

Mea e fai:




Aperila 22, 2018

Matāupu 28: “O le vavega i Petesa.”

Sini: Ia mae’a le mataupu ua iloa ma malamalama tamaiti, ua fa’aogaina e Iesu le taelega i

Petesa, e fa’amalolo ai le tagata ma’i.







O le Aso Sa ua te’a tamaiti na tatou talanoaina ai i le vavega lea na faia e Iesu i Kana i

Kalilaia ( O le liliuina o le vai e fai ma uaina). A o le Aso Sa lenei, o le a tatou talanoa i le isi fo’i

vavega na faia e Iesu. O le vavega lenei na faia i Petesa. O Petesa o le igoa fa’a-Eperu lea o se

tasi o taelega e latalata i le faitoto’a o mamoe I Ierusalema. E lima ona fa’apaologa. O le taelega

lea mo tagata mama’i uma lava, e o e fa’atalitali ai i le taimi e gaepu ai le vai ona feosofi lea i ai.

O le tagata e muamua, o le tagata fo’i lena o le a malolo.

O le sapati na ui ane ai Iesu i le taelega i Petesa ma iloa ai se tasi ali’i pipili ua atoa le

tolusefulu valu tausaga o ma’i. Ua fai atu i ai Iesu, “ Sole ua e fia malolo? Ona tali ane lea o le

pipili, “Ioe, ae leai se isi se’i fesoasoani mai ia te a’u i le taimi e gaepu ai le vai.” Ona toe fai atu

lea o Iesu, “Ina tu ia i luga ma ave lou moega ma alu i lou fale”. O le tulafono e fa’apea, e sa ona

fela’uaia ni mea totino mai nofoaga fai tele e ave aga’i i lou fale i le Aso Sapati. Ae vaai mai

tagata Iutaia ma e ta’ita’i i le lotu, o amoamo atu le moega o le tagata lea sa pipili. Ona latou

fesiligia lea o ia, po’o ai na fa’amaloloina lona ma’i, ae tali le tagata, o le tasi tagata na ia

fa’amalolo ia te a’u. Na te le’i iloa o Iesu lea na la feiloa’i i le taelega i Petesa.

Na o’o i le tasi aso, ona toe vaaia lea e Iesu le tagata lea sa pipili i le malumalu ona fai lea i ai

o Iesu. Aua ne’i e toe agasala, ne’i o’o atu se isi malaia e sili atu ia te oe. O lea na iloa lelei ai e

le pipili, o Iesu lea na fa’amaloloina ia i Petesa. Ona o le fefe o le tagata pipili ina ne’i afaina o ia

i le tulafono ma oti ai, lea na ia alu ai ma ta’u aut i ta’ita’i o le lotu Iutaia, o Iesu lea na

35

fa’amaloloina o ia i le sapati ma fai atu e ave lona moega ma alu i lona aiga. Ua te’a nei le feitai

ma le le fiafia o ta’ita’i o le lotu Iutaia i le tagata pipili, a ua fa’atutu nei ia Iesu lo latou feita. Ua

iloa e Iesu ua tulituliloa o ia e tagata Iutaia, ona o nei vavega na fai i le Aso Sapati, ona ia fai ane

lea ia i latou, “ O lo’o galue lo’u Tamā e o’o mai i le aso nei.” Ua atili ai le le fiafia o tagata

Iutaia ma taumafai loa e fasioti ia te ia.

E le fa’apea ua le usita’i le Ali’i i le tulafono na mafua ai ona ia faia le vavega lea i le Sapati.

A o le mea ua sili ona tāua i le manatu o le Ali’i, o le tagata ua fia malolo. E sili le fa’aali atu o

lou alofa nai lo le fa’atumauina o le tulafono. O le Aso Sa a tatou tamaiti, o le aso lea ua tatou

fa’amautuina mo le Ali’i. Ia tatou tausi fo’i la iai. Peita’i, e iai galuega alofa e tatau ona faia pea

pe afai ua mana’omia. E iai le fa’afoma’i, o leoleo o le malo, o le au tinei mu, ia ma nisi. Ae le o

se mea tatau lou soli o le Aso Sa, ona o tafaoga ma taelega i le sami, ma inuga pia, ia ma nisi

mea le tatau.

Mea e fai:




Aperila 29, 2018

Matāupu 29: “Ia ola fa’amagalo.”

Sini: Ia mae’a le mataupu ua iloa ma malamalama tamaiti, e fiafia le Atua i le tagata ola

fa’amagalo.

Tusi Faitau: Mataio 18:21-35






O le tatou mataupu i lenei Aso Sa tamaiti, Ia ola fa’amagalo. O ai e na te iloa ina le uiga o le

mataupu, “Fefa’amagaloa’i? Tamaiti, o le tele ia o a’oa’oga a Iesu i le upu lenei o le fa’amagalo

atu. Ai ona ua iloa lelei e le Ali’i, e le faigofie le ola fa’amagalo atu o se tagata. Le ala lea o le

tali a le Ali’i i le fesili a Peteru, “Pe fa’afia ona fa’amagalo atu? O le tali a le Ali’i, “Ia

fa’afitugafulu ni fitu.” O lona uiga ia faifai pea lou ola fa’amagalo. E le tatau ona gata. E tatau

ona fai ma amio a le tagata i aso uma. O le fa’ataoto lea na tatou faitau i ai, o le tala i le tupu ma

ana auauna. O se tasi o ana auauna sa nofo aitalafu ia te ia i le 10,000 taleni. Tamaiti o se tupe

tele lenei tupe na nofo aitalafu ai le auauna i le tupu, ua le mafai e le auauna ona toe totogi. Ona

36

ia fa’atoese lea i le tupu. Ina ua fa’atoese le auauna i le tupu, ona fa’amagaloina atu lea e le tupu

le auauna. Ma ua fiafia ai le auauna.

E le’i leva lava ona fa’amagalo e le tupu le auauna, ae alu loa le auauna lenei, ua su’e le isi

auauna o lo’o nofo aitalafu i ana tupe, ma fai atu ai ia totogi vave mai ana tupe. E le’i mafai e lea

auauna ona totogiina mai ia tupe, ona ia alu lea ma ua molia i le fa’amasinoga ma ua

fa’afalepuipuiina ai ma si nei auauna ina ua le fa’amagaloina.

O se a’oa’oga mata’utia lea a Iesu, o se tagata na fa’amagaloina e lona matai, ae alu ave le isi

uso a auauna i le fa’amasinoga ma fa’afalepuipuiina ai. Ua leai lava ma se alofa ma

fa’amagaloina atu, fa’apei ona faia e lona matai ia te ia. Ua manatu fa’apito fa’apito ifo ia te ia

lava. Ua le mafai ona fa’amagalo atu i le isi uso a auauna. Ua aumaia i le i’uga le tala le mea na

i’u i ai le auauna le loto fa’amagalo. Auā na toe iloa loa e le matai, ona ia toe poloa’iina ai lea e

toe totogi mai uma ana tupe, le 10,000 taleni po’o ua tu’uina atu le auauna le loto fa’amagalo i e

fa’ataumaoi, se ia tauia mai ana mea uma. Tamaiti, e finagalo Iesu ina o tatou ola fa’amagalo. Ia

le mo sina taimi, pe na’o na fa’atasi fo’i. A ia faia pea lava pea, aua lava ne’i iai se tuaoi.

Mea e fai:

1) Fai ni fesili e toe fa’amanatu ai le mataupu

2) Usu se Pese


Me 06, 2018

************SUEGA AOAO*************************************

Me 13, 2018

Mataupu 30: “O le Tinā fa’atuatua mai nu’u ese.” (Aso Sa o Tina)

Sini: Ia mae’a le mataupu ua iloa ma malamalama tamaiti, o le fa’atuatua e tupu ai le onosa’i ma

le loto maualalo, ae maise lava e mafai ai mea faigata uma.

Tusi Faitau: Mareko 7: 24-30






37

O ai na te manatua se tala na mafua ai lenei aso ua fa’apitoa mo Tina? E iai le tala tu’u o le

sauniga e tau talafeagai ma le aso ua tatou fa’aigoaina o le aso o tina. O lenei tala tu’u e mafua

mai i le malo o Roma. E iai lava aso fa’apitoa e fa’amanatu ai aiga tetele taua o le Hilaria. O

lenei la aso fa’apitoa e fa’a-autu i le atua tama’ita’i o Saipele (Cybele). Peita’i, na mafuli le

to’atele e fa’amautuina le taofi o le tatou aso o Tina e le mafua ma i’ina. O le mafuaaga ma le

amataga o le aso ua ta’ua nei o le aso o tina, na mata lava e si tama’ita’i Amerika o Ana M. Iavisi

(Anna M. Jarvis). Sa fa’atumauina pea le fiafia o lenei tama’ita’i i le nofo to’atasi, ma sa fa’aalia

fo’i lona latalata i lona tina. Sa fa’au’uina le tama’ita’i o Ana i le Kolisi i West Virginia ma galue

fa’afaia’oga ai i’ina, mulimuli ane, sa tuua loa Virginia mo Philadelphia. Ina ua maliu si ona tina

i le aso 5 o Me, 1905 i Philadelphia sa amata loa ona tupu a’e se lagona i lenei tama’ita’i e

fa’amantu se aso fa’apitoa mo tina uma i Philadelphia. Ua mavae le lua tausaga ona amata lea

ona fa’atinoina le mana’o o Ana ina ua talatalanoa i ana uo. E fa’apea le tala ua molimauina lenei

tama’ita’i o Ana i lona manatu alofa tele i nai tina o Philadelphia ua agaleagaina ma tu’ulafoaina

e a latou fanau matutua. Ona tupu ai lava lea o le lagona o le tiga alofa o Ana ma amata ai loa o

ni tauanau e fa’afeso’ota’i ai faifeau, o ulu o Pisinisi, ma ta’ita’i o le Setete ma le fa’amoemoe e

maua se lagolagoina o lona manatu. Ia Me 10, 1908, ua faia ai loa le ulua’i sauniga i le falesa i

Grafton, West Virginia, sa faia fo’i le isi sauniga, na fa’ata’atia ai e Ana le fa’avae o le

fa’aaogaina o ni fugalaau ona o lona Tina o se tagata e fiafia tele e mafuta i fugalaau. O le

fugala’au pa’epa’e mo tina uma ua tuua le mafutaga, a’o le fugalaau mumu mo i latou o lo’o

soifua pea. Mulimuli ane, ua silisli atu le uiga ua o’o i ai le lagona o le fa’amanatuina pea o lenei

aso e pei o lenei aso e pei ona mafaufauina e Ana i le amataga. O se tasi la o nei lagona o le

mafutaga so’os’o’o tauau a le tina i lana tama, o le alofa lea, ma ua olaola pea lenei lagona i so’o

se nofoaga ma setete ua sosolo atu i ai le fa’amanatuina o lenei aso. I le tausaga e 1910 ua aloaia

ai loa le folafolaina o el fa’amanatuga o le Aso o Tina e le ali’i Kovana o West Virginia.I le

tausaga 1912 na fa’atuina ai se fa’alapotopotoga e aiaia le uiga ma le fa’amanatuina o lenei aso.

A o le tausaga e 1913, na pasia ai se pili i le Maota o Sui i Amerika ina ia talosagaina le

Peresetene e fa’alauiloa lenei aso ma fa’amamaluina i Aso Sa lona lua uma o le Masina o Me. Na

maliu Ana 1944, ae ua tupu pea le fa’atauaina o le Aso o Tina e pei ona ia mafaufauina ma

amataina. I aso nei, ua tatou fa’amanatuina lenei aso e feofoofota’i ai mea alofa a fanau i latou

tina e fa’apea ia tama. Tatou te lagona le loto fiafia, olioli, fa’afetai i le Atua ona o le tama’ita’i o

Ana, e ui ina e le’i avea mea tina, a ua ia fa’ata’atia se ala tatou te mafaufau ai i le taua o tina ma

la latou galuega tele i totonu o aiga, nu’u, o galuega, ae maise le Ekalesia. A’o le tala lenei mai le

Tusi Paia i le fafine Kanana, e fa’apea le taofi o le fa’aolataga e muamua lava mo Iutaia ae soso’o

ai ma tagata nu’u ese. O lenei le manatu na fa’aalia ato ina ua uma le maliu ma le toe soifua

manumalo o Iesu Keriso.

O le soifuaga tala’i, galue, ma le fa’aola ua fa’amalolo ai nisi o nu’u ese pei o lenei tala. E foliga

mai e ui lava ina fa’amuamua Isaraelu ae o lo’o tatala lava e Keriso avanoa mo tagata o nu’u ese

ona o le malosi o lo tatou fa’atuatua i galuega fa’aola a le Keriso, e pei ona fa’aalia i lenei fafine.

Aua o le mea moni e tusa ai ma le tala a le tusitala a Mataio, e le ni tala talia gofie ia saunoaga a

le Ali’i. Ae ona o le malosi ole fa’atuatua o le tina na ia taliaina ai le moni o lenei saunoaga e ui

ina talia gata i lagona fa’a-le-tagata, ae maise lava i ai tatou (Samoa) e le ola fia to’ilalo. Ae le’i

afaina lea i le loto o le tina fa’atuatua ma talitonu i le Ali’i. Ina ua o’o mai le galuega a Iesu i

38

Turo ma Saitonu (vaai le fa’afanua) ae fa’afetaui e le fafine Kanana. Fai mai lenei tina, “Le Ali’i

e, fa’amolemole se’i e alofa mai ia te a’u, ua ou mafatia tele, e le maua se malolo i aso uma ona o

le ma’i a si a’u tama teine a tali oti. O a’u feau masani o lo’u mafaufau ua tu’u atoa i le tausiga o

si a’u tama teine.” Fai mai le tali a Iesu, “Tama’ita’i, e le’i auina mai a’u i nisi, ae tau lava o

mamoe o le aiga o Isaraelu ua le iloa.” Ae ua aioi fa’atauanau lava lenei tina, “Le Ali’i e, ia e

fesoasoani mai ia te a’u.” Ona toe fa’apea atu lea o Iesu, “E le tatau ona ave le meaai a fanau a

tagata ma lafo i “uli”. Fa’alogo i le mamafa o fetalaiga a Iesu na lu’i ai le fa’atuatua o lenei fafine

o nu’u ese.” Tou te iloa le tali a le fafine po’o le tina o nu’u ese lenei, ioe ave muamua le meaai

ma tagata nae sai ai (Isaraelu), a’o toe’aiga ua lava lea mo a’u. Na fa’ateia Iesu i le tali a lenei

fafine. O le tali a le tagata fa’atuatua, e le popole le tiga pe faigata, a’o le loto ua tu’u atu i le

Keriso ua na o ia le tali o ona mafatiaga. Ona fetalai atu lea o Iesu ia te ia, “Funa e, ua tele lou

fa’atuatua, ona o lou fa’alagolago atoa ma lou talitonu atoa ia te a’u, alu ia oe ua ola lau tama

teine.” O le ofo tele o Iesu ona ole malosi o le fa’atuatua o lenei tina a’o le tagata o nu’u ese. O le

tasi lenei mea taua mo i tatou tamaiti ia tatou manatua pea. O le moni ma le tele o le alofa o lenei

tina i lana tama teine, ua matua alu atoatoa ma le talitonu i le Ali’i. E ui na ia iloa lelei e le o se

fa’aolataga mo i latou, peita’i o lea ua le tu’ulafoa’i e le Ali’i ona o le tele o lona fa’atuatua.

Tamaiti, ua a’oa’o mai lenei mataupu, ua na o Iesu e matalatala ai mea na faigata i le ola sailiili.

Tatalo ma le fa’atuatua atoatoa ma ia fa’atino i le tu’u atoa i ai o lou malosi ma lou iloa ae aua le

musu e fetaia’i ma faigata ma tiga. A le talia tiga ia i le fa’atasi ma le fa’amoemoe i le Atua i

lona fesoasoani mai, e te le pa’i i le fa’aeaina. ‘Aua ne’i galo ia te oe le fa’amaoni o le alofa o

tina e pei o lenei tala, e talia so’o se mea ona o le alofa moni. O le a la sau meaalofa e taui ai le

alofa o tina, ua tigaina i le taumafaiga o tatou olaga. Tamaiti, o le tatou mealofa sili lava o le

usiusita’i ma toaga e mafuta i lou Ali’i o Iesu, le o lo’o saili mai pea i ai tatou.

Mea e fai:




Me 20, 2018

Mataupu 31: “Tausamiga o le Penetekoso”

Sini: Ia mae’a le mataupu ua iloa ma malamalama tamaiti, ia saga fa’amanatu pea i o latou

mafaufau le taua o le tausamiga o le Penetekoso ma le mea ua tupu ai ina ua mavae le toe tu o le

Ali’i.

Tusi Faitau: Levitiko 23: 9-21


39





E ao ina manatua lelei e a outou susuga i faiaoga o le tausamiga lenei o le Penetekoso, e le

fa’atoa maua pe fa’atoa fa’ataunu’uina i vaitau o le Ali’i o Iesu. Manatua fo’i o lenei sauniga

po’o le tausamiga lenei fa’atoa fa’amanatuina ina ua latou tu lauele’ele i Kanana le nu’u sa tauto

ai le Atua i o latou auga tama ua mavae atu, e pei o Aperaamo, Isaako, lea ua fai nei mo latou

tofi. Ina ua latou fa’amautu i eleele o Kanana, sa latou taumafai loa e atia’e fa’atoaga ma o latou

aiga. Ona la o lo latou manatu o nei mea uma o le fa’aaliga lea o le alofa o le Atua, o lea sa latou

faia ai lenei tausamiga e fa’amanatu ulua’i fua o le seleselega o a latou fa’atoaga mai le alofa

tunoa o le Atua. O le Penetekoso la o le upu Eleni o lona uiga, “o aso e lima sefulu”. O le igoa

lea o le tasi lenei o tausamiga sa faia i sa Iuta. E limasefulu aso sa va ai le Paseka tasi le aso sa

fai ai lea tausamiga. Sa fa’apotopoto uma tagata i Ierusalema i le agaga fiafia ma le fa’afetai i

mea ‘ai ua maua, e le gata i lena aso a’o tausga o lumana’i. Sa latou avatu fo’i areto e lua i luma

o le Atua, ua fai ai i le saito fou na ulua’i seleseleina. O le taulaga fa’afetai lea i le Atua. Sa

avane fo’i tama’i mamoe e lua, sa laulauina i luma o le Atua, ona avatu lea o le fuata saito e aai

ai. Sa manatua fo’i i lenei tausamiga ona po sa folafola ai e le Atua o tulafono e tele i le mauga o

Sinai. Ina ua mavae le toe tu manumalo mai o le Ali’i mai le oti ma le tu’ugamau, sa ia fetalai atu

i lona au so’o e nonofo i Ierusalema sei auina ifo le fesoasoani sili o le Agaga Paia lea. (Luka 24:

49) Ua o’o fo’i i le aso o le tausamiga o le Penetekoso, ua gasolo uma fo’i tagata i Ierusalema e

auai i lea tausamiga sa i ai uma foi le au so’o o le Ali’i o lo’o latou fa’atasi uma ai e tusa ma le

fetalaiga a Iesu. I lea lava aso na tupu ai se vaaiga ofoofoagia e pei ona fa’amatalaian e le tusi o

Galuega a le Au Aposetolo (Galuega 2:1-21). O se vaaiaga uiga ese lea i le molimau a i latou ua

iai i lea aso. Sa latou matua taufai ofo uma ia i le mana o le Atua ma le Ali’i o Iesu ua liligi ifo i

luga o le au so’o, po’o le au aposetolo ma ua latou perofeta mai ai. Ma sa malamalama uma ia

tagata ese’ese mai lea itu ma lea itu. O lenei la vaaiga ofoofoagia sa tupu tonu i le aso lea o le

tausamiga o le Penetekoso. Peita’i, o le atoa ai foi lea o le limasefulu o aso talu ona toe tu mai le

Ali’i o Iesu mai le tu’ugamau. Ua tatou fa’atauaina o aso talu ona toe tu mai le Ali’i o Iesu mai le

tu’ugamau. Ua tatou fa’atauaina la le Penetekoso o le Feagaiga Fou ua saunia e lo tatou Ali’i

Fa’aola, le Atua manumalo. Ua le o le tino la e pei ona aposetolo ma i tatou uma ina ua ofo atu

atoa lo tatou ola ma lo tatou malosi e fa’afetaia ai le alofa mutimutivale o le Atua, ua ia

fa’asa’oloto ai i tatou mai le amo o le pologa a le tiapolo ma ana faiga. O lea tamaiti e matua taua

tele lo tatou manatunatu toto’a i le taua o le alofa lavea’i o le Atua, ma lona fesoasoani mai e le

gata i lona lava nu’u, ae o i tatou foi e ala i le Penetekoso o le feagaiga fou ua auina mai lona

Agaga Paia e lavea’i tatou vaivai, e fesoasoani ma fa’amalosi pe a o’o mai faigata i lo tatou ola.

Mea e fai:




40

Me 27, 2018

Matāupu 32: “E o fa’atasi le fa’alogo ma le usita’i.”

Sini: Ia mae’a le mataupu ua iloa ma malamalama tamaiti, e tāua le fa’alogo i a’oa’oga lelei ma

usita’i iai.







O le mataupu o lenei Aso Sa, e o fa’atasi le fa’alogo ma le usita’i. E iai le fesili a le faitau pi e

fa’apea, O ai le Tamā o le au fa’atuatua? O le tali, o Aperaamo. Aisea? Ona ua fa’amaonia lona

fa’alogo ma lona usita’i i le Atua ma lona finagalo. O Aperaamo na ola i totonu o Uro i Kaletia,

o lona Tamā o Tara na maliu ua 205 tausaga. O Aperaamo na nonofo ma le fafine e igoa ia Sarai.

Na fetalai loa le Atua ia Aperaamo, tula’i loa ma lona to’alua ma le atali’i o lona uso e igoa ia

Lota ma oloa. Ua alu le malaga ua o’o atu i le nu’u o Kanana, ua aga’i atu fo’i i Sekema i le

aluna o More. O iina tonu lava na toe fa’aali i ai le Atua ma ta’utino ane o le nu’u lea o le a

foa’iina mo ia ma lana fanau. Ua faia e Aperaamo le fata faitaulaga i lea mea e fa’afetai ai i le

Atua soifua. O le fa’alogo ma le usita’i o le mea e tasi. E le’i fa’afiti lava Aperaamo, e ui ina ona

leiloa le ogaeleele o le a o iai, ae na alu pea ma le mautinoa. O le fa’alogo ma le usita’i o

Aperaamo sa fa’ataunu’uina lava i ai folafolaga a le Atua mulimuli ane. Manatua, o Aperaamo

lea na i ai lona atali’i e to’atasi o Isaako. O Isaako lea na i ai lona atali’i o Iakopo. O Iakopo le

lena na tupuga mai ai ituaiga e 12 o le nu’u o Isaraelu. Ua fa’atupuina fanau a Aperaamo ua fai

ma nu’u tele ma le malosi, ae maise o laueleele e tele ua fai mo latou tofi.

E taua tele le fa’alogo ma usita’i. Aua ne’i na ona lagonaina se fa’atonuga a Matua. A ia

tatou fa’alogo iai ma usita’i. Ia manatua o Matua uma e a’oa’i o latou fanau i mea lelei. O lona

uiga o fa’amanuiaga ua mautinoa mo i tatou pe afai e fa’alogo lelei ma usiusita’i. Ia fa’alogo ma

usita’i tamaiti i Matua, o Faiaoga, o le Faifeau ma lona Faletua. A ia fa’asilisili lou mata’u i le

Atua. Ia outou mautinoa lelei tamaiti le galuega lavea’i a lo tatou Ali’i. O lona fa’alogo ma

usita’i na faia ai lo tatou lavea’iina, aua ana le seanoa le fa’alogo ma usita’i semanu tatou a

malaia i le fa’afanoga o le agasala.

Mea e fai:




41

Iuni 03, 2018

Matāupu 33: “Ua u’u e le fafine aao o Iesu i le Suau’u.”

Sini: Ia mae’a le mataupu ua iloa ma malamalama tamaiti, e lelei le ola fai mea sili mo le Atua.

Tusi Faitau: Mataio 26: 6-13






O le mataupu o lenei Aso Sa, ua u’u e le fafine Iesu i le suau’u. Sa i ai Iesu ma ona so’o i

Petania, ona latou asiasi lea i le fale o le tagata e igoa ia Simona le lepela. A’o fai le latou

taumafataga (mea’ai), na alu atu se fafine ma se suau’u manogi tele. E foliga o se fagu sausau e

pei ona iai i nei ona aso. O le molimau a le tagata, e taugata tele lenei ituaiga suau’u ma e tatau

ona fa’apelepele iai. Na ona ulu atu lava o le fafine tatala le suau’u ma sasa’a loa i le ulu o Iesu.

Ua iloa atu e le so’o le mea ua faia, auā ua sasala i totonu o le fale le manogi o le fagu. Ua tupu

le le fiafia o le au so’o i le fafine ma latou fa’apea ane, ua maumau le suau’u. A ua fai ane nisi,

aisea ua maumau ai fa’apena le suau’u, ae ua le ave e fa’atau atu, ona maua ai lea o ni tupe se

tele e tufa atu ma tagata matitiva. Na fa’alogo atu i ai Iesu ia latou upu, ona ia fa’apea atu ai lea,

“ O aso uma lava tout e nonofo ai pea ma tagata matitiva, ae tatou te le nonofo fa’atasi pea I aso

uma. Aisea na fa’alavelave ai i le mea lelei, ua faia e le fafine. O se galuega ua faia mo le

fa’ata’imuaga o lo’u tanuga. Ma i so’o se vaega o le lalolagi e tala’iina i ai lenei tala, e manatua

ai pea e tagata le galuega lelei a lenei fafine ua ia fai mo a’u.

O le vaivaiga lava lea o tagata o lenei lalolagi. E vaaia loa se galuega lelei ua faia e se tagata,

ona fai lea o tala. O le fia lelei ia o Pai. E fiu a ia e le taitai lava ona fiafia i ai le faifeau. E le se

mea tatau lea mea. Ae mafaufau oe i sau galuega e tatau ona fai mo lou aiga, ina ia viia ai le Ali’i

ae maise ai se galuega lelei tatou te faia mo lo tatou Ali’i.

Mea e fai:




Iuni 10, 2018

Matāupu 34: “Aua ne’i fa’avaivai.”

Sini: Ia mae’a le mataupu ua iloa ma malamalama tamaiti, e tāua le ola fa’amalosi ma onosa’i ise

galuega.

42

Tusi Faitau: Tanielu 6: 18-24






O le mataupu o lenei Aso Sa, aua ne’i fa’avaivai. O le loto leagaina o Tanielu ina ua fai o ia

ma pule i Ali’i sili o le malo. O le taimi lea na pulea ai e Tariu le Tupu o Metai le malo ma tagata

o Iuta, ina ua fa’ato’ilaloina Papelonia. Manatua fo’i, o Tanielu o se tagata ese, a o lea ua na

pulea tagata maualuluga. Ona taupulepule ai lea o tagata o le malo, ma latou fai ai le tonu ia

talosagaina le tupu ina ia fai se tulafono, so’o se tagata e maua pe iloa o fa’atoga pe tapua’i atu i

se isi Atua, ia molia ma ia lafo loa i le lua o Leona e oti ai. Tau lava o Tariu e ifo i ai tagata uma

o le malo. Tanielu la, o lana lava masani o le tatalo fa’atolu i aso uma i lona Atua, ona o le tele o

mea faigata ma fa’afitauli o lo’o fetaia’i pea i aso uma, ona o le nofo pologa i nu’u ese. O se tasi

la aso na maua mai ai e tagata o lo’o tatalo Tanielu i le Atua, ona latou o lea ma molia Tanielu i

le tupu, ma ua lafoaina ai i le lua o Leona.

O le upu a Tariuna fai ia Tanielu, “O lou Atua, o le ua e auauna i ai, o ia n ate lavea’iina

oe. “ E le’i sese le upu a le Tupu na fai ia Tanielu. Auā na matuā ofo le Tupu ina ua o’o i le lua o

leona i le aso na soso’o ai. E valaau atu i lalo i le lua, ae tali mai Tanielu. Na matua’i leaga le

mea na o’o i ai nei tagata na molia Tanielu i le tupu o Tariu. E le’i mafai e ia mea na taufa’afefe

ma ia Tanielu i lona mafaufau atu i le Atua, ae na ia tumau pea i le Atua i taimi uma. E le’i

fa’avaivai ai Tanielu e tala’i atu le silisili ese o lona Atua i tagata o nu’u ese.

E iloa Tanielu i lona loto mau. E pei o upuo le pese a le Ekalesia,“ Ia pei o Tanielu, le na loto

mau.” E tatau fo’i ona fa’apena i tatou. Ia aua le vaivai gofie, e ta’u le mea moni. Auā e mulimuli

ane, na liliu uma e Tariu lona malo e tapua’i i le Atua o Tanielu.

Mea e fai:




Iuni 17 2018

Mataupu 35: “O Aperaamo le Tamā alofa”

Sini: Ia mae’a le mataupu ua iloa ma malamalama tamaiti, po’o le a lava se lelei po’o se galuega

alofa e ofo atu mo so’o se tasi e le mafai ona galo i le Atua i lona toe tauia mai.


43

Fesoasoani mo Faiaoga:





Ua tulaga ese foi nei vaitau ma le uiga o le soifuaga o tatou tagata. Ua tau le maua le uiga

tausa’afia lea sa masani ai o tatou tagata o le fealolofaa’i ma fesoasoania’i. Po’o fea lava e alu ai

se tama po’o se teine po’o se isi lava tagata e maau atu ai se toeaina savalivali atu lea toeaina

po’o se lo’omatua. Po’o fea foi e te ui ane ai a’o fai se taumafataga a se aiga, e taumafai lava lea

aiga ina ia maua se avanoa e te afe ane ai se i outou aai fa’atasi. O le agaga maualuga sa i ai i

aiga Samoa, ia maua le ola faasoa ma fealolofaa’i. Peita’i, o nei aso ua seasea lava ona toe vaaia

ia uiga tausa’afia sa masani ai o tatou tagata, o le ala fo’i lea sa ta’uta’ua ai la tatou aganu’u ona e

foliga e fa’avae i le alofa. O le tele i nei aso ua se’iloga lava e masani i ai ona fa’atoa fesoasoani

lea i ai. Ae o le uiga fa’aaloalo lena o tatou tuaa sa fa’aalia foi ia Aperaamo. E pei foi ona

fa’amatalaina e le tusitala o Kenese le tala i uiga fa’atama alofa moni, e le manatu fa’apito na’o

lona aiga ma lana fanau, e pei one ta’atele i nei aso, se’iloga lava o le tagata o aiga pe masani i

ai.

E foliga tutusa le uiga fa’asamoa o lo’o fa’amatalaina i le parakarafa o lo’o i luga ma le mea

sa faia e Aperaamo. Faimai le tala, na iloa loa e Aperaamo tagata o lo’o ua omai, e le’i fa’atali

se’i ona malamalama ma iloa lelei po’o ai nei tagata ua solivale mai le lauele’ele. Ina ua vaaia

nei tagata, e le i afaina le vaivai i le vevela o le la mai lana galuega sa fai. Na ona ia vaaia lava o

nei tagata, e le i toe fa’atali, ua tu i luga ma momo’e e pei se tama talavou. Ua ia pulunaunau atu

ia te i latou se’i malolo ane pe mapu ane se’i fai se malologa. Na tali e tagata nei e to’atolu le

tauanau ane a Aperaamo. Fai mai a’o fai le malolo a tagata nei e to’atolu, e le malolo ai

Aperaamo ua toe tamo’e atu ma f’aatonu lana ava o Sara e palu le falaoa e fai ai ni areto, a’o ia

ua fa’anatinati atu i le pa mamoe ma aumai ai le tama’i mamoe peti e fai ai le taumafataga e tali

ai ana malo. E le’i manumanu si toeaina o Aperaamo i le pepeti o lana lafu, ae o le mea aupito

sili lea ua fa’atino e tali ai ana malo, e ui na te matua le iloaina lava nei tagata po’o fea e o i ai.

Sa fai lava nei gasologa uma ma le loto alofa moni i nei tagata. Ae na fa’atoa iloa e Aperaamo o

tagata o le Atua tagata nei. Ina ua latou fa’afetai ane i lenei tama mai le tele o lona alofa, ma

latou fa’amanuia atu ia i laua i se meaalofa aupito sili ona taua i lo laua olaga, ma le tauto ai i le

Atua i ana fa’amanuiaga e liligi fa’aua atu i ai laua, ae maise o sa la pepe tama o le a fanau mai ia

Sara. Le mea ua leva ona moemiti i ai lenei aiga, a’o lea ua ala mai ai lo la taui ona o lo la

agalelei i tagata po’o agelu a le Atua. Ioe, tatou te le iloa ala o vae. E ese’ese foi ala e fa’aali mai

e le Atua i mea uiga ese’ese o le ola, ona ua matua faigata lava uiga o tagata, e tumu i le manatu

fa’apito.

44

A’OA’OGA

O se faata’ita’iga lelei lea ua faataoto mai e Aperaamo mo tama ma I tataou fo’i. Ia aua ne i e

manatu faapito I tagata e talia I lou aiga a ia e alofa I soo se tasi e afe ane. E iai le upu fo’I lea e

masani ai tatou, e auala eseese mai le alofa o le Atua. E taute le iloa fo’I poo ai nei tagata mau

tagata e feoa’I solo I le ala poo ni agelu poo ni tagata. O le mea taua, ia faatino pea le agaga alofa

I soo se tasi e pei ona alofa mai lo tataou Tama o I le lagi

Mea e fai:

1) Fai ni fesili ma usu se pese e fa’atatau i le mataupu


IA MANUIA GALUEGA O LENEI TAUSAGA!!

Documents

VASEGA MATUTUA · 33 Ua u’u e le fafine aao o Iesu i le Suau’uIuni 03, 2018 41 34 Aua ne’i fa’avaivaiIuni 10, 2018 41-42 ... A fua i le tala a le tusitala, e maoa’e ma tulaga