Upload
cherokee
View
156
Download
24
Embed Size (px)
Citation preview
Hilot: Tradisyon at SiyensiyaAng Hilot ay ang katutubong paraan ng panggagamot sa
Pilipinas.
Hindi malinaw kung kailan ito nagsimula, dahil wala pang
natatagpuan na mga lumang kasulatan na nagsasaad kung
gaano na talaga ito katagal ginagawa ng ating mga ninuno.
Ngunit malinaw na ang Hilot ay isang mahalagang bahagi ng
kulturang Pilipino, dahil ito ay matatagpuan sa buong Pilipinas.
Magkaiba man ang tawag dito sa iba’t ibang wika, at sari-sari
man ang istilo na ginagamit sa iba’t ibang isla, hindi maikakaila
na ang mga katutubong manggagamot ay pareho ang pinag-
uugatang prinsipyo ng pagpapagaling ng karamdaman.
Ang Tradisyon ng Hilot
Ang Hilot ay laganap sa ating bansa, ngunit hindi ito naiintindihan
ng karamihan. Kahit ang mga taong gumaling dahil sa Hilot ay
hindi maipaliwanag kung paano sila gumaling. Ang alam lang nila
ay bumuti at gumaan ang kanilang pakiramdam pagkatapos
nilang magpahilot at sundin ang payo ng albularyo ukol sa
halamang gamot at tamang pagkain.
Kapag tinanong naman ang albularyo o manghihilot hinggil dito,
malamang ang karaniwang tao ay hindi rin maliliwanagan.
Malamang ipapaliwanag ng albularyo ang Hilot gamit ang wika
kung paano niya ito natutunan—sa pamamagitan ng espiritu,
engkanto, kulam, at iba pa. Ito ay bahagi ng dahilan kung bakit
ang Hilot, bilang isang paraan ng panggagamot, ay naisantabi
pagpasok ng kanluraning paraan ng panggagamot, na
nagsasabing lahat ay dapat naka-ugat sa siyensiya.
Diyos ang pinagmumulan ng lahat. Ang Hilot ay nakaugat sa
malalim na paniniwala sa Diyos (tinatawag din na Espiritu ng mga
albularyo), na siyang pagmumulan ng buhay. Ang Diyos (o
Espiritu) ay matatagpuan sa lahat ng sulok ng daigdig, at maging
sa bawat nilalang. Ang Diyos ay pag-ibig—kung kaya
nararamdaman natin Siya sa pag-ibig at paglilingkod na walang
pasubali (unconditional love and service).
Isip, damdamin, at katawan. Ang Hilot ay isang paraan ng
panggagamot na tumatanaw sa Kabuoan ng tao, kaya ang
konsepto ng kalusugan ng Hilot ay sumasaklaw hindi lamang sa
pisikal na pangangatawan, kundi pati sa isip at damdamin. Sa
Hilot, ang malusog na tao ay siyang may malinaw na pag-iisip at
mahinahong damdamin, malakas na buto at matikas na
kalamnan, at namumuhay ng payapa.
Ang Apat na Elemento ng katawan. Pagdating sa katawan,
ang Hilot ay sumusunod sa paniniwalang ang tao ay binubuo ng
apat na elemento—lupa, tubig, hangin, at apoy. Ang mga
elementong ito ay may takdang balanse. Kapag ang mga
elemento ng katawan ay nasa tamang balanse, ang katawan ay
malusog. Ngunit kung ito ay nawawala sa balanse (dahil sa
kakulangan o kalabisan ng isa o higit pa sa mga elemento) ang
mga bahagi ng katawan ay humihina. Kapag napabayaan, ang
katawan ay bumibigay na sa sakit.
Engkanto o sakit? Noong unang panahon, ang pagkawala sa
balanse at karamdaman sa katawan ay ipinaliliwanag ng
albularyo sa paraang madaling maintindihan ng mga taong
pumupunta sa kanila—bilang kagagawan ng mga engkanto na
nauugnay sa elementong wala sa balanse. Halimbawa, kung ang
elemento ng lupa ang wala sa balanse, sinasabi ng albularyo na
ang tao ay naengkanto sa lupa, at ang kanyang karamdaman ay
dulot ng mga kapre o duwende. Kapag ang elemento ng tubig
ang wala sa balanse, sinasabi ng albularyo na ang karamdaman
ay dahil sa mga sirena o siyokoy. Kapag ang elemento ng hangin
naman ang may problema, kagagawan daw ito ng mga diwata.
Kapag ang elemento ng apoy naman ang wala sa ayos, ang mga
tiyanak at impernales ang tinuturong dahilan.
Ang ganitong katawagan at kaugnayan, dahil ito ay likas na
bahagi ng kultura at paniniwalang Pilipino, ay tinanggap ng buo
ng mga tao noong unang panahon. Dahil dito, sa ganitong paraan
din ipinasa ang kaalaman tungkol sa Hilot sa maraming salinlahi
ng mga katutubong manggagamot—hanggang sa panahon
ngayon, kung kailan maraming mga Pilipino ang hindi na
naniniwala sa mga engkanto, at nagsasabing ang mga ito ay
kathang isip lamang at hindi totoo.
Sa kasamaang palad, ang Hilot, dahil ito ay naugnay sa mga
katawagang engkanto sa loob ng napakatagal na panahon, ay
dumanas din ng katulad na kapalaran. Kasabay ng pag-isantabi
ng paniniwala sa mga engkanto, ay isinantabi din ng marami ang
paniniwala sa Hilot. Sa paglaganap ng kanluraning medisina at ng
“modernong” paraan ng panggagamot, ang Hilot ay tinitingnan
ng marami bilang isang makalumang paraan ng panggagamot ng
mga matatanda na hango lamang sa mga pamahiin at mistulang
walang basehan.
Ngunit, kung susuriing mabuti, makikita na ang Hilot ay naka-
ugat sa siyensiya. Ang mga paraan ng panggagamot ng mga
magagaling na albularyo ay batay sa mga batas ng kalikasan, at
sa batas ng mga planeta (universal law, o sa wika ng mga
albularyo, “batas ng Diyos”).
Ang Siyensiya ng Hilot
Kinailangan ang isang albularyong may kakaibang
pinanggalingan upang maipaliwanag na ang Hilot ay nakaugat sa
siyensiya, at hindi lang ito puro himala, engkanto, at kulam. Si
Bibiano “Boy” Fajardo, na mula sa angkan ng mga doktor, aral sa
isang ekslusibong paaralan, at nagtapos ng B.S. Chemical
Engineering, ay masasabing hindi tugma sa imahe ng karaniwang
nag-aaral ng Hilot upang maging isang albularyo. Ngunit dahil sa
kanyang maagang karanasan sa Hilot, orasyon, at sa
paghahanda ng mga halamang gamot (dahil tinutulungan niya
ang kanyang tiyo na siyang nagtutuli ng mga kabataan tuwing
bakasyon), siya ay nagkaroon ng interes na maging isang
albularyo.
Hilot at Muscular Dystrophy. Ang interes ni Boy Fajardo sa
Hilot ay lalo pang nadagdagan noong siya ay dalawampu’t pitong
taong gulang at nalumpo dahil sa sakit na Muscular Dystrophy.
Pabalik-balik siya sa ospital, ngunit walang gamot ang sakit na ito
sa kanluraning medisina—sa katunayan ay lingid sa kaalaman
niya, tinaningan na ng anim na buwan ang kanyang buhay.
Ngunit sa tulong ni Tiya Puring Guevarra, isang magaling na
albularyo na tubong Abucay, Bataan, na siyang nagsagawa ng
Hilot at banyos sa kanya, siya ay nakalakad muli at tuluyang
gumaling.
Ang siyensiya ng panggagamot. Habang lumalalim ang pag-
aaral niya ng Hilot at lumalawak ang karanasan niya dito,
napagtanto ni Boy Fajardo na ang ginagawa niyang panggagamot
ay sumusunod sa mga batas ng kalikasan na inaral niya bilang
estudyante ng siyensiya. Halimbawa na lang dito ang konsepto
ng “init-lamig.” Ang tila misteryosong konsepto na ito ay
alinsunod pala sa pangalawang batas ng thermodynamics
(second Law of Thermodynamics)!
Noong 1980, nag-umpisang mag-aral si Boy Fajardo kay Mr.
Agrifino Maranan sa Lemery, Batangas. Si Mr. Maranan, isang
principal na nagturo rin ng chemistry, biology at logic, ay isa sa
pinakamagaling na albularyo sa Pilipinas. Siya ang nagturo kay
Boy Fajardo ng mas malalim na siyensiya ng panggagamot at ang
tuluy-tuloy na proseso ng kalusugan gamit ang mga siyentipikong
konsepto katulad ng entropy at enthalpy.
Siyentipikong balangkas (o scientific framework) ng Hilot.
Dahil sa kaalamang natutunan niya kay Mr. Maranan, tuluyan
nang naiugnay ni Boy Fajardo ang paraan ng panggagamot na
natutunan niya mula sa mga matandang albularyo, at ang tila
napakalayong larangan ng siyensiya. Pinagpatuloy niya ang
panggagamot gamit ang kanyang bagong karunungan, hanggang
sa nabuo niya ang isang siyentipikong balangkas (“scientific
framework”) ng Hilot, kung saan maari ding ipaloob ang lahat ng
ibang paraan ng panggagamot.
Mula noong mapagsama niya ang tradisyon at siyensiya ng Hilot
sa kanyang panggagamot, ay nagsimula ding ipaliwanag ni Boy
Fajardo ang Hilot gamit ang wika ng siyensiya.
Electromagnetic force. Ang dating hindi maipaliwanag na
gawa ng Diyos, (o Espiritu),na walang ibang katawagan kundi
“milagro,” ay ipinapaliwanag na ngayon ni Boy Fajardo sa
siyentipikong paraan—bilang electromagnetic force o Emf. Ang
pwersang ito ay sumasaklaw sa buong kalawakan at siyang
pinagmumulan ng kuryente, liwanag, at magnetismo at
nakakaapekto sa lahat ng nilalang sa ating planeta.
Mga bahagi ng katawan at sakit. Ang apat na elemento ng
katawan ay hindi lamang guni-guni ng mga albularyo, kundi ang
mga ito ay may katumbas na mga kongkretong bahagi ng ating
katawan. Ang elemento ng lupa ay ang ating kalamnan at buto,
ang elemento ng tubig ay katumbas ng ating dugo, ihi, at iba
pang likido sa katawan, ang elemento ng hangin ay ang hangin
na ating hinihinga, at ang elemento ng apoy ay katumbas ng
enerhiya at metabolismo.
Ang pagkawala sa balanse o mga karamdaman na dati ay
pinapaliwanag bilang kagagawan ng engkanto, sa katunayan ay
mga sakit ng mga bahagi ng katawan na saklaw ng nasabing
elemento.
Sa pamamagitan ng siyentipikong pagpapaliwanag kung
paano nakakagaling ang Hilot (sa paraang biochemical,
neuroelectrical, biomechanical, at electromagnetical), umaasa si
Dr. Bibiano Fajardo na mailapit muli ang Hilot sa kasalukuyan, at
sa mga susunod na henerasyon. Layunin niyang patunayan na
ang karunungan n gating mga ninuno ilang dantaon na ang
nakalipas ay nananatiling angkop sa ating panahon at
makakatulong sa atin. Layunin din niyang ituwid ang mga maling
akala tungkol sa Hilot, na ito ay isang uri ng masahe lamang.