Embed Size (px)
Citation preview
Club da skiunzs Zuoz
Protocol da la radunanza generela dals 20 november 2015
Globe Lyceum Alpinum Zuoz Preschaints: 37 commembers e la suprastanza cun 4 persunas. In tuot 41 persunas.
S-chüsos: Planta Riet, Sigg Fredi, Hosang Claudia, Holzer Lala, Holzer Arnold, Grass Monika,
Berner Thomas, Derungs Gian Paul, Stieger Köbi, Haller Barbara, Rupf Reto, Rupf
Nicola, Rupf Salome, Bee Beatrice, Prohaska Vladimir, Luzi Angelika, Nuotcla Didl,
Enggist Markus, Suter Ruedi, Feuerstein Gian Cla, Campell Gudi, Plebani Maya,
Plebani Peter, Valär Göri, Gotsch Peider, Sonder Agi, Sonder Gian Reto
Roman Grossrieder dal Lyceum Alpinum salüda a tuot ils preschaints dal Club da Skiunzs Zuoz e giavüscha üna bella saira.
Tractandas: 1. Bivgnaint
2. Protocol da la radunanza generela 21.11. 2014 (vair pagina d’internet CdS Zuoz)
3. Rapports: President
Schef cuorsas e materiel
Schef giuvenils
4. Müdamaints
5. Quint annuel 2014/2015
6. Rapports dals revisuors e dis-charg a la suprastanza
7. Tschernas
8. Onorificaziuns
9. Programm annuel 2015/2016
10. Varia
1. Bivgnaint
Il president salüda a 37 commembras e commembers, specielmaing ils commembers d’onur ed anteriurs presidents. Impustüt salüda nos president Claudio Duschletta a Dumeng Giovanoli chi fo in seguit da la radunanza generela ün raquint speciel sur dal sport d’inviern e’l svilup da sia cariera cul tema “Da la val Fex sül podest a Kitzbühl”.
La bannida es gnida tramissa a temp ütil e las tractandas ordinarias vegnan acceptedas da la radunanza.
A do ün minut da silenzi per Anna Staschia Bott, chi d’eira üna fidela commembra da nos club düraunt bgers ans.
Scu scrutinadur vain proponieu Roman Grossrieder ed elet sainza cuntravuschs.
2. Protocol da la radunanza generela dals 21 novemb er 2014
Il protocol da la radunanza generela dals 21 november 2014 as ho pudieu leger sün la pagina d’internet dal CdS Zuoz e vain appruvo unanimamaing da la radunanza.
3. Rapports
Rapport annuel 2014/2015 dal president Claudio Dusc hletta:
President Club da skiunzs Zuoz, an da gestiun 2014/ 2015
Pudair scriver ün rapport annuel es üna lezcha agreabla – que do l’occasiun da refletter ün mumaint sur d’ün oter an chi’d es passo cul vent. Ün an cun bgers mumaints allegers, ma eir ün an cun rabgias e pissers. In guardand inavous però realisesch eau adüna darcho, cha’ls algords positivs sun pü ferms cu quels negativs – e que es qualchosa bel da realiser. Que demuossa cha l’ingaschamaint per üna societed vela bger. Contact cun otras persunas, sfidas e progets interessants, ma surtuot bgeras bellas uras in cumpagnia. Las pü bgeras uras possi passanter in nossa suprastanza, üna squedra simpatica, motiveda e fich ingascheda per la vita da nos club. Cun els schi cha que fo plaschair a piglier per mauns la roba e da pruver oura adüna darcho qualchosa nouv. Nus vains tuottüna ün program vast ed animo, almain düraunt la stagiun d’inviern. Da sted vains üna vouta decis da lascher in pos noss commembers e d’organiser be güsta la tschaina pels agüdaunts dal maraton Engiadinais. Ma d’inviern, lò schi chi gira qualchosa! Per metter in pè nos program druvains nus precis tschinch tschantedas da suprastanza, üna in avuost per invier tuot, üna in november per finaliser tuot, üna in schner, üna in marz ed üna in gün per serrer giò tuot. Dimena ün ingaschamaint survisibel cha la suprastanza prasta. E glistess do que our da quistas 5 tschantedas bgers dis e bgeras uras düraunt l’inviern, inua cha nus pruvains da spordscher ün program interessant per giuven e vegl, in möd activ u passiv. E fintaunt cha vains inviern per inviern ün bun rimbomb da noss commembers, ans motivescha que eir per cuntinuer cun quista via.
L’an da gestiun 14/15, sün quel cha vuless uossa fer ün cuort sguard inavous, ho cumanzo la fin october cun ün‘acziun brutela. Quels chi d’eiran tiers a chaver aint il büschen sülla costa da Pizzet, per cha possans – finelmaing – installer ün fil da piglier temp scu chi tuocha, quels saun da che cha discuor! Dit in bun Rumauntsch ün krampf! Ma uossa pudains esser superbis cha vains ün indriz chi funcziuna. Ün grand grazcha fich pertuocha cò a noss Thömi Pinchera, chi ho organiso tuot la logistica e’l materiel. Ma eir a tuot ils oters chi vaivan dis a l’inlungia barba giat aint illa bratscha ed illas chammas.
In november ho lö già bod tradiziunelmaing la buorsa d’inviern, inua cha vegnan vendieus ogets da sport d’inviern a predschs propi favuraivels, ma eir il di da finischun dal trenamaint da sted da noss’JO
illa sela da gimnastica dal Lyceum. La radunanza generela, inua cha vains guardo ün bel film da nossa festa dal 111evel giubileum, es steda bain frequenteda. Il di da Nadel da l’an passo d’eira ün di tuottafat speciel: eir scha la naiv nu d’eira propi auncha riveda, s’ho glistess pudieu festager l’avertüra da la nouva s-chabellera Albanas. Ün vaira luxus d’üna s-chabellera: pittüreda illas culuors da Zuoz, cun cuschins lams e cun üna sveltezza impreschiunanta. Pover Pizzet ho uossa fadia da motiver ils skiunzs da gnir sün sieus s-chabels main confortabels, schabain cha las costas sun aunch’adüna glistess bellas e stipas.
Il di da Bümaun, cur cha organisains nossa cuorsa d’Ella ed El, pera d’esser ün di cha divers commembers e giasts nu pensan landervi dad ir culs skis … curius, dimpersè nu dess que ünguotta pü bel scu cumanzer l’an nouv in cumpagnia sü Pizzet. La partecipaziun vi da la cuorsa nun es propi grandiusa e scha od las istorgias scu cha que d’eira pera da pü bod, schi d’he schont ün poïn melavita … ma tuot nu’s po avair.
La naiv es alura riveda. Zieva cha vaivans da spetter lönch, memma lönch, e’la propi riveda il di da la Diagonela. Na da crajer! Ed alura auncha uschè generusa, cha’s ho eir auncha stuvieu trer lavinas quella bunura bod, ironicamaing l’unica vouta düraunt tuot l’inviern passo! Zieva cha nu vaivans üngüna naiv, ma plövgia s’ho stuvieu improviser cun quista cuorsa da passlung da stil classic ed organiser ün stizzi illa Plaiv. Tuottüna haun sur 600 partecipants fat il sforz – ma impustüt haun numerus voluntaris, traunter quels fich bgers da nossa societed – insomma pussibilto la cuorsa. Uossa resta be da sperer cha la prosm’ediziun da la Diagonela possa üna vouta avair lö suot circunstanzas normelas e sül traget previs – stains a guarder …
Ün oter evenimaint intaunt fich populer es il di dals veterans. Üna gruppa da commembers sur 50 ans, fittischems e cun buna glüna, s’haun chatto la fin da schner süllas pistas ed impustüt aint il restorant Pizzet a ster in cumpagnia. In favrer nu vains üngüns evenimaints per na fer concurrenza a noss turists, ma in marz vo que zieva darcho inavaunt tun sün tun. L’organisaziun dal böt dal maraton, ma eir dal post da proviantaziun in Resgia, funcziunan propi bain. Sur 130 voluntaris sun alura in vigur e pissereschan per cha tuot clappa da manger e da baiver. La festa al böt es dvanteda ün punct fix i’l program, natürelmaing insembel culs duos grills, ed ün important factur per nossa cassa dal club! Üna granda part cha pigliains aint quella dumengia dains però darcho our la sanda zieva. Cun nossa nouva fuorma da coursa dal club cun saireda da trategnimaint, inua cha tuots noss commembers sun invidos, vains pera chalo il gnierv! La bunura sü Pizzet, il zievamezdi giò’n Resgia e la saira aint ill’Engiadina, cun musica e tombola. Flott esa sto – uschè flott cha vains decis d’organiser quist program eir quist inviern. Per glivrer la stagiun ho il club auncha organiso il böt da la cuorsa da patruglias chi sun rivos da Tavo sur la Porta d’Es-cha fin immez Zuoz. Ün pitschen evenimaint, ma in ün fich bun ambiaint. L’excursiun a Scuol d’eira ün po melsgüra, siand cha las previsiuns da l’ora nu d’eiran optimelas. Ma quels chi sun stos haun glistess giodieu. Ün oter evenimaint fich populer e bain frequento es la Gita Risotto il Venderdi Sench sün Arpiglia. Per esser ün di chi cumainza bod la bunura esa adüna darcho da ster stut quaunt tard cha tscherts vaun a chesa la saira … propi bel.
Dimena ün program intensiv e vario, scu manzuno al cumainzamaint da mieu rapport. E cun scriver il rapport es que scu guarder ün film, in sperand cha pels preschaints es il tadler tiers a mieus pleds eir scu guarder ün film.
Allegraivel es per ün club adüna darcho, sch‘ün commember realisescha resultats sportivs chi faun gust. Ün da quels es Maurus Lozza, chi’d es dvanto champiun svizzer illa categoria U18. Üna prestaziun grandiusa chi fo spraunza sün dapü, in saviand cha que dvainta adüna pü difficil e la concurrenza pü ferma. Noss sustegn ho Maurus in mincha cas. D’üna vart da möd finanziel cun üna modesta partecipaziun vi dals grands cuosts d’üna stagiun, ma impustüt cun ün grand sustegn morel da nus tuots. E davous Maurus es già ün u l’otra candidata chi’ns pudess eir fer gust in avegnir … stainsa a guarder.
L’an passo, in mieu rapport annuel, d’he a la fin auncha manzuno trais puncts critics. Sün quels vulessi tuottüna ir aint aunch’üna vouta: scu prüm la tematica da las cuorsas alpinas sü Pizzet. Scu chi
guard’oura pudains organiser la fin da schner 2016 darcho duos cuorsas da coppa Europa, insembel cul organisaziun da cuorsas da San Murezzan. Cul böt, scha Zuoz pudess giuver üna rolla importanta eir düraunt ils champiunedis mundiels dal 2017. Eau speresch ferm cha rivains da realiser quist proget – stainsa a guarder …
Ün oter punct d’eira quel dal passlung: La Diagonela d’üna vart, il Maraton Engiadinas da l’otra vart. In quist champ vains da fer ün grand pass, saglir suravi sumbrivas e guarder cha la collavuraziun possa gnir optimeda ed intensiveda. Las numerusas tschantedas, discussiuns e dispüttas a reguard las structuras dal Maraton am restaron auncha lönch in memoria. Sperains cha riva ün di il temp da pudair guarder inavous e constater cha tuot il sforz ho eir valieu la paina. Stainsa a guarder …
E’l terz punct d’eira quel da nossa giuventüna cha vains fadieu da rabaglier süls skis da passlung u d‘alpin. Eir cò vains pruvo cun grand sforz da schmuanter qualchosa, ma’l success es be moderat, scha guard las annunzchas per l’JO da quist inviern. Da l’otra vart vainsa analiso la partecipaziun sur ils ultims ans e realiso cha que ho adüna darcho do uondas, insü ed ingiò. In quist champ vainsa simplamaing da ster landervia e da pruver da motiver eir nons e nonas, baps e mammas dad ir e praticher il sport d’inviern in möd pü intensiv. Cun nossa nouva spüerta, inua cha spordschains il marculdi zievamezdi il trenamaint da passlung e la sanda il trenamaint alpin, sperains cha ün u l’oter possa fer adöver da quista cumbinaziun. Ils trenamaints da la sanda vains pudieu organiser insembel cun la scoula da skis, dafatta cun gianter sur mezdi – dimena üna spüerta cumplessiva ed attractiva. Stainsa a guarder …
Scu adüna, cur cha’l rapport vo vers la fin e’ls preschaints sun grats cha’l president ho finelmaing dit que cha’l vulaiva dir, vuless eau ingrazcher a tuot quels chi contribueschan qualchosa vi dal club da skiunzs da Zuoz. Que sun bgeras persunas, bunas ormas e fidels commembers e voluntaris. Per na schmancher ad üngün ingrazch eau a tuots in globo per l’ingaschamaint a favur da nos club e per la lavur prasteda e m’allegr sün ün avegnir allegraivel in quista cumpagnia.
Grazcha fich!
Rapport schef cuorsas e materiel 2014/2015 Thomas P inchera:
Cuorsas
Eau guard inavous sün üna stagiun pütost quieta, almain que chi reguarda las cuorsas organisedas dal club da skiunzs Zuoz.
Scu üsito ho gieu lö ils 1. schner 2015 la cuorsa «el ed ella» sü Pizzet cun abundant 30 partecipants. Eir quist an, adonta da la pocha naiv, vains pudieu giodair üna bellischma cuorsa sülla pista dal Pizzet.
Als 17 schner 2015 , zieva l`unica granda naivera da la stagiun ho gieu lö «La Diagonela». Eir scha «Petrus» ho pruvo da las tuottas per eviter quist evenimaint, ans es que glistess gratagio da mner tres quista seguonda Diagonela cun böt i‘l minz da Zuoz. Be grazch‘ün sforz enorm da divers commembers da noss club chi`s haun miss a disposiziun scu voluntaris, d`eira que insomma pussibel da spaler aint tonnas da naiv illa loipa e da fabricher sü l`infrastructura per quista cuorsa. Grazcha fich per tuot quellas fadias , süjuors ed uras prastedas a favur da « La Diagonela » Pü tard scu üsito, nempe als 14 marz 2015 avains tschercho ils champiuns da la club da skiunzs Zuoz . La maestraunza dal club ho cumanzo culla cuorsa da skis e snowboard sü Pizzet. Zieva gianter vains cumbattieu giò‘n Resgia culs skis da passlung per mincha secunda. Scu finischun vaivans tuots merito üna bella tschaina cun trategnimaint aint il Hotel Engiadina.
Materiel
Tres que cha las staungias chi sun staziunedas aint il container sü Pizzet nu vegnan druvedas propi bger sun quellas in bun uorden. Unic las staungias dad ün meter sun cul ir dals ans gnidas ün pôin falambras e per que avains cumpro giò da Claudio Viletta diversas staunginas per ün import da frs. 250.00.
Il magazin giò`l lavuratori cumünel vains sgumbro quista sted üna vouta ün pôin pü decis, que chi faiva eir da bsögn. Sgumbrand avains chatto schurmas da giaccas veglias dal JO, quellas avains purto a la duonna Leibl per regaler a glieud chi ho dabsögn a l‘ester. Eir il materiel in quist magazin es tres que darcho in bun uorden.
Rapport dal schef giuvenils 2014/2015 Thomas Fent :
Stimos preschaints
Darcho pudains nus guarder inavous sün üna bella stagiun sainz’accidaints da noss’JO. La fin avuost haun 40 iffaunts our da las vschinaunchas da S-chanf, La Punt, Madulain e Zuoz cumanzo cul trenamaint da sted. In conguel cun l’an aunz d’eiran que 14 iffaunts pü poch. Impustüt tals pü pitschens da las classas bassas vains stuvieu constater üna diminuziun considerabla tar las annunzchas.
Cun que cha duonna Holle ho durmieu al cumainzamaint da la stagiun ed ans ho regalo la naiv pür la mited da schner, ho il trenamaint sün naiv cumanzo in möd stantus. Grazch’a la flexibilited da nos mneders vainsa però listess pudieu mner tuot ils trenamaints planisos. In tuot ho il Club da skiunzs pudieu spordscher 53 uniteds da trenamaints per noss iffaunts.
Ils passlungists, suot la bachetta dad Andi Pauchard, Barbara Lozza e Rita Melcher haun cumanzo lur trenamaint d’inviern ils 26 november 2014. Nos trais atlets Maurus Lozza, Anja Lozza e Yanik Pauchard haun darcho partecipo cun grand success a cuorsas naziunelas, chantunelas e regiunels. Nus gratulains a quists trais sportivs per lur resultats grandius.
La gruppa alpin e snowboard es gnida organiseda da Claudio Viletta, Antoinette Russi, Didl Nuotclà e da Christian Florin. Eir els haun cumanzo la fin november sü Marguns ed haun alura continuo la mited schner süllas costas da Zuoz.
Ils iffaunts nun haun però be treno, els haun eir güdo cun grand ingaschamaint a la Diagonela ed al Maraton Engiadinais. Uschè sperains cha pudains bainschi recruter nouvs skiunzs e passlungists cun noss‘JO, ma eir nouvs commembers dal club e futurs voluntaris.
La suprastanza dal club ingrazcha cordielmaing a totelmaing 15 mnedras e mneders per lur sustegn important. Cun grand ingaschamaint prastan els ün’importanta contribuziun vi da la sandet dals iffaunts, ma eir vi dal sport d’inviern e per nos club.
Viva la cumpagnia, viva il club da skiunzs Zuoz!
Ils rapports annuels vegnan acceptos unanimamaing e cun grand applaus.
4. Müdamaints
Il club da skiunzs ho gieu l’an passo 240 commembers. Quels as cumpuonan seguaintamaing:
30 iffaunts d’JO, 112 commembers passivs, 80 commembers activs e 16 commembers libers.
5. Quint annuel 2014/2015
Nos president Claudio Duschletta preschainta cuort il rendaquint finel e’l bilauntsch siand cha nossa chaschiera Claudia Hosang es absainta.
Vair rendaquint e bilauntsch detaglio.
Als 30 gün 2015 ho il club da skiunzs gieu üna faculted da frs. 48'610.00.
Il rechav da l’an passo es frs. 107'936.05 e las sortidas d’eiran frs. 98'949.75. Usché cha resulta guadagn da frs. 8‘986.30.
Claudio ingrazcha a la chaschiera per sia lavur düraunt tuot l’an.
Il rendaquint vain accepto unanimamaing sainza cunt ravuschs.
6. Rapport dals revisuors
Ramun Ratti prelegia il rapport dals revisuors per l’an 2014/2015 e propuona a la radunanza da der dis-charg a la suprastanza.
Il rapport vain accepto e la radunanza do dis-charg a la suprastanza.
Il president Claudio Duschletta ingrazcha als revisuors Carla Robbi e Ramun Ratti per lur lavur,
7. Tschernas
Quist an do que cun Claudia Hosang, chi ho do la desditta da la suprastanza our da motivs da temp, ün müdamaint in suprastanza.
Nouv vain proponida Karin Casty invezza da Claudia Hosang scu nouva chaschiera da club. Sainza cuntravuschs e grand applaus vain Karin Casty eletta illa suprastanza a partir da dalum. Sinceras gratulaziuns e bainvgnieu in nos ravuogl. Claudio surdo üna giacca dal club da skiunzs Zuoz scu act simbolic.
8. Onorificaziuns
Chi chi’d es 25 ans commember da Swiss Ski dvainta veteran da SWISS SKI. Quist an sun que Riet Planta e Duri Campell cun 25 ans (medaglia d’argient).
Rita Melcher vain onureda per sia granda lavur scu mnedra dad JO da passlung düraunt passa 25 ans. Claudio ed Andi surdaun ün bel püschel fluors ed ün preschaint scu ingrazchamaint per sia lavur.
Impü manzuna il president cha sar Roman Casty es daspö 65 ans commember da nos club!
9. Program annuel 2015/2016
Il program annuel dal Cds Zuoz es eir per la stagiun 2015/2016 darcho interessant e vario.
Il program annuel 2015/2016 vain accepto unanimamaing da la radunanza. Grazcha fich e nus ans allegrains sün bgeras bellas uras in cumpagnia da nos club.
10. Infurmaziun futur dal Marathon engiadinais
Zieva cha es gnieu decis in occasiun da la radunanza generela dal Marathon engiadinais da müder ils statüts da tel es gnieu elavuro our dals presidents dals clubs da skis in Engiadin’Ota insembel cun la gruppa da lavur chi’s metta insembel aus dal “Ausschuss” dal Marathon, in quist occasiun nouvas structuras e preparo il Marathon pel futur.
In occasiun da la radunanza generela declera Claudio Duschletta cuort a tuot ils preschaints las noviteds e la cronologia dals ultims 3 ans a reguard ils müdamaints tal Marathon engiadinais.
11. Varia
Il president ingrazcha a tuot quels chi haun in ün möd u l’oter contribuieu la vita da nos club da skiunzs. Impustüt a la suprastanza per la buna collavuraziun ed als mneders da l’JO per lur grand ingaschamaint,
Scu punct culminant da quista stagiun ans spettan la terza La Diagonela in schner, il Marathon Engiadinais in marz ed impustüt la cuorsa dal club cun saireda da trategnimaint.
In seguit a l’infurmaziun vains l’onur da pudair bivgnanter a Dumeng Giovanoli chi quinta in ün referat sur dal sport d’inviern e sia carriera scu skiunz, hotelier e turistiker. Que scu üsito in ün möd umoristic e autentic.
La radunanza vain serreda a las uras 20.33 !
In buna fé L’actuar
Madulain, 20 november 2015 Andi Pauchard
