Upload
buithuy
View
336
Download
6
Embed Size (px)
Citation preview
1
REPUBULIKA Y’U RWANDA URWEGO RW’UMUVUNYI
B. P. 6269 KIGALI
Tel. 587308/09
Fax 587182
www.ombudsman.gov.rw
DUSOBANUKIRWE N’AMATEGEKO AGENGA
UBUTAKA
Kigali, Gicurasi 2008
2
AMASHAKIRO
INTANGIRIRO ..................................................................................................................... 3
UMUTWE I. IMITERERE Y’IKIBAZO CY’UBUTAKA .............................................. 4
I.1. MBERE Y’UBUKOLONI .................................................................................... 4
I.1.1 Ubukonde ................................................................................................................... 4
I.1.2 Igikingi ....................................................................................................................... 4
I.1.3 Inkungu ...................................................................................................................... 4
I.1.4 Gukeba ....................................................................................................................... 4
I.2 MU GIHE CY’UBUKOLONI ..................................................................................... 5
I.3.1 IMITERERE Y’IKIBAZO CY’UBUTAKA MURI REPUBULIKA YA MBERE .. 6
N’IYA KABIRI .................................................................................................................. 6
I.3.2 IKIBAZO CY’UBUTAKA NYUMA YA JENOSIDE YO MURI 1994 .................. 6
UMUTWE II. ITEGEKO NGENGA N° 08/2005 RYO KU WA 14/07/2005 RIGENA . 8
IMIKORESHEREZE N’IMICUNGIRE Y’UBUTAKA MU RWANDA ....................... 8
II.1 IBYEREKEYE AMATSINDA Y’UBUTAKA .......................................................... 8
II.1.1 UBUTAKA BWO MU MIJYI N’UBUTAKA BWO MU CYARO ........................ 8
II.1.2 UBUTAKA BW’ABANTU KU GITI CYABO ...................................................... 8
II.1.3 UBUTAKA BWA LETA ......................................................................................... 8
II.2. IBYEREKEYE IMICUNGIRE, IMITUNGANYIRIZE N’IMIKORESHEREZE .... 9
Y’UBUTAKA .................................................................................................................... 9
II.2.1 GUTANGA NO GUKODESHA UBUTAKA ......................................................... 9
II.2.2 GUTANGA NO GUKODESHA UBUTAKA BWA lETA ................................... 10
II.2.3 IYANDIKWA RY’UBUTAKA ............................................................................. 10
II.2.4 IHEREREKANYA RY’UBURENGANZIRA KU BUTAKA .............................. 10
II.2.5 UBUKODE BW’UBUTAKA BUGENEWE UBUHINZI N’UBWOROZI .......... 11
II.3 UBURENGANZIRA N’INSHINGANO BY’ABAFITE UBURENGANZIRA .... 12
KU BUTAKA .................................................................................................................. 12
II.3.1 UBURENGANZIRA ............................................................................................ 12
II.3.2 Inshingano ............................................................................................................. 13
II.4 Ibyerekeye ubuzime .................................................................................................. 14
II.5 Ingingo zihana ........................................................................................................... 14
II.5.1 Ibihano bifatwa n’inzego z’ubuyobozi ................................................................... 14
II.5.2 Ibihano byo mu rwego rw’ibyaha nshinjabyaha ..................................................... 16
UMUTWE III . ITEGEKO N° 18/2007 RYO KU WA 19/04/2007 RYEREKEYE.... 17
KWIMURA ABANTU KU MPAMVU Z’ INYUNGU RUSANGE ............................... 17
III.1 Ibikorwa by’inyungu rusange ................................................................................... 17
III.2 Inzego zifite ububasha bwo kwimura abantu, ibikurikizwa , uburenganzira ........... 18
bw’abimurwa n’ubw’abimura ku mpamvu z’imirimo y’inyungu rusange ...................... 18
III.2.1 Inzego zifite ububasha bwo kwimura abantu ........................................................ 18
III.2.2 Imihango ikurikizwa ........................................................................................... 19
III.2.3 Uburenganzira bw’abimurwa n’ubw’abimura ku mpamvu z’imirimo y’inyungu 20
rusange ............................................................................................................................. 20
III.3 Guha agaciro ubutaka n’ibyabukoreweho no gutanga indishyi ikwiye .................. 21
III.3.1 Guha agaciro ubutaka n’ibyabukoreweho ............................................................. 21
III.3.2 Gutanga indishyi ................................................................................................... 21
Umwanzuro rusange ......................................................................................................... 24
INYANDIKO ZIFASHISHIJWE .................................... Error! Bookmark not defined.
3
INTANGIRIRO
U Rwanda ni igihugu gifite ubuso bwa km² 26.338 gituwe n’abaturage 8.128.353
(MINECOFIN, Ugushyingo 2003) muri bo 90% bakaba batunzwe n’imirimo y’ubuhinzi
n’ubworozi.Ikigereranyo cy’ubutaka kuri buri muryango ni hegitari 0.60 mu gihe 25%
by’abaturage bafite hasi ya hegitari 0.5 n’abandi benshi badafite na buto.Ubwo bucucike
butuma habaho imikoreshereze mibi y’ubutaka, isuri ikabije n’igabanuka ry’uburumbuke.
Twabibutsa ko nta na rimwe u Rwanda rwigeze rugira politiki ihamye yihariye y’ubutaka,
ndetse nta n’ubwo rwigeze rugira itegeko rigenga imikoreshereze y’ubutaka usibye amwe mu
mabwiriza, amenshi atari akigendanye n’igihe tugezemo kuko yari ayo ku gihe cy’ubukoloni.
Ni mu rwego rwo guca amakimbirane ashingiye ku butaka no gutuma habaho uburyo bwiza
kandi burambye, Guverinoma y’u Rwanda yashyizeho politiki y’igihugu y’ubutaka ndetse
n’Itegeko Ngenga rigena imikoreshereze n’imicungire y’ubutaka mu Rwanda, tutibagiwe
n’itegeko ryerekeye kwimura abantu ku mpamvu z’inyungu rusange.
4
UMUTWE I: IMITERERE Y’IKIBAZO CY’UBUTAKA
I.1. MBERE Y’UBUKOLONI
Ubutaka bwari ubw’umuryango kandi hakabaho ubwuzuzanye hagati y’ubuhinzi
n’ubworozi.Bwari isoko y’ubukungu bukaba n’ishingiro ry’ibikorwa byose
ntangamusaruro.Kugira uruhare ku butaka byaterwaga n’ubwisanzure bwo kuba mu
karere aka n’aka kimwe n’ubwuzuzanye mu kububyaza umusaruro.
Dore bumwe mu buryo bwari bugize iyo micungire y’ubutaka :
I.1.1 Ubukonde : yabaga ari isambu nini cyane y’umuryango yacungwaga n’umukuru
w’umuryango, yashoboraga gutuzwamo imiryango myinshi bitaga
« Abagererwa », bagiraga uburenganzira ku butaka bushingiye k’umuco
gakondo.
I.1.2 Igikingi : cyatangwaga n’umwami cyangwa umutware bitaga « Umutware
w’Umukenke », akakigabira umuryango w’aborozi.kugera ku mwaduko
w’abakoloni, kugabirwa igikingi bwari bumwe mu buryo abantu bari
baragiye babasha kubonamo ubutaka cyane cyane mu karere ko hagati
mu gihugu.
I.1.3 Inkungu : ni umuco watumaga umutware agira uburenganzira bwo kwiha
cyangwa
bwo kuba yagabira abandi bantu ubutaka butagira nyirabwo. Ubu
butaka bwabaga ari igisigara umuyobozi yashoboraga kugabira
abatabugira.
I.1.4 Gukeba : byasobanuraga gutuza abantu mu rwuri cyangwa mu isambu isanzwe.
Gukeba, bitaga ubundi « kugaba » byakorwaga gusa n’umuyobozi
w’ahagombaga gutuzwa abantu.
Uburenganzira ku butaka bwarubahirizwaga kandi bugahererekanywa hagati y’ibisekuru
hakurikijwe uko umuco gakondo wabiteganyaga. Ubwo burenganzira bukaba
bwaratangwaga mu izina ry ’umwami ari nawe wari nyirabwo mu rwego rw’ikirenga
akanagira inshingano yo kwita ku mibereho myiza y’abaturage.Ubwo nibwo buryo bwari
bwemewe n’umuco n’ubuyobozi bw’icyo gihe, ni nabwo abakoloni basanze, nyuma haza
kwiyongeraho ubundi buryo bw’imicungire y’ubutaka bushingiye ku mategeko yanditse.
5
I.2 MU GIHE CY’UBUKOLONI
Umwaduko w ’abakoloni wazanye impinduka mu muco w’abanyarwanda winjizamo
ibintu byinshi by’amahanga bihindagura ibyari bisanzwe ndetse binagoreka ibyari byiza
mu Rwanda.
Ubukoloni bwadukanye amategeko yanditswe dusanga mu bitabo byiswe « Codes et lois
du Rwanda », by’umwihariko, ayo mategeko akaba yari agamije kurengera inyungu
z’abakoloni n’iz’abashoramari b’abanyamahanga mu mikoreshereze y’ubutaka bw’u
Rwanda.
Ubuyobozi bwa gikoloni kandi bwashyize mu bikorwa icyemezo cyo mu mwaka w’1885
kirebana n’uko ubutaka butangwa.
Ubutaka bufite ba nyirabwo bwakomeje gucungwa mu buryo bwa gakondo, mu gihe
abakoloni n’abanyamahanga gusa aribo bonyine bagize amahirwe yo kugengwa
n’amategeko yanditse.
Kubera ubucucike bukabije bw’abaturage no gushaka gukonda ubutaka bushya, ubutegetsi
bwa gikoloni bwashyizeho uburyo bushya bw’imiturire bise « paysannats ». Ni uburyo
bujya gusa no « gukeba » kwa gakondo.Iyi miturire mishya yakoreshejwe mu turere
tukirangwamo inzuri n’ahandi hakiri ibisigara, buri rugo rugahabwa isambu ingana na
hegitari 2 hagamijwe guteza imbere ibihingwa ngengabukungu nk’ikawa mu karere
k’Amayaga n’ipamba mu karere k’Ubugarama.
Nyuma y’ikurwaho ry’ubuhake n’ibikingi, ubwo buryo bushya bwatumye haboneka
amasambu atubatse yo guhinga mu mwanya w’inzuri.Ubu buryo kandi bwashyizeho
umurongo mushya w’iterambere ry’Igihugu rishingiye ku buhinzi gusa, ubwuzuzanye
bwari hagati y’ubuhinzi n’ubworozi burasenyuka.
Hagati y’imyaka y’1952 n’1954, umwami Mutara III RUDAHIGWA yakuyeho ubukonde
mu Gihugu, ategeka « abakonde » bose kugabana imitungo yabo y’ubutaka n’
« abagererwa » babo.
I.3 NYUMA Y’UBWIGENGE
Ugereranyije n’igihe cy’ubukoloni, nta cyahindutse kigaragara.Ibice 90% by’ubutaka
buhingwa byakomeje kugengwa n’umuco gakondo.Itegeko ryanditse rigenga ubutaka
ryakomeje kuba umwihariko w’abantu bacye n’imiryango y’abihaye Imana.Iryo tegeko
usanga rikoreshwa cyane mu mijyi no mu duce dukoreramo imirimo y’ubucuruzi.
6
I.3.1 IMITERERE Y’IKIBAZO CY’UBUTAKA MURI REPUBULIKA YA MBERE
N’IYA KABIRI
Nyuma y’ubwigenge, amakomini yahawe uruhare rukomeye mu micungire
y’ubutaka.Itegeko rigena amakomini ryo ku wa 23/11/1963, riteganya ko kubahiriza
uburenganzira ku butaka bwabaruwe hashingiwe ku mategeko gakondo bibazwa
Komini.Ni muri urwo rwego uburyo buteganywa muri iryo tegeko bwaje gukurwaho
n’Itegeko-teka N° 09/79 rigena uburyo bwo kugura no kugurisha ubutaka bwa gakondo.
Kuva mu 1959, ubutaka bwabaye isoko y’amakimbirane akomeye hagati y’abaturage
kubera impamvu za politiki, ni nacyo gihe hagaragaye impnzi za mbere zahunze zitaye
amasambu n’indi mitungo itimukanwa yazo.Icyo gihe ubutaka bw’izo mpunzi
bwaratanzwe, akaba ari yo ntandaro y’ibibazo n’ubu duhangana nabyo nyuma ya jenoside.
Mu mwaka w’1976, Itegeko-teka N° 09/76 ryo ku wa 4/03/1976 rigena uburyo bwo
kugura cyangwa kugurisha ubutaka gakondo cyangwa ubwo umuntu yubatsemo bisaba
kugira uburenganzira ahabwa n’ubuyobozi bubishinzwe kandi agasabwa gusigarana
nibura hegitari 2.Ugura yagombaga kugaragaza ko nta sambu yari asanganywe nibura
ingana na hegitari 2.Uhereye icyo gihe, Leta yatangiye kwemera gusa amasambu
yandikishijwe bityo iherako iba nyir’ubutaka ku mugaragaro.Ni muri icyo gihe kandi
habayeho abimukira benshi bagiye batuzwa mu turere twari tugifite ubutaka cyane cyane
bava mu turere dutuwe cyane (Ruhengeri, Gisenyi, Gikongoro, Kibuye) berekeza mu
turere tujya kuba ubutayu tw’iburasirazuba (Umutara, Kibungo, Ubugesera n’Amayaga).
Mu ntangiriro y’imyaka ya za 80, nta masambu mashya yari akiboneka maze ibibazo
bitagira ingano bitangira kuvuka: igabanuka ry’ubunini n’uburumbuke bw’imirima,
amakimbirane ashingiye ku butaka hagati y’imiryango, inzara n’ibindi.Anketi mu
by’ubuhinzi yakozwe icyo gihe yerekanye ko impuzandengo y’ubuso bw’umurima ku
muryango yavuye kuri hegitari 2 mu mwaka w’1960 igera kuri hegitari 1.2 mu mwaka
w’1984.
I.3.2 IKIBAZO CY’UBUTAKA NYUMA YA JENOSIDE YO MU 1994
Jenoside n’ubwicanyi byabaye kuva muri Mata kugeza muri Nyakanga 1994 byahitanye
abantu barenga miliyoni.Habayeho kandi itahuka ry’impunzi zo muri 1959 ziza zisanga
ibibazo bikomeye byatewe na jenoside birimo imfubyi, abapfakazi, impunzi hanze
n’imbere mu Gihugu, ubukungu n’ubuzima bw’Igihugu muri rusange byarasenyutse.
Ingingo ya 3 n’iya 4 y’Amasezerano ya Arusha zasabaga Leta y’u Rwanda gushakira
impunzi ubutaka bwo guturaho kandi, kugira ngo hatabaho ikibazo mu rwego
rw’imibanire n’ubwiyunge bw’abanyarwanda, hagiwe inama ko batari kwishyuza
ibyabo.Nyamara ingingo ya 4 yemeraga ihame ko umutungo w’umuntu utavogerwa.Urwo
rujijo rw’iyo ngingo hamwe no kuba Amasezerano ya Arusha atarabashije gushyirwa mu
bikorwa neza byateye ibibazo byinshi aho ubutaka bumwe bwabaga bufite imiryango
irenga umwe yerekana ko ibufiteho uburenganzira.Ibi byatumye hafatwa ingamba nshya
7
zo gusaranganya amasambu cyane cyane mu turere twakiriye abatahutse benshi (Kibungo,
Bugesera, Umutara,…) .
Mu buryo bw’agateganyo, bamwe mu mpunzi zo mu w’1959 bagiye mu masambu atari
afite ba nyirayo icyo gihe.Ibi byaje gutuma hajyaho itegeko ryo mu 1996 riteganya
imicungire y’agateganyo y’amasambu adafite ba nyirayo.Abandi bafashe amasambu
y’amadini, abandi bafata ibisigara bya Leta kugira ngo babone aho batura
n’ibibatunga.Ahatuwe muri ubwo buryo twavuga nko mu Mutara aho 2/3 bya Parike
y’Akagera, ishyamba rya Gishwati, imirima imwe yari iy’ibigo bya Leta n’ibisigara mu
turere dutandukanye.
Kuri ubu u Rwanda rukaba rufite Itegeko Ngenga N° 08/2005 ryo ku wa 14/07/2007
rigena imikoreshereze n’imicungire y’ubutaka mu Rwanda.
8
UMUTWE II: ITEGEKO NGENGA N° 08/2005 RYO KU WA 14/07/2005 RIGENA
IMIKORESHEREZE N’IMICUNGIRE Y’UBUTAKA MU RWANDA
Ubutaka bw’Igihugu bubarirwa mu mutungo rusange w’imbaga y’Abanyarwanda bose;
abakurambere, abariho, n’abazavuka.
Uretse uburenganzira abantu bemerewe, Leta niyo ifite ububasha bw’ikirenga bwo
gucunga ubutaka bwose bw’Igihugu, ikaba ibikora ku nyungu ya bose kandi igamije
amajyambere nyayo mu by’ubukungu no mu by’imibereho myiza hakurikijwe uburyo
buteganywa n’amategeko.
II.1 IBYEREKEYE AMATSINDA Y’UBUTAKA
II.1.1 UBUTAKA BWO MU MIJYI N’UBUTAKA BWO MU CYARO
Ubutaka bwo mu mijyi ni ubutaka bukubiye mu mbago z’imijyi zishyirwaho n’itegeko.
Iteka rya Perezida wa Repubulika rigena ubundi butaka bufatwa nk’ubwo mu mijyi buri
mu nkengero z’imijyi no mu midugudu. Ubundi butaka busigaye ni ubutaka bwo mu
cyaro.
II.1.2 UBUTAKA BW’ABANTU KU GITI CYABO
Bugizwe n’ubutaka batunze mu buryo buhuje n’umuco, ubwo batunze mu buryo bujyanye
n'amategeko yanditse butari mu butaka bwa Leta cyangwa bw’Akarere, Umujyi n’Umujyi
wa Kigali, ubwo bahawe n’ubuyobozi bubifitiye ububasha, ubwo baguze, impano,
ingurane n’isaranganya.
II.1.3 UBUTAKA BWA LETA
a. Ubutaka bwa Leta bugize umutungo rusange
Bugizwe n’ubutaka bwose bugenewe gukoreshwa na bose cyangwa se ubwo inzego
z’imirimo ya leta zikoreraho kimwe n’ubutaka bw’igihugu bugenewe kurinda ibidukikije.
b. Ubutaka bwite bwa Leta
Ubutaka bwite bwa Leta bugizwe n’ubutaka bwose butabarirwa mu butaka bwa Leta
bugenewe ibikorwa rusange, n’ubutaka butari ubw’Uturere, ubw’Umujyi wa Kigali
n’Imijyi ntibube n’ubw’abantu ku giti cyabo.
Indeka n’ibisigara bitagira undi muntu n’umwe ubifiteho uburenganzira, bibarwa mu
butaka bwite bwa Leta. Bikoreshwa mu bikorwa by’amajyambere, mu bikorwa
9
binyuranye birebana n’imitunganyirize rusange y’Igihugu no mu guhabwa abantu batagira
ubutaka, bavukijwe uburenganzira bwabo ku butaka.
Minisitiri ufite ubutaka mu nshingano ze ashobora guha ububasha ubuyobozi bw’Akarere,
ubw’Umujyi cyangwa ubw’Umujyi wa Kigali bwo gucunga ubwo butaka.
I.1.4 Ubutaka bw’Akarere n’ubw’Umujyi
Ubutaka bw’Akarere n’ubw’Umujyi, bugizwe n’ubutaka bugenewe ibikorwa rusange
by’Akarere n’Umujyi n’ubutaka bwite bwabyo. Leta ishobora kugenera Akarere cyangwa
Umujyi impano y’ubutaka, bwaba ubugenewe ibikorwa rusange cyangwa se bwaba
ubutaka bwabyo bwite. Imijyi n’uturere kandi bishobora kubona ubutaka bibuguze
cyangwa se bukomotse ku mpano z’abantu cyangwa se iz’amashyirahamwe, ubwo butaka
bukinjira mu butaka bw’Akarere cyangwa bw’Umujyi bugenewe ibikorwa rusange
cyangwa mu butaka bwite bw’Akarere cyangwa bw’Umujyi.
II.2. IBYEREKEYE IMICUNGIRE, IMITUNGANYIRIZE N’IMIKORESHEREZE
Y’UBUTAKA
Mu rwego rw’imitunganyirize y’ubutaka bw’Igihugu, hashyirwaho imbonerahamwe
y’imikoreshereze y’ubutaka ku buryo buboneye, haba mu miturire, mu buhinzi, mu gutera
amashyamba, mu bworozi, ahakorerwa imirimo y’inganda n’imirimo rusange ya Leta, za
pariki, ahari ibiyaga n’imigezi, ubucukuzi bw’amabuye y’agaciro n’ibindi, ahari ibishanga
n’ahandi hari umutungo kamere ukomye.
Hagamijwe inyungu rusange no kubyaza ubutaka bw’icyaro ubukungu butubutse
kurushaho, minisitiri ufite ubuhinzi mu nshingano ze afatanyije n’ubuyobozi, n’abaturage
bireba, ashobora kwemeza ko amasambu ahuzwa mu rwego rwo kubyazwa umusaruro.
Buri muturage agumana uburenganzira ku gice kigize ubutaka bwe.
Bitabangamiye ibivugwa mu gika cya mbere cy’iyi ngingo, birabujijwe kugabanya
ubutaka bugenewe ubuhinzi n’ubworozi bwa hegitari imwe cyangwa buri munsi ya
hegitari imwe. Na none, ubutaka buri hagati ya hegitari imwe na hegitari eshanu
bushobora gukatwa ari uko nyir’ubutaka abiherewe uburenganzira na Komisiyo ishinzwe
ubutaka ku rwego bubarizwaho.
II.2.1 GUTANGA NO GUKODESHA UBUTAKA
Ubutaka bwose iyo butanzwe, nyir’ukubuhabwa yubahiriza gahunda y’imicungire,
imikoreshereze n’imitunganyirize y’ubutaka nk’uko yemejwe n’ubuyobozi bubifitiye
ububasha.Uburenganzira bwo gutunga ubutaka butangwa na Leta ku buryo bw’ubukode.
Igihe cy’ubukode bw’ubutaka ntigishobora kujya munsi y’imyaka itatu (3) cyangwa ngo
kirenze imyaka mirongo icyenda n’icyenda (99). Icyo gihe gishobora kongerwa. Umubare
nyakuri w’imyaka y’ubukode bw’ubutaka igenwa n’Iteka rya Perezida wa Repubulika
hakurikijwe icyo ubwo butaka bugenewe gukoreshwa.
10
Kwemeza ko ubutaka butanzwe cyangwa bukodeshejwe ku buryo burambye bigaragazwa
n’icyemezo gihamya iyandikwa ry’ubutaka gitangwa n’umubitsi w’impapuro-mpamo
z’ubutaka.
II.2.2 GUTANGA NO GUKODESHA UBUTAKA BWA lETA
Ibyubahirizwa mu gutanga cyangwa gukodesha ubutaka bw’Akarere, ubw’Umujyi
n’ubw’Umujyi wa Kigali n’ubw’ibigo bya Leta bifite ubuzima gatozi, ahacukurwa amabuye
y’agaciro na kariyeri, bigenwa n’Iteka rya Minisitiri ufite ubutaka mu nshingano ze .
Ubutaka bwo mu bishanga ni ubwa Leta. Ntibushobora kwegurirwa burundu abantu ku giti
cyabo kandi nta wushobora kwitwaza ko abumaranye igihe kirekire ngo abwegukane.
Minisitiri ufite ibidukikije mu nshingano ze ashyiraho Iteka ryemeza uburyo ubutaka bwo mu
bishanga bugomba gucungwa, gutunganywa no gukoreshwa.
II.2.3 IYANDIKWA RY’UBUTAKA
Kwandikisha ubutaka abantu batunze ni itegeko. Iteka rya Minisitiri ufite ubutaka mu
nshingano ze risobanura uburyo iyandikishwa ry’ubutaka rikorwa.
Bitabangamiye amategeko yihariye agenga imikoreshereze n’imicungire y’ubutaka buri mu
mbago z’imijyi, hashyizweho ibiro by’ubutaka mu rwego rwa buri Karere n’Umujyi
bishinzwe kwandika ubutaka.
Ibyo Biro biyoborwa n’umukozi witwa Umukuru w’Ibiro by’Ubutaka akabika ibitabo
by’ubutaka akanatanga ibyemezo bihamya nyir’uburenganzira ku butaka. Mu birebana
n’ubutaka, afite ububasha bwa Noteri.
II.2.4 IHEREREKANYA RY’UBURENGANZIRA KU BUTAKA
Bitabangamiye ibyerekeye ubuso bw’ubutaka budashobora kugabanywa, ubutaka ni
umutungo utimukanwa uri mu rutonde rw’imitungo izungurwa. Izungura ry’umutungo
w’ubutaka riremewe kandi rikorwa hakurikijwe imihango y’izungura iteganywa n’itegeko
rigenga izungura.
Uburenganzira bushingiye ku mutungo w’ubutaka bushobora guhererekanywa hagati
y’abantu cyangwa se bugatangwa hakurikijwe izungura; bushobora gutangirwa ubuntu,
gukodeshwa cyangwa kugurishwa; bushobora gutangwaho ingwate, hakurikijwe
ibyangombwa n’uburyo biteganywa n’amategeko mbonezamubano asanzwe.
11
Gutanga burundu uburenganzira ku butaka, nko kubugurisha, kubutangira ubuntu cyangwa
kubugurana, bikozwe n’uhagarariye umuryango (abashakanye ku buryo bwemewe
n’amategeko, abana bagejeje ku myaka y’ubukure, abana bato batarageza kuri iyo myaka
babihagarariwemo n’abashinzwe kubarera n’abandi badashoboye bahagarariwe n’abishingizi
babo ); bigomba kubanza kwemerwa n’abagize umuryango bose basangiye ubwo
burenganzira.
Uku kwemerwa kugaragazwa n’inyandiko yashyizweho umukono w’abarebwa n’icyo kibazo
cyangwa bateyeho igikumwe, bikorewe imbere y’umwanditsi w’irangamimerere cyangwa
imbere y’Umukuru w’Ibiro by’Ubutaka akanabyandika mu bitabo bye. Uku kwemerwa kandi
ni ngombwa no mu gihe hagomba gutangwa ingwate ku butaka, ubukode ku butaka,
ukwatisha kw’igihe kirekire cyangwa se mu gihe habayeho ubwumvikane ku burenganzira
bwo gukoresha ubutaka bw’undi bitewe n’imiterere yabwo.
II.2.5 UBUKODE BW’UBUTAKA BUGENEWE UBUHINZI N’UBWOROZI
Aha havanywemo ibyerekeranye n’amashyamba kuko bigengwa n’amategeko
yihariye.Ubukode bwanditse nibwo bwonyine bwemewe kandi burengerwa n’itegeko, uko
igiciro cyabwo cyaba kingana kose
Ubukode burangira ku bw’itegeko iyo igihe cyateganyijwe gishize, bitarindiriye ko hatangwa
integuza. Iyo igihe cy’ubukode bufite igihe kizwi buzamara kirangiye, umukode akaguma ku
butaka yakodesheje, nyir’ugukodesha ntabyange kandi ataramuhaye integuza, ubukode buba
bukomeje mu ngingo zimwe nk’iza mbere, ndetse no ku byerekeye igihe buzamara,
bitagombye indi mihango hagati y’abagiranye amasezerano.
Iyo hatanzwe integuza, umukode ntashobora kwitwaza ko amasezerano yakomeje ku bwayo
iyo igihe yagombaga kurangirira kirenze n’ubwo yaba yarakomeje kubukoresha bwose.
Icyakora, hakurikijwe ibimaze kuvugwa mu gika cya 2, ubwishingire bw’ubukode
ntibukomezanya n’inshingano zikomotse kw’iryo yongera ry’igihe ritakorewe indi mihango
yihariye.
N’ubwo amasezerano yaba yarateganyije igihe azamara, nyir’ugukodesha ashobora igihe
cyose kuyasesa, abanje gutanga integuza bishingiye ku masezerano bagiranye.Igihe
cy’integuza kigeze umukode atarasarura ibye, nyir’ugukodesha amuha igihe cyo kubisarura,
atakubahiriza amasezerano, akamugenera indishyi ikwiye nk’uko biteganywa n’amategeko.
Umukode nta burenganzira afite bwo gukodesha abandi bantu cyangwa bwo kwegurira
ubukode undi muntu atabyemerewe mu nyandiko na nyir’ubutaka wakodesheje.
Nyir’ugukodesha ntiyishingira amahane abandi bantu bashobora kuzana ku mukode, mu gihe
nta n’uburenganzira baba bakurikiranye kuri ubwo butaka ; umukode ni we, ku giti cye,
ugomba kubiregera mu nzego zibifitiye ububasha.
Umukode ariko ategetswe kumenyesha nyir’ugukodesha ibikorwa byose bigamije
kwamburwa ubutaka cyangwa kuburengera, mu gihe cyateganyirijwe ihamagarwa
ry’ababuranyi mu rukiko ; mu gihe atabikoze, akurikiranwaho indishyi z’akababaro,
akanariha ibyangiritse.
12
Iyo umukode apfuye, amasezerano y’ubukode akomezanya ku bw’itegeko n’abagomba
kumuzungura cyangwa n’abandi bafite uburenganzira ku bye. Abazungura cyangwa abafite
uburenganzira ku by’umukode wapfuye bashobora, mu gihe cy’umwaka umwe (1) uhereye
igihe yapfiriye, gusesa amasezerano ariko babanje gutanga integuza nibura y’amezi atatu (3).
Nyir’ugukodesha ntashobora gusezerera abazungura umukode wapfuye cyangwa abandi
bafite uburenganzira mu bye igihe ubukode bugomba kurangirira kitaragera keretse gusa mu
gihe ubwo bubasha bwaba bwarateganyijwe ku buryo butaziguye mu masezerano y’ubukode.
Abazungura n’abafite uburenganzira ku mutungo w’umukode wapfuye bagomba kumenyesha
nyir’ugukodesha ukomeza ubukode. Mu gihe cyose bataramumenyesha icyemezo cyafashwe,
bagomba gufatanya kumwishyura, batitaye kuri uyu n’uyu. Inshingano zivutse nyuma
y’imenyesha ry’icyemezo cyafashwe zibazwa ugomba gukomeza ubukode.
Umukode ategetswe kwita ku bikorwa binyuranye byagenewe gufata neza ubutaka biri ku
butaka akodesha.
Imanza zose zivutse ku butaka ziregerwa inkiko zibifitiye ububasha kandi mu buryo
buteganywa n’amategeko ariko mbere y’uko ikirego gishyikirizwa Urukiko, ababuranyi
bombi bategekwa kubanza gushakira ikibazo cyabo umuti muri Komite y’Abunzi ku rwego
rw’Umurenge. Ibi bireba ubutaka budafite impapurompamo.
II.3 UBURENGANZIRA N’INSHINGANO BY’ABAFITE UBURENGANZIRA
KU BUTAKA
II.3.1 UBURENGANZIRA
Atabangamiye amategeko y’imiturire n’ay’imitunganyirize rusange n’imikoreshereze
y’ubutaka, nyir’ubutaka afite uburenganzira bwo gukoresha ubutaka bwe mu buryo
bwubahiriza amategeko, ariko nta burenganzira na buke afite ku mabuye y’agaciro no ku
wundi mutungo kamere biri munsi y’ubutaka bwe; ni ibya Leta. Icyakora yemererwa mbere
y’abandi mu kubona uburenganzira bwo kubicukura iyo abisabye kandi abishoboye. Leta
yishingira ko nyir’ubutaka abutunga mu mudendezo kandi ikamurinda kubwamburwa ku
maherere, bwaba bwose cyangwa se igice cyabwo.
Inyubako zose, ibihingwa n’ibikorwa biri ku butaka byitwa ko byakozwe na nyir’ubwo butaka
ku mafaranga ye cyangwa ku bundi buryo kandi ko ari ibye mu gihe nta kindi kimenyetso
kiboneka cyo kubivuguruza. Icyakora, ibyo ntibibuza ko undi muntu ashobora kugira
umutungo w’inyubako, uw’ibihingwa cyangwa uw’ibindi bikorwa ku butaka bw’abandi mu
buryo buteganywa n’amategeko.
Iyo ibyubatswe cyangwa ibihingwa byakozwe n’umuntu ku butaka butari ubwe ku buryo
butemewe n’amategeko, nyir’ubutaka afite uburenganzira bwo gusaba ko uwabikoze
abikuraho, bitabujije ko nyir’ubutaka yahabwa indishyi mbonezamusaruro mu gihe hari icyo
13
byamwangirije. Niba nyir’ubutaka yiyemeje kugumana izo nyubako cyangwa ibyo bihingwa,
agomba kuriha igiciro cyabyo cyose.
II.3.2 Inshingano
Amasezerano yo guha abantu uburenganzira ku butaka ateganya ibigomba kuzuzwa byihariye
byerekeranye no kubufata neza no kububyaza umusaruro hakurikijwe icyo bugenewe
gukoreshwa.
Uretse igihe bigaragara ko ari ngombwa, nyir’ubutaka ntagomba kubangamira uburenganzira
bw’abandi. Bityo ntashobora nko:
1° kwima abaturanyi be inzira igera mu kwabo mu gihe nta handi bashobora kunyura ;
2° kubuza ko amazi ku bwa kamere anyura mu butaka bwe avuye mu bw’abandi buri
haruguru y’ubwe;
3° kubuza abandi kuvoma ku iriba riri ku butaka bwe, keretse ashoboye kwerekana ko
iryo riba ari we ubwe waryicukuriye cyangwa waryiyubakishirije.
Umuntu wese ku giti cye, utunze ubutaka, agomba kubukoresha mu buryo bwongera agaciro
kabwo akurikije kamere yabwo n’icyo bwagenewe kandi umuntu wese ukoresha ubutaka
bw’undi, yaba ashingiye ku masezerano yagiranye na nyirabwo cyangwa se yaba yarabutijwe
ku buryo bwemewe n’amategeko, ategetswe kubufata neza no kububyaza umusaruro.
Bwitwa ko bufashwe neza kandi ko bubyazwa umusaruro, ubutaka bwatunganyijwe buriho
ibihingwa cyangwa inyubako, uburiho amashyamba ku buryo butangiza ibidukikije, ubuhinge
bwateguriwe guterwamo imyaka, ubutaka bumaze gusarurwamo imyaka bwarajwe mu gihe
kitarenze imyaka itatu (3), ubumaze gusarurwamo imyaka, kimwe n’inzuri abantu baragiramo
amatungo akwiriye haba ku giti cyabo, haba mu mashyirahamwe cyangwa se imiryango ifite
ubuzima gatozi.
Ntibushobora kwitwa ko bufashwe neza kandi bubyazwa umusaruro:
1° ubutaka butarinzwe isuri;
2° ubutaka bwagenewe guhingwa, butarimo imyaka cyangwa ibindi bihingwa nibura
kugeza kuri kimwe cya kabiri (½) cy’ubuso bwabwo ;
3° ubutaka bwagenewe urwuri, butaragirwamo amatungo mu buryo bukwiye cyangwa se
budateyeho ubwatsi bw’amatungo kugeza nibura kuri kimwe cya kabiri (½) cy’ubuso
bwabwo;
4° ubutaka bwagenewe inyubako izo ari zo zose, ariko izo nyubako zikaba zitarubatswe
mu gihe giteganyijwe n’amategeko;
5° ubutaka bwagenewe ibikorwa bitagamije inyungu, ariko hagashira imyaka itatu (3)
ibyo bikorwa bitaratangira.
Gutera imbago, kuzungurutsa inkuta cyangwa uruzitiro ubutaka, ubwabyo byonyine ntibyitwa
ko ari ukubufata neza ku buryo buhagije no kububyaza umusaruro ugaragara. Ibikubiye muri
14
gahunda y’imitunganyirize rusange n’imikoreshereze y’ubutaka bw’Igihugu bigomba iteka
kubahirizwa, byaba byarateganyijwe mbere y’uko amasezerano akorwa cyangwa se mu gihe
arimo gushyirwa mu bikorwa.
Nyir’ubutaka ntashobora kubuza ibikorwa mu kuzimu cyangwa hejuru mu kirere cy’ubutaka
bwe bigamije inyungu rusange. Iyo ibyo bikorwa bimuteye igihombo abibonera indishyi
ikwiye. Nyir’ubutaka afite inshingano yo gutanga umusoro w’ubutaka ugenwa n’itegeko
ryihariye.
II.4 Ibyerekeye ubuzime
Mu byerekeranye n’ubutaka, uburenganzira bwo kubukurikirana ko uri nyirabwo buzima
hashize imyaka mirongo itatu (30). Abihaye ku ngufu cyangwa ku buriganya ubutaka
bw’indeka n’inkungu cyangwa bigabije ubutaka bw’abandi, ntibashobora kwitwaza inyungu
zikomoka ku buzime ngo bavuge ko uburenganzira bwo kubukurikirana butakiriho, bwazimye
cyangwa ko babwegukanye burundu, kabone n’iyo baba babumaranye igihe kirenga
icy’ubuzime.
Abatunze iby’abandi, baba abatijwe ubutaka bwo gukoresha cyangwa abatijwe amazu yo
guturamo ari kuri ubwo butaka, ntibashobora kubwegukana burundu ku mpamvu y’ubuzime,
uko igihe babumaranye cyaba kingana kose. Ubwo butaka bujya mu mutungo bwite wa Leta.
Hagati y’abagize umuryango umwe, nta buzime bw’uburenganzira bubaho mu muryango. Iyo
umuntu yazimiye, kabone n’iyo yamara igihe kirekire cyane, aho yabonekera hose
yakurikirana uburenganzira bwe hakurikijwe amategeko mbonezamubano agenga umuryango.
II.5 Ingingo zihana
II.5.1 Ibihano bifatwa n’inzego z’ubuyobozi
a. Gufatira ubutaka bwangirika n’ubutabyajwe umusaruro
Komisiyo y’ubutaka, ku rwego rw’Akarere cyangwa urw’Umujyi, igenzura buri gihe ko
ubutaka bw’abantu ku giti cyabo n’ubukodeshwa bwo mu Karere n’ubw’Umujyi bufashwe
neza kandi bubyazwa umusaruro. Buri mwaka iyo Komisiyo iha raporo Umuyobozi
w’Akarere kuri iryo genzura, ikanayoherereza Abayobozi bafite ububasha bwo gutanga
cyangwa gukodesha ubutaka bwo mu mutungo bwite wa Leta.
Minisitiri ufite ubutaka mu nshingano ze cyangwa se undi wese ufite ububasha bwo gutanga
cyangwa gukodesha ubutaka bwo mu mutungo bwite wa Leta, amaze kumva icyo Komisiyo
y’ubutaka ibishinzwe ibivugaho, yemerewe, mu gihe bigaragara ko ubutaka bumaze imyaka
itatu (3) yikurikiranyije budakoreshwa nta n’impamvu yumvikana ibitera, gutegeka ko
bufatirwa mu gihe cy’imyaka itatu (3) gishobora kongerwaho indi itatu (3).
15
Hafatirwa gusa igice cy’ubutaka kitabyajwe umusaruro cyangwa cyangirika ariko,
nyir’ubutaka cyangwa uwagombaga kubukoresha abanje kwihanangirizwa mu nyandiko
ishinganye cyangwa ifite gihamya ko yakiriwe yashyikirijwe nibura mbere y’amezi atandatu
(6) y’ifatira nyirizina, ariko akaba yaranangiye.
Ubutaka bwafatiriwe bushobora kuragizwa undi muntu ubisabye akanagaragaza ko ashoboye
kubukoresha neza no kububyaza umusaruro. Iyo nta muntu ubonetse, Akarere cyangwa
Umujyi ubwo butaka buherereyemo bigomba kubwitaho no kububyaza umusaruro.
b. Kwamburwa ubutaka bwari bwafatiriwe
Kwamburwa burundu ubutaka byemezwa na Minisitiri ufite ubutaka mu nshingano ze, amaze
kumva icyo Komisiyo y’ubutaka ku rwego rw’Igihugu ibivugaho.
Icyemezo cyo kwamburwa ubutaka ntigishobora gufatwa nyir’ubutaka atabanje
kwihanangirizwa mu nyandiko ishinganye cyangwa ifite gihamya ko yakiriwe igomba
kubimumenyesha nibura amezi atandatu (6) mbere yo kubumwambura.
Iyo kandi nyir’ubutaka adashoboye kuboneka, inyandiko yihanangiriza, ihabwa ubukoresha
muri icyo gihe kandi ikamanikwa ku biro by’Akarere, iby’Umujyi cyangwa iby’Umujyi wa
Kigali n’iby’Umurenge by’aho ubwo butaka buherereye mu gihe cy’amezi atandatu (6)
ateganywa mu gika cya mbere cy’iyi ngingo.
Inyandiko yihanangiriza igaragaza ku buryo budashidikanywa impamvu icyemezo kigiye
gufatwa gishingiyeho, n’umunsi kudakoresha ubutaka burebwa nacyo byatangiye
kugaragariraho.
c. Gusubizwa ubutaka bwari bwafatiriwe
Gusubiza ubutaka bwafatiriwe bikurikiza imihango imwe nk’iyo byanyuzemo bufatirwa,
bikanemezwa n’ubuyobozi bufite ububasha bwo gutegeka ko bufatirwa. Gusaba gusubizwa
ubutaka bwari bwarafatiriwe cyangwa se kwiyemeza undi mugambi mwiza bitewe no
kwihanangirizwa kubanziriza kwamburwa ubutaka bikorwa mu nyandiko igaragaza ingamba
nshya zo kuzabubyaza umusaruro n’uburyo ubisaba afite bwo guhita yongera gukoresha no
kwita kuri ubwo butaka kandi akabikomeza mu buryo buboneye.
Iyo nyandiko igomba kuba yageze ku buyobozi bwafatiriye ubutaka cyangwa uwohereje
inyandiko yihanangiriza mbere y’uko igihe giteganywa kirangira niba ubutaka bwarafatiriwe.
Ni nako bigenda mbere y’uko amezi atandatu (6) ashira mu gihe habayeho kwihanangirizwa
mbere yo kwamburwa ubutaka.Ubuyobozi busuzuma ibyo byifuzo bukurikije aho ubwo
butaka bwafatiriwe cyangwa bushobora kwamburwa buri bunahereye no ku mpamvu za buri
cyifuzo, bukacyemera niba bubona gifite ireme cyangwa bukacyanga niba bubona ntaho
gishingiye.
Mu gihe ubuyobozi bwanze icyo cyifuzo, icyemezo gifashwe kigaragaza impamvu
gishingiyeho n’ibikubiye mu bitekerezo n’inama byatanzwe, nyir’ubwite kireba
16
akamenyeshwa ko afite uburenganzira bwo kukijuririra mu rukiko rubifitiye ububasha mu
gihe kitarenze amezi atandatu (6). Nta ndishyi z’akababaro zishobora gutangwa ku
bw’isubizwa ry’ubutaka bwari bwarafatiriwe.
Iyo ubutaka bushyizwe mu maboko y’undi muntu bigomba kwandikwa mu bitabo
by’ubutaka, bitaba ibyo ntihabe hagira ubyitwaza imbere y’abandi bantu cyangwa se imbere
ya nyirabwo. Kugira ngo nyir’ubutaka abusubirane, abihabwa n’ubuyobozi bwabufatiriye
hashize igihe kitari munsi y’imyaka itatu (3) kuva umunsi bwafatiriweho. Iyo abusubiranye,
ibikorwa uwari wahawe ubutaka yakozemo byegukanwa na nyirabwo nta ndishyi abitangiye.
Icyakora, uwari wahawe ubutaka abanza guhabwa integuza y’amezi atandatu (6) mbere yo
kubusubiza nyirabwo.
II.5.2 Ibihano byo mu rwego rw’ibyaha nshinjabyaha
Bitabangamiye ibihano birushijeho gukomera byateganyijwe n’Igitabo cy’Amategeko Ahana,
azahanishwa igihano cy’igifungo kuva ku myaka itanu (5) kugeza ku myaka icumi (10)
n’ihazabu y’amafaranga y’u Rwanda kuva ku bihumbi ijana (100.000 Frw) kugeza kuri
miliyoni imwe (1.000.000 Frw) cyangwa se kimwe gusa muri ibyo bihano :
1° umubitsi w’inyandiko z’ubutaka warenze ku itegeko ku byerekeye kubika neza ibitabo
by’inyandiko z’ubutaka no gutanga inyandiko z’ubutaka ;
2° ukoresha inyandiko z’ubutaka, zibwe, zahinduwe ukundi ku mayeri cyangwa
zarashyizwemo amakosa kandi abizi ;
3° uwangije cyangwa ugize ukundi ahindura inyandiko z’ubutaka ;
4° umutangabuhamya wahamije ibyavuzwe cyangwa ibyakozwe kandi azi ko ari
ibinyoma ;
5° umuntu ushyikiriza umubitsi inyandiko z’ubutaka, umwirondoro n’ubushobozi bw’abo
bireba bose, azi ko atari byo kandi agamije kwandikisha inyandiko z’ubutaka.
Umuntu wese ubangamira uburenganzira bw’abandi cyangwa akabuza ibikorwa mu kuzimu
cyangwa hejuru mu kirere cy’ubutaka bwe bigamije inyungu rusange,nk’uko biteganywa n’iri
tegeko, ahanishwa igihano cy’igifungo kuva ku minsi irindwi (7) kugeza ku mezi atandatu (6)
n’ihazabu y’amafaranga y’u Rwanda kuva ku bihumbi makumyabiri (20.000 Frw) kugeza ku
bihumbi ijana (100.000 Frw) cyangwa se kimwe gusa muri ibyo bihano. Ategekwa kandi
gukora ibyo atubahirije.
Aha twabibutsa ko abitwa abagererwa batujwe n’umukonde ku butaka bahinga ubu cyangwa
bakoresha mu bundi buryo bafatwa kimwe nk’abandi baturage bose bakomora ubutaka
barimo ku bw’umuco kandi ko abantu bavukijwe uburenganzira bwabo ku butaka,
Leta ifite inshingano zo kubabonera ubundi butaka.Abaturage batunze ubwo butaka
babufitiye uburenganzira kimwe nk’abandi bose bakomora ubutaka bariho ku bw’umuco.
17
UMUTWE III : ITEGEKO N° 18/2007 RYO KU WA 19/04/2007 RYEREKEYE
KWIMURA ABANTU KU MPAMVU Z’ INYUNGU RUSANGE
Iri tegeko rigena uburyo bwo kwimura abantu ku mpamvu z’inyungu rusange.Aha
twabibutsa ko igikorwa cy’inyungu rusange ari igikorwa cyaba icua Leta, icy’ibigo bya
Leta, imiryango itegamiye kuri Leta, amashyirahamwe yemewe n’amategeko akorera mu
Gihugu cyangwa icy’umuntu bwite, kikaba gifitiye akamaro abantu benshi.
Leta ni yo yonyine ishobora gutegeka kwimura ku mpamvu z’ibikorwa by’inyungu
rusange kandi kwimura abantu bikorwa gusa ku mpamvu z’inyungu rusange kandi
habanje gutangwa indishyi ikwiye.Akaba ntawe ugomba kwitwaza inyungu ze bwite ngo
abangamire ishyirwa mu bikorwa rya gahunda yo kwimura abantu ku mpamvu z’inyungu
rusange.
Nyir’ubutaka ntashobora kubuza ibikorerwa mu kuzimu cyangwa hejuru y’ubutaka bwe
bigamije inyungu rusange.Iyo ibyo bikorwa bimuteye gihombo abibonera indishyi
ikwiye.Buri mushinga ku rwego urwo ari rwo rwose, uteganya ibikorwa byo kwimura
abantu ku mpamvu z’inyungu rusange ugomba guteganya amafaranga y’igikorwa
cy’ibarura ry’umutungo w’uwimurwa n’ay’indishyi ikwiye.Indishyi ikwiye ikaba ari
indishyi y’agaciro k’ubutaka n’ibyabukoreweho ihabwa uwimurwa kandi ibarwa
hashingiwe ku biciro biri ku isoko.
III.1 Ibikorwa by’inyungu rusange
Ibikorwa by’inyungu rusange ni ibi bikurikira:
1° imihanda n’inzira ya gari ya moshi ;
2° imiyoboro y’amazi n’ibigega rusange by’amazi;
3° imiyoboro itwara amazi yanduye n’aho atunganyirizwa;
4° ingomero z’amazi;
5° imiyoboro y’amazi y’imvura ikorwa ku mihanda;
6° ahatunganyirizwa imyanda;
7° imiyoboro y’amashanyarazi;
8° imiyoboro ya gazi, peterori n’ibigega byabyo;
9° imiyoboro y’itumanaho;
10° ibibuga by’indege;
11° aho bategera ibinyabiziga, gari ya moshi n’amato n’aho babyururukira;
12° ahantu hakomye hagamije kurengera urusobe rw’ibinyabuzima, umuco gakondo
n’amateka y’Igihugu;
13° ibikorwa bigamije umutekano n’ubusugire bw’Igihugu;
14° ibitaro, ibigo nderabuzima, amavuriro n’izindi nyubako zifitanye isano n’ubuvuzi
rusange;
15° amashuri n’izindi nyubako zifitanye isano na yo;
18
16° inyubako z’inzego z’ubuyobozi bwa Leta n’ibigo byayo, ibigo mpuzamahanga na za
ambasade;
17° ibibuga n’inyubako bigenewe imikino n’imyidagaduro;
18° amasoko ;
19° amarimbi ;
20° inzibutso za jenoside;
21° imirimo yo gushyira mu bikorwa ibishushanyo mbonera by’imitunganyirize y’Imijyi
n’iby’ubutaka bw’Igihugu muri rusange;
22° amabuye y’agaciro n’undi mutungo kamere biri mu bikorwa by’inyungu rusange;
23° ibikorwa remezo n’
ibindi bikorwa byose bigamije inyungu rusange bitagaragajwe kuri
uru rutonde byemezwa n’iteka rya Minisitiri ufite ibikorwa byo kwimura abantu ku
mpamvu z’inyungu rusange mu nshingano ze abisabwe n’abo bireba.
Ibikorwa bigamije inyungu z’abantu ku giti cyabo ku buryo bw’umwihariko ntibishobora na
rimwe kwitwa ko bigamije inyungu rusange. Iyo bibaye ngombwa, nyir’ibyo bikorwa abanza
kubyumvikanaho n’ushobora kwimurwa akamuha ikiguzi bumvikanyeho bashingiye ku
mategeko abigenga kandi bikorewe imbere y’ubuyobozi bubifitiye ububasha.
Iyo bigaragaye ko iyo mirimo y’abantu ku giti cyabo ifitiye inyungu abantu benshi n’Igihugu
muri rusange, iyo mirimo ifatwa nk’iy’inyungu rusange, ariko ba nyir’iyo mirimo ni bo
bishyura amafaranga y’igikorwa cy’ibarura ry’umutungo w’uwimurwa n’ay’indishyi ikwiye
Kwamburwa ubutaka bwangirika n’ubutabyajwe umusaruro bituma uwabwambuwe burundu
atakaza uburenganzira ku ndishyi ikwiye igenerwa abimurwa ku mpamvu z’inyungu rusange.
III.2 Inzego zifite ububasha bwo kwimura abantu, ibikurikizwa , uburenganzira
bw’abimurwa n’ubw’abimura ku mpamvu z’imirimo y’inyungu rusange
III.2.1 Inzego zifite ububasha bwo kwimura abantu
Inzego zigaragaza imishinga yo kwimura abantu ku mpamvu z’inyungu rusange ni izi
zikurikira:
1° Komite Nyobozi ku rwego rw’Akarere, iyo imirimo ireba Akarere kamwe ;
2° Komite Nyobozi ku rwego rw’Umujyi wa Kigali, iyo imirimo ireba Akarere karenze
kamwe mu mbago z’Umujyi wa Kigali;
3° Minisiteri bireba, iyo imirimo iteganyijwe ireba Uturere turenze kamwe cyangwa ari
igikorwa cyo ku rwego rw’Igihugu, haseguriwe ibivugwa mu gace ka 2° k’iyi ngingo.
Inzego zigenzura ko imishinga yo kwimura abantu ku mpamvu z’inyungu rusange yujuje ibya
ngombwa ni izi zikurikira:
19
- Komisiyo ishinzwe iby’ubutaka ku rwego rw’Akarere, iyo ari umushinga ureba
Akarere kamwe;
- Komisiyo ishinzwe iby’ubutaka ku rwego rw’Umujyi wa Kigali, iyo ari umushinga
ureba Uturere turenze kamwe mu mbago z’Umujyi wa Kigali;
- Komisiyo ishinzwe iby’ubutaka ku rwego rw’Igihugu, iyo ari umushinga ureba
Uturere turenze kamwe cyangwa umushinga wo ku rwego rw’Igihugu, haseguriwe
ibivugwa mu gace ka 2° .
Kwemeza ko abantu bimurwa ku mpamvu z’inyungu rusange bikorwa:
- ku rwego rw’ Akarere, n’Inama Njyanama y’Akarere ishingiye ku cyemezo cya
Komisiyo ishinzwe iby’ubutaka ku rwego rw’Akarere;
- ku rwego rw’ Umujyi wa Kigali, iyo ari umushinga ureba Uturere turenze kamwe mu
mbago z’Umujyi wa Kigali, n’Inama Njyanama y’Umujyi wa Kigali ishingiye ku
cyemezo cya Komisiyo ishinzwe iby’ubutaka ku rwego rw’Umujyi wa Kigali;
- ku rwego rw’Uturere turenze kamwe, hakoreshejwe Iteka rya Minisitiri ufite ubutaka
mu nshingano ze, hashingiwe ku cyifuzo cya Komisiyo ishinzwe iby’ubutaka ku
rwego rw’Igihugu, haseguriwe ibivugwa mu gace ka 2° k’iyi ngingo;
- ku rwego rw’Igihugu, hakoreshejwe Iteka rya Minisitiri w’Intebe.
III.2.2 Imihango ikurikizwa
Inyandiko isaba kwimura abantu ku mpamvu z’inyungu rusange igomba kugaragaramo ibi
bikurikira:
- imiterere y’umushinga;
- ikigaragaza ko umushinga ugamije inyungu rusange;
- igishushanyo mbonera cy’ubutaka umushinga uzakorerwaho;
- inyandiko igaragaza ko umushinga utabangamiye ibidukikije;
- ikimenyetso gihamya ko ikiguzi cy’indishyi ikwiye gihari;
- isobanurampamvu igaragaza ko ubwo butaka cyangwa aho hantu ariho habereye uwo
mushinga
- inyandikomvugo igaragaza ko abaturage bireba basobanuriwe iby’uwo mushinga n’akamaro
ufite.
Igishushanyo mbonera kivugwa kigomba kugaragaramo ibi bikurikira :
- igishushanyo cyangwa amakarita yerekana imbago z’ubutaka iyo mirimo izakorerwaho;
- imiterere y’ibintu biri kuri ubwo butaka;
- urutonde rugaragaza abafite uburenganzira kuri ubwo butaka;
- urutonde rw’abafite uburenganzira ku bikorwa biri kuri ubwo butaka.
Komisiyo y’ubutaka ibishinzwe imaze kubona isabwa ryo kwimura abantu ku mpamvu
z’inyungu rusange, isuzuma ishingiro ry’uwo mushinga. Iyo isanze uwo mushinga ufite
ishingiro, Komisiyo isaba mu nyandiko ubuyobozi bw’Akarere bireba gutumiza inama
nyunguranabitekerezo y’abaturage aho ubwo butaka buherereye nibura mu minsi mirongo
20
itatu (30) nyuma yo kubona isabwa ryo kwimura abantu ku mpamvu z’inyungu rusange,
ibamenyesha itariki, isaha n’ aho inama izabera. Iyo Komisiyo ibishinzwe igomba kuba
yafashe icyemezo nibura mu gihe cy’iminsi cumi n’itanu (15) nyuma y’ikiganiro
nyunguranabitekerezo n’abaturage.
Nyuma yo kungurana ibitekerezo n’abaturage, Komisiyo y’ubutaka ibishinzwe yongera
guhura n’abaturage igatangaza mu ruhame icyemezo ntakuka yafashe kuri uwo mushinga.
Icyemezo Komisiyo ifashe kimanikwa ahagaragara ku biro by’Umujyi wa Kigali,
iby’Akarere, iby’Umurenge n’iby’Akagari aho ubwo butaka buherereye, kikanatangazwa kuri
Radiyo Rwanda no mu binyamakuru bya Leta kugira ngo abo bireba babimenye. Bibaye
ngombwa gishobora kandi no kunyuzwa mu rindi tangazamakuru ryose rishoboka. Ibi
bikorwa nibura mu minsi mirongo itatu (30) nyuma yo gufata icyo cyemezo.
Nyuma yo gutangaza icyemezo ntakuka cy’iyimura ku mpamvu z’inyungu rusange, Komisiyo
y’ubutaka ibishinzwe ikora urutonde nyarwo rwa ba nyir’uburenganzira ku butaka n’ibikorwa
byabukoreweho kandi rukamanikwa ahagaragara ku biro by’Akarere, iby’Umurenge
n’iby’Akagari ubwo butaka buherereyemo kugira ngo abo bireba babimenye. Imihango
ikurikizwa mu iyimura ntishobora kurenza igihe cy’amezi ane (4) guhera ku munsi inzego
zivugwa haruguru zibyemeje.
III.2.3 Uburenganzira bw’abimurwa n’ubw’abimura ku mpamvu z’imirimo y’inyungu
rusange
Uwimurwa ku mpamvu z’imirimo y’inyungu rusange agomba kumenyeshwa igihe ipima
n’ibarura by’ubutaka bwe n’ibyabukoreweho bizatangirira. Imirimo y’ipima n’ibarura ikorwa
ubifiteho uburenganzira ahari cyangwa ahagarariwe hari kandi n’abahagarariye ubuyobozi
bw’inzego z’ibanze
Iyo nyiri ibikorwa atabonetse kandi yarabimenyeshejwe mu buryo buteganyijwe muri iri
tegeko, bikorerwa inyandikomvugo ishyirwaho umukono n’abahagarariye ubuyobozi
bw’inzego z’ibanze hamwe n’abakoze ipima n’ibarura.
Umuntu ufite ubutaka bwagenewe imirimo y’inyungu rusange agomba kugaragaza
ibimenyetso bihamya ko ubwo butaka n’ibyabukoreweho abifiteho uburenganzira n’icyemezo
cy’uko imiryango ye ibyemera. Mu bimenyetso bihamya ko ubwo butaka n’ibyabukoreweho
ari ibye harimo ibi bikurikira:
1° ibimenyetso byanditse bigaragaza ko ubutaka yabuguze, yabuhawe, yaburazwe, cyangwa
se yabuzunguye;
2° inyandiko cyangwa se imvugo y’abayobozi b’ibanze ko uwo muntu afite uburenganzira
ku butaka yimurwaho;
3° inyandiko cyangwa ubuhamya bw’abaturanyi byemeza ko ubwo butaka ari ubwe koko;
4° icyemezo cy’urukiko.
21
Umuntu ufite ubutaka bwagenewe imirimo y’inyungu rusange agomba kugaragaza kandi
icyemezo cy’uwo bashakanye iyo ari abashakanye hakurikije ivangamutungo rusange
cyangwa ivangamutungo w’umuhahano.
Uwituje cyangwa uwakoreye ibikorwa ku butaka bubujijwe guturwaho nyuma y’uko
amategeko abigenga ajyaho, nta ndishyi ahabwa
Uwimurwa ku mpamvu z’inyungu rusange afite uburenganzira bwo kujuririra icyemezo
cyafashwe na Komisiyo y’ubutaka ibishinzwe muri Komisiyo y’ubutaka yo ku rwego
rwisumbuye mu minsi mirongo itatu (30) nyuma y’ifatwa ry’icyemezo. Binaniranye,
hiyambazwa urukiko rubifitiye ububasha.
Usaba kwimura ku mpamvu z’inyungu rusange afite uburenganzira bwo kujuririra icyemezo
cyafashwe na Komisiyo y’ubutaka ibishinzwe muri Komisiyo y’ubutaka yo ku rwego
rwisumbuye mu minsi mirongo itatu (30) nyuma y’ifatwa ry’icyemezo. Binaniranye,
hiyambazwa urukiko rubifitiye ububasha.
III.3 Guha agaciro ubutaka n’ibyabukoreweho no gutanga indishyi ikwiye
III.3.1 Guha agaciro ubutaka n’ibyabukoreweho
Ibintu bibarurwa kugira ngo bihabwe agaciro ko kuriha indishyi zikwiye z’abimuwe ku
mpamvu z’inyungu rusange ni ubutaka n’ ibikorwa byakorewe ku butaka nk’ibihingwa
binyuranye, amashyamba, inyubako izo ari zo zose cyangwa ibindi bikorwa bigamije
gukoresha neza ubutaka cyangwa kububyaza umusaruro.
Bitabangamiye andi mategeko, agaciro k’ubutaka n’agaciro k’ibikorwa byakorewe ku butaka
bwimurwaho abantu ku mpamvu z’inyungu rusange, bibarwa hitawe ku ngano, imiterere
yabyo n’aho biherereye kandi hashingiwe ku biciro biri ku isoko.
III.3.2 Gutanga indishyi
Ku bwumvikane bw’uwimura n’uwimurwa, indishyi ikwiye ishobora kuba amafaranga,
ubundi butaka, inyubako cyangwa ibindi bikorwa bihwanye n’indishyi ikwiye yabaruwe mu
mafaranga. Iyo indishyi ikwiye yabaruwe mu mafaranga isumbije agaciro ubutaka bundi
uwimurwa ahawe, amafaranga asagukaho ahabwa uwimurwa.Kandi kugira ngo iyimurwa
ryemerwe, indishyi ikwiye ihabwa uwimurwa igomba kurihwa mbere y’uko yimuka.
Indishyi ikwiye yemejwe na Komisiyo y’ubutaka yishyurwa mu gihe kitarenze iminsi ijana na
makumyabiri (120) uhereye igihe iyo ndishyi ikwiye yemerejwe. Iyo birenze icyo gihe,
iyimurwa riba ritaye agaciro keretse uwimurwa n’uwimura babyiyumvikaniye.
22
Nyuma yo kwakira indishyi ikwiye, uwimuwe afite igihe kitarenze iminsi mirongo cyenda
(90) kugira ngo abe yimutse kandi igihe cyose uwimurwa agitegereje kwishyurwa, afite
uburenganzira bwo guhinga ibihingwa bitarenza mu murima we iminsi mirongo cyenda (90)
no gusarura imyaka ye ikiri mu murima.
Amafaranga y’indishyi ikwiye ashyirwa kuri konti y’uwimurwa muri banki iri mu Gihugu
cyangwa mu kigo cy’imari kiri mu Gihugu cyemewe n’amategeko kandi yihitiyemo naho mu
gihe indishyi zikwiye zigomba guhabwa abimurwa barenze umwe iyo basangiye
uburenganzira kuri uwo mutungo nk’umuryango cyangwa se umugore n’umugabo
bashakanye mu buryo bwemewe n’amategeko, amafaranga ashyirwa kuri konti basangiye ku
buryo bisaba ko ugiye kuyabikuza ahabwa uruhushya rwanditse rw’abo bayisangiye.Aha
twakwibutsa ko Iyo umutungo w’uwimurwa wafashweho ingwate muri banki, amafaranga
y’indishyi ikwiye ashyirwa kuri konti yumvikanyeho n’iyo banki.
Iyo uwimurwa atagaragaje nomero ya konti amafaranga y’ibintu yabaruriwe yashyirwaho mu
gihe kitarenze iminsi mirongo itatu (30) uhereye igihe abimenyesherejweho, ayo mafaranga
ashyirwa kuri konti y’Akarere uwo mutungo uherereyemo akaba ari ho azayafatira.
Iyo uwimurwa atanyuzwe n’agaciro kahawe ubutaka n’ak’ibikorwa byabukoreweho,
Komisiyo y’ubutaka yo ku rwego ikibazo kiriho imusaba mu nyandiko kwishyiriraho
impuguke cyangwa ibiro by’inyigo yihembera byazobereye mu ibaruragaciro kandi byemewe
n’amategeko kugira ngo bigaragaze agaciro mvuguruza ; Iyo ako gaciro mvuguruza
katemewe na Komisiyo yari yabisabye, uwimurwa ajuririra Komisiyo y’ubutaka y’urwego
rwisumbuye mu gihe kitarenze iminsi cumi n’itanu (15) y’akazi na yo igatanga umwanzuro
mu gihe kitarenze iminsi mirongo itatu (30) uhereye ku munsi yakiriyeho ubwo bujurire.
Uwimurwa atanyurwa n’umwanzuro wa Komisiyo y’ubutaka yajuririyemo, aregera inkiko
zibifitiye ububasha hagati aho agaciro kemejwe na Komisiyo y’ubutaka y’urwego rwajuririwe
gahabwa uwimurwa kugira ngo ibikorwa bidahagarara mu gihe hagitegerejwe icyemezo
cy’urukiko.
Bitabangamiye ibihano biteganywa n’Igitabo cy’amategeko ahana, umuntu wese wishyuwe
indishyi ikwiye iteganywa n’iri tegeko agasaba kubarurirwa no kwishyurwa inshuro irenze
imwe yirengagije ko yari yabaruriwe kandi yarishyuwe mbere, ahanishwa igihano cy’igifungo
kuva ku mezi atandatu (6) kugeza ku myaka ibiri (2) n’ihazabu y’amafaranga y’u Rwanda
kuva ku bihumbi ijana (100.000 Frw) kugeza kuri miliyoni eshanu (5.000.000 Frw) cyangwa
se kimwe muri ibyo bihano. Iyo bigaragaye ko uwimurwa yishyuwe inshuro irenze imwe,
agomba gusubiza indishyi yari yahawe kandi agahanishwa ibiteganywa n’ingingo
z’amategeko zikubiye mu Gitabo cy’amategeko ahana ibyaha.
Mu gihe uwishyura indishyi zikwiye atazitangiye igihe cyagenwe cyavuzwe haruguru
yishyura indishyi y’ubukerererwe ya 5% buri mwaka yiyongera kuri iyo ndishyi ihabwa
uwimurwa. Icyo gihe ntigishobora kurenga imyaka ibiri (2), kandi iyo uwimura yisubiyeho
mu gihe cyavuzwe haruguru ntibimubuza gutanga izi ndishyi.
Mu gihe uwimurwa atimutse mu gihe cyateganyijwe kandi yaramaze kwishyurwa, yimurwa
ku ngufu z’ubuyobozi bubifitiye ububasha.
23
Mu gihe ibi byose byagezweho ari uko byaciye mu nkiko, uwatsinzwe urubanza ni we
wishyura amafaranga y’ikurikiranwa ry’urubanza agenwa n’urukiko.
Mu gihe komisiyo z’ubutaka ku rwego rw’Umujyi wa Kigali no ku rw’Akarere
zitarashyirwaho, kugenzura no kwemeza imishinga yo kwimura abantu ku mpamvu z’inyungu
rusange bikorwa n’Inama Njyanama y’Umujyi wa Kigali cyangwa iy’Akarere ubutaka
buherereyemo.
24
Umwanzuro
N’ ubwo hashyizweho Itegeko Ngenga n° 08/2005 ryo ku wa 17/07/2005 rigena
imikorehsereze n’imicungire y’ubutaka mu Rwanda, ibibazo byose birebana n’ubutaka
ntibyabashije kubonerwa ibisubizo kuko n’ubundi hari abatarabashije kubona ubutaka bwaba
ubwo guhinga, gutura cyangwa kororeraho, akaba ari muri urwo rwego ubwo twateguraga iyi
mfashanyigisho, Perezida wa Repubulika yatangiye gahunda y’isaranganya yikorera ubwe.
Byongeye kandi kuba amategeko-teka afasha aya mategeko yombi ryaba iry’ubutaka n’iryo
kwimura abantu ku mpamvu z’inyungu rusange, bituma aya mategeko adashyirwa mu
bikorwa ku buryo bukwiriye.
25
INYANDIKO ZIFASHISHIJWE
1. Itegeko Ngenga n° 08/2005 ryo ku wa 14/07/2005rigena imikoreshereze n’imicungire
y’ubutaka mu Rwanda
2. Politiki y’Igihugu y’Ubutaka, Gashyantare 2004
3. Itegeko n° 18/2007 ryo ku wa 19/04/2007 ryerekeye kwimura abantu ku mpamvu
z’inyungu rusange