Upload
cristina-blanco-ruiz
View
291
Download
15
Embed Size (px)
DESCRIPTION
Relato de A Calma Podre
Citation preview
A Calma Podre
Rui Afonso Ramires
O libro das transformacións
A árbore que soñaba voar
Ás veces
cando miro cara ó ceo
asómbrome un pouco.
Non te sintas mal por iso,
a todos nos pasa,
e non escoites ós paxaros
que asubían nas túas pólas
o seu canto vello e triste.
Acouga
¿ves?
xa están calando.
Meu amigo,
afunde as túas raíces
e ante todo
fai por non pensar
que a vida é unha árbore
que soña poder voar.
A beleza sinxela
Non recordo o momento exacto no que adquirín esta habilidade. Soamente sei
que non hai moito que a posúo e que non a logrei de súpeto, foi un don que se
desenrolou en min de maneira progresiva. Ó primeiro podía velos na súa unidade
pero, pouco a pouco, comezaron a diluírse coma vultos tremorosos para logo
transformarse en algo etéreo, vaporoso, ata agora que tan só son fume ante os
meus ollos. Podo velos camiñar pola rúa transparentes, construídos con esa volátil
argamasa gris. O vento axítaos e os deforma aínda que sempre acaban volvendo a
recobrar a súa forma orixinal. Páranse nos semáforos, fronte ós escaparates, nas
colas dos cines, observo como buscan aproximarse, uns preto dos outros, foxen da
soidade pero, a pesar de amar a multitude, a masa, xamais chegan a tocarse entre
eles. Nos vagóns ateigados do metro viaxan agrupados, apertados como sardiñas en
conserva e, con todo, sempre gardan un palmo entre corpo e corpo, coma se unha
forza magnética lles impedise tan sequera rozarse, establecer ningún tipo de
contacto. Rexeitan a mirada de quen os mira como azoutados polo medo, non inician
conversacións entre eles, ninguén atravesa a sutil parede invisible que os separa e se
alguén o intenta recibe indiferencia por resposta, algunhas veces ata agresividade.
Resulta curioso observar estas reaccións de conflito, nelas o corpo do agresor
expándese e se axita violentamente, o espacio que ocupa aumenta ata o dobre do
orixinal mentres efémeros lóstregos de luz atravesan o seu espectro, namentres, o
corpo do agredido semella minguar, dobrarse cara a dentro coma unha anémona
que se pecha, e a súa aura se tingue de cor púrpura. Isto cando non se produce
unha colisión, cando os dous suxeitos se converten en agresores desencadéase a
tempestade, dous irascibles bancos de nubes negras chocan entre si, os lóstregos
que antes nacían e morrían no corpo agora atravesan o aire baleiro e van bater no
corpo alleo seguidos de prolongados e broncos tronos. A tormenta transcorre
mentres perdura a discusión e vai minguando a medida que os ánimos calman.
Cando a disputa finaliza os corpos de ambos volven estabilizarse e a recobrar o seu
tamaño orixinal, os lóstregos vanse facendo cada vez máis intermitentes ata
desaparecer por completo.
A miña habilidade foi adquirindo novas posibilidades coa práctica. De tratarse de algo
meramente físico e material pasei a introducirme na psique de quen desexo. Podo
meterme na mente dunha persoa e saber cales son as súas afeccións, as súas
debilidades, as súas perversións, os seus desexos máis escuros con só rozar a súa
pel. Atopeime con tenros adolescentes namorados, con homes de débil vontade, con
amas de casa frustradas, con anciáns fartos de vivir, con fanáticos do fútbol,
mulleres obsesionadas coa aparencia.
Introducinme nas mentes máis turbias; maltratadores, violadores, asasinos,
racistas, todos eles atoparon o xeito de xustificar eses salvaxes actos no seu interior,
todos teñen un pretexto no que lexitimar as súas accións, a maioría das veces
absurdamente rocambolescos, como a dun violador que abusara da súa veciña
porque nunha desas redes sociais de internet ela escribira, a modo de chanza, quero
un elefante coa trompa ben grande.
Ó principio estas mentes enfermas chamaban poderosamente a miña
atención, gustábame infiltrarme nelas para coñecer máis da escuridade da alma
humana, dos baixos desexos e das perversións máis retorcidas. Aínda que saía
repugnado daqueles interiores, daquela dexeneración do ser humano, seguía
introducíndome nelas coa actitude dun metódico estudioso do espírito, quizais
porque pensase que alí atoparía algún tipo de coñecemento diferente sobre a vida e
o pensamento. Con todo, a medida que visitaba este tipo de mentes enfermas íame
aborrecendo máis e máis delas á fin e ó cabo, e a pesar da gravidade daqueles
crimes, nada podía aprender xa daquel noxo no que me cofaba, tan só sentía
profunda tristeza. Sinxelamente deixaron de interesarme, sobre todo desde que
descubrín que había unha característica común entre todas elas, entre o violador e o
asasino, entre o pai de familia e a señora da limpeza, o zapateiro, a dependenta, o
funcionario, a peor das desgracias humanas, o dilúementes, o virus da
conformidade.
Cheguei á conclusión de que por aquel camiño non atoparía nada diferente e
comecei a buscar entre a xente algo distinto, algunha fonte nova e fresca onde
beber. Busquei con ansiedade, como quen busca unha pequena pedra de ouro na
corrente dun río que comeza a encher as súas augas, busquei a alguén coa
suficiente determinación como para fuxir da inmunda lea gris. Durante días busquei,
durante semanas, meses quizais ata que por casualidade topei con aquela muller. A
primeira vista era unha femia de aparencia fráxil, común entre os comúns, con todo
había algo distinto na súa forma etérea, unha sensación como de unidade, de
integridade, parecía non dispersarse co vento, parecía estar formada por un fume
máis espeso, case sólido, así que a seguín. Camiñei detrás dela polo transcurso dun
par de rúas, seguinna moi de preto, aínda que deixando sempre uns catro ou cinco
pasos de distancia. Posuía uns movementos delicados, case graciosos, movíase sobre
a beirarrúa coma non querendo incordiar, coma se non pisase o chan e con
todo, para os meus ollos, era poderosa a súa figura, tan distinta ó resto da xente,
tan íntegra e tan firme. Entón sucedeu, ó dobrar unha esquina a luz do sol golpeou
de fronte o seu corpo, quedeime marabillado, abraiado, os raios solares atravesaban
a súa materia e volvíana diáfana, as súas extremidades, o seu tronco, o seu rostro,
os seus cabelos poboábanse de infindos resplandores brancos, como escintileos de
diamantes, como unha lúa chea que ilumina un mar en calma. Aqueles resplandores
tremelucían e apagábanse por tódalas partes do seu corpo e na zona do peito, alá
onde debería estar latexando o seu corazón, xiraba a máis fermosa espiral que eu
vira xamais, unha espiral en lento movemento, trazando círculos sobre si mesma e
producindo fermosas ondas azuis, amarelas, rosadas... daba a impresión de que
aquela espiral, aquela especie de galáctico corazón era o berce da vida, a orixe do
único futuro posible. Entón ansiei introducirme na súa mente, necesitaba saber cales
eran os pensamentos daquel diamante vivo, de onde quitaba a forza que a facía
brillar daquel xeito, así que me preparei para introducirme, concentreime nela,
exclusivamente nela e corrín para atravesar a súa materia. Ese é o procedemento
habitual, atravesar os corpos para ocupar o lugar dun ser e habitar a súa alma. En
circunstancias normais é suficiente con rozar unha man, un brazo, ata o cabelo,
aínda que para sabelo todo, absolutamente todo, debería ocupar ata o último átomo
da súa materia, todo o seu espacioo vital. Avancei cara a ela rapidamente, tratando
de cruzar a súa fumareda, pero introducirme no seu corpo resultou imposible. Non
puiden atravesar a súa pel porque había algo que mo impedía, como unha
membrana protectora, a muller estaba como recuberta dunha burbulla infranqueable.
Cada vez que o tentaba saía repelido, coma se o meu corpo fose a marea que
tropeza no peirao. Tras intentalo unhas cantas veces con idéntico resultado desistín
do meu empeño e conformeime con seguila. Xa que non podía desvelar os seus
segredos introducíndome no seu interior quizais puidese descubrilos observándoa
dende fóra. A muller camiñou unhas cantas rúas máis e logo se meteu nun
automóbil, pousou o seu portafollas sobre o asento do copiloto e arrincou. Nunca
máis a volvín a ver.
Saín daquel encontro sumido na dúbida, ¿que demo significaba aquel brillo?
¿que orixe podería ter? ¿de que fonte se alimentaba? ¿como é que, habéndome
cruzado con milleiros de persoas, xamais contemplara nada semellante? Entón, como
un estoupido de branca luz, unha idea iluminou a miña mente. ¿Será que non tiven
os ollos o suficientemente abertos? E é que pasara tanto tempo inmerso nas mentes
máis depravadas, revolvendo entre o tóxico, que esquecín buscar o excelente, o
extraordinario. Prometinme a min mesmo non descansar ata atopar o brillo
novamente no medio daquela enorme masa de gris desolación. Tiña que haber máis
seres luminosos. Mentres camiñaba de volta a casa comecei a trazar un plan para
lograr o meu propósito. Comezaría a buscar polos barrios máis prósperos,
seguramente alí a epidemia gris trabase con menor ferocidade.
Ó día seguinte dirixinme a un deses barrios centrais. Comecei a camiñar polas
súas rúas peonís, alí onde non hai lixo no chan e as beiravías están cubertas dun
fermoso empedrado, onde as árbores parecen podadas con escuadra e cartabón.
Concentreime na xente tratando de ver máis alá do fume gris que formaba os seus
corpos. Cruceime con milleiros de persoas; executivos enfundados en traxes
impecables, mulleres que saían das boutiques cargadas de bolsas plásticas, nenos
embutidos en uniformes escolares, anciáns perfumados, limpacristais, traballadores
de sucursais bancarias. Non atopei nada substancial entre os veos grises da súa
aparencia. Como máximo un par de escintileos que máis se me antollaron produto da
miña imaxinación que sucesos reais. Logo de camiñar ata o mediodía unha e outra
vez as mesmas rúas desistín do meu empeño e senteime na terraza dunha cafetería
a repousar.
Pedinlle ao camareiro un café longo e un bocadillo de xamón con queixo.
Mentres esperaba que chegase o meu pedido entretívenme ollando un xornal. Deime
conta de que aquelas eran páxinas penosas e miserables, tan só recollían noticias de
catástrofes, asasinatos, desemprego, política, tensións bélicas, non había rastro
algún de alegría. Un home sentou na mesa da esquerda e comezou a ler á súa vez
outro exemplar do mesmo xornal. Puiden comprobar que a súa materia, a súa
fumareda gris íase asombrando máis e máis a medida que avanzaba na lectura.
Comprimíase e dilatábase, ó principio lentamente, pero ós poucos estes cambios de
tamaño fixéronse cada vez máis perceptibles, máis ansiosos e frenéticos. Sen dúbida
o home estaba experimentando o abatemento do seu ánimo mais,
inexplicablemente, seguía lendo aquelas páxinas con avidez, coma se tratase dunha
sutil droga que non puidese deixar de consumir. Aquel acontecimento provocoume
un profundo pesar, decidín pechar o xornal, aqueles papeis semellaban velenosos.
De mala gana o camareiro pousou o café e o bocadillo sobre a mesa e sen
dicir unha verba volveu dentro do bar. Ó rozar sen querer a súa man co meu brazo o
seu pensamento entrou na miña mente como unha bandada de escuros corvos. O
pobre home non pensaba noutra cousa que na súa mísera xornada de doce horas
diarias, que estaba preso daquel traballo porque precisaba cubrir as necesidades da
súa familia, a súa desolación debíase a que el era consciente de que estaba
capacitado para realizar algunha actividade máis edificante pero xamais a sorte lle
puxera unha oportunidade diante dos ollos. Sorbín o café ós poucos pensando que a
vida é tremendamente inxusta mentres as primeiras follas do outono comezaban a
caer das árbores.
Entón sucedeu. Pola beirarrúa de en fronte vin achegarse a un home. Ó
principio non o diferenciei do enxame de seres grises que camiñaban ó seu lado,
mais de súpeto albisquei uns reflexos brancos no seu ventre. Aquilo non era unha
alucinación, non era unha miraxe, os escintileos eran reais e ían medrando e
facéndose máis persistentes a medida que o home avanzaba cara a onde eu estaba.
Levaba a vista alzada, coma se algo captase a súa atención alén da rúa. Dirixín a
miña mirada cara alí e vin a unha muller que sorría envolvida en idéntico resplandor.
A espiral luminosa foi crecendo no peito de ambos a medida que se aproximaban, e
o seu vibrante latexar fíxose máis e máis perceptible. Cando estiveron xuntos
fundíronse nunha cálida aperta e da fumareda gris que antes formara os seus corpos
non quedou nin rastro. Unha auréola de celeste azul envolveu os seus corpos
entrelazados e as súas espirais fundíronse formando unha soa, latexando
desbocadamente como unha estrela a piques de estalar. Despois simplemente
desapareceron da miña vista camiñando rúa abaixo, desprendendo a cada paso
refachos desa inexplicable claridade.
Quedeime pensando, ¿e se fose o amor a fonte de tan poderosa enerxía? A
solución semellaba válida pero á vez simple. Se fose así, se en realidade esa fose a
explicación, o mundo resultaría, sen dúbida, un lugar moito máis desolador do que
ata entón crera. ¿Acaso non me cruzara con milleiros de persoas en todo aquel
tempo de procura? Resultaba desesperante que tan só tres persoas entre aquel
alude humano topase a luz a través do amor. Non, aquela non era a resposta que eu
precisaba, algo non casaba, non encaixaba, así que pensei que algo máis tiña que
haber oculto, algo que se escapaba ó meu entendimento.
Deixei sobre a mesa un billete e levanteime da terraza sen esperar o cambio.
Dirixinme apuradamente cara a un daqueles barrios humildes que hai no alfoz. Sabía
que o que vira o día anterior naquela muller que subiu ó coche non era producto da
casualidade, que se repetira, e iso significaba que era posible en máis seres. Aquilo
era unha aptitude humana, moi estraña e excepcional, non obstante era humana.
O barrio onde cheguei non era en aparencia tan fermoso como o da mañá
anterior. Todo estaba máis desordenado, a xente non vestía con tanto adobío,
moitos lucían as roupas desgastadas e algún ata amosaba remendos. A actividade
nas rúas era maior, o lixo acumulábase nos colectores e polo chan, o tráfico era
intenso e se escoitaba o son estridente das bucinas a cada pouco. Volvín centrarme
na xente. Para ter mellor visión sentei nun banco fronte á luz do sol e tratei de abrir
ben os ollos. Durante uns intres a súa intensidade me cegou e non puiden ver nada,
tiven que afacer as miñas meniñas a aquela radiante enerxía pero, ós poucos, o meu
ollar foise aclarando. De primeiras non distinguín nada entre a fumareda de corpos,
tan só o implacable gris reinante por todas partes, unhas veces máis espeso, outras
máis livián pero tan só gris, entristecedor e uniforme gris. Pasaron os minutos e, a
falta de resultados, os ánimos cos que me sentei comezaron a minguar. Dubidei de
min mesmo, pensei que quizais os meus ollos viran o que a miña mente lles
ordenara que visen e non o que en realidade fora. Pero entón se cruzou diante de
min unha muller empurrando un carriño cun bebé dentro. Cando me fixei no seu
ventre puiden apreciar uns efémeros escintileos que se apagaban case sen deixar
rastro. Concentrei a miña mirada naquel punto, forcei tanto a vista que pensei que
me ían a estalar os ollos, pero entón o ollei con claridade. O brillo era débil pero
continuado. Acendíase e apagábase sutilmente, case coma se non existise, mais
estaba alí. Fixeime despois nun home que transportaba unha escaleira sobre o seu
ombreiro, fixeime no seu ventre e distinguín entre os seus marengos veos de fume
lenes resplandores de luz. Despois observei a unha muller que viña de facer a
compra, a un ancián que cruzaba lentamente cara ó portal da súa casa, a un
repartidor baixando da súa furgoneta, en todos lucía timidamente aquel brillo, como
querendo pasar desapercibido, coma se non quixese molestar brillaba uns instantes e
despois se consumía, logo volvía brillar e se consumía novamente. Eu quedara
atónito, atopara algo distinto entre a fumareda, o fermoso brillo de diminutas
estrelas no abismo gris da cidade.
Volvín á miña casa lentamente, non podía deixar de fixarme no ventre das
persoas coas que me cruzaba. Todas brillaban, aínda que nalgunhas o refulxir era
case imperceptible todas, sen excepción, brillaban ó seu modo.
Ó cruzar o limiar da porta da miña casa, sen querelo, volvín perderme no labirinto,
recordei novamente todas as mentes que ocupara; os violadores, os funcionarios, os
taxistas, as dependentas. Mergulleime na gris decepción á vez que abría a billa da
ducha. Parecía esquecer o insólito descubrimento daquel día. A tristeza apoderouse
do meu pensamento. Pero vira aquel brillo, aquel brillo marabilloso e aquela espiral,
comprobara que todas as persoas mostraban algún tipo de escintileo nos seus
ventres. Isto só podía significar unha cousa; ¡eran en potencia seres luminosos!
Souben que non todo estaba perdido e que calquera, por corrompida que estivese a
súa mente, podería romper a gris fumareda e converterse en brillo e luz. Metinme na
ducha, precisaba quitarme a suor e o po acumulado no meu camiñar. Baixo o chorro
de auga as ideas fóronse aclarando. Pensei nos meus semellantes como vítimas
inocentes da desolación, como seres perdidos entre o fume. Entón comprendín, con
toda claridade, cal era o meu labor na vida. Debería de dar co xeito de amosarlle ás
outras xentes aquela bendición do resplandor, o carreiro da claridade. Se tan só
conseguise facelo cun, ¡tan só un! a miña existencia tería sentido. Os meus ánimos
medraron porque na miña mente aniñou a idea de que aquilo era posible.
Cando decidín que estaba limpo dabondo pechei a billa e sequei o corpo
cunha toalla. Saín da bañeira e me acheguei ó lavabo, abrín o bote de desodorizante
e alcei a vista. ¡O meu corpo brillaba tamén! ¡O meu corazón convertérase nunha
cálida e latexante espiral luminosa! No meu pensamento desfixéronse as tebras e
aclarouse o enigma. Aquel fulgor, aquela beleza sinxela, aquela fermosa
luminosidade era o froito da esperanza.
En silencio
Algúns choran e rin á vez. Non sei como o fan pero é así, podo escoitalos
dende o meu cuarto. Hai tamén quen fala só, quen se anoxa coa súa sombra, quen
insulta, quen acocora, quen dirixe sermóns a multitudes inexistentes... Onte á noite
escoitei ó home do cuarto contiguo ouveando coma un can, escoitei á súa veciña
xemer e gritar mentres finxía que a violaban; ¡porco, ah, quítame as mans de enriba,
ah, non, non, porco noxento!
Francamente, vivo rodeado de desequilibrados, estou seguro. Deime de conta
porque só eu permanezo en silencio. Aínda que a verdade é que non teño outro
remedio, alguén me coseu os beizos.
As penas de Leopoldo Quintás
O mesmo día en que o penúltimo habitante de Santa Bríxida morreu a
Leopoldo Quintás comezaron a saírlle penas do corpo. Aínda tardou case unha
semana en darse de conta e non foi porque as penas medrasen amodo, non, o
motivo foi que Leopoldo, a quen por certo non lle gustaba moito sentir o contacto da
auga no corpo, vestiu seis días seguidos a roupa que puxera no funeral. Tan
baldrogas era que ata se deitaba con ela e tan só tiraba os zapatos para non luxar as
sábanas coa lama. E aínda tardaría un pouco máis en abrir a billa para lavarse se
non fose porque ó quinto día do enterro do penúltimo habitante de Santa Bríxida
comezou a sentir un cheiro ó curral no ambiente que non era normal carecendo a
aldea como carecía de polos que desprendesen aquel fedor quentiño ás penas e ás
cagadas das aves. Leopoldo Quintás non se imaxinaba de onde podería vir aquela
bafarada tan misteriosa, el ben que ollaba cara ó ceo na procura de pombas ou
chirlomirlos que xustificasen o misterioso acontecimento, pero nada, tan só vía o
firmamento gris e a teimuda poalla caéndolle nos ollos. Chegou a conclusión de que,
xa que o cheiro ía con el a onde quixera que fose, tiña que se lavar para ver se era o
seu corpo quen desprendía aquel estraño alcatreo.
Chegou a casa rabioso e fregando na perneira. As penas picábanlle na pel ó
rozar coa camiseta e cos pantalóns, sen embargo Leopoldo Quintás non se aquelou
por este feito porque pensou que aquela comechón era a causa da morriña, botara a
vida a rañar por riba da roupa así que continuou a facelo sen preocuparse das
causas de que sentise aquelas puntadas tan intensas. O caso era aguantar o máis
que puidese sen ter que pasarlle a pastilla de xabón a pel, total, en Santa Bríxida non
quedaba xa ninguén para levarlle as contas das veces que mudaba a camisa. Se xa
cando tiña veciños Leopoldo Quintás era un porcallán de medo agora que estaba só
sentíase na gloria, ben podería se lle petase revolcarse na lama coma un cocho que a
ninguén lle había parecer mal.
Ó anoitecer do quinto día do enterro do penúltimo habitante de Santa Bríxida
Leopoldo Quintás decidiu que xa era hora de se lavar. Aínda que non era sábado
aquela peste ó curral tíñao enfasquiado, así que foi decidido ó baño e lle puxo o
tapón á bañeira, botou unha pastilla de xabón no fondo e abriu a billa da auga.
Estivo alí parado coma un paspán mirando coma o xabón se desfacía e formaba
burbullas na superficie do líquido, a piques estivo de se espir e meterse na auga
morna, mais logo acordou que aquilo era unha parvada, que el era un home e non
unha galiña e que por tanto era imposible que fose el quen desprendese aquel fedor
ó polo e que, por outro tanto máis, non tiña sentido lavarse aquela noite. Pechou a
billa, tirou da cadea do tapón, subiu ó cuarto, quitou as botas e se meteu na cama.
Normalmente daba un par de voltas no leito e logo comezaba a roncar, sen
embargo aquela noite no puido porque lle entraron unhas ganas tremendas de
mexar. As sábanas xa estaban quentes así que fixo por aguantar as ganas porque
era inverno e facía un frío que pelaba. O váter tíñao na planta de embaixo, ó carón
da cociña, e non quería que se lle arrefriasen os pés polo camiño agora que xa
conseguira darlles temperatura, tentou pensar noutra cousa por ver se a vexiga se
esquencía de evacuar a garrafa de tinto que bebera coa cea. Deu voltas no leito
mentres rosmaba pero aquilo cada vez facía máis forza por saír, entón pensou que
sendo ó último veciño vivo que quedaba en Santa Bríxida ben podería mexar pola
fiestra sen que a ninguén lle parecese mal. E así foi, prendeu a luz, ergueuse do
leito, abriu o vidro, baixou a cremalleira, tirou a pirola e soltou ó chorro de mexo a
presión pola fiestra abaixo mentres salaiaba aliviado e deixaba saír os gases que lle
provocaran os zonchos que acompañara co viño. Estivo longo tempo evacuando toda
aquela destilación, contemplando medio abraiado como aquelas pequenas nubes de
vapor subían dende o chorro morno que botaba aquel picho de carne e se
mesturaban coa noite. Cando se dispuxo a sacudir as últimas pingueiras para
retornar ó leito notou no seu membro un pequeno bulto, coma unha especie de puga
que se lle cravara na base da carne. Pechou a fiestra e se achegou á bombilla para
ver mellor que era aquilo. Ó primeiro custoulle distinguir de que se trataba, pensou
que era un anaco de tecido que lle quedara alí colado, logo baixou os pantalóns para
comprobar se a protuberancia lle formara sarabullo.
- ¡Hostias!
Descubriu que tiña a pelve chea daqueles picos brancos. Tirou a camisa ás
presas e deuse de conta que tiña o peito tamén cuberto. Foi ó armario e abriu a
porta. Viuse no espello. As costas, as pernas, o cú, todo estaba cuberto daquelas
estrañas protuberancias. Leopoldo sentouse nunha esquina do leito e quedou a
pensar aquelado que ó día seguinte tería que resignarse a facer aquela cousa que
máis odiaba no mundo, máis aínda que lavarse, ir ó médico.
Tirou dunha daquelas misteriosas pugas brancas, doeulle coma se lle
arrincasen un dente. Rañou no lugar mancado e logo achegou o pico branco á luz da
bombilla. Custoulle distiguir naquel obxecto afiado coma a punta dun cravo a
presencia de centos de pelos diminutos e brancos adheridos a un tubo. Logo caeu na
conta de que era unha pena, fregou nos ollos fortemente e volveu mirar, aínda non
podía crer que do seu corpo saísen aquelas plumas de polo novo. Agora se explicaba
a peste ó curral que o perseguirá durante todos aqueles días. Alegrouse porque xa
todo casaba e puido tirar aquela sensación da súa testa de pensar que estaba a
volverse tolo. Despois de saber que aquela estraña pel branca que lle saíra no corpo
non eran máis que penas calmouse un pouco e se meteu outra vez na cama. Ó día
seguinte tería que ir ó médico, non quedaba outra, pero aquela noite nada podía
facer máis que durmir, preocuparse por algo que el non podía arranxar non tiña
sentido así que pechou os ollos e uns intres despois comezou a roncar coma un
bieito.
Acordou cando aínda era noite pecha. Déronlle ganas de subir ó tellado e
berrar un pouco. Sen embargo non o fixo. Tiña que se preparar, lavarse e vestir
roupa nova. Ás sete e vintecinco pasaba o autobús de liña na aldea próxima. Se non
o tomaba tería que esperar ó das dez e un cuarto e non quería perder o día enteiro
para ir ó médico, tiña un alcouve de verdura lista para levar á terra e a viña sen
podar aínda, aquela cousa das penas non era máis que un maldito contratempo que
lle viña a romper o ritmo de traballo.
Abriu o armario e mirou o corpo no espello, aquelas plumas semellaran crecer
de noite e volverse un pouco máis duras, notou que xa lle sairan totalmente da
epiderme porque xa non picaban tanto. Aínda así resignouse a ter que ir ó
ambulatorio, colleu unha muda limpa e foi cara ó baño. Puxo o tapón, abriu a billa e
quedou outra vez pasmado mirando como a pastilla de xabón burbulleba no fondo.
Espíuse e meteu un pé no auga morna, entón pensou que como a pel case non lle
picaba quizais era porque as penas deixaran de medrar e acabarían por caer. Iso era
o normal, non coñercera aínda a home ningún que tivese o corpo cheo de plumas,
quizais algún había no mundo pero el non o coñecera, sinal de que as penas saían e
logo caían sen que ninguén soubese daquel suceso. Decidiu agardar un día máis
para ver como evolucionaba a cousa. E claro, como xa decidira agardar ó día
seguinte para ir ó médico non tiña sentido lavarse daquela e vestir a muda fresca
para ir ó campo, total ¿para que, para suala e luxala? Acordou que o faría daquela
maneira así que pechou a billa, tirou da cadea do tapón, vestiu a roupa coa que
durmira aquela noite e foi á cociña a preparar o almorzo.
Comeu unha codia de pan reseso para espantar á fame e bebeu unha parva
de augardente para facer o mesmo co frío mentres ollaba pola fiestra. Poallaba
aínda, aquilo non lle fixo gracia ningunha, ter que ir traballar debaixo daquela
humidade toda, aturar a friaxe torcéndolle os ósos, mais pensou que non lle quedaba
outra, ou enchoupaba os pés nas leiras ou o alcouve agostaba coa falta de espacio.
Botou a coroza de palla polas costas e foi cara ó alboio, colleu un sacho e levantou
sete ou oito ducias de repolos do sementeiro, meteunos nun cesto e foi cara á leira.
Comezou a abrir os sucos a iso das oito da mañá. Aínda que en Santa Bríxida
non quedaba ninguén que tanguese a campá, a súa vida de labrego marcáralle os
tempos da vida a ferro no seu interior. Non era preciso que mirase o reloxio que non
tiña para saber sen errar que horas serían. A carrapucha de palla daba un calor de
medo, o corpo comezoulle a suar e o alcatreo ó curral a impregnar o ambiente. Sen
embargo a Leopoldo Quintás aquel cheiro non lle importaba, era como se xa se
afixese a el, coma se o levase ulindo toda a vida, como se fose o aroma do seu
propio lar, aquel arrecendo ó quentiño, ó lugar cuberto da chuvia colmáballe a alma
de ledicia. Se por el fora non cambiaría o perfume das rosas por aquel cheiriño novo
que lle saía do corpo.
A mañá chegara á súa metade e xa Leopoldo Quintás tiña o cento de repolos
medrando nos sucos. Pensou que podería facer un receso e ir á casa a facer a
comida, quizais con un pouco de sorte a chuvia parase e podería podar as viñas cos
pés secos. E así foi, deixou o sacho no alboio e tirou as botas enlamadas. Calzou uns
zocos e foi á cociña. O día anterior botara na auga unha peza de porco a desalgar,
tiña pensado cocela cunhas patacas e un pouco de verdura, tiroulle a auga e
meteuna nunha perola. Sen embargo, cando estaba a piques de prender o lume
antollóuselle unha sopa de fariña milla, coma aquelas que tantas veces comera de
neno porque na casa non había outra cousa. Pensou que vida só había unha e que
se lle tiña que facer a vontade ó pensamento. Volveu meter a peza de porco no
balde e botoulle auga, de todas formas non se había estragar porque o comese á
noite. Foi ó recuncho da cociña onde gardaba os cereais e colleu un cazo de fariña
milla. Ó seu carón saco de millo estaba aberto e aqueles granciños amárelos
semellaban tan sabrosos que non o puido evitar. Colleu unha presada e meteuna na
boca. Tentou mordela pero o gran estaba tan seco que non puido así que foino
chuchando amodo mentres fervía a fariña cun pouco de auga. Abraiouse do ben que
sabía aquel millo, do dociño que estaba, pero non lle estrañou. O verán pasado fixera
unha calor de medo e as mazarocas maduraran sen que as estragase o cornizó.
Cando a auga do cazo ferveu apagou o lume e botou a sopa nun prato. Sentiu no
seu padal os grans moles do cereal e tragounos, non os mordeu sequera, botounos
así enteiros para o estómago, alí embaixo aquela roda de muíño que tiña no ventre
xa se encargaría de moelos.
Sentouse diante do prato coa sopa a ferver e escachou unha codia de pan de
bola. As migallas esparexéronse sobre o mantel cheo das marcas arredondeadas que
tinguira a garrafa de viño. Leopoldo Quintás ollou para os anaquiños de pan como
quen mira ouro nun río, así tan apetecibles se lle amosaban nas súas meniñas,
esticou a man e foinas recollendo nun monte. O traballo na horta espertáralle unha
fame de medo, colleu unhas migalliñas entre os dedos e levounas á boca, estaban
tan tenras, tan boas pero eran tan escasas que logo achegou a boca ó mantel
comezou a comelas directamente.. Ía achegando a boca a aquel monte abundante,
collía as que podía entre os beizos e logo erguía a testa mirando cara ó teito para
que as migallas lle escorregasen pola gorxa coa soa forza da gravidade. Así foi
repetindo aquela operación ata que deu cabo do monte. Divertiulle tanto comer
daquela maneira que acabou por desfacer todo o anaco de pan en migallas,
xuntounas nun grande monte e foi peteirando nelas ata que o mantel quedou limpo.
Despois se ergueu porque tiña o estómago farto, foi á fiestra e comprobou que
deixara de poallar. Era a hora de rodrigar na viña así que foi ó alboio a buscar as
ferramentas e o atado de vimbios que preparara no serán do día anterior. A sopa de
fariña milla quedou fumegante no prato, non a probou sequera.
Os pequenos gomos xa axexaban nas varas da viña. Leopoldo Quintás
alegrouse de non ter ido ó médico porque se deixaba aquela tarefa para o día
seguinte a lúa había comezar a minguar e só conseguiría facer unha desfeita coa
demouca. As viñas non eran tantas, medio cento de pés de loureiro ó redor da
almuíña e dúas tiras de tinta pobres na leira alta. Leopoldo Quintás gustaba de
traballar rápido, sobre todo cando a labor lle agradaba, normalmente non tardaba
máis dunha tarde en armar todo aquilo así que colleu a poda disposto e comezou
pola parte de embaixo. Traballou con ritmo mais cando levaba tan só unha ducia de
pés comezou a sentir as súas mans entaladas, coma se as súas falanxes encolleran
cara adentro e xa non se dobrasen nas articulacións. Puxo a ferramenta no peto e
esticou o membro para comprobar se lle saíran vinchas nas palmas. Non tiña, o que
si lle estrañou foi a cantidade de engurras que se lle formaran, coma se a pel
engordase e se pregase cara adentro por falta de espacio. Virou a man, a parte
convexa estaba igual de encartada e os dedos semellaban enmagrecer e quererse
xuntar. A Leopoldo Quintás sorprendeulle aquilo pero logo pensou que en
comparación con ter o corpo cheo de plumas a cousa das engurras non era máis que
unha minucia. Ademais, aquela cobertura de penas amparábao da humidade do
comezo da primavera, se non fose por aquel cheiro ó curral que desprendía todo
eran ventaxas, pensou que quizais aquelas engurras poderían reportarlle algunha
utilidade, que quizáis ó volvérselle a man máis estreita fose quen de vestir as
pequeñas luvas que tiña na casa dende hai anos. Non lle deu máis voltas e colleu a
poda para seguir coa demouca. Non puido, e iso que o tentou teimudo, pero a cada
momento semellaba máis difícil agarrar o aparelllo así que se resignou, botou o
atado de vimbios debaixo do sobrazo, meteu a pequena fouce no peto e foi para a
casa un pouco anoxado por non ter acabado coa viña, mais logo lle pasou porque a
verdade era que non tiña moitas ganas de traballar aquela tarde, sentíase un pouco
esmorecido e tiña a vista cuberta dunha especie de néboa lene, devecía por aniñar o
corpo no leito. Se na vendimia próxima apañaba menos acios bebería menos e xa
estaba, o primeiro era a saúde.
Deixou a ferramenta no alboio, trocou as botas de goma polas zocas secas e
foi cara á casa. Antes de subir ó cuarto foi ó bocoi onde gardaba o millo e levou
unha presada á boca. Ó saborear o gran exquisito deulle mágoa de non ter
descuberto aquel manxar antes. O certo era que despois de aquel descubrimento ata
as filloas se lle antollaban eslamiadas, quixo tirar ó lixo os pezuños de porco que tiña
a desalgar na auga pero a súa precavida alma de labrego impedíullo, máis valía non
apresurarse, podía ser que á noite xa aborrecese do millo e lle apetecesen aquelas
carnes cocidas.
Tirou as zocas e, como era costume nel, se deitou no leito sen quitar a roupa.
Tapouse coas mantas e comezou a suar de inmediato. Leopoldo Quintás pensou que
era a causa da febre, sentía o corpo esmorecido e aquel calor que non era normal,
se se parase a pensar un intre daríase de conta de que cuberto coas mantas, coa
roupa e con aquela plumaxe que lle tapaba o corpo non podía evitar aquela fervura
que lle laceraba a pel. Comezou por botar as mantas a un lado, aínda así non era
dabondo, as pingueiras de suor escorregábanlle na fronte. Pasou a manga pola testa
para secar un pouco aquela humidade e notou unha protuberancia no cráneo.
Apalpou nela e sentiu como varios bultos lle saíran da parte alta. Ergueuse e foi ó
espello. Achegou a cabeza ó reflexo unhas cantas veces, porque non podía crer o
que estaba vendo. Unha crista estreita e vermella nacérallle no medio daquelas
penas nas que se transformaran o seu cabelo. Leopoldo Quintás pasou a man
arrepiado pola protuberancia pensando que tiña que ir de urxencia ó ambulatorio,
sen embargo, sentiu aquel apéndice tan mol e tan suave que pronto lle pasou a
preocupación, a fin de contas non era para tanto, mentres non lle doera.
Quixo ir deitarse outra vez pero entre a calor e a incomodidade do leito
tiráronselle as ganas. Pensou que mellor iría á cociña a sentar un pouco na mesa. Así
o fixo, pero despois duns intres de estar sentado comezou a mirar cara ós lados e a
sentirse incómodo, dáballe a impresión de que aquel non era un lugar para el, de
que aquelas paredes encaladas estaban feitas para outra persoa. Comezou a sentir
unha especie de claustrofobia, as paredes semellaban estreitarse e o aire negábase a
entrar nos seus pulmóns. Non tivo máis remedio que saír ó eido.
Poallaba novamente, sen embargo non fixo nada por taparse da auga, aquel
fresquiño livián sentáballe ben, facíalle diminuir a temperatura do corpo e afastar
aquela sensación de esmorecemento que tivera perante toda a tarde. Así estivo un
bo rato, enchoupando os pés na herba do lugar. Entón se preguntou se aquela
cuberta de penas que lle saíra non sería tamén un aillante da auga, levou os seus
dedos curiosos á testa e remexeu na plumaxe. Aínda que nas puntas das plumas se
acumulaban as pingueiras frescas da poalla a pel estaba seca e quente como o
lombo dun can. Alegrouse porque polo momento, e salvo a apariencia que lle daba,
aquilo de ter o corpo cuberto de penas non lle trouxera máis que ventaxas.
Decidiu comprobar se todo o seu corpo era impermeable á chuvia así que se
espiu por completo e quedou alí parado baixo da chuvia coma unha estatua de
pedra. Estrañoulle ver que as súas pernas cobraban un ton amarelo, que os seus pés
se esticaran e os seus dedos se fixeran finos e alongados. Tratou de non pensar
naquilo, declinou de buscar calquera explicación a aqueles sucesos extraordinarios á
vez que decidiu que non visitaría ó médico. Non quería que o mareasen con probas e
máis probas, non quería prestar o seu corpo para que experimentasen con el persoas
que seguramente xamais presenciaran síntomas tales. O único que fixo foi
permanecer alí longo tempo, parado baixo aquela chuvia sanadora coa faciana
tristeira dun pardal que agarda a que escampe. Cando comezou a sentir o frío
subíndolle polos xeonllos foi a acubillarse no alboio.
Xusto cando se fixo a escuridade sobre Santa Bríxida a Leopoldo Quintás
entroulle un sono de medo. No alboio non tiña leito onde se deitar pero regresar á
casa non quería, aquela sensación de encerro abafante quitáralle todas as ganas.
Simplemente se acomodou como puido sobre unha paca de feo. Non recostou o
corpo, senón que quedou axeonllado sobre a herba seca, meteu o nariz debaixo do
sobrazo e quedou profundamente durmido.
Unha sensación de desasosego espertouno no medio da noite. Era unha
sensación similar a acordar alporizado por un pesadelo aínda que Leopoldo Quintás
soubo que aquilo se debía a un perigo externo. Sentiu barullo de pasadas no firme
de cemento, sen embargo non eran as pasadas dun home, máis ben semellaba que
un can se achegase porque sentíase o barullo das súas unllas gaduñando no chan. A
porta do alboio quedara entornada e Leopoldo Quintás viu como de súpeto asomaba
un afiado fociño no van. Deuse de conta enseguida de que era aquilo que axexaba
na porta e comezou a emitir unha especie de mestura de rosmido e cascarexo. Unha
raposa entrou na pequena edificación, chegara ata alí seguindo o rastro do fedor ó
curral que impregnaba ata ás últimas leiras de Santa Bríxida, sen embargo cando
mirou a aquel ser enorme o animal abriu os ollos inmensamente e saíu correndo por
donde viñera, rápida coma un foguete porque alí dentro estaba a agardar a
mesmísima morte coa gadaña disposta. E non era para menos, o corpo de Leopoldo
Quintás transformárase nunha mestura de humán e polo mangallón contra o que
nada tería que facer a miúda raposa. O seu nariz convertérase nun peteiro do
tamaño dunha palma e as súas afiadas gadoupas eran máis grandes que o esmirrado
cánido. Leopoldo Quintás ergueuse da paca de feo e foi pechar a porta, logo volveu
ó seu improvisado niño e quedou outra vez profundamente durmido.
Espertou antes de que a alborada extendese os seus purpúreos raios sobre o
val de Santa Bríxida. Instintivamente subiu ó tellado e comezou a cantar coma un
galo que chama polo día. Leopoldo Quintás aínda non o sabía, porque non tiña
espello onde ver o novo aspecto que adquirira, pero o seu nariz acabara xa de
transformarse nun rexo peteiro e a súa testa estaba coroada por unha impoñente
crista, as súas pernas enmagreceran e se acurtaran perdendo os xeonllos e os seus
pés extendéranse en forma de gadoupas, os seus brazos perderan as mans e se
convertiran en dúas fermosas ás e, alí enriba do ollo do cú, as penas crecerán máis
que as outras para formar unha cola ergueita e presumida.
Cando a claridade foi abundante baixou do tellado e púxoxe a gaduñar
afanosamente na terra coas súas gadoupas eficaces tratando de levar alimento ó seu
papo cheo de fame. Leopoldo Quintás non tiña conciencia do que facía porque por
dentro seguía a considerarse un humano coma outro calquera, quizais creu no seu
interior que estaba a abrir sucos na terra para plantar uns repolos porque non
semellaba aquelado por peteirar naquelas lesmas e naqueles bechocos que ía
atopando no seu escaravellar.
A nova existencia como polo de Leopoldo Quintás sería tranquila e feliz se non
fose porque a iso das nove da mañá un portugués, Xoâo Loureiro Serro para máis
señas, que madrugara para ir á feira, pasou por Santa Bríxida e mirou aquela ave
inmensa solta no eido. Os seus ollos lusitanos abríronse coma pratos e a súa gorxa
comezou a rezumar cuspe. Aquel polo habería facer a mellor sopa que probara
xamais, aquela ave inmensa que bastaría para dar de comer a toda a freguesia. El
ben sabía que en Santa Bríxida non quedaban xa veciños, non coñecía da existencia
de Leopoldo Quintás, así que entrou na casa aberta e colleu unha cazola. Foise
achegando polas costas da ave mentres abría a afiada navalla que levaba no peto.
Coma un gato que axexa un pardal foi amodiño achegándose ó corpo daquel polo do
tamaño dun porco. Cando estivo perto dabondo deu un chimpo e subiu sobre o
seu lombo, tirou do pescozo cara el e dunha certeira navallada abríulle a gorxa. A
sorpresa desmontou a reacción de Leopoldo Quintás que non fixo nin forza para se
defender, simplemente permaneceu alí parado, como xeado enriba daquela cazola
onde a súa gorxa escurría sangue mentres escoitaba aquelas estrañas verbas a
modo de réquiem do seu propio funeral.
- ¡Fóda-se pá, quanto arroz de cabidela!
A gaiola
Se algún día
alguén constrúe
unha gaiola a túa medida
e te pide que entres nela,
pénsao ben
Se decides entrar
ten en conta que o máis normal
é que a porta se peche detrás de ti
De todas formas mantén os ollos despertos
Non hai cousa máis ridícula
que un ver un paxaro
metido nunha gaiola
que ten a porta aberta
O clasificador se estrelas
Como cada noite ollou ó ceo e viu os astros tremorosos, pareceulle distinguir a
figura dunha serpe nun cúmulo de estrelas e pensou, ¿por que a ninguén se lle
ocorreu chamarlle serpe a ese cúmulo de estrelas? De súpeto quedou marabillado
coa súa idea, se el era o primeiro que lle puña nome ós astros entón aquela súa
marca quedaría para sempre no mundo e a súa existencia non morrería máis. Está
ben, acouga, esta será a serpe pero quedan moitas outras, tes que acabar a obra,
quitou un caderno do peto e foi debuxando a forma da constelación e engadíndolle o
nome a un lado. Así foi facendo, ollando ó ceo e buscando formas nos luceiros.
Distinguiu un carro e anotou ese nome ó carón do bosquexo, vislumbrou nun cúmulo
próximo a figura dun carro máis pequeno e quixo chamarlle carriño, mais aquilo
pareceulle un pouco infantil e pensou que sería mellor diferencialos como carro
grande e carro pequeno, así soaba máis culto, máis elevado. Quedou satisfeito con
aquel matiz e continuou coa laboura. Logo ollou un can, un boi, un carneiro, uns
peixes… entón pensou que algo non ía ben, se quería que a súa idea pasase
verdadeiramente a historia debería buscar uns nomes máis altisonantes. A piques
estivo de escachar a folla onde comezara a bosquexar a súa clasificación, sen
embargo virou a faciana cara ó leste e distinguiu a claridade da alborada próxima.
Non había tempo de comezar de novo, tiña que acabar co seu proxecto aquela noite,
non fora que a alguén se lle ocorrese tamén buscarlle nomes ós astros e lle roubase
a súa gloria merecida.
Pensou que se camiñaba lixeiro cara ó poñente lle gañaría tempo á claridade,
a noite se faría máis longa e el podería rematar o seu traballo. Colleu por un carreiro
entre xestas e comezou a camiñar escapando do mencer, ollando naquela bóveda
escura chea de formas. Aquí hai un labrego rodrigando as viñas, leva un atado de
vimbios no cinto e unha poda na man, anotou o nome do labrego na folla, mais de
súpeto emborranchou as letras porque pensou que aquel nome, labrego, non era
unha verba de categoría para unha clasificación que aspiraba a transcender ó
esquecimento. Lembrou que unha vez lera nalgún lugar que un antigo guerreiro
chamado Orión fora autor de lexendarias fazañas. Escribiu aquel nome satisfeito de
mostrarlle ó mundo os seus coñecimentos de historia. Logo veu Pegaso, Heracles,
Hidra, Centauro… e así foi completando o mapa, camiñando sen parar para que non
o collese o día co traballo sen facer. Avanzaba a grandes pasadas sen reparar onde
pousaba os pés, a súa única obsesión era rematar coa súa obra e deixala no mundo
para que a xente recordase o seu nome aínda despois de morto.
Ollou un canteiro fendendo na pedra mais non lle puxo aquel nome porque
pensou, os canteiros non son xente digna da miña obra, chamoulle entón escultor,
pero aínda así non quedou satisfeito, aquel nome non era dabondo. Era preciso dotar
ó seu escrito dunha cualidade que lle outorgase un nivel superior. El que era un
home con bastante cultura pensou en empregar o latín para marcar ben a diferencia
que o separaba da xente vulgar, para que todo o mundo se abraiase coa súa
habilidade no manexo das verbas e das línguas. O escultor pasou a ser Sculptor e o
clasificador de estrelas se relameu no pensamento de saberse superior ó común dos
mortais.
Entón chegou ó cabo do mundo e viu unha pequena cruz tremendo na noite
fría. Esta é a última, pensou, dareille un nome sinxelo para que ninguén me tome
por un arrogante. Ó primeiro quixo chamarlle pau de mallar mais logo mudou de
idea porque tampouco quería que o tomasen por un pailanciño, así que desbotou
aquela nomenclatura e á fin a constelación quedou co sinxelo nome da Cruz do Sur.
O traballo estaba rematado, revisou o papel con ollos ávidos e comprobou que
tódalas constelacións tiñan un nome que as dintinguía naquela espallada morea de
estrelas. A súa obra era perfecta e talentosa, insuperable, ningún home podería facer
xamais o que el fixo, ningún podería clasificar ós astros daquela maneira tan precisa
e exacta. Os nomes estaban todos alí, el era só un humano mais nin as altivas
estrelas lograran fuxir do seu enxeño. Agora que sabía da superioridade da súa
intelixencia podía á fin descansar tranquilo. Deixou de camiñar e se tumbou de
costas sobre o orballo dun prado, fíxoo así porque quería quedar durmido
contemplando a grandeza da súa obra.
Cando xa comezaba a entornar os ollos viu como unha lene estrela fugaz cruzaba o
firmamento alumeando a escuridade por intre e logo morría irremediablemente. De
súpeto unhas agres bágoas, pequenas e tremorosas coma astros, comezaron a
abrollar dos seus ollos.
Ollo por ollo
Ollo por ollo
Dente por dente
Non, non é así
É dente por ollo e ollo…
¡Non, non, non!
Son ollos por dentes
¡Xa está ben, tanta leria
por uns tristes allos
e unhas patacas podres!
O extraordinario esforzo de Bieito Ferrato
Xa comezaba a arrefecer cando Bieito Ferrato se chantou na Praza de España.
Despois daquel verán de inferno o outono semellaba ter présa por chegar canto
antes. Pasaran tres meses de calor abafante e as xentes non estaban acostumadas a
aquel refrescar tan repentino porque, nada máis porse o sol, sentían o aire tentando
metérselles na pel e botaban a chaqueta polas costas. Bieito Ferrato xa viñera
precavido da casa, non sabía canto tempo duraría aquela súa aventura pero
sospeitaba que non sería pouco, así que vestiu uns calzóns de la gorda debaixo do
traxe dos domingos, puxo uns peúgos de inverno nos pés e botou a boina nova
sobre a calva. Non era cousa de pasar frío.
A xente pasaba ó seu carón coma quen pasa diante dunha farola, eran os
menos os que se daban de conta de que diante súa, apoiado no chan, había un
cartón escrito con xiz branco no que se podía ler; “Eu daquí non me movo ata que
encerren a quen me queimou a tomada”. E a verdade era que non tiña pensado
moverse, estaba decidido. A cousa fora que a mediados do xuño pasado alguén
prendera lume no monte. Na aldea sabían ben que o pirómano fora o Xan do Rego,
aínda así ninguén se atrevera a denuncialo porque non había veciño que non lle
tivese medo, non por enfrontarse con el que era un home cativo e de apariencia
feble, senón porque era un falso de tremer que o mesmo te envelenaba os cans que
te botaba unha bastarda pola fiestra adentro. Ademais, sospeitaban que o Xan do
Rego tan só era un mandado, que el fixera aquilo pero que había unha man
poderosa agochada nas sombras. Enriba daqueles outeiros estaba proxectada a
construcción dunha planta de tratamento de lodos e, xa se sabe, o máis sensato é
arredarse cando algúns poñen o cazo. Sen embargo, para Bieito Ferrato a cousa non
era así, se tiñan que levar o monte que o levaran, dende logo el ía facer todo o
posible por impedilo, pero diso a arrasar con todo…
Cando as xentes da aldea conseguiron extinguir o lume o primeiro que fixo foi
ir o cuartel da Guardia Civil. Veño pór unha denuncia, dixo. Coñecía ó axente que o
atendeu, era un homiño cativo e de aire apoucado, vírao algunhas veces andar na
patrulla pero xamais se dixeran outra cousa que bos días ou boas tardes. Contra
todo pronóstico aquel home, cando Bieito Ferrato lle contou o motivo da denuncia,
tratou por tódolos medios de quitarlle a idea da testa. Mire que vai perder o tempo e
os cartos, mire que igual a persoa que está a denunciar non foi, mire que non sabe
onde se mete. A medida que a propia autoridade trataba de desanimalo no seu afán
de procurar xustiza máis medraba a carraxe de Bieito Ferrato. Pero isto non pode
quedar así, queimáronme o monte e iso non se fai, eu non quero cartos, só quero
que quen fixo tanto mal pague a súa conta, que o pense dúas veces antes de volver
a prender un misto. Despois de moito insistir Bieito Ferrato conseguiu que o axente
redactase a denuncia. Ó tempo que lle tomaba os datos foille explicando que tería
que agardar a que o chamasen do xulgado, aconselloulle tamén que buscase un
avogado que o representase. Ó escoitar a verba avogado na mente de Bieito Ferrato,
que honestamente non era gran cousa, relucíu a idea de que lle ían chuchar os
cartos. Nada diso, pensou, non ía contratar ningún avogado, o caso estaba
demasiado claro para andar gastando os aforros nun lambefoulas, bastaría con topar
cun par de veciños que deran testemuño perante o xuíz, así que foi para casa a
agardar. Matou os días na tomada limpando a cinza da desfeita para que o fento non
abafase por falta de aire. Foi facendo pequenos montes de borralla e logo, coa axuda
do carretillo, botounos polo valado abaixo, ciscou semente de herba, regou,
estrumou e fixo plans para plantar de novo naquel outono. Todo isto mentres o seu
odio ía medrando como a mala herba, a cada intre podíaselle escoitar renegando
contra o Xan do Rego e o malparido que lle mandou facer aquilo. Falaba cos toros
queimados dos pexegueiros, das ameixeiras, das maceiras, dos castiñeiros… parecían
anoxados, coma se o fixesen a el responsable daquel lume devastador. Máis dunha
vez se sorprendeu a si mesmo chorando ó lembrar as pólas retorcidas coa dor das
súas amadas árbores, o sufrimento daqueles seres ó verse no medio daquel inferno,
cruxíndolle a leña entre as lapas. Aquel Xan do Rego tiña que pagar, el e o
malnacido que lle ordeara facer aquel mal.
Pasaron un par de meses e Bieito Ferrato recibiu unha citación para ir declarar,
ía comezar o proceso. Aquel día lavou a cara, os pés, as orellas, quitou a roña das
unllas, cortou o cabelo, fixo a barba e foi cara ós xulgados. Agora si, dicíase mentres
viaxaba no autobús de liña, agora si que has pagar fedorento. Pero á fin non foi así,
o fedorento non pagou, nin tampouco o malnacido agochado nas sombras que lle
mandara facer aquilo. Todos os malos presaxios que escoitara perante aqueles
meses fixéronse realidade nun choscar dos ollos. O xuíz non tardou nin dez minutos
en arquivar o caso; “por carencia de indicios probatorios”, dixo. Bieito Ferrato colleu
una mala hostia de coidado. ¿Qué tipo de home era aquel que ousaba pór o seu pé
traizoeiro enriba da xustiza? Aquel que debería ser o seu máis fiucego servidor. ¿É
que non lle chegaban máis de setenta ferrados de monte calcinado como proba? El
tentara facer relucir a verdade polas boas e non lle fixeran caso, ¿para aquilo valían
os tribunais? Tanto gasto, tantos fondos destinados a manter toda aquela maquinaria
de xuíces, secretarios, fiscais, edificios, instalacións, funcionarios… para que non
fagan caso de quen leva a razón. De tódalas formas, que agardasen tranquilos, se o
asunto non podía ir polas boas tería que ir pola tremenda. ¡Aquilo non podía quedar
así!
Foi naquel intre, movido pola carraxe, cando tomou a determinación de
plantarse na Praza de España. Non tardou nin dous días en preparalo todo e tomar
rumbo á cidade. Nada máis chegar o seu destino pousou o letreiro no chan e
acendeu un cigarro. Fumouno de vagar, disfrutando cada chuchada, vendo á xente
que pasaba ó seu carón coma quen mira unha bandada de estorniños. Cando acabou
tirou a boquilla ó chan e esmagouna co pé, colleu aire nos pulmóns e aínda deu uns
últimos pasos antes de se quedar quieto, conxelado sobre una baldosa da beirarrúa,
cos brazos estricados formando unha “uve” cara ó ceo e os ollos pechos. Como ben
dicía o cartel, de alí non se movería ata que os responsables pagasen pola desfeita.
Aquela fora a súa decisión, a estratexia tíñaa ben calculada e estaba disposto a
chegar ata á fin. ¡Contra se estaba!
Cando levaba naquela posición tan só uns intres comezaron a molestarlle os
brazos, una comechón insoportable ascendeu pola caluga ata instalarse debaixo da
boina. Bieito Ferrato devecía por se rañar un pouco, por mover os brazos e deixar ó
sangue fluír libremente pero, é preciso dicilo, o vello era sobre todo un testán de
medo, cando se lle metía algo no medio das cellas non se lle quitaba de alí nin
arreluando con auga a ferver, así que respirou fondo e tratou de non pensar na
incomodidade, o importante era facer pagar ós malnacidos. Pasaron dúas ou tres
horas de dura loita contra da súa vontade pero chegou un momento no que se deu
de conta de que a comechón pasara e a incomodidade da postura tamén. Parece
coma se o seu corpo se habituara a estar naquela posición, coma se os seus
músculos e os seus ósos adoitasen aquela forma e non servisen xa para o
movimiento. Para cando se fixo de noite Bieito Ferrato xa se esquencera de que una
vez camiñara, correra polos montes, trepara nos valados, semellaba coma se nacese
así, naquela postura e só servise para estar cravado no chan, coma un daqueles
plátanos da sombra que se abanaban na Praza de España. O seu extraordinario
esforzo comezaba a dar os seus froitos.
Ó primeiro a xente pasaba ó carón del coma quen pasa por diante dunha
pedra, incluso algún, distraído co teléfono móbil, estivo a piques de tropezar contra o
seu corpo parado. Pero aquilo xa o tiña pensado e Bieito Ferrato, nunha acertada
decisión decidiu realizar a súa protesta cos ollos pechados, non quería que ninguén o
desviase do seu motivo de estar alí. Nunca se fiara da xente, el que nacera antes da
guerra de sobra sabía que andaba moito cabrón solto polo mundo. Alí, detrás das
súas pálpebras pechadas, podía imaxinar o que acontecía ó redor. Pouco a pouco foi
sentindo a presencia da xente que se achegaba. Privado do sentido da vista comezou
a diferenciar o son das pasadas. Prestando atención podía saber cando ían ou cando
viñan, o que non resultaba tan doado de adiviñar era a actitude que adoitaba a xente
que por un instante se paraba perto del. Como tiña os ollos pechos e, nun exemplo
de honestidade, non os abría nin para ver caer as follas, non podía saber que había
quen se paraba a ler o que tiña escrito no cartel, nin que tamén había quen
simplemente paraba a escasos pasos de onde el estaba sen reparar en que un vello
levaba alí xa unhas cantas horas, cos brazos alzados e sen outro movimento que o
producido pola feble brisa que lle batía levemente no peito.
A noite caeu e a temperatura baixou coa escuridade pero Bieito Ferrato,
abrigado como estaba, non sentía o frío. Pouco a pouco foi diminuíndo o fluxo de
peóns na beiravía. As formiguiñas volven á tobeira, deu en pensar. Esta idea
divertíao. Para el que era un home activo, un cu picudo por chamalo dalgún modo,
non era doado estar alí sen facer nada, así que tiña que matar o tempo con calquera
pensamento. Aquilo das formiguiñas parecíalle un pouco infantil pero, cando menos,
facíalle os minutos máis liviáns. Pronto comezou a imaxinar ás persoas con anteniñas
na fronte e cuns abdomes redondos e prolongados. Non sabía se quen pasara canda
el se daría de conta de que por dentro estaba a escachar coa risa. Supuña que non.
Non sentía ningún músculo movérselle na face pero, despois dunha tarde de quedar
premeditadamente quedo, o certo era que xa case non sentía o corpo. A verdade era
que tanto lle tiña, tan só había unha cousa que o comezaba a preocupar, despois de
poder coa inactividade, ¿podería tamén coa fame? Máis aínda cando bulía no aire
aquel arrecendo ó churrasco e á fricolada de peixe que, con seguridade, viña dalgún
lugar non moi lonxano. E é que Bieito Ferrato dende sempre fora home de bo dente,
non había comida a que lle dixese que non, podería gustarlle máis ou menos, pero se
tiña media garrafa de tinto e unha codia de pan todo entraba. Así tiña aquel pipote
na barriga, que máis semellaba cura que labrego, dentro do seu corpo rexo coma un
tocón de carballo. Aquel corpo tan vigoroso era a causa do traballo duro que facía
tirando do sacho, a barriga botáraa despois de anos e anos de meter a comida gorxa
abaixo, aínda que fose ós abalóns. Por iso, naquel momento en que a fame
comezaba a trabar coma o lobo, Bieito Ferrato dubidou da súa capacidade de aturar
a tentación de mandar todo ó carallo e ir ó lugar de onde viña aquel cheiriño do ceo.
Pero xa dixemos que se algo tiña de característico Bieito Ferrato era a súa testanería,
e é que como se lle metese algo entre as cellas non llo quitaban de alí nin con pata
de cabra, así que respirou fondo e tratou de esquencerse daquel cheiro e deixar
pasar o tempo. O importante era que Xan do Rego e quen lle mandou facer aquel
estrago pagasen pola súa maldade. Non quedaba outra, a xustiza tiña que abrollar e
pasar por riba daquel xuíz miserento. Perder unha batalla doía máis gañar a guerra
era o que importaba, tiña que resistir, esa era a súa estratexia.
Durante unhas cantas horas nada aconteceu. Bieito Ferrato continuou na súa
teima coma un valente, e iso que seguramente non houbese alí ninguén para ter
conta de que non se movese. Ben podería mexerse un pouco, estirar as pernas,
camiñar uns pasos, estirar os brazos e os ósos das costas, pero aquilo comezaba a
ser unha cuestión de orgullo persoal, tiña que facer as cousas ben ou senón máis
valía marchar para a casa. Teimudo seguiu sen se mover, tan rigoroso foi que nin
sequera choscou ó torto, simplemente foi matando as horas da noite na compaña
dos camións do lixo e do bulir dos trasnoitados que pasaban a súa beira camiñando
diante do resón das súas pasadas. A Bieito Ferrato, como non tiña máis que facer
que agardar que o tempo pasase, deulle pola filosofía. Cos ollos pechos tan só lle
quedaban os outros sentidos para tentar comprender calquera cousa do que
acontecía ó seu redor. Oíu o rechouchío triste dos pardais entre as pólas dos
plátanos da sombra, era noite pecha así que se estrañou daquel suceso. Alá na aldea
despois do canto dos reiseñores semellaba pararse o mundo ata o novo alborear, a
non ser polo grave reclamo dalgún moucho o demáis era silencio. Se alguén facía
barullo eran os grilos no verán, o vento mexendo as copas dos piñeiros pero… ¡os
paxaros non cantaban de noite! Isto das cidades é para tolos rematados, pensaba, ó
tempo que unha feble morriña polo seu íalle medrando no medio do peito. Devecía
por voltar ó carón daqueles regos que levaban a vida ata ós prados sedentos,
lembrábase das fermosas casas de pedra, das chemineas cuspindo fume… Tan
sumido estaba nestes pensamentos que non se deu de conta de que uns lacazáns
que andaban de troula se achegaron canda el. ¡Mira para aquí, hai un mimo! ¿Un
mimo, a esta hora? Aqueles dous moinantes cheiraban á bebida como apesta o
inferno ó xofre. ¡Ei mimo, fai un pouco o parvo! ¡Móvete veña! Pero, como é sabido,
Bieito Ferrato tiña decidido que el de alí non se movía ata que o Xan do Rego e máis
o malparido que lle mercara os mistos pagasen pola desfeita. ¡Veña home, fai o
parvo, mira que teño aquí unhas moedas! ¡Déixao, este é un tolo! ¡Pois que merda
de mimo! Escoitou uns pasos que se alonxaban, os bébedos parecían querer marchar
pero a Bieito Ferrato lle estrañou que as pisadas fosen dunha soa persoa. Foi entón
cando sentiu un barulliño de auga, e logo un líquido quentiño esvarándolle nas
pernas, e logo aquel cheiro ó amoniaco subindo dende o chan. ¡Aquel fillo dunha
cadela mexáralle enriba! Tal foi a carraxe que colleu que a piques estivo de abrir os
ollos e baixar os brazos para buscar a gorxa daquel bastardo e retorcerlla. Sen
embargo, semella que na mente de Bieito Ferrato, que en honor á verdade non era
para tirar foguetes, cruzou un lóstrego de claridade que o fixo quedarse quedo. Nin
sequera abriu os ollos, quizais porque pensou que a actitude dun bébedo non faría
tremer a súa causa de xustiza. E así foi, non tremeu. O mexón marchou mofándose
do vello e alí quedou Bieito Ferrato coa compaña das súas pernas molladas con
aquela urina que comezaba a perder temperatura e a aumentar o fedor. E claro,
como tiña os ollos pechos non se deu de conta de que aquel fillo dunha corva,
ademáis de mexarlle na pernas, mexara tamén sobre o cartón escorrendo a arxila e
deformando as letras, facendo calquera mensaxe ilexible.
Bieito Ferrato soubo que comezaba a clarear o día porque a actividade na
Praza de España se facía máis intensa. Á primeira hora o tráfico era maioritariamente
de vehículos pesados; camións ou grandes furgóns para o transporte de
mercadorías. Logo viñeron os autobuses de pasaxeiros e os peóns camiñando á súa
beira. Sen embargo, a xente parecía non reparar nel. Bieito Ferrato comezaba a
preocuparse, ¿quizais estaba a facer algunha cousa mal? Aínda despois de pasar a
noite alí á intemperie, comportándose con rigorosa honestidade, semellaba non
chamar a atención dos cidadáns. Pensou que aquela xente debería de estar cega e,
de paso, pensou tamén que non quedaba outra que seguir aguantando. Cando
menos algo tiña ó seu favor, o que era aguantar sabía facelo ben.
Rápidamente pasaron tres xornadas dende que Bieito Ferrato se chantara na
Praza de España. No medio daquela inactividade tres días supuñan tanto tempo que
o vello tiña a sensación de que lle estaban a nacer raíces dos pés. Durante todo
aquel tempo tivo que facer un tremendo esforzo mental; loitou contra a comechón e
o gana de durmir, fuxiu da tentación de comer correndo diante do lobo da fame que
lle trababa con violencia no estómago. Pero Bieito Ferrato, testán como era, pensou
que tiña á razón da súa parte e que a verdade botaría pronto os primeiros rebentos.
Para el non había outro xeito que actuar daquela maneira, para el que non andaba
no medio dos poderosos, que non mexía nos fíos da política para facer negocio, para
el que non era máis que un vello que tiña uns cantos ferrados de monte. E aínda que
a intelixencia de Bieito Ferrato non era tanta como para escribirlle un libro, tampouco
era desa clase de home que se deixase tourear só coa dialéctica, de sobra sabía que
nesta vida todo está en buscar contactos, en ter amigos, facer favores e recibir a
cambio. A el nunca lle gustara isto por inxusto, é máis, cada vez que puña a radio e
escoitaba; “… novo conselleiro de obra pública…”, ”… executado o presuposto para o
novo trazado da autovía…”, “… o señor presidente prometeu ante…” Bieito Ferrato
tiraba de retranca e falándolle ó aire soltaba alguna frase como; ¡agora si!, ¡desta
vai!, ¡home, tampouco facía falta prometer! mentres seguía a fozar na terra ou a
apañar un pouco de herba para os coellos. O caso era que coa verdade do seu lado
non se podía deixar asoballar, xa fora á Guardia Civil e máis ós xulgados e non lle
fixeran caso, así que só lle quedaba aguantar alí, para ben ou para mal algunha
cousa habería de acontecer.
E foi na mañá daquel terceiro día de protesta cando Bieito Ferrato sentiu que
un vehículo de grandes dimensións estacionaba ó carón del. Logo escoitou o barullo
metálico dunha porta corredeira que se abría e como dúas ou tres persoas, non
estaba seguro, baixaban á beiravía. Unha daquelas persoas era muller, iso estaba
claro, porque sentía o batucar dos seus tacóns contra o piso, ademáis podíase ulir o
seu perfume ás leguas. Bieito Ferrato chegou á conclusión de que algo estraño
estaba a acontecer, non é normal que unha muller que calza zapatos de tacón baixe
dun furgón de transporte. Mentres lle daba á testa tratando de debullar a mazaroca
daquel misterio sentiu que un grupo de xente, polas pintas numeroso, estaba a
acumularse ó seu redor.
A escasos cinco minutos daquela enigmática chegada a muller dos tacóns
comezou a falar usando un ton esaxeradamente alto e forzado. Bos días, fálalles
Paulina Santos transmitindo en directo dende a Praza de España. Achegámonos ata
aquí porque tivemos constancia de que este home, que está situado ás miñas costas,
leva tres días nesta mesma posición, sen moverse nin para ir a asearse. Sospéitase
que durante todo este tempo non comeu nin bebeu, aínda que hai quen di que polas
noites vai camiñar un chisco e inxire algún alimento. A Bieito Ferrato déronlle gañas
de lle berrar a aquela muller, ¿como podía dicir que se movera, que comera, cando
levaba tres días facendo un esforzo inhumano de honestidade, cando podendo facer
trampas non as fixera? Sen embargo conservou a calma porque conseguira chamar a
atención dos medios, agora as cousas habían marchar soas. O caso é que ninguén
sabe con exactitude que é o que este home pretende comportándose desta maneira.
Algún di que ten perturbadas as súas facultades mentais, outros din que está a pedir
esmola, inclusive escoitámoslle afirmar a un transeúnte que este home, de
identidade aínda descoñecida, está a protestar porque a súa muller lle liscou da casa
levándolle os cartos. Como ben vostedes saben estimados espectadores neste canle,
Q2, somos amantes da verdade, así que pensamos que a mellor maneira de informar
era preguntándolle directamente ó verdadeiro protagonista desta historia, ó
individuo, a esta existencia anónima que está a punto de ser cuberta polo fanal da
transcendecia. Imos, por tanto, darlle a oportunidade de que nos faga coñecedores
do seu caso. Bos días señor, fálalle Paulina Santos do canle Q2, estamos
transmitindo en directo para Esperta Cidadán, quixeramos facerlle unhas preguntas,
¿é posible? Paulina Santos achegoulle o micrófono á boca a Bieito Ferrato pero, ó
non obter resposta, a reporteira pensou que o vello non escoitara ben, así que
volveu repetir a pregunta. ¡Bos días señor! Aquí Paulina Santos, quixeramos facerlle
unhas preguntas, ¿é posible que nos refira o motivo polo que está aquí dende hai
tres días? Mais Bieito Ferrato, ademáis de decidir que quedaría quieto e cos ollos
pechos ata que Xan do Rego e o malnacido pagasen polo seu crime, decidirá tamén
que unha parte da súa estratexia pasaba por non falar. Non era preciso, el tiña a
verdade do seu lado e a verdade é clara e resplandecente, coma un facho prendido
no medio da noite máis escura. Señor, aquí Paulina Santos do canle Q2, ¿é posible
falar un intre con vostede? A muller agardou algún tipo de resposta. Nada, Bieito
Ferrato seguiu instalado no seu silencio. Non se lle viu xesto ningún, nin movimiento
nos beizos nin nas pálpebras. A reporteira non esperaba aquela reacción ou, máis
ben, aquela carencia de reacción por parte daquel vello insensato que tiña diante.
Paulina Santos tivo que empregarse a fondo para saír daquela lameira informativa na
que estaba a afundir os seus tacóns e cun movimento elegante e casi que reflexo
esquivou triunfante ridículo. Estimados espectadores, parécenos que este home está
algo indisposto. Facendo un sinxelo exercicio de empatía podemos, sen dificultade,
adiviñar as causas do seu malestar; a fame, a soidade, o frío instalado nos ósos…
Por todo isto estimamos que o mellor e dar paso á publicidade mentres agardamos a
que o noso entrevistado repoña un pouco o seu estado de ánimo. Por favor non
cambien de canle, nun intre estamos con todos vostedes. E así foi como a emisión en
directo pasou ós reclamos publicitarios, Paulina Santos puido entón quitar a máscara
e falarlle a aquel vello insolente como realmente se merecía.
Mire señor, ten que pór un pouco da súa parte, ten que coadxuvar, hai xente
que pagaría unha morea de cartos por estes minutos que nós lle estamos a dar de
balde. Pero o vello, confiado como estaba no seu plan, seguía sen dar sinais de vida.
¿É que non comprende vostede que a nós o mesmo nos dá entrevistalo a vostede
que ir detrás dun rabaño de ovellas? Nada, o vello semellaba un monicreque de
palla. Aquel parviño, en lugar de pórse a falar, de soltar o torrente das verbas, en
lugar de contar unha gracia ou aproveitar aquel vento e facer un pouco de
pantomima, de procurar o seu propio interese comportándose coma un divirtemonas,
en lugar de argallar naquel show á comenencia continuou na súa teima de non
mover nin un piollo da testa.
¡Xa está ben! Paulina Santos comezaba a estar máis que farta daquel vello
inútil e, de paso, daquel traballo tamén. Tivera que erguerse ás seis da mañá para
estar peiteada e maquillada ás oito e un cuarto. Despois tivera que desprazarse ata
alí, atallando como mal puideron un atoamento duns vinte minutos, memorizar o
guión ás présas, forzar o sorriso diante da cámara e, aínda por riba, doíalle a cabeza
como si lle estiveran a bater nela cun ferro. Por todo isto, a cada verba que
pronunciaba ía pasando da zalema inicial á máis funesta das ameazas. Mire señor,
¡non me faga perder o tempo! ¡Ou colabora ou xúrolle polo máis sagrado que os
gastos que nos ocasionou facéndonos vir ata aquí vai pagalos vostede do seu peto
multiplicados por dez! Nin con esas, Bieito Ferrato non se inmutaba, parecía mesmo
unha estatua. ¡Acabouse, acabouse! A muller estaba entolecida, a toda présa foi
empurrando á xente que rodeaba o lugar e indo cara ó furgón. A medida que
avanzaba ía tirando do cámara como se fose un can, tiña o micrófono enchufado a
cámara e o pobre do home non puido facer outra cousa que correr atrás da
reporteira e meterse no furgón. Logo arrancaron e non volveu haber ningunha outra
aparición de Bieito Ferrato nos medios. Cando o Esperta Cidadán volveu da
publicidade emitiuse unha receita de cociña, falouse un pouco daquela muller que se
deitou cun toureiro, anunciouse un producto contra as perdas de urina, un xogo de
coitelos máxicos, un reloxio de parede cuspidiño ó Big Beng… pero a propósito da
historia de Bieito Ferrato non se referiu nada máis no que quedaba de programa, nin
tampouco ó dia seguinte, nin á semana seguinte. Simplemente foi unha historia a
medias, coma un mal libro que se deixa pola metade, non se deu ningunha
explicación á audiencia da verdadeira razón daquel misterioso caso, non se centrou o
fío argumental da noticia no extraordinario esforzo daquel home para perseverar
naquela mesma postura durante días sen se mover nin un centímetro, tampouco
causou estrañeza que o home nin comese nin bebese durante tanto tempo, non
falemos xa de investigar a verdadeira causa da súa protesta ou a identidade daquel
vello. O caso é que a nova carecía de todo tipo de interese, non provocaba ningún
tipo de reacción na audiencia, non daba pé a montar unha tertulia ó seu redor. Se o
vello non quería falar, non quería insultar a ninguén, nin sequera chorar ou
lamentarse da súa condición de ancián desamparado, ¿onde estaba o acicate
mediático da súa protesta? Como aquilo non chegaba para montar un circo a causa
de Bieito Ferrato saíu dos medios de igual maneira que entrou e o Esperta Cidadán
colleu outros vieiros menos sutís, non fora que a audiencia, ante aquela
desmesurada esixencia de esforzo mental, fose cambiar de canle.
Logo que marchou o furgón da televisión a xente que se congregara ó carón
de Bieito Ferrato foise esparexendo. Aínda quedou algún por alí falando do vello e
das causas que o levaran a tomar aquela actitude. Durante aquel tempo ás orellas do
chantado chegaron as opinións máis variadas. Que se non aproveitara a
oportunidade, que non tódolos días pode un saír na televisión, que se aquel modo de
tratar a reporteira era máis de xente sen cultura, que se a culpa era del por non
baixar da burra… a verdade era que a Bieito Ferrato xa se lle quitara a gana de pórse
a latricar sobre o asunto. O que quixera enterder que entendera. Máis valía non
perder o tempo nin os ánimos. El seguiría ó seu aire, coma quen mira chover, alí
quieto ata que á xente que pasase ó seu carón lle comezase a traballar a conciencia.
Cando mirasen a aquel vello alí plantado, soportando a penuria da fame e o azoute
do frío, a choiva por riba e o vento baténdolle no corpo non poderían pasar
indiferentes. Todo era unha cuestión de agardar. Durante a súa vida xamais se
deixara levar polo fume da ilusión, sen embargo naquel caso estaba esperanzado na
capacidade de empatía do ser humán.
Trabucouse.
O tempo pasou e a ninguén semellaba importarlle o máis mínimo que Bieito
Ferrato levase alí, naquela postura, sen comer nen beber, sen siquera mudar de
roupa seis, sete, oito días. Quenes aínda non pasaran pola Praza de España dende
que o vello se chantara naquel anaquiño de baldosa quedaban a mirar para el sen
comprender. Nas súas mentes formábanse as máis diversas explicacións sobre o
motivo de que aquel home estivese alí, había quen ata pensaba que era unha
estatua humana e xenerosamente lle deixaba nos pés algunha que outra moeda.
Para quen tiña que pasar diariamente ó carón de Bieito Ferrato a cousa era distinta;
os máis, cando pasaban á súa altura, simplemente viraban a cara, algúns sentían
certo sentimento de lástima ó miralo así tan desvalido, pero o sentimento era tan
febliño que esquencíano nada máis camiñar uns pasos. Sen embargo, as voces que
máis altas soaban eran as de aqueles que se amosaban molestos porque a
autoridade permitise tan grotesco espectáculo nun dos puntos máis transitados da
cidade. Non obstante, e a pesar daquelas queixas, a autoridade nunca interviu. A
razón daquela pasividade nunca se soubo, probablemente non tivesen constancia
oficial daquel feito e ás patrullas que pasaban polo lugar nunca lles deu por gastar
uns minutos cun vello que aínda por riba non se metía con ninguén, un vello que non
fixera outra cousa que estar alí simplemente parado, sen pedir nada, sen causar
ningún problema.
Canta razón levaba aquel sabio que dunha volta dixera que o destino do home
é o esquecimento, cando menos no caso de Bieito Ferrato acertou de cheo. A cousa
foi que os días pasaron voando e o inverno cubriuno todo de chuvia, vento e xeada.
Incriblemente o vello estaba, non só vivo, senón que aínda tiña forzas para aguantar
o que lle botasen. Xa non padecía coa fame nin coa sede e iso a pesar de que xa
perdera a conta do tempo que levaba alí parado sobre aquel cantiño da beirarrúa. Os
números e os días confundíanse na súa mente adormecida pero sospeitaba que
levaba alí plantado algo máis de dous meses. Admirouse de si mesmo de aturar tan
ben o frío. Aínda que trouxera roupa de abrigo xamais pensou que a súa protesta ía
a durar tanto tempo, ó seu entender aquel traxe e aqueles calzóns de la gorda eran
insuficientes no inverno. De todas formas o frío non fería e a choiva non transpasaba
o seu cabelo. Semellaba coma se a pel se curtira coa inactividade, era coma si o
vento e a xeada do mencer a fosen engordando, como si en lugar de pel tivese
cortiza. De todas formas pensou que se non pasaba frío tiña un problema menos.
Non podía máis que alegrarse e, acougado o desacougo, tan só había que seguir na
loita.
Bieito Ferrato non volveu a ter sentido do tempo ata que chegou o nadal. A
cidade pareceu cambiar de súpeto. Ó seu carón instalaron un altofalante para
ambientar as rúas facendo soar panxoliñas. Cando as escoitou por primeira vez
experimentou unha ledicia instantánea, imaxinou ter o sabor das noces metido na
boca amais, un pouco de música non viña mal, así se distraería daquel longo non
facer. Pasadas unhas horas caeu na conta de que era sempre o mesmo disco que
volvía ó principio de forma automática unha e outra vez, unha e outra vez… Entón
desexou que o nadal acabase por dúas razóns; a primeira, para que a xente voltase
a súa vida normal, así poderían prestarlle máis atención á súa causa e, a segunda,
para que quitasen aquela condena de música que lle tiña os tímpanos estragados.
E como todo pasa nesta vida aquel tempo tamén pasou. Logo, co San Amaro,
veu un frío máis intenso e logo a primavera. Bieito Ferrato soubo que era a
primavera porque sentía como aumentaba o rebulir dos paxaros nos seus brazos
estricados, como trepaban polos seus cóbados para ir a pousarse nos seus dedos,
facéndolle cóxegas e peteirándolle suavemente nas uñas. E é que, despois de todo
aquel tempo de non se mover daquela baldosa, Bieito Ferrato xa parecía unha parte
inseparable da Praza de España. Ademáis, entre o po da cor da terra acumulado na
roupa, as cagadas dos paxaros que ninguén lle limpaba, as mexadas dos cans e as
follas secas que lle quedaran pegadas no corpo Bieito Ferrato máis semellaba unha
árbore que un ser humano. Tanto era así que a ninguén lle pareceu estraño cando,
co ascenso da temperatura ambiental, dos seus brazos comezaron a agromar
pequenos rebentos verdes cheíños de botóns florais.
Non pasou nin unha semana disto cando unha maxetuosa floración apareceu
no corpo de Bieito Ferrato. O estraño do caso non era que da materia dun ser
humano nacesen flores de maneira natural, o máis difícil de comprender era a razón
de por que, se ninguén lle inxertara aínda ningunha póla, as flores que se abriran no
corpo do vello non eran só dunha especie de planta, senón de maceira, pexegueiro,
castiñeiro, nogueira, sabugueiro, inclusive se abriu a chiruma dos toxos, a flor dos
carballos… en definitiva, as flores de cada unha das árbores que tiña plantadas
naquela tomada que arrasaron para sempre o Xan do Rego e aquel malnacido que lle
mandou prender o lume, aquel mesmo que despois impediu que a cega xustiza
nivelase a súa veleidosa balanza.
Xa pasaron uns anos daquela incrible metamorfose e a xente que pasa pola
Praza de España pareceu esquencer que esa árbore, que agora deron en chamar “a
das mil primaveras”, é en realidade un home que está alí parado esperando a que se
faga xustiza. En canto á estación de tratamento de lodos á fin foi levada a outra
comarca. Nos xornais dixeron que se aproveitou unha superficie de monte queimada
para construíla e así evitar, ou polo menos disminuir ó máximo, o impacto
medioambiental que estas necesarias instalacións supoñen. O Xan do Rego morreu
de alí a pouco tempo sen que ninguén lle arranxase as contas nin lle chorase no
funeral. En canto ó malnacido agochado nas sombras, como ata hoxe non consta a
súa identidade, non se pode referir aquí nada do que foi del, de tódalas formas non
supón moito esforzo imaxinar por onde andará argallando agora. Eu non sei se Bieito
Ferrato conserva aínda algún sentimento humano, pero gústame pensar que cada
primavera fai un esforzo extraordinario por florecer e así alegrarlle a vista a toda
aquela xente que, aínda que non atendera a súa petición de xustiza, polo menos ten
a decencia de facer por vivir sen estragar demasiado a terra que han deixar a quen
os sobreviva.
A ferida que non pecha
Son estes ollos gastados
É este lazo na gorxa
Son uns beizos amarrados
por este xa non me importa
Son estes pés tan rendidos
É este camiño poento
É meu alento cativo
Son estas nubes sen vento
É este prado sen auga
Son estas moufas sedentas
É este peito máis nada
Son estas carnes baleiras
É esta noite calada
Son estas rúas desertas
É a miña vida derramada
na ferida que non pecha
A chuvia no mainel
O barullo da trapela da porta ó abrirse soou como cada día ó asomar o
rompente. A feble luz alumou a cela. Unha man atravesou o van, ergueu o prato
valeiro que agardaba no limiar e retirouno cara fóra. Despois se escoitou o gaduñar
metálico do pratiño ó ser arrastrado sobre o chan, desta volta colmado con esas
eslavas que confomaban a súa dieta e, á fin, o bater seco do poxigo ó pecharse
implacable ata o día seguinte. Nisto consistía a súa relación co mundo exterior. Para
ser máis exactos; nisto e nas nubes, os paxaros, a chuvia, as estrelas, algunha
esporádica sarabia, o sol catro veces no ano… que mostraba o van do minúsculo
mainel do teito.
Así catorce longos anos, prisioneiro daquelas paredes macizas, sen máis
abertura ao mundo que aquel circuliño que mostraba o ceo, sen máis contacto
humano que os dedos de negras unllas da man do celador que cada día introducía
pola abertura da porta o mesmo prato cheo da mesma lavadura. Despois máis nada,
el con el mesmo, a soas coas súas ansias, enfrontándose ós seus pensamentos
iguais a un can de presa.
Tivera tempo dabondo para pensar na culpa e a inocencia, no humano e no
divino, no ben e no mal, no regular. Contara cada mancha da parede, buscáralle o
xeito a cada borrancho, a cada sombra, a cada esquina. Percorrera a súa minúscula
cela mil e unha veces, paso a paso, en círculos, en cadrados, en rombos, ós brincos,
sobre un pé, de xeonllos, arrastrando o cu, desgastando de calquera modo as
sesenta e tres baldosas ó ir e volver daquel desapiadado errar. Sufrira de
desesperanza, de euforia, de fastío, de gratitude, de desalento. Cruzara os millóns de
escuros corredores que formaban a súa mente, suorento e delirante de febre, para
non chegar a ningún lugar. Toleara mil veces e mil veces volvera a recobrar a
cordura naqueles catorce malditos, implacables e longos, sobre todo longos anos.
Aceptouno todo, o seu mal fado, a condena, a redención, o lume eterno, ata a
morte. Todo menos unha cousa. No seu pensamento xamais renunciara, nin por un
intre, a escapar de entre aquelas catro paredes que o sepultaban en vida.
Nos seus primeiros anos de reclusión tentou luír as xuntas dos bloques de
pedra cunha culler pero o cemento que os unía semellaba feito de aceiro, non
conseguira outra cousa que limar o feble metal do cuberto, pero en canto ó cemento
nada, nin un gran de area se desprendera dos muros. Tentou logo desgastar a
pedra, tentouno coa culler, coas uñas, cos dentes… nada. Probou a forzar o pecho
da porta, os gonzos, a chapa metálica, tentou levantala facendo panca na finísima
abertura do limiar. Nada. Imposible, por máis que o tentou, por máis que teimou, o
esforzo e a suor, as arelas de verse ceibe foran en balde.
A única esperanza que lle quedaba era saír polo mainel do teito. Pero aquilo
era un imposible, necesitaría medir catro veces a súa estatura para chegar sequera a
rozalo, e iso contando coa axuda do enferruxado leito onde durmía. E, se algún día
lograse chegar ata ó teito, precisaría non ser máis grande que un pardal para poder
coarse por aquel minúsculo buraquiño. Parecía un imposible, por alí só entrara a
auga da chuvia e a auga nunca volve cara arriba. Entón quedou pensando… ¿e se
volvese?
A algunha conclusión debeu chegar porque acto seguido arrastrou o leito ata a
metade da cela, espiuse por completo e se deitou nel cara arriba, a mirada fixa no
mainel, os brazos e as pernas estricadas, as palmas das mans abertas, o corpo
xacente e paralizado. Renunciou a durmir e a comer, renunciou a falar, a pensar, a
rir, a moverse, a rañarse, a compadecerse de si mesmo. Aínda que tiña os ollos
abertos conseguiu non ver, conseguiu que nas súas orellas non entrase outro son
que o latexo do seu corazón e que no seu nariz non entrase outro cheiro que o do ar
que enchía os seus pulmóns. As inspiracións fixéronse tan febles que case
desapareceron, os batidos lánguidos e apoucados como un chiscar dos ollos. Tan só
pronunciaba unha miserenta palabra en todo o condenado día, un rotundo ¡non!
cando o celador lle preguntaba se tampouco entón ía comer.
Lentamente pasaron os días, amodiño, coma follas de buxo que medran. O
mainel se escureceu trinta e dúas veces e outras trinta e dúas volveuse tinguir de
azul. Entón comezou a sentir algo distinto, unha sensación descoñecida ata ese
momento. Primeiro sentiu calor no ventre, ós poucos a calor fíxose máis intensa e foi
baixando polas súas pernas e os seus brazos, chegou ata os seus dedos, cubriu a
súa cara, a súa fronte, a súa caluga. Sentía aumentar a calor por momentos, aquilo
non era febre, era algo distinto. Sabía que a febre non podía elevar a temperatura
corporal a aqueles niveis tan altos, así que se mantivo á expectativa, sentindo cada
vez máis calor.
Chegado o momento caeu na conta de que debería estar ardendo, e con todo
non sentía unha calor lacerante, era máis ben unha calor morna, devecida, coma o
efémero refulxir dun sol pasaxeiro que asoma no ceo cuberto do inverno. Entón
dirixiu a mirada cara ós seus pés e puido ver que todo o seu corpo gurgullaba,
seguía tendo forma pero entrara en ebulición, na súa superficie se formara un
cachón fermoso e irisado. Lonxe de aquelarse ficou calmo, abraiado co son
inconfundible de grumos que estouran, aquel son que producían os seus xeonllos, a
súa pelve, o seu pene, o seu abdome ó ferver. Puido ver como se formaba unha
columna de vapor que ía subindo ata o mainel. Unha columna tímida ó principio que
se transformou, en cuestión de segundos, nun caudaloso torrente que saía da cela
atravesando o van. Sentiu que flotaba, que se elevaba do leito e fluía cara arriba,
separábase do chan e achegábase ó teito da cela, pasando amodiño, unha a unha,
polas ringleiras de pedra que o encerraran durante todos aqueles anos. Logo o son
xordo dun sumidoiro ó desaugar e logo a claridade do día, os montes e os vales
amados, o sol alaranxado do atardecer morrendo no océano, alumeando de ocre o
lugar onde se abría o mainel que, alá lonxe, se facía cada vez máis e máis pequeno.
MANUAL DE INSTRUCCIÓNS PARA TOCAR UNHA
ESTRELA
Para Antón, que agora é un tigre
- Dezaseis… dezasete… dezaoito… dezanove e vinte. ¡Vou!
Non era preciso contar tanto pero a Amelia e a Martiño gustáballes rirse do pailanciño do seu irmán pequeno. Cando Felipe comezaba a
contar aínda quedaban alí detrás del facéndolle xestos de burla e só se ían agochar cando a pequeño chegaba ó número quince.
O primeiro lugar que inspeccionou o cativo foi o vestidor que había
na entrada da casa, abriu a porta e ollou detrás, turrou bruscamente dos gabáns. Alí non había nada máis que todos aqueles tratos que seus país
puxeran alí para facer sitio na despensa. Foi cara á cociña camiñando despacio, aínda que só vestía uns peúgos nos pés pousaba os seus pasos
amodo tratando de non facer ruído. Abriu as portas da lacena, apartou o mantel da mesa e ollou embaixo, abriu a porta do cuartiño do lixo. Mirou
na despensa, o forte cheiro á pintura fíxoo tusir. Alí tampouco había ninguén.
- ¡Por min! ¡Xa estaba, Amelia xa librara! Foi á porta da entrada e topouna alí,
asubiando fachendosa coas costas apoiadas na parede, os brazos cruzados no ventre e cunha perna diante da outra.
- ¿Onde estabas? - ¿Iso non se di?
- ¿Non te agocharías no faiado? Xa sabes que alí non vale.
- Frío, frío. O cativo deuse de conta de que a súa irmá non tiña pensado
desvelar o seu agocho así que decidiu aforrar a saliva e foi mirar á sala.
Descorreu as cortinas, nada, só topou a chuvia escorrendo no vidro das fiestras. Felipe torceu o bico, gustaríalle ir fóra a brincar no xardín pero a
auga non parara de caer en todo o día. Mirou detrás do sofá e debaixo da mesas, abriu as portas do moble da televisión. ¿Onde se metería Martiño?
Na parte baixa non estaba. - Oe Rubén, ¿sabes onde foi o Martiño?
- ¡Déixame en paz mocoso, que me vas estragar a partida! Rubén volveu meter o fociño na pantalla da maquiniña e non fixo
máis caso de seu irmán. Felipe pensou que alí non había que facer e foi cara a escaleira. Subiu ó piso e se parou uns intres no último chanzo.
Tería que ter coidado, se se metía nun cuarto e o Martiño non estaba alí, deixaríalle o camiño libre para que fose salvarse. Pensou que non había
máis remedio que arriscar. Antes de abrir a porta do cuarto de seus país fixo un plano no seu pensamento dos lugares onde era posible
acoubillarse. Só había dous, embaixo da cama e dentro do armario.
Respirou profundamente e foi a toda présa a facer a inspección. Ollou debaixo da cama, abriu a porta do armario e saíu lixeiro. Martiño non ser
agochara alí pero tan rápido fixera aquela operación que Felipe sentiu certa xactancia pola súa habilidade. Logo foi ó cuarto de Amelia e utilizou
o mesmo sistema. Pensou, entrou, comprobou e saíu en tempo récord co mesmo resultado. Xa só quedaba o baño, o cuarto dos mozos, o estudio
de seu pai e o cuarto dos convidados. O baño era cousa sinxela, se o Martiño se meterá alí só podería agocharse na bañeira ou detrás da porta.
Abriu e ollou que a bañeira tiña a cortina descorrida, alí non estaba, logo mirou a través do pequeno oco que se abría entre a porta e o marco,
nada. Polo menos xa sabía que só podería estar nos tres cuartos que non inspeccionara. Foi entón cando sentiu barullo no faiado. ¡Ah trampulleiro!
Martiño agochárase alí sabendo que iso non valía. Foi chamar pola súa irmá berrando dende o alto da escaleira.
- ¡Amelia, Amelia!
- ¿Que queres, oh? - ¡Ven aquí, corre, ven!
Amelia subiu os chanzos de mala gana, rosmando e dando fortes pisadas na madeira.
- ¿Que? - O Martiño é un trampón, foi agocharse no faiado e el ben sabe
que está prohibido. - ¡Imos ver!
- ¿O faiado? Eu non vou. - ¿Por que… tes medo?
- ¿Medo? Eu non lle medo de nada, ¿decátaste? - ¡Felipe ten medo, Felipe te medo! ¡Ai Felipiño, ai Felipiño!
Amelia xiraba e cantaba aquelas verbas metidas nunha improvisada melodía. A verdade era que a Felipe dáballe igual aquel canto e aquel
baile, se a súa irmá estaba un pouco tola non era problema seu, pero se
había unha cousa que non aturaba, se había algo neste mundo que o alporizase irremediablemente era que lle chamasen Felipiño.
- Agora vas ver.
Sen máis subiu correndo a escadiña do faiado e chegou arriba. Estaba totalmente alporizado, aquilo xa se pasara de rosca. Primeiro seu
irmán fixera trampas e se agochara onde conviñeran que estaba prohibido e logo aquela lercha da súa irmá chamárao Felipiño. Mirou en derredor.
Aquilo estaba cheo de trastos. Cadeiras, louza de baño, vaixelas, lámpadas, xoguetes vellos, libros, espellos… e todo cuberto dunha capa de
pó de un par de dedos de espesor. Tería que remexer entre todas aquelas cousas e luxarse as mans e a roupa para dar con Martiño. Non lle facía
moita gracia pero abofé que o ía atopar. Entón sentiu que dúas mans lle tapaban os ollos dende as súas costas. O cativo revolveuse e conseguiu
zafarse. Cando virou viu ó Martiño cun sorriso estúpido nos beizos. - ¡Es un trampulleiro!
- Coidado co que dis. ¿Non te ensinaron a respectar ós maiores? - Eu non falo con trampulleiros.
- Xa te avisei.
Martiño empurrou a Felipe e este, que a verdade non lle faltaba carácter, lonxe de arredarse deulle unha couce nun nocelo ó seu irmán.
Pronto se formou unha boa refrega entre os dous, o grande turráballe do cabelo ó cativo, Felipe mordíalle nos barzos e gaduñaballe o peito. Amelia
que escoitou o bater da liorta subiu apurada a separar os seus irmáns. - ¡Veña, veña, xa está ben, que parecedes porcos bravos!
Pero os cativos non lle daban conta e seguiron coa súa disputa ensarillados no chan. Amelia perdeu a paciencia e agarrounos os dous de
senllas orellas. Aquela lección aprendéraa da súa nai e abofé que collera ben a insinanza porque os seus irmáns deixaron de pelexar e comezaron a
laiarse. - ¡Ai, ai, ai!
- ¡Solta bruta! - ¿Ides acougar?
- ¡Si, si, pero solta!
Amelia soltou ós cativos e estes comezaron a esfregar nas orellas. - A ver, ¿por qué andabades á liorta?
- Martiño fixo trampas, agochouse aquí cando dixeramos que non se podía.
- ¿E que se me agochei aquí? O que pasa é que ti es un mandón e queres controlalo todo. ¿Non é así… Felipiño?
Aquilo xa era demasiado para Felipe, ademáis de empregar o maldito diminutivo aínda lle engadía aquel ton de burla e chulería. Non o
aturou, non podía pasar por aquilo, así que colleu carreira e foi cara ó autor da aldraxe. Meteulle semellante empurrón que o Martiño foi bater
contra un andel cargado de trastes. Aquela morea de obxectos caeu ó chan formando un escandaloso estrépito. Caixas de zapatos, un monte de
papeis, ferramentas, bolsas, parafusos… todo ciscado polo chan no medio dunha enorme nube de po.
- ¡Mira o que fixeches pailán!
¡Agora si, fixéraa boa! Felipe quixo protestar, dicirlle ó seu irmán que non fora el só, que Martiño tamén tivera algo que ver coa desfeita,
sen embargo asumiu interiormente a súa culpa e pechou a boca. Non
había desculpa posible. Cando chegasen os seus pais o castigo había ser grande, exemplar. Tivo gana de romper a chorar, de ir ó seu cuarto e
pechar a porta pero o seu orgullo impedíallo. Tiña que arranxar aquilo así que comezou a recoller os obxectos do chan. Martiño axeonllouse para
axudalo, el tampouco ía saír indemne da reprimenda. Amelia ollou ó chan, algo había alí que chamara a atención da súa
vista. Entre aquel desastre de trastes esparexidos por todas partes había algo que emitía uns lenes escintileos, mirou naquela dirección, o brillo
procedía dun obxecto cuadrado. Achegouse, tratábase dun caderniño vermello cos bordes e o lombo dourados. Colleuno e leu o que estaba
escrito na cuberta dianteira. Manual de instruccións para tocar unha estrela. Pero… ¿que é isto? pensou. Abriu o caderno e comezou a ler.
Nada é imposible para quen teima nos seus soños. - ¡Ei rapaces, mirade o que atopei!
- Déixate de lerias e bótanos unha man.
- Non, en serio, mirade isto, ¡que cousa máis estraña! Aquela última frase bateu fortemente na curiosidade dos cativos.
Erguéronse e foron ver. - Aquí está escrito que é posible tocar as estrelas.
- ¿Pero que dis? ¡Iso é imposible! - Calade é escoitade – Amelia comezou a ler – Manual de
instruccións para tocar unha estrela. Nada é imposible para quen teima nos seus soños. Eu, Xan Guerreiro, sempre soñara con
tocar unha estrela. Faláralle diso ós meus coñecidos pero todos me contestaban o mesmo; “¡ti estás tolo, iso é imposible!” –
Amelia parou un chisco e mirou cara a Martiño cos ollos cheos de reproches – o caso é que esa verba, imposible, xa había tempo
que a borrara do meu diccionario. ¿Por que ía ser imposible? Moitos xenios no pasado foran calificados de tolos por tentar o
que a xente común nen pensara en facer. Decidín non facer casos
daqueles comentarios negativos dos meus achegados e centreime en buscar a forma de chegar a tocar unha estrela. Pensei que tiña
que buscar unha forma de achegarme ó ceo para esticar a man e tratar de cumplir o meu soño así que merquei un mapa e comecei
a viaxar. Fun directamente ós países onde se erguían os cumios máis altos do mundo e subín a eles. Decepcioneime un pouco ó
comprobar que, aínda que me achegara un chisco a aquelas estreliñas que tanto devecía por tocar, non era dabondo. Os
astros seguían estando tan lonxe que era imposible sequera rozalos. Pero xa sabedes que esa verba, imposible, non está no
meu diccionario, así que non me rendín e seguín a miña viaxe. Din voltas polo mundo, comecei a falar con inventores, con
científicos, con bruxos… pero todos me dicían o mesmo; ¡iso mozo é impoisible! Non podía ser, aquelas persoas trabucábanse
e eu habíallo demostrar. Foi entón cando un día atravesei un
deserto seco coma unha fogueira e topei cun home que me puxo na pista do meu obxetivo. Iso que ti buscas é posible pero non
dende este mundo, díxome, tes que buscar as portas das Terras
de Gaguenia, dende alí poderás subir a tocar unha estrela. ¿Gaguenia? preguntei eu, ¿e onde está a porta dese lugar? Meu
amigo, contestoume, a ruta terás que atopala ti só. E sen máis marchou camiñando polo deserto adiante. Podedes imaxinar
entón a miña ledicia, ¡había un lugar dende onde poder cumprir o meu soño! Púxenme ata nervoso e comecei a procura das portas
de Gaguenia. Metinme en covas escuras coma a noite, busquei nos campos, nas fragas, nas cidades, nas aldeas… pero non topei
nada. Deume a impresión de que aquel home me enganara e a piques estiven de desistir e renunciar á miña ilusión. Pero un día,
cando xa deixara de buscar aquela terra lexendaria, topei sen querer coa porta a aquel mundo marabilloso.
- ¡Incrible! - Si, eu tampouco o creo
- ¡Calade que aínda non acabou! – Amelia seguiu lendo – Neste
libro están ben claras todas as instruccións para chegar a tocar as estrelas. Se alguén quere facelo ten que por coidado de seguir
estrictamente os pasos consignados nel. Pero antes de comezar ten que facer o Xuramento dos buscadores, imaxinade que todo o
mundo se adicase a ir a Gaguenia e comezase a sobar nas estrelas. Pobriñas, tan febliñas e tan tristeiras, habíanas acabar
desgastando e consumíndoas, ¡xa non quedarían astros no ceo! Por iso prégovos por favor que non iniciedes a ruta sen xurar
antes. Amelia pechou o caderno. Realmente que aquilo non era sinxelo de
crer, outro mundo a parte daquel no que vivían, un mundo máxico dende onde poder tocar as estrelas. Realmente que aquilo era de tolos, ¡pero era
tan tentador! - ¿Que dicides, facémolo?
- ¿Ti estás tola? Non me digas que te criches todas esas trolas.
- Eu quero tocar unha estrela – Felipe contestara que si, máis pensando en ir a Gaguenia para evitar o castigo que lle agardaba
que por tocar unha estrela que, a verdade, tanto lle tiña. - ¡Outro tolo!
- ¿E se fose posible, de verdade que non estás curioso de saber? De tódalas formas, non temos nada que perder por tentalo.
Martiño pensou uns intres, relamente a súa irmá tiña razón, nada tiñan que perder por tentalo. Tardou en dar unha resposta, primeiro
porque non estaba moi seguro daquilo e segundo porque, para ser sinceros, o seu cerebro non era precisamente un prodixio. Á fin falou.
- Veña, imos tocar estrelas. - ¡Ben!
- Está ben, estamos xuntos nisto pero primeiro hai que facer o xuramento – Amelia abriu novamente o caderniño e comezou a
ler onde acabara – Xuramento dos buscadores. Repetide en voz
alta e coa man dereita erguida as verbas que veñen a continuación.
- ¡Veña mocoso, ergue a man! – Martiño erguera a man e deulle
un lene empurrón ó máis cativo. - Xuro solemnemente cumprir os mandamentos do buscador.
Primeiro, xuro non desvelar os segredos da ruta de Gaguenia. Segundo, xuro respectar ás xentes de Gaguenia, ós animais de
Gaguenia, as plantas, os montes, os ríos, a terra no seu conxunto, e xuro non faltar a esta promesa a menos que a miña
vida corra perigo – Amelia fixo unha breve pausa, aquilo do perigo fíxoa desconfiar, sen embargo seguiu – Terceiro e último,
xuro tocar as estrelas con suavidade e non tratar de quitalas do sitio onde as topei.
Os rapaces foron un a un repitindo o xuramento e o trámite quedou cumprido. Un sorriso abrollou nos seus beizos, xa podían comezar a
procura. - Oes, ¿por que non lle preguntamos a Rubén se quere vir con nós?
- ¿Para que? Vai dicir que non de tódolas formas.
- Home, preguntar non é caro. Os cativos baixaron as escaleiras a toda présa facendo un barullo
enxordecedor, máis semellaban unha manda de cabalos que aqueles tres cativiños febles. Chegaron canda Rubén que seguía metido co fociño no
videoxogo. - ¡Rubén!
- Déixame tranquilo, ¿non ves que estou ocupado? A maquiniña emitía o son electrónico dunha liorta de espadas.
- ¿Non queres vir con nós? Imos tocar unha estrela. - ¡Fóra de aquí! - Rubén non os ollaba ó falar, premía nos botóns
nervoso - ¡Porra! Xa me fixestes perder a partida, agora teño que comezar a fase de novo.
- ¿E logo non queres vir? - ¿Ir a onde?
- A tocar estrelas.
- Pero ti es parva, ¿non ves que iso é imposible? Amelia mirou ós seus irmáns e fíxolles un aceno chiscando o ollo. O
grupo dos buscadores botou a rir e a camiñar cara a cociña mentres a maquiniña de Rubén emitía o son doutra partida que comezaba.
Os cativos sentaron arredor da mesa, Amelia abriu o caderno e leu. - Antes de comezar coa busca hai que preparar o material. Collede
unha bolsa plástica e metede dentro garfos, culleres, unha corda, fita adhesiva…
- Veña mocoso, vai polos garfos e as culleres, eu collerei a fita e ti Amelia, vai lendo o que nos resta.
- Vale. Unha corda pequena, un espello de man, unha lanterna… Reuniron o material que se indicaba na lista e o pousárono todo na
mesa. Repasaron que non faltase nada. Tiñano todo así que o meteron
nunha bolsa plástica e se felicitaron pola presteza e a coordinación coas
que actuaran. Xa estaban preparados para ler as seguintes instruccións. - As portas de Gaguenia están moito máis perto do que vos
imaxinades. Eu atopeinas de casualidade así que, se seguides as
instruccións e a sorte vos acompaña, axiña estaredes pisando aquelas fermosas terras. Ide ó baño, acendede a lanterna e
apagadea a luz do teito. Metédevos na bañeira e correde a cortina da ducha.
Así o fixeron, foron lixeiros a buscar as portas de Gaguenia, subiron os chanzos de catro en catro, semellaba que levaran ás nos pés. Entraron
no baño e prenderon a lanterna, metéronse na bañeira e correon a cortina. Amelia leu as seguintes instruccións.
- A forma das bañeiras acumula a enerxía cósmica e altera as dimensións do tempo e do espacio. Así que, collédevos das mans
uns ós outros e respirade profundo mentres repetides as verbas máxicas: “nada é imposible, nada é imposible”. Non deixedes de
facelo ata que as portas se abran. E agora apagade a linterna e proecedede. Boa viaxe.
A luz da linterna se apagou, os buscadores se colleron das mans e
comezaron a repetir as verbas máxicas. - Nada é imposible, nada é imposible, nada é imposible…
Así estiveron longo tempo, sentados na escuridade e repetindo aquelas palabras máxicas, fixérono máis de cen veces pero semellaba non
acontecer nada extraordinario, nada agás que comezaban a sentirse un pouco ridículos. O primeiro en fartarse foi Martiño.
- Isto é unha parvada. Xa o dicía eu. - ¡Cala oh!
- ¡Nada é imposible, nada é imposible! Martiño calou pero pensou tamén que se non pasaba nada nos
seguintes dous minutos el marcharía. Se os seus irmáns estaban medio tolos el non quería seguir o seu camiño.
- ¡Mirade, mirade! Unha pequena luz aparecera ó carón do grifo. Era unha luciña tímida
e pequena, tan pequena que case non se distinguía na escuridade. Sen
embargo ós poucos a luz foi medrando, formando un círculo que se agrandaba diante da vista dos nenos. Comezaron a distinguir no interior
da circunferencia unha cor azul brillante e logo unhas ondas. ¡Era un mar! Entón a luz aumentou bruscamente de tamaño e acabou de completar un
círculo que pechaba por completo ós nenos. Sen embargo, non estaban encerrados en ningures. Estaban no mar, con milleiros de paxaros
sobrevoando as súas testas e un sol, ¡que un! eran tres soles lucindo no ceo. Miraron cara a esquerda, alí onde a bañeira os levaba empurrada por
aquel vento que enchía as velas, ou máis ben, a cortina da ducha. No lonxanía podíase distinguir unha illa cun monte enorme de curuto
fumegante no medio. ¡Un volcán! Os cativos quedaron abraiados, nunca viran un volcán na vida e, pese á mala fama que tiñan os volcáns, aquel
non semellaba perigoso.
O vento sopraba lene pero continuo, rápidamente se ían achegando
a unha praia de area negra coma a cinza. Os rapaces sucaban o mar coa boca aberta, maravillados daquel fermoso paisaxe que se agochaba no
seu baño. O primeiro en dicir algo foi Felipe.
- ¿Que facemos agora? - Bótalle unha ollada ó caderno Amelia, a ver que pon.
Amelia quitou o caderno de dentro da bolsa plástica onde portaban o material e comezou a ler.
- Cando cheguedes á praia agochade ben a bañeira, nunca se sabe quen está mirando. Logo tedes que topar un carreiro que leva
cara a montaña. Mirade con atención porque é un carreiro pequeniño e é dificultoso de atopar. Por se vos axuda de algo,
recordo que tiña dúas árbores de plátano ós lados – non había máis nada escrito naquela páxina así que Amelia pechou o
caderno. - ¿E… non di nada máis?
- Máis nada. - Imos logo, hai que dar coas árbores de plátano.
Os rapaces botaron unha ollada en derredor. ¡Pois si que era unha
axuda aquela! A beira da area había milleiros de árbores de plátano e, aínda por riba, a praia era enorme. Aquilo sería coma buscar unha agulla
nun palleiro. - Pois veña, ¡a buscar! Non queda outra.
Os cativos achegáronse á liña de árbores que marcaban os lindes da praia e foron camiñando en paralelo. A vexetación era tan tupida que non
se podía ver máis que un par de pasos no interior daquela selva. Felipe pensou que se un tigre estivese acubillado entre as árbores non se darían
de conta ata que topasen cos seus dentes. Camiñaban e camiñaban e camiñaban pero non daban co condenado
carreiro, e iso que se fixaran nas bases de todos aqueles árbores de plátano. Aquilo non comezaba ben. Se non eran capaces siquera de topar
un carreiriño, ¿como ían tocar unha estrela? De súpeto Martiño deu a volta.
- ¿Que fas?
- ¡Mirade, aquí, mirade! – Martiño axeonllouse á beira dunhas canas.
Os rapaces se axeonllaron perto de seu irmán. O primeiro non distinguiron nada. Alí só había area, así que tiveron que entornar a vista.
Logo de moito fixarse Amelia e Felipe descubriron o motivo de porque seu irmán dera a volta. Na area, case imperceptibles, víanse as pequeniñas
pisadas duns pés diminutos que viñan da praia e ían meterse no medio daquela selva. Cando alzaron a vista para seguir o rastro viron o carreiro
por fin. A verdade era que chamarlle carreiro a aquilo era demasiado
xeneroso. Era tan só unha verea non máis ancha que a marca da roda dunha bicicleta.
- Polo menos o caderno non mentía. ¿Vedes? Ten dúas árbores de plátano ós lados.
Martiño e Felipe miraron ás arbores e aínda riron un cacho. Cando o
riso cesou xa Amelia comezaba a entrar polo carreiro. Meteu un pé, pero cando foi meter o outro o zapato tropezoulle contra as pólas das plantas.
Non cabía, non podía pasar. Pero… ¿como fixera Xan Guerreiro? Algunha
forma tiña que haber. Entón ocorréuselle unha idea. Deu un brinco e adiantou un pouco caendo co mesmo pé.
- Temos que facelo ó pé manco. E así foi como avanzaron polo carreiriño. Ledos ó primeiro de atopar
a solución ó enigma e de escoitar os cantos dos paxaros pero, logo dun tempo, se amolaron un pouco. O carreiro non parecía ter fin e camiñar
daquela maneira era moi cansado. Ademáis, non podían cambiar de perna, non había sitio.
O caso foi que teimaron sen pensar en renderse, logo de moito camiñar sobre un pé conseguiron chegar a un claro da selva. Non podían
máis, estaban derreados, o primeiro que fixeron foi tirarse ó chan para recobrar un pouco os folgos. Apoiaron as costas sobre a herba e miraron
cara ó ceo. Quedaron abraiados. Milleiros de volvoretas de tódalas cores bulían de aquí para alá,
buscando as polas das árbores e os cálices das flores. Había tamén
paxaros azuis, vermellos, amárelos, verdes, con peteiros de multitude de formas e longas plumas nas colas. Aquel era o xardín zoolóxico máis
fermoso que viran nunca. Estiveron enfeitizados longo tempo por aquelas cores e aqueles cantos. Logo se deron de conta de que se seguían alí o día
marcharía e eles non poderían continuar. Amelia abriu o caderno. - Se conseguistes atravesar o carreiro chegaredes a un claro na
selva. Tedes que chegar ata a pedra redonda que hai xusto no medio do claro. Espero que non pisarades a ningún Glom.
- ¿Glom, que é un Glom? - Eu son un Glom, ¿e ti quen es?
Os cativos viron en derredor, non había ninguén. Por máis que ollaron nos distinguiron outra cosa que non fose aire. ¿Estarían a falar con
seres invisibles? - ¡Dende logo, menudos tres pailáns! ¡Aquí abaixo home, aquí
abaixo!
O grupo dos buscadores mirou ós seus pés buscando a orixe daquela voz. Alí non había máis que herba.
- ¡Axeonlládevos! Aquilo que lles estaba a falar ou era moi pequeno ou estaba metido
na terra. Os cativos axeonlláronse. - ¡Amodo, home, amodo!
- ¡Que ides provocar unha desgracia! Os gloms berraban dende algures pero os cativos, aínda cos xeonllos
na terra, non conseguían distinguir grande cousa. Algunha sombra pequeniña que se movía ou o lene abanear da herba pero iso era todo.
Felipe achegou a faciana ó chan de Gaguenia. Parecéralle ver algo moverse enriba dun seixo. A medida que se achegaba á pedra comezou a
separar as formas e a distinguir a figuriña dun salvaxe. Estaba vestido cunhas cativas peles de animais e enfeitado cun pequeno óso no cabelo,
tiña a cara pintada, colares no pescozo e argolas nas orellas. Viu tamén
que esta armado cunha pequena lanza que… ¡viña en dirección ó seu nariz!
- ¡Ai! ¿que fas? – Felipe rascou o nariz, a lanzada clavárase xusto
no medio, aínda que a armiña non era máis grande que un fideo da sopa picáballe coma se lla frotaran cunha ortiga.
- ¡A culpa foi túa por quererme comer! - Eu non te quero comer, o que pasa é que se non me achego non
te vexo ben. - ¡Pois meu rei, haber avisado antes!
Os cativos arrimaron a testa ó chan. Había centos daqueles gloms, milleiros, todos vestidos con peles e todos armados con lanzas, flechas ou
machadas. Había tamén mulleres gloms, e ancians gloms, e nenos gloms, e cans gloms, ovellas gloms, gatos gloms, cans gloms e cabalos gloms.
Martiño alzou a vista e o que viu non lle gustou nada. - Agora si, non podemos pasar. Mirade.
Dende onde eles estaban ata a pedra do medio do claro os Gloms construíran o seu poblado. Todo o panorama, de dereita a esquerda,
estaba semeado de pequenas chozas con tellados de palla, cortellos de
adobe e o que semellaban altares para o oficio dos seus cultos. Non poderían pasar sen derrubar con todo.
- ¿Como imos facer para chegar ata alí sen desfacer as construccións desta xente?
- Non sei. ¿O caderno non di nada? - Non.
- ¡Ouvide gloms! Temos que atravesar o claro e chegar ata aquela pedra.
As voces alporizadas dos Gloms comezaron a soar aquí e acolá pola pradaría adiante.
- ¡E eu quero un carneiro que fale! - ¡Estás tolo!
- ¡Ídevos por donde viñéchedes! - ¡Esta xente non está ben da cabeza!
¡Pero… aínda por riba! A Martiño saíulle o carácter. Se fose outro o
que quixese cruzar o prado dende logo que non se andaría con tantas contemplacións. Agora lles ía amosar a aqueles gloms petulantes quen
mandaba alí. Ergueuse, esticou unha perna e fixo ademán de pór o seu pé sobre as primeiras chabolas.
- ¡Para, para! ¡Está ben! - ¡Non te poñas así, home!
- ¿É que non sabes aturar unha chanza? Amelia colleu o senso da estratexia de seu irmán. Entón falou.
- Vos saberedes. Ou nos dicides a forma de chegar ata a pedra sen escachar nada ou pasamos sen ter coidado de onde pousámolos
pés. - ¡Mira ti a resabida! ¡Está ben, agardade un intre! ¡Gloms, traede
os espellos!
A herba comexou a mexerse sen vento que a empurrara. Os cativos
comezaron a distinguir dúas liñas brillantes no chan. Os gloms formaran dúas fileiras e estaban a reflectir a luz do sol nos seus espellos.
- ¡Agora poñede os pés entre as dúas liñas de luz e vos guiaremos
por camiño libre! ¡Non pisedes fóra do límite ou se non…! - ¡O que ti digas, rosmón! – Felipe xa comezaba a divertirse con
aquel carácter arisco dos ananiños. Dende o comezo do claro ata a pedra do medio habería uns cen
metros pero, como os gloms non eran máis altos que a metade dun dedo pulgar, aquel percorrido levoulles moito moito tempo. Aquela pasaxe
ademais de lenta foi bastante aburrida, sen embargo conseguiron chegar á base da pedra. Era a hora da despedida.
- ¡Moitas grazas pola vosa axuda queridos gloms, gustaríanos… - ¡Ala, con Deus!
- Si, e non volvades. Os gloms viráronlle o cú ó grupo e foron cara ó seu poblado
deixando a Amelia co agradecemento na boca. Dende logo, os bos modais non eran o forte daqueles seres diminutos. Os cativos subiron ó alto da
pedra e abriron o caderno.
- En Gaguenia nada é o que parece. Canto máis lle busquedes o senso ás cousas máis confusos estaredes. Moitas veces é mellor
non facerse moitas preguntas e aceptar as cousas tal e como veñen. A vida na Terra é moi previsible, sempre igual, sempre
rutinaria, sen embargo hai outros mundos que non se rexen polas mesmas regras. Iso foi o que eu pensei cando cheguei á pedra e
non topei outra forma de avanzar que abrindo o mainel do ceo. Así que, abride a portiña que tedes nas testas e trepade a ela.
Logo seguide o corredor do túnel e virade á esquerda, esquerda, esquerda, dereita, esquerda.
Amelia pechou o caderno e alzou a vista ó ceo. O mesmo fixeron seus irmáns. Había que buscar un mainel no ceo pero… ¿era aquilo
posible? Alí soamente había pequenas nubes espalladas que máis semellaban lamberetadas de azucre que verdadeiras nubes. Felipe foi o
primeiro en darse de conta de que naquela paisaxe celeste había algo que
non encaixaba. As nubes formábanse no mar e se movían amodo en dirección ó centro da illa pero chegado un punto, mellor dito, un cadrado
as manchiñas brancas e rosas parecían mudar de forma, era coma se se espallasen no medio e se encollesen nas puntas, coma se hinchasen. Logo
de pasar o cadriño recobraban a súa forma orixinal. - ¡Que estraño, mirade alí! – Felipe sinalou co dedo o lugar onde as
nubes sufrían esa transformación. - Si, é coma se pasasen detrás dun vidro.
- E esa físgoa ¿que é? Aí, na esquiniña da esquerda. - ¡Que mágoa que esté tan alta! Dende aquí non podemos
distinguir nada. Agora tiñan un problema. Crían que toparan o mainel do ceo pero
estaba demasiado alto como para chegarlle estricando os brazos. Se polo menos tivesen unha escada de man.
- Amelia, tes que subir ós meus hombreiros e ti Felipe ós
hombreiros de Amelia. - ¡Claro, que boa idea! Ás veces Martiño semellas ter algo dentro
desa testa de espantallo.
- Déixate de lerias e sube, ¡veña! Martiño pousou o xeonllo na pedra e baixou a testa para que Amelia
subise. - ¡Veña cabaliño, arriba, arriba!
- ¡Deixa de facer o parvo, eh, e hai que tratar de comer un pouco menos! Agora ti Felipe sube os hombreiros desta vacaloura.
- ¡Eh, non te pases! – protestou Amelia. - ¿E como queres que suba?
- Pois como subiamos ós eucaliptos na fraga, ¿lembraste? Teste que agarrar fortemente cas pernas ó meu corpo e logo turrar cas
mans cara arriba. - Eu iso non o fago.
- ¿E por que? - Pois… pois… pois porque ti non es un eucalipto.
- Ah xa, o que pasa é que tes medo. ¿Ves Amelia? O Felipiño ten
medo. Non foi preciso teimar máis con el. Aquel diminutivo bateu no
cerebro do cativo coma unha fusta no lombo dun cabalo. Trepou polos corpos do seu irmán coma un posuído, agarrándose dos brazos, da roupa,
do cabelo, dando couces e magoando coas unllas ó pel de seus irmáns. O caso foi que visto e non visto xa estaba nos ombreiros de Amelia.
- ¡Eh bruto, con coidado! - Es un toleirán Felipe.
- Non sexades choromicas, ¿que fago agora? - Mira que é esa liña da esquina.
Felipe comprobou que a pequena físgoa non era tal, non se afundía senón que sobresaía da porta, era unha especie de gancho metido nunha
argola, semellante a unha caravilla. Si, si, era unha caravilla. Quería preguntarlle ós seus irmáns que facer pero xa estaba máis que farto de
que lle chamasen Felipiño, tería que comezar a tomar decisións por el
mesmo. Entón esticou o brazo e desenganchouna. Co peso a fiestriña abriuse bruscamente e de pronto caeron sobre as
testas dos buscadores unha morea de pompas de xabón. Os miúdos pecharon os ollos co susto. As pequeñas burbulliñas escorregaban do
mainel e bulían en todas direccións empurradas pola lene brisa. Algunhas ían estourar sobre a pel dos cativos facéndolles cóxegas.
- ¡Que fermoso! Mirade cantas cores. - ¡E como bulen no aire!
- Si, si, moi bonito pero temos que seguir. Xa está a caer o sol. Martiño mirara un dos tres soles de Garguena meterse tralas
árbores da selva que atravesaran para chegar ata alí. Aquilo era o mellor daquel mundo. Naquela estraña terra había tres abrentes e tres poñentes.
Moitas veces os garguiáns se erguían para ver o sol saír e se volvían
deitar ata o seguinte, aínda que claro, isto só o podían facer os domingos
porque os demáis días, coma neste mundo, tiñan que traballar. - Agora méteste polo oco e turras da túa irmá cara arriba. Eu
empurrarei dende abaixo.
- ¡Ás súas ordes señor Presidente! Felipe subiu ó oco e estricou as mans para turrar de Amelia. Martiño
dende abaixo axudouna a gañar o corredor que había detrás da porta. O problema agora era subir a Martiño, quedara alá embaixo, subido na
pedra, e nin brincando era quen de chegarlle ás mans que lle ofrecían. Felipe lembrou que trouxeran unha corda, así que a quitaron da bolsa
plástica e a fixeron escorregar polo marco da fiestriña. Martiño comezou a subir mentres seus irmáns tiraban da corda para axudalo.
- ¿E ti me chamabas vacaloura? - Home, todo o día coa comida na boca.
- ¡Calade e turrade que xa estamos! O esforzo foi grande pero á fin conseguiron superar aquel atranco,
estaban todos enriba e podían continuar. Escoitaron a fiestriña pecharse ás súas costas sen que ninguén a empurrase. Comezaron a camiñar, a luz
era moi feble, tan só unhas liñas de puntiños a ambos lados da parede,
por iso aínda tardaron en caer na conta de que o piso do corredor estaba mollado e cheo de escuma.
- ¡Mira os falcatruáns! ¡Heivos dar eu andarme a luxar o piso! Unha señora viña cara eles cunha ameazante fregona nas mans,
berrando entolecida e con cara de querer comelos vivos. Os cativos tentaron fuxir pero non había outra escapatoria que tirarse do mainel
abaixo. Abriron a fiestra e calcularon a altura do salto, era demasiado para eles.
- Meus reiciños, ¿estades ben? A señora cambiou bruscamente de ton e as súas verbas soaron máis
coma un agarimo que coma unha reprimenda. De súpeto converteuse nunha velliña tan doce e mansa que semellaba que nunca se amolara na
vida. Os miúdos estrañáronse daquela transformación pero non podían máis que alegrarse.
- Estamos… e desculpe señora, non nos demos de conta de que
estaba a limpar. - ¿Qué non vos destes de conta? ¡Eu a fregar e vos malnacidos a
enlamar o limpo! A muller mudou o carácter outra vez e comezou a berrar alporizada,
os seus cabelos rizados semellaban estricarse e volverse a rizar con cada berrido, os seus ollos medraban e abríanse como querendo saltarlle da
faciana para diminuir logo ata o tamaño de dous pequenos botóns, as veas do pescozo hinchábanselle coma a manga que tiña seu pai para
regar o xardín. - ¡Ai señora, non a queriamos amolar! Sentímolo moito.
- ¡Que o sentides, que o sentides? ¡Heivos dar unha cousa que sintades de verdade!
A señora berraba con eles mentres mexía a fregona no aire tentanto baterlles con ela, pero tan lenta era que antes de acabar de dar o golpe xa
ós rapaces lles dera tempo de esquivalo. Ademáis, era tan fraca e tiña
aquel cabelo tan singular que máis parecía unha escoba que unha señora da limpeza. Tanto foi o esforzo que fixo, tanto foi o alento que gastou a
lles berrar que en seguida quedou sen folgos e tivo que sentarse no chan.
- Déixeme, déixeme a min a fregona que xa acabo eu. - Vou vella, vou vella. Toma filliña toma, pero tórcea ben que se
non non seca – a señora recobrara súbitamente a tranquilidade na fala.
- Claro, descoide que eu ben sei como hai que facelo. Por certo, ¿como se chama vostede?
- ¿Eu? Eu son a señora Catalina, son a limpadora de Garguenia, ¡a única! ¡Que bonitiña es! Se houbese máis cativiños coma ti… Eu
paso o día a limpar e non dou abasto. Pero mira, unha illa tan grande para min soa. ¿E hai alguén disposto a botarme unha
man? Non, non, só saben emporcar e emporcar. Amelia apurou a limpar. Non era que non lle caera ben a señora
Catalina, era que a xente que limpa anda sempre co mesmo conto na boca. Que se ninguén me axuda, que se soamente saben luxar. Moitas
veces se preguntara porque había que limpar se despois dun par de horas
xa estaba todo cheo de pó e todo ciscado polo chan. O que quedaba non era moito así que logo acabou.
- Xa está señora Catalina, déixolle a fregona aquí no caldeiro. Quédalle escurrida. E agora temos que irnos.
- Hai si, ide meiguiños pero deixáde os zapatos aquí. E ti pequecho, xa me din de conta que só calzas uns peúgos. Menos
mal que o chan está quente que se non ías coller unha catarreira de medo. Ata logo meus reis.
Os buscadores de estrelas non lles facía moita gracia quedar sen zapatos, quen sabe o que toparían no camiño, pero era mellor aturar a
dor de mil espiñas de cactus cravadas nos pés que provocar o anoxo daquela muller, así que deixaron mansamente os zapátos no chan.
- Señora Catalina ¿e por aquí a onde se vai? - ¡Todo o día a preguntar! ¡Moitas palabras e pouco traballo! ¡Se
non chego a estar eu esta illa ía ser unha corte de…
Máis valía correr. A señora Catalina volvía ás mesmas e parecía que collera forzas. Os miúdos foron ás presas polo corredor adiante mirando
de esguello por se a limpadora os seguía. Non, quedara alí, ó carón do mainel, pero o seu rosmar aínda se escoitaba rebotando alporizado nas
paredes do corredor. - ¡Veña, bulide! Temos que ir á esquerda, logo á esquerda,
esquerda, dereita e esquerda. - Non, non, non era así.
- Si Felipe, si que era. - Si, xa o sei, só me estaba a meter con vós – dende sempre Felipe
adoecera daquela manía de falar por falar e claro, logo tiña que saír do paso inventando unha escusa.
Os rapaces continuaron polo corredor seguindo as indicacións do caderno. Era un lugar ben estraño, estaba iluminado por unhas luciñas tan
pequenas e tan febles que en lugar de luces verdadeiras semellaban cús
de vagalume, os muros non estaban feitos de ladrillo nin de pedra senón que alguén os construíra amoreando tecidos uns enriba dos outros.
Ademáis, aboiaba no ambiente un intenso cheiro a neftalina. Cando
fixeron o último xiro á esquerda distinguiron no fondo do corredor a saída do túnel.
Chegaran a un lugar habitado, a unha especie de aldea de rúas estreitas e casas vellas, o chan estaba cheo de bosta de cabalos e vacas e
escoitábanse rinchos e cascarexos ó lonxe aínda que as rúas estaban desertas.
- ¿E agora que facemos? - Hai que ler o caderno.
- Ai si, veña Amelia le. Amelia abriu o caderno e comezou a ler.
- Se fostes quen de pasar polo corredor chegariades a Gaguépole. Desculpade que non vos falara da señora Catalina Cenlúas pero é
que non vos quería amedrentar. A muller naceu coa mala sorte de ter ese inusual carácter, pero o certo é que todo son verbas.
Só rosma e rosma pero non lle fai mal a ninguén.
- Quen o diría despois de ver como mexía a fregona. - Agora tedes que buscar entre as rúas de Gaguépole a tenda de
Ultramarinos do Chinés Cheiranmospés. Preguntádelle que cousas precisades para chegar ás estrelas e el proveerabos de todo o
necesario. En Gaguenia non existen os cartos así que teredes que comerciar cos obxetos que levades. Tede coidado porque o chinés
é un mentirán e un trampulleiro. Amelia pechou o caderno e meteuno na bolsa. Comezaron a buscar
a tenda do chinés entre as casas. Ían lendo os carteis dos negocios, a verdade era que naquel sitio a xente tiña uns nomes bastante peculiares.
Floristería de Ramón Queimafeixóns, Posto de candeas de Evaristo Deixamunmisto ou Cafetería de Benamado Descafeinado eran só
exemplos desta característica tan singular. Os nenos ían polas rúas escachando coa risa cada vez que descubrían un novo nome, tan
divertidos estaban lendo os carteis que case se esquencen de buscar a
tenda. O caso foi que se toparon con ela sen querer, foi ó virar unha esquina cando viron pendurada da parede dous faroles vermellos de papel
a ambos lados do cartel da tenda. Pensaron que o home tería que ter coidado de quitalas cando comezase a chover se non quería que se
estragasen coa auga. - Aquí é, ¿imos?
- Veña, pero hai que ter coidado, xa nos avisou Xan Guerreiro que o home é un trampón.
- Coma ti Martiño que te agochas no faiado. - Cálate formiga.
- Xa está ben, sodes coma nenos pequenos, todo o día a rifar. - Foi falar a grande señora.
Entraron na tenda enguedellados na discusión. Anque posuían unhas
personalidades moi distintas os tres tiñan un rasgo común, eran uns testarudos de coidado, sen dúbida saíran á súa nai.
- ¿Plecisaban dalgunha cousa os señoles?
Alí estaba o chinés, ou mellor dito, case que estaba. O tendeiro era tan baixiño que só se lle podía ver o chapeu mandarín, o cabelo e un
chisquiño da fronte. Os rapaces asomáronse ó mostrador para poder ver totalmente á persoa da que proviña aquela voz tan aguda. Ía vestido
cunha camisa chinesa, claro, e cuns pantalóns chineses de cor vermello e con debuxos de dragóns na tea. Levaba o cabelo enredado nunha trinca
tan longa que case lle chegaba ós nocelos. Tiña dous dentes que lle sobresaían da boca e lle daban aspecto de coello, tiña tamén os ollos
musgos e a pel de cor marela coma un limón ben maduro. - ¿Que fan aí palados coma palvuíños, é que nunca milalan un
tendeilo? - ¡Ai si desculpe! Precisabamos de algunas cousas para chegar a
tocar as estrelas. - Ui, entón van tel que complal moito. Collan un par de cestos e
veñan comigo.
Os rapaces colleron un par de cestos e seguiron ó chinés por medio dos estantes da tenda. A nena torceu o bico, había un fedor insoportable
preso do ambiente, un cheiro ós pés que tiraba para atrás, coma se aquel home tivese espallados un cento de peúgos húmidos polo chan. O tendeiro
íalles pasando obxectos mentres os rapaces se preguntaban para que contra precisarían dun paquete de panos reutilizables, un reloxio de cociña
coa forma da testa dun pato, unha escumadeira de cartón, unha saca con dúas patacas, un gancho con mango telescópico, estensible e
retropropulsable, un almanaque de hai quince anos… entón Felipe recordou a advertencia de Xan Guerreiro e caeu na conta.
- Oíde – dixo polo baixo - que o chinés nos está a engañar. Recordade o caderno.
- ¡E verdade! - ¿Que están a losmal os señoles?
- E… nada, nada. Que sinto un pouco de humidade.
- É semple así. O que vivimos en Gaguépole xa estamos acostumados. Tede isto.
E deulles un estropallo usado para que o metesen nun dos cestos. Amelia fíxolle un sinal a Felipe para que quedase atrás. Martiño viuno
tamén e comprendeu o que tiña que facer, así que se adiantou para tratar de entreter ó chinés mentres seus irmáns argallaban un plan para non
seren engañados. - Temos que pensar en algo.
- Si, ¿pero que? Nós non sabemos que cousas son precisas para chegar ás estrelas.
- Nós non pero el si. Debemos aproveitarnos diso – Amelia rañou a queixada, sempre o facía cando cavilaba concentradamente – ¡Xa
está! – entón achegou os seus beizos a orella de seu irmán e bisboulle o plan.
O chinés seguiu a darlles cousas ata que nos dous cestos xa non
cabía unha agulla. Entón parece que se deu por satisfeito porque volveu ó mostrador a facer as contas da mercancía.
- Imos vel. Unha caixiña de palafusos.
- ¡Iso non o precisamos! – Amelia deu aquela réplica tallante como se coñecera de sobra a lista das cousas que necesitarían facer o
seu camiño. - ¿Como que non? ¿E como ídes suxeital as escadas do castelo?
- ¡Dígolle que non os precisamos! - E eu digo que si, ¿é que queledes tel que dal a volta?
- Está ben, mercámola. - Pois vale – ó chinés ilumináronselle os ollos pequeniños, venderá
algo do que non ían precisar – Un alfinete pequeño. - Iso tampouco o precisamos.
- Ai, é verdade. Xa me esquencía de que quitalan do camiño o espantallo asasino.
E así foron, obxecto a obxecto, seguindo o plan da nena. Ela pensara que o chinés, se como semellaba era realmente un trampulleiro e
un mentirán, teimaría en venderlles o que non precisaban e deixaría o que
lles faría falta para despexar o camiño. Se non podían avanzar por carencia daquelas cousas terían que voltar a tenda irremediablemente. Á
fin de toda aquela teima quedaron apartados no lado das cousas necesarias o alfinete, unha cana de pescar, tres espadas, unha cenoria e o
gancho con mango estensible e retropropulsable, e no outro lado, semellante morea de trastes que ós rapaces xa lles quitaba as ganas de ir
a buscar estrelas. - E agola, ¿como me van pagal toda esta melcadolía?
- Non, iso non o queremos. Quedamos con estas cousas de aquí. - ¿Como que non… e… e o pallaso desapiadado, as selpes
sanguinalias, os demos pelvelsos? - Non se preocupe por iso. Quedamos con este monte.
- Pelo… - Nin pelo nin cabelo. Quedamos con este monte e xa está.
O chinés aínda teimou un pouco máis pero logo deuse de conta de
que lle colleran as trolas e deu o brazo a torcer. - Como queilan, pelo se non teñen algunha cousa que me intelese
non o levan. - ¿E que cousa non lle interesa? Só para non ofrecerlla sabe…
- Pois obxectos sen valol ningún coma galfos, culleles ou cousas polo estilo.
¡Que fina andivera Amelia, e que ben lle saíra o plan! Ela sabía que si lle turraba da lingua ó tendeiro, se era máis trampulleira que el,
acabaría por descubrir o que o home realmente devecía. Entón quitou os garfos e as culleres da bolsa. Ó primeiro o chinés finxiu que non lle
importaban os cubertos, pero pronto comezou a suar. É que estaban tan ben feitiños, tiñan aquela forma tan perfecta e brillaban tanto de limpos
que os trouxeran que non puido máis e se abalanzou sobre eles coma se estivesen mesmo feitos de ouro.
- ¡Galfos, culleles! ¡Ai meus galfiños, miñas culleliñas!
- Semella que o trato xa está feito. Collamos as cousas e lisquemos.
Colleron as cousas e saíron da tenda sen despedirse do home, de
tódalas formas estaba tan distraído aloumiñando ás culleres e o garfos, arrolándoos baixiño, abalándoos no peito que nin os escoitaría.
- Xa temos as cousas. Moi ben Amelia, a min non se me ocurriría xamais semellante idea.
Amelia quedou abraiada, Martiño recoñecéndolle algo, aquilo era novo, tería que acostumarse. Quixo darlle as grazas pero á fin soamente
dixo. - Temos que ler o caderno e bulir cara ás estrelas. O segundo sol
xa comeza a poñerse. Seus irmáns ollaron ó ceo. Era verdade, o segundo sol de Gaguenia
xa comezaba a trocar de cor e a perderse por riba das copas das árbores lonxanas. Amelia leu as seguintes instruccións.
- Tedes que saír da vila pola rúa do Capagatos que vai dar directamente ó río Quetemollo. Cando cheguedes á beira das
augas virade á dereita e seguide ata a ponte Aquenón. Cruzadea
e seguide todo recto, non vos desviedes. Tedes que camiñar contando os chuchameles do valado dereito. Cando cheguedes a
trinta e tres parade e ollade cara á esquerda, debaixo da Árbore do Saber hai un pozo, chámanlle o Pozo Resabido pero hai que
ter coidado con el porque é moi celoso do que sabe e, para que a xente non chegue a saber máis que el, di as cousas do revés.
Preguntádelle que hai que facer para chegar á Cova de Nonvexonada.
Os miúdos cruzaron a vila e a ponte e seguiron polo camiño sen desviarse. Foron contando os chuchameles preguntándose como era que
Xan Guerreiro sabía que eran exactamente trinta e tres. A única explicación que toparon era que as plantas en Garguenia non nacían nen
morrían, porque plásticas non eran. - Eu quero chuchar nun – dixo Martiño.
- Non podes, se fas iso o seguinte que veña a buscar unha estrela
hase trabucar. - Pois cambiamos o caderno e xa está, seguro que Xan Guerreiro
tamén probou un. - Mira que es testán, eu non o faría, quen sabe se son velenosos
pero á fin has facer o que te pete, ¡como sempre! - ¡Exacto!
Estaba claro que Martiño non ía facer caso dos consellos da súa irmá, ademáis gustáballe facela rabiar así que foi dereitiño cara ó primeiro
chuchamel que topou mirando para a nena cun sorriso malicioso nos beizos.
- ¡Pero que demo…! O chuchamel, ó sentir o contacto dos dedos do cativo, encolleuse e
metéuse na terra escondéndose da gadoupa daquel hervíboro. - ¿Víchedes? ¡Metéuse na terra!
- Agora xa sabemos porque sabía Xan Guerreiro cantos
chuchameles había que contar. Os cativos abraiáronse do suceso e comentaron que se as árbores
fixesen o mesmo na terra non existirían os graves problemas de
deforestación que estaba a sufrir o medio ambiente. Logo continuaron o camiño, soamente levaban contados unha ducia de chuchameles e aínda
lles quedaban bastantes por topar. Seguirían lixeiros facendo a ruta se non fose porque a Martiño se lle
deu por ollar atrás, o chuchamel comezaba a saír da terra amodo. Entón botou a correr cara a pranta, deu un salto e se abatiu sobre ela. Non lle
deu tempo de a agarrar. O chuchamel encolleuse rápidamente e Martiño só conseguiu lixar os pantalóns de terra. Pero agora xa sabía que os
chuchameles volvían saír e ó cativo metéuselle entre os cornos que el non marchaba sen probar un daqueles chuchameles tan apetitosos.
Seguiron camiñando pero agora tiñan que parar cando topaban un novo chuchamel para que o mangallón de Martiño tratase de atrapalo.
Non había forma e mira que probou de tódalas maneiras. Acubillose no muro e foi amodiño arrastrando o ventre coma un gato, tiroulles pedras,
probou coa espada, achegouse de costas, foi asubiando, facendo o
somnámbulo… ¡non conseguía nada! Os chuchameles semellaban saber as intencións daquel mangallón e se estaban a rir del.
- ¿Por que non probas a pedirllo por favor? - ¿Como por favor? Non se fala coas plantas, eu non lle vexo
orellas. Pero Martiño quedou pensando naquilo. O caso era que xa o probara
todo e levaban contados trinta e un chuchameles. Aínda que lle daba un aquel facer o que lle mandaba a súa irma, a súa obsesión coas plantiñas
marelas era tan grande que lle gañou a guerra ó seu orgullo. Ademáis, non perdía nada por probar así que se achegou ó chuchamel forzando a
tose para aclarar a voz. - Señor chuchamel, desculpe a molestia pero é que é vostede tan
ben feitiño que me entran as ganas de probar o seu sabor. ¿Sería tan amable de deixarme probar un pouco? Só un cachiño e xa o
deixo tranquilo.
O chuchamel non respondeu. Martiño sentiuse parvo entón, ¿como ía responder se era unha planta? Non quixo mirar atrás para non
comprobar se os seus irmáns se estaban a rir del. Se era así xa estaba a liorta montada. Íase erguer para dar a volta pero pensou que xa que
estaba alí axeonllado ben podería probar a ver se o apañaba. Esticou o brazo amodiño e foi lentamente pechando a man. Semellaba que o
chuchamel se ía deixar coller pero nada máis rozalo se meteu na terra. ¡Coma sempre! Aínda que había unha diferencia, desta vez deixara un dos
seus petaliños enriba da herba. Era como si o chuchamel atenderá á educación do cativo recompensándoa con aquel anaquiño do deu ser.
- ¡Teño un pétalo, teño un pétalo! - Pensa ben se queres…
Felipe quixo dicir comelo pero antes de acabar a frase xa Martiño puxera o pétalo debaixo da lingua.
- ¡Demo, que rico! ¡E o mellor que probara nunca!
- E agora, ¿xa estás contento? Veña, que se fai tarde. Continuaron a ruta en silencio, metidos cada un nos seus propios
pensamentos mentres contaban as florciñas dos chuchameles. Cando
chegaron ó número trinta e tres, ollaron á esquerda e viron, no medio dun prado verde coma unha esmeralda, a fermosa Árbore do Saber. Era unha
árbore inmensa e semellaba moi vella, pero o que realmente chamaba a atención eran as súas follas. Non eran unhas follas verdes correntes senón
que eran de papel, aínda non o podían distinguir con claridade pero supuñan que nelas estaba escrito todo o saber das xentes de Gaguenia,
de aí o seu nome. - ¡Que fermoso!
- ¡Xamáis imaxinei que fose así! - ¡Io, io, ioooo!
Os cativos miraron a Martiño. ¡Ese cativo non cambiaría nunca! Xa estaba outra vez a trebellar, agora déralle por imitar o falar dos burros.
- ¿A que ven iso? - ¡Io, io, ioooo!
- Deixa de facer o parvo que xa nos fixestes facer demasiado o
tempo. - ¡io, io, iooo!
- ¡Xa está ben, se non paras marchamos sen ti a procurar as estrelas!
Na vista de que Martiño non se podía comunicar cos seus irmámns coas verbas, non lle quedou máis remedio que escribir cun pauciño no
chan o que quería dicir. “Non podo evitalo, creo foi o chuchamel o que me fixo isto”.
- ¡Estate ben por testán! - Pero… Martiño, ¡estate a medrar o nariz!
¿Nariz? Aquilo non era un nariz, era o fociño dun burro. E aquelas orellas, e aquel pelame, e aquelas patas con cascos. Martiño estábase a
transformar nun burro sen que puidese facer nada por evitalo, aquilo era de certo un castigo á súa testanería. O cativo quixo chorar pero non podía
porque os burros non choran… ¿ou si? Unhas bagoíñas pequenas e
brillantes comezaron a manar dos seus ollos. Polo menos aquel burro si choraba. Tivo que apoiar as patas dianteiras no chan porque xa non era
quen de manterse en pé soamente coas traseiras e, aínda por riba, non podía suxeitar o pau para escribir na terra.
- Tranquilo, tranquilo – os irmáns aloumiñábanlle a caluga mentres trataban de animalo – Xa verás como todo se arranxa.
Aquelas caricias pareceron animar un pouco ó burriño Martiño que deixou de chorar e non tivo máis remedio que facerse á idea de que xa
non era máis un neno. O carácter de Martiño era tan voluble que logo comezou a camiñar, máis ben trotar, cara a Árbore do saber, os seus
irmáns estrañoulles aquel cambio, pola forma de se mover semellaba que fora asno toda a vida, así ía de contento e resolto.
Como supuñan as follas da árbore estaban escritas. Leron unhas cantas pero a maioría non as comprenderon, estaban escritas en línguas
estranxeiras ou contiñan números e fórmulas inintelixibles. Unha das
follas caeu da árbore e foi meterse na boca do pozo, agora comprenderon porque era tan Resabido. Os cativos asomáronse ó pozo e viron o seu
reflexo na auga profunda. O burriño quixo chorar outra vez ó ver o seu
novo aspecto pero, mirándoo por outro lado, era un asno bastante aposto.
- ¡Señor Pozo Resabido, eu invoco á túa sabedoría para que guíe as nosas dudas pola senda da iluminación!
- ?rebas sedereuq euQ¿ sairel ed sovedáxieD – contestou o pozo. - ¿Que foi o que dixo?
- ¡Io, io, ioooo! – que significa nin idea na linguaxe dos burros. - É que fala do revés. Hai que coller papel e lapis e apuntar.
Quitaron o lápis da bolsa e buscaron unha folla en branco no caderno.
- ¡Oh, sabio pozo! ¿Poderías repetir as túas verbas de verdade e sabidoría?
O pozo repetiu e os cativos apuntaron. Cando descifraron a mensaxe a Amelia tinguíuronselle as moulas coa vergoña. Logo de aquilo xa sabían
a forma de proceder para entender ó pozo así que foron preguntando e
apuntando ás presas. Non era sinxelo escribir aquela linguaxe. - ¿Cómo se vai á Cova de Nonvexonada?
- .odni esiaV Aquilo non ía ser doado.
- Si pero… ¿hai alguna forma de chegar sen ter que buscar todo o día?
- .iaH - ¿E cal esa forma?
- .adartne a ata áravel sov e ri oedáxieD. oñicof od etnaid aironec ahnu ellreñop e orrub on edatnoM
- Moitas grazas señor pozo. Outra pregunta, ¿Qué hai que facer para que Martiño deixe de ser un burro?
- .adiv a adot res ah orrub orep ,opmet oc asap otcepsa O - ¡Io, io, iooo! – que quere dicir, boute mexar nas paredes.
- A última pregunta señor pozo – dixo Felipe que comprendera o
verdadeiro potencial daquel pozo de sabidoría - ¿Onde esconde a miña nai o chocolate?
- !oriepral ,ale a ollatnúgerp osI¡ - Grazas oh señor pozo da sabidoría e do…
- !mehe mehE! – o pozo tusiu para interrumpir aquel discurso de agradecimento – !sodirrubA! rel sedaxied em non euq zev ahnud
sedahcram es rev A De certo que había seres estraños en Gaguenia, estraños e bastante
maleducados. Aínda que Amelia se anoxara un pouco decidiu que non pagaba a pena quedarse a rifar co resabido do pozo e montou no burro.
Felipe tamén montou. - ¡Io, io, iooo! – que quere dicir; isto non llo digades a ninguén.
Ataron a cenoria na punta da tanza da caña de pescar e puxéronlla diante do fociño ó asno. O animal botou a trotar atraído polo cheiriño doce
da cenoria mentres os xinetes se divertían achegándolle o vexetal a boca
e afastándoo cando a abría para tratar de comelo. Estaban tan entretidos con aquel xogo que case que non se deron
de conta de que xa chegaran á boca da Cova de Nonvexonada. Os
Gaguenios embeleceran a entrada da cova construíndo un fermoso arco ó seu redor. No pilar da esquerda había un papel suxeitado con fita
adhesiva, semellaba un cartel ou un aviso, os cativos achegáronse para ler. “Suministro de luz cortado por non pagar os recibos. Máis nada”.
Aínda así, antes de meterse na escuridade da espenuca premeron a chave da luz. Por se acaso.
Xusto estaban os dous xinetes a piques de desmontar do burro para entrar na cova cando escoitaron un pequeno estourido, coma o son que
fan as rollas das garrafas de champán cando saen disparadas polos aires. El logo sentíronse caer ó chan envoltos nunha nube branca.
- ¡Ai, ai, ai! ¡Saíde das miñas costas agora mesmo! Martiño sufrira unha súbita metamorfose e transformárase outra vez
nun neno. Os seus irmáns se alegraron de que volvese ó seu estado orixinal e Martiño tamén, aínda que interiormente xa se acostumara á súa
équida existencia e comezara a maxinar as facianas dos mestres cando
chegase ó día seguinte á escola e sentase na cadeira. Ademáis, non lle importaría que o reprendesen por facer mal as tarefas porque burro xa
era. O caso era que todo aquilo pasara, volvera ser un cativo normal,
entón non pagaba a pena seguir a pensar no asunto. Quedoulle mágoa de non atopar un par de pétalos máis de chuchamel pero xa estaba, non
podían perder máis tempo volvendo ata os valados. Os cativos entraron na cova, nada máis dar uns pasos quedaron totalmente ás escuras.
Acenderon a lanterna. - Dentro da Cova de Nonvexonada – comezou a ler Amelia – non
se mira un burro a catro pasos. - Moi simpático este Xan Guerreiro, para que escacho coa risa –
dixo Martiño que cando lle daba á retranca formaba un ese cos beizos - Ha ha, que ben o pasamos. Xa está, xa podes seguir.
- Tedes que chegar ata o fondo da cova e topar a Fervenza de
Vaitelavar. Xusto no lugar onde cae o chorro hai unha caixa metálica. Abrídea e collede o que hai dentro.
- ¿Iso é todo? - É.
- Imos entón. E foron, camiñando amodo e en ringleira, seguindo o cono de luz da
lanterna e tratando de non dar croques coas estalactitas ou estalagmitas, non sei, nunca me lembro de como lle chaman ás que saen do teito. O
caso foi que chegaron ata a fin da caverna pero alí non había rastro ningún de fervenza nen son que delatase a presencia de auga perto.
- Aquí non hai fervenza ningunha. - Igual secou coa calor.
- Pode ser, o caso é que sen a fervenza non podemos saber tampouco onde está a caixa. ¿Que imos facer?
- Pois se non hai auga temos que buscar algún indicio que nos diga
onde a houbo no pasado, algo así como as rochas erosionadas ou unha cantidade grande de verdello, ou un…
- ¡Ollade, aquí temos a fervenza!
Mentres os seus irmáns andaban a perder o tempo discutindo a forma de proceder Felipe topara a fervenza perdida, ou máis ben a forma
de facer que a fervenza volvese correr pola Cova de Nonvexonada. O cativo fora alumeando coa lanterna nas pedras das paredes e dera con
outro cartel no que se podía ler; “Fervenza de Vaitelavar. Quen queira ver a fervenza que abra a billa e que a peche logo ¡que hai que aforrar auga!”.
- Dende logo, si que é un lugar bastante peculiar esta Garguenia. Deixemos correr a auga.
A uns pasos de onde estaba a billa o cano cuspiu tres veces auga mesturada con aire antes de que o chorro saíse firme. Moi bonita a
fervenza non era pero cando menos o chorro indicaba o lugar onde debería estar a caixa. A auga caía nunha especie de cunco pero saía tan
enferruxada que non se podía ver o fondo, de certo que estaban a aforrar auga, xa debería haber semanas que ninguén abría aquela billa. A Amelia
deulle un poco de noxo tocar aquela auga pero alguén tiña que facelo, así
que meteu a man e comezou a palpar na procura da caixa. Sentiu aque algo lle rozaba os dedos, era algo que se mexía e parecía ter moitas
patas. Asustouse. - ¡Ai, aí adentro hai un polbo!
- ¿Que dis, como vai haber un polbo? - Mete a man se non me cres.
Claro que Felipe non a cría pero máis vale aturar que te colen unha trola a que te metan unha mordedela.
- Si, si que hai un polbo, e logo ¿non lle vin eu as patas saíndo da auga? – outra vez Felipe escorría o vulto como mal podía.
- Vaia uns aventureiros que estades feitos – dixo o burriño, ou perdón, o Martiño.
O maior dos irmáns meteu a man ata o fondo e remexeu. A el non lle daba noxo ningún, a dicir verdade, se lle dixese a algún coñecido que
se ía transformar nun animal todos pensarían que sería nun porco, tal era
o seu gusto por revolcarse por todos lados. Algo lle rozou a man tamén pero lonxe de asustarse deu a volta á palma e agarrou ó perigoso
cefalópodo dunha pata. - Aquí tes o polbo asasino.
Era unha luva plástica. Tirouna ó chan mentres seus irmáns loitaban porque o rubor non lle cubrise as meixelas. Volveu meter a man e a
remexer. Quitou unhas botas de chuvia todas enlamadas e uns pantalóns de andar na horta. Sentíase feliz só de meter as mans naquelas eslavas
de roupa e, de paso, manchar a camisa. Entón topou cun obxecto contundente. Aquí está, pensou. Turrou del e sacouno da auga. Era unha
caixiña prateada con debuxos de aves na tampa, unha desas caixas metálicas onde veñen as pastas danesas.
- ¡Ábrea veña, imos ver que hai dentro!
Abriuna. Dentro había unha chave grande e enferruxada, aínda que
máis semellaban unhas tenaces que unha chave. O obxecto levaba unha nota enredada e atada cun fío. Custoulle desfacer o nudo, como non podía
coas mans meteulle os dentes e acabou por cortar a fibra. Desenrolou a
nota e tratou de ler. - Chave da Po… ¡achega a lanterna que non vexo!
- Toupeira – rosmou Felipe. - Chave da Porta do Ceo. Nota: non darlla ó diaño que é capaz de
queimalo todo. Xa o tiñan, xa podían saír de alí. Non é que aquela cova estivese
mal, era quentiña e todo iso, o que pasa é que había un cheiro a lixivia que tiraba para atrás. Os miúdos pensaron que a señora Catalina Cenlúas
andivera por alí a limpar pero logo o descartaron porque se aquela muller mirase o estado do cunco era capaz de matar a alguén. Os cativos saíron
da cova e consultaron o caderno de instruccións. - Se xa tedes a chaviña…
- ¿A chaviña? ¡Se cunha chave así o avó pechaba a porta do muíño!
- ¡Cala home! Se xa tedes a chaviña avanzade vinte pasos cara
adiante. O cativos avanzaron vinte pasos cara adiante.
- Logo dez pasos á dereita. Dez pasos a dereita.
- Tres pasos atrás. Tres pasos atrás.
- Doce pasos á esquerda. Doce pasos á esquerda.
- Dezasete pasos atrás. Dezasete pasos atrás.
- E por fin, dous pasos á dereita. Dous pasos á dereita.
Chegaron a unha nova caverna, a Felipe deulle a impresión de que xa coñecía aquel lugar pero non dixo nada, non quería atrasar a procura
das estrelas.
- Entrade na Cova de Quenandaí e situádevos xusto no medio da cúpula.
Os miúdos entraron na cova facendo comentarios sobre o servicio de limpeza de Gaguepole. E non era de estrañar, naquel lugar tamén había
un forte cheiro á lixivia. - Comprobade que no medio da cúpula hai unha argola. Usade o
gancho con mango telescópico, estensible e retropropulsable para turrar dela. ¡Ai, esquencíame, coidado co dragón Cacacán!
- ¿Dragón, que dragón? De súpeto soou un infernal berrido as súas costas. Os buscadores
deron a volta e quedaron arrepiados. A lene luz da lanterna enfocaba unha faciana de reptil pavorosa, unhas meniñas verticais coma as dunha serpe,
unha enorme boca da que saía e entraba unha lingua bífida. O dragón era enorme, tiña o corpo recuberto de escamas e unha liña de cornos que se
marcaban ameazantes dende a testa ata a estarrecente cola que
remataba na punta cun velenoso e afiado dardo. O dragón abriu a boca e puideron ver uns dentes afiados coma espadas e unha garganta profunda
coma o inferno.
- ¡Coidado vai cuspir unha laparada de lume! O aspecto infernal do dragón deixara xeados ós miúdos. Xa non
había tempo de fuxir, todo estaba perdido, así que se abrazaron entre eles, pecharon os ollos e se resignaron á súa mala sorte. O dragón cuspiu
o seu lume inclemente. - ¡Fffffffffffffff!
Os nenos abriron os ollos e apalpáronse os corpos. As meixelas estaban ben, o cabelo non estaba queimado, a roupa non ardía. O dragón
respirou tranquilo, menos mal que os cativos tiñan os ollos pechados cando soltou aquela súa infernal bafarada da que el mesmo sentía
vergoña. El quería soltar unha laparada apocalíptica que queimase a cova enteira, a cidade enteira, Gaguenia enteira, pero o que lle saíu pola boca
realmente foi unha chamiña humilde e pequeniña, coma se prendese un mistiño dunha caixa desas de medio euro. Un cativo rubor vermello
tinguiulle as moulas.
- É que que que non tirei a dar. - ¡Aaaa, foi iso!
O dragón mudoulle a mirada outra vez e abriu a boca para emitir un ruxido bronco e prolongado, arrepiante. Esticou as ás e mexeunas para
tomar altura. Os miúdos fixeron forza para que o forte vento que producía o voo do dragón non os desprazase cara atrás. O dragón comezou a dar
voltas sobre as súas testas. - ¡Temos que liscar de aquí!
- ¡Non, se liscamos non poderemos chegar ás estrelas! - ¡Esquéncete das estrelas!
Se aínda tiveran unha oportunidade de escapar perdérana falando porque o dragón xa se abalanzaba sobre eles e foi prender a Martiño e a
Amelia entre as súas gadoupas. Felipe colleuno da cola pero o saurio conseguiu zafarse e marchou pola abertura do teito levando ós dous
miúdos con el.
- ¡Volve cobarde! ¡Deixa tranquilos ós meus irmáns! Aqueles berridos desesperados de Felipe eran xa cousa inútil. O
dragón perdeuse de vista na abertura do teito. ¿Que sería agora dos desgraciados dos cativos? ¡Ía comelos! Setiu medo, aínda que o dragón
voltase era demasiado fero para el, xamais podería liberar os seu irmáns porque el era febliño coma unha herba, o dragón só tería que mover unha
unlla para acabar con el. Soubo que era imposible porque el era cobarde, sentíuse impotente. Humedecéronselle os ollos, as bágoas empurraban
con forza, querían saír pero o cativo non as deixou. - ¡Non! Teño que salvalos, teño que os axudar. ¡Eu non quero ser
máis Felipiño! Estaba decicido anque o intento lle custara a vida, todo era unha
cuestión de atrevemento e actitude. Subiu enriba dunha pedra e encheu o peito. Semellaba un cabaleiro da apocalipse, o executor do dragón, o
azoute do mal, se naquel momento tivese vestida unha capa ondearía no
vento para facer aínda máis temible a súa impoñente figura. Cando ollou a altura á que estaba a abertura por onde fuxira o dragón esvaeceuse a
fantasía e retornou á realidade. Como ía chegar ata a abertura do teito se
estaba alí no alto, tan lonxana. El era un cativiño miúdo e aquela distancia era demasiado grande como para chegar sequera a rozala. Esticou o
gancho con mango telescópico, estensible e retropropulsable pero nin co o aparato se aproximaba a argola que baixaría a escada, colleu carreira e
brincou. ¡Nada! ¡Imposible! Entón recordou as verbas máxicas que os trouxeran a aquela terra.
- ¡Nada é imposible… nada é imposible…! Recitou aquelas verbas unha ducia de veces e de pronto sentiuse
lixeiro coma unha pena, veloz coma un leopardo, áxil coma un… non sei, áxil. Atou a bolsa co material no cinto e colleu carreira para chimpar ó
buraco do teito. Desta non podía errar, tiña que dar un salto ben grande, cubrir aquela distancia dunha soa vez non era doado pero, xa se sabe,
imposible non é nada. A verdade foi que con aquel humilde choutiño que deu non chegou nin a metade da distancia, pero cando se dispuña a
preparar o corpo para amortuxar a caída aconteceu algo inusual. Felipe
non descendía, quedou alí suspenso no ar coma unha aguia. Sentía unha presión na cintura pero aquilo se debía sen dúbida a enerxía que estaba a
usar para manterse aboiando no aire. O cativo mirou para abaixo e tivo un pouco de vertixe, sen embargo, lonxe de ennervarse e pórse a tremer,
botoulle valor ó asunto e tratou de buscar o xeito de chegar ó buraco. Mexeu os brazos arriba e abaixo coma un paxaro, pensaba que así podería
impulsarse movendo o aire que quedaba embaixo das súas palmas. Aquilo non funcionaba. Logo pensou que quizáis o aire en Gaguenia funcionase
de igual maneira que o auga na terra, así que imitou os movimentos dun sapo. Movía o brazos en dirección o buraco tratando de desprazar o
volumen do aire mentres se daba impulso coas pernas. Tampouco funcionaba pero Felipe estivo aínda facendo aqueles movimentos un bo
rato, era divertido e como ninguén o miraba tampouco lle daba vergoña. - ¿Que demo estás a facer?
- ¿Eu...? ¡Nada!
- Así non conseguirás chegar a ningures. - Pero… ¿quen está a falar?
- Eu, ¿quen vai ser? - ¿Onde está?
- Diante da túa vista, ¡toupeira! Felipe alumeou coa lanterna cara o lugar de onde lle viña aquela
voz, puxo atención ó panorama cavernícola que tiña diante pero non mirou máis que sombras.
- ¿Quen é, o home invisible? - ¿O home invisible, pero ti aínda cres nos reis magos? Son o que
te está a coller do cinto para evitar que te partas unha perna. ¿É que non ves o alto que estás?
- Claro que o vexo, cheguei ata aquí dun só chimpo ¿sabe? – contestou Felipe fachendoso.
- Si, xa o vin. Iso é o que tedes os cativos de hoxe en día, que só
mirades cara arriba e non tedes en conta que o perigo está embaixo.
- Xa estamos co sermón de sempre. Pero dígame, ¿se non é
vostede o home invisible quen é? Porque por máis que forzo a vista non o vexo.
Entón comezou a desplazarse cara a unha das paredes da espenuca. Aínda que non distinguía nada o home aquel debería ter as pernas ben
longas porque sentía o son das pasadas e o desprazamento era enorme entre cada unha. Como non vía a quen o agarraba do cinto, ó cativo
deulle a impresión de estar voando así que pechou o puño e esticou o brazo cara adiante, coma se fose un superheroe.
- ¡Deixa de facer o parvo! - Ai si desculpe, é que me emociono ¿sabe?
O home chegou perto da parede da cova, abriu unha portiña e empurrou unha pequena panca. De súpeto a caverna iluminouse. O miúdo
ollou en derredor, aquel lugar tampouco estaba tan mal, pensou que cunha boa limpeza e un pouco de pintura aínda había ser unha cova
bastante confortable. Entón virou a faciana cara ó lugar do cinto por onde
se supuña que o home o tiña collido. ¡Que estraño! Alí non había man ningunha, tiña que ser o home invisible, ¿quen senón? Pero como xa llo
preguntara anteriormente a Felipe deulle un pouco de vergoña volver a facelo. De súpeto distinguiu algo, era unha especie de pau finiño ou unha
cana de palla que ascendía dende o cinto, pasaba por riba da súa testa e acababa por xuntarse noutro pau que ascendia verticalmente ata un par
de ollos que o estaban a mirar con severidade. - ¡Ai, xa o vexo!
- Pois non era sen tempo. Hai que subir os chumbos senón non hai electricidade na cova.
- É que como limos o aviso da entrada… - Xa, esas son cousas do alcalde que non quere que lle gasten a
luz, nin que a pagara el. - ¿E vostede como se chama?
- ¿Eu? Chámome Uxío, Uxío Feitodunfío.
- ¡Ai que nome máis bonito! – en realidade a Felipe déronlle gañas de escachar coa risa, o nome víñalle que nin pintado pero
conseguiu reprimirse - ¿e a que se dedica señor Feitodunfío? - Eh… fago cousas… xa sabes, un traballo aquí outro alá. O certo é
que son labouras temporais mentres adestro para cumplir o meu soño.
- ¿Seu soño? - Si, meu soño, quero ser loitador de sumo. E ti que fas aquí, os
cativos non deberían andar sós nesta cova. Hai un dragón… - ¡Xa o sei, non me fale! Non vin só, cheguei ata aquí cos meus
irmáns, estabamos a percorrer a ruta que chega ás estrelas pero entón veu o dragón e levounos con el – Felipe sentiu que xa
perderá tempo bastante a falar con aquel home, quen sabe se os
seus irmáns seguirían con vida - ¡Teño que irme, teño que
salvalos! - Ui, mala cousa, se os apañou o dragón Cacacán xa os podes dar
por perdidos – o señor Uxío levábao cara o buraco do teito
mentres falaba – De tódalas formas date présa, nunca se sabe. Ascende polo buraco ata chegar á saída e logo busca o niño do
dragón. Está enriba dunha columna de pedra. ¡Ah, e ten cuidado cos gardas!
Elevouno ata a argola da escada e deixouno alí. Aínda que o señor Uxío era un home estraño dabondo a Felipe non lle fixera máis que ben,
así que se despediu del con certa tristura. - ¡Adeus señor Uxío, que teña boa sorte cos seus soños!
¡Sempre ten sorte quen os persigue! Foi o último que escoitou antes de subir a toda présa pola escada arriba. Subiu, subiu e subiu. A suor
escorregáballe pola cara e se lle metía nos ollos. Aquela escada semellaba non ter fin pero el continuou teimudo desterrando o desánimo do seu
pensamento, os seus irmáns estaban en perigo e só el os podería salvar das fauces carniceiras do temible dragón Cacacán. Distinguiu a
esperanzadora boca do buraco alí no alto. Era só un puntiño de luz pero
logo o cativo gañou ánimos porque a cada paso que daba o puntiño se ía facendo máis e máis grande. Soamente cando chegou ó último chanzo se
permitiu parar uns intres para recuperar un pouco os folgos e ver, con certa tranquilidade, aquel panorama que se abría no final do túnel.
Chegara a unha chaira quente e reseca, unha especie de deserto con pedras da cor da area e cactos cheos de pinchos. Tivo a seguridade de
que naquel lugar a chuvia era un fenómeno bastante inusual. Ollou quedamente o horizonte para ver se descubría o niño do dragón. Alá lonxe
no fondo viu unha pedra alta e fina, unha especie de columna natural a que o vento lle fora dando aquela veleidosa forma. Non se vía ningún
outro lugar elevado, por tanto supuso que era alí onde o dragón tiña a súa gorida. Botou a andar ollando o ceo. Se fose mediodía aquel había ser un
lugar inclemente para o viaxeiro pero como xa estaba a anoitecer a calor era soportable. ¡Estaba a anoitecer! O terceiro sol de Gaguenia xa estaba
a caer sobre os montes que rodeaban o deserto. Tiña que andar lixeiro se
non quería que a escuridade cubrise o lugar e perdese de vista a torre do dragón.
Aínda que a calor non era abafante atravesar aquela chaira non foi traballo doado. No chan había milleiros de pedras dispersas aquí e acolá
que fixeron que Felipe caese máis dunha vez magoando os xeonllos e rozando os pantalóns. O cativo sabía que súa nai habíase anoxar con el
por escangallar a roupa pero aquel era un problema secundario, o importante era axudar ós seus irmáns, só tiña esta idea na testa así que
continuou mentres a noite se ía pechando sobre Gaguenia. Menos mal que apurara e podía distinguir na escuridade os fachos
prendidos da torre do dragón. Achegouse a modo para non facer barullo, na entrada había dous gardas que lle impedían pasar libremente. Tiña que
pensar nalgo, tiña que trazar un plan. O miúdo tomou uns intres para pensar, sentou sobre unha pedra e ollou ó ceo. Quedou abraiado, ademáis
dos millons de estrelas, das fermosas constelacións, das galaxias
refulxentes, ademáis diso había unha manchea de lúas espalladas na cúpula do ceo. Había lúas cheas, en cuarto menguante, en cuarto
crecente, había lúas en parellas, en triángulo, en cadrado, había lúas
formando un círculo, semellante a un colar de pérolas mentres outras se amoreaban formando un belísimo acio. ¡Que fermosura!
Pero fermoso ou non o tempo se esgotaba. Mentres ollaba o espectáculo das lúas fora argallando un plan para conseguir traspasar a
celosa protección dos sentinelas. Achegouse decidido ó portón da entrada da torre.
- Boas noites. - Boas noites
O cativo finxiu non darse de conta de que aqueles homes eran os gardas e tratou de entrar sen dar explicación algunha. Os vixilantes
cortáronlle o paso xuntando a súas machadas en forma de cruz diante da porta.
- ¿A onde cre que vai vostede? - ¿Eu? Pois adentro – dixo Felipe facendo un pouco o parvo.
- ¿E a santo de que ten que ir vostede adentro?
- E que teño unha entrevista co señor dragón Cacacán. - ¿Unha entrevista?
- Si, de traballo. - Ai, pois ninguén nos avisou.
- Ese, meu amigo, non é o meu problema. - Se quere ter un problema non hai inconveniente ningún – dixo un
dos gardas, con bastante chulería por certo. - ¿E que posto se ofrece na entrevista? Igual me apunto eu. A
verdade é que xa estou aburrido de estar aquí parado coma unha pedra.
- Pois aquí o teño anotado, un momento – Felipe quitou o caderno e finxiu que lía – Esta tarde, cando caia o sol, convocarase o
proceso de selección na torre do dragón para o posto de Inspector das probas para cortarlles o pescozo os gardas – os
gardas tragaron cuspe, Felipe continuou – as funcións a
desenrolar son; xulgamento dos gardas, afiado dos gumes, premedor do botón que fai baixar a coitela.
Mentres Felipe ía inventando todas aquelas función os sentinelas ían desfacendo ós poucos a cruz que impedía a entrada. As machadas íanse
separando como a cámara lenta mentres os gardas miraban de esguello un cara ó outro, cos ollos ben abertos e a fronte empapada en suor. Non
sei con seguridade porque actuaron así, pero semellaba que ós vixilantes lles houbese gustado non estar de turno aquela noite.
- Pase, pase. Non teña medo. Suba esa escada de aí, non hai perda.
- Que teña moita sorte na entrevista. - Si, moita sorte, e non se esqueza que aquí somos todos
compañeiros - Moitas grazas. ¿Entón pola escada todo seguido, non é?
- Si, si, non hai perda querido compañeiro.
- Por certo, ¿como se chaman vostedes? - ¿Nós? Pois… pois… eu son Pano e este é Pam.
- Á súa disposición para o que precise.
- Moi ben – Felipe finxiu que apuntaba no caderno – Señor Pam e señor Pano. Tereino en conta. Boas noites.
- ¡Boas noites señor! – Os gardas Pam e Pano puxéronse firmes para despidir a Felipe ó xeito militar.
O seu plan funcionara á perfección, custaba crelo cando o pensou pero fora así, aqueles dous gardas colleran medo, era comprensible, a
ninguén lle gusta ver a súa cabeza metida nun cesto. Felipe comezou a subir pola grande escada de pedra que levaba ó cumio da torre. Os
chanzos eran moitos pero ía avanzando rápidamente. De súpeto parou, escoitábase un laio, era como se alguén estivese a xemer coa dor. ¿Sería
un dos seus irmáns? Pensou que se eles, que eran maiores, estaban a padecer as maldades do dragón, se non eran capaces de lle facer fronte,
de nada serviría que intervise. ¿Que podería el facer? El que era pequeniño coma un botón, cativiño coma unha formiga. A piques estivo de
crer nesta escusa e de recuar, e o faría se non fose porque a imaxe do
Martiño asomou no seu pensamento. A faciana do seu irmán maior aparecía na súa imaxinación ampliada, como reflectida nun espello
convexo, e o miraba con ollos severos mentres o seu dedo índice o sinalaba e a súa boca lle falaba cunha voz esaxeradamente grave,
marcando lentamente aquelas condenadas catro sílabas; ¡FE – LI – PI –ÑO!
¡Non, el non era máis Felipiño! El era un home, ou máis ben un proxecto dun home, non o sabía moi ben, pero o que con certeza sabía
era que aquela tarde el deixara de ser un neno, ¡el xa non era un coitadiño! Colleu tanta carraxe que non puido aturar máis a súa testa,
amarrou fortemente unha das espadas e foi correndo, subindo os chanzos de tres en tres mentres berraba, ¡eu son Felipe, eu son Felipe! De seguida
chegou á estancia do dragón, a porta estaba pechada, meteulle tal couce que a piques estivo de tremer o mundo enteiro con semellante violencia.
Entrou na estancia acompañado do descomunal estrondo que emitiu a
porta ó bater contra a parede. - ¿Pero que fas toleirán?
- ¿Que queres, botar o marco abaixo? - Este cativo algo ten na testa que non vai ben.
Felipe quedou avergoñado e un pouco anoxado tamén. Vale que igual se emocianara un pouco e que se pasara batendo na porta, pero de
alí a chamarlle tolo… Sen embargo decidiu non contestar, sobre todo porque aquilo que atopou dentro da estancia do dragón no o esperaba. Os
seus irmáns estaban ben, quen semellaba non estar ben era o dragón Cacacán, o pobriño caíanlle as bágoas polas espiñosas moufas e tiña a
testa apoiada no ombreiro de Amelia. Aquela nena tiña unha facultade moi especial, sabía escoitar á xente e dar bos consellos.
- ¿Que acontece aquí, pensei que o dragón vos comera?
- ¡Shh! – Martiño levou o dedo ós beizos mandando calar ó seu
irmán – Fala baixiño. Felipe achegouse para non ter que falar ós berros e comezou a
bisbar co seu irmán.
- ¿Que acontece? - Nada, que o dragón está un pouco deprimido.
- E logo… ¿que ten? - Que que que teño, que que que todo o mundo se se se ri de min.
- Acouga, veña, xa está. Ninguén se ri de ti, son imaxinacións túas. - Non, e a ve ve verdade.
Entón comprendeu Felipe. Aquel dragón con aquel aspecto tan fero e perigoso non podía falar con ninguén porque nada máis abrir a boca a
xente lle perdía o respecto. O pobriño era tatexo, pero moi que moi tatexo.
- E cando vou ó ó ó mercado e pido un qui qui quilo de patacas a froi froi froi teira me contesta, “¿de pa pa patacas brancas ou a a
amarelas?” ¿Ves como se ri ri rin de min? - ¿Pero é que non te das de conta de que o problema é da xente?
Non es ti quen fala mal, son eles que non escoitan ben.
- ¿Cre cre cres? - Claro homiño, ou dragonciño. O que tes que facer e tratar de
correxir un pouco a túa fala, pero sobre todo o que tes que facer é non darlle conta a eses que se cren tan perfectos.
- ¿Sabes que? Tes ra ra razón. ¡Non teñen ningún de de dereito a se rir de mi mi min!
- Claro, ti es o grande dragón Cacacán e… - ¡Non! Eu son o grande dragón Ca Ca Can.
- Pois iso, foi o que eu dixen ¿ou? - Si, fo fo foi, pero eu quixen di di dicir que eu son o grande dragón
Ca Ca Can. - Ah, xa sei – dixo Felipe – queres dicir que ti es o grande dragón
Can. - I i iso. O grande dragón Can – o dragón quedou uns intres en
silencio, repasando as súas verbas – ¡dí dí díxeno!
E era verdade, dixérao. Os buscadores de estrelas felicitárono por aquel avance, déronlle palmadiñas nas costas e animárono a seguir coa
cura do deu mal. O dragón volveu chorar pero esta vez de ledicia. Xa non estaba tan deprimido, o seu tatexar era grave pero non incurable. A frase
que máis se escoitou entón foi a devandita; “nada é imposible para quen teima nun soño”.
Despois daquilo o dragón convidounos a merendar, deulles bocadillos de queixo con marmelo e iogures de amorodo e vainilla. Cando
tiveron a barriga ben chea os miúdos lembraron que a súa procura aínda non rematara. Estaban moi a gusto alí naquela torre, gozando do agarimo
e da con con conversa do grande dragón Can, pero era o momento da despedida.
- Grande dragón Can, amigo noso, a túa compaña é moi grata pero temos que marchar.
- E logo… que que quedade un pouco máis.
- Non, non podemos, xa é noite pecha e aínda non sabemos canto camiño nos queda para tocar as estrelas.
- Ah, ¿pero ides to to tocar as estrelas?
- Si, para iso viñemos a Gaguenia. - Po po pois o camiño que vos queda non se fai nun dí dí día. Tedes
que atra atra atravesar a lameira de Queporcallada, o río de Mo Mo Mollamospés e o val de Che Che Cheiriñoáherba. Iso antes de
me me metervos no castelo Chuchamiúdos. - ¡Os chuchamiúdos! ¡Eu alí non entro!
- Eu tam tam tampouco. - Acougade, tamén dicían que era tan fero o dragón Can e á fin
non era máis que un canciño manso – Martiño deuse de conta de que se pasara e deseguido cambiou de tema – O caso é que se
xa non nos da tempo de chegar hoxe non queda outra que dar a volta.
- Si, as oito e media temos que estar na mesa para cear. - Se se se queredes eu pódovos levar a a ata o castelo. Pero non
po po podo entrar.
- E logo, ¿estás en guerra con eles? - No no non. O que pasa e que no castelo ha ha hai moitos ratos, e
me me me dan medo. Quen o diría, semellante mangallón con semellante corpo e tiña
medo dos ratos. Nin que o foran comer. Pero o certo foi que os cativos levaron unha alegría inmensa, espontáneamente se abrazaron ó dragón
Can e o cubriron de bicos. - ¡Ve ve veña, xa está que me ides babear toda a ca ca cara!
Montade no me me meu lombo. Os cativos montaron no lombo espiñento do dragón. Aquel asento
non era moi cómodo, os cornos picábanlle nas pernas e nas nádegas, e a pel era dura, en lugar de ir montados nun dragón máis semellaba que
estaban a montar nunha varanda irregular, pero aturaron o malestar sen queixarse porque aquela era unha forma lixeira de viaxar. Ascenderon
bastante e puideron albiscar, entre a negrura da noite o que parecía a
lameira, o río e logo o prado. Non pasou moito tempo e xa estaban a escasos pasos da porta do Castelo dos Chuchamiúdos.
- Boa sorte dragonciño, e non te esquenzas, nada é imposible… - Para quen te te teima nun soño. ¡Adeus que que queridos
amigos! - ¡Adeus! ¡Cóidate ben! ¡Adeus!
O grande dragón Can perdeuse no ceo estrelado e aluado da noite de Gaguenia. Os cativos viron o impresionante aspecto do Castelo dos
Chuchamiúdos. Non sabían o que tiñan que facer nin a quen se ían enfrontar así que abriron o caderno para comprobar se había algunha
instrucción escrita nel. Pasaron a páxina da lameira de Queporcallada, a do río de Mollamospés e a do prado de Quecheiriñoaherba.
- Aquí está – Amelia que, polo que parece, asumira a responsabilidade de custodiar o caderno comezou a ler – O
Castelo dos Chuchamiúdos é o último obstáculo que vos separa
das Porta do Ceo. Tedes que atravesar o Castelo e atopar o túnel do volcán. Unha vez que entredes nel tan só o tedes que cruzar,
no outro extremo está o voso obxectivo. Poucos consellos se
poden dar en canto ós chuchamiúdos, tratade de pasar desapercibidos e se por casualidade vos descubren nunca, repito,
nunca vos sentedes á mesa con eles. ¡Xamais deixan un miúdo sen chuchar! Dígovos isto polo voso ben.
- ¿Iso é todo? - É.
- ¡Pois vaia unha axuda! - ¡Eu aí non entro! ¡Dou a volta e vou para a casa!
- ¿E por que non vas entrar? - Pero é que non te deste de conta. ¡Aí adentro nos van a comer!
- ¿Pero que dís paspallás? - ¿E ti chámasme paspallás? ¿Qué pensas que quere dicir
chuchamiúdos? Martiño deulle voltas á cabeza. Para unha persoa normal non é moi
difícil desligar esa verba en dúas pero hai que ter en conta que a que
estaba a traballar aquí era a testa de Martiño, ese mesmo que non hai tanto tempo estaba máis que satisfeito de se transformar nun burro.
- Chu chamiúdos, chuchamiú dos, chucha miúdos. ¡Chucha miúdos, chucha miúdos! – berraba coma un tolo porque á fin
dera coa resposta ó enigma – ¡Comen nenos! - Despois disto Martiño xa te podes pór coa teoría da relatividade –
Amelia tirou de retranca pero logo se deu de conta que non pagaba a pena porque seu irmán non a ía a comprender.
- ¿Ves? E agora… ¿aínda tes gañas de entrar? - Non sei… non sei… - Martiño rascaba na queixada mentres
pensaba nalgo – o caso é que se Xan Guerreiro, que estaba só, puido cruzar o Castelo, non vexo porque nós non habiamos ser
capaces de o facer. ¡Eu vou! - ¡Eu tamén! – apuntouse Amelia.
- Dende logo, sodes uns insensatos – Felipe quería botarse atrás,
con só mirar os altos muros do Castelo comezaban a tremerlle as pernas, pero el xa non era Felipiño así que… - Imos entón, pero
eu entro de último. - O que diga o señor. Dame unha espada, eu de vós collería outra.
Colleron cadansúa espada e entraron no Castelo. Estrañoulles que no portón non houbese vixilancia pero seguiron, era mellor así, quizais
estivesen a cear e fose aquel o mometo idóneo para buscar o túnel. Foron avanzando polos estreitos corredores de pedra. Non había
fiestras, a lene luz que os alumeaba proviña dos fachos das paredes. A Felipe metéuselle na testa que se os collían de nada lles valería berrar.
Pensou que se cadra os Chuchamiúdos comían ós nenos vivos, ¡e iso tiña que ser terrible! Decidiu que se sucedía a desgracia de seren descubertos
el loitaría ata a fin. Prefería mil veces ir morto ó caldeiro que ver como o metían na auga ardente entre as berzas e as patacas.
- ¡Shhh! – Martiño que ía diante fixo un aceno co dedo para que
seus irmáns non falasen – Vén alguén, vén alguén, veña liscade. - Aquí hai un recuncho, arrimádevos.
Os tres cativos apretaron as costas fortemente contra a parede. Alí
había un canto sombreado, pero era tan pequeno que se ós chuchamiúdos lles dese por virar a cara os descubrirían irremediablemente.
Uns pasos achegábanse, o troupeleo era ruidoso, aquel son era o mesmo do que emite un ferro cando bate na pedra. Aquel chuchamiúdos
debería ter as botas reforzadas con aceiro. Os cativos nin se atrevían a respirar. O chuchamiúdos pasou diante deles e quedaron arrepiados.
Semellaba máis un monstro que un soldado, tiña a pel verde, coma podre, e as orellas aguzadas, as máns semellaban pólas de vide, pero o peor, o
máis noxento e arrepiante, o máis infernal era a boca, sobresaíalle da faciana coma se non formase parte dela, e no medio amosaba duas
ringleiras de dentes afiados, amárelos e cheos de baba. Agora comprendían para que precisaban daquela boca terrorífica, ¡para chuchar
miúdos! O soldado pasou de longo sen os ollar pero meteulles un medo no
corpo que xa non poderían alonxar ata que saísen daquel demoníaco
castelo. Martiño colleu a iniciativa, se antes camiñaba tranquilo agora notábase nos seus pasos que estaba nervoso, notábase que quería saír de
alí tanto ou máis que os seus irmáns. Toparon cunhas escadas e as dúbidas comezaron, o caderno soamente dicía que o túnel estaba no outro
extremo do Castelo, pero non dicía nada da altura. Non quedaba outra, tiñan que tomar unha decisión ¡e axiña! Optaron por subir. Foi unha mala
idea. Nada máis chegar ó primeiro piso toparon de fronte cunha lexión de arrepiantes chuchamiúdos. Tentaron escapar pero xa era tarde, un grupo
de seis chuchamiúdos que viñan de facer a patrulla subía as escadas cortándolles a fuxida. Pensaron en erguer as armas e darles batalla pero
eran demasiados así que optaron pola opción máis intelixente, axeonlláronse e comezaron a chorar e a berrar entolecidos.
- ¡Déixennos, déixennos, non os queriamos amolar! - ¡Nós só queriamos chegar ó túnel das estrelas!
- ¡Ai por deus, non nos coman, non nos coman!
- ¡Si, non nos coman, só temos ósos e os nosos corpos non farían máis que estragarlle o caldo!
- ¡Ai, non nos coman! Os cativos montaran todo aquel espectáculo pero os chuchamiúdos
semellaban non pensar na compaixón nen no perdón. Quedaron uns a mirar para os outros coas bocas e os ollos inmensamente abertos, coma
comunicándose o plan de ataque entre os seus silencios, como poñéndose de acordo para os coller. Ata que un falou.
- Pero estes cativos son parvos ¡slurp! – este slurp quere dicir que pasaban a lingua polos beizos e polos dentes para que non lles
caese a baba. - Ben parvos, si señor ¡slurp!
- ¿De onde quitaste que vos queríamos comer? ¡slurp! - Pero… ¿non queren?
- ¡Ai non, que noxo! ¡slurp!
- Pero vostedes son os chuchamiúdos. - ¡Xa estamos coa verbiña! Nós somos os guerreiros
Lambenosdentes, ¡slurp! Iso dos chuchamiúdos é un alcume que
alguén nos puxo, e por certo, un alcume falso de todo ¡slurp! - ¿Entón non comen nenos?
- Pois non, ¿é que teñen os nenos para que devezamos por os comer? ¡slurp! Mira para ti, só tes ósos e pelexo.
- ¡Ei, tampouco hai que despreciar! – era cousa estraña pero agora Amelia sentíase un pouco ofendida porque non a quixesen comer
– moita carne non lle hai pero é limpiña, non ten graxa ningunha. Aínda botaron un bo tempo a discutir sobre a dieta dos chuchami…
¡perdón! dos guerreiros Lambenosdentes. Os guerreiros teimaban en que comer nenos era un auténtico noxo, que seguramente as carnes correúdas
se meterían entre os dentes e que carecerían de sustancia ¡slurp! En cambio os cativos trataban de convencelos de que a carne dos nenos era
a máis terna e a máis gustosa. Non chegaron a ningún acordo así que a primeira en dar o asunto por imposible foi Amelia.
- Vale, está ben, os nenos non serven para ser comidos. ¿Xa están
contentos? - Non, aínda non pero deixarémolo estar ¡slurp!
- O caso é que temos que topar o túnel do volcán. - ¿O túnel do volcán? ¡slurp! ¡Pero si está aquí pertiño!
- ¿Ai si, e poderiannos guiar ata alí? - Si, claro, pero primeiro temos que cear que xa son horas ¡slurp!
¿Gustaríavos sentarvos á mesa con nós? - ¿A cear?
- Non, a cantar un fado ¡slurp! ¿que é o que facedes na túa casa cando sentades á mesa?
- Señor guerreiro Lambenosdentes – Amelia estaba ofendida con aquela actitude retranqueira – tampouco é preciso andar con
tanta sorna. - Ah si, desculpa neniña.
- Vale, pero que non volva a pasar. A verdade é que nos gustaría
moito quedar a cear pero é que temos… - Pois eu teño fame.
- É que non te lembras do caderno – bisboulle Felipe no ouvido – nunca se debe cear cos chuchamiúdos.
- Non sexas pailán, ¿non ves que esta xente non come nenos? ¡Eu quedo a cear!
Amelia e Felipe miraban un para o outro. Condenado Martiño, sempre fora un lambón. O caso é que tiñan dúas opción, quedar a cear ou
seguir sós, porque o que era Martiño non se movía de alí sen levar algo á boca. Cando se lle metía unha cousa entre as orellas era testán coma un
burro, así que os dous cativos non tiveron máis remedio que resignarse. - Está ben, nos tamén quedamos.
- ¡Bravo, temos convidados! – vese que os chuchamiúdos non
adoitaban ter xente á mesa porque estaban totalmente entusiasmados con aquela visita.
Nun intre foron conducidos ó comedor e sentados no medio dunha
mesa inmensa. Os camareiros anunciaron que a cea estaba pronta e comezaron a pousar unha chea de bandexas cubertas sobre a mesa. Os
guerreiros Lambenosdentes comezaron a lamber nos dentes todos a unha, máis semellaban unha lexión de dromedarios que unha irmandade de
guerreiros. Puxéronse ata nervosos, aquela xente realmente sentía auténtica paixón pola comida. Martiño tamén compartía aquela paixón así
que amarrou o pano no colo da camisa, agarrou o coitelo e o garfo coas mans e preguntou:
- ¿E que temos para cear? - ¡¡¡Miúdooooos!!!
Aquel berro de ledicia dos chuchamiúdos resoou nas paredes do comedor. Os cativos pensaran que foran enganados, e iso que lle xuraran
polo máis sagrado que aquela estirpe de guerreiros non comía nenos. Temían que debaixo daquelas tampas houbese pequenos neniños asados
con mazás na boca e gornición de chícharos e cenorias rodeando os seu
malfadados corpiños. As fontes comezaron a ser destapadas e, ó ver que non había neniños nas fontes, os irmáns respiraron con tranquilidade.
Pero só foi un intre, logo comezaron a sentir noxo da comida. Sobre aquelas fontes había miúdos si, pero eran os miúdos dos porcos e dos
polos; pulmóns, cerebros, corazóns, estómagos, tripas todo cocido. Aquelas partes dos animais que na súa casa se separaban para darllas ó
can, agora estaban alí exhibidas diante deles coma o máis exquisito dos manxares.
- Vós primeiro, pero servídevos axiña que temos fame e a cea ten unha pinta irresistible ¡slurp! – os chuchamiúdos seguían as
regras da cortesía pero mirábase nos seus ollos que estaban ansiosos por chuchar naqueles miúdos.
- ¡Hai que ben, que boa pinta! – mintiu Felipe – Ti primeiro Martiño, e logo… ¿non tiñas tanta fame?
- Pois a verdade é que me pasou. As damas primeiro, adiante
Amelia, non teñas vergoña. - Non, non, non, por deus, ti primeiro.
- Non ti primeira - ¡Queredes coller dunha vez! ¡slurp! – os chuchamiúdos perderan
os nervos, aquela comida tan boa e tan quentiña e tiñan que agardar a que aqueles tres se decidisen - ¡Collede!
- Si, si, si. Ós cativos non lles quedou outra que coller cadansúa ración. Xa só
con botar aquela comida no prato daba terrexío. Servíronse con noxo e comeron con noxo. Felipe e Amelia comezaron a darlle couces por debaixo
da mesa ó espabilado do seu irmán Martiño que os meterá naquilo. Por contra, os guerreiros Lambenosdentes comían nos miúdos con avidez,
facendo ruído ó mastigar e ó chuchar nas vísceras, semellaban felices e satisfeitos, coma se estivesen a comer o pastel máis doce e delicado da
historia da repostería. De cando en vez se formaban estrepitosas
algueiradas, sobre todo cando un collía demasiadas talladas de pescozo de polo, aquela parte era a que chuchaban con máis gusto, relaméndose,
¡slurp! e lanzando ó aire exclamacións de satisfacción, ¡mmm!
Cando acabou o banquete os chuchamiúdos preparáronse para a cerimonia de agradecemento pola cea recibida. Os camareiros formaron
en ringleira diante dos comensais para que estes últimos mostrasen a súa satisfacción, abriron inmensamente as súas bocas e procederon a expulsar
semellante arrouto colectivo que máis semellaba un sismo que o que realmente era.
- Moitas grazas pola cea señores Lambenosdentes. - Si, xamais probara comida tan exquisita.
- Se queredes ¡slurp! mandamos facer uns paquetes para a viaxe. - ¡Non! Quero dicir, que non se molesten. Non queremos abusar da
súa hospitalidade. - Iso, non queremos abusar.
- Como queirades ¡slurp! Pero en ningún outro lugar comeredos miúdos tan bos coma estes ¡slurp!
- Non é preciso que o xure, pero con que nos acompañen ata a
entrada do túnel xa temos dabondo. Os cativos foron conducidos ata a entrada do túnel e despedidos
amablemente polos guerreiros Lambenosdentes. Se non fora porque comían aquelas viandas noxentas ata lles gustaría quedar un pouco máis
na súa compaña, sen embargo metéronse ás presas no túnel, non fora que ós chuchamiúdos lles entrase fame outra vez.
O túnel era estreito e non estaba iluminado así que os cativos prenderon a lanterna e foron avanzando entre as tebras. Realmente non
atoparon nada sinalable no seu interior. Camiñaron lixeiros, non tiñan nin idea da hora que sería pero xa deberán perder tempo dabondo naquela
cea de tripas e pulmóns. De súpeto o túnel agrandouse e entraron nunha especie de círculo enorme con lava ardente no fondo, ollaron cara arriba,
as estrelas e as lúas de Gaguenia lucían fermosas a ceo aberto. ¡Chegaran ó cono do volcán! Os irmáns desfixeronse en apertas mutuas por un intre,
logo tusiron como querendo acabar cunha carraspeira e volveron a gardar
as distancias. Tiñan que buscar as portas do ceo, non deberían de estar moi lonxe.
- Mirade o que hai aquí. Perto deles, pendurado na parede había un cartel no que se podía
ler “Ás portas do ceo --> Falade baixiño que as nubes están a durmir”. Seguiron na dirección que lles indicaba a frecha, tiñan que apurar, a calor
que desprendía o magma incandescente comezaba a afectarlles os sentidos.
Atoparon un par de sinais semellantes a aquel da entrada nos que, aparte de indicar o camiño, se aconsellaba non montar moito barullo para
non espertar ós lóstregos e a saraiba. Camiñaron e camiñaron ata que á fin chegaron ás Portas do Ceo. A Felipe pareceulle máis unha caixa de
cartón que unha verdadeira porta pero non dixo nada, non fora que o chamasen ignorante.
- Temos que ler o caderno, senón igual facemos algo mal e a viaxe
sería inútil. - Aquí o teño – Amelia abriu o caderno pola última páxina e
comezou a ler – Se xa estades perante as Portas do Ceo
felicítovos, o camiño para chegar ata aquí non é doado. Tedes que correr o pecho das portas coa chaviña que topástedes na
Cova de Nonvexonada, logo abride as follas devagar e por fin poderedes tocar as estrelas. Facédeo con suavidade e agarimo,
as estrelas son seres fermosos pero moi delicados. Recordade o xuramento que fixestes de non desvelar o segredo e xamais
esquenzades que o que vos trouxo ata aquí foi crer que nada é imposible cando alguén teima nun soño. Despídome de vós e sigo
na procura dos meus, agora metéuseme na testa baixar ás vorcalladas polo lombo dun arco das mozas, ¡e abofé que o hei
facer! Tede os ollos abertos por se un día atopades un caderniño con instruccións. ¡Saúde meus nenos!
- ¡Adeus Xan Guerreiro! – a verdade era que os cativos non coñecían de nada ó escritor daquel caderno pero xa lle
comezaran a coller cariño.
- Quita a chave, imos abrir a porta. Quitaron a chave e abriron a porta. Mellor dito, cortaron a fita
adhesiva que unía as follas daquel estraño contedor de estrelas. Cando alzaron as tampas quedaron abraiados, alí dentro había galaxias de
tódalas cores e planetas de tódolos tamaños e formas e, no medio de todas aquelas marabillas, toparon a estrela máis fermosa que os seus
ollos v¡ran xamais. Collérona entre as mans delicadamente, coma se en vez dunha estrela fose un paxariño pequeno e fráxil. Fórona pasando
entre os tres e agarimándoa con dozura. Realmente os soños eran posibles e aquel era o máis marabilloso de todos os que imaxinaran
nunca. - ¡Ei nenos, xa parou de chover, vou quitar o can! ¡Queredes vir?
Rubén chamaba polos seus irmáns pequenos dende a escada do faiado. Ó non ter resposta subiu, máis por curiosidade que por gana de
compaña. ¿Que andarían a facer aqueles cativos? Nada bo cando estaban
tan calados. Chegou ó faiado e ollou aquela desfeita, estaba todo ciscado polo chan e os seus irmáns axeonllados ó carón da caixa de cartón onde
se gardaban os adornos do nadal. Quitaran todas as cousas e estaban a agarimar a estrela do cumio da árbore. ¡Entoleceran!
- ¿Pero que facedes aí? - ¿É que non o ves? Estamos a tocar unha estrela.
- Déixao, tanto videoxogo tenlle comido o cerebro. - !!!nápsap nu É¡¡¡
De esguello
Unha tarde na vida do carismático congresista Weiner
Chegou á casa derreado, todo o día a puxar do maletín cheo de folios
tíñalle o brazo partido. Pechou a porta e foi á cociña a darlle un bico á súa modesta
muller.
- ¿Que estás a facer?
- Un pastel de carne
- ¡Ai que ben, teño unha fame que morro! ¿Queres que poña a mesa?
- ¿Pero como… é que xa non te lembras?
- Lembrarme… ¿de que?
- Hoxe quedamos para ir cear coa miña nai.
- ¿Aínda máis esa? Levo todo o día a traballar, só quero tirar os zapatos
un chisco. Aínda teño que cubrir uns papeis e facer un par de chamadas.
- Xa, o que pasa é que non te gusta a miña nai.
- ¿Como que non me gusta? Babe – colleuna dos brazos e achegouna
contra si – non é iso, só que o meu traballo non acaba nunca. Xa o sabes.
- Non sei, antes non lle facías máis que garatuxas.
- Vale, está ben, hoxe non podo, resúltame imposible ir cear con vós,
pero o sábado collo o día libre e imos xantar ó Central Park, debaixo do noso
carballo. ¡Prométocho!
- Si, o de sempre, xa falaremos o sábado.
Alí acabou a conversa. A súa modesta muller meteu o pastel de carne nunha
bolsa plástica, pousou un bico na carismática fronte do congresista Weiner e saíu
pola porta afóra.
- ¡Fuck off, xa era hora!
O carismático congresista Weiner non agardou nin a que a súa modesta muller
entrase no ascensor. Foi dereitiño ó ordenador, prendeuno, conectou a internet e
abriu o Twitter e maila súa conta de correo electrónico. Cando comprobou que non
tiña resposta na súa bandexa de entrada levou un chasco do demo. Xa era a sexta
moza que se acababa por aburrir del e non lle daba máis conta. Non o podía crer, a
min co carisma que eu teño, a min coa posición social que ocupo, dicía. Mais isto non
vai quedar así, se ningunha destas seis quere xogar xa buscarei outra, ¡o mundo
está cheo delas! Premeu nas teclas do seu ordenador e escribiu; “Xa na casa, cos
pés enriba da mesa”, logo púxose a agardar resposta. Pasou un, dous, tres minutos,
¡Nada! Nin unha triste visita, nin un miserable usuario agregou a súa conta. Volveu
premer nas teclas; “día duro na oficina, perdido entre papeis e preparando a miña
candidatura”. Volveu agardar, mais outra vez nada. Comezou a poñerse nervioso, ¿a
que ven isto? Co carisma que eu teño, co ben que emprego a dialéctica. Sentiu unha
calor lacerante subíndolle polas costas, tirou a camisa, os pantalóns e os peúgos,
bebeu un grolo de auga mentres rañaba na entreperna. De súpeto viu a lene imaxe
do seu peito reflexada na pantalla. A piques estivo de escribir algo no Twitter mais
non o fixo porque pensou; dalles tempo… dalles tempo... E así fixo, deulles tempo ós
usuarios para que se agregasen á súa conta mentres mataba o del facendo
fotografías coa cámara web. Comezou por tirar unha foto da súa man, ¿non é
perfecta?, pensou. Logo fixo outra das sobrecellas, e logo outra dos calzóns. Así
estivo entretido durante longo rato, tirando imaxes da lingua, dos nocelos, dos
cóbados, da gorxa, do peito. Alí parou, non sabía porque aquela imaxe chamara a
súa atención, mira ti que peitiño tan fermoso, así facendo forza, así todo encollido.
Deulle voltas á imaxe e púxoa boca abaixo, inclinada cara á esquerda, cara á dereita,
outra vez boca abaixo. De súpeto lembrouse de que xa levaba algún tempo sen
consultar o Twitter, naquel lapso deberían ter visitado o seu perfil centos, ¡que
centos… milleiros de persoas dispostas a prosternarse ante o seu cetro! Premeu na
opción de actualizar e agardou a que a barriña da páxina se tinguise de verde por
completo. Colleu unha mala hostia do demo, ¡ninguén, nadie, non me agregou
ningún, co carisma que eu teño, coa posición que eu ocupo, pero agora vades ver,
agora si, ninguén amola ó congresista Weiner!
Se se parase un chisco a pensar, se non lle dese pulo á denteira aínda se salvaría de
facer aquilo que ía facer, INSERTAR IMAXE, pero deixouse levar pola soberbia, polo
fatuo fume da posición predominante da súa persoa, LOADING, pola sobreestima
provocada por tantas zalemas que recibira na vida, SENDING, pola certeza de
saberse invencible, ENVIADO. Viu a mensaxe alumeando na pantalla e sorriu
complacido.
- Agora si que vou ter visitas.
E tantas que tivo, mais a culpa de que todo aquilo sucedese foi del por non
caer da burra. Meu amigo, non esquenzas que o primeiro, antes que a política, antes
que a fortuna, antes aínda que respirar, o primeiro que hai que facer na vida se
queres que todo te vaia ben é tratar de ter contenta á túa sogra.
Vivir sen glamour
Foi entón cando me espetou; “¿é que non tes nin un chisco de glamour?
Semellas un home das cavernas”. Aínda hoxe non sei por que contestei daquela
maneira pero sinxelamente lle dixen; “¡grazas!”. Saíume así, espontánea e
automáticamente. A verdade era que nunca me parara a reflexionar sobre si eu era
poseedor dese misterioso glamour do que tanto se fala por aí. Según aquela rapaza;
¡rotundamente non!
Aquela revelación foi para min coma una labazada no medio da cara. Lembro
que o primeiro que fixen foi preocuparme. ¿Qué vai ser de min? Meu amigo, nos
tempos que corren carecer de glamour significa afacerse á idea de que nunca xamais
chegarás a nada na vida. Sen glamour non virá nin Dior, nin Gucci, nin Massimo
Dutti… nin sequera Giorgi a ofrecerme un contrato multimillonario por prestala miña
imaxe persoal como icono dos seus productos. Aquela funesta revelación alterou os
meus nervos. Comencei a suar. Só lembro que naquel momento precisei saír de alí
con urxencia, así que me escusei coa rapaza e fun ó baño.
Precisaba refrescarme un pouco, ter uns intres a soas para pensar, estaba
alterado, descentrado. Abrín a billa do lavabo e formei un cunca coas miñas mans,
metín o nariz ata o fondo. Aquilo me aliviou. Permanecín así, naquela postura,
exposto a lascivas intencións durante un longo tempo, mentres pensaba que máis
me valía comezar a facer algo por atopar de novo o meu glamour perdido. ¿Perdido?
¿é que algunha vez tivera eu glamour? Foi entón cando alcei a vista buscando no
meu reflexo algún tipo de resposta á miña dúbida pero, incomprensiblemente, aquel
fulano que aparecía no outro lado do espello estábame a sorrir dunha maneira
displicente.
¿De quen te ris, fedorento? ¿De ti? ¿De min? Si, de ti, de ti. E… ¿a causa de
que? se pode saberse. De que es un pailán, un pailanciño que non se da de conta de
que lle está a dar a mordedela á brinca máis evidente. ¿Ah si? O glamour é un conto
chino. ¿Pero que dis? ¡o glamour o é todo! Claro, o que ti digas. E daquela maneira
tan soberbia, dándome a razón coma se eu fose un vello senil, deixou de sorrir e
calou. Eu tratei de falarlle pero non fixo outra cousa que imitar o movimento dos
meus beizos, así que volvín á mesa onde a rapaza me agardaba pacientemente.
¿Xa estás máis calmado? Si, si, tranquila, por certo… o glamour ¿que é? Os
ollos da rapaza pareceron estoupar coa carraxe, puxéronse vermellos, incharon tanto
que semellaban querer saír disparados da súa faciana. Respirou fondo unhas cantas
veces mentres dicía; non paga a pena, non paga a pena. Cando recobrou a calma
bebeu dun grolo a copa de viño que tiña servida, limpou a boca, recolleu o seu
móbil, ergueuse e, sen dicir unha palabra, saíu pola porta do restaurante.
Eu quedei alí plantado sen saber moi ben que facer. Mirei a un lado e ó outro.
Na mesa contigua un matrimonio me estaba a observar como se eu fose unha
atracción de circo, un animal de vinte ollos. Tan apoucado me sentín sendo o foco
daquelas miradas inquisidoras que a piques estiven de erguerme para pedirlles
desculpas, para confesarlles que eu son un indouto que non sabe nada da vida, que
non sería quen de distinguir un diamante dun monte de merda. Digo que estiven a
piques porque realmente non o fixen. O caso foi que tanta tensión me espertou unha
fame terrible e tiven que sentarme a comer para evitar un esvaecimento. Tentei de
esquencerme daquelas dúas miradas que me atravesaban a caluga e centreime na
cea.
A miña feixoada tiña unha pinta estupenda pero pensei que se comezaba por
ela o maigret de pato que pedira a rapaza enfriaría irremediablemente. Decidín que o
mellor era xuntar as dúas cousas nun mesmo prato. E así foi, volquei a carne sobre a
feixoada e fixen unhas eslavas deliciosas. Fun devorando a delicada carne e a
enxebre legume á vez, mesturando no meu padal os dous sabores para darlle dobre
pracer á miña barriga famenta. Ante aquel espectáculo o matrimonio da mesa
contigua comezou a bisbar, seguramente contundentes críticas á miña actitude.
Decidín entón que lles daría o gusto completo de sentirse superiores a min por
saberse cubertos daquela aura de glamour da que eu sen dúbida carecía. Así foi
como comecei a comer coas mans, facendo todo o posible por emporcallarme a
camisa, coma un auténtico e xenuíno home das cavernas.
Guerra preventiva
Coa primeira luz da mañá os bombardeiros despegaron da base militar. As
súas estáticas ás cortaron o vento mentres o atronador barullo dos motores facía o
que podía por seguir a aqueles estraños Ícaros de aceiro.
- Obxectivo ás tres e un cuarto. Prepárense para proceder ó ataque
preventivo.
Xa estaban moi perto do punto crítico así que os pilotos levantaron as tampas
de seguridade dos disparadores, pronto as bombas de racimo estalarían na terra
espallando a súa certeira e abundante metralla.
- Aquí Cóndor a Donicela, aquí Cóndor a Donicela.
- Adiante Cóndor copiámolo.
- Donicela proceda a facer branco.
- Ok Cóndor, copiado, corto.
O xefe de operacións daba as últimas instruccións dende a base militar
mentres sorbía no café que tiña nas mans facendo un barulliño pausado, máis
semellaba que estaba a falar da chuvia que a dar a orde de usar as bombas.
- Escuadrón. Listos. Cinco, catro, tres, dous, un, ¡fóra!
Os pilotos premeron os disparadores e as bombas saíron dos ventres dos avións.
Foron caendo amodo, asubiando no vento, impulsadas pola soa forza da gravidade,
mais se dirixían dereitiñas á posición onde o inimigo estaba atrincheirado.
- ¡Bombas! – berrou un capitán ós seus homes.
Os soldados do bando inimigo ollaron ó ceo, sen embargo, en lugar de ir
acubillarse debaixo dos sacos de area quedaron pasmados na espera de que as
bombas lles caesen sobre as testas. O inevitable sucedeu, o primeiro proxectil tocou
terra e estourou espallando a súa metralla. Todo o mundo agardaba un estrondo
inmenso que enxordecese os ouvidos, porén o que soou foi un lene ruído, coma se
alguén lle tirase a rolla a unha garrafa de champán. A metralla bateu nas aramadas e
nos uniformes dos soldados, centos e centos de caraveis vermellos foron cubrindo o
chan da contenda.
O inimigo pasou ó contraataque disparando as súas baterías antiaéreas
cargadas con filloas doces e rosquillas de anís. Fixeron branco moitas veces sobre o
metal dos aparatos. O xefe de operacións deu a orde de regresar á base militar, non
fose que tanta acumulación de glucosa estragase a pintura das máquinas.
As hostilidades por terra duraron todo o día, os bandos se atacaban
mutuamente disparando os seus foguetes de nubes de azucre e caramelos de
tódalas cores. As baixas foron abundantes, moitos tiveron que ir de urxencia á
enfermería cos bandullos a piques de estourar polo empacho. Sen embargo o peor
veu á noite. Cando o sol se puxo nos outeiros e a oscuridade cubriu o campo de
batalla ambos bandos comezaron a empregar o armamento definitivo. Tomaron
posición e apuntaron ó centro mesmo da cabeza do inimigo. Logo soltaron a
súa descarga de bicos ó aire que foron atinar certeiros nos beizos das bocas dos
contrincantes.
- ¡Infantería!
Os soldados formaron e se dispuxeron a atacar por terra. As tropas avanzaban
resolutas sobre a herba ordenadas en valerosas fileiras. Cando ambos exércitos se
toparon desatouse a contenda corpo a corpo, moitos se abrazaron e se bicaron,
outros se deron palmadiñas na espalda mentres se facían chanzas, mais algúns,
afervoados polo fragor da batalla, se espiron e comezaron a encarnizarse co inimigo,
a enguedellarse co corpo oposto e a caer ó chan cuberto de charcos de marmelada
de amorodo.
A loita foi intensa e se prolongou ata a alborada seguinte. Ningún dos bandos
claudicou, simplemente chegaron ó acordo de que aquela guerra remataba alí, sen
gañadores nen perdedores, sen vencedores nen vencidos. Pode que fose unha
batalla sentimentalmente ilóxica, aínda así pasou á historia por ser a primeira guerra
onde quen gañou foi a vida.
De esguello
Soñaba mexer nos fíos invisibles,
mesturarse con esas xentes
que empurran o leme da vida
á vontade.
Coidaba os contactos
coma se fosen
orquídeas
e
xamais mordía
na man que lle daba
de comer.
Porén,
avasallaba en quen podía
e miraba de esguello
a todo aquel
que ocupaba
a súa mesma altura.
Adoitaba tomar notas
por se algún día
lle fixese falta
falar
e
respondía
sen dubidar
a esas preguntas
que valen ascensos.
Críase tan interesante,
tan instruído,
tan vehemente,
tan superior…
Dábase
tantos aires,
meu Deus,
que non caía na conta
de que
non
era
máis
que
un
anaco
de
merda.
(Vive e deixa vivir)
Non andes a tocar no taléfano
Estaban na cama a piques de coller o sono. Custáballes durmir ós dous, tiñan
unha vaca doente e dúas leiras expropiadas polo trazado da autoestrada. Dis que llas
ían pagar ben, que había un taxador que era boa persoa e que tiña en conta á xente,
mais eles non crían neses falares, sabían por experiencia que os cartos que lles
habían dar non pasaban dunha esmola. Non eran bos tempos para a familia, aínda
por riba a Pauliña, a súa única filla, estaba a estudar en Santiago. Aquilo era mexer
no peto día si e día tamén, aínda así resignábanse e trataban de seguir adiante na
espera de que tempos mellores chegase. ¿Que outra cousa podían facer máis que
resistir?
De súpeto o teléfono soou. Levaron un susto de morte, aquilo non podía ser
nada bo. Algo lle pasara á Pauliña, senón… ¿quen ía chamar a aquela casa despois
da medianoite?
- ¡Ai meu Deus, vai, vai!
- Acouga, que non ha ser nada.
Aínda así o que máis aquelado estaba era el, se algo lle pasaba á filla non
sabía o que ía facer. Que morresen tódalas vacas, que levasen tódalas leiras, que
marchase o sol do mundo, pero a filla non, San Antón Bieito que non sexa nada. Foi
tan rápido como puido, a reuma espicháballe os ósos na carne mais fixo por non
pensar naquilo, tiña que coller o teléfono. Algo acontecera, sabíao, aquilo non era
normal, chamar despois da medianoite…
- Si.
- Ola, moi boas noites querido amigo
- ¿Quen é?
- Si… perdón son
- ¿Quen é?
- So… Xose Ramón Gayoso da Televisión de Galicia do luar
- Boeno carallo… pero neno, ti mañá non traballas ¿ou?
- Perdón, perdón, ¡shhh!
- ¿Pero ti non traballas mañán, non tes máis que faser? ¿Andas de
carallada tocando no taléfano?
- Home no, pero…
- Pero… pero ¡vai por aí diante, hombre! ¡Pero deixa durmir á xente,
hombre!
- Pero, perdona home estamos facendo u…
- Pero pero que ta que tamos facendo tanto luar e tanta coña marinera
- Bueno perdón
- ¡Vai rascar no carallo!
Colgou cheo de carraxe. ¿Que mundo é este que xa non respecta nin o
descanso da xente? Foi para a cama enfasquiado só de pensar que tiña que volver a
dar voltas no leito para coller o sono. Chegou ó cuarto, deitouse, apagou a luz e se
cubriu coas mantas.
- ¿Quen era?
- Un que andaba de carallada. Dis que era o Gayoso, ese da televisión
- ¿O do luar?
- Si, ese.
- ¿É era?
- ¿Que sei eu?
- Vaites, din que chaman para darlles cartos á xente
- Pois a min só me quitou o sono
- ¿E se era?
- Nin que fora o Papa, non son horas de andar a tocar no taléfano, ¡que
chame a súa casa!
Deu a volta no leito e púxose de costas. Estaba contento, e iso que perdera unha
manchea de cartos, pero o máis importante estaba a salvo, a súa Pauliña, o seu
tesouro do ceo. Deulle as grazas ó San Antón en nun intre quedou durmido.
O amor é cego
Cada vez que a miraba
enchíanselle os ollos
de faíscas,
daí
aqueles tenros aloumiños
cos que a trataba.
Queríalle tan ben,
gostaba tanto
de estar
á súa beira,
que ata se esquencía
de que un agre mundo
agardaba
tralo cerrume.
Xamais lle viu
un mal xesto,
xamais lle escoitou
unha verba
por riba da outra,
xamais lle buscou
os defectos,
xamais lle amosou
un desprezo,
un capricho,
unha manía.
Conformábase con tan pouco
e dáballe tanto en troques
que non podía estar
máis que agradecido
por aquela entrega.
E iso que tan só
era unha cabra.
A verdadeira cor da ideoloxía do finado señor Panas
Eu era aínda moi novo así que non me lembro do seu nome, paréceme que lle
chamaban Alfredo pero, en verdade, non estou seguro. Do que si me lembro é de
que polas costas todos o coñecían coma “o Panas”. O caso era que o señor Panas,
que en paz descanse, espertou a curiosidade nos veciños e iso, para quen sepa algo
da vida nas aldeas, resulta algo fatal. Non hai cousa peor que andar na boca da
xente, ser o centro de atención dos grupos que bisban no terreiro, o motivo das
conversas da tendeira. O finado do señor Panas non fixera nada para que os veciños
lle andivesen con tanta cousa, el non se metera con ninguén, facía a súa vida e xa
estaba. Botaba unha man cando lla pedían mais tampouco sementaba relación de
confianza algunha, iso si, era cordial con todos, ninguén puido dicir nunca que lle viu
un mal xesto na cara. Muller non tiña, por tanto tampouco tiña sogra nin fillos na
casa. Coidaba as súas leiras e na taberna paraba pouco, á igrexa non a pisaba. Non
se lle coñecían gustos nen aficcións, tan só se sabía que cada domingo mandaba ó
fillo da señora Gelina a mercarlle o xornal a cambio de quedar coa volta. Por aí o
colleron de ollo.
A xente quere saber… a xente quere saber… esa foi a lección máis valiosa que
me deu meu pai na vida. Ler o xornal ós domingos non ten nada de particular, eu
non o fago pero supoño que habera centos… ¿que centos? millóns de personas no
mundo que o merquen. O caso era que o finado do señor Panas mercaba un distinto
de cada vez, e aquilo claro, foi o que chamou a atención do vulgo. Ou se le un xornal
ou ningún, pero… ¿que é iso de andar a cambiar de fontes? As xentes comezaron
por preguntarse a que se debía aquel estraño comportamento, uns dicían que era
para ter varios puntos de vista, outros que era para despistar, outros que non sabía
ler e que só tentaba facerse o interesante. Ningún atinou, só eu souben o motivo
daquel comportamento extraordinario.
Ó primeiro os veciños confomábanse con bisbar, mais o día que o finado do
señor Panas lle encargou ó fillo da señora Gelita vir un xornal portugués a paciencia
daquelas xentes acabou. Acto seguido mandaron un grupo á súa casa a preguntar
porque sempre mercaba un xornal distinto.
- E vostede… ¿por que sempre merca un xornal distinto?
- E logo… ¿fai falta vir ata aquí por esa parvada?
O grupo de veciños quedou calado pensando no que estaban a facer, ninguén
foi quen de lle dar unha respota convincente ó finado do señor Panas porque,
realmente, aquilo era unha parvada, achegarse ata alí todos eles só porque un home
mercaba un xornal distinto de cada vez non era motivo dabondo como para se
explicar, así que deron volta e regresaron ó terreiro.
- ¿E que vos dixo?
Contaron o sucedido e todos quedaron de acordo en que aquilo non era cousa
deles, que en verdade era unha parvada interesarse polas manías dun vello que non
se metía con ninguén. Sen embargo, a xente quere saber, e logo dun cuarto de hora
xa estaba a curiosidade outra vez aguilloando naquelas testas, se cadra aumentada
por tres ou por catro. Quixeron ir a chamarlle de novo na porta pero pensaron que
se podía aburar e non soltar prenda, así que bosquexaron un plan para saber do
motivo de porque o finado do señor Panas sempre mercaba un xornal distinto. Se
non llelo dicía directamente terían que tirarlle a resposta á zoroña.
E así foi, a primeira tentativa viu ó domingo seguinte cando o fillo da
señora Gelita lle foi mercar o xornal, entón a tendeira lle preguntou.
- ¿Cal quere hoxe?
- Dixo que quería un xornal deportivo.
- ¿Este?
- ¿E non ten outro?
- É o que ven
- Pois este logo
- Dime mozo… ¿que fai con eles?
- Que sei eu, supoño que os lerá ¿ou?
- Non sei… non sei… Faime un favor, preguntalle se os le filliño, toma,
toma un caramelo e llo preguntas ¿dacordo? E logo me ves dicir que te
respostou ¿vale?
- Vale
- Pero ven ¿eh?
O fillo da señora Gelita meteu o caramelo na boca e saíu pola porta, quizais
pensando que os adultos estaban un pouco mal da testa. Sen embargo cumpliu a
súa palabra, entregoulle o xornal ó finado do señor Panas e lle fixo a pregunta.
- ¿Leos?
- Léoos
Marchou sen dicir máis nada e foille dar razón á tendeira.
- ¡Pero iso non pode ser! – a tendeira quedou a pensar naquilo un tempo,
ata que á fin viu a luz prenderse na súa mente – Se os le entón… ¡é cousa da
ideoloxía!
Unha hora despois daquel razonamento xa a aldea enteira se esquencera de
querer saber o motivo de porque o finado do señor Panas mercaba un xornal distinto
de cada vez pero, xa se sabe, a xente quere saber e aquela dúbida se trocou por
outra, a curiosidade cambiou de fiestra e o importante entón era desvelar a
verdadeira cor da ideoloxía daquel home que non se metía con ninguén pero que,
sen embargo, mercaba un xornal distinto de cada vez.
Déronlle ós miolos entre todos e decidiron que o mellor era montar unha
farsa. Chamaron a dous veciños dunha aldea próxima, contáronlle o asunto, os
vestiron de candidatos e os mandaron á casa do finado do señor Panas para que lle
tirasen da lingua, disimuladamente claro.
- Bos días señor
- Bos días
- Estamos a facer campaña para as eleccións
- ¿Pero xa? ¡Se aínda falta un ano!
- Si, xa o sabemos, pero temos un proxecto ambicioso e queremos facer
ben as cousas. ¿Permíteme unha pregunta?
- Vostede dirá
- ¿A quen lle vota vostede?
Os dous veciños da aldea próxima non entenderan moi ben a idea de tirarlle
da lingua disimuladamente mais a culpa non foi deles, a culpa foi dos veciños que en
lugar de mandar a un par de avogados a facer aquela encomenda mandaron a
xentes máis acostumadas a tratar coas vacas que coa demagoxia. O finado do señor
Panas desfíxose deles cunha soa resposta.
- Meus amigos, o voto é secreto
Alí se lle esgotou a dialéctica ós dous labregos e non lles quedou outra que
pechar a boca e volver ó centro de operacións, ou sexa, ó palco da música. As
xentes quedaron confusas, desesperadas por saber, a curiosidade era tanta que
despois daquilo argallaron mil astucias, mais ningunha funcionou. Probaron a
chamalo por teléfono para facerlle unha enquisa, foille un home a chamar na porta
dicindo que era do censo, ata lle remexeron no lixo na procura dos xornais por ver se
escribira algunha nota. Aquilo aínda foi peor. ¡Non os tiraba! Comezaron a pensar as
cousas máis diversas, a facer as conxeturas máis estrambóticas, que se era un
ilustrado, que se era un fuxitivo da xustiza, que se non sabía ler e usaba os xornais
para prender a cociña de ferro… o caso era que por máis que a curiosidade medraba
o finado do señor Panas non soltaba prenda sobre a verdadeira cor do seu
pensamento político.
Eu, que andaba no medio de toda aquela xente, logo quisen saber tamén.
Podo dicir aquí que fun o único que desvelou o sentido da ideoloxía do finado señor
Panas. ¿Como o fixen? Á zoroña, ¿como ía ser senón? Esa é a forma que
aprendemos nas aldeas.
O plan que eu discurrira para desvelar a verdadeira cor da ideoloxía do finado
señor Panas era ben sinxelo, pasaba por agardar ó domingo seguinte e logo
meterme ás agochadas na almuíña da casa do home. Eu era novo e de corpo cativo,
así que non me custou moito ogocharme detrás dos montes de herba seca. Cando o
fillo da señora Gelita chegou co xornal achegueime máis perto da casa, acubilleime
ben detrás dunha pía de leña e agardei acontecimentos. O finado señor Panas colleu
o periódico e despediu ó rapaz, meteuno embaixo do brazo e foi dereitiño ó alboio.
Eu achegueime as reixas da fiestra para espreitar mellor. Achegouse a un estante,
colleu unha alzaprema e foi levantar a tampa do pozo negro, logo se virou de costas,
baixou os pantalóns, agachouse, abriu o xornal e se puxo a cumplir con aquilo que
fora alí a facer. Escoitábao xemer e falar mentres as ventosidades saían do seu cu
coma bombas de palenque, semellaba que aquel home non fixera de corpo en toda a
semana.
- Un home tenta vender á súa… ¡non, esta non! O fillo do toureiro e a
folclórica fixo… ¡esta tampouco! O xefe do goberno deu por cumplidas as súas
promesas electorais un ano antes do que prometera e xa pensa en… ¡Si, esta
é boa, esta é boa!
O finado do señor Panas arrincou aquela folla do xornal e deixou o resto a un
lado, inclinou unha perna e sen máis preámbulos limpou o ollo do cu con aquela
nova que tanta atención lle chamara. Logo moveu o brazo cara adiante para
contemplar mellor a obra que fixera e tirou o anaco de folla ó pozo negro, deixando
así patente cal era a verdadeira cor da súa ideoloxía. Antes de subir os pantalóns
aínda dixo.
- ¡Me cago no mundo!
Receita infalible para escribir unha historia
Se vostede ten a ilusión de ser escritor pero sempre anda dicindo “¡é que non
se me ocorre nada!” debe saber que hai unha receita infalible para escribir historias
diversas, só ten que seguir os pasos que se enumeran a continuación. Así que, se
vostede ten a ilusión de ser escritor pero sempre anda dicindo “¡é que non se me
ocorre nada!” que sepa que agora xa non ten escusa.
O primeiro que hai que facer é o traballo de campo. Pois nada, colla unha
cesta, peneira non vale, e vaia ata o campo. Métase nun prado onde haxa vacas ou
touras, tanto ten, e apáñelle o brillo dos ollos, métaos na cesta. Siga camiñando e
busque unha ovella ou unha cabra, se non hai tamén vale un porco, cando teña ó
animal localizado proceda a estraerlle o movimento presumido (se é cabra ou
ouvella) ou baldrogueiro (se á fin é un porco) do cu, métao na cesta. Camiñe ata un
souto e recolla a caída das follas do outono, o tacto das landras dun carballo, o
cheiro da merda dunha curuxa, a cor do sol entre as follas e son do roñar dun porco
bravo, os cogomelos non os toque que non nos fan falta. Saia do souto e achéguese
a unha aldea, aproveite para coller o sabor dos chuchameles dos valados senón logo
terá que dar a volta. Cando chegue á aldea colleite a voz da tendeira, o ollar do cura
e a labia do tratante de gando. Mire na cesta, se xa o ten todo pase ó punto
seguinte, senón ten que dar a volta.
O segundo é darlle sentimento á obra. Se conduce colla o coche e diríxase á
cidade, se non conduce vaia tirar o carné ¡lacazán! Cando chegue á cidade busque
un banqueiro e cóllalle a fachenda, métaa na cesta, busque un funcionario e apáñelle
a desidia, métaa na cesta, busque un pai de familia e colléitelle o medo, métao na
cesta, busque un proxeneta e cóllalle o amor, métao na cesta. De sentimentos xa
basta, non sexa que a obra quede eslamiada de máis. Regrese a súa casa, de
camiño apañe o canto nocturno dos pardais, o cheiro do lixo espallado despois de
tres semanas de folga e a temperatura do bidón metálico onde arde a fogueira dos
vadíos.
Cando chegue a casa colla unha cazola na cociña e unha culler de madeira,
deite medio litro de auga no recipiente e diríxase ó seu escritorio. Verta o contido da
cesta na cazola e remexa… remexa… remexa… remexa… ¡Xa está! Agora hai que
agardar a que pouse o gaspallo. Tampouco é preciso que quede aí a ollar coma un
monifate. Vaia mirar a televisión ou dar un paseo que aínda tarda.
Cando o gaspallo teña pousado colla a culler de madeira, retire un pouco de
líquido e próbeo. Noxento ¿verdade? Iso é que a historia tampouco é moi boa, de
todas formas, pode consolarse pensando que no mundo aínda hai escritas cousas
que saben peor.
Agora xa ten o corpo da obra rematado, falta a que é quizais a parte máis
importante, o final. Opte pola opción que queira, a continuación reflexamos só
algúns exemplos.
- Un final feliz – Viviron felices e comeron perdices
- Un final esperanzador – Poetas somos todos
- Un final desacougante – Carallo dereito non ten respeito
Penso que iso é todo. Xa ten a súa historia e xa pode ir por aí adiante
dicíndolle a todo o mundo que vostede É UN ESCRITOR.
Nota. Se un día non ten ganas de escribir vaia quitárllelas silvas ás leiras que fai boa
falta, e ante todo non esqueza que nunca, nunca, nunca, baixo ningún concepto, nin
que lle marche a muller da casa, nin que lle arda a cociña, nin que a sogra lle chame
na porta, nunca, nunca ande a tocar no taléfano despois das dez da noite.
Caer da burra
- “… vadíos sobre o espello tremendo sen ollar máis alá”. Non entendo
nada. Estes poetas do carallo, ¿tanto mexer nas verbas para isto?
- ¿Qué non entendes?
- Non entendo nada desta merda que está aquí escrita, os vadíos, os
espellos.
- ¿E logo?
- ¡E logo tampouco!
- Imos ver, ¡dame paciencia señor! ¿ves ese polo?
- Vexo.
- ¿Que fai?
- Nada, estar aí parado coma un pasmarote, ¿que vai facer?
- Si, pero… algo fará ¿ou?
- Vale… es un aburrido ¿sábelo non? O polo está ollando as flores,
agora ergue a vista cara ó ceo, agora volve ver as flores.
- ¿É feliz?
- ¡É un polo!
- Si, xa sei, pero é feliz.
- ¡Ai que cona! ¿Que queres, que llo pregunte?
- Vale, vale, está ben. ¿Ves aquela pita de alí, aquela que está ó carón
do pozo?
- Vexo si
- ¿Que fai?
- Escaravella na terra
- ¿Por que?
- Anda á procura de miocas.
- Iso é. Agora imaxina que ti es un polo, o prado é a vida e a herba, as
flores, as abellas, o pozo… son o espello.
- Si pero… ¡aaaah, agora si!
- ¿Que foi, caeches da burra mamalón?
A calma podre
Acordou de súpeto, sobresaltado, alguén estaba a bater na porta. Entre o son do
vento e a choiva, entre o balbordo incansable do mar, escoábanse uns golpes secos
e pausados. Era un resón lonxano e feble, pero á vez preciso e constante. Ninguén
bate así, pensou, esa non é a chamada dun home. Entón tivo medo porque entendeu
con claridade quen estaba a chamar, ou iso supuña o vello. Nunca fora un agoireiro,
pero levaba demasiado tempo agardando aquela visita, parecía algo incrible pero
agora estaba alí presente. Pensou erguerse do leito e atender á chamada, pero non
foi quen. Convenceuse de que aquilo era demasiado extraño como para tomalo á
lixeira, pensou que quizais estivese trabucado, e se fose outro o que chamaba?
Enganouse a si mesmo, inconscientemente buscara unha arreda porque, en
realidade, estaba morto de medo. Fechou os ollos e fixo por durmir. Botou algún
tempo dando voltas no leito, agardando que aquel visitante marchara. Aínda que era
pleno inverno e facía un frío do demo comezou a suar. Desabrigouse das mantas e
sentíu coma a suor se iba arrefriando. Comezou a gorentar que o camiñante liscase.
Deuse de conta de que a súa mente estaba a entrar nunha gaiola invisible e tratou
de non pensar en nada, non podía, aquel bater non cesaba.
- ¡Vaite maldito! ¡Vaite por donde viñeches!
Dende o leito gritaba o pobre home, desesperado, coma quen grita por acordar dun
pesadelo e non pode. El non pedira aquela visita, el non chamara a aquel camiñante.
El só quería durmir tranquilo e acordar ó mencer para saír ó mar. Sen embargo non
daba acougado porque era consciente de que tiña que cumprir unha obriga, aínda
que soubera tamén que non tiña valor para elo.
Inesperadamente o petar calou. O home se incorporou no leito e virou a orella cara á
porta, contivo o alento e escoitou con atención. Odiou as ondas que non lle deixaban
ouvir se o extraño camiñante seguía alí. O mar ía morrer violento contra as rochas,
co seu barullo ancestral de folla de lata, o vento ruxía con forza asubiando ó
atravesar as fendas dos tablóns dos poxigos. Non ouvía outra cousa. Quen queira
que estivese fóra non daba sinal algún. Transcorreu un interminable instante de
pegañenta angustia. A piques estivo de erguerse do leito pero, de súpeto, volveu
chamar, desta volta con máis forza. Un arrepío atravesou a espiña dorsal do home.
- Silverio – unha voz profunda e espectral chamaba – Silverio, ábreme Silverio.
- ¡Vaite! ¡Vaite malnacido!
Pero non marchaba. Quedou largo rato alí, batendo na porta, lento pero
incansable, como quen dispón de toda a eternidade para non facer outra cousa que
bater naquela escascada madeira. Silverio dubidaba, non quería abrir, desexaba con
toda a súa alma que o bater parase. Quería que o camiñante volvese ó seu lugar,
que fose chamar noutra porta, pero non había outra porta, aquel servizo só o
podería cumplir el. Sabíao, so el.
Xa non puido volver durmir. Silverio pensou que se non contestaba o
camiñante aborrecería e marcharía seguindo os seus pasos, pero non foi así. Durante
horas estivo chamando, coma un desesperado. Silverio prendeu unha candea e
matou o tempo buscándolle xeito ás formas reflectidas no branco encalado das
paredes.
O vento era tan forte que no interior do cuarto se mexían as redes penduradas do
teito, un almanaque abaneaba cravado na parede, as perolas chiscaban no andel da
cociña. O saín da candea consumíase rápidamente, pronto quedaría ás escuras
naquela noite de lúa crecente. A choiva parou e tan só un leve froallo obstinado
continuaba a caír.
Misteriosamente o bater cesou. Silverio prestou atención pero non ouvíu máis
nada que o bulir do vento e a auga escorregando no tellado, o queixoso ouveo dun
can que chegaba enxordecido do outro lado da vila, os pardais que facían barullo
entre as pólas das árbores. Despois, uns pasos bacentos que se alonxaban no
enlousado da estrada.
O mencer chegara e a primeira luz da alborada entraba na cociña polo garguelo da
porta. Agora xa se podía erguer sen medo, o peor pasara. Ogallá nunca máis volvese
unha noite coma aquela, ogallá aquel camiñante se perdese no tempo.
********
Encheu a barriga cunha codia de pan e unha presada de bocartes salgados.
Abríu a garrafa do aguardente e encheu un par de dedos de licor no fondo dun vaso
derramando unas cantas pingas sobre a madeira da mesa. Bebeuno dun trago e
sentíu o sabor doce da caña quentándolle o peito. Enrolou un cigarro de picadura e
prendeu un misto. Aspirou o fume do tabaco mentres pensaba onde iría botar as
redes. Podía ver o mar pola fiestra, amainado o vento da noite a auga calmárase un
pouco. En todo caso, conviña non alonxarse moito por se o temporal chegaba de
imprevisto. Decidíu que iría ó Corgo das Barxas. Seguramente habería alí bo peixe e,
no caso de levantarse un vento inesperado, podería amarrar a dorna no pequeno
peirao daquela entrante e volver camiñando.
Saíu da casa co atado das redes ás costas e un salabardo na man. Facía por
non pensar no camiñante. Miraba para as gaivotas deixándose emboubar polos
círculos que trazaban no voo, coma se os seus movimentos aéreos valesen para
levarlle lonxe o seu pesar. Pero aquel bater non era deste mundo, aquel son infernal
quedáralle gravado a ferro na mente. Ademáis, non era o seu oficio aliado do
esquecimento. Se algo ten o mar é soidade, e a soidade ama o recordo, ás veces ata
a loucura. Habían pasar longos días ate que Silverio fose quen de desatar aquel nó
que agora lle amortallaba a alma.
Ó chegar á praia botou o atado de redes sobre a falca do estribor, soltou as
amarras e púxose a turrar da barca cara ó mar. Cando as primeiras ondas lle
mollaron os pés sentíu a auga xeada nos nocelos. Os ósos semellaban escarpas
cravándose na carne. Pasara toda a vida entre néboa, choiva e humidade e agora,
na vellez, a reuma era a súa recompensa. Pero Silverio era un home obstinado e
seguíu teimando, apertando os dentes mentres xemía para enganar á dor.
Ó cabo conseguíu aboiar á dorna e con custoso esforzo subíu ó bote coas
galorchas enchoupadas. Sentou sobre o taboleiro de cara ó leme e, coas súas mans
vellas e curtidas polo sal, agarrou os remos e afundíu as pas na auga. Foi entón
cando botou en falta a Maximino, o seu compañeiro na pesca, morto había non
moito tempo. Mentres Silverio remaba, Maximino levaba o temón, ou ó revés. O caso
era que agora tiña que valerse só, tiña que usar o pé para corrixir o rumbo e aquilo
lle daba certa vergoña, non andarían a facer mofa del os vilegos? Case sempre se
lembraba do seu compañeiro cando se desplazaba pola auga, pero o que máis
saudade lle causaba era que perdera a súa compaña.
Paseniñamente foise alonxando da praia cara ó Corgo das Barxas, sumido nos
seus recordos, sentíndoos liscar coma penas que leva a brisa. Remaba a modo, lento
pero constante, como un bo mariñeiro que garda as forzas por se as precisase máis
tarde. Remaba pensando no mar, dicíndose a si mesmo que é falso e traizoeiro,
cantas vidas non levara con él? O máis grave é a confianza. Cando cres que o
coñeces é cando te abraza para non te soltar. O mar é ciumento coma un home
namorado.
Cando chegou ó Corgo buscou o mellor lugar para comezar a largar o cerco.
Dende que era cativo vivira naquela ría. Coñecía aqueles farallóns coma se fosen
pedras do seu lugar. Cada rocha, cada remuíño, cada furna formaban, dende
sempre, parte do seu ser. Sabía que no Corgo había que botar a rede a partires do
segundo saínte de penedos do nacente, alí onde o fondo é areento e a malla non
queda prendida das rochas. Así que sorteou a ondaxe e chegou ó lugar apropiado.
Botou pola borda a primeira cortiza e víuna quedar boiando na superficie coma unha
bailarina. Deu un par de impulsos á dorna cos remos, e a inercia valeulle para
mandar un par de cortizas máis. A chumbada íase afundindo pouco a pouco mentres
Silverio se extrañaba de non ver peixes naquela auga sempre abundante. Cousa tal
nunca acontecera, nunca viu o mar tan falto de vida así que, premeditadamente,
disminuíu a velocidade da dorna e foi botando a rede amodiño, dándolle tempo ó
peixe a meterse no cerco. Aínda que tardase, o peixe había entrar. Acaso non
entrara sempre?
Pouco a pouco, paseniño, foi pechando o cerco formando un círculo perfecto,
resultado da rutina de toda unha vida. Cando lle quedou só unha boia por largar
preparouse o vello para cumprir co seu ritual. Como cada día levou a man ó rostro e
enxugou a suor, esfregou os ollos, meteu os dedos debaixo da boina e rañou na
testa, respirou profundamente mirando ó ceo cos seus ollos neboentos de carrazas e
pregou a súa oración silandeira. Logo colleu os dous cabos da rede e comezou a
turrar. Moi despacio, amantiñamente, coma se os empurróns lle puidesen facer dano
a malla.
Ós chiscos, o fondo da dorna íase enchendo de rede e argazo. Foi entón cando
comezou a aquelarse. A rede saía da auga con suavidade, nada facía forza no outro
extremo. Non vira aínda peixe ningún enredado no tecido e, preocupado, comezou a
turrar con máis ímpetu, case que violentamente, ata que ó fin a última cortiza foi dar
ás súas mans cumprindo o máis negro dos presaxios. Estaba valeira. Nunca tal lle
sucedera, era coma se o mar estivese morto, coma se non agochase vida no seu veo
azul.
No preciso intre en que a derradeira cortiza caíu sobre a cuberta un lóstrego
alumou o horizonte. Silverio levantou a vista e albiscou coma unhas ameazantes
nubes negras se aproximaban polo poñente. O ronco estoupar do trono chegou
canda el á vez que un forte vento asubiante lle fixo pechar as pálpebras. As ondas
comezaban a medrar coma negras heraldas do temporal que asexaba non moi lonxe,
a vella dorna abaneaba entre elas coma un miserento pau. O mar é traizoeiro,
pensou Silverio. Xa non tiña tempo de volver á vila, así que levou a barca cara ó
pequeno peirao d´As Barxas.
Ó chegar atou firmemente a vella dorna no amarradeiro. A choiva comezou a caír.
Silverio botou as redes ás costas de calquera maneira, colleu o salabardo e comezou
a camiñar cara á casa, mentres as gaivotas sobrevoaban a bandadas o lugar exacto
onde soltara a rede.
*********
O temporal que ameazara á ría ó solpor, co chegar da noite, cumplíu a súa
promesa. Fortes rachas cruzaban o océano para vir arrandear os poxigos das fiestras
da casucha do vello. Choiva, trebóns, friaxe, os altos eucaliptos filtrando as rachas
nas súas copas e renxendo os troncos a piques de partiren... O país do auga facíalle
honra o seu nome. Pouco tardou a poalla en converterse en torboada. Polo
empedrado da empinada costa comezou a acumularse a auga. Ó primeiro era tan só
un reguiño humilde, pero nun choscar dos ollos se transformou en riada entolecida
que ía arrastrando ó seu paso todo o que topaba; ramas vellas, follas secas, estrume
do gando dos camiños, frouma dos piñeiros, movíanse na auga coma absurdas
gamelas. Todo ía cara ó mar, a finar no medio de aquela violencia implacable.
Aquela ía ser unha noite infernal para os barcos ós que o temporal collera
alonxados da costa. Terían que sobrevivir á monstruosa ondaxe antes de achegarse
ó peirao. Os penedos da costa agardaban coma afiados coitelos dispostos a tronzar
as febles naves ó máis mínimo roce. Aqueles barcos estaban tripulados por
esguízaros mariñeiros de facianas curtidas pola adversidade pero, aquela noite, o
tobogán das ondas habíase cobrar máis dunha vida.
Dentro da casucha escoitábase o ruído do vento asubiando nas fendas. As
portas renxían no seu tétrico abanear. Da praia chegaba o son antigo das ondas
coma ruxidos de lobos famentos. Silverio estaba ás escuras na cociña. Sentado ó
carón da lareira buscaba o último alento das languidecentes brasas dunha torada de
carballo. Na entrada ó cuarto, contra o cantareiro, unha pingueira facía sons líquidos
o caír nun enferruxado bacín.
Fumaba un cigarro tras doutro. Sentíase alterado, nervoso, estivera avelaíño
toda a noite, tumbárase no leito tratando de coller o esvaradío sono pero, aborrecido
de dar voltas, ergueuse e foi sentar á cociña. A preocupación pola pesca frustrada
tiña ó seu pensamento atrapado coma a un pardal nas poutas dun miñato. Nunca tal
lle sucedera, endexamáis botara a rede en van, aquilo era moi extraño. Pensou que
quizáis fose a causa do temporal pero non as tiña todas consigo. Estaba ademáis o
outro, aquel bater na porta, aquel misterioso camiñante. Que clase de home podía
porfiar debaixo da choiva por tanto tempo? Que había tan importante naquela casa
como para esquencerse dos elementos dese xeito? Silverio tan só achaba unha
explicación pero... negábase a crer nela, non podía crer nela!
O tempo foi caíndo impasible. A boca da noite foise abrindo e o temporal
parecía medrar de violencia. Silverio toqueneaba sentado ó carón da lareira, entre os
asubíos do vento e o repenicar da auga no tellado. O quente da manta nas costas foi
vencendo o seu desvelo. O cansanzo da pesca e o pouco alimento fixeron que
pechase os ollos e quedase durmido alí mesmo. As brasas acabaron de consumirse e
o cheiro do fume ocupou o ar da cociña. As paredes cubríronse cun veo de vapor
que resaltaban aínda máis as negras manchas de humidade que as poboaban.
*******
A macabra risada dunha gaivota sobresaltouno. O son entrara escorregando
polo tiro da cheminea, probablemente o paxaro estivese pousado no tellado. Silverio
acordou inquedo, desconfiando do que ouvira, aínda que logo caíu na conta de que
tan só era unha gaivota. Fóra comezara a chover a mares. Ergueuse da cadeira,
devagar, para ir buscar unhas follas de xornal. Sentíu a dor da reuma nas pernas.
Sentíu os seus ósos estalar coma barras de xeo. O resío do inverno non é amigo dos
vellos, pensou, e recordou con nostalxía a súa baril mocidade. Deu uns pasos e
chegou a gabeta onde gardaba os papeis, abríuna, cortou media folla e levouna con
el. Pese a que a reuma era tan forte que lle daban ganas de chorar, estaba
acostumado a soportar a dor. A vida é sufrimento, pensou, así que regresou á lareira
e puxo o papel enrugado enriba das cinzas, botou unha presada de follato e máis
unha piña e prendeulle lume cun misto. As lapas extendéronse do papel ó follato
creando unha breve bafarada que chegou ata a gramalleira e baixou de seguido de
intensidade. A piña prendera, así que Silverio engadíu uns poucos anacos de
canaveiras cortadas e uns rachóns de eucalipto. Foi ó cantareiro e encheu un xerro
de auga para pór a quentar no pote.
Foi xusto entón cando bateron na porta. Silverio quedou paralizado, o seu
rostro palideceu coma a neve, cortóuselle a respiración, cravou a mirada na porta
coma quen quere ver do través. Volveron bater. O mesmo bater pausado da outra
noite, irreal, case que mecánico.
Silverio fixo por non facer ruído. Desexou botar unha manta na porta para
impedir que a claridade amarela do lume se coase polas físgoas da madeira, pero
non conseguíu moverse. Arrepiáballe aquela porta, arrepiáballe tan só achegarse a
ela. Mentres, o bater seguía sonando frío, distante, inhumano...
Quixo berrar, quixo ir pola francada e abrir a porta para espetarlla na testa a aquel
malnacido. Cala! pensaba, cala! mentres botaba as mans ás orellas. Pero aquel bater
atravesaba a carne, atravesaba os ósos. Aquel bater non era deste mundo, aquilo
tiña que ser cousa do demo.
Estivo a piques de perder o sentido. Comezou a camiñar pola cociña, amodo ó
primeiro pero logo máis rápido, nervoso coma un carneiro que se sinte ameazado. A
súa ansiedade foi crecendo con cada bater, ata que caíu de xeonllos no chan, preso
do pánico. Tratou de rezar calquera cousa pero na súa mente só topaba blasfemias.
Resfregou os ollos, querendo acordar daquel pesadelo, rañou a testa, os brazos, o
peito. A súa fronte estaba asulagada de suor que esbaraba ata metérselle nos ollos
inmensamente abertos. Non podía máis, a tolemia asexaba no petril, tiña que facer
algo contra aquilo, tiña que se enfrotar co descoñecido. Foi á parede do fondo e
descolgou a francada do cravo onde estaba pendurada. Foi directo ata a porta
fungando e maldicindo. Agora vas ver! agora si Satanás!
Pero, de súpeto, o bater calou. Silverio quedou paralizado coma un
monicreque de pau, á expectativa, co aparello na man. O corazón latexáballe
desbocado, podía sentir o seu rumor no silencio da cociña. Pero... onde fora o vento?
Calara e xa non chovía. O temporal amainara nun bafexo, coma unha morea que se
mete na cova, esperando mellor ocasión para trabar á terra. Aquilo non podía ser, un
temporal non se ía así, tan de socato, coma unha bágoa que cae no mar.
Comezou a tremer. Vacilante, devagar, achegouse ata a porta. A reuma
pasara, sentía as pernas vellas e cansas pero os ósos non lle ferían ó camiñar.
Amarrou a caravilla da porta pero aínda dubidou un intre en abrir. Non estaba
seguro, e se todo era unha astucia daquel camiñante? Unha badalada estremeceu as
aves nocturnas, a campá da igrexa comezou a soar. O badalo golpeaba no ferro
lentamente, emisario dalgunha desgraza acontecida na noite. Silverio pensou que
non podía seguir así. O medo é unha mala compaña, pensou, así que correu o
pasador e abríu a porta bruscamente.
Nada. Ninguén. Alí non había ninguén. Mirou cara ós lados pero non topou
rastro de home algún. Tan só aquelas badaladas tristes. Poido comprobar que non
había vento, nin brisa, nin choiva, non había ondas no mar nin nubes no ceo. Tan só
un firmamento de refulxentes estrelas e alá, no poñente, unha lúa casi chea
pintando na auga tranquila un camiño prateado e palpebrexante.
*******
Coma o día anterior, na auga turquesa e cristalina do Corgo, non se apreciaba
indicio de vida algún. Ningunha sombra, nen breves resplandeceres que delatasen a
presenza dalgún ser despistado perto da barca, nada! Auga morta nada máis, calma,
inmóvil. Non se vían por lado ningún os habituais peixes corcovando ó brincaren fóra
das ondas, nin cormoráns na súa procura, tan só unha bandada de tétricas gaivotas
pelexando no ar. Silverio dudaba se botar as redes. Tiña o estomágo valeiro. Aínda
non comera nada. Os poucos bocartes que lle quedaban, sendo home precavido,
prefería deixalos para a cea. Os dous dedos de caña que bebera ó erguerse bulíanlle
na barriga coma un río de pequenos cristáis de mica. Ó fin decidiuse e comezou a
botar a malla pola borda. Outra vez se lembrou de Maximino, botábao en falta. Non
só porque agora tiña que facer todo o traballo sen axuda. Non era iso, ben
aprendera a valerse el mesmo. O que máis arelaba era a súa compaña, a súa
conversa escasa, os seu calar case que perpetuo. Sentíase extraño sen o seu
compañeiro de angueiras e, aínda por riba, aquel mar tan calmo impensable no
inverno.
Seguíu botando a rede inmerso nos seus pensamentos. Ían e viñan na súa
mente coma anduriñas sobre un prado. Preguntábase que era o que estaba a
acontecer, aqueles fenómenos tan misteriosos; a calma podre no inverno, temporais
que desaparecen coas badaladas... un arrepío fíxoo tremer ó recordar o bater do
camiñante. Deu en pensar que se estaba volvendo tolo, que a súa mente gastada lle
estaba a falar de cousas imposibles. Na vila vira moitos vellos acabaren a vida coma
cativos sen sentido, mexando por eles e falando ó chou. Pero non! Non podía ser.
Aquel bater era demasiado real como para tratarse dunha tolemia... ou dun soño.
Rematou de botar o cerco e preparouse no seu ritual. Enxugou a suor da
fronte, esfregou a vista e rañou a testa por debaixo da boina, mirou ó ceo e
comezou a pregar a súa oración silenciosa. Pedíulle axuda a Deus, ía necesitala. Nun
xesto pouco habitual descubríu a testa respetuoso. A medida que se ía facendo vello,
a súa confianza en Deus medraba. Cando acabou, volveu poñer a boina e respirou
profundamente tratando de coller folgos nos seus pulmóns castigados polo fume do
tabaco.
Xuntou as dúas puntas da rede e comezou a turrar. Amodiño, cortiza a cortiza,
formando pequenas ondas na mar serena. A rede ía caíndo no fondo da dorna con
suavidade, Silverio aprendera a agarimar aquel triste trebello coma se fose parte da
súa carne. Aínda que os seus dedos tiñan mil marcas de cicatrices daquela rede,
aínda que non topase sitio nas mans que non fose ferido por ela, Silverio amaba
aquelas mallas coma un preso odia as reixas que o encerran. Sempre lle tivera
confianza a aquel tecido, por vello que estivese, sempre lle dera que comer. Mais
agora non as tiña todas consigo. Ó recoller a rede sentíaa vir canda el lixeira e
suave. Non había forza do outro lado que lle indicase que algo quedara atrapado no
cerco. Enredado nas celas tan só o argazo, nin peixe grande nin pequeno. Coma se
os habitantes das aguas descubrisen o antigo segredo do aparello de Silverio. Seguíu
turrando, máis por recoller as redes que por esperanzas de ó fin pescar calquera
cousa. E así foi. A última cortiza caíu na borda facendo un ruído seco e oco, coma o
que fai un pardal o bater contra unha fiestra, un ruído que parecía mofarse del.
Silverio amarrou os remos e afundíu as pas na auga. Os seus brazos cansos
comezaron a remar cara á casa mentres, de costas á terra, a súa mirada perdíase
tristeira no horizonte.
*******
Quedou adormecido sobre o colchón de follato ó pouco de tomar a cea.
Estaba rendido. Os escasos bocartes que lle quedaban foron dar ó fondo do
estómago valeiro coma bágoas nun pozo. Non sabe canto tempo durmíu pero cando
acordou xa estaba ben entrada a noite.
O seu descanso foi cativo e tempestuoso. Un angustioso pesadelo deixoulle o espírito
acorado. Non sabía cantas voltas dera no leito pero lembraba perfectamente que
soñara que acordaba nun tétrico camposanto, onde centos de negros paxaros ían
pousarse sobre as sepulturas e se escoitaban, de cando en vez, queixidos tristes e
miserentos de xentes aflixidas. Atravesou o camiño entre as tumbas, recoñecendo
nas lápidas a algúns dos enterrados. Deu varias voltas entre as fileiras de nichos ata
que, á fin, atopou a saída entre dous grandes sabugueiros alumiados por centos de
diminutas lapiñas violetas. Abríu a cancela do cemiterio e botou a andar por un
carreiro estreito e torto. Tivo que atravesar unha fraga de árbores grises coma a
cinza e logo chegou a un prado de herba seca onde milleiros de carricantas
rinchaban a un tempo. O son era insoportable, infernal, por máis que botaba as
mans ás orellas non conseguía desfacerse daquel renxer. As pedras do vieiro
comezaron a moverse dun lado ó outro coma lagartas entolecidas. Colleu medo e
comezou a camiñar máis rápido, tratando de se alonxar daquel lugar. Xemía polo
esforzo pero non podía deixar de camiñar. Levantou a vista e víu un pequeno outeiro
non moi lonxano. No alto había unha casiña branca coa cheminea fumegante.
Escoitou bulir no vento verbas graves e metálicas, verbas que viñan de ningures;
onde vas pailán? dicían, onde vas coitadiño? Logo, unha risada tétrica e prolongada.
Mirou cara ó chan. No pó do camiño formábanse precisas figuras de arrepiantes
bestas que trataban de trabarlle nas pernas. Comezou a correr, os folgos
escaseaban, xemía prolongada e custosamente, pero canto máis rápido corría máis
grandes e violentas se facían as bestas. Ó ollar cara adiante puido ver o outeiro moi
preto, o pensamento de atopar refuxio deulle forzas para correr aínda máis rápido.
Bafexante, subíu polo carreiro que levaba á casiña branca e, aínda que sentía a
risada máis lonxe, non se atrevía a mirar atrás. Entrou no lugar e sentíu unha
instantánea sensación de tranquilidade, coma se aquela fose a súa propia casa.
Había ducías de restras de allos penduradas da fachada, secando ó sol, enormes
cabazos alaranxados sobre unha mesa de pedra, un par de cestas de vimbios con
espigas a medio debullar... Bateu na porta con firmeza. Unha feble voz preguntou
dende o interior, quen é? Son eu, Silverio! contestou o vello. A porta abríuse
lentamente e tras dela apareceu un home vestido cun traxe negro. Cando Silverio
alzou a mirada quedou arrepiado. O habitante da casa tiña a pel escamada, de cor
verde, unha lingua bífida que ós poucos expulsaba entre dous afiados cabeiros e uns
ollos amarelos e vítreos de ofidio que semellaban atravesalo. De súpeto abríu os ollos
e xa non soñou máis, aínda que seguíu vendo aqueles ollos de serpe onde quer que
mirara.
Pasou un longo tempo de angustia. Non se daba quitado da cabeza aquel mirar de
meniñas verticais, aquela pel de reptil que lle producía insoportable fasquío. Respirou
fondo e comezou por pensar nas rúas da vila, no día da feira, nas peixeiras facendo
a poxa da pesca... e así, ós poucos, conseguíu recuperar a calma. Tiña que
esquencerse daquel pesadelo, a súa cordura esixíallo. Deu en pensar no presente, no
real, a súa situación era moi apurada. Aquilo non podía seguir así, as tripas renxíanlle
no ventre coma portas húmidas. Ó día seguinte tería que pescar calquera cousa se
non quería sufrir coa fame. Foi a cociña e servíuse un par de dedos de caña, agardou
a que o fino gaspallo asentase no fondo do vaso e bebeuno dun grolo. Logo foi cara
o andel e colleu a lata do tabaco, abríuna e botou un pouco de picadura na man.
Envolveuna no papel de arroz e prendeulle lume. Á vez que fumaba ía lembrando os
seus movimentos da tarde anterior, pero por máis que rebuscaba na memoria, non
topaba ningún erro, non fixera nada anormal, nada distinto do que levaba facendo
dende había décadas. A causa non era el, iso estaba claro, nin da rede que estaba
en perfecto estado, a causa era do mar que semellaba estar morto.
Finísimas columnas de fume saían da punta do cigarro formando imperceptibles
ondas ó subiren cara o teito. Un par de gatos miañaban fóra, sentíase o rañar das
súas gadoupas bulindo aquí e acolá. Silverio comezaba a ter un pouco de frío. A
temperatura baixara de súpeto. Foi ó cuarto, colleu a manta da cama e botouna
sobre as costas. Regresou a cociña a seguir fumando no cigarro. Puido ver á
columna de fume do tabaco movéndose dun lado ó outro, bailando ó ritmo que
algunha furtiva brisa lle marcaba.
No preciso intre no que Silverio sentou na cadeira unha violenta racha de vento
golpeou a porta e as fiestras e, simultaneamente, comezou a treboar. O vello quedou
pasmado, de donde saíra aquela tronada? Cando se metera na cama o ceo estaba
totalmente despexado, sen nubes á vista nen vento nas árbores. Sen embargo, aí
estaba o temporal, inesperado e violento, como se un escoler pillabán andivese
argallando no horizonte. Pronto comezou a sentir barullo de auga no tellado. A
pingueira da cociña comezou a filtrar líquido que repenicaba ó cair no bacín
enferruxado.
Silverio deixou o cigarro na cuncha de vieira que facía as veces de cinceiro e se
ergueu traballosamente. Quería ver que clase de temporal lle agardaba aquela noite.
Deu uns pasos cara a porta arrastrando as súas pernas vellas e preguiceiras e botou
a man á caravilla. Foi entón cando bateron na porta. Un batido seco e illado,
pausado, logo outro e outro. Unha bandada de pegas pousouse nalgunha póla perto
da casa e comezou a berrar o seu lúgubre balbordo. Silverio quedou xeado coma un
carambelo, retirou a man do pecho e retrocedeu un paso, quizáis porque pensara
que o camiñante podería atravesar a porta.
A noite anterior collera a francada para guindarlla na testa a aquel malnacido, pero
ese impulso desaparecera, a carraxe que entón o cegaba minguara
inexplicablemente. Tan só consevaba agora unha sensación de desacougo e
desconfianza.
- Ábreme Silverio, ábreme a porta.
Outra volta aquel falar profundo e grave, aquela voz plana que non era deste
mundo. Agora Silverio non sabía que facer. Estaba desconcertado. Por unha banda
quería abrir, pero lle faltaba coraxe; por outra, quería que todo aquelo fose un soño,
un mal pesadelo do que acordar. Quería abrir os ollos e comprobar que aquel
extraño nunca estivera alí.
- Ábreme Silverio, ábreme.
- Vaite de aquí espantallo!
- Ábreme, son eu.
- Vaite por onde viñeches, fillo dun demo! Vaite e non volvas!
- Son eu, ábreme. Son Maximino.
Que foi o que dixera? Silverio quedou paralizado, anulado, transformado en
pedra. Dixera Maximino, sen dúbida algunha dixera Maximino. Non o podía crer.
- É que xa non te lembras de min? Son Maximino.
Silverio quedara mudo. Non sabía que dicir, non sabía que pensar. Sempre
sospeitara da identidade do misterioso camiñante. No máis profundo do seu ser
sempre pensara que aquel visitante non podía ser outro que Maximino. Quen senón?
Quen aturaría o vento e a choiva, a friaxe e a treboada, só para bater na súa porta?
E así seguía aquel extraño, Maximino ou quen fose, a bater na porta con aqueles
golpes pausados, enfermizos.
- Ábreme, son Maximino. É que xa nen te lembras de min?
- Vaite fillo dun demo! – Silverio mantíñase firme aínda que a dúbida escoaba na súa
voz – Maximino está morto!
De seguido se escoitaron pasos no empedrado. Bastou dicir aquelas últimas
verbas para que o camiñante espantase. Silverio sentíuno baixar pola costa mentres
a dúbida se agrandaba na súa mente, rexa e forte coma un penedo. Foi cara a porta
mentres pensaba que aquilo non podía ser, que a súa mente de vello lle estaba
facendo mofa. Acaso non botara el mesmo terra sobre o cadaleito do seu amigo?
acaso non vira medrar a herba sobre a súa sepultura? Botou man do pasador
mentres se extrañaba de non ouvir pingueira ningunha caíndo do tellado, nen vento
mexendo as contras e, aínda que era inverno, sentía un calor pegañento coma se o
máis forte calmizo do vran estivese a cubrir o mundo. Entón se lembrou da casa do
pesadelo. Da sensación parecida que vivira ó entrar no lugar. Aquela apariencia de
quentiño benestar, aquela porta farta de alimentos, os ollos de serpe craváronselle
no pensamento coma afiados aguillóns. Comezou a suar, as pernas tremíanlle, a cara
se lle puxo pálida coma a pedraza. Quedou totalmente paralizado, aterrado, a piques
estivo de deixarse vencer por aquela mirada penetrante. Sen embargo, unha idea,
coma unha branca pomba, lle cruzou na mente. Dixera Maximino, dixera Maximino.
Maximino non lle había facer mal. Sen mais, correu o pasador.
Cando abríu a porta xa non había ninguén. Instintivamente ollou a un lado e ó
outro e comprobou que alí non había máis que a solaina da súa vella casucha e máis
el. A prateada luz da lúa chamou a súa vista coma os ollos da serpe chaman a
mirada do rato. Mirouna fixamente como se aquel brilar escondese algunha resposta.
Foi entón cando caíu na conta de que algo inaudito estaba a acontecer. Aínda que
era inverno, os seus vellos ouvidos enchíanse co canto de milleiros de grilos e cos
asubíos dos rousiñoles nos piñeiros, mentres un lixeiro barbadelo sopraba dende o
sul.
*******
Xa o risol andaba a tinguir as nubes cando Silverio chegou ó Corgo das
Barxas. O mesmo lugar de sempre, as mesmas redes, o mesmo actuar pausado.
Hoxe tería que pescar calquera, levaba xa bastantes días sen encher o bandullo.
Miraba cara á profundidade daquela auga pero, por máis que buscou no medio das
imperceptibles ondas, non topou sinal algún. Nin sombra nin destelo que delatase a
presenza de vida, nin sequera víu os pequenos biscallos que, inxenuamente,
adoitaban rodear a dorna. A auga seguía extrañamente calma e igual de morta que
nos días anteriores. De todos modos tiña o presentimento de que a súa sorte ía
mudar, sabía case con seguridade que a rede non volvería caír valeira sobre a
cuberta da dorna. Así que comezou a largar o cerco facendo o posible por afogar os
negros presaxios que asomaban na súa mente.
Foi botando unha a unha as cortizas pola borda, paseniño, coma un amante
que acariña os cabelos da súa namorada. Víu afundirse a chumbada entre o argazo e
a corrente, namentres remaba ós poucos para coller impulso. O ceo estaba
totalmente cuberto de nubes brancas, aínda que polo poñente comezaban a asomar
máis oscuras. De todas formas, Silverio tería tempo de recoller a rede antes de que
caísen as primeiras pingueiras.
Foi trazando o círculo, lentamente, devagar, ata que chegou a primeira
cortiza. Coma sempre, os dous cabos coincidían. Coma un cesteiro que leva toda a
vida trenzando o vimbio, podía facer aquel traballo cos ollos pechos. Xuntou os dous
cabos do cerco na auga preparándose para o seu ritual particular. Foi entón cando
caíu na conta de que non añorara a Maximino á hora de facer aquela laboura el só.
Poida que xa se estivese acostumando a súa ausencia, quizáis porque aquel
camiñante se identificara como o seu amigo, o caso era que non sentía unha tristura
tan grande polo seu compañeiro, se cadra, un lene desazo por deixalo só baixo a
choiva. Simplemente botara o cerco sumido nos seus pensamentos, e así ten que ser
de agora en diante, pensou, hai que deixar ós vivos vivir e ós mortos descansar en
paz.
Enxugou a suor da cara, esfregou os ollos, rañou a testa por debaixo da
boina e ollou cara o ceo bisbando a súa misteriosa oración, daquela
extraordinariamente longa. Cando rematou, colleu folgos profundamente e
afundíu as mans na auga para coller os cabos da rede. Estaba xeada, sentíu o
efecto da humidade nos seus dedos enxoitos coma se apañara unha presa de
ourizos. Pero a súa vontade de ferro non lle permitía rendición algunha, así
que, apretou os dentes e comezou a turrar.
Ó igual cos días pasados, a rede viña canda el suave e mol como una
folla de papel, sen outra colleita que algunha que outra folla de alga. Comezou
a inquedarse. Tivera posta toda a súa fe naquel día, a grande premonición que
tivera ó mencer, pouco a pouco se ía desmoronando, como un castelo de area
á beira do mar. Sen embrago, fixo por non pensar no fracaso e seguíu
turrando, se cadra máis amodo, como non querendo chegar ó final. Foi entón
cando ouvíu unha voz nas súas costas; o esquecimento é mal compañeiro, dixo.
Silverio deu a volta alarmado pero alí non había ninguén. “O esquecimento é
mal compañeiro”. Que querían dicir aquelas verbas? Quen ou que ser invisible
aparecera ás súas costas para lle falar?
Como podía ser? Como lle podía chegar voz algunha ata alí? Non achaba
explicación e unha idea, coma un lóstrego, víu a retumbar no seu pensamento,
estás a volverte tolo. As tebras creceron no seu interior. E se fose así? Xa non
sabía que pensar, xa non sabía no que crer. Os seus sentidos, o seu
razoamento, dicíanlle que aquilo non era posible, que as verbas tiñan que saír
dalgún home presente. Sen embargo, o seu sentimento devecía porque
Maximino estivese alí con el. Deu en pensar que a soidade do mar e do inverno
estaban a murchar a lucidez da súa mente. Víuse a si mesmo perdendo o norte,
desvariando polas rúas, víu un feixe de rapaces andar tras del tirándolle pedras
e meténdolle ras nas súas cirolas cheas de trancallos. Necesitaba acougo, non
pensar, necesitaba estar tranquilo e recuperar o equilibrio. Fixo o posible por
concentrarse na pesca e espantar aqueles funestos pensamentos, pero eran
tantos e tan extraños os acontecementos dos últimos días que necesitaría un
milagre para poder deixar de pensar naquilo.
E o milagre apareceu. Sentíu que algo na outra banda da rede facía forza. Era
unha forza morta, coma se estivese arrastrando algo que non se movía, sen
embargo, Silverio se alegrou daquilo coma un labrego que sinte o arrecendo da
choiva no vran. Deu un pequeno empurrón violento e a malla fixo máis forza.
Si, alí algo había, algo que non deixaba á rede escoar a auga con facilidade.
Coidadosamente, coma quen arrola un cativo nun berce, foi subindo a malla a
bordo. Pouco a pouco foron caíndo as cortizas na borda mentres o vello
enrugaba a fronte albiscando miraxes entre as augas. Ó cabo, distinguíu na
profundidade unha forma extrañamente redonda vindo cara á superficie. Púido
ver algunhas cores no lombo daquel estraño ser, matices verdes e vermellos,
tonos amarelos e fucsias difuminados polo movimento que a rede producía no
mar. Dunha cousa estaba seguro, aquilo que pescara, sen dúbida, non era un
peixe. Achegábase a pesca inminente como un tornado e entón recoñeceu con
claridade que era aquel misterioso obxecto, o que non comprendía era que
agochado propósito tiña todo aquilo. Esfregou os ollos fortemente, coma se
puidese borrar da súa vista aquel achado, coma se ó deixar de os esfregar, ó
volver a aclararse a mirada, aquela funesta pesca desaparecese. Pero non foi
así. Silverio volveu mirar cara ó mar e puido ver, e acreditar entón, que contra
o estribor da dorna estaba a bater unha coroa de flores dun funeral.
*******
Outra vez volveu o vento a bater nas fiestras, a asubiar polas fendas e
polo tiro da cheminea. A choiva comezou a caír coma un lene froallo pero
subitamente se transformou en violenta torboada. A pingueira da cociña
comezou o seu concerto ó cair no bacín enferruxado. A luz resplandecente dun
lóstrego alumou por embaixo da porta, enchendo de claridade o chan da
cociña. Ó lostrego seguíulle un trono bronco e tremolante, un canto profundo
saído da boca do ceo. Sentíronse uns pasos na solaina, un troupeleo pausado e
solemne, un camiñar tranquilo e sen presa, coma o de quen vai facendo
procesión. Logo, o bater na porta; un, dous, tres golpes secos e separados,
febles pero rotundos.
- Ábreme Silverio. Son eu, Maximino.
Pero esta vez Silverio nin se inmutou. Podería dicirse que se acostumara a
aquela situación tan extraña, que se habituara a visita dos mortos. Sen
embargo, o motivo da súa tranquilidade era outro. O vello perdéralle o medo a
tolemia, perdéralle o medo ós ollos feiticeiros do ofidio. Quizáis porque pensara
que se realmente era Maximino o que batía na porta, ningún mal lle esperaba
do outro lado. Así que se esquenceu de serpes e de agoiros, se esquenceu da
vertixe do descoñecido e confiouse cegamente á amizade. Ergueuse da cadeira
sosegadamente. A reuma metida nos ósos xa era parte del, xa non doía tanto
ou, cando menos, aprendera a aturala coma a un mal veciño. Foi despaciño
cara á porta mentres o bater continuaba baixo a choiva. Non houbo dúbida nin
receos, non houbo arrepíos daquela. O destiño estaba escrito na noite con tinta
indeleble. Tomou o caravilla coa man e empurrou o pasador. A choiva pareceu
parar subitamente, o vento calmou ó instante e os lóstregos desapareceron do
ceo coma se nunca existisen. A porta emitíu un renxido prolongado mentres se
abría. A luz arxentina da lúa chea foi conquistando ás languidecentes sombras
da casa ata chegar a pratear completamente o rostro de Silverio e o branco
encalado das paredes da cociña.
Silverio víu a Maximino agardando no petril. Ía vestido elegantemente,
co traxe negro que lle servira de mortalla, afeitado e co branco cabelo peiteado
cara atrás, mentres sostiña coas dúas mans, en claro sinal de humildade, a
boina contra o ventre. Por ironías da vida, a Silverio deulle a impresión de que
o seu camarada gozaba de boa saúde.
- Boas compañeiro.
- Ola Maximino.
- Preciso que me fagas un servizo.
- Cala, non paga a pena que fales. Xa sei o que ves buscar.
Silverio saíu da casa deixando a porta aberta. Cruzaron a entrada do
lugar e foron camiñando cara a praia. No enlousado da estrada sentíanse os
pasos dos homes quebrando o ciumento silencio da noite, creando perfecta
armonía co sinistro canto das gaivotas que sobrevoaban o ceo no alto.
Ían calados, non facían falla verbas, dende había moito tempo selárase
unha calada comunión entre aqueles dous homes. Non era preciso que dixesen
nada para se entenderen. Sen embargo, Silverio tiña o corazón colmado de
ledicia porque recuperara, aínda que só fora por aquela noite, a arelada
compaña do seu camarada.
Chegaron onde a dorna e retiraron as amarras, turraron do bote
facéndoo esbarar pola area. Entre os dous aquel era un traballo sinxelo. Cando
a madeira comezou a boiar subiron a bordo cos pes asulagados, coma nos
vellos tempos. Silverio colleu os remos mentres Maximino guiaba o leme.
Paseniño fóronse adentrando no mar cara ó poñente. Dende a terra íanse
facendo pequenos ata desapareceren por completo. Coma unha de tantas
sombras, no camiño prateado e palpebrexante que pinta a lúa chea sobre o
mar.
¡Esta noite morreu a calma!
¡Esta noite soplou o vento!
¿Onde foi a súa alma?
¡Din que lla levou o demo!