Upload
erlet-shaqe
View
552
Download
8
Embed Size (px)
DESCRIPTION
Marrëdhëniet ndërkombëtare (m-n) gjatë shekullit XX, e veçanërisht pas vitit 1945, kanë pësuar ndryshime të mëdha. Ajo që bie në sy është numri i shteteve, që janë aktorët kryesorë të m-n, i cili ka ardhur duke u rritur, nga 40-50 në vitet 1900-1945 deri në mbi 190 pesëdhjetë vjet më vonë. Pas një përvoje të shkurtër e fatkeqe të Lidhjes së Kombeve në periudhën mes dy luftërave botërore, u krijua OKB, një arenë e madhe ku pleksen shtete të fuqishëm dhe të dobët, të pasur dhe të varfër, xhelatë dhe viktima, një lloj qeverie e botës, utopike dhe e papërkryer, por mjaft e domosdoshme për të sfiduar anarkinë në m-n.
Citation preview
Krizat dhe marrëdhëniet ndërkombëtare
Marrëdhëniet ndërkombëtare (m-n) gjatë shekullit XX, e veçanërisht
pas vitit 1945, kanë pësuar ndryshime të mëdha. Ajo që bie në sy është
numri i shteteve, që janë aktorët kryesorë të m-n, i cili ka ardhur duke u
rritur, nga 40-50 në vitet 1900-1945 deri në mbi 190 pesëdhjetë vjet më
vonë. Pas një përvoje të shkurtër e fatkeqe të Lidhjes së Kombeve në
periudhën mes dy luftërave botërore, u krijua OKB, një arenë e madhe ku
pleksen shtete të fuqishëm dhe të dobët, të pasur dhe të varfër, xhelatë dhe
viktima, një lloj qeverie e botës, utopike dhe e papërkryer, por mjaft e
domosdoshme për të sfiduar anarkinë në m-n. Historikisht shtetet janë
ndeshur mes tyre në mënyra nga më të ndryshmet : mosmarrëveshje
diplomatike, konflikte tregtare e doganore, luftëra të mëdha ose të vogla,
më natyrë fetare ose civile, etnike ose fisnore, koloniale ose revolucionare,
ato mund të jenë bërë për rrëzimin e tiranëve ose lirinë e njerëzve, për dalje
në det ose për zotërimin e pasurive dhe zgjerimin e territoreve.
Që këtej del, se sipas studiuesit të njohur H. Morgenthau, në themel të
shoqërisë ndërkombëtare gjenden dy faktorë: njëri është diversiteti, tjetri
është antagonizmi i elementëve të saj, i kombeve të veçanta. Kjo
shumëllojshmëri formash të antagonizmit në m-n dëshmon për momentet e
vështira që kalojnë marrëdhëniet mes shteteve, të cilat sintetizohen si kriza
ndërkombëtare. Ky është rast mjaft i veçantë në histori, kur koha ndalon
rrjedhën e saj, çasti kur vihet në pikëpyetje fati i njerëzimit dhe kur shtetarët
pyesin vetveten për vendimet që do marrin dhe kur nuk dinë ende se si do
të zgjidhin konfliktin dhe shtegun e rrezikshëm që duhet të zgjedhin, i cili
ndan frikën nga shpresa dhe paqen nga lufta.
A. Koncepti mbi krizën ndërkombëtare
Shpesh herë duket sikur jetojmë në një epokë krizash të përhershme.
Pas viteve 1990, përcaktime të reja janë përdorur për termin “krizë”, të cilat
përfshijnë një gamë të gjerë ngjarjesh ndërkombëtare: si p.sh. kriza e Afrikës
së Jugut, kriza e Lindjes së Mesme, kriza e Ballkanit apo e ish-Jugosllavisë,
kriza e borxheve, kriza e ushqimit, janë disa prej shembujve të shumtë. Disa
1
karakterizohen nga dhuna, si në Afrikën e Jugut, Lindjen e Mesme, Ballkan,
ndërsa të tjera jo, si ajo e borxheve dhe e ushqimit.
Për qëllimin tonë, kërkohet një përcaktim më i ngushtë. Një prej
përcaktimeve të dobishme mbi shpërthimin e krizës kërkon katër elementë:
Prioritet i lartë i qëllimeve i shtetit që kërcënohet;
Kohë e kufizuar në dispozicion përpara se ndërmerren veprime;
Situatë e paparashikueshme në pjesën më të madhe të rasteve;
Situata nuk shkallëzohet deri në konflikt të armatosur.
Krizat dhe konfliktet ndёrkombёtare, veçanërisht ato nё Evropë,
përbëjnë tiparin më të rёndёsishёm të m-n pas vitit 1945, pra periudhës së
Luftës së Ftohtë. Kriza e Berlinit (1958-1961) dhe kriza e raketave në Kubë
(1962), janë ato ndër më ato më klasiket e kësaj periudhe. Por krizat nuk
janë kufizuar vetëm në marrëdhëniet Lindje-Perëndim, madje edhe sipas
kriterit të përcaktuar si më sipër. Kriza e pengjeve në Iran (1979), p.sh.
plotëson kërkesat e një krize të vërtetë ndërkombëtare: prioritet i lartë i
objektivave amerikane, në lidhje me sigurimin e legatës diplomatike në
Teheran, që ishte e kërcënuar; administrata e presidentit Karter e
konsideronte situatën tepër shqetësuese; kapja peng e diplomatëve
amerikanë ishte e paparashikuar; situata nuk u shkallëzua në konflikt të
armatosur.
Studimi i krizave ndërkombëtare është një dukuri e vonë, jo më shumë
se gjysmë shekulli. Analizat e para u shfaqën në mes të viteve 1970. ShBA,
të nxitura nga kriza e raketave në Kubë, u bënë pararendës të këtyre
studimeve. Koncepti crisis management lindi nga studimet e kësaj periudhe
dhe u shndërrua në disiplinë për studimin e m-n. Prej këtyre përpjekjeve të
para për analiza dalin dy aspekte me rëndësi: kriza në m-n është një dukuri
e veçantë dhe me një rëndësi të jashtëzakonshme; ka një mungesë thuajse
të plotë mirëkuptimi mbi atë se çfarë është kriza saktësisht. Ky paradoks në
dukje mund të shpjegohet me dy mënyra: në radhë të parë, duke ditur
numrin e madh të krizave gjatë shekullit të XX, vihet re një kompleksitet i
madh i fenomenit; sipas autorëve dhe përcaktimeve të bëra, nga kriteret më
kufizuese deri tek më të zgjeruarat, numri i krizave varjon nga disa qindra në
disa mija.
2
Kriza mund të përcaktohet si një moment ndërprerje ose ndryshimi i
beftë brenda një sistemi të organizuar. Në aspektin ndërkombëtar ajo mund
të jetë rezultat i një gjendje tensioni, apo i një qëllimi voluntarist ofensivë i
një prej aktorëve të shoqërisë ndërkombëtare. Në çfarë do lloj rasti, kriza për
arsye se ajo është mbartëse e rreziqeve për sigurinë kombëtare ose
ndërkombëtare, kërkon që të merren me shpejtësi vendime e duhura dhe të
gjenden mjetet e përshtatshme për ta zgjidhur. Kriza ndërkombëtare përbën
kështu një dukuri të mprehtë dhe jo një kronikë, ku për pasojë, dinamika e
vendimmarrjes është anormale dhe e jashtëzakonshme. Kriza mund të
përkufizohet ndryshe edhe si një gjendje midis paqes dhe luftës.
Aktualisht, në dy dekadat e fundit, krizat ndërkombëtare nuk janë
detyrimisht ndërshtetërore. Në botën e pas Luftës së ftohtë, shtetet nuk
kanë as monopolin e dhunës së armatosur as atë të fuqisë ekonomike e
madje ushtarake. Shtetet nuk janë më aktorët e privilegjuar të lojës
ndërkombëtare. Në një farë mënyre, roli i tyre po dobësohet dhe
ngandonjëherë preferohet ti akordohet kujdesi i zgjidhjes së konflikteve,
organizmave ndërkombëtare, që po kthehen gradualisht aktorë të krizave
dhe rregullimit të tyre.
B. Krizat, luftërat dhe konfliktet ndërkombëtare
Mosmarrëveshje, konflikte, kriza dhe luftërat zakonisht karakterizojnë
m-n. Mungesa e konflikteve mes shteteve është e rrallë. Historia jep pak
shembuj të jetesës së njerëzve, shoqërive ose shteteve pranë njeri tjetrit për
një farë kohe, pa manifestuar herët a vonë mosmarrëveshje ose konflikt
pikëpamjesh apo interesash. Këto mosmarrëveshje në se janë të thella
bëhen shkak për kriza dhe rrezikojnë, po qe se ashpërsohen, të çojnë në
luftë.
Por si mund të dallojmë krizën nga mosmarrëveshjet dhe luftërat? Cili
është pragu kur kalohet nga njëra gjendje në tjetrën? Cilat janë raportet mes
tyre? Si mund t’i dallojmë ato?
Kriza dhe lufta përfaqësojnë dy nën-kategori të një dukurie më të
gjerë, konfliktet ose mosmarrëveshjet ndërkombëtare. Në kuadrin e këtyre
3
konflikteve ndërkombëtare ose mosmarrëveshjeve, marrëdhëniet mes
shteteve marrin katër forma të ndryshme:
konflikte ndërkombëtare pa kriza dhe luftëra;
kriza që nuk çojnë në luftë;
kriza si përgatitje për luftë;
lufta ose konflikti i armatosur.
Në rastin e parë kemi një gjendje tensioni permanent që zgjat në kohë,
e paqëndrueshme dhe shpërthyese. Shtetet kërcënojnë njeri tjetrin në
mënyrë pak a shumë të fshehur ose të hapur. Por në se kërcënimi me
përdorim armësh mbetet një eventualitet, marrëdhëniet mes dy shteteve në
konflikt mbeten relativisht normale dhe thuajse paqësore. Në rastin e dyte,
kriza që mund të ketë si shkak direkt ndodhi të ndryshme (vendime,
rrethana, aksidente), përcakton marrëdhënie tepër të veçanta mes shteteve.
Atëherë këta përballen papritur me një gjendje në dukje e vështirë dhe e
mbarsur me rreziqe. Menjëherë duhen marrë vendime, që mund të shpien
në reagime të ashpra e të dhunshme nga pala tjetër.
Krizat, (rasti i tretë), të cilat çojnë në luftë (rasti i katërt), janë
relativisht të pakta. Në shekullin e XX, shumica e krizave kanë qenë nën
kontroll, qoftë në mënyrë jo të dhunshme, qoftë me anë të një përdorimi të
kufizuar të forcës. Por përse atëherë ndodh që krizat të klasifikohen
ndonjëherë brenda tipologjisë së luftërave? Thjesht sepse mendohet se një
përqindje e konsiderueshme e krizave shkallëzohet në dhunë dhe luftë.
Megjithatë, evidencat sasiore tregojnë se shkallëzimi i krizave drejt luftës
është bërë më pak i dendur dhe kjo për arsye të rritjes së kostos së
luftërave. Nga pikëpamja historike, sipas një studimi të bërë mbi 217 kriza
që kanë ndodhur nga viti 1929 deri në vitin 1985 dallojmë:
kriza që nuk kanë çuar në luftë, 65% e rasteve;
krizë e pasuar nga një luftë, 12% e rasteve;
kriza që ndodhin gjatë luftërave, 23% e rasteve.
Konkretisht në rastin e fundit, disa studiues amerikanë përpiqen të
dallojnë kriza brenda luftërave: beteja e Stalingradit ose zbarkimi në
Normandi përbëjnë kriza për Gjermaninë naziste, ndërsa ndalimi i sulmit të
Aleatëve në malet Ardene (dhjetor 1944), ishte krizë për këta të fundit.
4
Një krizë me zgjidhje të kënaqshme mund të rregulloj problemet dhe
të zhdukë tensionet dhe mosmarrëveshjet që kanë qenë shkaku i saj. Por ka
gjithashtu shumë mundësi një rikthim i gjendjes së tensionit që parapriu
krizën, madje një tension edhe më i fortë. Ecuria e ngjarjeve mund të ndjekë
një rrjedhë më dramatike dhe kriza përfundon realisht me luftë. Ky është
rasti, kur gjatë shekullit të XX, kjo ka ndodhur afërsisht një në dhjetë raste.
Pra kriza nuk është luftë. Krizat mund të shihen si një fazë speciale në
marrëdhëniet mes aktorëve ndërkombëtarë. Ato, në një kuptim klasik janë
manifestime të kushteve “as luftë dhe as paqe”.
Lufta ose konflikti i armatosur janë shpesh produkt i krizave të
menaxhuara keq. Lufta ndryshe nga kriza, përcaktohet si një instrument i
politikës shtetërore dhe konsiderohet si një formë relativisht e re e dhunës
së organizuar. Një luftë, megjithatë, shpesh përbën një krizë për një vend të
tretë, i cili nuk është implikuar direkt ose menjëherë, por që mund të jetë në
mënyra të ndryshme gjatë zhvillimit të mëtejshëm të një konflikti të caktuar.
Për gjatë viteve 1980 dhe 1990, luftërat civile në Liban, Kamboxhia, Somali
apo ish-Jugosllavi, megjithëse nuk implikonin direkt ShBA ose aleatët e tyre
perëndimorë, përbënin për këto vende kriza ndërkombëtare të rrezikshme.
C. Fazat e krizës dhe karakteristikat e tyre
Kriza është një gjendje ndërprerje përgjithësisht momentale dhe e
përkohshme në marrëdhëniet mes shteteve. Ndërkaq, kjo gjendje mund të
zgjasë javë madje dhe muaj. Kriza evoluon në funksion të vendimmarrjeve
dhe rrethanave. Një krizë ndërkombëtare tip zhvillohet përgjithësisht sipas
katër fazave të dallueshme nga njëra tjetra:
para-kriza,
shkallëzimi,
detanta,
ndikimi, ose rezultati i krizës që merr në konsideratë aspekte të
ndryshëm të ekuilibrit të ri të krijuar nga rregullimi i krizës.
Para-kriza është një periudhë tensioni jo-normal, por e kufizuar në
marrëdhëniet konfliktuale mes dy ose më shumë aktorëve. Kjo është një
fazë e rrezikshme, e cila po të mos kontrollohet dhe rregullohet, degjeneron
5
papritur me rast ngjarjesh që mund të ndezin fuçinë e barutit. Atëherë
ndodh ndërprerja e marrëdhënieve, ajo çka nuk duhej të ndodhte, pasi ajo
fshin çdo gjë, duke filluar nga vullneti i mirë. Kjo ndërprerje ndodh në tre
mënyra të mundshme: - një veprim armiqësor si p.sh. marrja peng e një
territori nga një shtet në dëm të një vendi fqinj; - një ngjarje destabilizuese si
vrasja e një kryetari shteti; - një ndryshim i frymës ndërkombëtare si p.sh.
një deklaratë e njëanshme aneksimi territorial.
Shkallëzimi si fazë lidhet me një prishje të thellë të ekuilibrit
ndërkombëtar dhe rreziku i luftës rritet ndjeshëm. Ngjarje të tilla si :
deklarata shtetarësh, shfrenime mediatike, manifestime nacionaliste,
demonstrime ushtarake, ose ultimatume ndaj akteve që gjykohen si të
papranueshëm, e rëndojnë jashtëzakonisht situatën. Adoptimi i masave
mbrojtëse nga një shtet, që vështrohet nga një shtet tjetër si shtim i rrezikut,
shkakton si reagim kundër-masa dhe ushqen procesin e shkallëzimit. Kjo i
përgjigjet tipit të marrëdhënieve ndërvepruese që modifikojnë tërësinë e
marrëdhënieve.
Ky çast, kur tensioni ka arritur kulmin është mjaft i rrezikshëm. Faktorë
emocionalë, psikologjikë ose irracionalë rrezikojnë të ndikojnë mbi
vendimmarrjen e drejtuesve. Ankthi dhe nervozizmi, i zënë vendin gjykimit
në qetësi. Opinioni publik, i manipuluar, reagon befasisht ndaj ngjarjeve dhe
luan një rol të veçantë herë në favor e herë kundër qetësimit të situatës.
Në këto rrethana kriza është afër me luftën dhe kalimi nga njëra tek
tjetra është i lehtë por dhe i frikshëm. Faktorët që shndërrojnë krizën në
luftë gjenden në karakteristikat e sistemit ndërkombëtar, shtetet-aktorë e në
natyrën e vetë krizës. Një sistem ndërkombëtar i bazuar në ekzistencën e
shteteve sovranë, mes të cilëve mosmarrëveshjet janë të thella e të vjetra,
ku konfliktet e shkuara janë të gjalla në kujtesën kolektive, është i
përshtatshëm për kalimin nga kriza në luftë. Përdorimi i dhunës në të
kaluarën përbën një precedent me rrezik, pasi kjo shihet si një mundësi e
madhe që kriza të degjeneroj në luftë.
Kalimi nga kriza në luftë mes shteteve favorizohet nga katër rrethana
të caktuara:
6
1- Ekzistenca e një çekuilibri të thellë në raportet e forcave, ndikon në
zvogëlimin e kostos së një lufte dhe në pasigurinë e zgjidhjes së saj.
Shteti më i fuqishëm natyrisht nxitet të mos frikësohet nga shkallëzimi
madje as edhe nga vetë lufta.
2- Paqëndrueshmëria e brendshme e një ose e disa shteteve favorizon
nxitjen e luftës. Drejtuesit e shteteve të paqëndrueshëm, të
preokupuar për të kapërcyer tensionet e brendshme, mund ta gjejnë
me leverdi të orientojnë vëmendjen e publikut të tyre drejt rreziqeve
të jashtme, burim i të “gjitha të këqijave”. Kjo është një prirje e
zakonshme për regjimet autokratike. Por nga ana tjetër, kjo dobësi e
brendshme e shteteve të paqëndrueshëm i bën ata më të cenueshëm.
Shtete të tjerë mund të përpiqen të përfitojnë nga dobësia e tyre dhe
të mos tuten nga shkallëzimi i konfliktit. Dy shtete të pa qëndrueshëm,
në gjendje krize mes tyre, në mënyrë të natyrshme tentojnë të hyjnë
në luftë.
3- Një shtet ndjehet i kërcënuar në atë çka ai e konsideron jetike për
ekzistencën ose mbijetesën e tij. Sa më shumë shteti vlerëson si
themelore interesat dhe vlerat e rrezikuara nga kriza, si tërësia
territoriale, sigurimi kombëtar, ekzistenca e vendit, aq më shumë ky
shtet tenton të marrë përsipër rreziqe që mund të çojnë në luftë.
4- Gjeografia luan rol në dinamikën e procesit krizë-luftë. Afërsia
territoriale mund të acaroj shqetësimet e vendimmarrësve përballë një
rreziku të pritshëm, në momentin kur nuk ka kohë në dispozicion për
të vepruar dhe kur rreziku i ndeshjes është i madh.
Njohja e këtyre faktorëve rëndues mund të ndihmoj në sensibilizimin e
shtetarëve për rreziqet e degjenerimit të një krize, me qëllim që një
shkallëzim i pakontrolluar të mos çoj në një konflikt të armatosur. Kontrolli i
një tipi të tillë mosmarrëveshjesh, do të thotë të pengosh shkallëzimin, do të
thotë të veprosh në mënyrë që të ruash kontrollin e situatës me qëllim që, si
rezultat të kalohet nga kriza në detantë pa pasur nevojë të bëhet luftë.
Detanta është faza e tretë, ajo më e shpeshta, pasi shumica e krizave
nuk përfundojnë në luftë. Pra detanta është procesi i kalimit nga kriza në
paqe. Në këtë fazë, intensiteti i marrëdhënieve konfliktuale mes shteteve
7
zvogëlohet ndjeshëm. Shtetet në krizë normalisht përpiqen të arrijnë një
rregullim falë të cilit, në mënyrë progresive krijohej një ekuilibër i ri. Kjo fazë,
e cila ka një kohëzgjatje variabile, dallohet nga një zvogëlim i tepër i
dukshëm i rrezikut të konfrontimit ushtarak. Vendi i lihet normalizimit të
marrëdhënieve dhe detantës. Interesat themelore të shtetit nuk duken se
janë në rrezik të veçantë dhe lufta bëhet e pamundur. Faza e tensionit
ekstrem zëvendësohet nga një fazë e padiskutueshme detante. Frika nga një
ballafaqim ushtarak mes palëve kish qenë e tillë sa që ata premtuan të
bëjnë gjithçka për të evituar që të gjendeshin përsëri në buzë të greminës.
Shkaqet që favorizojnë detantën janë pak a shumë të kundërtat me
ato që ashpërsojnë krizën gjatë fazës së shkallëzimit: mosmarrëveshja ka
pak kohë që ka lindur dhe pak shtete janë përfshirë në të; këto shtete, ma
forca thuajse të njëjta, regjimet politike të të cilëve janë kryesisht
demokratike, i japin përparësi mjeteve jo të dhunshme në zgjidhjen e
krizave.
Faza e fundit e krizës, ndikimi (impact), është gjurma që lë ajo,
pasojat e saj kur çështja ka përfunduar. Marrëdhëniet mes palëve
protagoniste megjithëse të modifikuara, rifillojnë dhe drejtuesit konstatojnë
rikthimin e gjendjes para-krizës. Çdo krizë transformon marrëdhëniet mes
shteteve dhe çon në një ekuilibër të ri në gjirin e sistemit ndërkombëtar.
Kriza që përfundon me suksesin e njërës palë dhe me humbjen e tjetrës dhe
zgjidhet me një kompromis të dyshimtë ose përfundon pa rrugëdalje,
rrezikon të çoj në një ringjallje të tensioneve dhe të paqëndrueshmërisë.
Vetëm një përfundim harmonik që çon në një zgjidhje të kënaqshme të
krizës për të dy palët krijon kushte për marrëdhënie të bazuar në besim
reciprok dhe për pasojë edhe më të qëndrueshme.
Rrugëdalja nga kriza nuk është mënyra e vetme që ndikon mbi pasojat
e saj. Mirëkuptimi pak a shumë pozitiv i kundërshtarëve pas krizës
mbështetet edhe mbi karakteristikat e vetë krizës dhe të qëndrimit dhe
sjelljes së protagonistëve të saj. Krizat që kanë një ndikim destabilizues, janë
ato ku janë përfshirë disa pjesëmarrës, shpesh herë tepër të ndryshëm njëri
nga tjetri, ku pleksen shumë kërkesa, debate dhe kundërshtime, të cilat janë
8
administruar me mjete dhune, që kanë kohëzgjatje të madhe dhe që janë
zhvilluar në zona gjeografike veçanërisht të ndjeshme.
D. Tipet e ndryshme të krizave, origjina dhe shkaqet e tyre.
Tipet e mundshme të krizave janë të shumta. Disa studiues i klasifikojnë
sipas shkallës së intensitetit ose mënyrës së rrugëdaljeve të tyre, paqësore
ose luftarake, sipas rezes gjeografike të veprimit, botërore ose rajonale, ose
vetëm dypalëshe, të tjerë përpiqen t’i klasifikojnë sipas një rendi kronologjik,
duke i ndarë në kohë dhe hapësirë në raport me këtë periudhë të
jashtëzakonshme të shek. XX që është Lufta e Ftohtë. Në këtë mënyrë mund
të dallojmë tre tipe krizash në këtë shekull të trazuar dhe të shkurtër, siç
është quajtur me të drejtë nga historiani i njohur E. Hobsbawun i rrëmbyeri
shekulli i njëzetë.
1- kriza periferike të fillimit të shekullit. Ato quhen të tilla për arsye se
prekin interesat periferike të fuqive të ndryshme, të cilat nuk kanë
arsye themelore për të përdorin armët, pasi ato nuk prekin interesat e
tyre jetike;
2- krizat qendrore të Luftës së Ftohtë. Këto janë kriza të vazhdueshme
dhe gjenden në zemër të sistemit ndërkombëtar, kryesisht në Evropë
dhe veçanërisht rreth çështjes gjermane dhe qytetit të Berlinit, si
simbole të Luftës së Ftohtë. Në këtë rajon ku ballafaqohen dy blloqet
më të mëdha ushtarake të botës, u zhvilluan krizat kryesore dhe më të
rrezikshmet, megjithëse rrezja e tyre e veprimit shtrihej herë herë disa
qindra km më në veri ose jug, në Budapest, Pragë ose në Mesdhe.
3- krizat pas vitit 1990, që nuk janë më kriza qendrore për shkak të
mungesës së rivalitetit mes dy superfuqive. Somalia, Rwanda,
Kamboxhia janë kriza periferike, ndërsa krizat në ish-Jugosllavi ose ato
në Lindjen e Mesme dhe Korenë e Veriut, lidhen me probleme të
rëndësishme të organizimit ose të prishjes së raportit të forcave
brenda të sistemit ndërkombëtar aktual. Por ato kanë një ndryshim të
thelbësor me periudhën e Luftës së Ftohtë. Krizat aktuale tentojnë të
gjejnë zgjidhje jo më në ballafaqimin mes aleancave antagoniste që
sot nuk janë më, por në kuadrin e bashkëpunimit të pasuesve të tyre.
9
Klasifikimi i krizave sipas shkaqeve dhe origjinës së tyre është
relativisht më i thjeshtë. Nga njëra anë, dukuritë konfliktuale të vëzhguara
mund të jenë të befasishme ose në të kundërtën progresive, nga ana tjetër,
ato janë rastësore ose, në të kundërtën voluntariste.
Kriza progresive. Kriza klloçit për njëfarë kohe dhe në mënyrë
graduale, ajo shpërthen në momentin kulmor të një procesi të ingranuar e të
shkallëzuar tensioni mes dy kundërshtarëve. Megjithatë, kohëzgjatja e
inkubacionit të krizës sipas rasteve është shumë më e gjatë se disa ditë, ose
javë, si p.sh. kriza mes Izraelit nga njëra anë dhe Egjiptit e Sirisë nga ana
tjetër në qershor të vitit 1967, që rezultoi në “luftën e Gjashtë Ditëve”.
Shfrytëzimi progresiv i burimeve natyrore, zbatimi i teknologjive të reja,
popullsitë në rritje ose që emigrojnë, janë dukuri që ushtrojnë gradualisht
presione mbi sistemin ndërkombëtar ose mbi shtetet, deri në atë shkallë sa
bëhen shkak për kriza.
Si kriza potenciale, aktualisht figurojnë rastet e Koresë së Veriut dhe
Iranit. Përpjekjet e këtyre vendeve për tu pajisur me armatim atomik,
përbëjnë një shqetësim të madh për shoqërinë ndërkombëtare. Imigracioni i
hebrenjve në Palestinë gjatë gjysmës së parë të shek. XX është në një masë
të konsiderueshme origjina e mjaft krizave në Lindjen e Mesme që prej vitit
1947 e deri sot. Kjo tregon qartë rolin e mundshëm të migracionit
ndërkombëtar në shpërthimin e krizave. Katastrofat natyrore, si thatësirat e
mëdha për vite me radhë në Afrikë, të cilat shkaktuan në Somali në 1992 uri
dhe luftë civile, janë në orgjinë të një krize të gjatë dhe progresive.
Kriza të befasishme. Këto lloj krizash janë më të zakonshme dhe më
të shpeshta. Ato shkaktohen nga ngjarje të çastit dhe që zgjasin shumë pak,
por që parashikohen me vështirësi. Këto kriza përbëjnë një moment
dramatik në marrëdhëniet mes dy shteteve, në rastin kur një incident i
veçantë prish stabilitetin dhe ekuilibrin mes tyre. Për nga vetë natyra, këto
kriza të karakterizuara nga një surprizë thuajse e plotë, nuk mund t’i
parandalosh. Megjithatë, shtetari mund të përpiqet të përgatitet,
intelektualist dhe materialisht për një sprovë të tillë. Ngjarje të tilla si marrja
peng e diplomatëve amerikanë në Teheran (1979), bombardimi ajror Tripolit
(1986) nga aviacioni amerikan, masakrat ndëretnike në Rwanda (1990-
10
1991), përbëjnë shembuj ngjarjesh që ndodhin befas dhe që gjenerojnë kriza
në m-n.
Kriza voluntariste ose rastësore. Të bësh dallimin mes një krize
voluntariste ose të shkaktuar në mënyrë të ndërgjegjshme me një krizë të
rastësishme lidhet me faktin se në cilën anë vendoset vëzhguesi i tyre.
Shpërthimi i një krize është ngandonjëherë rezultat i politikave të
qëllimshme. Një shtet shpreson të marrë kështu nga një shtet tjetër
avantazhe ose përfitime, me qëllim që të përmirësoj pozitën ose sigurimin e
tij. Për një nga shtetet kriza është voluntariste, për tjetrin ajo është
rastësore. Rimilitarizimi i Rhenanisë (1936) dhe copëtimi i Çekosllovakisë
(1938) nga Hitleri, janë shembuj klasik të shpërthimit të krizave në mënyrë
të ndërgjegjshme, duke u bazuar në kalkulime paraprake për të dalë fitues
nga kriza ndërkombëtare. Një situatë e ngjashme përsëritet me rastin e
nacionalizimit të kanalit të Suezit nga koloneli Nasser (1956), ose kur serbët
e Bosnjës bombarduan Srebrenicën për të përzënë që andej myslimanët
(1995).
Pasojat e një krize të qëllimshme, sigurisht që nuk mund të jenë
doemos ato që shpresoheshin dhe rezultatet e parallogaritura nuk janë kurrë
të garantuar. Megjithë këtë, bota ka ecur në këtë shekull nga kriza në krizë.
Njohja dhe dijenitë rreth krizave të kaluara dhe se si ato janë vënë nën
kontroll dhe zgjidhur, përbëjnë kushte paraprake dhe mjaft të nevojshme për
një drejtim të mirë dhe efikas të shtetit.
Kriza, krahas rrugëve të tjera si bisedimet diplomatike, integrimi
ekonomik dhe politik, krijim i organizatave ndërkombëtare, ose madje edhe
lufta, është një mekanizëm i dobishëm për zhvillimin e sistemit
ndërkombëtar. Megjithatë, karakteri i saj i trazuar dhe shpërthyes e bën
krizën një mjet të vështirë për tu zotëruar dhe aspak i përshtatshëm për një
evolucion paqësor të marrëdhënieve ndërshtetërore. Kjo për arsye se
momenti kur shpërthen kriza është zakonisht i paparashikueshëm dhe
shtetarët gjenden të papërgatitur. Por ajo ndërkaq shfaqet si një katalizator i
fuqishëm i përcaktimit, vendosjes ose transformimit të raporteve të forcës
mes shteteve. Kjo është arsyeja që kriza përbën një mjet të privilegjuar të
11
përmirësimit të sistemit ndërkombëtar dhe si e tille ajo duhet konsideruar e
dobishme.
www.erletshaqe.com
12