Momogun, Rungus om KadazanPanarangan-ku diri ontok di toun 2010 , nga kakali kiharati!!Momogun Rungus om Kadazan - Habal Antad sid Amai Traugott Forschner pada 17hb Disember 2010 tumimpa sid di Johori Botohong November 10, 2010 Subject: Asal usul dot Rungus: Varo nosurat ku tokudik kanangan ko asal-usul dot Rungus isuhut dit pandangan om teori dit ongo ahli antropologi dit opibasa ku. Nunu pandangan dikou? Iti i dohon fot ambat diri:O Johori, biano-ogi varo kotibangan do tumimpa dikau. Nemot-ku-no do mitanid it artikel Rungus sid Wk My und WEnglish.Hiza do nokorikot-oku-ogi sid Sabah 1956, kakali iso nga aso orang puteh minamakai di ngaran Rungus. Dusun-nopo, minsanko i missionari Honegger nga iadino. Kagi sid infomasi do Basel Mission, bai Dusun-nopo nokosurat sino diri. Bai ioku nokotimpuun do mamakai om pazazad sid vokon di ngaran Rungus do iadko i rurungan di tumorindak dit ongovokon iadko Nulu, Gonsomon om vokoni. Nakaharati-oku dot i boros do Rungus mad alus-no om pasok banal sid pialatan dot Ongomomogun i sid daerah Kudat..Kodung kopisamung do vokon, iadko ulun do Ranau ko sid Telipok, Tuaran, Tamparuli om Ranau, ko sid Kinabatangan, mad ogolivong do i kogumuai dioti nga mamakai do Dusun ko ong sid Kinabatangan, Orang Sungai o ngaran ong sid porinta diri. Sid Ranau om i BEM (SIB) ogolivong-oku, tu it ongokristian nga minamakai do Dusun. Topot ong i labus, nga Pasok Momogun. Antad diri nakaharati-oku do varo apajak o ngaran bahagi di sokoviai it ongorurungan antad sid Tawau sampai sid Weston dit iseso ot bansa, ino-no Momogun.Ong i tangon do Nunuk Aragang mad manarang di kinopitongkizadan dit ongorurungan diri.Kasalaan-nopo, hiza di mission do RC sid Penampang, ino runrungan Tenggara, i White Fathers minongonsug dit anganak do Tenggara do sumikul sid sikul Kina sid Api-api. Alaid-nopo it ongomolohing dit ongosumikul, minomungaran dit anganak sumikul do Kakadazan, tu inot anganak di sumikul sid Apiapi nga minintoron modop sid ongokadai sampai iadko kuli di tumabang sid kadai Kina. Kagi tu nokosikul ioti, avantangan-no ioti dot okonko Tenggara o ngaran ioti, inoi nga Kadazan-okoi, ka dioti, okonko bai ulun do govuton Dusun.I toun 1960 nokembulai-no i Kadazan- Society iadko cultural pongumpugan, tu a-po koho i British do varo political kumpulan. Nokorikot-po i Donald Stephens, it editor do Sabah Times, ino news paper di varo laid sangnalad habal sid boros "Kadazan". Kopiumpug-no it ongoulun dit ongokampong osomok sid Sikuati sid Mission Station do tomod minsamung dialo. Iosido minongonsug dit ongoRungus do mamung sid Kadazan Society.I Abah Mongimbal, i ponulung-za sid valai, nga minongingut di Stephens (Donald Stephens) do varo-po kotibangan dau do kopiboros dohon. Sinod umpug dino minamalang-oku di hal dit ongongaran dit ongorurungan do Momogun dino sampai pinopiontupat dau dot kadan-no tumabang do popitongkizad vagu dit Ongomomogun. Na ka dau, oviton-ku ino hal sid Annual conference om mongingut dit ongorungus do mamung sid Api-api sampai pogili sid umpug dot ombo i ngaran ot apatut mamakai, inono Pasok Momogun, supaya ensanan i kopiamung arait ko Kadazan, i ngaran antad sid Tenggara. .Na antad sid ongoRungus varo nokovozo i Lagan, i OT Barambangun-Kampong. Iosido a-insan nakalabus antad sid daerah Kudat, nga mongo-vongo iosido di ibu Kuta Sabah Apiapi, it ongokobongunan sino dino, om i-po kogumuai dit ongoulun antad pentongkob do Sabah. Aso kosusaan dioti do kopiharati, minsanko minamakai it ongulun dinoumpug siri di dau om dau do boros daerah ko rurungan. Alaid-nopo misalasai om minananarang om mongitung i niumpug sino, iri-ogi dinuat di Stephens i kogumuai dot umpug dot Kuran,ka.Nunu it apatut o ngaran tokou? Pakazon tokou i ngaran Pasok Momogun, ko kakali momongo tokou do mangarait dit kesaan tokou do Kadazan tokou, ka dau. Insani i Lagan songingkakat om minongogizak-nopo dot, Kadazan tokou, Kadazan tokou, ka dau.Iri-ogi minongirim i Stephens do surat sid dohon sampai minonuturan-no do iadino i kinompusan. Antad diri, ong kodung kadapat it ongoulun do Sabah do momolitik ponong sid kopiundian do local government, opitongkizad-no laid it ongoMomogun do varo UPKO om varo UMKO.Sid pinilihan do 1963 dit insan-ogi, nga aso majority bahagi i Momogun, inoi nga, miabal-no it ogomon. Minsanko i Stephens nakajadi do Menteri Besar, amu songkuro om oruhai-ogi pahaba di Stephens, tu i Kina minomili di kakayaan, okonko i tolu KKK dot Kazu om Kakayaan om Kavi-avi. Amu songkuro, i Mustapha o minongorunggal do Sabah om minimbulai di dau do vaza momorintah om sumambah sid hoturan antad sid Semenanjung..Varopo iso hal dit osusa do manalasai om manantu: I hiza dot i Honegger tinumimpuun do momodsu dot ulun di jumadi do Kristian, minamakai iosido do Christian names, dot amu mongitung iosido do sid hoturan do mamakai "bin" ko "binte" i ngaran dit anak jumadi ngaran koduvo (ngaran dit ongkob) di dau dot anak. Na biano, okudik it ongongaran dit anganak om osukod do Rungus di nokokristian pembulai-po dit inantadon om i dau do tradisi.Avantang dara do varo hoturan dot ipat-ipat i ongkob om varis momili dot iso ngaran Momogun dit aki ko aki lombus do pajadi dino ngaran do ngaran koduvo (dit ongkob) sampai pada dino "bin ko binte" di dang Sama, ko Yahudi. Iri-ogi murun-turun-nopo it anganak, nga varo ngaran dit ongkob om varis om varo-po i ngaran kondiri banal. Ioku kondiri a-insan nokotiim do monimban dit ongongaran do Momogun, nga minongoho dot varo-po ngaran koduvo iadko i George Abah Mongimbal. Topot sid IC bai Abah Mongimbal o notontuan sid porintah.